1. Ika kụ edị odẹ raraạr igbo awe phọ aZihova siphẹ oḅẹl okuron asiạ phọ?

 TORỌ amem dị aZihova angọ we phọ odị oḍighi, odị rawạ ghan mọ omhaạr odẹ raraạr kụ oḍighi. (1 Kọr. 14:33) Esi omaạm, eḍighi ni ogbi Enhaạn ogbeelhom iiḅi iinhaghạn phọ olheenye oomo ade phọ. (Mat. 24:14) AZihova maḅọgh oḍighi phọ opọ phọ alọgh ḍighaạgh aZizọs. Kụ aZizọs alọgh ni ikuph omhiịn mọ omaạr ri odẹ raraạr kụ roḍighi oḍighi phọ ophọn phọ. Siphẹ oḅẹl okuron asiạ phọ, umiteom ni rookpomhoghan ibadị arikpisi, kụ omạ ikumor awe dị koḍiemhiom oḅilhẹ ooḅakị raraạr. (Iiḍ. 14:23) Abutelhedom mọ r’abunhọn ikumor awe urọl li Jeruselem dị ongọ ghan iiḅakiọm dị arookpomhoghan phọ odaphạn ghan. (Iiḍ. 15:2; 16:4) Loor iduọn abumor r’abumaranhi phọ odaphạn bọ iiḅakiọm mọ ongọ ghan bọ bidị, “bidị ukparamị ghan ni omeeraam abuọ asiosị phọ, kụ aḍita phọ eḍiza ghan aḍio etum ḍio.”—Iiḍ. 16:5.

2. Emhiigh 1919, ika kụ edị aZihova mangọ we phọ odị iiḅakiọm r’eḍien aruwaloor?

² AZihova akị ni ghisigh rodon raakpomhoghi ghan we phọ odị. Kạ 1919 kụ edị aZizọs asighẹ ebạm egu awe dị osagharạn uwaloor iigbia phọ raaḅakiọm oḍighi oghaạph iiḅi iinhaghạn phọ r’ongọ eḍien aruwaloor bumatuạn phọ odị. a (Luk 12:42) Ekạr kụ eganana mọ aZihova akạr kụ rasẹph oḍighi egu awe phọ abuẹn phọ.—Isa. 60:22; 65:13, 14.

3-4. (a) Kaạph idị omhaạr ghan odẹ araraạr mungọ iyira suọ. (b) Yira kooḅeghiọn eeghe siẹn emhuoghaạph phọ ephẹn phọ?

³ Mu/dẹ bọ raraạr eten phọ ephẹn phọ obọ yira mu/tue uḍighi  oḍighi phọ ophọn phọ aZizọs ungọ bọ iyira. (Mat. 28:19, 20) Esi omaạm, iikolhobian arokool arukumuan phọ kụ m’/ilo bọ; obọ torobọ oye mukị ghan torọ ekpisi lọ eḅeraạn nyodị kụ agbeelhom iiḅi iinhaghạn phọ. Ipẹ phọ miḍighi ghan idị mugbor ghan ogbeelhom iiḅi iinhaghạn phọ iniin arokool bịn owilhẹ ipheriphọ. Nạ aatughiạn ni inhọn areten dị omhaạr ghan odẹ araraạr mingọ iyira suọ?

⁴ Idiphọ aZizọs amhaạr ghan bọ adẹ raraạr mem mọ odị arọl bọ r’abutelhedom mọ odị kụ edị odị aghị ghisigh raḍighi kẹn ḍio arodon. Siẹn emhuoghaạph phọ ephẹn phọ, yira kooḅeghiọn eḍeenhaan phọ aZizọs aphighi bọ r’idị oḍighom mọ radaphạn eḍeenhaan phọ odị. Yira kooḅeghiọn kẹn idị yira kotue oḍeenhaan mọ yira osereghiạn ni oḍighom mọ aZihova.

OḌIGHOM MỌ RADAPHẠN GHAN EḌEENHAAN PHỌ AZIZỌS

5. Eghẹn kụ eniin eten dị yira kotue otuughaạny Zizọs? (Jọn 8:28)

⁵ AZizọs atuughạ ḍighaạgh Odẹ k’akẹ phọ odị iyaạr phọ odị kaḍighi bọ ḅilhẹ r’araraạr phọ odị kakaạph bọ. Oḍighom mọ aZihova radaphan ghan ni eḍeenhaan phọ aZizọs esi osighẹ ghan Ekpo Onhụ phọ Enhaạn oḍighinhom olhoghonhaạn ayira ḍighaạgh olhegheri araraạr dị enhighẹ r’idị i/nighẹ ḅilhẹ r’ongọ ghan ayira iiḅakiọm. (Bạl Jọn 8:28; 2 Tim. 3:16, 17) Ragbor ghan ni kuutughianhạm iyira aạl ghan r’osighẹ ghan oḍighinhom ikpo onhụ phọ Enhaạn. Eeghe asuọ kụ edị odaphạn itọ phọ iphẹn phọ ringọ ghan iyira?

6. Eghẹn kụ eniin ekpanhạ eten dị yira romooghọm ghan suọ mem dị yira otuughạ ghan Baibul phọ?

⁶ Yira romooghọm ghan ni suọ mem dị yira otuughạ Baibul phọ r’arinyạ ookpomhoghan phọ. Esi omaạm, yira rosighẹ ghan ipẹ aBaibul phọ atughemhị bọ kophoghom iiḅakiọm mọ oḍighom mọ rangọ ghan bọ. Mem dị yira omhiịn mọ usighẹ iiḅakiọm mọ siphẹ aBaibul phọ, rekparamhị ghan ni oḍuom olhoghi phọ ayira esi oḍighom mọ aZihova.—Rom. 12:2.

7. AZizọs agbeelhom ghan eeghe adom, ika kụ edị oḍighom mọ aZihova radaphạn eḍeenhaan phọ odị?

⁷ AZizọs agbeelhom “ooḅi oghaạph ilọ Omạr phọ k’Enaạn.” (Luk 4:43, 44) AZizọs atọ angọ bumatuạn phọ odị ogbeelhom aani ghan ilọ Omhạr phọ. (Luk 9:1, 2; 10:8, 9) Rodon oomo awe dị odi siẹn ookpomhoghan phọ aZihova rogbeelhom ghan dom Omhạr phọ etigheri ekpisi dị bidị orugh obobọ roopoogh dị bidị omhoọgh siẹn ookpomhoghan phọ.

8. Eeghe egbogh eepoogh kụ edị yira omhoọgh?

⁸ Eḍighi ni eboom eepoogh dị yira omhoọgh oghaạph ilọ Omhạr phọ oḅenhị abunhọn! K/oomo awe kụ umhoọgh eepoogh phọ ephẹn phọ. Esi omaạm, mem mọ aZizọs arọl bọ siẹn ade phọ, odị o/mheera mọ ikarạph aruwaloor phọ eghaạph ilọ odị eḅenhị we. (Luk 4:41) Rodon, oye kasi ni amanhanhaạm kụ agbi omhoọgh eepoogh oḍighan awe phọ aZihova ogbeelhom iiḅi iinhaghạn phọ. Ḍeenhaan mọ nạ asereghiạn ni eepoogh phọ ephẹn phọ esi osighẹ ghan atorobọ eepoogh dị nạ amhoọgh ogbeelhom iiḅi iinhaghạn phọ. Idiphọ aZizọs, aḍiigbu ayira pọ ozụph r’ooduom amuụm iizuphạ igey Omhạr phọ rokpom awe.—Mat. 13:3, 23; 1 Kọr. 3:6.

9. Ika kụ edị oḍighom mọ maḍighi idị awe moru olhegheri ḍien phọ Enhaạn?

⁹ AZizọs aḍighi idị awe olhegheri ḍien phọ Enhaạn. AZizọs aaḅereghị aḅenhị Odẹ phọ odị mọ: “Mị maḍighi ni dị bidị moIegheri ḍien phọ anạ.” (Jọn 17:26) Dị emhoọgh muḅọph r’eḍeenhaan phọ aZizọs, oḍighom mọ aZihova raḍighi ghan ni oomo ilọ katue olhoghonhaạn awe ḍighaạgh oru olhegheri aḍien phọ Enhaạn. ABaibul phọ New World Translation of the Holy Scriptures malhoghonhaạn ḍighaạgh  agey oḅulhemhi aḍien phọ Enhaạn riisi phọ ipẹ erọl bọ siphẹ okạr oḅẹl aBaibul phọ. Kụ mogbạ oomo obobọ pakirị aBaibul phọ New World Translation of the Holy Scriptures otenhe runhụ dị repel li 270. Pogh Appendix A4 r’A5 aBaibul phọ ophọn phọ, nạ kamiịn ni riphigh phọ otuạn bọ oḅulhemhi ḍien phọ Enhaạn riisi aBaibul phọ ipẹ phọ. Appendix C phọ odi bọ siphẹ aStudy Bible phọ, akaạph ni abughẹ ilọ ariphigh phọ aḍien phọ Enhaạn ekpẹ bọ omite 237 amem siphẹ Igẹ Iigbia AGrik phọ.

10. Nạ atuughạ eeghe esi ikpo onhụ anhịr olọ aMyanmar phọ?

¹⁰ Idiphọ aZizọs, yira rowạ ni olhoghonhaạn aḍighaạgh torobọ oye dị yira kotue oteẹny oru olhegheri aḍien phọ Enhaạn. Anhịr dị mamhạn 67 asiạ epẹ Myanmar azu ni izin mem mọ aru bọ alhegheri ḍien phọ Enhaạn, kụ aḅẹm mọ: “Ephẹn kụ eḅẹl amem siẹn aghuḍum mọ amhị dị mị manhaghạn ghan mọ aḍien Enhaạn okol mọ aZihova. . . . Nạ mutughemhị imhị iyaạr dị ekạr emhạn maạr dị ewạ mọ mị ulegheri.” Iduọn yira omhiịn bọ siẹn eḍeenhaan phọ, olhegheri aḍien Enhaạn ketue ni enyu we onme adọl aghuḍum abidị.

KIỌM GHISIGH AḌEENHAAN MỌ NẠ ASEREGHIẠN NI OḌIGHOM MỌ

11. Ika kụ edị ikumor awe phọ koḍeenhaan mọ bidị osereghiạn ni oḍighom mọ aZihova? (Miịn kẹn afoto phọ.)

¹¹ Eghẹn kụ eniin eten dị ikumor awe ookpomhoghan phọ kotue oḍeenhaan mọ bidị osereghiạn ni oḍighom mọ Enhaạn? Mem dị oḍighom mọ ongọ iiḅakiọm, rewạ ghan dị ikumor awe phọ komiigha loor obạl kụ oḍighi oomo ipẹ bidị kotue bọ orue odaphạn. Esi omaạm, rongọ ghan ni bidị iiḅakiọm ilọ ongọ araghaạph, ilọ ooḅereghị siphẹ ookpomhoghan phọ ḅilhẹ r’ilọ ophogh iyool phọ aKraist. Mem dị ikumor awe phọ osighẹ oḍighinhom iiḅakiọm mọ oḍighom mọ rangọ ghan bọ, abumor r’abumaranhi phọ rologhoma ghan ni ephomhoghiạn phọ ḅilhẹ r’ogbolhomaam mọ aZihova esi abidị.

12. (a) Uḍighi ika kụ ewạ bọ dị yira konaghanhạn ghan buphẹ roḍiemhiom bọ? (Hibru 13:7, 17) (b) Uḍighi ika kụ ewạ bọ mọ ogbon ghan imạ araagharạ abuphẹ roḍiemhiom bọ?

¹² Torọ amem dị ikumor awe phọ ongọ nyinhạ iiḅakiọm, kewạ ni mọ yira odaphạn. Mem dị yira oḍighi idiphọ phọ, kedughanhaan ikumor awe phọ oḍighi oḍighi phọ abidị. ABaibul phọ uromha iyira mọ onhaghanhạn ghan kụ oḅilhẹ osooromhi loor odaphạn buphẹ ruḍiemiom bọ iyira. (Bạl Hibru 13:7, 17.) Eeni amem ipẹ phọ etue ni eḍighi ipaanhaạn. Eeghe kụ iḍighi? Loor esi dị bidị u/munughan. Toroboiperolbọ, eḍighi maạr dị yira ogbon sipiomạn phọ abidị kparipẹ r’imạ araagharạ phọ abidị, pọ yira rologhonhaạn ghan ḍighaạgh bumulhọgh ḍien phọ ayira. Ika? Yira roḍighi ghan idị awe ko/ḍuom mun olhoghi oḍighom mọ aZihova, kụ epẹ kụ iyaạr phọ abumulhọgh ḍien phọ ayira rokparaghạ ghan bọ oḍighi phọ. Eeghe kụ edị yira kotue oḍighi orue olhọgh elhegh kụ oḅilhẹ oghel okpẹ kirokirọ abumulhọgh ḍien phọ?

KA/MEERA ABUNHỌN ODUGHE OḌUOM OLHOGHI PHỌ ANẠ ESI OḌIGHOM MỌ

13. Ika kụ edị abumulhọgh ḍien phọ Enhaạn mokparaghạ ophuẹ aḍien oḍighom mọ aZihova?

¹³ Abumulhọgh ḍien phọ Enhaạn rokparaghạ ghan oḍighi idị imạ araraạr phọ oḍighom mọ raḍighi bọ kekịgh mudị i/nighẹ. Esi omaạm, yira motuughạ siphẹ aBaibul phọ mọ aZihova rawạ dị abuphẹ rooḅereghị bọ nyodị koḅaạl eten iphulhupul, esi aroozọ, ḅilhẹ r’eten aruwaloor. Odị aḅẹm mọ ophorogh ghan oye dị aghị ghisigh raḍighi ghan ikarạph kụ u/meera ukiton. (1 Kọr. 5:11-13; 6:9, 10) Kụ loor odaphạn itọ aBaibul phọ ipẹ phọ, abuphẹ rusophoghom ghan bọ iyira roḅẹm ghan mọ yira  u/pomoghiạn we, mọ yira ro/loghomạ ghan we dị ogbatanhaạn r’ayira.

14. Anhiạn kụ azin ikarạph asiagbạ phọ rogbaaghiọm ghan bọ ookpomhoghan phọ?

¹⁴ Lọgh elhegh oye phọ akạr bọ rakọm izuoghom mọ. ASetan Eru phọ kụ azin oomo okpẹ kirokirọ phọ rogbaaghiọm bọ ookpomhoghan phọ. Odị kụ “odẹ oomo okpẹ.” (Jọn 8:44; Gen. 3:1-5) Kụ yira olegheri ni mọ odị kasighẹ ni we phọ robakị bọ nyodị aḍighinhom oraramhiọm okpẹ kirokirọ phọ odị ragbaaghiọm bọ oḍighom mọ aZihova. Iphẹn phọ imite ni siphẹ oḅẹl okuron asiạ phọ.

15. Eeghe kụ edị abuḍiemhiom aruukụ iiḅereghị phọ oḍighi Zizọs r’abumatuạn phọ odị?

¹⁵ Ghalhamọ r’iduọn oọny phọ Enhaạn, Zizọs, amhunhughan bọ ni ḅilhẹ aḍighi yogh iiḍaạny kirokirọ, bịn aSetan asighẹ ni we agbaaghiọm nyodị okpẹ. Esi omaạm, abuḍiemiom aruukụ iiḅereghị phọ uḅenhị ghan we mọ aZizọs “asighẹ iikpọ eru” kụ raporoghom bọ ikarạph aruwaloor phọ. (Mạk 3:22) Mem mọ abuọ eghạm mọ osiph bọ Zizọs, abuḍiemhiom aruukụ iiḅereghị phọ ukpaariọm ḍita phọ oghiigh aZizọs. (Mat. 27:20) Kụ onyebel roten, iduọn abudaphạm mọ aZizọs rogbeelhom bọ iiḅi iinhaghạn phọ, abuphẹ osophoghom ghan bọ bidị ughị ni ghisigh onyu buọ “emeera phọ owiiIiom onhụ ruuruen phọ” okpuuroghọm abidị. (Iiḍ. 14:2, 19) Idị egbolhomaam Iiḍighi 14:2, aWatchtower aDecember 1, 1998, abẹm mọ: “Osophoghom adom mọ bịn i/gbaanyạn bumulhọgh ḍien phọ, bidị uḅilhẹ ni oghaaphọgh ghan raraạr dị keḍighi idị awe kolọgh ḍien Kristẹn phọ oḅilhẹ okel dom mọ abidị.”

16. Eeghe kụ edị yira kootughiạn mem dị yira onhaghạn ikarạph asiagbạ?

¹⁶ Okpẹ k”ophẹr Setan. Rodọn, odị akị ni ghisigh raakelheghi “oomo aḅirini phọ.” (Ogan. 12:9) Nạ anhaghạn ikarạph asiagbạ ilọ  ookpomhoghan phọ obobọ ilọ abuphẹ roḍiemiom bọ, tuutughiạn ipẹ ozoọm bọ Zizọs r’abumatuạn phọ siphẹ oḅẹl okuron asiạ phọ. Rodon, rogbaaghiọm ni koḅilhẹ osophoghom we phọ aZihova idiphọ aBaibul phọ aghaạph bọ. (Mat. 5:11, 12) Okpẹ kirokirọ phọ iphẹn phọ iyira kuu/kelheghi eḍighi iyaạr dị yira olhegheri zin phọ kụ oogboronhom oḍighi iyaạr omiteom. Eeghe kụ edị ewạ mọ oḍighi?

17. Ika kụ edị yira kotue okel ikarạph asiagbạ? (2 Timoti 1:13) (Miịn igbe phọ “ Ilọ Oḍighi Mem Dị Nạ Anhaghạn Ikarạph Asiagbạ.”)

¹⁷ Kel ikarạph asiagbạ. Otelhedom mọ aPọl angọ ni oromha ilọ oḍighi mem dị yira onhaghạn ikarạph asiagbạ. Odị aḅenhị Timoti mọ aḅenhị buọ ookpomhoghan phọ mọ “bidị . . . owilẹ sidum.” (1 Tim. 1:3, 4; 4:7) Ii, obumoọny atue ni asighẹ iyaạr ude bịn alọgh onhụ, kuolọ okumor oye dị malhegheri iyaạr ka/ḍighi ipẹ phọ. Yira rokel ghan sidum dị i/tu inẹ loor iduọn yira olhegheri bọ zin okpẹ phọ. Yira ropamanhạm ghan ghụn “ikpo onhụ” igey phọ.—Bạl 2 Timoti 1:13.

18. Ika kụ edị nạ katue aḍeenhaan mọ nạ asereghiạn ni oḍighom mọ aZihova?

¹⁸ Yira mooḅeghiọn iraạr areten dị oḍighom mọ aZihova rotuughaạny ghan Zizọs. Iduọn nạ ratuughạ bọ Baibul phọ, kparaghạ olhọgh elhegh inhọn areten dị oḍighom mọ radaphạn eḍeenhaan phọ aZizọs. Loghonhaạn ḍighaạgh bunhọn siphẹ ookpomhoghan phọ anyinha okparamhị oḍuomolhoghi phọ abidị esi oḍighom mọ aZihova. Kụ aghiọm ghisigh aḍeenhaan ghan osereghiạn phọ anạ esi oḅạr aZihova r’ookpomhoghan phọ odị asighẹ bọ raḍighinhom omhunhenhi ogbi phọ odị. (Ps. 37:28) Kiọm ghisigh asereghiạn ghan eepoogh phọ nạ amhoọgh bọ oḍighi aani apakirị ookpomhoghan awe phọ aZihova.