Nạ mamhiigha ni loor abạl oomo arumhuoghaạph Otu Okoriom alhạ phọ arolhool? Uguạ, pogh mughumọ nạ katue ni apanyanhaạn sipuru phọ iphẹn phọ:

Ekpẹ ozoọm ghan ika buphẹ osagharạn bọ uwaloor iigbia phọ?

ABaibul phọ uroma iyira mọ otuughaạny omheeraam mọ abidị; kuolọ ke/nighẹ dị yira kooraraghiạn ghan bidị iboom. Yira oghel ‘oophughemi ghan abunọn’ awe. (Jud 16) Yira ro/puru ghan bidị raraạr dị iyira i/gbolhomaam ilọ oḍuomolhoghi phọ abidị.—w20.01, opoḍi phọ 29.

Uḍighi ika kụ nạ kakuphom bọ owol mọ aZihova alhegheri ni nyinhạ r’aloor?

ABaibul phọ aḍeenhaan mọ odị alhọgh ni nyinhạ elhegh k’epẹ okuruḅakạ phọ, kụ ogbi bọ omhạr anạ. Odị ranaghạn ghan ni torobọ iiḅereghị anạ. Odị alegheri ni iitughiạn phọ r’olhoghoma phọ anạ, iḍighinhom araraạr ph’anạ retir ghan ni nyodị. (1 Chron. 28:9; Prov. 27:11) Odị kụ akạr aḍur nyinhạ alhoghomạ.—w20.02, opoḍi phọ 12.

Ighẹn kụ areḍeenhaan amem dị ekpẹ oḅạ r’amem dị ekpẹ oḅoorian?

Mem dị yira rokaạph ilọ aZihova. Mem dị yira omhiịn dị oye rawạ ozọ eten dị i/kpeanhaạn. Ikumor awe phọ r’ongọ ghan oroma mem dị emhoghi. Yira roḅoorian ghan mem dị upuru iyira ilọ ipẹ ropạm ghan bọ rukumuan phọ ayira eelhe dị osophoghom oḍighi phọ ayira. Mem dị yira olhegheri raraạr ookpomhoghan phọ dị i/wạ mọ onhọn oye anhaghạn.—w20.03, ipoḍi phọ 20-21.

Ika kụ idị igurubia phọ edi bọ Joel emhụ phọ 2 egbatanhaạn r’ipẹ edi bọ Ogananami phọ emhụ phọ 9?

Joel 2:20-29 eḅẹm mọ Enhaạn aphorogh ni igurubia phọ akelẹ, kụ aguanhaan okpẹ iikpiạ ilọ araraạr phọ igurubia phọ ephueghị bọ. Ipẹ reten, kụ Enhaạn aakuom uwaloor phọ odị. Ipẹ phọ imhunhughan mem mọ awe eghạm mọ aBabilọn ozuoghom bọ Izrạl kụ esighẹ rekị. Ogananami 9:1-11 rekaạph ghan ilọ arebenhẹ phọ abuphẹ aZihova asagharạn bọ uwaloor phọ. Idiphọ igurubia, bidị rogbeelhom ghan r’akpọ olhoghi dom ooruẹn phọ Enhaạn edianhaan bọ okarạph aḅirinhi phọ ophọn, kụ iphẹn phọ mekọm idị ilhoghi abuphẹ robakị bọ aḅirinhi phọ i/pọ.—w20.04, ipoḍi pho 3-6.

Anhiạn kụ uw-emhạ epẹ esiinyọm mọ ḍio arodon?

ARussia r’abuphẹ r’odị oḍighan bọ. Bidị okạr kụ rokpuuroghọm we phọ Enhaạn, osophoghom oḍighi iphelhegbeel phọ, kụ iphẹn phọ eḍeenhaan mọ bidị olọgh ḍien Bugbaanhaạn phọ. Uw-emhạ epẹ esiinyọm mọ raapikian ni r’uw-emhạ epẹ esoorom mọ.—w20.05, opoḍi phọ 13.

Araagharạ phọ ogoolhạ bọ siphẹ Galetia 5:22, 23 bịn kụ oomo apakirị ‘eemuma uwaloor iigbia phọ’ ḍughụm?

Eeye. Uwaloor iigbia phọ rulhoghonhaạn ghan ni iyira ḍighaạgh omhoọgh inhọn imạ araagharạ, idiphọ elhiom eḍighinhom iyaạr. (Efẹ. 5:8, 9)—w20.06, opoḍi phọ 17.

Eeghe kụ ootor’osooromineen phọ odi bọ esi olhoghoḍị ghan araraạr ilọ aloor anạ siphẹ intanẹt phọ?

Araraạr phọ nạ radoghoḍi ghan bọ siphẹ intanẹt phọ ketue ni eḍighi idị awe kootughiạn mọ nạ rabagaam loor, obobọ mọ nạ o/sooromhi loor.—w20.07, ipoḍi phọ 6-7.

Eeghe kụ idị abukaaphọm ilọ omhạr pho kotue otuughạ esi awe dị omhaạr akonị agey?

Bidị rokonị ghan ni mem r’esi dị bidị koteẹny iboom ina. Omaạr oḍighinhom araraạr phọ rokoniọm ghan bọ akonị phọ. R’akpọ oḅio rokumuan ghan ni mem dị asidọl phọ enmia. Yira kotue ni otuughaạny aani iphẹn phọ siẹn oḍighi iphelhegbeel phọ ayira.—w20.09, opoḍi phọ 5.

Ighẹn kụ iniin areten dị yira kotue ologhonhaạn ḍighaạgh buphẹ yira rotughemhị ghan bọ Baibul phọ obughẹ ephomhoghiạn phọ abidị esi aZihova?

Toma mọ bidị aạl ghan Baibul phọ torobọ aḍio, kụ ogbirima ghan ipẹ bidị aạl bọ. Tughemhị bidị ilọ ooḅereghị.—w20.11, opoḍi phọ 4.

Abuọ anhiạn kụ “oomo” awe phọ ‘kotuạn bọ Kraist oḅerion’?—1 Kọr. 15:22.

Otelhedom mọ aPọl o/ḅẹm ghan siẹn phọ mọ koḅerion oomo omhạr awe. Odị aghaạph ghan ilọ aKristẹn phọ abuphẹ osagharạn bọ uwaloor phọ, buphẹ Enhaạn “mewoph bọ eḍighi buọ odị,” esi aḍien phọ aKraist. (1 Kọr. 1:2; 15:18)—w20.12, ipoḍi phọ 5-6.

Buphẹ konmia bọ esi “onyam-oḅatạn” kologhonhaạn ḍighaạgh Kraist oḍighi eeghe?—1 Kọr. 15:51-53.

Bidị koḍighan r’aKraist esi oḍighi osighẹ ikparạ okuron kụ ophoghom areelhe phọ. (Ogan. 2:26, 27)—w20.12, ipoḍi phọ 12-13.