Eeye, aBaibul phọ obobọ iphirigba i/lo dị eghaạph mọ iphẹn phọ imite ni.

Eten phọ epẹ ibadị asi-Baibul egbạ bọ ekpịgh phọ ephẹn phọ, meḍighi idị abuniin awe ootughiạn mọ siḍio phọ aPọl awe ughol ghan ni emhụ abuphẹ momhuughu bọ oḍiiny muụm. Esi omaạm, Ooḅi Oghaạph phọ aḅẹm iduọn mọ: “buniin odi ni dị rokol ghan emụ abuphẹ momuughu bọ kụ komeera mọ owurogh bunọ muụm. Eḍighi iyaạr dị oḅerion esi aḍuugh i/lo ghan, emụ eḍighinom iyaạr phọ ephẹn phọ eeghe?”

Toroboiperolbọ, lọgh elhegh idị iyạl awe dị otuughạ ilọ aBaibul oḅẹm. Dr. Gregory Lockwood aḅẹm mọ, iphirigba obobọ aBaibul phọ o/ghaạph mọ amem irọl li dị “oghol ghan emhụ abuphẹ momhuughu bọ kụ oḍiiny muụm.” Professor Gordon D. Fee aḅẹm aani kẹn mọ: “Iphirigba obobọ aBaibul o/ghaạph mọ odọ oḍiiny amuụm mọ ophọn phọ arọl ghan ni. Emhiigh Matiu kụ esi Ogananami phọ, aBaibul phọ o/ghaạph r’oghaạph ilọ iphẹn phọ; ḅilhẹ esi i/lo dị eghaạph mọ aKristẹn obobọ aruutu asiosị dị emite mem mọ abutelhedom mọ momhuughu bọ omhạn, dị oḍighi ghan eḍighinhom iyaạr phọ ephẹn phọ.”

AZizọs aḅenhị bumatuạn phọ mọ ‘ikị oomo areelhe aḅirinhi phọ eḍighi we bumatuạn amị, eḍiinye bidị muụm . . . , etughemị bidị ooko oomo araraạr phọ mị atọ bọ iḅenị inyina.’ (Mat. 28:19, 20) Tutụ oye kaḍighi onyọ amatuạn dị maḍiiny muụm, pọ odị katuughạ ni ilọ aZihova r’aZizọs Oọny phọ Odị, ameeraam aḅilhẹ anaghanhạn bidị. Oye dị mamhugh kụ moḍi ka/tue aḍighi iphẹn phọ, obobọ onyọ aKristẹn dị odi ni rapooghu ka/tue aḍighinhaan iphẹn phọ nyodị.—Eccl. 9:5, 10; Jọn 4:1; 1 Kọr. 1:14-16.

APọl akạr raḅẹm ghan eeghe siẹn phọ?

Abuniin awe abuọ Korịnt u/meeraam oḅetenhu esi aḍuugh phọ. (1 Kọr. 15:12) APọl aghel li ḍiitughiạn phọ aḍiphẹ phọ. Odị amạ ni amiteom mọ odị ‘asoman ghan ni ḍuugh ḍio etum ḍio.’ Etigheri iiḅaghamhị phọ ekọm ghan bọ okaphian oomhiigh engọ nyodị oomo amem, odị amhoọgh ni oḍuomolhoghi mọ ghalhamọ odị amhugh ni koḅeton ni nyodị ongọ ghuḍum epẹ k’akẹ, idiphọ oḅeton bọ aZizọs.—1 Kọr. 15:30-32, 42-44.

APọl awạ dị awe aKorịnt phọ kolọgh elhegh mọ awe dị oḍighi Kristẹn dị mosagharạn uwaloor iigbia phọ kosoman ni iiḅaghamhị ḍio ḍio ḍio, omugh, kụ ogbi oḅeton abidị ogheelhom k’akẹ. Esi iduọn phọ, mem dị bidị “oḍiiny muụm oḅophoghạn [Zizọs]” pọ bidị oḅarạm aani ni “oḅophoghạn omugh aḍuugh phọ [aZizọs].” (Rom. 6:3) Iphẹn phọ remạ ghan keḍeenhaan mọ idiphọ aZizọs, bidị kosomhan ni imhinhimhiịn, omugh kụ ogbi oḅeton abidị ogheelhom k’akẹ.

AZizọs roḍiiny muụm roten esi iyạl asiạ r’opeel, odị aḅenhị ni iyạl abutelhedom odị mọ: “Kiḍiinye aani ni inyinha muụm mọ muḍiinye bọ imhị.” (Mạk 10:38, 39, NWT) Siẹn phọ aZizọs o/ghaạph ghan ilọ oḍiiny amuụm mọ odị, kuolọ odị raḅẹm ghan mọ orọl adọl dị ekpẹ oḍuomolhoghi oghị esi Enhaạn phọ odị kekọm idị kokiigh nyodị. APọl agẹ mọ abuphẹ osagharạn bọ uwaloor phọ kopin aani ni bin “iminimiịn phọ aKraist, [opin] kẹn ni bin eegu phọ odị.” (Rom. 8:16, 17; 2 Kọr. 4:17) Kụ iḍighi kụ bidị komugh aani ni kụ ogbi oḅeton abidị ogheelhom k’akẹ.

Esi iduọn phọ, ikpo onhụ phọ aPọl ekạr reḅẹm ghan mọ: “Ḅilhẹ kẹn, buphẹ oghol bọ omhugh kụ oḍiiny muụm koḍighi bọ ika? Eḍighi iyaạr dị oḅerion esi aḍuugh i/lo ghan, emụ eḍighinom iyaạr phọ ephẹn phọ eeghe?” (NWT).