Nạ katue ni apanyanhaạn sipuru phọ iphẹn phọ, odaphạn Otu Okoriom a 2019 phọ ḍughụm?

Eeghe kụ emhụ oguan phọ Enhaạn aḅẹm bọ mọ: “Eenemạ i/lo dị okpọl iphoghomhiom inyinha kụ kemoọgh ekol”? (Isa. 54:17)

Yira oḍuom ni olhoghi mọ Enhaạn kughoph ni iyira asighẹ esi iikpọ dị ketue ni epiemhi, idiphọ “igbagbaar abuọ iidaraghu phọ.” (Isa. 25:4, 5) Amulọgh ḍien phọ ayira ko/tue okạr uḍighi iyira iyaạr dị koḅẹm mọ ikị kụ emhiịn.—w19.01, pp. 6-7.

Ika kụ idị ipẹ Enhaạn azoọm bọ we aKena r’awe Izrạl phọ abuphẹ oghel bọ iiḅakiọm odị, eeghironhaan elhiom ooruẹn phọ odị?

Enhaạn asophonhaan ni ooruẹn buphẹ oopụ bọ siloor abidị r’aroozọ orolạn esi dị u/ḅaạl obobọ omhiinẹ ghan bọ ibạm anmụny r’anmariịr. Odị asẹph ni buphẹ onhaghanhạn ghan bọ nyodị oḅilhẹ ozoọm ghan bunhọn eten dị ekpeanhaạn.—w19.02, pp. 22-23.

Yira koḍighi ika eḍighi maạr dị yira odi aani esi dị oye dị u/ḍighi onyọ Ogbaanhaạn kụ raaḅereghị?

Yira otue ni olọgh eegu oḅoorian kuolọ ku/ḅẹm mọ “erọl li idiphọ” obobọ ukpạph ḍighaạgh onhọn oye. Yira otue ni ooḅereghiọm olhoghi ayira.—w19.03, p. 31.

Eeghe kụ iḍighi kụ ibiighi ibạm anmụny eḍighi bọ igbogh ikarạph?

Ibiighi ibạm anmụny eḍighi ikarạph dị oḍighi opọ emitenhaan bọ, ookpomhoghan phọ, buọ itooghị phọ, ḅilhẹ r’Enhaạn. Ekpisi lọ iilhogh abuọ itooghị phọ ewạ m’oghaạph ghan oḅenhị gomẹt ilọ araghaạph ibiighi lọ emite, ikumor awe phọ rodaphạn ghan ni.—w19.05, pp. 9-10.

Ika kụ idị nạ katue anme obobọ anighemhị oye olhoghi phọ anạ?

Ikpanạ aradạ ogbariọn pọ: Kaaphạn aZihova esi iiḅereghị. Gbirima ghan r’aḍiigbu ooḅeghiọn aloor anạ ophogh. Kụ asaḅạr bugey arighirị.—w19.06, p. 11.

Eeghe iyaạr kụ edị yira kotue oḍighi nyiidiphọ orue ookolhobian ilọ osoman igbiphoghọm?

Ewạ dị yira kokparamhị siya phọ ayira r’aZihova. Kuphom ni owol m’aZihova uphomhoghiạn ni iyira ḅilhẹ m’odị iyira ku/ḅitonhaạn. Bạl ghan Baibul phọ ḍio etum ḍio, kụ aaḅereghị ghan egbạ gbạ amem. Kuphom owol mọ aḍisẹph kirokirọ Omhạr phọ k’Enhaạn ketu ni inẹ. Tuutughiạn ghan riisi aBaibul dị ekạr eḅeeraạn nyinhạ aḅilhẹ ghan amhoọr suọr dị reeseeny aZihova dị esi nạ u/pogh.—w19.07, pp. 2-4.

Yira koḍighi ika kụ otue ologhonhaạn ḍighaạgh buọ asiya ayira omhoọgh aani apelieẹny?

Emạn ni maạr oḍeenhaan ghan olhoghoma, ḍighi idị ezọ phọ anạ kụ keghaaphanhaạn nyinhạ, moọgh okparạm aḅilhẹ amhiigha loor.—w19.08, pp. 15-17.

Odaphạn oguan phọ aZizọs siphẹ Matiu 11:28, ika kụ idị yira m’omhoọgh ophooghian?

Yira omoọgh bupoghom dị omhoọgh ephomhoghiạn, righirị dị onhighẹ opelheghiom, ḅilhẹ r’oḍighi dị anhighẹ apelheghiom.—w19.09, p. 23.

Ika kụ idị aZihova katue ungọ iyira eephuạ r’iikpọ oḍighinhom ipẹ eḅeeraạn bọ nyodị? (Fil. 2:13)

Mem dị yira aạl Ekpo onhụ phọ Enhaạn kụ ogbirima, Enhaạn kunyaamhị ni iyira, ungọ iyira eephuạ ḅilhẹ r’iikpọ oḍighinhom ipẹ eḅeeraạn bọ nyodị. Kasighẹ uwaloor phọ odị kụ anyaamhiọm sighalhanyạ phọ ayira.—w19.10, p. 21.

Eeghe aradạ kụ edị yira kogbariọn, kụ ogbi osopha osopha?

Oogh aradạ dị yira kogbariọn pọ: Kuamhị awaaghị raraạr alhegheri. Ḅeeḅereghị alhọm osụ olhoghi. Maạr aaḅeghiọn aphogh iyaạr phọ nạ atụ bọ kụ rasopha bọ osopha phọ. Legheri ipẹ nạ katue bọ aḍighi. Pighi siigbu dị nạ kateẹny.—w19.11, pp. 27-29.

Itughemhị phọ eḅẹm bọ mọ asol ra/mugh ghan phọ, iḍuạ ni esi ipẹ aSetan aḅenhị bọ Iv kụ emite ḍughụm?

Eeye. ASetan aḅẹm mọ Iv ka/mugh, o/ḅenhị mọ kekịgh mudị odị amugh ni bịn. Yira olegheri mọ uḅeer oomo ikarạph iiḅereghị phọ mem Amuụm-aḍigho phọ aNoa. Eeni itughemhị phọ eḅẹm bọ m’asol phọ ra/mugh ghan imite mem mọ Enhaạn egbaragbaramhị bọ onhụ aḍiaḅạ siphẹ Babẹl.—w19.12, p. 15.