1. Ika kụ idị oghaạph dị ongọ siphẹ ookpomhoghan eephugh alhạ phọ 1935 atir oniin oḍoọgh oye?

ENIIN eghunotu irọl li dị oḍighi aani Nmụny Askul ABaibul phọ, eḍighi bọ ḍien dị olhegheriom ghan Bugbaanhaạn AZihova. Odẹ phọ r’onhiin phọ umhạr iraạr alhephiri r’iyạl anmanyaạn, kụ otughemhị bidị ilọ okumu aZihova ḅilhẹ r’otuughaạny aZizọs Kraist. Oniin olhephiri amhạn 18 asiạ bịn aḍiiny muụm lhạ phọ 1926. Eḍighi bọ edị oomo abidị oḍighi bọ Nmụny Askul ABaibul phọ mem mọ amuphẹ phọ, oḍoọgh oye phọ ophọn asooromhi bọ ni loor alhe aani ghan ni abrẹd phọ aḅilhẹ aphughọl aani ghan miim mọ torobọ alhạ mem Eḍien Adulhe Uw-emhoọgh phọ. Toroboiperolbọ, oḍuomolhoghi phọ odị ilọ aghisigh phọ anmia ni dị eego esi oghaạph dị amhạn maạr dị ko/tue obulha dị aḅẹm mọ, “Asiadạm Awe.” Umor phọ J. F. Rutherford kụ angọ oghaạph phọ opọ phọ lhạ phọ 1935 esi ookpomhoghan eephugh epẹ Washington, D.C., U.S.A. Utuughạ eeghe siphẹ ookpomhoghan eephugh phọ opọ phọ?

2. Eeghe igey kụ iganana siphẹ oghaạph phọ Umọr phọ Rutherford angọ bọ?

² Umor phọ Rutherford agananamhi ni buphẹ koḍighi bọ “ḍigbogh aḍita” phọ (King James Version), obobọ “siadạm awe” phọ oghol bọ siphẹ Ogananami 7:9. Kụ egbi eteẹny amem mọ amuphẹ phọ, uutughiạn ghan mọ egu awe phọ abuphẹ phọ oḍighi omhunhenhiom iyạl ekụ awe dị kokeel aani k’akẹ dị u/kạr umoọgh ḍigey aḍimheerạ. Umor phọ Rutherford asighẹ Baibul phọ kụ agbạ aagholhomhi mọ u/saḅạr aani ḍigbogh aḍita phọ orọl epẹ  k’akẹ, kuolọ bidị inhọn iyool * aKraist dị kokpetenhaan “iboom iminimiịn phọ” kụ otọl siẹn ade phọ k’agee-pọ. (Ogan. 7:14) AZizọs aḅẹm mọ: “Mị aḅiIẹ ni amoọgh inọn iyooI igạ dị i/Ioom aani siẹn oghoony phọ ophọn. Mị kasighẹ aani ni bidị atu kụ bidị konaghạn aani ni eḍọgh phọ amị. Koḅaraghị ni bidị oḍighi ḍiniin aḍita kụ omoọgh oniin Opoghom.” (Jọn 10:16) Iyool phọ iphẹn phọ remạ ghan Bugbaanhaạn aZihova oḅạr bọ nyodị ḅilhẹ omhoọgh bọ oḍuomolhoghi orọl adọl aParadaịs siẹn ade phọ k’agee-pọ. (Mat. 25:31-33, 46) Uguạ omhiịn ipẹ omhoom onhaghạn aḍughụm mọ ophọn phọ anme bọ sighuḍum ibadị awe phọ aZihova, eḅaramaạm onyọ umor phọ opọ amhạn bọ 18 asiạ phọ.—Ps. 97:11; Prov. 4:18.

3-4. Siphẹ ookpomhoghan eephugh alhạ phọ 1935, eeghe kụ edị asimuonịr onhaghanhạn ilọ oḍuomolhoghi phọ abidị, kụ eeghe kụ iḍighi?

³ Iḍighi ni iyaạr oḅaạl olhoghi siphẹ ookpomhoghan eephugh phọ opọ phọ mem mọ okaaphọm mọ apuru bọ buphẹ ronaghạn bọ mọ: “Ke/lẹ, oomo abuphẹ omhoọgh bọ oḍuomolhoghi orọl isiẹn ade phọ k’agee-pọ omhereghạ.” Oniin onyọ umor dị aghị aani ookpomhoghan eephugh phọ, aḅẹm mọ awe dị ropel li oolemhi odi 20,000 awe onhaghạn bọ oghaạph phọ kụ umhereghạ. Kụ umor phọ Rutherford agbeelhom mọ: “Ipogh! Siadạm awe phọ!” Ipẹ reten kụ oomo awe phọ olọ ḍiolọ ibo. Abuphẹ omhereghạ bọ ulhegheri ni mọ u/saḅạr aani bunọ ogheel k’akẹ. Bidị ulhegheri ni mọ u/sagharạn bunọ uwaloor iigbia phọ Enhaạn. Ḍieriphọ aḍio ookpomhoghan eephugh phọ opọ phọ, 840 abumhoom Abugbaanhaạn uḍiiny ni muụm, kụ ibadị abidị uḍighi aani buọ inhọn iyool phọ.

⁴ Oghaạph phọ roten, bịn oḍoọgh oye phọ oghaạph bọ oghol epẹ emhiighom mọ ḅilhẹ r’asimuonịr abunhọn awe u/le ghan mun abrẹd phọ r’amiim mọ mem Eḍien Adulhe Uw-emhoọgh phọ. Ibadị ulhoghoma aani ni idị oniin onyọ umor alhoghoma kụ aḅẹm mọ: “AMemorial alhạ phọ 1935 kụ amem dị esughanham omhạn dị mị alhe abrẹd phọ aḅilhẹ aphughọl miim mọ. Mị ulhegheri mọ aZihova ko/sighẹ uwaloor iigbia phọ odị u/ngoọm imhị oḍuomolhoghi ogheel epẹ k’akẹ phọ, kparipẹ ghụn mị umhoọgh oḍuomolhoghi orọl aani isiẹn ade phọ olhoghonhaạn aḍighaạgh otenhe ade phọ paradaịs.” (Rom. 8:16, 17; 2 Kọr. 1:21, 22) Egbi k’amem mọ amuphẹ phọ, ibadị awe moḍighan aani ḍigbogh aḍita phọ kụ rokumuan ghan r’abusughenheen phọ * abuphẹ osagharạn bọ uwaloor iigbia phọ.

5. AZihova rapogh ghan ika buphẹ ro/le ghan mun bọ abrẹd phọ r’amiim mọ mem aMemorial phọ?

⁵ AZihova rapogh ghan ika we phọ abuphẹ owilhẹ bọ olhe abrẹd phọ r’amiim mọ emhiigh 1935 kụ rekị? AZihova rapogh ghan ika onyọ Ogbaanhaạn dị maḍiiny muụm ḍio arodon kụ amheeraam mọ odị atue ni ale abrẹd phọ aḅilhẹ apughọl miim mọ kụ agbi olhegheri mọ ko/sagharạn nyodị uwaloor iigbia phọ? (1 Kọr. 11:28) Abuniin molhe ghan abrẹd phọ oḅilhẹ opughọl miim mọ loor esi dị bidị u/kạr unaghanhạn oḍuomolhoghi phọ abidị. Kuolọ eḍighi maạr dị bidị omheeraam ni mọ bidị mopiomạn, bịn owilhẹ olhe ghan, ḅilhẹ oghiọm ghisigh okumu aZihova eten dị ekpẹ oḍuomolhoghi, pọ aZihova kagbiom ni bidị idiphọ ipheriphọ iyool  phọ. Ghalhamọ r’iduọn bidị ro/le ghan mun bọ abrẹd phọ koḅilhẹ ophughọl miim mọ, bidị rokị ghan ni aMemorial phọ loor esi dị bidị okạr kụ osereghiạn ipẹ aZihova r’aZizọs moḍighinhaan bọ bidị.

6. AZizọs atọ aḅenhị ruukpaạny phọ moḍighi eeghe?

⁶ Loor esi iduọn igbogh iiḅaghamhị phọ mekpụl bọ siẹn, kenighẹ ni dị yira koḅilhẹ ooḅeghiọn ipẹ Ogananami phọ emhụ phọ 7 eghaạph bọ ilọ aKristẹn phọ abuphẹ osagharạn bọ ḅilhẹ r’ilọ asiadạm ipheriphọ iyool phọ. AZizọs atọ aḅenhị ruukpaạny phọ mọ oghiọm ghisigh ophạm oḅulhemhi omhạn inya oghim amuphe phọ. Bidị ko/bilhẹ ophạm oghim mọ tutụ aZihova aḅẹm mọ aKristẹn phọ abuphẹ osagharạn bọ okpẹ ni oḍuomolhoghi. (Ogan. 7:1-4) Koonmo bumor phọ aKraist abuẹn osagharạn bọ uwaloor iigbia phọ ruunmo oḍighi aruw-emhạ r’abupinyọn rikiạ epẹ k’akẹ r’odị. (Ogan. 20:6) AZihova, Zizọs, ḅilhẹ r’aruukpaạny phọ kogon ni omhiịn dị 144,000 abuẹn osagharạn bọ komoọgh ruunmo phọ abidị epẹ k’akẹ phọ.

7. Odaphạn Ogananami 7:9, 10, buọ anhiạn kụ edị aJọn amhiịn esi uḍien, kụ bidị uḍighi ghan eeghe? (Miịn afoto oḅẹl opoḍi phọ.)

⁷ AJọn roghaạph bọ ilọ 144,000 aruw-emhạ phọ ḅilhẹ r’abupinyọn rikiạ phọ, odị amhiịn ni enhọn eekiạ iyaạr, “siadạm awe” dị mokpetenhaan Amagedọn. Iyạl phọ arugu phọ iphẹn phọ egbaranhaạn ni, loor esi dị emhunhenhiom iyạl egu phọ ebụgh epu eḅẹl phọ, kụ kẹn ko/tue obạl omuneni. (Bạl Ogananami 7:9, 10.) “Iphalaḅaạl” phọ bidị oonmenan bọ remạ ghan mọ bidị urọl dọl dị r’iyaạr bidị “i/bịph” siẹn aḅirinhi phọ aSetan, ḅilhẹ mọ bidị oḅạr Enhaạn r’aKraist. (Jems. 1:27) Bidị ulọ omiteom mọ bidị momhoọgh pelieẹny loor esi ipẹ aZihova r’aZizọs Oọny oyool phọ Enhaạn moḍighi bọ. Bidị uphamhạgh ighirikị iriịr oḍeenhaan mọ r’ibo bidị osighẹ ni Zizọs idiphọ Uw-emhạ dị aZihova kụ mamạ.—Poghom Jọn 12:12, 13.

8. Ogananami 7:11, 12 iḅenhị iyira eeghe ilọ apakirị eghunotu phọ aZihova epẹ k’akẹ phọ?

⁸ Bạl Ogananami 7:11, 12. Eeghe kụ imite mem mọ buphẹ odi bọ epẹ k’akẹ phọ omhiịn bọ siadạm awe phọ? AJọn amhiịn mọ oomo abuphẹ oḍighi bọ pakirị eghunotu k’akẹ phọ Enhaạn umhoọgh ni ibo mem mọ bidị omhiịn bọ dị aḍigbogh aḍita omite roboom Enhaạn. Keḅeraạn ni pakirị eghunotu phọ Enhaạn epẹ k’akẹ phọ omhiịn amem mọ uḍien phọ ophọn phọ kamunughan bọ, mem dị aḍigbogh aḍita phọ kokpetenhaan bọ igbogh iiḅaghamhị phọ r’ighuḍum.

9. Odaphạn Ogananami 7:13-15, aḍigbogh aḍita phọ roḍighi ghan eeghe nyiidiphọ?

⁹ Bạl Ogananami 7:13-15. AJọn aḅẹm mọ aḍigbogh aḍita phọ “usighẹ iḅaạl Oọny Iyool Ogạ phọ kụ ootolom bọ rusuomạ phọ abidị oḅaalamị.” Iphẹn phọ remạ ghan mọ bidị omoọgh ooruẹn olhoghi dị aḅaạl, ḅilhẹ r’aḍigey aḍimheerạ ghisigh aZihova. (Isa. 1:18) Bidị aKristẹn dị moḅọgh loor ongọ oḅilhẹ oḍiiny muụm, ḅilhẹ omhoọgh omheeraam dị akpạr oghị esi ekiạ phọ aZizọs, kụ omhoọgh igey asiya r’aZihova. (Jọn 3:36; 1 Pit. 3:21) Esi iduọn phọ, bidị osianhaan ni omheerạ aghisigh agadạ odaạm emhạ phọ Enhaạn, ‘oḍighi oḍighi ongọ Enaạn ḍughul r’ootaany’ siẹn ade phọ. Ghalhamọ r’anyiidiphọ, r’oophugh bidị roḍighi ni oboom oḍighi ogbeelhom Omhạr phọ ḅilhẹ r’oḍighi awe bumatuạn loor esi dị bidị osighẹ ḍiḅeraạn Omhạr phọ Enhaạn kụ oḍighi eḅẹl siphẹ adọl aghuḍum mọ abidị.—Mat. 6:33; 24:14; 28:19, 20.

10. Eeghe kụ edị aḍigbogh aḍita phọ okuphom owol, ḅilhẹ oghẹn oguan kụ edị bidị komiịn dị kamunughan?

¹⁰ Asiadạm awe phọ okpetenhaan bọ igbogh iiḅaghamhị phọ okuphom ni owol mọ Enhaạn kakiọm ni ghisigh apogh ghan bidị loor esi dị “Odị kụ aḍibuo dị bidị oḍigh.” Oguan phọ opọ ipheriphọ iyool igạ phọ rekori ghan bọ kakạr kụ amunughan: “[Enhaạn] kagbuurogh ni oomo izin riḍien abidị. Aḍuugh r’amukum  ologhi r’emoghi r’eephina ke/tọl mun.”—Ogan. 21:3, 4.

11-12. (a) Odaphạn Ogananami 7:16, 17, eeghe aḍisẹph kirokirọ kụ rekori ḍigbogh aḍita phọ ghisigh? (b) Ipheriphọ iyool phọ koḍighi aani eeghe siphẹ aMemorial phọ, kụ eeghe kụ iḍighi?

¹¹ Bạl Ogananami 7:16, 17. Nyiidiphọ, abuniin awe aZihova odi okoọny loor esi dị bidị u/moọgh ikpoki oghoom aani iyaạr lọ repụ bidị olhe, obobọ osoman iiḅaghamhị loor esi ipẹ araaghạm mekọm bọ. Abunhọn odi ikoli loor omheeraam mọ abidị. Toroboiperolbọ, aḍigbogh aḍita phọ omoọgh ni ibo olhegheri mọ mem dị bidị okpetenhaan muphe okarạph aḅirinhi phọ ophọn phọ, bidị komoọgh ni iiḅakiọm Enhaạn, ḅilhẹ eḍien kemuza ni. Mem dị aZihova kapiemhi bọ aḅirinhi phọ aSetan, odị kakoph ni ḍigbogh aḍita phọ asighẹ esi ighạgh ilhoghi phọ odị eghịgh bọ egholhoghọl erumuḍio phọ dị “ke/gụr” aani bidị. Kụ mem dị iboom imhinhimhiịn phọ eten, aZizọs kaaḅakị ni buphẹ kokpetenhaan bọ siẹn ade phọ akị angọ ‘muụm aghuḍum [k’agee-pọ].’ Kụ tuutughiạn: Asiadạm awe phọ omoọgh ni ookiạ oḍuomolhoghi. Kụ eeni ariisi eelạ awe phọ kotọl bọ mem mọ amuphẹ, ko/mugh mun!—Jọn 11:26.

¹² Esi iduọn phọ ipheriphọ iyool phọ omoọgh ni ookiạ oḍuomolhoghi dị bidị oghol rosẹph aZihova r’aZizọs! Ghalhamọ r’iduọn aZihova u/saḅạr aani bọ ni bidị ogheel k’akẹ phọ, bidị omạn aani ni maạr esi aZihova idiphọ abuphẹ osagharạn bọ. Iyạl phọ arugu phọ kotue ni oboom Enhaạn r’aKraist. Eniin eten dị bidị roḍighi ghan iduọn phọ pọ oghị aani ghan aMemorial phọ.

13-14. Eeghe kụ iḍighi kụ ewạ bọ ni dị torobọ oye kakị aani ghan aMemorial phọ?

¹³ Siạ dị ke/bia iboom, esi 1,000 awe dị oghị aMemorial phọ, awe dị role ghan abrẹd phọ r’amiim mọ enụm bịn kụ isugha omhạn oniin. Iphẹn phọ emạ emiteom mọ ibadị arookpomhoghan dị ropạm aani ghan aMemorial phọ ro/moọgh ghan oye dị rale aani ghan abrẹd phọ r’amiim mọ. Ogbogh opol abuẹn rokị aani ghan bọ aMemorial phọ omoọgh oḍuomolhoghi orọl isiẹn ade phọ. Kuolọ bidị utụ eeghe kụ rokị aani ghan bọ Eḍien Adulhe Uw-emhoọgh phọ? Iyaạr phọ eḍighi bọ kụ awe rokị aani ghan bọ pinien oyaghirị abidị kụ edị bidị rotuạn ghan bọ koghị aani. Arighirị phọ rokị ghan oḍeenhaan mọ bidị opomhoghiạn ni oḅilhẹ obakị olom mọ r’anhịr phọ robalạn bọ. Igina phọ kẹn, iphediphọ iyool phọ rokị aani ghan aMemorial phọ loor esi dị bidị opomhoghiạn oḅilhẹ obakị Kraist r’abuphẹ  osagharạn bọ. Ḅilhẹ bidị oḅilhẹ kẹn rokị ghan aMemorial phọ oḍeenhaan mọ bidị osereghiạn ni ekiạ etagharạn phọ aZizọs, ekiạ phọ eḍighi bọ idị kedughanhaan bidị orọl isiẹn ade phọ k’agee-pọ.

¹⁴ Enhọn ekpanhạ ephigh phọ eḍighi bọ kụ iphediphọ iyool phọ rokị aani ghan bọ aMemorial phọ, pọ utuạn odạph itọ phọ aZizọs. Mem mọ aZizọs alhe bọ eḍien adulhe phọ r’abumatuạn phọ odị okpẹ bọ oḍuomolhoghi phọ, odị aḅenhị bidị mọ: “lḍighi ghan iphẹn phọ iitughianạm imị.” (1 Kọr. 11:23-26) Kụ iḍighi kụ, eḍighi bọ edị abuniin abuphẹ osagharạn bọ uwaloor phọ odi bọ ni siẹn ade phọ, iphediphọ iyool phọ okiọm ni ghisigh rokị aani ghan Eḍien Adulhe Uw-emhoọgh phọ. Okạr oghaạph, iphediphọ iyool phọ okiọm ni ghisigh romạgh ghan torobọ oye odạph aani abidị oghị aMemorial phọ.

15. Ika kụ idị torobọ onyọ ayira katue aboom Enhaạn r’aKraist siphẹ aMemorial phọ?

¹⁵ Siphẹ aMemorial phọ, yira romoọgh ghan eepoogh ooseeny Enhaạn r’aKraist, esi oḅophoghạn omhoọr aḍuọr oḅilhẹ ooḅereghị. Emhuoghaạph aMemorial olọ arolhool phọ eḅẹm mọ “Sereghiạn Ipẹ Enhaạn r’Akraist Moḍighinhaan Bọ Nyinhạ!” Kekạr kụ ekparamhị osereghiạn phọ yira omhoọgh bọ oghị esi aZihova r’aKraist. Mem dị rokirom abrẹd phọ r’amiim mọ, yira kootughiạn ni iyaạr phọ bidị emherenyạn bọ—ḍizu r’iḅaạl phọ aZizọs. Yira koḅilhẹ ootughiạn ephomhoghiạn phọ aZihova uḍeenhaan bọ iyira, esi omheera mọ Oọny phọ odị aru amhugh obọ yira omhoọgh ghuḍum. (Mat. 20:28) Torobọ oye dị aphomhoghiạn Odẹ k’akẹ phọ ayira ḅilhẹ r’Oọny phọ odị kawạ ni oghị aani aMemorial phọ.

16. Ighẹn areten kụ edị abuphẹ osagharạn bọ ḅilhẹ r’iphediphọ iyool phọ oghighighạn?

¹⁶ Enhaạn i/sighẹ buphẹ osagharạn bọ idiphọ abudị omhạn maạr opu iphediphọ iyool phọ. Odị amaghamhị ni maạr iyạl phọ arugu phọ. Yira ulhegheri iphẹn phọ loor esi dị oniin phọ aghuḍum ooḅi Oọny phọ odị kụ edị odị asighẹ bọ ni aghoom iyạl phọ arugu phọ. Oḍuomolhoghi phọ bidị omhoọgh bọ bịn kụ agbaranhaạn. Kuolọ iyạl phọ arugu phọ omoọgh oḅạr Enhaạn ḅilhẹ r’aKraist. (Ps. 31:23) Legheri mọ Enhaạn rangọ ghan uwaloor iigbia phọ torobọ oye odaphạn ipẹ rewạ bọ. Mughumọ odị aḍighi oniin opọ osagharạn bọ obobọ iphediphọ iyool phọ.

17. Abusughenheen abuphẹ osagharạn bọ rogon ghan eeghe epẹ ghisigh?

¹⁷ U/marạm Kristẹn phọ abuphẹ osagharạn bọ uwaloor iigbia phọ oḍuomolhoghi ogheel k’akẹ. Enhaạn kụ angọ bidị oḍuomolhoghi phọ opọ phọ. Bidị rootughiạn ghan ni ilọ ipẹ phọ, kooḅereghị, ḅilhẹ rokori ni r’ikpukpụ omhoọgh aruunmo phọ abidị epẹ k’akẹ. Bidị u/legheri ipẹ aḍizu phọ abidị ketọl bọ epẹ k’akẹ. (Fil. 3:20, 21; 1 Jọn 3:2) Ghalhamọ r’iduọn phọ ni, bidị rogon ni oghị oteẹny aZihova, Zizọs, ruukpaạny phọ,  r’abueriphọ abuphẹ osagharạn bọ. R’ikpukpụ bidị rowạ ni orọl r’abidị siphẹ Omhạr phọ epẹ k’akẹ.

18. Ipheriphọ iyool igạ phọ rogon ghan omhiịn eeghe?

¹⁸ Ipheriphọ iyool phọ omaghamhị ni maạr oḍuomolhoghi phọ omharạm bọ bidị, oḍuomolhoghi orọl isiẹn ade phọ k’agee-pọ. (Eccl. 3:11) Bidị rogon ghan ḍio phọ aḍiphẹ bidị kologhonhaạn bọ ḍighaạgh onme oomo ade phọ otenhe aParadaịs. Bidị rogon ni ḍio phọ bidị kodoghoḍi bọ ruutu ilọ abidị, omoọgh roghoony iizuphạ ilọ abidị, ḅilhẹ ookonhom ibạm anmụny abidị r’omhoon aloor dị amhunhughan. (Isa. 65:21-23) Bidị rogon ni orelhe oomo ade phọ—omhiịn araaḅarạph, ruukpuạ, ḅilhẹ r’ariphiịny abazị phọ—oḅilhẹ otuughạ ilọ oomo araraạr phọ aZihova alhẹm bọ. Kuolọ iyaạr dị eḅaạl olhoghi abidị epelheghiom, pọ olhegheri mọ amasian phọ abidị r’aZihova kakị ni ghisigh akpạr ghan.

19. AMemorial phọ ungọ iyira eepoogh oḍighi eeghe, ḅilhẹ kopạm aMemorial phọ oghẹn amem rolhool phọ?

¹⁹ AZihova mangọ torobọ ebenhẹ odị dị maḅọgh loor odị angọ nyodị ookiạ oḍuomolhoghi ilọ aghisigh phọ. (Jer. 29:11) Eḍighieeny ootughianhạm aḍuugh phọ aKraist rengọ ghan ni torobọ onyọ ayira eboom eepoogh oboom Enhaạn r’aKraist esi ipẹ bidị muḍighinhaan bọ iyira, pidị yira okelhọm ghuḍum k’agee-pọ. Dị iikia i/lo, aMemorial phọ kụ eḍighieeny dị emhạn maạr iboom dị abugey aKristẹn kotuạn ghan ookpomhoghan. Rolhool phọ, kopạm eḍighieeny phọ ephẹn phọ Satodee, March 27, 2021, mem dị erumuḍio phọ memheel ighool. Rolhool phọ, ibadị komoọgh ni eereẹgh oghị aani eḍighieeny phọ ephẹn phọ egbatanhaạn bọ. Abunhọn kokị aani ni etigheri isophoghom. Abuniin dị odiighi ruutu ikoli kosoman ni ipaanhaạn ophinhom aani abin eḍighieeny phọ ephẹn phọ. Iduọn aZihova r’aZizọs, ḅilhẹ r’apakirị eghunotu phọ odị epẹ k’akẹ ropogh bọ, eḍighi idị torobọ ookpomhoghan, egu, ḅilhẹ r’oye kakelhọm aani aMemorial phọ!