EMHUOGHAẠPH ITUUGHẠ PHỌ 33
“Buphẹ Ronaghanạn Ghan Bọ Nyinạ” Komoọgh Ni Pelieẹny
“Maạr agona loor phọ anạ r’ipẹ nạ ratughemị bọ. Ḍighi ghan ni iphẹn phọ. Nạ aḍighi ghan ni iphẹn phọ, pọ nạ kapẹl Ii Ioor phọ anạ r’abuphẹ ronaghanạn ghan bọ nyinạ.”—1 TIM. 4:16.
AḌUỌR PHỌ 67 “Preach the Word”
OGHAẠPH OOKARAGH *
1. Eeghe eephuạ kụ edị yira omhooghonhaạn buọ asiya phọ ayira?
“EMHIIGH k’amem mọ mị alhegheri bọ igey phọ, mị uwạ ghan ni dị torobọ oye siphẹ eghun-otu phọ amhị katọl aani r’amhị siphẹ paradais,” ipẹ kụ idị umarani dị oghol mọ Pauline aḅẹm. * “Mị ukạr ghan awạ dị olom amhị Wayne, r’oọny ayoor kudạph imhị okumu aZihova.” Nạ amoọgh ni onyọ asiya dị ko/lhegheri ḅilhẹ ophomoghiạn aZihova ḍughụm? Eeni nạ raloghoma aani ghan ni eniin phọ eten phọ aPauline alhoghoma bọ.
2. Ighẹn asipuru kụ edị yira kooḅeghiọn siẹn emhuoghaạph phọ ephẹn phọ?
2 Yira ko/tue okpaariọm buọ asiya ayira onhaghạn iiḅi iinhaghạn phọ, kuolọ yira kotue ni ologhonhaạn bidị ḍighaạgh oghunyon arokpom r’ilhoghi abidị onhaghạn adom aBaibul phọ. (2 Tim. 3:14, 15) Uḍighi ika kụ ewạ bọ ni ongọ ghan ogbaanhaạn buọ asiya phọ ayira? Eeghe kụ iḍighi kụ ewạ bọ dị yira kokparaghạ ghan onaghanhạn ipẹ bidị olhoghoma bọ? Yira koḍighi ika kụ otue ologhonhaạn ḍighaạgh buọ asiya phọ ayira ophomhoghiạn aZihova? Ḅilhẹ ika kụ idị abumor r’abumarani ookpomhoghan phọ kotue ologhonhaạn ḍighaạgh?
UḌIGHI IKA KỤ EWẠ BỌ NI ONGỌ GHAN OGBAANHAẠN BUỌ ASIYA PHỌ AYIRA?
3. Odaphạn 2 Pita 3:9, uḍighi ika kụ ewạ bọ ni dị yira kongọ ogbaanhaạn buọ asiya ayira?
3 Esi eẹny ekulha amem bịn, aZihova kasiemhi ni eekunha aḅirinhi phọ ophọn. Ogina “abuphẹ [Enhaạn] mesaḅạr bọ omoọgh aghuḍum k’agee-pọ phọ” kụ kokpetenhaan. (Iiḍighi 13:48) Yira rolọgh ghan ni muboom amem r’inyaạm oghaạph oḅenhị abunhọn siphẹ emhạ phọ ayira, kụ iḍighi kụ eḍighi ni eseeriom dị yira kowạ mọ asiya ayira udạph aani iyira okumu aZihova. Odẹ ephomhoghiạn phọ ayira, Zihova, “o/wạ ophiemi r’oniin oye, odị rawạ ghan ghụn mọ oomo phọ awe phọ okiton esi ikarạph phọ abidị.”—Bạl 2 Pita 3:9.
4. Eeghe odọ opiomạn kụ edị eeni yira ropiomạn ghan mem dị yira rongọ ogbaanhaạn buọ asiya phọ ayira?
4 Ewạ ni dị yira kolegheri mọ eten edi ni dị ekpẹ ḅilhẹ r’idị i/kpẹ osighẹ oghaaphọm adom apelieẹny phọ. Esi omaạm, mem dị yira rokaaphạn ruuruen yira roḍighinhom ghan ni magheel, kuolọ mem dị yira rokaaphạn buọ asiya ayira, yira rokaạph ghan bịn onyen eten.
5. Ewạ mọ yira ootughiạn ghan eeghe mem dị yira rokaạph igey phọ koḅenhị buọ asiya ayira?
5 Mem dị yira ootughiạn eḅẹl eten phọ epẹ yira omhiighom bọ ongọ ogbaanhaạn buọ asiya phọ ayira, eeni yira otue ni ologhoma saị. Otelhedom mọ aPọl aroma Kristẹn mọ: “Oghaạph phọ anyina adụgh ghan aḅilẹ aroor weye! IIegheri idị ekpẹ ghan ophagharanaạn atorobọ oye.” (Kọl. 4:5, 6) Enighẹ ni dị yira kootughiạn ghan oroma phọ ophọn phọ mem dị yira rokaaphạn r’abuọ asiya phọ ayira. Obọ yira kokaạph ghan bọ eten dị keporogh bidị ekelẹ kparipẹ r’olhoghonhaạn abidị ḍighaạgh onhaghạn adom mọ.
YIRA KOḌIGHI IKA KỤ OTUE OLOGHONHAẠN ḌIGHAẠGH BUỌ ASIYA AYIRA?
Onhaghanhạn ghan ipẹ bidị olhoghoma bọ r’ezọ phọ anạ ketue ni engọ oboom ogbaanhaạn (Miịn siikpịgh phọ 6-8) *
6-7. Ngọ eḍeenhaan dị emạ emiteom iyaạr phọ ewạ bọ oḍeenhaan ghan olhoghoma oghị esi olom obobọ anhịr dị ko/mhiigh aani okumu aZihova.
6 Ḍeenhaan ghan olhoghoma. APauline, oghaạph bọ oghol epẹ omhạn, aḅẹm mọ: “Eḅẹl amem mọ mị ughaaphạn ghan olom amhị ilọ Enhaạn r’aBaibul phọ bịn. Yoor u/kaạph ghan ilọ ‘inhọn’ araraạr.” Kuarị, olom mọ aPauline, aWayne, o/kạr ghan olhegheri ilọ aBaibul phọ ḅilhẹ o/nhaghanhạn ghan ipẹ aPauline rakaạph bọ. Esi odị, ighịgh mudị oomo idị anhịr phọ odị raatughiạn ghan, pọ ilọ ekụ iiḅereghị phọ odị bịn. Odị aaḅaghamhiạn ghan loor mọ eeni mookelheghi anhịr phọ rolọgh ekarạph ekụ.
7 APauline amheeraam ni mọ onọ agbor ghan arolhạn bumor r’abumarani phọ ḍughul r’eekunha awiki phọ—epẹ otu ituughạ phọ, epẹ erugh phọ, ḅilhẹ r’amem ooḅughonhaan. APauline aḅẹm mọ “Eeni amem lọ aWayne arigheel oḍighi oye o/mhiịn ghan, kụ alhoghoma ghan igini.” Ogbạ agey, inyaam anhịr phọ r’obumoọny phọ isiph ghan ni Wayne. Odị o/lhegheri odọ awe phọ r’abidị rooḍikuan ghan bọ, esi iduọn phọ ighịgh esi odị mudị abumoom arighirị phọ kụ umhạn maạr esi anhịr phọ opu nyodị. AWayne anyạ ni kụ aḅẹm mọ onọ kaseere aPauline. Nạ amiịn ni reten dị aPauline mutue arọph amhiịn ipẹ olom mọ odị alhoghoma bọ ḍughụm?
8. Odaphạn 1 Pita 3:1, 2, eeghe kụ rekạr ghan ketir buọ asiya phọ ayira?
8 Ezọ phọ anạ kụ eghaaphanhaạn nyinhạ. Ibadị amem, ipẹ yira rozọ ghan bọ kụ retir ghan buọ asiya phọ ayira kepu ipẹ yira rokaạph bọ. (Bạl 1 Pita 3:1, 2.) Eekunha phọ, aPauline alhọgh ni elhegh iphẹn phọ. Odị aḅẹm mọ. “Mị ulhegheri ni mọ aWayne uphomoghiạn ni iyoor kụ o/wạ oseere amhị. Kuolọ iduọn odị upaạr bọ imhị iḍighi idị mị alhoghoma mọ ewạ dị mị kaḍighi raraạr eten phọ epẹ eḅeeraạn bọ aZihova. Kparipẹ r’oboom oghaạph, ewạ dị mị kaḍeenhaan imạ aroozọ.” APauline awilhẹ ni okpaariọm ghan olom mọ odị ilọ araghaạph aBaibul, bịn amhiigh oghaạph aani ghan inhọn odọ araghaạph. AWayne amhiịn ni mọ anhịr phọ m’anmia, ḅilhẹ oọny phọ odị asooromhi loor. (Prov. 31:18, 27, 28) Mem dị aWayne amhiịn bọ imạ idị adom aBaibul phọ m’enme eghun-otu phọ odị, odị amheera ni otuughạ Ekpo Onhụ ph’Enhaạn.—1 Kọr. 7:12-14, 16.
9. Eeghe kụ iḍighi kụ yira kokiọm bọ ni ghisigh okparaghạ ghan olhoghonhaạn aḍighaạgh buọ asiya ayira?
9 Kiọm ghisigh akparaghạ ghan olhoghonhaạn aḍighaạgh buọ asiya ph’anạ. AZihova apighi ni imạ eḍeenhaan ungọ iyira. “Mem etum mem” odị rangọ ghan ni we eepoogh onhaghạn iiḅi iinhaghạn phọ omhoọgh aghuḍum. (Jer. 44:4) Ḅilhẹ otelhedom mọ aPọl aḅenhị Timoti oghiọm aghisigh olhoghonhaạn aḍighaạgh bunhọn. Eeghe kụ iḍighi? Loor esi dị, esi oḍighi ghan iphẹn phọ odị kapẹl loor odị r’abuphẹ ronaghanhạn bọ nyodị. (1 Tim. 4:16) Yira opomoghiạn ni buọ asiya phọ ayira, pọ kụ iyaạr phọ yira rowạ ghan bọ dị bidị kolegheri aani igey phọ edi bọ siphẹ Ekpo onhụ phọ Enhaạn. Ikpo onhụ r’aroozọ phọ aPauline imhoọgh ni imạ etirom eghị esi eghun otu phọ odị idiphọ amem rekị bọ. Nyiidiphọ odị amoọgh ni oḅaạl olhoghi loor esi dị olom mọ odị r’odị moḅọph rokumu aZihova. Iyạl phọ abidị oḍighi bukọy eten, ḅilhẹ aWayne maḍighi okumor oye ookpomhoghan.
10. Eeghe kụ iḍighi kụ ewạ bọ omhoọgh okparạm?
10 Moọgh okparạm. Mem dị yira osopha orọl idị eḅeeraạn Enhaạn, rekparanhaạn ghan ni buọ asiya phọ ayira onhaghanhạn omhoom omheeraam mọ r’adọl aghuḍum mọ ayira. Ibadị amem, bidị ropụr ghan komiịn mọ yira ro/ḍighan ghan mun bidị olheeghi arayaạl ḅilhẹ r’imirighan itooghị. Ibadị abuọ asiya ayira otue ni ughaghạm iyira olhoghi eḅẹl amem mọ. (Mat. 10:35, 36) Kuolọ yira ku/ḅonyonhu uzuan. Eḍighi maạr dị yira owilhẹ olhoghonhaạn abidị ḍighaạgh onhaghanhạn omheeraam mọ ayira, pọ yira mosoph ooruẹn ongọ bidị idiphọ awe dị u/kpeanhaạn omhoọgh aani aghuḍum k’agee-pọ. AZihova iyira u/ngọ oḍighi oogbonhaan awe iiruẹn—odị angọ oḍighi phọ opọ phọ Zizọs. (Jọn 5:22) Yira omhoọgh okparạm, eeni esighẹ rekị abuọ asiya phọ ayira konaghạn ni dom mọ ayira.—Miịn igbe phọ “ Sighẹ Osoph Intanẹt Phọ Ayira Atughemhiọm Ghan.”
11-13. Nạ atuughạ eeghe esi ipẹ Alice azoọm bọ odẹ r’onhiin phọ odị?
11 Miigha loor kuolọ ka/nme osopha phọ anạ. (Prov. 15:2) Ooḅeghiọn eḍeenhaan onyọ umarani dị oghol mọ Alice. Odị atuughạ igey phọ mem dị odị u/tọl ghan r’odẹ r’onhiin odị, oḍighi bọ we dị u/meeraam Enhaạn ḅilhẹ oḍighi buọ imirighan itooghị. Odị amhiịn ni mọ ewạ onhuụn oḅenhị abidị ilọ imạ araraạr phọ odị ratuughạ bọ. Alice aḅẹm mọ:“Eḍighi maạr dị n’aabinyemiom oḅenhị abuọ eghunotu phọ anạ ilọ omheeraam r’iḍighonhom araraạr phọ anạ, pọ keḍighi ni ekperenom esi abidị.” Odị agẹ ni rinyạ aghiomaạn odẹ r’onhiin odị, apuru ghan ḍiitughiạn abidị ilọ itughemhị aBaibul dị eḅeeraạn bidị, idiphọ ephomhoghiạn. (1 Kọr. 13:1-13) Odị asẹph ni odẹ r’onhiin phọ odị ookonhom bọ oḅilhẹ omhaạr ophạm nyodị, ḅilhẹ asighẹ raraạr aghiomaạn bidị. Torobọ amem lọ odị aghị ophogh abidị, odị alhoghonhaạn ghan ni ḍighaạgh onhiin phọ oḍighi yogh araraạr siphẹ olhoghotu phọ. Eḅẹl amem mọ Alice aḅenhị bọ odẹ r’onhiin phọ odị ilọ omheeraam mọ odị, olhoghi abidị o/ḅaạl.
12 Mem mọ Alice arọl bọ k’odẹ r’onhiin phọ odị, odị o/wilhẹ ghan aạl aBaibul phọ ḍio ḍio ḍio. Alice aḅẹm mọ: “Iphẹn phọ iḍighi idị onhiin amhị amhiịn idị aBaibul phọ amhạn maạr esi amhị.” Eniin phọ amem mọ, odẹ Alice asopha aạl aani aBaibul phọ omhiịn iyaạr phọ eḍighi bọ kụ onyanhị phọ odị anme bọ iitughiạn phọ odị, ḅilhẹ r’owaaghị ariisi dị aBaibul phọ asughanham. Alice aḅẹm mọ, “Mị ungọ ni nyodị Baibul, kụ mị agẹ ḍinyạ aḅarạm.” Ikọm eeghe kụ emiteom? Kparipẹ romhiịn ariisi dị aBaibul phọ asughanham, ipẹ odị aạl bọ siphẹ aBaibul phọ ikạr kụ etir odẹ phọ Alice.
13 Ewạ mọ omiigha loor kuolọ ku/nme osopha phọ ayira, ghalhamọ iḍighi ni idị yira kosoman igbiphoghọm. (1 Kọr. 4:12b) Esi omaạm, Alice asoman ni igbiphoghọm ḍighaạgh onhiin odị. Alice aḅẹm mọ: “Mem mọ mị aḍiiny bọ muụm mọ, Onhiin umhạgh imhị mọ ‘okarạph onyanhị.’ ” Alice amhegheron ika? Odị aḅẹm mọ, “Kparipẹ rophogh bịn oḅoorian, r’olhọgh eegu mị umhiigha ni loor aḅenhị nyodị mọ mị masopha oḍighi onyọ Ogbaanhaạn AZihova, kụ mị ka/nme osopha phọ amhị. Mị ukparaghạ ni oḍeenhaan onhiin amhị mọ mị akạr ri apomoghiạn nyodị. Esi iduọn phọ, izin iyạl ayoor ighạr ri, kụ mị asaanhaạn nyodị eḍien dị edụgh iikiạ. Emhiigh k’amem mọ amuphẹ phọ kụ rekị, onhiin phọ amhị aru ni amhiịn mọ aBaibul phọ munme imhị aḍighi ogey oye.”
14. Eeghe kụ iḍighi kụ i/wạ bọ dị yira komeel oḍighanhaan inyuughiom okạ osopha phọ ayira?
14 Etue ni esighẹ mem kụ abuọ asiya phọ ayira ogbi okạr omhiịn idị okumu aZihova amhạn maạr esi ayira. Esi omaạm, mem dị Alice asopha okọy eten kparipẹ rophorogh aḍiigbu dị odẹ phọ r’onhiin phọ oghooronaạn, onhiin phọ odị aḅilhẹ ni amhiigh emoghi. Kuolọ Alice o/nme osopha phọ odị. Alice aḅẹm mọ: “Nạ amheera mọ eghun otu phọ anạ onme osopha anạ ilọ eniin iyaạr, bidị kowạ kẹn ni onme ghan osopha anạ ilọ inhọn araraạr. Kuolọ eḍighi maạr dị nạ amhiigha loor aghaạph ilọ omheeraam mọ anạ aḅenhị bidị k’u/nme osopha phọ anạ, abuniin siphẹ olhoghotu phọ otue ni onhaghanhạn nyinhạ.” Ipẹ kụ idị emitenhaan Alice. Iduọn rokaạph bọ, odẹ r’onhiin phọ odị moḍighi aani bukọy eten, ḅilhẹ odẹ phọ aḍighi okumor oye ookpomhoghan.
IKA KỤ IDỊ ABUMOR R’ABUMARANI OOKPOMHOGHAN PHỌ KOTUE OLOGHONHAẠN ḌIGHAẠGH?
Ika kụ idị ookpomoghan phọ kotue ologhonhaạn aani ḍighaạgh buọ asiya phọ ayira ro/tu aani ghan bọ ituughạ phọ? (Miịn siikpịgh phọ 15-16) *
15. Odaphạn Matiu 5:14-16 r’1 Pita 2:12, ika kụ idị “iiḅi iiḍighi” abunhọn keloghonhaạn ḍighaạgh buọ asiya phọ ayira?
15 AZihova raḍur ghan we kaloghomạ dị eego esi “iiḅi iiḍighi” arebenhẹ phọ odị. (Bạl Matiu 5:14-16; 1 Pita 2:12.) Eḍighi maạr dị olom obobọ anhịr anạ u/ḍighi aani onyọ Ogbaanhaạn AZihova, odị mazuan ghan ni buọ ookpomhoghan anyinha ḍughụm? APauline, oghaạph bọ oghol epẹ omhạn, amhạgh ni bumor r’abumarani oru k’abidị obọ olom mọ odị aWayne, alegheri aani bidị. AWayne aghaạph ni idị oniin onyọ umor alhoghonhaạn nyodị ḍighaạgh onhaghanhạn odọ awe phọ aBugbaanhaạn phọ oru bọ, aḅẹm mọ: “Odị asighẹ ophooghian otu oḍighi emhụ aḍio, kụ aru dị yoor kopogh bọl. Mị uutughiạn mọ, ‘Odị aru omhoore r’amhị bịn!’ ”
16. Eeghe kụ iḍighi kụ ewạ bọ ni mọ yira omhạgh aani ghan buọ asiya ayira oru aani ghan ituughạ?
16 Eniin imạ eten olhoghonhaạn aḍighaạgh buọ asiya phọ ayira, pọ omhạgh aani abidị oru ituughạ. (1 Kọr. 14:24, 25) Eḅẹl amem dị aWayne aghị ituughạ—iḍighi aMemorial—loor esi dị iḍighi mem dị morighelheghu iiḍighi, ḅilhẹ aMemorial phọ ra/bia ghan bọ. Odị aḅẹm mọ: “Mị u/kạr unaghanhạn oghaạph phọ, kuolọ mị u/bulha we phọ mị azuan bọ siphẹ phọ. Bidị uru ni ungọ imhị ḍighaạgh, uḅenhị imhị mọ, nạ masi. Ogbạ agey, bidị okạr kụ oḍighi bugey awe.” Oniin olom r’ anhịr urọl li dị okạr ghan oḍeenhaan ephomoghiạn oghị esi aPauline r’oọny phọ odị, olhoghonhaạn ghan ḍighaạgh mem dị oghị ituughạ r’epẹ erugh phọ. Kụ iḍighi kụ mem mọ aWayne asopha bọ okuamhị olhegheri ilọ omheeraam mọ aPauline, aḅenhị olom mọ, mọ aghị ghan atughemhị nyinhọ Baibul phọ.
17. Eeghe kụ idị i/wạ mọ otuạn okpalạm siloor ayira, kụ eeghe kụ iḍighi kụ i/wạ bọ dị ki/phẹr iyira olhoghonhaạn aḍighaạgh buọ eghunotu phọ ayira?
17 Yira oḍuom ni olhoghi mọ oomo asiya phọ ayira kudạph ni iyira okumu aZihova. Toroboiperolbọ, etigheri oomo ikuph phọ yira olhọgh bọ olhoghonhaạn abidị ḍighaạgh dị bidị kokumu Enhaạn, eeni bidị ko/meera onaghạn igey phọ. Eḍighi iduọn phọ pọ yira ku/kpalạm siloor ayira ilọ osopha phọ abidị. Idị eḍighi bọ, yira ko/tue okpaariọm oye mọ amheeraam aani ipẹ yira omheeraam bọ. Ghalhamọ r’iduọn phọ ni, mem dị abuọ eghunotu phọ anạ omhiịn odọ oḅaạl olhoghi dị nạ amhoọgh esi iduọn nạ rakumu bọ aZihova, etue ni eloghonhaạn bidị ḍighaạgh okumu aZihova. Ḅeeḅereghinaạn ghan bidị. Kaaphạn ghan bidị eten amagheel. Ki/phẹr nyinhạ olhoghonhaạn ghan abidị ḍighaạgh! (Iiḍighi 20:20) Ḍuom olhoghi mọ aZihova kasẹph ni ikuph phọ nạ alhọgh bọ. Eḍighi maạr dị abuọ asiya anạ onhaghanhạn ni nyinhạ, pọ bidị komoọgh ni pelieẹny!
AḌUỌR PHỌ 57 Preaching to All Sorts of People
^ par. 5 Kiḅeeraạn ni iyira dị asiya ayira kolegheri aani aZihova, kuolọ bidị kụ kosopha mughumọ bidị kokumu ni nyodị obobọ ko/kumu. Emhuoghaạph phọ ephẹn kekaạph ipẹ yira koḍighi bọ kụ kedughanhaan siya phọ ayira onhaghanhạn ayira.
^ par. 1 Iniin asiḍien phọ oḍighinhom bọ siẹn phọ monmeeghi. Siẹn emhuoghaạph phọ ephẹn phọ, ekpo onhụ phọ “buọ asiya” remạ ghan buọ eghun-otu ayira dị ko/mhiigh okumu aani aZihova.
^ par. 53 ILỌ AFOTO: Onyọ iḍoọgh raloghonhaạn ghan ḍighaạgh odẹ odị dị u/ḍighi aani onyọ Ogbaanhaạn oselemi amoto abidị. Mem dị eepoogh emite, odị amiteom vidio siphẹ jw.org® raḍeenhaan ghan.
^ par. 55 ILỌ AFOTO: Onyọ umarani amaạr aler rurụ ranaghanhạn ghan olom odị dị u/ḍighi aani onyọ Ogbaanhaạn dị rakaạph ghan ipẹ aḍio phọ eghị bọ. Ipẹ reten kụ bidị oḅophoghạn ropegh ephegh ozaamiạn aloor.
^ par. 57 ILỌ AFOTO: Onyọ umarani phọ mamhạgh buniin abuọ ookpomhoghan phọ otu k’abidị. Abumor phọ oḍeenhaan ḍiḅeeraạn esi okạr olhegheri ilọ olom onyọ umarani phọ. Ipẹ reten, olom mọ madạph anhịr phọ odị akị aani aMemorial phọ.
