Ghalhamọ r’iduọn phọ, aZihova rawạ mọ yira okparạm okori mem mọ odị amaanhaạn bọ oḍighi iyaạr omiteom. Uḍighi ika kụ odị rawạ bọ dị yira kokparạm okori? Eeghe kụ kilhoghonhaạn iyira ḍighaạgh okparạm okori r’ibo?

UḌIGHI IKA KỤ AZIHOVA RAWẠ BỌ DỊ YIRA KOKPARẠM OKORI?

ABaibul phọ aḅẹm mọ: “AZihova phọ rakori ni onmạ anyinha ighirigiir. Odị anyạ ni oseenyạn anyinha idị eḍighi bọ odị raḍighi ghan ni ipẹ esel bọ oomo amem. Oḅaạl olhoghi odianhaan buphẹ okpasị bọ olhoghi abidị esi odị.” (Isa. 30:18) Ii uḅạ ikpo onhụ phọ iphẹn phọ oḅenhị oomo buọ aJu phọ oḅaạr bọ emhụ. (Isa. 30:1) Kuolọ abulọ okpẹ oḍuomolhoghi urọl li igbo aJu phọ abuẹn phọ, kụ ikpo onhụ phọ iphẹn phọ ikạr kụ engọ bidị oḍuomolhoghi. Ikpo onhụ phọ iphẹn phọ engọ aani kẹn ni rebenhẹ aZihova dị okpẹ oḍuomolhoghi rodon.

Esi iduọn phọ, yira okparạm okori, loor esi dị, aZihova akparạm ni rakori. Odị amoọgh ni mem dị odị mamaanhaạn osiemhi eekunha aḅirinhi phọ ophọn phọ, kụ odị rakori ghan dị aḍio phọ r’amem mọ keteẹny. (Mat. 24:36) Mem mọ amuphẹ phọ, kekạr kụ eegholhaan mọ oomo asiagbạ okpẹ phọ Eru agbaanhaạn bọ aZihova r’abuphẹ rokumu bọ Nyodị mọ okpẹ ni. Opọ kụ amem dị Odị kapiemhi Setan r’atorobọ oye dị odi agạ odị. Kuolo aZihova kunmạ ni iyira ighirigiir.

Siẹn yira okparạm bọ rokori, aZihova ka/sighẹ iiḅaghamhị phọ ayira, kuolọ odị ungọ iyira okuphom owol mọ yira kotue ni omoọgh oḅaạl olhoghi iduọn yira okparạm bọ rokori. Idiphọ Aizaya aghaạph bọ, yira kotue ni omoọgh oḅaạl olhoghi iduọn yira rogon bọ obobọ oḍuom bọ olhoghi dị imạ iyaạr kemite. (Isa. 30:18) a Ika kụ edị yira kotue omoọgh oḅaạl olhoghi phọ opọ phọ? Inya araraạr ketue ni ilhoghonhaạn iyira ḍighaạgh.

IDỊ YIRA KOTUE OMOỌGH OḄAẠL OLHOGHI IDUỌN YIRA ROKORI BỌ

Tuutughiạn ghan imạ araraạr phọ remitenhaan ghan bọ nyinhạ. Uw-emhạ phọ Devid mamhiịn ni iboom ikarạph iḍighinhom araraạr awe siphẹ aghuḍum mọ odị. (Ps. 37:35) Ghalhamọ r’iduọn phọ ni, odị agẹ mọ: “Ḅoorian bịn ḅiribiriph ghisigh aZihova kụ akparạm akori ghan nyodị. Kaa/ḅaghamhiạn olhoghi esi oye  phọ opọ enhighenhọm bọ, oye phọ opọ aaghiạn bọ kụ raḍighi yogh bọ odọ kirokirọ.” (Ps. 37:7) ADevid asighẹ ni alhọgh olhoghi oroma phọ opọ phọ kụ agbon ipẹ aZihova aguanhaan bọ ophẹl odị. Odị aḅilhẹ kẹn asereghiạn ḍisẹph kirokirọ phọ aZihova masẹph bọ nyodị. (Ps. 40:5) Eḍighi maạr dị yira ogbon imạ araraạr phọ rimitenhaan ghan bọ iyira ḅilhẹ yira u/tolhonhaạn ootughiạn idị ikarạph araraạr phọ rimitenhaan ghan bọ iyira mekọm, pọ kidughanhaan ni iyira okparạm okori aZihova.

Gbor ghan aaseeny aZihova. Eeni aDevid kụ agẹ bọ Psalm 71, odị aḅenhị aZihova mọ: “Mị kakiọm ni ghisigh akori ghan; mị kaaseeny ghan nyinhạ aḅilhẹ aaseeny.” (Ps. 71:14) Ika kụ edị odị kaaseeny bọ aZihova? Odị kaḅenhị bunhọn ilọ aZihova aḅilhẹ amoọr suọr iiseeny angọ nyodị. (Ps. 71:16, 23) Idiphọ aDevid, yira kotue ni omoọgh oḅaạl olhoghi iduọn yira rokori bọ aZihova. Yira kotue ni ooseeny aZihova mem dị yira rogbạ ikpo onhụ phọ, rokaạph raghaạph r’awe, ḅilhẹ r’amem dị yira romoọr suọr otu ituughạ. Mem lọ nạ aḅilhẹ ramoọr ḍuọr otu ituughạ kiririom ni aphogh ikpo onhụ olhọgh ophophe phọ edi bọ siphẹ aḍuọr phọ.

Meera abumor r’abumaranhi phọ okparamhị nyinhạ. Mem dị aDevid asoman ipaanhaạn, odị aḅenhị aZihova mọ: “Ghisigh awe phọ anạ mị kagbeelhom ni ḍien phọ anạ.” (Ps. 52:9) Yira kẹn kotue ni omoọgh okparamhị ḍighaạgh abumor r’abumaranhi phọ ayira mem dị yira oghị ituughạ, omite epẹ erugh phọ ogbạ ikpo onhụ phọ, ḅilhẹ r’amem dị yira ookpomhoghan ooḅughonhaan oḍẹ oḍẹ.—Rom. 1:11, 12.

Kparamhị oḍuomolhoghi phọ anạ. Psalm 62:5 eḅẹm mọ: “Mị aḅoorian bịn kụ rakori Enhaạn loor esi dị mị akpasị oḍuomolhoghi amhị esi odị.” Oḍuomolhoghi dị akpạr aḅaramaạm okuphom owol raraạr phọ yira rogon bọ—kụ akạr kụ amạn maạr eḍighi maạr dị yira rowạ ni okparạm ghalhamọ r’amem dị eghịgh mudị eekunha aḅirinhi phọ reebinya. Yira omoọgh okuphom owol mọ aruguanhaan phọ aZihova kemunughan ni etigheri onhụ asiạ dị yira morọl okori. Yira kotue ni okparamhị oḍuomolhoghi phọ ayira esi otuughạ ghan Ekpo Onhụ phọ Enhaạn—imiịn phọ, muḅọph phọ odi bọ Ekpo Onhụ phọ odị, ḅilhẹ r’oomo ipẹ aZihova agananamhi bọ loor odị uḍeenhaan iyira. (Ps. 1:2, 3) Ḅilhẹ kẹn, “uwaloor iigbia phọ kụ aḍiemiom ghan iiḅereghị phọ [ayira]” pidị yira otue okiọm ghisigh imạ asiya phọ ayira r’aZihova, iduọn yira rokori bọ dị oguanhaan aghuḍum k’gee-pọ phọ kamunughan.—Jud 20, 21.

Idiphọ Uw-emhạ phọ Devid, kuphom owol mọ aZihova rapogh ghan ni kaḅilhẹ aḍeenhaan ephomhoghiạn oḅạr phọ Odị buphẹ rokori bọ nyodị. (Ps. 33:18, 22) Kiọm ghisigh akparạm akori ghan aZihova esi ootughiạn ghan imạ araraạr phọ remitenhaan ghan bọ nyinhạ, agbor ghan aaseeny aZihova, amheera mọ abumor r’abumaranhi phọ okparamhị nyinhạ, aḅilhẹ akparamhị ghan oḍuomolhoghi phọ anạ amhạn bọ ni maạr.