EMHUOGHAẠPH ITUUGHẠ PHỌ 4
AḌUỌR PHỌ 30 My Father, My God and Friend
AZihova Amoọgh Ni Igbiririph Anạ Iboom
“Omoọgh-we phọ amoọgh ni iboom igbiririph.”—JEMS. 5:11.
EGBON
Idị ephomhoghiạn phọ aZihova reḍur ghan iyira ketumeriom nyodị ḅilhẹ reḍighi ghan idị yira kologhoma oghoph phọ odị, ogbolomaam mọ odị, ḅilhẹ r’idị odị ruumhanhamhi ghan iyira.
1. Eeghe kụ retu ghan olhoghi anạ mem dị nạ aatughiạn ilọ aZihova?
NẠ MAPURUAN ghan ni loor odọ phọ oye phọ aZihova aru bọ? Mem dị nạ aḅaanhaạn nyodị esi iiḅereghị, eeghe kụ retu ghan iitughiạn anạ? Ghalhamọ r’iduọn yira ko/tue bọ omiịn aZihova, aBaibul phọ akaạph ni ilọ odị ibadị areten. Akol aZihova mọ “erumuḍio r’osuarạm” ḅilhẹ “aniạn epueghị.” (Ps. 84:11; Hib. 12:29) Dị eego esi uḍien Ezekiel aghaạph mọ adọl phọ aZihova ekịgh asafaịr, okuron dị ramụ, ḅilhẹ aghozogh oburukeeny dị raalhoghoḍian. (Ezek. 1:26-28) Iniin areten phọ iphẹn phọ oghaạph bọ ilọ aZihova etue ni inyu iyira ooseeny aZihova obobọ etue kẹn ni eḍighi idị yira kologhoma mọ yira u/mạn maạr.
2. Eeghe kụ ketue ekikima buniin awe oḍuraan otuman aZihova?
2 Etue ni ikparanhaạn iyira omheeraam mọ aZihova uphomhoghiạn ni iyira loor esi iduọn yira ko/tue bọ omiịn nyodị. Abuniin awe rootughiạn ghan mọ aZihova o/phomhoghiạn bidị loor esi ikarạph araraạr dị memitenhaan ghan bidị. Eeni bidị u/moọgh ghan odẹ dị aphomhoghiạn ghan bidị. AZihova anaghanhạn ni ipẹ yira olhoghoma bọ ḅilhẹ r’iyaạr phọ eḍighi bọ kụ ikparanhaạn bọ iyira oḍuraan otuman odị. Orue olhoghonhaạn ayira ḍighaạgh, odị akaạph ni ilọ odọ oye phọ aZihova aru bọ siphẹ Ekpo Onhụ phọ odị.
3. Uḍighi ika kụ yira komiigha bọ loor ooḅeghiọn ephomhoghiạn phọ aZihova?
3 Eniin ekpo onhụ dị ekạr eghaạph ilọ odọ oye phọ aZihova aru bọ pọ ephomhoghiạn. (1 Jọn 4:8) ABaibul phọ aḅẹm mọ Enhaạn ephomhoghiạn. Eegharạ phọ epẹ phọ kụ reeḅakị ghan torobọ iyaạr dị odị raḍighi. Enhaạn raḍeenhaan ghan ephomhoghiạn phọ ephẹn phọ buphẹ ophomhoghiạn bọ nyodị r’abulọ nyodị u/pomoghiạn. (Mat. 5:44, 45) Siẹn emhuoghaạph phọ ephẹn phọ, yira komiigha loor ooḅeghiọn oye phọ aZihova aru bọ ḅilhẹ r’ephomhoghiạn phọ odị. Iduọn olhegheri iyaạr phọ ayira ilọ Enhaạn rabụgh bọ, kụ edị ephomhoghiạn phọ ayira esi odị kekpạr ghan bịn.
AZIHOVA AKẠR KỤ UPHOMHOGHIẠN IYIRA
4. Ika kụ edị igbiririph phọ aZihova etir nyinhạ? (Miịn kẹn afoto phọ.)
4 ‘AZihova amoọgh ni iboom igbiririph.’ (Jems. 5:11) Siphẹ aBaibul phọ, odị asighẹ loor odị atomaạm onhiin dị amhoọgh igbiririph. (Isa. 66:12, 13) Gbiom olhoghi onhiin dị amhaạr rapogh obumoọny odị r’ephomhoghiạn. Eyoghoyoghọ eten kụ edị odị raḅeton ghan kaḅilhẹ aḅaanhaạn nyodị reḍọgh dị edugh. Mem dị obumoọny phọ ramoghi obobọ alhoghoma eephinha, odị ramiịn ghan ni mọ odị amiteom angọ iyaạr phọ obumoọny phọ amhoghi bọ. Mem dị yira odi esi iiḅaghamhị, yira kotue ni okuphom owol ephomhoghiạn phọ aZihova. Okọ suọr phọ agẹ mọ: “Torobọ amem lọ mị aaḅaghamiạn loor aḅilhẹ amhoọgh oḅio kaph-kaph, nạ uudereghị imhị aḅilhẹ ungọ imhị oḅaạl olhoghi.”—Ps. 94:19.
“Mị kiidereghị inyina, idiphọ onhiin raadereghị ghan bọ moọny odị” (Miịn ekpịgh phọ 4)
5. Ephomhoghiạn oḅạr phọ aZihova remạ ghan eeghe esi anạ?
5 AZihova Enhaạn oḅạr. (Ps. 103:8) Odị ka/bilhẹ ophomhoghiạn ghan ayira ghalhamọ r’amem dị yira opiomạn. Eelhe phọ Izrạl ubi ni aZihova ibadị amem; kuolọ aZihova aghiọm ni ghisigh aḍeenhaan ghan we phọ odị okiton bọ ephomhoghiạn phọ odị re/minheen ghan bọ. Esi omaạm odị aḅenhị bidị mọ: “Nyinha eḍigh ni iiseẹny esi amhị kụ mị iphomoghiạn inyina kụ ingọ inyina eghuan.” (Isa. 43:4, 5) Ephomhoghiạn phọ Enhaạn ke/nmia. Yira kotue ni obeḍenhọm ephomhoghiạn phọ odị. Ghalhamọ yira uḍighi ni igbogh ikarạph, aZihova iyira ku/toka. Yira okiton kụ oḅilhẹ oḅula k’aZihova, yira komiịn ni mọ ephomhoghiạn phọ odị amhoọgh bọ aru esi ayira ke”nmia. Odị aguanhaan ‘oogborion ghan osạr owilhenhaạn.’ (Isa. 55:7) ABaibul phọ akaạph kẹn mọ osạr owilhenhaạn phọ aZihova ‘ragbuurogh ghan ikarạph phọ ayira’ kụ uumhanhamhi iyira.—Iiḍ. 3:19.
6. Zechariah 2:8 itughemhị iyira eeghe ilọ aZihova?
6 Bạl Zechariah 2:8. Loor iduọn odị uphomhoghiạn bọ iyira, odị raagboronhom ghan ni olhọgh elhegh ipẹ yira olhoghoma bọ ḅilhẹ anyạ ni r’ikpukpụ oghoph ayira. Olhoghi odị ra/ḅaạl ghan mem dị yira oḅonyonhu ozuan. Esi iduọn phọ, yira otue ni ooḅereghị mọ: “Uuko imhị idiphọ oọny aḍien phọ anạ.” (Ps. 17:8) Ekpeḍien apakirị aloor phọ dị yira osereghiạn ḅilhẹ romaạr ghan kooko. Esi iduọn phọ, mem dị aZihova usighẹ iyira ratomaạm oọny aḍien odị, pọ odị raḅẹm ghan mọ, ‘torobọ oye dị iwạ inyinha sighiton pọ ruwạ imhị, loor esi dị mị akạr isereghiạn inyinha.’
7. Uḍighi ika kụ emhoghi bọ okparamhị oḍuom olhoghi phọ ayira esi ephomhoghiạn phọ aZihova?
7 AZihova rawạ mọ legheri akuphom owol mọ odị aphomhoghiạn ni nyinhạ. Odị alegheri ni mọ loor esi araraạr dị mimitenhaan ghan iyira epẹ omhạn, yira otue ni ookia ephomhoghiạn phọ odị. Obobọ yira osoman ni dọl dị redẹgh kephogh oḍuom olhoghi phọ ayira esi ephomhoghiạn phọ aZihova. Eeghe nuụn kụ kekparamhị oḍuom olhoghi phọ ayira? Otuughạ ipẹ aZihova raḍeenhaan ghan bọ ephomhoghiạn phọ odị Zizọs, buphẹ osagharạn bọ, r’oomo ayira.
IDỊ AZIHOVA RAḌEENHAAN GHAN EPHOMHOGHIẠN PHỌ ODỊ
8. AZizọs atụ eeghe kụ akuphom bọ owol ephomhoghiạn Odẹ phọ odị?
8 Esi ibadị asiạ dị yira ko/tue ogbi, kụ edị asiya arighirị phọ regbogh ephomhoghiạn phọ aZihova r’Oọny phọ odị emhiigh. Asiya arighirị i/lo dị ekpọ epu epẹ aZihova r’aZizọs epẹ k’akẹ r’isiẹn ade phọ. AZihova aghaạph ni aagholhomhi dị awe konaghạn mọ odị apomhoghiạn Zizọs, idiphọ edi bọ Matiu 17:5. AZihova mutue ni bịn aḅẹm mọ, ‘ophọn kụ edị mị masabạr.’ Kuolọ o/ḍighi idiphọ, awạ ghụn dị yira kolegheri odọ idị odị aphomhoghiạn Zizọs, esi iduọn phọ odị aḅẹm mọ “Oọny amị dị mị aphomoghiạn.” AZihova aabagaam ghan Zizọs loor odọ oye phọ aZizọs aru bọ ḅilhẹ r’ipẹ odị aakolhobian bọ osighẹ aloor phọ odị ophighironhọm ekiạ. (Efẹ. 1:7) R’amem r’amem aZizọs oo/kia mughumọ Odẹ phọ odị apomhoghiạn ni nyodị. Odị akạr kụ akuphom owol mọ aZihova apomoghiạn ni nyodị. AZizọs aghaạph ni ibadị amem r’okuphom owol mọ Odẹ phọ odị apomhoghiạn ni nyodị.—Jọn 3:35; 10:17; 17:24.
9. Eeghe ikpo onhụ kụ edị aZihova asighẹ aghaaphọm ilọ ephomhoghiạn phọ odị amhoọgh bọ aghị esi abuphẹ osagharạn bọ uwaloor iigbia phọ? Gbạ. (Rom 5:5)
9 AZihova aḍeenhaan kẹn ni ephomhoghiạn phọ odị buphẹ osagharạn bọ uwaloor iigbia phọ. (Bạl Rom 5:5.) Adiniin aḍinyạ etomaạm ephomhoghiạn phọ aZihova amhoọgh bọ aghị esi aKristẹn phọ osagharạn bọ uwaloor iigbia phọ muụm dị rakil okol. P’eeghe imạ eten osighẹ oghaaphọm ilọ egbogh ephomhoghiạn phọ aZihova amhoọgh bọ aghị esi abuphẹ osagharạn bọ! Kụ abuphẹ osagharạn bọ uwaloor iigbia phọ olegheri ni mọ bidị odimom “ephomoghiạn Enaạn.” (Jud 1) Otelhedom mọ Jọn aghaạph ni idị bidị olhoghoma mem mọ odị agẹ bọ mọ: “Imiịn eboom ephomoghiạn dị Odẹ phọ uphomoghiạn iyira. Ephomoghiạn phọ odị ebụgh ni iboom dị motuạn ughol iyira mọ anmụny Enaạn!” (1 Jọn 3:1) Oginha abuphẹ osagharạn bọ uwaloor iigbia phọ bịn kụ edị aZihova aphomhoghiạn ḍughụm? Eeye, aZihova maḍeenhaan ni ephomhoghiạn phọ odị oomo ayira.
10. Eghẹn kụ eten dị enhighẹ epelhom dị aZihova maḍeenhaan nyinhạ ephomhoghiạn phọ odị?
10 Eghẹn kụ eten dị epelheghiom dị aZihova muḍeenhaan iyira ephomhoghiạn phọ odị? Ekiạ etagharạn phọ kụ egbogh eten dị aZihova muḍeenhaan iyira ephomhoghiạn dị onhọn oye ko”ḍeenhaan ghan! (Jọn 3:16; Rom. 5:8) AZihova angọ ooḅi Oọny phọ odị, pidị etue edugh dị kosạr obilhenhaạn omhạr awe ikarạph ḅilhẹ yira otue oḍighi righirị Odị. (1 Jọn 4:10) Yira oghị ghan ghisigh ogbirima ghan ipẹ aZihova r’aZizọs uḍighinhaan bọ iyira, onhaghanhạn aḍughụm mọ ayira ilọ ephomhoghiạn phọ bidị umhooghonhaạn bọ iyira kebụgh ghan bịn. (Gal. 2:20) U/tuạn oghaạph ogbaanyamhị elhiom ooruẹn aZihova bịn kụ omiteom bọ ekiạ etagharạn phọ. Ekiạ phọ eḍighi inmo ephomhoghiạn. AZihova aḍighi aḍeenhaan ephomhoghiạn phọ odị esi osighẹ aZizọs phọ odị aphomhoghiạn bọ iboom ophighironhọm ekiạ. AZihova amheera mọ Oọny phọ odị utuạn iyira amhiinhọm kụ amhugh.
11. Yira otuughạ eeghe siphẹ Jeremiah 31:3?
11 Iduọn yira momhiịn bọ, aZihova ra/ḅoronhom ghan ephomhoghiạn phọ odị amhoọgh bo esi ayira, odị rakaạph ghan ni kamiteom. (Bạl Jeremiah 31:3.) AZihova ruḍur ghan iyira kalhoghoma loor esi dị odị uphomhoghiạn iyira. (Poghom Deuteronomy 7:7, 8.) Iyaạr obobọ oye o/lho dị katue ugbatạn iyira esi ephomhoghiạn phọ Enhaạn. (Rom. 8:38, 39) Ika kụ idị ephomhoghiạn phọ ephẹn phọ etir nyinhạ? Bạl Psalm 23, omhiịn ipẹ ephomhoghiạn phọ r’ogbolhomaam mọ aZihova etir Devid ḅilhẹ r’idị ketue etir aani oomo phọ ayira.
EPHOMHOGHIẠN PHỌ AZIHOVA RETIR GHAN NYINHẠ IKA?
12. Ika kụ edị nạ kakaạph aakaragh Psalm 23?
12 Bạl Psalm 23:1-6. Siphẹ Psalm 23, aDevid aghaạph ni akuphom owol mọ aZihova apomhoghiạn aḅilhẹ amoọgh ogbolhomaam odị. Odị aghaạph ilọ asiya arighirị phọ odị amhoọgh bọ r’aZihova, opọ odị amhiịn bọ idiphọ Opoghom odị. ADevid alher ri loor angọ iiḅakiọm mọ aZihova, aḅilhẹ abeḍenhọm ghan nyodị oomo amem. ADevid alhegheri ni mọ aZihova kakị ni ghisigh aḍeenhaan ghan nyodị ephomhoghiạn torobọ aḍio siphẹ aghuḍum mọ odị. Eeghe kụ ingọ bọ nyodị akpọ oḅio phọ ophọn phọ?
13. Uḍighi ika kụ aDevid akuphom bọ owol mọ aZihova kapogh ni nyodị?
13 “Iyaạr imhị ki/kuom.” ADevid akuphom ni owol ephomhoghiạn phọ aZihova, loor esi dị aZihova amhiịn ghan mọ oomo amem iyaạr nyodị i/kuom. ADevid alhegheri ni mọ aZihova apomhoghiạn ni nyodị aḅilhẹ asighẹ nyodị idiphọ oyaghirị dị odị asereghiạn. Epẹ kụ iyaạr phọ odị akuphom bọ owol mọ etigheri iyaạr dị emitenhaan nyodị ghisigh, aZihova kakiọm ni ghisigh apogh nyodị. Okuphom owol phọ aDevid amhoọgh bọ mọ aZihova apomhoghiạn ni nyodị ḅilhẹ mọ kapogh ni nyodị, ikọm ibo r’ogbaanyạn kụ engọ nyodị.—Ps. 16:11.
14. Ika kụ edị aZihova ramaạr ghan kuphogh iyira r’ephomhoghiạn?
14 AZihova ruphogh ghan ni iyira, ekạr ekpaariọm mem dị ikarạph araraạr imitenhaan iyira. AKlaire, a dị makumuan Betẹl 20 asiạ r’opeel aḅẹm mọ aloor odị ipelhelhẹ ni mem dị odị u/legheri ilọ olhoghonhaạn aḍighaạgh eghunotu odị dị iiḅaghamhị emheelhom. Odẹ odị amheelhom ezẹgh aḍighaạgh r’aduwol, ophorogh oniin umaranhi odị siẹn ookpomhoghan phọ, kụ eghunotu phọ oḅilhẹ omhoọgh iiḅaghamhị ikpoki r’esi orọl. Ika kụ edị aZihova aḍeenhaan bidị ephomhoghiạn? AKlaire aḅẹm mọ: “AZihova amhiịn mọ eghunotu phọ ayoor omoọgh ni raraạr orolhọm ḍio etum ḍio. Mem etum mem, aZihova amiteom ghan ni ungọ iyoor raraạr dị yoor olhoghi u/seere! Mi ragbor ghan ni kaatughiạn ipẹ aZihova mulhoghonhaạn bọ imhị ḍighaạgh kụ ipẹ phọ ringọ ghan imhị okuphom owol mọ aZihova uphomhoghiạn ni imhị. Iphẹn phọ milhoghonhaạn imhị ḍighaạgh oghiọm aghisigh okumu ghan aZihova ghalhamọ r’amem dị mị asoman iiḅaghamhị.”
15. Eeghe kụ iimhanhamhi bọ Devid? ((Miịn kẹn afoto phọ.)
15 “Nạ ruumhanhamhị ghan imhị.” Eeni amem, aDevid aḅonyonhu ghan ni azuan loor iiḅaghamhị ḅilhẹ rodẹgh ophogh phọ odị asoman ghan bọ. (Ps. 18:4-6) Ghalhamọ r’iduọn phọ ni, ephomhoghiạn phọ aZihova iimhanhamhi ghan ni nyodị. AZihova asighẹ ni oyaghirị phọ odị maḅonyonhu bọ azuan aghimọm loor “atuyoghonyoghọ arooghọ” ḅilhẹ “ogbạl-amuụm dị ra/kil.” Kụ iphẹn phọ iḍighi ni idị aDevid aamhanham aḅilhẹ amhoọgh inyaạm aghiọm ghisigh akumu aZihova r’ibo.—Ps. 18:28-32.
Ghalhamọ r’amem dị aDevid aḅonyonhu azuan, bịn ephomhoghiạn phọ ḅilhẹ r’ogbolomaam mọ aZihova aamhanhamhi ni nyodị (Miịn ekpịgh phọ 15)
16. Ika kụ edị ephomhoghiạn phọ aZihova meemhanhamhi nyinhạ?
16 Iginha phọ kẹn rodon, “ephomoghiạn phọ aZihova r’onmạ ighirigiir phọ odị amabi u/lo ghan bọ edi ghan bịn” mem dị yira osoman odẹgh ophogh r’iiḅaghamhị kirokirọ. (Lam. 3:22; Kọl. 1:11) Ooḅeghiọn eḍeenhaan aRachel. Odị akạr kụ aḅonyonhu azuan mem ezẹgh aKOVID-19 phọ loor iduọn olom mọ odị awilhẹ bọ nyodị r’aZihova. AZihova alhoghonhaạn nyodị ḍighaạgh ika? Odị aḅẹm mọ: “AZihova aḍighi ni idị mị aloghoma ephomhoghiạn. Odị ukitonhom imhị r’arighirị dị ungọ ghan imhị mem abidị, uruom ghan imhị eḍien, ugẹ ghan imhị rinyạ oḅilhẹ osighẹ ghan Baibul phọ ukparamhiọm imhị, omhilhọgh ghan r’amhị, ḅilhẹ oghị ghan ghisigh uutughianhạm imhị mọ aZihova amoọgh ni ogbolhomaam amhị. Mị rasẹph ghan ni aZihova oomo amem ongọ amhị egbogh eghunotu ephomoghiạn phọ ephẹn phọ.”
17. Uḍighi ika kụ aDevid o/ghiilhaan bọ iyaạr?
17 “Mị ka/kiilhaan iyaạr, idị eḍighi bọ nạ odi r’amhị.” ADevid asoman ni ibadị asidọl ooto r’osooromineen r’abumulhọgh ḍien dị omhoọgh iikpọ. Kuolọ, ephomhoghiạn phọ aZihova iḍighi ni idị odị alhoghoma oghoph. ADevid alhoghoma ni mọ aZihova odi ni r’odị etigheri dọl phọ, kụ ipẹ phọ ingọ ni nyodị akpọ oḅio. Esi iduọn phọ, odị amhoọr ri mọ: “[AZihova] uphẹl imhị asighẹ esi oghiilhaan kirokirọ phọ amhị.” (Ps. 34:4) ADevid amhoọgh ni oghiilhaan, kuolọ odị arue ni akpạr apu oghiilhaan phọ odị, loor esi dị odị akuphom owol ephomhoghiạn phọ aZihova.
18. Ika kụ edị okuphom owol ephomhoghiạn phọ aZihova ketue ekparamhị nyinhạ mem dị nạ amhoọgh oghiilhaan?
18 Ika kụ edị okuphom owol ephomhoghiạn phọ aZihova ketue ikparamhị iyira mem dị yira osoman sidọl oḅio kaph kaph? Okọy eten dị oghol mọ Susi aghaạph ni idị olom odị r’odị olhoghoma mem dị oọny abidị asinha: “Ekperenhom iiḅaghamhị reḍighi ghan idị oye phọ ra/legheri ghan ilọ oḍighi. Kuolọ ephomhoghiạn phọ aZihova iḍighi ni idị yoor olhoghoma oghoph.” ARachel, oghaạph bọ oghol epẹ omhạn aḅẹm mọ: “Ḍiniin aḍughul dị mị akạr akururu, aaḅaghamhiạn loor, ḅilhẹ aghiilhaan, mị uuḅereghị ni r’emoghi aḅenhị aZihova. Bịn egina amem mị alhoghoma dị odị amhiigh ophoomhị ekpom amhị aḅilhẹ uudereghị imhị, idiphọ onhiin raadereghị ghan bọ obumoọny odị, bịn aralhạ usighẹ imhị. Mị ka/tue ni bịn abula ipẹ emite bọ ḍio phọ aḍiphẹ phọ.” Okumor oye ookpomhoghan dị oghol mọ Tasos arọl inya asiạ ikoli loor iduọn odị u/meera bọ uḍighi onyọ eghạm. Ika kụ edị aZihova aḍeenhaan nyodị ephomhoghiạn r’ogbolhomaam? Odị aḅẹm mọ: “AZihova amiteom ni ungọ imhị oomo phọ araraạr phọ mị amhoghi bọ r’inhọn. Iphẹn phọ ingọ ni imhị akpọ oḅio mọ mị katue ni akpasị emooph phọ amhị esi odị. Ḅilhẹ kẹn, dị eego esi uwaloor phọ odị, aZihova ungọ ni imhị ibo etigheri ḍigbagarạ adọl ikoli phọ. Iphẹn phọ ingọ ni imhị okuphom owol mọ iduọn mị rabughẹ bọ rukumuan phọ amhị r’odị, kụ edị mị kakị ghan ghisigh bịn aloghoma ephomhoghiạn phọ odị. Esi iduọn phọ, mị usighẹ ni okọy eten opọ oomo amem mọ siphẹ otu ikoli phọ.”
ḌURAAN ATUMAN ENHAẠN IGBIRIRIPH PHỌ
19. (a) Ika kụ edị olhegheri mọ aZihova uphomhoghiạn iyira ketue etir raraạr phọ yira roḅenhị ghan bọ nyodị esi iiḅereghị? (b) Ighẹn ikpo onhụ dị eghaạph ilọ ephomhoghiạn phọ aZihova kụ rekạr ghan ketir nyinhạ? (Miịn igbe phọ “ Ikpo Onhụ Dị Reḍighi Ghan Idị Yira Rologhoma Ghan Ephomhoghiạn Phọ AZihova.”)
19 Areḍeenhaan phọ yira mooḅeghiọn bọ ekạr eḍeenhaan mọ aZihova “Enaạn ephomoghiạn” phọ odi ni r’ayira! (2 Kọr. 13:11) Odị amoọgh ni ogbolhomaam atorobọ onyọ ayira. Yira okuphom ni owol mọ “ephomoghiạn phọ odị re/mineen ghan bọ” ikoom ni iyira ekitonhom. (Ps. 32:10) Mem dị oghị ghisigh ogbirima ghan reten phọ odị muḍeenhaan bọ iyira ephomhoghiạn phọ odị, kụ edị yira kokiọm ghisigh bịn oḍuraan otuman nyodị. Yira kotue ni oḅaanhaạn nyodị torobọ amem ḅilhẹ olọm nyodị oḍeenhaan ayira ephomhoghiạn phọ epẹ yira rowạ bọ. Yira kotue ni oḅenhị nyodị torobọ ooḅaghamhiạn aloor dị yira omhoọgh, r’oḍuom olhoghi mọ odị anyạ ni r’ikpukpụ olhoghonhaạn ayira ḍighaạgh.—Ps. 145:18, 19.
20. Ika kụ edị ephomhoghiạn phọ aZihova riḍur ghan iyira ketumeriom nyodị?
20 Iduọn yira roḍuraan ghan bọ kotuman niạn dị okpoonhị mem dị osipheeny rusiph iyira, kụ edị yira roḍuraan ghan kotuman ephomhoghiạn phọ aZihova righolhogholhomhị ghan bọ iyira. Ghalhamọ r’iduọn ephomhoghiạn phọ aZihova emhoọgh bọ ni iikpọ, eyoghoyoghọ kẹn ni. Esi iduọn phọ, moọgh ibo loor esi dị aZihova aphomhoghiạn ni nyinhạ. Eḍighi idị ephomhoghiạn phọ odị kenyu nyinhạ ogbeelhom mọ: “Mị apomoghiạn ni aZihova”!—Ps. 116:1.
NẠ KAPAGHARANHAẠN IKA?
-
Ika kụ edị nạ kagbạ ephomhoghiạn phọ aZihova?
-
Uḍighi ika kụ nạ katue bọ ni akuphom owol mọ aZihova aphomhoghiạn ni nyinhạ?
-
Nạ aloghoma ika ilọ ephomhoghiạn phọ aZihova?
AḌUỌR PHỌ 108 God’s Loyal Love
a Monme iniin asiḍien.