Umhạr imhị emhạ dị oghol mọ Quebec, epẹ Canada, dị roḅạ ghan onhụ aFrench. Odẹ r’onhiin amhị, Louis r’aZélia, uphomhoghiạn imhị iikiạ. Odẹ amhị aghiil ghan umugholoor ḅilhẹ amhoọgh ghan agey ḍiḅeraạn aạl aḍinyạ. Elọ amhị ogẹ arinyạ kụ iḅeraạn ghan imhị, kụ iḍighi kụ mị umhoọgh eephuạ oḍighi oye dị rageeghị ghan iinhaghạn.

Mem dị mị rakị omhạn 12 asiạ, oniin oye dị r’odẹ amhị roḍighi ghan oḍighi dị oghol mọ Rodolphe Soucy, aphạm ni oyaghirị odị arumom k’ayoor. Bidị uḍighi Bugbaanhaạn AZihova. Mị u/kạr ghan ulegheri ilọ Abugbaanhaạn phọ obobọ u/moọgh ghan ḍiḅeraạn ekụ iiḅereghị phọ abidị. Kuolọ eten phọ bidị osighẹ bọ Baibul phọ kụ ophagharanhaạn ghan sipuru phọ ayoor iḅeraạn imhị iikiạ. Iphẹn phọ iḅeraạn aani ni odẹ r’onhiin amhị, kụ yoor oḅenhị mọ bidị oru ghan utughemhị iyoor Baibul phọ.

Mem mọ opọ phọ mị ughị ghan askul aCatholic. Mị utọ ghan ni mem aghaạph aḅenhị buọ ekụ phọ amhị ilọ ipẹ mị ratuughạ bọ siphẹ aBaibul phọ. Ekureriom mọ, abutughemhiạ askul phọ oḍighi ghan bọ sipriest phọ unhaghạn ni ilọ iphẹn phọ. Kparipẹ romạ isiphẹ aBaibul phọ omiteom mọ mị ragbạ ghan okpẹ, oniin onyọ abidị ugbaaghiọm imhị risigh oomo ekụ phọ mọ mị oye igbagharạn! Ghalhamọ r’iduọn iigbaghanhiạn phọ ipẹ phọ i/dugh bọ ni, ikọm ghụn ḍisẹph kụ emiteom, ḅilhẹ ilhoghonhaạn imhị ḍighaạgh omhiịn mọ itughemhị askul phọ i/moọgh muḅọph r’ipẹ aBaibul phọ aghaạph bọ. Iphẹn phọ iḍighi ni idị mị amhiịn mọ askul phọ opọ phọ o/kpẹ oghị. Odẹ r’onhiin amhị umheeraam ni mọ mị ukị onhọn askul.

Mị ughiọm ni ghisigh ituughạ aBaibul phọ, kuolọ mị u/nuụn upoph eten aruwaloor loor esi oghiilhaan oḍighi oḍuạ otu ogbạ otu phọ. Ekụ iiḅereghị aCatholic phọ umhoọgh ghan agey iikpọ, esi iduọn phọ bidị usophoghom ghan oḍighi iphelhegbeel phọ. AMaurice Duplessis, oḍiemhiom  abuọ imirighan itooghị phọ epẹ Quebec aḍighi ghan onyọ aCatholic. Odị abakị aani ghan ugheel ekpạr dị ozuoghom ghan Bugbaanhaạn phọ. Iwạ ni oḅom emhụ orue oghaạph iiḅi iinhaghạn phọ mem mọ amuphẹ phọ.

Oniin onyọ umor dị oghol mọ John Rae dị aghị aani askul aGilead opọ amhunhenhiom bọ esugha phọ, kụ ulhoghonhaạn imhị ḍighaạgh okpạr opu oghiilhaan. Umor phọ John, aḍighi oye dị ayoghoyoghọ, adugh oteẹny, ḅilhẹ asooromhi loor. Kaakaạgh kụ odị asighẹ onhụ odị uḅenhiọm imhị iyaạr, imạ eḍeenhaan phọ odị ghụn kụ itughemhị ghan imhị. AJohn o/nhaghạn French, esi iduọn phọ mị udạph ghan ni nyodị ibadị amem obọ mị aloghonhaạn ḍighaạgh akaaphạn bulọ roḅạ onhụ aFrench. Mem mọ mị arọl bọ r’aJohn ilhoghonhaạn ni imhị ḍighaạgh ogbatạn edạ siẹn igey phọ. Ḍioph asiạ reten egbi k’amem mọ mị azuan bọ Bugbaanhaạn AZihova, bịn mị aḍiiny muụm, unwanyụ aMay 26, 1951.

Abukọy eten kụ umuza ghan obạm ookpomhoghan ayoor epẹ Quebec. Imạ areḍeenhaan phọ abidị inyu ni imhị okọy aani eten. Mem mọ amuphẹ phọ, aBaibul phọ bịn kụ ogina iyaạr dị yoor osighẹ ghan oḍighinhom epẹ erugh phọ. Loor esi iduọn inhọn arinyạ i/tọl ghan bọ, yoor usighẹ ghan Baibul phọ oḍighinhom eten dị emhoon. Esi iduọn phọ, mị ulhọgh ni iboom inyaạm okuamhị otuughạ ariisi aBaibul dị mị kasighẹ ghan aḍighinhom epẹ erugh phọ. Anyụ isiẹn phọ, ibadị awe u/meera ghan ubạl Baibul dị asiosị aCatholic phọ u/meeraam mọ osighẹ ghan oḍighinhom.

Lhạ phọ 1952, bịn mị aphin Simone Patry onyọ umarani olọ ookpomhoghan ayoor dị akpẹ oḍuomolhoghi. Yoor uḍuạ ni oghị ekpisi dị oghol mo Montreal, kụ alhạ reten, yoor omhạr Lise, onyanhị phọ ayoor. Ii, obọ mị uwilhẹ ni rukumuan okọy eten oomo amem mọ kụ mị agbi bọ ophin aSimone, kuolọ idiphọ eghunotu, aSimone r’amhị ukparaghạ ni odughe adọl aghuḍum mọ ayoor, pidị yoor otue opinom aani bin rukumuan isiphẹ ookpomhoghan phọ ayoor.

Ḍioph asiạ reten bịn mị aḅilhẹ amhiigh ootughiạn ilọ oḅilhẹ obughẹ arukumuan phọ amhị. Lhạ phọ 1962, mem dị mị aghị Kingdom Ministry School ikumor awe, dị arọl oniin unwanyụ epẹ Betẹl aCanada, onyọ umor dị oghol mọ Camille Ouellette r’amhị kụ urọl osoph. Oophugh arukumuan phọ aCamille, etigheri iduọn odị m’aphin bọ anhịr aḅilhẹ amhoọgh ibạm anmụny, akạr kụ utir imhị. Mem mọ amuphẹ phọ, u/gbor ghan u/miịn oye dị mamhoọgh eghunotu aḅilhẹ amhạr obumoọny dị rakọy eten epẹ Quebec; ḍiphẹ kụ aḍiigbu dị aCamille aghoọr. Mem mọ  iyạl phọ ayoor orọl bọ otu, odị uroma ni imhị mọ mị uḅilhẹ ukiririom upogh dọl phọ amhị. Kụ mem dị iyạl ikpo arunwanyụ reten, mị uru ni amhiịn mọ mị kaḅilhẹ ni atue akọy eten oomo amem mọ. Abuniin awe upuru yogh ni imhị mughumọ osopha phọ amhị aḍighi ni olọ osụ-olhoghi, kuolọ mị u/pogh ipẹ phọ, mị uḍuom ni olhoghi mọ aZihova kasẹph ni ikuph oḍighi iphelhegbeel phọ amhị.

Lhạ phọ 1964, umạ imhị r’anhịr amhị Simone idiphọ okọy eten phọ opọ agbatanhaạn bọ epẹ egbogh emhạ phọ aQuebec, emhạ ph’ayoor, yoor orọl bọ okumu esi ibadị asiạ. Mem dị osighẹ kụ rotomaạm eḅẹl amem mọ, adọl oghaạph iiḅi iinhaghạn phọ memalaạm, kuolọ yoor uḅilhẹ ni osoman isophoghom.

Oniin ootaany aSatodee, onyọ iḍiil usiph ni imhị epẹ Sainte-Marie, ebạm emhạ dị i/kạr ikelhạn r’aQuebec. Onyọ iḍiil phọ usighẹ imhị alhọgh ikoli loor esi dị mọ mị aḍuạ otu r’agbạ ghan otu kaghaạph iiḅi iinhaghạn phọ, dị agomẹt kụ imhị iikpọ u/ngọ. Onyebel roten, usighẹ imhị omheremhị ghisigh oogboom iiruẹn dị amite amhanhạm dị oghol mọ Baillargeon. Odị upuru imhị oye phọ kugbaanhaạn bọ imhị ḍighiton phọ epẹ otu iiruẹn phọ. Mị r’oghol mọ aGlen How, * onyọ ogbaanhaạn dị aạl ilọ iilhogh dị awe olhegheri ni, kụ odị alọ mọ: “eeye! Ilọ amhị ri/ḍigh.” AGlen How ogbaany oye iilhogh dị raloghonhaạn ghan ḍighaạgh Bugbaanhaạn phọ ogbaanhaạn abidị sighiton k’aḍio dị. Mem mem mọ bịn otu iiruẹn phọ uḅenhị imhị mọ olhogh imhị u/siph mun.

Isophoghom oḍighi iiḅi iinhaghạn phọ epẹ Quebec iḍighi idị ikparanhaạn iyoor omhoọgh egey esi dị yoor kopạm ghan ituughạ. Yoor uukpomhoghan ghan esi dị reephoọm dị roseere ghan moto. Orue omhoọgh egholhoghọl mem eephoọm mọ amuphẹ phọ, abumor phọ usuughị ghan raraạr dị kengọ egholhoghọl. Bidị ugbor ghan onhuụn osi esi phọ kopạm bọ ituughạ phọ pidị oniin akparamhị nyoniin esi iyạl ikpo awạ kụ amem ituughạ phọ egbi oteẹny.

Ekạr kụ eḍighi iyaạr aḍiḅeraạn omhiịn ipẹ oghaạph iiḅi iinhaghạn phọ maphoph bọ aghị aghisigh k’asiạ phọ epẹ phọ. Siạ phọ ipẹ eḍighi bọ 1960, iyạl ikpo arookpomhoghan bịn kụ irọl ghan oomo egbogh emhạ phọ aQuebec, Côte-Nord, ḅilhẹ r’epẹ Gaspé Peninsula. Nyiidiphọ, ibadị abumor r’abumarani momite rikpisi phọ ipẹ phọ, ḅilhẹ abumor phọ nyiidiphọ phọ rookpomhoghan ghan imạ asiKindọm Họl.

Umhạgh Simone r’amhị oghị okumuan idiphọ opoghom eghir lhạ phọ 1970. Bịn lhạ phọ 1973, uḅenhị iyoor oghị oḍighi opoghom eephugh. Siạ phọ ipẹ phọ, mị utuughạ ni ibadị araraạr ḍighaạgh abumor dị osianhaan idiphọ aLaurier Saumur * r’aDavid Splane, * iyạl phọ abumor phọ abuẹn phọ uḍighi aani ghan bupoghom eghir. Eekunha atorobọ aḍio dị ophạm ookpomhoghan eghir, aDavid r’amhị ughaạph ghan ni ilọ yoor kotue onighemhị eten itughemhị phọ ayoor. Mị aatuughiạn ni eniin amem dị umor phọ David uḅenhị imhị mọ: “Léonce, mị akelhọm agey oghaạph ph’anạ. Oghaạph phọ anhighẹ ni, kuolọ mọ amhị, obọ opọ iraạr araghaạph!” Mị ughaạph iboom araraạr bịn akpol siphẹ oghaạph phọ  amhị. Iwạ mọ mị utuughạ ilọ ongọ ghan oghaạph dị aḍighi key.

Ulhọgh ghan bupoghom eephugh oghị okparamhị abupoghom eghir. Ibadị abukaaphọm ulhegheri imhị agey epẹ Quebec. Iḅeraạn ghan bidị agey orelhean amhị mem dị mị aghị ophogh arookpomhoghan phọ. Mị ughelhọm ghan agey orelhean abidị epẹ erugh phọ, kuolọ mị u/lọgh ghan mem dị ekasiạn orọl r’abupoghom eghir phọ. Eniin amem, oniin opoghom eghir uutughianhạm ni imhị mọ: “I/beeph ooḍikuan r’abumor phọ, kuolọ ka/bula mọ nạ uru ophogh amhị. Mị amoghi aani ni okparamhị!” Oyoghoyoghọ oroma phọ ophọn phọ, ulhoghonhaạn ni imhị ḍighaạgh oolemhi araraạr.

Lhạ phọ 1976 iyaạr dị olhoghi u/seere dị eeph ni iboom imitenhaan ni imhị. Ooḅi anhịr ph’amhị, Simone, amheel li egbogh e/moon bịn amhugh. Odị aḍighi ni ookiạ anhịr esi amhị iboom loor okuọm aloor phọ r’ephomhoghiạn ph’odị esi aZihova. Iyaạr dị ilhoghonhaạn imhị ḍighaạgh okparạm, mem mọ odị amhugh bọ, pọ ogbor ghan omite epẹ erugh phọ. Mị rasẹph kẹn ni aZihova esi iduọn odị ubakị bọ imhị mem mọ amuphẹ phọ. Onyebel roten, bịn mị aphin Carolyn Elliott, okọy eten dị aḅạ ghan aḅekeeny dị aru Quebec ekpisi dị ewaạm mọ ebụgh. ACarolyn phọ umarani dị amhoọgh ḍiḅeraạn abunhọn, ekạr ekpaariọm bulọ olhoghoma igini obobọ rokiil umugholoor, ḅilhẹ adugh oghaaphạn. Odị ulhoghonhaạn imhị agey ḍighaạgh, mem mọ odị amhiigh bọ okumuan r’amhị siphẹ oḍighi opoghom eephugh phọ.

January 1978, ulhọgh imhị otughemhị oḅẹl Askul Abukọy Eten phọ epẹ Quebec. Mị ughiilhaan ni loor esi dị araraạr phọ kotughemhị bọ iḍighi aani ni imhoom esi amhị. Emaạr bọ enhighẹ abukọy eten dị osilor kụ umuza eḅẹl ekụ phọ mị atughemhị bọ. Ghalhamọ r’iduọn opu bọ oḅẹm mọ mị kụ otughemhiạ phọ, mị utuughạ ni ibadị araraạr ḍighaạgh abidị!

Onyebel r’oten lhạ phọ 1978, kụ ophạm ookpomhoghan eephugh dị agbatanhaạn dị oghol mọ “Victorious Faith” siphẹ Olympic Stadium mọ aMontreal. Opọ kụ aḍighi ogbogh ookpomhoghan eephugh dị mophạm ghan epẹ Quebec, awe dị opel li 80,000 kụ  usoor. Umạ imhị okumuan r’Ekpịgh Abuọ Iinhaghạn ookpomhoghan eephugh phọ. Mị ughaaphạn ni ibadị abuọ igeeghị iinhaghạn phọ, kụ idụgh ni omhiịn dị bidị ogeeghị imạ imạ ilọ Abugbaanhaạn phọ. Isighẹ ni mem dị repel li 20 awạ ophanyanhaạn asipuru abuọ iinhaghạn phọ, ilọ awe TV, ḅilhẹ r’abuọ asiredio, kụ ogẹ rukuron arumhuoghaạph ilọ ayira siphẹ arinyạ iinhaghạn phọ. Ingọ ni ogbogh ogbaanhaạn!

Lhạ phọ 1996 araraạr inmia ni iboom esi amhị. K’amem mọ mị aḍiiny bọ muụm mị ukumuan ghan pakirị dị roḅạ onhụ aFrench epẹ Quebec, lhạ phọ aḍiẹn phọ bịn usighẹ imhị oghị pakirị dị roḅạ ghan onhụ Aḅekeeny epẹ Toronto. Mị ulhoghoma mọ mị u/kpeanhaạn, kụ mị aghiilhaan ghan ipẹ mị kangọ bọ oghaạph onhụ aḄekeeny. Ikạr kụ ewạ mọ mị ulọm aZihova esi iiḅereghị ḅilhẹ ubeḍenhọm nyodị.

Mị umhoọgh ni oghiilhaan, kuolọ nyiidiphọ mị katue ni aḅẹm mọ mị ughelhọm ni agey okumuan iyạl asiạ epẹ Toronto. R’okparạm, aCarolyn ulhoghonhaạn ni imhị ḍighaạgh orue oḅạ onhụ Aḅekeeny phọ r’akpọ oḅio, kụ abumor r’abumarani phọ ubakị ni oḅilhẹ ukparamhị imhị agey. Yoor uu/binyemiom omhoọgh abumhoom arighirị.

Etigheri inhọn iiḍighi ḅilhẹ r’ookolhobian ilọ ookpomhoghan eghir phọ ropạm ghan bọ eekunha awiki phọ, mị ugbor ghan ni amite epẹ erugh phọ akumuan dị remạn ni oniin awạ torobọ aFraidee. Eeni abuniin uutughiạn ghan ni mọ, ‘Eeghe kụ iḍighi kụ mị kamite bọ epẹ erugh phọ mem dị omhoọgh ookpomhoghan eghir dị kopạm eekunha awiki phọ?’ Ghalhamọ r’iduọn phọ ni, mị umhiịn ni mọ oghaaphạn awe epẹ erugh phọ raamhanhamhi ghan oye. Ghalhamọ r’anyiidiphọ phọ ni, omite ghan epẹ erugh phọ oomo amem ringọ ghan imhị oḅaạl olhoghi.

Lhạ phọ 1998, uḅilhẹ usighẹ imhị r’aCarolyn oghị Montreal okumuan idiphọ abukọy eten dị ogbatanhaạn. Esi ibadị asiạ, arukumuan phọ amhị iḅarạm ookolhobian ilọ oghaạph iiḅi iinhaghạn phọ esi ogbo, r’okumuan ghan r’abuọ iinhaghạn phọ oolhemi aḍikarạph aḍiitughiạn dị awe omhoọgh oru esi Abugbaanhaạn phọ. Nyiidiphọ aCarolyn r’amhị rokelhọm ghan agey oghaạph iiḅi iinhaghạn phọ oḅenhị aruuruen dị purukụ oḍuạ oru ephẹn Canada kụ rowạ otuughạ iboom siphẹ aBaibul phọ.

Mem dị mị aatughiạn ilọ 68 asiạ arukumuan phọ amhị siẹn arukumuan phọ aZihova, mị raloghoma ghan ḍisẹph. Oghelhọm oḍighi iphelhegbeel phọ ḅilhẹ r’olhoghonhaạn aḍighaạgh ibadị awe olhegheri igey phọ, mekạr kụ ingọ imhị oḅaạl olhoghi. Mem dị onyanhị phọ amhị aLise ḅilhẹ r’olom odị mookonhom nmụny phọ abidị oḍume, bidị umhiigh ni okọy eten oomo amem mọ. Ringọ ghan imhị oḅaạl olhoghi mem dị mị amhiịn oophugh phọ odị siẹn oḍighi iphelhegbeel phọ. Mị akạr kụ rasẹph bumor r’abumarani phọ abuphẹ imạ areḍeenhaan phọ ḅilhẹ r’oroma phọ abidị ilhoghonhaạn bọ imhị ḍighaạgh ophoph oghị aghisigh siẹn ookpomhoghan phọ, ḅilhẹ r’omhaạr ophạm arukumuan ph’amhị. Mị amiịn mọ redughanhaan ghan oye phọ ophạm arukumuan oye phọ siẹn igey phọ, mem lọ oye phọ abeḍenhọm uwaloor iigbia phọ aZihova. (Ps. 51:11) Mị akiọm ni ghisigh rasẹph aZihova ongọ aani amhị imạ eepoogh ooseeny aani aḍien phọ odị!​—Ps. 54:6.