Ipẹ ogẹ bọ Deuteronomy 22:25-27 re/kaạph ghan ilọ omạ omiteom m’oye phọ asoor ri olhogh, loor esi dị eegholaan ni mọ oye phọ asoor ri. Olhogh phọ ophọn phọ agbon omạ omiteom e”legheri anhịr ephoph phọ. Lọgh elhegh ipẹ esi phọ rekaạph bọ.

Asiikpịgh phọ 23, 24 ekaạph ilọ oye dị arolạn esi onyanhị dị onhọn oye maguan pinien “siphẹ emhạ phọ.” Iduọn phọ pọ odị asoor olhogh orolạn esi anhịr onhọn oye, loor esi dị onyanhị lọ moguan pinien rosighẹ ghan idiphọ anhịr ilhom. Kokaạph ika ilọ onyanhị phọ? “Odị o/looghị siphẹ emhạ phọ.” M’odị alooghị ni obọ awe munaghạn ni oghị ophẹl nyodị. Kuolọ odị o/looghị. Iduọn phọ pọ, aruupuruan iyạl abidị, kụ iḍighi kụ usoph ghan m’iyạl abidị kụ usoor olhogh phọ.

Ipẹ reten kụ olhogh phọ aḅilhẹ aghaạph ilọ adọl dị egbatanhaạn mọ: “Toroboiperolbọ, eḍighi maạr dị oye phọ azuan onyanhị dị moguan ilhom olhoghi eḍum kụ oye phọ akpaariọm akpạr apu, kụ arolạn esi, oye phọ abiighi bọ nyodị bịn kụ kamugh, nyinha ke/ḍighi iyaạr onyanhị phọ. Onyanhị phọ o/soor olhogh dị akpẹ oghiigh. Iniin phọ kẹn ni r’amem dị oye anyạ aghị azuom onhọn oye bịn aghiigh. Odị azuan nyodị epẹ olhoghi eḍum mọ kụ onyanhị phọ alooghị kuolọ oye ophẹl odị o/rọl.”—Deut. 22:25-27.

Esi iduọn phọ, onyanhị phọ alooghị bọ ni, abuugboom iiruẹn phọ umheeraam ghan ni mọ onyanhị phọ olhogh o/soor. Eeghe kụ iḍighi? Loor esi dị odị “alooghị ni kụ oye ophẹl odị o/rọl.” Esi iduọn phọ odị o/lhe emhạ. Toroboiperolbọ, oye phọ asoor olhogh ibiighi ḅilhẹ r’olheom emhạ anhịr onhọn oye, loor esi dị odị “akpaariọm akpạr apu, kụ arolạn esi r’odị,” onyanhị phọ moguan bọ ilhom mọ.

Kụ iḍighi kụ, ghalhamọ r’iduọn olhogh phọ ophọn phọ agbon aani bọ ni e”legheri anhịr phọ, igẹ phọ ekạr ekaạph mọ oye phọ asoor olhogh ibiighi ḅilhẹ r’olheom emhạ anhịr onhọn oye. Yira kotue ni oḍuom olhoghi m’abuugboom iiruẹn phọ “k’okuamhị ni owaaghị raraạr” kụ osoph iiruẹn dị edaphạn sinị iilhogh phọ Enhaạn m’aghaạph bọ kụ aghaạph, kụ eegholaan bọ ni.—Deut. 13:14; 17:4; Ex. 20:14.