Asipuru Dị Abuẹn Robạl Ghan Bọ Rinyạ Phọ Ayira Opuru
Ika kụ edị emhuoghaạph phọ “Eegu Erolonaạn Ḍien Phọ Anạ” edi bọ Otu Okoriom aJune 2020 eegholhomhi onhaghạn aḍughụm mọ ayira ilọ aḍien phọ ḅilhẹ r’elhiom itooghị phọ aZihova?
Siphẹ emhuoghaạph phọ epẹ phọ, yira utuughạ mọ eniin ephigh oghaạph dị esoman ruukpaạny phọ r’omhạr awe pọ: oḅaalhamhị aḍigbogh aḍien phọ aZihova. Oghaạph elhiom itooghị phọ aZihova—iduọn phọ pọ eten itooghị phọ aZihova kụ inhighẹ epelheghiom—eḍighi pakirị oghaạph oḅaalhamhị aḍien phọ aZihova. Ḅilhẹ kẹn, mughumọ oye katọl dọl aruukuan obobọ ka/tọl eḍighi aani kẹn pakirị ogbogh oghaạph oḅaalhamhị aḍien phọ aZihova.
Uḍighi ika kụ yira rokaạph bọ nyiidiphọ kolhọgh iiphaghamiọm ilọ aḍien phọ aZihova ḅilhẹ r’ilọ ophạm oḅaalhamhị? Ooḅeghiọn iraạr ariphigh.
K’amem igbagharạn phọ k’arodon kụ edị aSetan ragbaaghiọm ghan ikarạph asiagbạ ḍien phọ aZihova
Eḅẹl phọ, aSetan magbaaghiọm ḍien aZihova, obobọ oye phọ odị aru bọ, siphẹ oghoony phọ Iden. Aḍipuru phọ aSetan apuru bọ Iv imạ ghan mọ aZihova o/ḍighi Enhaạn inmo ḅilhẹ mọ odị rasiphigha ghan Adạm r’Iv. ASetan aghị ghisigh agbạgh ikpo onhụ phọ aZihova, bịn aghol Enhaạn ogbaạm okpẹ. Odị agbaaghị ophuẹ aḍien phọ aZihova. Bịn odị aḍighi “Eru,” obobọ “ogbaạm okpẹ.” (Jọn 8:44) Loor iduọn Iv amheeraam bọ okpẹ phọ aSetan, odị aghị ni ghisigh aḅaạr emhụ aghị esi Enhaạn, bịn aḍeenhaan mọ odị o/wạ dị Enhaạn katooghị angọ nyodị. (Gen. 3:1-6) K’arodon, aSetan akị ni ghisigh ragbaaghị ghan okpẹ ilọ odọ oye phọ aZihova aru bọ. Awe dị omheeraam okpẹ kirokirọ phọ odị roḅaạr ghan emhụ k’oghị esi aZihova. Kụ iḍighi kụ, arebenhẹ aZihova omiịn mọ iyaạr dị eeph eeleeny ogbaaghiọm ophuẹ aḍien phọ Enhaạn i/lo. Epẹ kụ ekpanhạ iyaạr phọ ekọm bọ imhinhimhiịn phọ ayira ḅilhẹ r’asipioghọm mọ edi bọ siẹn aḅirinhi phọ.
Omhunhenhiom iyạl, aZihova kaḅaalhamhị ni ḍien phọ odị, kụ aḅilhẹ agbuurogh oomo eenịr phọ mobiphoghọm bọ, obọ engọ suọ oomo olhẹm mọ odị. Ephẹn phọ kụ iyaạr dị emhạn maạr epelheghiom esi aZihova. Pọ kụ iyaạr phọ odị aḅẹm bọ mọ: “Mị kakạr kụ aḅaalhamhị ḍigbogh aḍien phọ amhị.” (Ezek. 36:23) AZizọs amạ ni amiteom mọ iphẹn phọ kụ ikpẹ oḍighi iyaạr dị emhạn maạr epelheghiom esi iiḅereghị atorobọ ebenhẹ aZihova, mem mọ odị aḅẹm bọ mọ: “Eegu eroIonaạn ḍien phọ anạ.” (Mat. 6:9) ABaibul phọ akaạph ni alọgh iiphaghamiọm ibadị ariisi iyaạr phọ emhạn bọ maạr oghuenhi ghan aḍien phọ aZihova. Ooḅeghiọn iniin areḍeenhaan: “Iboom ḍien eegu phọ aZihova.” (1 Chron. 16:29; Ps. 96:8) “Imoọr eghueniom ḍien igbogh phọ odị.” (Ps. 66:2) “Mị kagbeelhom ḍien igbogh phọ anạ k’agee-pọ.” (Ps. 86:12) Eniin amem dị aZihova aḅạ k’epẹ k’akẹ kụ emitẹ siphẹ otu iiḅereghị phọ epẹ Jeruselem, aZizọs alhọm ni mọ: “Odẹ, kueni ni ḍien phọ anạ.” AZihova aphagharanhaạn mọ: “Mị maghueni ni ḍien phọ amị kụ mị kaḅiIẹ kẹn ni akueni.”—Jọn 12:28. a
Omhunhenhiom iraạr, arigbiom mọ aZihova ekomọm ḍien phọ odị, obobọ oye phọ odị aru bọ. Gbiom olhoghi anạ: Aruukpaạny phọ ḅilhẹ r’omhạr awe kologhoma ika ilọ aḍien phọ aZihova, mem eekunha owaaghị ophogh phọ asughanham bọ omhạn phọ kadaphạn bọ Itooghị Oniin Oonịr Asiạ Phọ AKraist? Orue ophagharanhaạn aḍipuru phọ aḍiphẹ phọ, ooḅeghiọn iyạl ikpanhạ araraạr phọ eḍighom bọ siphẹ oghaạph oḅaalhamhị aḍien phọ Enhaạn—ophamhanhạm adọl aruukuan ḅilhẹ r’oye dị amhoọgh elhiom otooghị. Mem mọ amuphẹ phọ, awe koḅilhẹ ghan ni okị ghisigh osoman odẹgh ophogh orọl adọl aruukuan ḍughụm? Eeye. Bidị koḍighi we dị momhunhughan okuạ phaghaphaghạ. Mem mo amuphẹ phọ, bidị momhoọgh ghuḍum k’agee-pọ. Oghaạph ilọ oye dị amhoọgh elhiom otooghị keḅilhẹ ni eḍighi okpanhạ oghaạph dị katọl igbo aruukpaạny ḅilhẹ r’omhạr awe ḍughụm? Eeye. Mem mọ amuphẹ phọ, oomo abulọ odi k’akẹ r’isiẹn ade phọ moḅophoghạn omeeraam mọ aZihova kụ amhoọgh elhiom otooghị. Kokaạph ika ilọ aḍien phọ aZihova?
Mem mọ amuphẹ phọ, torobọ oye kalegheri ni ipẹ eru bọ inẹ ilọ aZihova, kụ ogbuurogh oomo phọ okpẹ phọ okpolhom bọ ḍien phọ odị. Kuolọ, aZihova kakị ni ghisigh aḍighi ghan oye dị amhạn maạr apu ghuḍum atorobọ oye epẹ k’akẹ r’isiẹn ade phọ. Eeghe kụ iḍighi? Loor esi dị odị kakị ni ghisigh uḍighinhaan ghan iyira imạ araraạr. Ḅilhẹ kẹn: Loor iduọn r’osooromhi aloor aZizọs kaḅọgh bọ itooghị phọ angọ aZihova, “Enaạn bịn kụ kepogh oomo phọ idị emadạn.” (1 Kọr. 15:28) Ipẹ reten, kụ omhạr awe okelhọm “aani bin eegu phọ Enaạn idiphọ anmụny odị dị mokpetenaan.” (Rom. 8:21) Kụ aZihova amunhenhi ogbi phọ odị omhoọgh eniin eghunotu dị eḅarạm buphẹ odi bọ epẹ k’akẹ r’isiẹn ade phọ.—Efẹ. 1:10.
Mem dị oomo araraạr phọ iphẹn phọ memite, ika kụ idị ketir eghunotu phọ aZihova epẹ k’akẹ r’isiẹn ade phọ? Okạr oghaạph kekạr kụ itir iyira—yira komoọgh egbogh eephuạ—eephuạ ooseeny aḍimạ aḍien phọ aZihova. Inyu ni okọ suọr phọ Devid ogẹ mọ: “Iboom aZihova Enhaạn phọ . . . Iboom ḍien oghur phọ odị k’agee-pọ.” (Ps. 72:18, 19) K’iiḍuul k’iiḍuul, yira kokiọm ghan ghisigh bịn omoọgh imhoom ariphigh otuạn oḍighi ghan iphẹn phọ.
Aḍien phọ aZihova kụ aghuḍum mọ ayira. Aḍien phọ odị riitughianhạm ghan iyira ephomhoghiạn phọ odị. (1 Jọn 4:8) Oomo amem yira kootughiạn ghan ni mọ aZihova ulhẹm iyira loor ephomhoghiạn phọ odị, aḅilhẹ amiteom ekiạ etagharạn phọ loor ephomhoghiạn, ḅilhẹ mọ aloor ephomhoghiạn phọ odị kụ edị odị ratooghị bọ r’elhiom eḍighinhom iyaạr kungọ iyira. Yira kokiọm ni ghisigh omiịn ipẹ aZihova raakuom ghan bọ ephomhoghiạn olhẹm mọ odị. K’iiḍuul k’iiḍuul, k’inyu ni iyira oḍuraan otuman odị idiphọ Odẹ ayira, kụ omhoọr asuọr ooseeny aḍien eghuan phọ odị.—Ps. 73:28.
