1-2. Ika kụ idị aZihova ughughuronhaan iyira eten oḍighi aani apakirị eghunotu phọ odị, kụ eeghe kụ iḍighi?

AZIHOVA mumhạgh iyira oḍighi aani apakirị eghunotu abuọ iiseeny ph’odị. P’eeghe imạ eepoogh! Abuọ eghunotu iiseeny ph’Enhaạn pọ abuphẹ moḅọgh bọ loor ongọ Enhaạn, oḅilhẹ omhoọgh omheeraam oghị esi ekiạ etagharạn oọny ph’odị. Yira oḍighi eghunotu oḅaạl olhoghi. Yira rokelhọm ni ghuḍum nyiidiphọ, ḅilhẹ olhoghi ayira aḅaạl li esi oḍuomolhoghi aghuḍum k’agee-pọ phọ—mughumọ isiẹn ade phọ obobọ epẹ k’akẹ.

² Ephomhoghiạn inyu ni aZihova ophighirọn ekiạ, oghughuronhom eten phọ epẹ yira kotue bọ oḍighom aani pakirị eghunotu phọ odị. (Jọn 3:16) “[Ugho ni iyira] ḍiboom aḍighi.” (1 Kọr. 6:20) AZihova amiteom ekiạ etagharạn phọ pidị idughanhaan iyira omhoọgh asiya dị ekpạr r’odị. Eḍighi ni eboom eghuan esi ayira omhạgh ghan Opọ abụgh bọ apelheghiom oomo isiẹn aḅirinhi phọ, mọ Odẹ. Siphẹ emhuoghaạph phọ eten bọ, yira umhiịn ni mọ aZihova kụ Okaraghị ogey Odẹ dị anhighẹ apelheghiom.

3. Ighẹn asipuru kụ edị yira kotue ni opuru? (Miịn igbe phọ “ AZihova Ulhegheri Ni Imhị Ḍughụm?”)

³ Eeni yira otue ni opuru aani ḍiniin phọ aḍipuru phọ oniin ogeọm aBaibul phọ apuru bọ mọ: “Mị kasighẹ eeghe kụ akpeọm aZihova esi oomo iiḅi phọ odị muḍighinhaan bọ imhị?” (Ps. 116:12) Ophagharanhaạn phọ pọ, yira ko/tue okpẹ aZihova Odẹ k’akẹ phọ ayira oomo iiḅi phọ odị muḍighi bọ iyira. Ghalhamọ r’iduọn phọ ni, ephomhoghiạn phọ yira omhoọgh bọ oghị esi odị r’inyu ghan ni iyira ophomhoghiạn odị oḅulemian. Otelhedom mọ aJọn agẹ mọ: “Yira ropomoghiạn ghan idị eḍighi bọ [Enhaạn] kụ iphụr iphomoghiạn iyira.” (1 Jọn 4:19) Kụ iḍighi kụ, ighẹn areten kụ edị yira kotue oḍeenhaan mọ yira opomhoghiạn ni aZihova Odẹ phọ ayira?

4. Odaphạn Jems 4:8, eeghe kụ iḍighi kụ ewạ bọ ni dị yira kolọgh ikuph oḍuraan otuman aZihova?

⁴ AZihova rawạ mọ yira oḍuraan otuman nyodị oḅilhẹ oghaaphạn ghan nyodị. (Bạl Jems 4:8.) Odị uḅenhị iyira mọ “[ooḅereghị] ghan oomo amem,” kụ odị raler ghan ni rurụ k’angọ iiḅereghị phọ ayira oomo amem. (Rom. 12:12) Amem i/lo dị odị ra/moọgh ghan eepoogh olher arurụ ongọ ayira. Pakirị ophọn ayira, yira ronaghạn aani ghan eḍọgh odị dị eego esi aạl ghan Ekpo Onhụ ph’odị Baibul phọ, ḅilhẹ r’arinyạ phọ rilhoghonhaạn ghan bọ iyira ḍighaạgh onhaghanhạn aBaibul phọ. Yira oḅilhẹ kẹn ronaghạn ghan eḍọgh odị mem lọ yira olher ghan rurụ ongọ raghaạph phọ rongọ ghan bọ epẹ otu ituughạ phọ. Idiphọ ogbor ghan oghaaphạn raloghonhaạn ghan bọ ḍighaạgh ibạm anmụny otuman aburudẹ r’aburunhiin abidị, kụ edị ogbor ghan oghaaphạn aZihova kulhoghonhaạn iyira ḍighaạgh oḍuraan otuman odị.

5. Ika kụ idị yira kotue onighemhị iiḅereghị ph’ayira?

⁵ Maạr akiririom aphọgh odọ iiḅereghị ph’anạ. AZihova rawạ mọ ookuom nyodị ipẹ edi bọ ekpom ayira esi iiḅereghị. (Ps. 62:8) Kụ iḍighi kụ, puruan loor mọ: ‘Iiḅereghị phọ amhị eḍighi ni ilọ anyụ r’anyụ bịn, dị mị radạph ghan idị ogẹ olhọgh ḍinyạ kụ kaaḅereghị ḍughụm, obobọ eḍighi idị eḍuạ ekpom amhị kụ emite ḍughụm?’ Iikia i/lo nạ apomhoghiạn ni aZihova iboom, ḅilhẹ nạ rawạ ni okparamhị asiya ph’anạ r’odị. Esi iduọn phọ, ewạ ni dị nạ kakaaphạn ghan nyodị egbạ gbạ amem. Kaạph raraạr ibooghiạn ph’anạ aḅenhị nyodị. Ḅenhị nyodị raraạr dị rengọ ghan nyinhạ ibo, ḅilhẹ r’idị rekọm ghan e/ḅaạl olhoghi kengọ nyinhạ. Kuphom ni owol mọ odị kalhoghonhaạn ni nyinhạ ḍighaạgh.

6. Ewạ mọ yira omhoọgh eeghe eegharạ, orue oḍuraan otuman Odẹ k’akẹ ph’ayira?

⁶ Eegharạ ongọ ghan aḍisẹph kilhoghonhaạn iyira ḍighaạgh otuman Odẹ k’akẹ ph’ayira. Iphẹn phọ eḅọph r’ipẹ okọ suọr phọ aḅẹm bọ mọ: “P’eeghe ibadị araraạr dị nạ maḍighi, Sey Zihova Enhaạn amhị, iikiạ iiḍighi phọ anạ ḅilhẹ r’iitughiạn phọ anạ esi ayoor. Olọ omaạm anạ o/lo; Mị aghị oḅạ oḅilhẹ oghaạph ilọ abidị, epughạn ogbi omhunhenhi!” (Ps. 40:5) Oḍighi ghan idị epelhom olhoghoma mọ yira osereghiạn ni; oḍighi ghan oḍeenhaan mọ yira osereghiạn ni aZihova esi ikpo onhụ r’iiḍighi. Iphẹn phọ rigbatạn ghan iyira r’awe aḅirinhi phọ aḍio arodon. Yira odi aḅirinhi dị awe ro/sẹph ghan Enhaạn ilọ oomo araraạr phọ maḍighinhaan bọ bidị. Ogbạ agey, eniin iyaạr dị ekạr eḍeenhaan mọ yira odi mem “aruukuna phọ” pọ e”legheri iiḅi. (2 Tim. 3:1, 2) Yira ku/tọl aani idiphọ!

7. Eeghe iyaạr kụ edị aZihova rawạ mọ yira oḍighi, kụ eeghe kụ iḍighi?

⁷ Idiphọ aburudẹ r’aburunhiin ro/wạ ghan bọ dị ibạm anmụny abidị kobeeghi, kuolọ komaạr opomoghiạn, kụ idị aZihova rawạ mọ oomo anmụny ph’odị ophomhoghiạn kụ ooseeny ghan nyodị. Ogbạ agey, ephomhoghiạn phọ yira omhoọgh bọ oghị esi oniin atum nyoniin kụ imạ bọ iyira eḍeenhaan idiphọ abugey aKristẹn. (Jọn 13:35) Kụ iḍighi kụ yira omeeraam ni iphẹn omoọr suọr phọ agẹ bọ mọ: “Pogh! Idị enhighẹ bilhẹ kẹn edụgh dị abumor koḅophoghạn otọl eniin esi r’amuḅọph!” (Ps. 133:1) Mem dị yira ophomhoghiạn bumor r’abumarani phọ ayira, pọ yira roḍeenhaan ghan aZihova mọ yira opomhoghiạn ni nyodị. (1 Jọn 4:20) P’eeghe idị edụgh oḍighom aani apakirị eghunotu abumor r’abumarani dị omhoọgh ‘igbiririph r’onmạ ghan ighirigiir” oniin atum nyoniin!—Efẹ. 4:32.

8. Odaphạn 1 Jọn 5:3, eeghe kụ ekpanhạ iyaạr phọ yira otụ bọ ronaghanhạn ghan aZihova?

⁸ Idiphọ aZihova rawạ bọ mọ ibạm anmụny onhaghanhạn ghan burudẹ r’aburunhiin abidị, kụ edị odị rawạ mọ yira onhaghanhạn ghan nyodị. (Efẹ. 6:1) Ekpẹ ni dị yira konaghanhạn ghan nyodị loor esi dị odị kụ Olemiạ ayira, ongoọm aghuḍum, ḅilhẹ asụ olhoghi apu burudẹ  r’aburunhiin ayira. Toroboiperolbọ, ekpanhạ iyaạr phọ yira otụ bọ kụ ronaghanhạn ghan bọ aZihova pọ ephomhoghiạn phọ yira omhoọgh bọ oghị esi odị. (Bạl 1 Jọn 5:3.) Ghalhamọ r’iduọn ibadị ariphigh edi bọ otuạn onhaghanhạn aZihova, odị iyira u/kpaariọm oḍighi iduọn phọ. AZihova ungọ ni iyira eereẹgh, kụ iḍighi kụ olhoghi odị raḅaạl ghan ni mem dị yira osaḅạr onhaghanhạn odị loor esi ephomhoghiạn phọ yira omhoọgh bọ oghị esi odị.

9-10. Eeghe kụ iḍighi kụ emhạn bọ ni maạr olhegheri asiigbu ph’aZihova, kụ oḅilhẹ odaphạn?

⁹ Aburudẹ r’aburunhiin rowạ ghan dị ibạm anmụny abidị komoọgh oghoph. Pọ kụ iyaạr phọ bidị ropighi ghan bọ siigbu dị keeḅakị raagharạ ph’abidị, pidị engọ bidị suọ. Mem lọ ibạm anmụny phọ odaphạn iiḅakiọm mọ ipẹ phọ, reḍeenhaan ghan mọ bidị oḍuom ni olhoghi burudẹ r’aburunhiin ph’abidị, ḅilhẹ olọgh ni bidị eegu. P’eeghe idị emhạn maạr epelhom dị yira kolegheri siigbu Odẹ k’akẹ phọ ayira, kụ otuụgh odaphạn! Yira oḍighi iduọn phọ, pọ reḍeenhaan ghan mọ yira opomhoghiạn ni oḅilhẹ olọgh eegu aZihova, kụ yira komooghọm ni suọ. (Isa. 48:17, 18) Kuolọ abuphẹ oghel bọ aZihova roḍighinhaan ghan ikarạph siloor abidị.—Gal. 6:7, 8.

¹⁰ Mem dị yira orọl eten phọ epẹ eḅeraạn bọ aZihova, odị kughoph ni iyira asighẹ esi araraạr dị kekọm iiḅaghamhị engọ loor phọ ayira, iitughiạn phọ ayira, ḅilhẹ r’asiya phọ ayira r’odị. AZihova alegheri ipẹ kekạr bọ inhighenhaạn iyira. Oniin onyọ umarani dị oghol mọ Aurora dị odi ghan epẹ United States, aḅẹm mọ, “Mị alegheri ni mọ onhaghanhạn aZihova rengọ ghan ghụn okạr akugey aghuḍum oye phọ.” Ipẹ kụ idị edi aani ni esi atorobọ onyọ ayira. Nạ mamooghọm aani ghan  ni suọ esi onhaghanhạn iiḅakiọm ephomhoghiạn phọ aZihova ḍughụm?

11. Ika kụ idị iiḅereghị rilhoghonhaạn ghan iyira ḍighaạgh?

¹¹ Iiḅereghị rilhoghonhaạn ghan iyira ḍighaạgh onhaghanhạn, ghalhamọ r’amem dị ekpạr ri oḍighi iduọn phọ. Eeni amem rikparanhaạn ghan ni iyira onhaghanhạn aZihova, kuolọ olhọgh ikuph eenhan inyuughiom oḍighi ikarạph phọ ayira. Omoọr suọr phọ alọm Enhaạn mọ: “Tiitieni eephuạ amhị ilọ onhaghanhạn anạ.” (Ps. 51:12) Umarani dị oghol m’aDenise, dị rakọy ghan eten oomo amem, aḅẹm mọ, “Mem dị ikparanhaạn imhị onhaghanhạn iniin itọ aZihova, Mị raaḅereghị ghan kalhọm inyaạm oḍighinhom ipẹ eru bọ inẹ.” Yira kotue ni okuphom owol mo torobọ amem aZihova aakolhobian ni onhaghạn odọ ilọm m’ipẹ phọ.—Luk 11:9-13.

12. Efesọs 5:1 eḅẹm mọ yira oḍighi eeghe?

¹² Bạl Efesọs 5:1. Idiphọ “abuuḅi anmụny” aZihova, yira roḍighi ghan ni ipẹ yira kotue bọ, otuughaạny odị. Yira rotuughaạny ghan raagharạ ph’odị esi ophomhoghiạn ghan, oyoghoyoghọ, ḅilhẹ r’osạr ghan owilhenhaạn abunhọn. Eeni etue ni enyu buphẹ k”olhegheri bọ Enhaạn otuughạ ilọ Enhaạn mem dị omhiịn imạ aroozọ ph’ayira. (1 Pit. 2:12) Aburudẹ r’aburunhiin dị oḍighi Kristẹn omoọgh egey ephigh otuạn otuughaạny aZihova esi eten phọ epẹ bidị kozoọm ghan bọ nmụny phọ abidị. Idị eḍighi bọ, mem dị bidị otuughaạny aZihova kenyu ibạm anmụny phọ abidị oḍigh arighirị r’Odẹ ephomhoghiạn phọ ayira, Zihova.

13. Eeghe kụ kilhoghonhaạn iyira ḍighaạgh omhoọgh akpọ olhoghi?

 ¹³ Idiphọ ibạm anmụny robagaam ghan bọ burudẹ abidị koḅilhẹ oghaạph ilọ abidị r’oḅaạl olhoghi, kụ edị yira robagaam ghan kẹn Odẹ k’akẹ phọ ayira, Zihova, koḅilhẹ oḍighi idị abunhọn awe kolegheri aani nyodị. Oomo phọ ayira rologhoma aani ghan ni idiphọ Uw-emhạ phọ Devid alhoghoma bọ kụ agẹ bọ mọ: “Mị kabagaam ni aZihova.” (Ps. 34:2) Kokaạph ika, eḍighi maạr dị yira rokiilhom umugholoor? Ika kụ idị yira kotue omoọgh akpọ olhoghi? Yira komoọgh ni akpọ olhoghi mem dị yira ootughiạn ibo phọ k’engọ bọ aZihova ḅilhẹ r’ipẹ abunhọn komooghọm bọ suọ mem dị bidị otuughạ aani ilọ aZihova. AZihova k’ungọ ni iyira akpọ oḅio phọ ewạ bọ. Odị angọ ni akpọ olhoghi Kristẹn oḅẹl okuron asiạ phọ, kụ k’ungọ aani ni iyira.—1 Tẹs. 2:2.

14. Eeghe kụ iniin ariphigh phọ eḍighi bọ kụ emhạn bọ ni maạr ophinhom aani abin rukumuan oḍighi-awe bumatuạn phọ?

¹⁴ AZihova ra/lọgh ghan we iiseẹny, esi iduọn phọ, olhoghi odị raḅaạl ghan agey mem dị odị amhiịn dị yira roḍeenhaan ephomhoghiạn bunhọn, etigheri ekpisi phọ bidị oḍuạ bọ oru. (Iiḍighi 10:34, 35) Eniin eten dị enhighẹ epelheghiom oḍeenhaan ghan ephomhoghiạn bunhọn, pọ esi oghaạph aani iiḅi iinhaghạn phọ oḅenhị abidị. (Mat. 28:19, 20) Oḍighi phọ ophọn phọ k’akọm eeghe kụ amiteom? Kanighemhị dọl aghuḍum abuphẹ runhaghanhạn bọ iyira nyiidiphọ, ḅilhẹ bidị omoọgh oḍuomolhoghi aghuḍum k’agee-pọ ghisigh.—1 Tim. 4:16.

15-16. Ighẹn ariphigh kụ edị yira kotuạn omoọgh oḅaạl olhoghi?

¹⁵ AZihova aḍighi odẹ ephomhoghiạn, kụ iḍighi kụ odị rawạ mọ eghunotu phọ odị omhoọgh oḅaạl olhoghi. (Isa. 65:14) Ibadị ariphigh otuạn omhoọgh oḅaạl olhoghi edi ni nyiidiphọ, etigheri iduọn eeni amem yira rosoman ghan bọ iiḅaghamhị. Esi omaạm, yira omoọgh oḍuomolhoghi mọ Odẹ k’akẹ phọ ayira uphomhoghiạn ni iyira iboom. Yira omoọgh olhegheri iyaạr Ekpo Onhụ phọ Enhaạn. (Jer. 15:16) Ḅilhẹ kẹn yira oḍighi aani pakirị eghunotu awe dị ophomhoghiạn aZihova, ophomhoghiạn siigbu phọ odị, ḅilhẹ oniin aphomhoghiạn nyoniin.—Ps. 106:4, 5.

¹⁶ Eḍighi maạr dị yira okuphom owol mọ aghuḍum mọ ayira kanighẹ ni ghisigh, pọ kilhoghonhaạn iyira ḍighaạgh ophamhanhạm oḅaạl olhoghi. Yira olegheri mọ moọny amem aZihova kagbuurogh ikarạph iḍighinhom araraạr, kụ siphẹ eeḍiạn iiḅakiọm Itooghị Omhạr phọ odị koḅilhẹ oḍighi de phọ paradaịs. Yira oḅilhẹ kẹn omoọgh ookiạ oḍuomolhoghi mọ koḅilhẹ ni oḅerion ongọ ghuḍum buphẹ momhuughu bọ, kụ oḅophoghạn r’abuọ ephomhoghiạn phọ abidị. (Jọn 5:28, 29) P’eeghe amem ibo! Edị emhạn maạr epelheghiom pọ, yira okuphom ni owol mọ moọny amem torobọ oye epẹ k’akẹ r’isiẹn ade phọ k’angọ ni Odẹ ephomhoghiạn phọ ayira eghuan phọ, iiseeny phọ, r’iiḅereghị phọ esi bọ nyodị.