1. Ephomhoghiạn phọ Enhaạn reḍighi ghan idị nạ kaloghoma ika?

OTELHEDOM mọ aJọn agẹ mọ, “Enaạn phọ ephomoghiạn.” (1 Jọn 4:8) Ikpo onhụ phọ iphẹn phọ eghom bọ ni iitughianhạm iyira ikpanhạ igey mọ: Enhaạn phọ aḍighi bọ zin aghuḍum mọ, kụ azin ephomhoghiạn kẹn. AZihova uphomhoghiạn iyira! Ephomhoghiạn phọ odị reḍighi ghan idị yira kologhoma oghoph, omoọgh oḅaạl olhoghi, ḅilhẹ r’ogbaanyạn.

2. Odaphạn Matiu 22:37-40, ighẹn kụ iyạl phọ ikpanhạ itọ phọ, ḅilhẹ uḍighi ika kụ eeni kikparanhaạn bọ iyira ooko omhunhenhiom iyạl phọ?

² Esi aKristẹn, oḍeenhaan ghan ephomhoghiạn i/ḍighi bin dị bidị kụ kosaḅạr. Eḍighi ghụn itọ. (Bạl Matiu 22:37-40.) Mem dị yira olhegheri aZihova agey, etue ni idughanhaan iyira ooko iḅẹl itọ phọ. Loor esi dị, aZihova amunughan; amoọgh igbiririph, ḅilhẹ ruphogh ghan ni iyira. Kuolọ etue ni ikparanhaạn iyira ooko omhunhenhiom iyạl itọ phọ. Eeghe kụ iḍighi? Loor esi dị abumor r’abumarani phọ ayira—buphẹ oḍighi aani bọ matuman ayira,—u/munughan. Eeni amem, bidị otue ni okaạph iyaạr ḅilhẹ uzoọm iyira eten dị i/ḍeenhaan ogbolhomaam. AZihova alegheri ni mọ kikparanhaạn ni iyira ooko itọ phọ iphẹn phọ, kụ iḍighi kụ odị asighẹ ni buniin abugeọm aBaibul phọ ageọm iyaạr phọ eḍighi bọ kụ oniin kaḍeenhaan ghan bọ ephomhoghiạn akị esi oniin ḅilhẹ r’ilọ oḍighi ipẹ phọ. Oniin odị agẹ aani ilọ ipẹ phọ pọ aJọn.—1 Jọn 3:11, 12.

3. AJọn aghaạph akpaariọm ilọ eeghe?

³ Siphẹ igẹ phọ odị, aJọn aghaạph ni akpaariọm mọ aKristẹn omoọgh oḍeenhaan ghan ephomhoghiạn. Okạr oghaạph, siphẹ aḍinyạ aBaibul phọ aJọn agẹ bọ ilọ adọl aghuḍum mọ aZizọs, odị aḍighinhom ni ikpo onhụ phọ “ephomoghiạn” ḅilhẹ “aphomoghiạn” apuemhi iraạr abueriphọ abugeọm aGospel phọ. AJọn ramạn okuron asiạ mem mọ agẹ bọ ḍinyạ phọ odị ḅilhẹ r’iraạr phọ  ipheriphọ arinyạ phọ odị. Igẹ phọ ophum bọ Jọn ogẹ, itughemhị iyira mọ ephomhoghiạn kụ enyu ghan torobọ iyaạr dị onyọ aKristẹn raḍighi. (1 Jọn 4:10, 11) Isighẹ ni mem kụ aJọn agbi bọ olhegheri ilọ iphẹn phọ.

4. AJọn aḍeenhaan ghan ni ephomhoghiạn oomo amem ḍughụm?

⁴ K/oomo amem kụ edị aJọn aḍeenhaan ghan ephomhoghiạn mem mọ odị aḍighi bọ oḍoọgh oye. Esi omaạm, eniin amem dị aZizọs r’abutelhedom mọ odị rokị Jeruselem kụ oogo Sameria, eniin emhạ aSameria u/meera ulọgh bidị otu. AJọn aḍighi ika? Odị apuru mọ omhạgh niạn k’akẹ osoore ophiemhi oomo awe emhạ phọ! (Luk 9:52-56) Enhọn amem kẹn aJọn apiọm ni oḍeenhaan ephomhoghiạn oghị esi abueriphọ abutelhedom mọ. AJọn r’umor phọ odị Jems, uḅenhị onhiin abidị mọ aghị aḅenhị Zizọs mọ angọ bidị igbogh asidọl, orọl ekeeny r’elhiom odị epẹ Omhạr phọ. Mem mọ abueriphọ abutelhedom mọ onhaghạn bọ ipẹ aJems r’aJọn oḍighi bọ, ughaghạm ni bidị olhoghi! (Mat. 20:20, 21, 24) Toroboiperolbọ, etigheri sipiomạn phọ odị iphẹn phọ, aZizọs aphomhoghiạn ni nyodị.—Jọn 21:7.

5. Yira kooḅeghiọn eeghe siẹn emhuoghaạph phọ ephẹn phọ?

⁵ Siẹn emhuoghaạph phọ ephẹn phọ, yira kooḅeghiọn eḍeenhaan phọ aJọn ḅilhẹ r’iniin araraạr dị odị agẹ ilọ ephomhoghiạn. Iduọn yira rooḅeghiọn bọ, yira kotuughạ idị yira kotue oḍeenhaan aani bumor r’abumarani phọ ayira ephomhoghiạn. Yira koḅilhẹ kẹn otuughạ ilọ eten dị emhạn maạr dị uw-emhụ eghunotu kaḍeenhaan ghan mọ odị apomoghiạn ni eghunotu phọ odị.

6. Ika kụ idị aZihova aḍeenhaan mọ onọ uphomhoghiạn ni iyira?

⁶ Yira otue ni ootughiạn mọ ophomhoghiạn awe pọ olhoghoma ghan igey ilọ abidị oḅilhẹ oḅạ ghan igey ikpo onhụ bịn. Kuolọ eḍighi maạr dị yira okạr ophomhoghiạn bidị, pọ ewạ mọ oḍeenhaan ephomhoghiạn phọ ayira esi imạ iiḍighi. (Poghom Jems 2:17, 26.) Esi omaạm, aZihova uphomhoghiạn iyira. (1 Jọn 4:19) Kụ odị raḍeenhaan ghan ephomhoghiạn phọ odị dị eego esi imạ ikpo onhụ phọ ogẹ bọ siphẹ aBaibul phọ. (Ps. 25:10; Rom. 8:38, 39) Toroboiperolbọ, yira omeeraam mọ Enhaạn uphomhoghiạn ni iyira loor esi ipẹ odị raḍighi ghan bọ, ki/pẹ odị rakaạph ghan bọ bịn. AJọn agẹ mọ: “Idiphọ Enaạn erom bọ ogina Oọny phọ odị mọ aru siẹn aḅirini phọ pidị yira otuạn nyodị omoọgh ghuḍum kụ idị odị uḍeenaan bọ iyira ephomoghiạn phọ odị.” (1 Jọn 4:9) AZihova amheera ni mọ ooḅi oọny phọ odị amhiinhọm aḅilhẹ umhughanhaan iyira. (Jọn 3:16) Iikia edi niiniin mọ aZihova akạr ri uphomhoghiạn iyira ḍughụm?

7. AZizọs aḍighi eeghe oḍeenhaan mọ odị uphomhoghiạn ni iyira?

⁷ AZizọs angọ ni okuphom owol butelhedom  mọ odị mọ onọ apomhoghiạn ni bidị. (Jọn 13:1; 15:15) Odị aḍeenhaan ni ipẹ ephomhoghiạn phọ odị esi abidị r’ayira elheeny bọ, ke/si ikpo onhụ phọ odị bịn kuolọ esi iiḍighi phọ odị. AZizọs aḅẹm mọ, “ephomoghiạn i/Io ghan dị ebụgh epu nyepẹ oye dị aghoI righirị odị bịn aphiemi ghuḍum odị.” (Jọn 15:13) Mem lọ yira ootughiạn ilọ ipẹ aZihova r’aZizọs uḍighinhaan bọ iyira, kinyu iyira oḍighi eeghe?

8. Eeghe kụ idị 1 Jọn 3:18 eḅẹm mọ oḍighi?

⁸ Yira roḍeenhaan ghan mọ yira opomhoghiạn ni aZihova r’aZizọs esi onhaghanhạn ghan abidị. (Jọn 14:15; 1 Jọn 5:3) AZizọs akạr kụ uḅenhị iyira mọ oniin aphomhoghiạn ghan nyoniin. (Jọn 13:34, 35) Yira koḅenhị ghan bumor r’abumarani phọ ayira mọ yira opomhoghiạn ni bidị kụ oḅilhẹ ghan oḍighi oḍeenhaan ipẹ phọ. (Bạl 1 Jọn 3:18.) Ighẹn kụ iniin araraạr dị yira kotue oḍighi oḍeenhaan mọ yira opomhoghiạn ni bidị?

9. Ephomhoghiạn inyu Jọn oḍighi eeghe?

⁹ AJọn mutue ni arọl r’odẹ odị aḅilhẹ aghị ghan oḍighi akonị eghunotu phọ abidị pidị amoọgh ikpoki. Kuolọ, odị asighẹ ghụn dọl aghuḍum mọ odị esugha bọ alhoghonhaạn ghan ḍighaạgh bunhọn awe olhegheri aani igey phọ ilọ aZihova r’aZizọs. Okol aghuḍum mọ aJọn asaḅạr bọ o/dugh. Ugbiphoghọm ni nyodị, kụ reteẹny bọ elọ epẹ eekunha oḅẹl okuron asiạ phọ mem dị odị maḍighi okumor oye, bịn oroph nyodị ogbeph. (Iiḍighi 3:1; 4:1-3; 5:18; Ogan. 1:9) Ghalhamọ r’iduọn olhọgh bọ nyodị ikoli loor emhụ ogbeelhom ilọ aZizọs, odị amạ ni amiteom mọ odị raatughiạn ghan ni ilọ abunhọn. Esi omaạm, mem mọ odị odi bọ ekpu ogbo phọ aPatmọs, odị agẹ ni ipẹ ogananami bọ oḍeenhaan nyodị aghiomaạn ookpomhoghan phọ, pidị bidị olegheri aani ilọ araraạr dị “kenuụn ni emiteghu.” (Ogan. 1:1) Kụ eeni siẹn amem mọ omiteom bọ nyodị ikoli phọ epẹ Patmọs, kụ edị aJọn agẹ bọ ḍinyạ phọ odị ilọ adọl aghuḍum mọ r’arukumuan phọ aZizọs. Odị aḅilhẹ kẹn agẹ iraạr arinyạ olhọgh ophophe oḅilhẹ okparamhiọm abumor r’abumarani phọ. Ika kụ idị nạ katue atuughaạny aani eegharạ osighẹ aloor ophighironhọm ekiạ phọ aJọn?

10. Ika kụ idị nạ kaḍeenhaan mọ nạ apomoghiạn ni we?

¹⁰ Nạ katue ni aḍeenhaan mọ nạ apomoghiạn we esi ipẹ nạ asaḅạr bọ oḍighinhom aghuḍum mọ anạ. Aḅirinhi phọ aSetan rawạ ghan dị nạ kaatughiạn ghan ilọ aloor anạ bịn, esi ogbo ikpoki obobọ omiteom aḍien. Kparipẹ r’adọl aghuḍum dị erọl idiphọ, aKristẹn oomo isiẹn aḅirinhi phọ rolọgh ghan mem mọ amuphẹ bidị kotue bọ, ogbeelhom adom Omhạr phọ, ḅilhẹ r’olhoghonhaạn aḍighaạgh we oḍuraan ogbị aZihova. Abuniin okạr rokaạph ghan koḅilhẹ otughemhị oomo amem.

11. Ika kụ idị abukaaphọm dị okpẹ oḍuomolhoghi roḍeenhaan ghan mọ bidị opomoghiạn ni aZihova ḅilhẹ r’abumor r’abumarani phọ abidị?

¹¹ Rekpaariọm ghan ni ibadị aKristẹn okuamhị okumuan pidị bidị otue ologhonhaạn ḍighaạgh siloor abidị r’eghunotu abidị. Ghalhamọ r’iduọn phọ ni, abukaaphọm mọ abuẹn okpẹ bọ oḍuomolhoghi rologhonhaạn ghan ni ḍighaạgh oḍighom mọ Enhaạn torobọ eten dị bidị kotue. Esi omaạm, abuniin rologhonhaạn ghan ni ḍighaạgh mem dị ekperenhom iyaạr emite, abunhọn odi rukumuan odoghoḍi aruutu, kụ torobọ oye amoọgh ni eepoogh osogh aani ghan ikpoki olhoghonhaạn aḍighaạgh oḍighi oomo isiẹn aḅirinhi phọ. Bidị roḍighi ghan iduọn phọ loor esi dị bidị opomoghiạn Enhaạn r’abunhọn awe. Torobọ awiki, yira roḍeenhaan ghan mọ yira opomoghiạn ni bumor r’abumarani phọ ayira esi oghị ghan ituughạ ḅilhẹ oghaạph aani ipẹ yira ookolhobian bọ mem dị ituughạ phọ rekị. Ghalhamọ aloor ayira idugh ni, yira rokị ghan ni ituughạ phọ. Ghalhamọ oḅio ayira rakaph ni, yira ropagharanhaạn ghan ni ḍipuru. Bilhẹ ghalhamọ r’iduọn oomo ayira omhooghọgh bọ ni iiḅaghamhị, yira rolọgh ghan ni kophophe  bunhọn mem dị ituughạ phọ kee/mhiigh obobọ mem dị ituughạ phọ memiteghu. (Hib. 10:24, 25) P’eeghe idị olhoghi ayira aḅaạl loor esi oḍighi phọ abumor r’abumarani phọ ayira roḍighi bọ!

12. Eghẹn kụ enhọn eten dị aJọn aḅilhẹ aḍeenhaan ephomhoghiạn aghị esi abumor r’abumarani phọ?

¹² AJọn o/ḍeenhaan ghan ephomhoghiạn phọ odị amhoọgh bọ aghị esi abumor r’abumarani phọ esi osẹph ghan abidị bịn, kuolọ odị angọ ghan kẹn bidị oroma. Esi omaạm, siphẹ arinyạ phọ odị, aJọn asẹph ni bumor r’abumarani phọ ilọ omheeraam mọ r’imạ iiḍighi phọ abidị, kụ aḅilhẹ angọ bidị oroma dị amhạn maạr ilọ ikarạph. (1 Jọn 1:8–2:1, 13, 14) Igina phọ kẹn ni, rewạ ni mosẹph ghan bumor r’abumarani phọ ayira esi igey araraạr phọ bidị roḍighi ghan bọ. Kuolọ eḍighi maạr dị oye ramoọgh ekarạph eegharạ obobọ ezọ dị i/nighẹ, yira kotue ni oḍeenhaan ephomhoghiạn esi oḅenhị odị r’amagheel ipẹ rewạ bọ mọ odị alhegheri. Rewạ ghan ni akpọ oḅio orue ongọ oye oroma, kuolọ aBaibul phọ aḅẹm mọ ogey oyaghirị ratoma ghan ni obobọ raalemhi ghan ni oyaghirị.—Prov. 27:17.

13. Eeghe iyaạr kụ edị yira ko/ḍighi ghan?

¹³ Eeni amem, yira roḍeenhaan ghan ephomhoghiạn bumor r’abumarani phọ ayira esi araraạr dị yira ro/ḍighi ghan. Esi omaạm, iyaạr dị bidị oghaạph re/nuụn ghan kephin olhoghi ayira. Tuutughiạn idị emite mem mọ rekpụl bọ eekunha aghuḍum mọ aZizọs siẹn ade phọ. Odị aḅenhị bumatuạn phọ odị mọ eḍighi maạr dị bidị rowạ omhoọgh aghuḍum pọ bidị kobạ iphulhupul phọ odị oḅilhẹ opughọl iḅaạl phọ odị. (Jọn 6:53-57) Oghaạph phọ ophọn phọ aḍigh ni ḍiigu dị tutụ ibadị abumatuạn phọ owilhẹ nyodị oḅuạ—kuolọ abugey arighirị phọ aZizọs idiphọ aJọn, uḅạr ri nyodị. Bidị urọl li r’odị. Bidị u/naghanhạn ipẹ aZizọs aghaạph bọ, kụ eeni iḍighi ni iikia esi abidị. Toroboiperolbọ, abugey arighirị phọ aZizọs uu/tughiạn mọ odị akaạph iyaạr dị i/nighẹ, bịn ephin ilhoghi abidị. Kparipẹ ghụn, bidị uḍuom ni olhoghi nyodị loor esi dị bidị olegheri mọ odị rakaạph ghan idị eru inẹ. (Jọn 6:60, 66-69) P’eeghe idị emhạn maạr dị iyaạr dị arighirị ayira oghaạph kee/gboronhom ghan epin olhoghi ayira! Kparipẹ ghụn, yira kongọ ghan bidị eepoogh dị bidị r’ayira kokaaphọgh.—Prov. 18:13; Eccl. 7:9.

14. Uḍighi ika kụ yira ko/lọgh bọ ḍien bumor r’abumarani phọ ayira?

¹⁴ AJọn aḅilhẹ ni uḅenhị iyira mọ ku/lọgh ḍien bumor r’abumarani phọ ayira. Eḍighi maạr dị yira u/dạph oroma phọ opọ phọ, aSetan katue ni usighẹ iyira aḍighinhom. (1 Jọn 2:11; 3:15) Iphẹn phọ imitenhaan ni buniin siphẹ eekunha oḅẹl okuron asiạ phọ, aSetan akparaghạ  ghan ni ipẹ odị katue bọ okọm amulọgh ḍien r’ogbariọn awe phọ Enhaạn. Mem mọ aJọn agẹ bọ rinyạ phọ odị, awe dị oghịgh aani Setan moḍiku siphẹ ookpomhoghan phọ. Esi omaạm, aDiotrifis akọm ni oboom amadia oniin ookpomhoghan. (3 Jọn 9, 10) Odị o/lhọgh eegu we phọ aloor phọ repogh bọ olhọgh ghan bọ mọ oru ophogh ookpomhoghan phọ. Odị akparaghạ ghan kẹn ophorogh isiphẹ ookpomhoghan phọ buphẹ olhọgh ghan bọ otu we dị u/ḅeraạn nyodị. P’eeghe oḅom emhụ! ASetan akạr kụ anyaaghiạn ogbariọn ḅilhẹ r’okpạr opu awe phọ Enhaạn ḍio arodon. Ku/meera amulọgh ḍien ugbariọn iyira.

15. Eeghe kụ edị ewạ mọ uw-emhụ eghunotu alhegheri?

¹⁵ Eniin eten dị emhạn maạr dị uw-emhụ eghunotu phọ kaḍeenhaan mọ onọ apomoghiạn ni eghunotu phọ odị pọ omiteom ghan ongọ araraạr phọ ipẹ ewạ bọ siphẹ eghunotu phọ. (1 Tim. 5:8) Toroboiperolbọ, ewạ ni dị odị kalegheri mọ olhoghonhaạn aḍighaạgh eghunotu phọ odị omhoọgh amugey amasian r’aZihova kụ imhạn maạr epelhom. (Mat. 5:3) Lọgh elhegh eḍeenhaan dị aZizọs angọ ruw-emhụ eghunotu. Odaphạn ipẹ aJọn agẹ bọ ilọ aZizọs, ghalhamọ r’amem mọ aZizọs ramugh bọ siphẹ anyụ oreeny imhinhimhiịn phọ, odị aatughiạn ilọ eghunotu phọ odị. AJọn amheerạ r’aMeri onhiin phọ aZizọs epẹ oghiigh bọ Zizọs, etigheri iboom mọ imhinhimhiịn phọ odị asoman bọ, aZizọs aḅọgh Meri alhọgh ḍighaạgh aJọn. (Jọn 19:26, 27) Iikia i/lo, aZizọs amhoọgh ni nmụny onhiin dị mutue ni omiteom ilọ rewạ ongọ onhiin phọ abidị, kuolọ ekịgh mudị r’oniin onyọ abidị ko/ḍighi onyọ amatuạn odị mem mọ amuphẹ phọ. Esi iduọn phọ, odị awạ oye dị kamiteom ni ilọ rewạ angọ Meri aḅilhẹ aloghonhaạn nyodị ḍighaạgh oghiọm aghisigh okumu aZihova.

16. Eeghe araraạr kụ edị aJọn amhoọgh oḍighi?

¹⁶ AJọn amhoọgh ni ibadị araraạr oḍighi, idiphọ oniin otelhedom iwạ mọ odị amhoọgh oophugh ogbeelhom adom Omhạr phọ. Eeni odị aphin ni anhịr, esi iduọn phọ, odị amhoọgh ni oḍighi ophogh eghunotu odị r’oḍighi idị bidị komoọgh mugey amasian r’Enhaạn. (1 Kọr. 9:5) Iphẹn phọ etughemhị eeghe ruw-emhụ eghunotu rodon?

17. Uḍighi ika kụ emhạn bọ ni maạr dị uw-emhụ eghunotu kaḍighi idị eghunotu phọ odị komoọgh igey asiya r’aZihova?

¹⁷ Onyọ umor dị aḍighi uw-emhụ eghunotu atue ni amoọgh ibadị iiḍighi dị emhạn maạr. Esi omaạm, odị amoọgh okumuan ghan agey epẹ otu oḍighi phọ odị pidị esighẹ rughuenhian  etuomaan aZihova. (Efẹ. 6:5, 6; Taitọs 2:9, 10) Kụ eeni apạm kẹn iiḍighi siphẹ ookpomhoghan phọ, idiphọ oghị ophogh ghan abumor r’abumarani phọ olhọgh ophophe abidị, ḅilhẹ r’oḍiemhiom ghan oghị ogbeelhom iiḅi iinhaghạn phọ. Eniin phọ amem mọ, emạn ni maạr ogbor ghan otuughạ aBaibul phọ r’anhịr phọ odị ḅilhẹ r’ibạm anmụny phọ. Eghunotu phọ kosereghiạn ni ikuph phọ odị ralọgh ghan bọ ophogh abidị ḅilhẹ r’oḍighi idị bidị komoọgh igey asiya r’aZihova.—Efẹ. 5:28, 29; 6:4.

18. AJọn akuphom owol eeghe?

¹⁸ Aghuḍum mọ aJọn adoọny ni ḅilhẹ odị amhiịn ni ibadị araraạr. Odị asoman ni ipaanhaạn kirokirọ dị mitue ni edughe omheeraam mọ odị, kuolọ egbagbạ amem odị akparaghạ ghan ni oḍighi ipẹ odị katue bọ ooko itọ phọ aZizọs, eḅaramaạm ipẹ eḅẹm bọ mọ odị aphomhoghiạn bumor r’abumarani phọ odị. Esi iduọn phọ, aJọn akuphom ni owol mọ aZihova r’aZizọs opomhoghiạn ni nyodị ḅilhẹ mọ kongọ ni nyodị inyaạm mọ odị rawạ bọ okpạr opu ipaanhaạn. (Jọn 14:15-17; 15:9, 10; 1 Jọn 4:16) ASetan r’aḅirinhi phọ odị u/tue usophoghom Jọn ophomhoghiạn abumor r’abumarani phọ odị, ḅilhẹ r’oḍeenhaan ghan abidị ephomhoghiạn esi ipẹ odị aghaạph ghan bọ aḅilhẹ aḍighi.

19. 1 Jọn 4:7 uromha iyira oḍighi eeghe, kụ eeghe kụ iḍighi?

¹⁹ Idiphọ aJọn, yira odi aḅirinhi dị aSetan kụ ratooghị kụ odị o/mhoọgh ephomhoghiạn awe. (1 Jọn 3:1, 10) Ghalhamọ r’iduọn odị rawạ bọ ni dị yira kolọgh ḍien bumor r’abumarani phọ ayira, odị ka/tue amoọgh ekol eḍighi maạr dị yira u/ngọ nyodị eepoogh. Osopha ophomhoghiạn abumor r’abumarani phọ ayira, ḅilhẹ r’oḍeenhaan mọ yira opomoghiạn ni bidị esi ipẹ yira rokaạph ghan bọ koḅilhẹ oḍighi. Mem dị yira oḍeenhaan ghan ephomhoghiạn, yira komoọgh ogbaanyạn, ibo, ḅilhẹ r’aḍimạ adọl aghuḍum.—Bạl 1 Jọn 4:7.