Eeye. Eru phọ o/ḅenhị Iv mọ odị alhe eemhumha phọ Enhaạn agbiemhi bọ nyodị, mọ kekịgh mudị odị amugh ni bịn, kụ apakirị odị dị ro/miịn ghan (ephẹn awe phọ oḅẹm bọ m’asol dị ra/mugh ghan) ekiọm ghisigh etọl ghan. Dị eego esi ekarạph iyaạr, aSetan aḅenhị Iv m’eḍighi maạr dị odị alhe eemhumha oreeny phọ, mọ ‘odị ka/mugh’ r’omhugh. Odị aḅẹm mọ Iv katọl ghan bịn, akelhọm imạ aghuḍum siẹn ade phọ, dị u/beḍenhọm Enhaạn.—Gen. 2:17; 3:3-5.

Eḍighi maạr dị itughemhị okpẹ asol phọ ramugh ghan bọ i/miigh siphẹ Iden, imhiighom eghẹn? Yira u/kạr ulegheri. Yira olegheri mọ uḅeer oomo ikarạph iiḅereghị phọ mem Amuụm-aḍigho phọ aNoa. Ekarạph ekụ iiḅereghị i/kpetenhaan Ḍigho phọ loor esi dị ogina aNoa r’otọ odị,—oḍighi bọ bugey abuseenyom—bịn k’ukpetenhaan.

P’iduọn phọ itughemhị ph’eḅẹm bọ m’asol phọ ra/mugh ghan phọ edi bọ ḍio arodon, imite mem mọ Aḍigho phọ aNoa meten bọ. Dị iikia i/lo, mem mọ Enhaạn egbaragbaramhị bọ onhụ aḍiaḅạ phọ siphẹ Babẹl, kụ awe phọ orarạ bọ “oomo isiẹn ade phọ,” kụ edị ophamhạm itughemhị asol phọ ra/mugh ghan bọ elheeny elheeny. (Gen. 11:8, 9) Etigheri mem mọ itughemhị okpẹ phọ ophọn emhiigh bọ, yira omeeraam ni mọ “odẹ oomo okpẹ” phọ, aSetan Eru phọ, kụ agbạ ni, ḅilhẹ eḅeeraạn ni nyodị iduọn melheeny bọ elheeny.—Jọn 8:44.