1-2. (a) Pụr amem kụ edị yira rokạr ghan kootughiạn oye ephomhoghiạn ayira dị mamhugh? (b) Eeghe eḍighieeny kụ edị aZizọs aphighi ḍughul phọ eḅaạl kokiigh bọ nyodị?

OYE kụ umhughanhaan iyira ghalhamọ k’amem dị mebia ni, yira rokiọm ghan ni ghisigh kootughiạn nyodị. Yira rokạr ghan kootughiạn ilọ oye phọ mem dị eeghiraan eteẹny mem mọ odị amhugh bọ.

² Torobọ alhạ, yira roḍighom aani ghan ni pakirị irubal awe oomo isiẹn aḅirinhi phọ dị rookpomhoghan ghan ooko aḍio aḍuugh oye dị yira ophomhoghiạn iboom—Zizọs Kraist. (1 Pit. 1:8) Yira rookpomhoghan ghan ootughiạn opọ angọ bọ ghuḍum mọ odị idiphọ ekiạ, otagharanhạm ayira osighẹ esi ikarạph r’aḍuugh. (Mat. 20:28) Okạr oghaạph, aZizọs rawạ dị abudaphạm mọ odị kootughiạn ghan ḍuugh phọ odị. Ḍughul phọ eḅaạl kokiigh bọ nyodị, odị aphighi ni eḍighieeny dị egbatanhaạn kụ atọ mọ: “Iḍighi ghan iduọn ilọ ootughianạm amị.”—Luk 22:19.

3. Yira kooḅeghiọn eeghe emhuoghaạph phọ ephẹn phọ?

³ Iyạl ikpo awe dị rokị aani ghan aMemorial aḍuugh phọ aKraist omoọgh oḍuomolhoghi ogheel k’akẹ. Kuolọ irubal dị rokị aani ghan omoọgh oḍuomolhoghi orọl isiẹn ade phọ. Siẹn emhuoghaạph phọ ephẹn phọ, yira kooḅeghiọn ipẹ eḍighi bọ kụ r’ikpukpụ iyạl phọ arugu phọ rogon ghan bọ oghị aani aMemorial phọ torobọ alhạ. Kụ yira ooḅeghiọn ipẹ yira romooghọm ghan bọ suọ. Uguạ, omhiighom ooḅeghiọn iniin araraạr  phọ eḍighi bọ kụ abuẹn mosagharạn bọ rokị ghan bọ.

4. Uḍighi ika kụ abuphẹ osagharạn bọ role ghan bọ Eḍien Adulhe Uw-emhoọgh phọ?

⁴ Torobọ alhạ, abuẹn osagharạn bọ ropogh ghan ni koghiọm ghisigh olhe abrẹd r’amiim mọ. Uḍighi ika kụ i/beeph bọ dị bidị kole abrẹd phọ r’amiim mọ? Omhiịn ophagharanhaạn phọ, pọ ooḅeghiọn ipẹ emite bọ ḍughul phọ eḅaạl kokiigh bọ Zizọs. Bidị r’olhe eḍien Eyaạl Ophẹl Otenhe phọ romhạn, kụ aZizọs aphighi eḍighieeny phọ molhegheriom bọ nyiidiphọ idiphọ Eḍien Adulhe Uw-emhoọgh phọ. Odị asighẹ abrẹd phọ r’amiim mọ adi 11 abutelhedom mọ kụ aḅenhị bidị mọ olhe oḅilhẹ ophughọl. AZizọs aḅenhị bidị ilọ iyạl iyọ obobọ aruguanhaan—imhoom iyọ phọ ḅilhẹ r’iyọ Omhạr phọ. * (Luk 22:19, 20, 28-30) Iyọ phọ iphẹn phọ kụ ighughuron bọ eten dị abutelhedom mọ abuẹn phọ ḅilhẹ r’oọny egu abunhọn koḍighi ruw-emhạ r’abupinyọn rikiạ epẹ k’akẹ. (Ogan. 5:10; 14:1) Abusughenheen abuphẹ osagharạn bọ, * oḍighom aani bọ iyạl iyọ phọ iphẹn phọ, bịn kụ role ghan Eḍien Adulhe Uw-emhoọgh phọ.

5. Eeghe kụ idị abuẹn osagharạn bọ olhegheri ilọ oḍuomolhoghi phọ abidị?

⁵ Enhọn ephigh dị abuẹn osagharạn bọ otụ bọ kụ rokị ghan aMemorial phọ pọ: Eḍighieeny phọ rengọ ghan bidị eepoogh ootughiạn ilọ oḍuomolhoghi phọ abidị. AZihova mangọ bidị ookiạ oḍuomolhoghi—oghelhọm aghuḍum e/mugh ghan r’e/ḅọr ghan epẹ k’akẹ, okumuan r’aZizọs Kriast phọ moghuenhi bọ ḅilhẹ r’abueriphọ 144,000 phọ. Kụ edị ekạr emhạn maạr, orọl okạr isiphẹ aghisigh aZihova Enhaạn phọ! (1 Kọr. 15:51-53; 1 Jọn 3:2) Abuẹn osagharạn bọ olegheri ni mọ momạ bidị oghị oghelhọm aroopoogh phọ iphẹn phọ epẹ k’akẹ. Kuolọ orue ogheel k’akẹ phọ, pọ bidị kotọl dọl dị ekpẹ oḍuomolhoghi bịn k’aḍuugh. (2 Tim. 4:7, 8) Rengọ ghan buẹn osagharạn bọ iboom ibo oḅilhẹ ootughiạn ilọ oḍuomolhoghi phọ abidị. (Taitọs 2:13) Kokaạph ika ilọ ipheriphọ “iyooI igạ” phọ? (Jọn 10:16) Ighẹn kụ iniin ariphigh phọ bidị otu bọ rokị aani ghan aMemorial phọ?

6. Uḍighi ika kụ abueriphọ iyool phọ rokị aani ghan bọ aMemorial phọ torobọ alhạ?

⁶ Abueriphọ iyool phọ ro/kị ghan aMemorial phọ olhe abrẹd r’amiim mọ, kuolọ rokị ghan omhiịn aani. Lhạ phọ 1938, kụ eḅẹl amem dị omhạgh aani bueriphọ iyool phọ oghị aani aMemorial phọ. AWatchtower aMarch 1, 1938, aḅẹm mọ: “Ekạr eḍighi elhiom eḅilhẹ enighẹ dị [abueriphọ iyool] phọ kokị aani ghan eḍighieeny phọ omhiịn ipẹ roḍigh bọ. . . . Keḍighi aani ni mem ibo kụ engọ bidị.” Idiphọ awe dị omhạgh oghị aani apinien robo ghan bọ, kụ idị aḍieriphọ iyool phọ robo ghan mem dị oghị aMemorial phọ.

7. Uḍighi ika kụ abueriphọ iyool phọ rogon ghan bọ oghaạph aMemorial phọ?

⁷ Abueriphọ iyool phọ kẹn rogbirima ghan ilọ oḍuomolhoghi phọ abidị. Bidị rogon aani ghan onhaghạn oghaạph aMemorial phọ. Ogbogh apakirị oghaạph phọ ragbon ghan ipẹ aKraist r’144,000 koḍighinhaan bọ buphẹ okpẹ bọ oḍuomolhoghi phọ mem Itooghị Oniin Oonịr Asiạ phọ aKraist. Eeḍiạn itooghị  Uw-emhạ phọ abidị Zizọs Kraist, abutooghiạ k’akẹ phọ kotenhe de phọ paradaịs kụ ologhonhaạn ḍighaạgh buphẹ osooromhi bọ loor phọ omhunhughan. P’eeghe oḅaạl olhoghi dị ratọl ghan esi irubal abuẹn rokị aani ghan bọ aMemorial phọ mem dị bidị rootughiạn omhiịn omhunhughan imiịn aBaibul phọ edi bọ Isaiah 35:5, 6; 65:21-23; r’Ogananami 21:3, 4. Ogbiom ghan olhoghi dị abuọ ephomhoghiạn phọ abidị odi siphẹ omhoom aḅirinhi phọ, rekparamhị ghan oḍuomolhoghi phọ abidị ilọ aghisigh phọ ḅilhẹ r’oghiọm aghisigh okumu aZihova.—Mat. 24:13; Gal. 6:9.

8. Eghẹn kụ enhọn ephigh phọ abueriphọ iyool phọ otụ bọ rokị aani ghan aMemorial phọ?

⁸ Ooḅeghiọn enhọn ephigh dị abueriphọ iyool phọ otụ bọ rokị aani ghan aMemorial phọ. Bidị rowạ ghạn oḍeenhaan ephomhoghiạn r’obakị abuphẹ osagharạn bọ. Ekpo Onhụ phọ Enhaạn ekaạph ni ilọ amuḅọph dị katọl igbo abuphẹ osagharạn bọ r’abueriphọ iyool phọ. Ika? Omhiịn iniin areḍeenhaan.

9. Imiịn phọ edi bọ Zechariah 8:23 eḍeenhaan eeghe ilọ eten phọ epẹ abueriphọ iyool phọ olhoghoma bọ oghị esi abuphẹ osagharạn bọ?

⁹ Bạl Zechariah 8:23. Imiịn phọ ekaạph ni ilọ emạ eten dị abueriphọ iyool phọ olhoghoma oghị esi abumor r’abumarani phọ abuphẹ osagharạn bọ. Ikpo onhụ phọ “onyọ aJu” ḅilhẹ “r’anyinha” remạ ghan eniin phọ egu phọ—buphẹ osagharạn bọ. (Rom. 2:28, 29) Kụ “aḍioph aruuruen” phọ emerenyạn bueriphọ iyool phọ. Bidị “okpạph okparamhị”—okaraghị oḅạr—buphẹ osagharạn bọ, oḅilhẹ oḍighan r’abidị esi iserereẹny iiseeny. Esi iduọn phọ, ḍughul aMemorial phọ, abueriphọ iyool phọ roḍeenhaan ghan mọ bunọ oḅạr ri agey buphẹ osagharạn bọ esi oghị aani aMemorial phọ.

10. Ika kụ idị aZihova mamhunhenhi imiịn phọ edi bọ Ezekiel 37:15-19, 24, 25?

¹⁰ Bạl Ezekiel 37:15-19, 24, 25. Esi omhunhenhi imiịn phọ iphẹn phọ, aZihova maḅạr buphẹ osagharạn phọ r’abueriphọ iyool phọ agbiemhị eten dị ko/tue ogbariọn. Imiịn phọ ekaạph ekol iyạl ireeny. Abuẹn omhoọgh bọ oḍuomolhoghi k’akẹ phọ pọ oreeny “phọ aJuda” (eghun phọ omiteom ghan bọ ruw-emhạ phọ Izrạl), kụ abuẹn omhoọgh bọ oḍuomolhoghi orọl isiẹn ade phọ pọ oreeny phọ “Ephraim.” * AZihova kaḅophoghị iyạl phọ ireeny phọ bịn eḍighi “oniin oreeny.” Iphẹn phọ remạ ghan mọ bidị koḅọph ni okumuan eeḍiạn Uw-emhạ phọ abidị, Zizọs Kraist. Torobọ alhạ, abuẹn osagharạn bọ r’abueriphọ iyool phọ rokị ghan aMemorial phọ idiphọ ‘aḍiniin aḍita’ eeḍiạn “oniin Opoghom.”—Jọn 10:16.

11. Ika kụ idị “iyooI igạ phọ” oghaạph bọ oghol siphẹ Matiu 25:31-36, 40 robakị bumor phọ aKraist?

¹¹ Bạl Matiu 25:31-36, 40. Siẹn aḍidogh phọ, “iyooI igạ phọ” emerenyạn buọ elhiom eḍighinhom iyaạr phọ odi bọ mem eekunha phọ, omhoọgh bọ oḍuomolhoghi orọl isiẹn ade phọ—iduọn phọ pọ abueriphọ iyool phọ. Bidị oḅạr ri oḅilhẹ obakị bumor phọ aKraist abuẹn osagharạn bọ uw-aloor phọ esi olhoghonhaạn abidị ḍighaạgh omhunhenhi oboom oḍighi phọ bidị omhoọgh bọ—oḍighi igbeel r’oḍighi awe bumatuạn phọ.—Mat. 24:14; 28:19, 20.

12-13. Ighẹn inhọn areten kụ idị abueriphọ iyool phọ oghiọm ghisigh robakị ghan bumor phọ aKraist?

¹² Torobọ alhạ, siwiki phọ rekị bọ oteẹny aMemorial phọ, abueriphọ iyool phọ robakị ghan ni bumor phọ aKraist esi oḍighom aani ogbeelhom aḍimhạgh aMemorial phọ. (Miịn  igbe phọ “ Nạ Raakolhobian Ni Ilọ Amem AMemorial Phọ Ḍughụm?”) Bidị rologhonhaạn ghan ni ḍighaạgh omhiịn mọ opạm ni aMemorial phọ oomo isiẹn aḅirinhi phọ, ghalhamọ r’iduọn abudị osagharạn u/lo bọ ni ibadị arookpomhoghan. Abueriphọ iyool phọ romoọgh ghan ni ibo obakị abumor phọ aKraist reten phọ iphẹn phọ. Bidị olegheri mọ aKraist amiịn torobọ iyaạr dị oḍighinhaan buphẹ osagharạn bọ idiphọ iyaạr dị oḍighinhaan nyodị.—Mat. 25:37-40.

¹³ Ighẹn kụ inhọn ariphigh phọ yira otụ bọ rokị aani ghan aMemorial phọ etigheri oḍuomolhoghi phọ ayira?

14. Ika kụ idị aZihova r’aZizọs muḍeenhaan iyira eboom ephomhoghiạn?

¹⁴Yira rosereghiạn ghan ephomhoghiạn phọ aZihova r’aZizọs uḍeenhaan bọ iyira. AZihova muḍeenhaan ni iyira ephomhoghiạn phọ odị ibadị areten. Kuolọ ekạr egbogh eten dị muḍeenhaan iyira pọ orom ooḅi Oọny phọ odị oru omhiinhọm r’omhughanhaan ayira. (Jọn 3:16) Kụ aZizọs phọ kẹn uḍeenhaan ni iyira eboom ephomhoghiạn esi omheera ongọ aghuḍum mọ odị loor emhụ ayira. (Jọn 15:13) Yira ko/tue okpẹ aZihova r’aZizọs esi ephomhoghiạn phọ bidị muḍeenhaan bọ iyira. Kuolọ ipẹ yira oseere bọ dọl aghuḍum mọ ayira torobọ aḍio kụ keḍeenhaan mọ yira osereghiạn ni. (Kọl. 3:15) Ḅilhẹ yira rokị ghan aMemorial phọ ootughiạn ephomhoghiạn phọ abidị r’oḍeenhaan aani abidị ephomhoghiạn.

15. Uḍighi ika kụ abuphẹ osagharạn bọ r’abueriphọ iyool phọ okạr bọ omhaghamhị maạr inmo etagharạn phọ?

¹⁵Yira okạr omaghamhị maạr inmo etagharạn phọ. (Mat. 20:28) Abuẹn osagharạn bọ omaghamhị ni maạr etagharạn phọ engọ bọ bidị eepoogh omhoọgh aani ookiạ oḍuomolhoghi phọ opọ phọ. Loor omheeraam mọ abidị esi ekiạ phọ aKraist, aZihova magbeelhom mọ bidị awe elhiom eḍighinhom iyaạr aḅilhẹ asighẹ mọ anmụny onọ. (Rom. 5:1; 8:15-17, 23) Iphediphọ iyool phọ kẹn osereghiạn aani ni etagharạn phọ. Loor omheeraam mọ abidị esi iḅaạl phọ aKraist, bidị momhoọgh ooruẹn olhoghi dị aḅaạl ghisigh Enhaạn, kotue kẹn ooseeny Enhaạn, oḅilhẹ oḍuomolhoghi okpetenhaan “iboom iminimiịn phọ.” (Ogan. 7:13-15) Eniin eten dị buẹn osagharạn bọ r’abueriphọ iyool phọ koḍeenhaan osereghiạn phọ abidị pọ oghị aani ghan aMemorial phọ torobọ alhạ.

16. Eghẹn kụ enhọn ephigh phọ yira otụ bọ rokị ghan aMemorial phọ?

¹⁶ Yira rokị ghan aMemorial phọ loor esi dị yira rowạ onhaghanhạn aZizọs. Etigheri oḍuomolhoghi phọ yira omhoọgh bọ, torobọ onyọ ayira rawạ ni odaphạn itọ phọ aZizọs angọ bọ ḍughul phọ odị aphighi bọ eḍighieeny aMemorial phọ: “lḍighi ghan iphẹn phọ iitughianạm imị.”—1 Kọr. 11:23, 24.

17. Ika kụ idị aMemorial phọ ruḍur ghan iyira katumeriom aZihova?

¹⁷Yira roḍuraan ghan kotuman aZihova. (Jems. 4:8) Iduọn yira momhiịn bọ ni, aMemorial phọ rungọ ghan iyira eepoogh ootughiạn ilọ oḍuomolhoghi phọ aZihova mungọ bọ iyira r’ogbirima ilọ eboom ephomhoghiạn phọ odị uḍeenhaan bọ iyira. (Jer. 29:11; 1 Jọn 4:8-10) Mem dị yira ootughiạn ghan oḍuomolhoghi phọ ayira ilọ ghisigh phọ r’ephomhoghiạn phọ Enhaạn re/mineen ghan bọ, kebughẹ ni ephomhoghiạn phọ ayira esi aZihova eḅilhẹ ekparamhị siya phọ ayira r’odị.—Rom. 8:38, 39.

18. Ogbirima ghan eḍeenhaan phọ aZizọs rinyu ghan iyira oḍighi eeghe?

 ¹⁸Rinyu ghan iyira otuughaạny eḍeenhaan phọ aZizọs. (1 Pit. 2:21) Mem dị rekpụl aMemorial phọ, yira robạl ghan igẹ aBaibul dị eghaạph ilọ awiki phọ aZizọs arọl bọ siẹn ade phọ asughanham omhạn, ḍuugh phọ r’oḅetenhu esi aḍuugh phọ odị. Kụ siphẹ aMemorial phọ, oghaạph phọ ruutughianhạm ghan iyira ephomhoghiạn phọ aZizọs uḍeenhaan bọ iyira. (Efẹ. 5:2; 1 Jọn 3:16) Mem dị yira aạl oḅilhẹ ogbirima ilọ eḍeenhaan osighẹ aloor ophighironhọm ekiạ phọ aZizọs, rinyu ghan ni iyira otuụgh adọl “phọ aḍiphẹ aJizọs Kraist arọl ghan bọ kụ [orọl] aani.”—1 Jọn 2:6.

19. Ika kụ idị yira kotue otolhọm ephomhoghiạn phọ Enhaạn?

¹⁹Rekparamhị ghan osopha phọ ayira orolhọm ephomhoghiạn phọ Enhaạn. (Jud 20, 21) Yira kotolhọm ephomhoghiạn phọ Enhaạn esi oḍighi oomo ipẹ yira kotue bọ onhaghanhạn odị, oḅaalamhị aḍien phọ odị, ḅilhẹ roḅaalhamhị olhoghi odị. (Prov. 27:11; Mat. 6:9; 1 Jọn 5:3) AMemorial phọ runyu ghan iyira orọl atorobọ aḍio eten dị eḍeenhaan mọ yira roḅenhị ghan aZihova mọ, ‘Mị rawạ orolhọm ephomhoghiạn phọ anạ bịn k’agee-pọ!’

20. Eeghe igey ariphigh kụ edị yira omhoọgh oghị aani aMemorial phọ?

²⁰ Mughumọ oḍuomolhoghi ayira orọl epẹ k’akẹ obobọ isiẹn ade phọ k’agee-pọ, yira omoọgh ni igey ariphigh oghị aani ghan aMemorial phọ. Torobọ alhạ dị yira ookpomhoghan ḍio aMemorial phọ, yira rootughiạn ghan ḍuugh oye dị yira ophomhoghiạn, Zizọs Kraist. Edị emhạn maạr epelhom, yira rootughiạn ghan ekạr egbogh eḍeenhaan ephomhoghiạn phọ—epẹ aZihova uḍeenhaan bọ iyira esi ongọ Oọny phọ odị idiphọ etagharạn. Rolhool phọ, kopạm aMemorial phọ ḍughul aFraidee, April 15, 2022. Yira opomhoghiạn aZihova r’Oọny phọ odị, esi iduọn phọ iyaạr i/lo dị emhạn maạr epu oghị aani aMemorial aḍuugh phọ aZizọs.