NẠ AMIỊN ni loor anạ idiphọ oye dị rangọ ghan ḍisẹph ḍughụm? Aḍiphẹ phọ aḍipuru dị ewạ ni mọ torobọ onyọ ayira apuruan loor. ABaibul phọ aghaạph ni mọ, siẹn amem mọ ayira ibadị awe ko/legheri ghan “iiḅi.” (2 Tim. 3:2) Eeni nạ maazuanhaan ghan ni buniin awe dị rowạ ghan mọ torobọ amem abunhọn kụ ongọ ghan bidị iyaạr, mudị ole omhụgh abidị. Ekịgh mudị bidị rologhoma ghan mọ eḍighi elhiom abidị kụ i/moghi osẹph esi ipẹ ongọ bọ bidị. Iikia i/lo, nạ kameeraam ni mọ ke/dụgh orọl igbo awe dị orọl idiphọ.

Ḍieriphọ aḍighaạgh phọ, otoma rebenhẹ aZihova mọ: “[Ongọ] ghan ni ḍisẹph.” Torobọ ilọ erọl yira ongọ ghan ni “ḍisẹph.” (Kọl. 3:15; 1 Tẹs. 5:18) Ogbạ agey, omhoọgh eegharạ osẹph ghan obobọ ongọ ghan aḍisẹph eḍighi ni ilọ asuọ ayira. Ibadị ariphigh ni kụ edi otuạn oḍighi ghan iduọn phọ.

Eniin ekpanhạ ephigh phọ ewạ bọ dị yira komoọgh eegharạ ongọ ghan aḍisẹph pọ kilhoghonhaạn iyira ḍighaạgh omhoọgh egey ephoghom aloor. Idị eḍighi bọ oye dị rangọ ghan ḍisẹph eeni kaloghoma ni oḅaạl olhoghi siphẹ aloor phọ odị, kụ oye phọ rosẹph bọ kamoọgh aani kẹn oboom oḅaạl olhoghi. Eeghe kụ iḍighi kụ ongọ ghan aḍisẹph kengọ bọ ni oḅaạl olhoghi opọ asẹph bọ ḅilhẹ r’opọ osẹph bọ? Ọ, ooḅeghiọn eḍeenhaan phọ ephẹn: Mem dị nạ amhiịn mọ abunhọn awe rowạ ghan oḍighinhaan anạ iyaạr r’ophooph olhoghi, nạ ragbi mọ ipẹ phọ i/mạ iḍeenhaan mọ nạ akpẹ ni oḍighinhaan iyaạr phọ epẹ phọ? Bidị omoọgh ogbolhomaam otu esi anạ. Mem dị nạ alhoghoma ogbolhomaam mọ opọ phọ, nạ kaloghoma ni oḅaạl olhoghi siphẹ aloor phọ anạ. Idọ phọ iphẹn phọ imitenhaan ni Ruth. ABoaz anmo inmo Ruth. Iikia i/lo, aRuth amhoọgh ni oḅaạl olhoghi mem mọ odị alhegheri bọ mọ oye rapogh ni nyodị obobọ amoọgh ni ogbolhomaam akị esi odị.—Ruth 2:10-13.

Ekạr kụ ekpeanhaạn ongọ ghan Enhaạn ḍisẹph. Dị iikia i/lo, eeni amem nạ raatughiạn ghan ni ilọ ibadị araraạr phọ aZihova mamiteom bọ siẹn ookpomhoghan phọ ḅilhẹ raraạr iphulhupul phọ odị ramiteom ghan bọ, ḅilhẹ aghiọm bọ ni ghisigh ramiteom ghan. (Deut. 8:17, 18; Iiḍighi 14:17) Kuolọ kparipẹ rootughiạn ephurukpu ilọ imạ phọ ipẹ Enhaạn meḍighi bọ, eeghe kụ nạ o/gho bọ mem ogbirima ghan ilọ aḍisẹph kirokirọ phọ Enhaạn meekuom bọ nyinhạ r’abuphẹ nạ aphomhoghiạn bọ. Ogbirima ghan ilọ inmo Olemhiạ phọ anạ keḍighi idị nạ ka/gbạ ghan mem osereghiạn odị, kụ eḅilhẹ eetughianhạm nyinhạ mọ asereghiạn ni aḅilhẹ aphomhoghiạn nyinhạ.—1 Jọn 4:9.

Kuolọ kaa/tughiạn ḅilhẹ ka/gbirima ghan ilọ inmo r’aḍisẹph kirokirọ phọ odị bịn; ngọ ghan aZihova ḍisẹph, loor iiḅi phọ odị. (Ps. 100:4, 5) Roḅẹm ghan ni mọ, “oḅenhị oye mọ maḍighi kụ eniin ekpanhạ eten dị rengọ ghan we oḅaạl olhoghi.”

Enhọn ephigh phọ enhighẹ bọ ni ongọ ghan aḍisẹph, pọ aloor esi dị kekparamhị siya arighirị phọ anạ. Riḅeeraạn ghan ni iyira mem dị usereghiạn iyira. Mem dị nạ aḅenhị onhọn oye k’epẹ ekpom mọ anạ mọ maḍighi, esi iiḅi dị oye phọ aḍighinhaan nyinhạ, iyạl phọ anyinha keḍigh righirị agey. (Rom. 16:3, 4) Awe dị rongọ ghan ḍisẹph rologhonhaạn ghan bunhọn ḍighaạgh. Mem dị bidị ootughiạn iiḅi lọ abunhọn oḍighi bidị, renyu ghan ni bidị oḍighi aani oḅulhemhian. Ogbạ agey, olhoghonhaạn abunhọn ḍighaạgh rekọm ghan oḅaạl olhoghi. Idiphọ aZizọs aḅẹm bọ mọ: “Ibo [k’Enhaạn] edianaan buphẹ rongọ bọ epu buphẹ roboọr bọ.”—Iiḍighi 20:35.

ARobert Emmons, oniin onyọ abuphẹ rooḅakị bọ University aCalifornia, aḅẹm mọ: “Orue ongọ ghan aḍisẹph, pọ ewạ dị yira kolọgh elhegh masian phọ odi bọ igbo onmo ghan inmo ḅilhẹ r’aạr ghan inmo.” Ogbạ agey, yira ko/tue otọl dị ubeḍenhọm  bunhọn awe reten kirokirọ. Esi omaạm, eeni bidị otue ni ungọ iyira iyaạr olhe obobọ ulhoghonhaạn iyira ḍighaạgh reten arookonhom. (1 Kọr. 12:21) Oye dị rangọ ghan ḍisẹph raḍeenhaan ghan mọ onọ amaghamhị ni maạr iiḅi dị abunhọn oḍighi nyodị. Esi iduọn phọ, eḍighi ni eegharạ anạ oḍeenhaan aḍisẹph ilọ iiḅi lọ abunhọn oḍighi nyinhạ ḍughụm?

Enhọn ephigh otuạn omhoọgh eegharạ osereghiạn ghan pọ, kelhoghonhaạn nyinhạ ḍighaạgh ogbon ghan igey kparipẹ r’ikarạph. Iduọn phọ pọ olhoghi anạ katọl idiphọ osalhạm. Kaḍighi idị nạ kagbon ghan iniin araraạr siphẹ ekool phọ bịn abilhẹ iniin. Keḍighi idị nạ kagbor ghan amiịn imạ-imạ bịn, nạ ka/gbor ghan aatughiạn ilọ kengọ nyinhạ iiḅaghamhị. Nạ agbor rangọ ghan ḍisẹph, pọ keḍighi idị nạ kamiịn ghan imạ-imạ bịn, dị keḅilhẹ ghụn ekọm idị nạ kalegheri bịn asereghiạn abughẹ. Eḍighi maạr dị nạ agbon ghan raraạr dị kekọm ghan idị nạ kasẹph bunhọn, kelhoghonhaạn nyinhạ ḍighaạgh oḍighi idiphọ aPọl aḅẹm bọ mọ: “bo ghan esi Omoọgh-we phọ oomo amem.”—Fil. 4:4.

Eegharạ ongọ ghan aḍisẹph reḍighi ghan idị oye kaa/tughiạn ghan ikarạph. Edugh ni dị oye kasẹph ghan kụ aḅilhẹ aloghoma eḍịm, e/ḅaạl olhoghi, obobọ ophin olhoghi eniin phọ amem mọ ḍughụm? Awe dị rosereghiạn ghan ro/moọgh ghan eegharạ okpolhoghi aruphua. Bidị romaghamhị ghan maạr ilọ bidị omhoọgh bịn, ro/tolonhaạn ghan okpolhoghi iboom araraạr.—Fil. 4:12.

Idiphọ onyọ aKristẹn, nạ alegheri ni mọ aSetan rawạ ghan oḅonyon ḅilhẹ r’odughe anạ esi aḍikparaminheẹn phọ nạ rasoman ghan bọ siẹn asiḍio eekunha phọ. Reḅeeraạn ghan nyodị dị nạ kamiịn ghan raraạr eten dị eeph, ḅilhẹ agum ghan ilọ atorobọ iyaạr. Eegharạ phọ epẹ phọ keḍighi idị kekparanaạn we onhaghanhạn anạ mem dị nạ amite epẹ erugh phọ oghaạph iiḅi iinhaghạn phọ. Okạr agey, ongọ ghan aḍisẹph reḍeenhaan ghan mọ yira omhoọgh ni eemuma uwaloor iigbia phọ Enhaạn. Esi omaạm, ringọ ghan iyira oḅaạl olhoghi r’omheeraam esi Enhaạn.—Gal. 5:22, 23.

Idiphọ oniin onyọ aZihova, eeni nạ ameeraam ni iphẹn oghaạph bọ siẹn phọ ilọ ongọ ghan aḍisẹph. Ghalhamọ r’iduọn phọ ni, nạ alegheri ni mọ ongọ ghan aḍisẹph, ḅilhẹ r’omhoọgh ogbaanyạn r’oḍuom olhoghi, re/gạ ghan bịn kemite. Kuolọ ipẹ phọ nyinhạ ki/dughe. Nạ katue ni alẹm amiteom aḅilhẹ apamhanhạm eegharạ ongọ ghan aḍisẹph. Ika? Lọgh ghan mem torobọ aḍio aatughiạn iniin araraạr siphẹ adọl aghuḍum mọ anạ dị emhoghi otuạn ghan ongọ aḍisẹph. Nạ agbor raḍighi iduọn phọ, bịn enụm enụm meḍighi pakirị adọl aghuḍum anạ. Ipẹ phọ kengọ nyinhạ oḅaạl olhoghi epuemhi buphẹ ogbon bọ iiḅaghamhị adọl ghuḍum mọ abidị bịn. Tuutughiạn ghan imạ araraạr dị Enhaạn r’abunhọn awe moḍighinhaan nyinhạ dị ekparamhị nyinhạ, ḅilhẹ engọ nyinhạ oḅaạl olhoghi. Nạ atue ni agẹ alọgh esi. Nạ atue ni agẹ alọgh siphẹ aḍinyạ phọ anạ iyạl obobọ iraạr araraạr dị nạ atuạn angọ ḍisẹph, torobọ aḍio.

Abuọ igbogh ituughạ phọ oḅẹm mọ “ogbor ghan osẹph abunhọn ketue ni enme eten phọ epẹ epul ayira rekumuan ghan bọ, bịn idughanhaan iyira olhoghoma ghan igey ilọ adọl aghuḍum mọ.” Oye dị rasẹph ghan bunhọn ramoọgh ghan oḅaạl olhoghi. Tuutughiạn ḍisẹph kirokirọ phọ anạ, kụ aghelhọm ghan imạ araraạr phọ ipẹ memitenhaan bọ nyinhạ, kụ angọ ghan ḍisẹph! Kparipẹ r’osighẹ ghan imạ araraạr idiphọ eseeriom, “ngọ ghan aZihova ḍisẹph, loor esi dị odị anighẹ ni.” Ii, “Torobọ ilọ erọI ingọ ghan ni ḍisẹph.”—1 Chron. 16:34; 1 Tẹs. 5:18.