1. Eeghe kụ ketue eḍighi iyaạr dị yira komoọgh oghiilhaan?

 OYE o/lho dị ra/moọgh ghan oghiilhaan eeni amem. Ii, loor igey aBaibul phọ yira motuughạ bọ, yira ro/kiilhaan ghan mun we dị momhugh, ikarạph aruwaloor, obobọ idị kemitenhaan omhạr awe ghisigh. Kuolọ yira odi mem dị “araraạr aruugu,” idiphọ araaghạm, osoroghu iilhogh, ḅilhẹ areezẹgh kụ emuza. (Luk 21:11) Yira otue kẹn ni omoọgh oghiilhaan oye, buọ itooghị dị rukpuuroghọm iyira obobọ buọ eghunotu ayira dị rusophoghom iyira ooḅereghị aZihova. Abuniin rokiilhaan ghan mọ eeni bunọ ko/tue okparạm igbiphoghọm mọ bidị rosoman bọ nyiidiphọ obobọ kosoman bọ ghisigh.

2. Eeghe adọl kụ edị aDevid asoman epẹ Gath?

² Asimem irọl li dị aDevid amhoọgh oghiilhaan. Esi omaạm, mem mọ aSaul Odaạm mọ rawạ bọ nyodị oghiigh, aDevid asuma aghị emhạ abuọ aPhilistine dị oghol mọ Gath. Kụ Achish odaạm mọ aGath, aru alhegheri mọ aDevid kụ ookparạ phọ omhoorọm ghan bọ mọ “mazẹ simuonịr asimuonịr” aPhilistine phọ. Kụ aDevid “amhoọgh oboom oghiilhaan.” (1 Sam. 21:​10-12) Odị aghiilhaan iyaạr phọ Achish kaḍighi bọ nyodị. Ika kụ idị aDevid akpạr apu oghiilhaan phọ odị?

3. Odaphạn Psalm 56:​1-3, 11, ika kụ edị aDevid arue akpạr apu oghiilhaan phọ odị?

³ Siphẹ Psalm 56, aDevid aghaạph ni ipẹ odị alhoghoma bọ mem mọ odị arọl bọ epẹ Gath. Siphẹ phọ aDevid akạr aghaạph iyaạr phọ ekom bọ oghiilhaan phọ odị, ḅilhẹ r’iyaạr phọ elhoghonhaạn bọ nyodị ḍighaạgh okpạr opu oghiilhaan phọ. Mem dị odị amhoọgh oghiilhaan, aDevid aḍuom olhoghi aZihova. (Bạl Psalm 56:​1-3, 11.) ADevid amhoọgh ni igey ariphigh otuạn oḍuom olhoghi  aZihova. R’aḍisẹph aZihova, aDevid arue ni alhegheri ilọ oḍighi: Odị amhiigh oḅo ilọ oḍigh elhaạl! Bịn kparipẹ rowạ areten oghiigh aDevid, Achish awạ ghụn eten ophorogh aDevid, bịn aDevid amhoọgh eepoogh osuma.—1 Sam. 21:13–22:1.

4. Ika kụ edị nạ katue akparamhị oḍuom olhoghi phọ anạ esi aZihova? Kaạph amaaniọm.

⁴ Yira kotue kẹn ni okpạr opu oghiilhaan phọ ayira esi oḍuom ghan olhoghi aZihova. Kuolọ ika kụ edị yira kotue okparamhị oḍuom olhoghi phọ ayira esi aZihova, ekạr ekpaariọm mem dị yira omhoọgh oghiilhaan? Ooḅeghiọn oghaạph omaanhiọm. Eḍighi maạr dị nạ alhegheri mọ nạ amoọgh ezẹgh, eeni emhiighom mọ nạ kamoọgh ni oghiilhaan. Kuolọ nạ katue ni apoomhị loor eru maạr dị nạ amhoọgh oḍuom olhoghi aghị esi oyil arookonhom mọ anạ. Odị maakonhom ni ibadị dị omhoọgh eniin phọ ezẹgh phọ. Odị aler rurụ angọ nyinhạ iduọn nạ rakaạph bọ ipẹ reḍighi bọ nyinhạ, kụ nạ alegheri mọ odị anaghanhạn ni ipẹ nạ alhoghoma bọ. Odị atue ni akaạph ilọ arookonhom dị meḍumhe ni ibadị. Eniin phọ eten phọ kẹn, yira kotue ni okparamhị oḍuom olhoghi phọ ayira esi aZihova mem dị yira ooḅeghiọn ipẹ odị maḍighi ghan bọ, ipẹ odị raḍighi bọ nyiidiphọ, r’ipẹ odị kuḍighinhaan bọ iyira epẹ ghisigh. Ipẹ kụ idị aDevid aḍighi bọ. Iduọn yira rooḅeghiọn bọ Psalm 56, tuutughiạn idị nạ katue akparamhị oḍuom olhoghi phọ anạ esi aZihova kụ akpạr apu oghiilhaan phọ anạ.

EEGHE KỤ EDỊ AZIHOVA MAḌIGHI?

5. Orue okpạr opu oghiilhaan phọ odị, aDevid agbirima ilọ eeghe? (Psalm 56:​12, 13)

⁵ Ghalhamọ r’amem mọ odị odi bọ ni dọl ooto r’osooromineen phọ, bịn aDevid aghị ni ghisigh agbon ghan ipẹ aZihova maḍighinhaan ghan bọ nyodị igbaany. (Bạl Psalm 56:​12, 13.) Epẹ kụ iyaạr dị aDevid aḍighi ghan siphẹ oomo adọl aghuḍum mọ odị. Esi omaạm, eeni amem odị agbirima ghan ilọ olhẹm mọ aZihova, kụ ipẹ phọ iitughianhạm ghan nyodị ilọ iikpọ phọ aZihova ḅilhẹ r’ogbolhomaam mọ aZihova amhoọgh bọ aru esi omhạr awe. (Ps. 65:​6-9) ADevid agbirima ghan kẹn raraạr phọ ipẹ aZihova maḍighinhaan bọ bunhọn awe. (Ps. 31:19; 37:​25, 26) Odị akạr agbirima ghan ipẹ aZihova maḍighinhaan bọ nyodị r’aloor. K’amem dị aDevid aḍighi obumoọny kụ edị aZihova amhiigh ophogh odị. (Ps. 22:​9, 10) Dị iikia i/lo, ogbirima ghan ilọ araraạr phọ ipẹ phọ ikparamhị ni oḍuom olhoghi phọ aDevid esi aZihova!

6. Mem dị yira olhoghoma oghiilhaan, eeghe kụ kilhoghonhaạn iyira ḍighaạgh oḍuom olhoghi aZihova?

 ⁶ Mem dị nạ amhoọgh oghiilhaan, puru loor anạ mọ, ‘Eeghe kụ edị aZihova maḍighi?’ Tuutughiạn ilọ olhẹm mọ odị. Esi omaạm, mem dị yira okiririom ophogh ipẹ aZihova rapogh ghan bọ inhụn phọ r’asifalawạy phọ—odị u/lẹm bọ u/kighimaạm loor ḅilhẹ ke/tue bọ eeḅereghị nyodị—kekparamhị ni oḍuom olhoghi phọ ayira mọ odị kuphogh ni iyira. (Mat. 6:​25-32) Gbirima raraạr phọ aZihova maḍighinhaan bọ rebenhẹ phọ odị. Nạ atue ni atuughạ ilọ oye siphẹ aBaibul phọ dị aḍeenhaan omheeraam dị agbatanhaạn, obobọ nạ atue ni abạl ilọ idị emitenhaan oniin ebenhẹ aZihova siẹn amem mọ ayira. a Kụ oḅarạm isiphẹ, gbirima ilọ araraạr phọ ipẹ aZihova maḍighinhaan bọ nyinhạ. Ika kụ edị odị aḍur bọ nyinhạ alhọgh siẹn igey phọ? (Jọn 6:44) Ika kụ edị odị rapagharanhaạn ghan iiḅereghị phọ anạ? (1 Jọn 5:14) Ika kụ edị nạ ramooghọm ghan suọ ḍio etum ḍio esi ekiạ ooḅi Oọny phọ odị?—Efẹ. 1:7; Hib. 4:​14-16.

7. Ika kụ idị ipẹ emitenhaan bọ Daniel elhoghonhaạn ḍighaạgh aVanessa okpạr opu oghiilhaan phọ odị?

⁷ AVanessa onyọ umaranhi olọ aHaiti, b asoman ni dọl dị engọ nyodị oghiilhaan. Oye olọ emhạ abidị amhạgh ghan aḅilhẹ agẹ ghan aruom nyodị dom afon, kụ akpaariọm ghan aVanessa ogaạny odị. Kuolọ aVanessa o/mheera. Kụ oye phọ aghiọm ghisigh anyaạm ghan aḅilhẹ apaarọgh ghan nyodị. AVanessa aḅẹm mọ ipẹ phọ “ingọ ni nyodị oghiilhaan.” Ika kụ edị aVanessa akpạr apu oghiilhaan phọ odị? Odị aḍighi ni idị odị katue oghoph aloor odị. Okumor oye ookpomhoghan abidị alhoghonhaạn ni nyodị ḍighaạgh oghị oḅenhị agomẹt phọ ipẹ remite bọ. AVanessa agbon kẹn ipẹ aZihova maghoph bọ rebenhẹ phọ odị iḍiodi phọ. Odị aḅẹm mọ: “Oḅẹl oye dị aru olhoghi amhị pọ oyil phọ Daniel. Uroph nyodị osumeeny ooni idimini-buagụ dị okoọny rasiph ghalhamọ r’iduọn odị olhogh u/soor bọ ni. Kuolọ, aZihova aghoph ni nyodị. Kụ mị alhọm aZihova mọ odị utagharạn imhị ḍighaạgh oye phọ ophọn phọ. Mị rooḅereghị bịn oghiilhaan phọ amhị aḍuạ.”—Dan. 6:​12-22.

EEGHE KỤ EDỊ AZIHOVA RAḌIGHI?

8. Eeghe kụ edị aDevid akuphom owol? (Psalm 56:8)

⁸ Ghalhamọ r’iduọn aDevid asoman bọ ni dọl ooto r’osooromineen epẹ Gath, odị o/gbon raraạr dị kengọ nyodị oghiilhaan. Kparipẹ ghụn, odị asopha ooḅeghiọn araraạr phọ ipẹ aZihova raḍighinhaan bọ nyodị mem mọ amuphẹ phọ. ADevid amhiịn ni ipẹ aZihova raaḅakị bọ, rakoph bọ, aḅilhẹ bọ kẹn r’anaghanhạn ipẹ odị alhoghoma bọ. (Bạl Psalm 56:8.) ADevid amhoọgh kẹn ni bugey arighirị, idiphọ aJonathan, r’Ogbogh Opinyọn Rikiạ Phọ Ahimelech dị okparamhị ghan oḅilhẹ olhoghonhaạn ghan nyodị ḍighaạgh. (1 Sam. 20:​41, 42; 21:​6, 8, 9) Kụ ghalhamọ r’iduọn Odaạm mọ Saul, awạ ghan bọ ni reten oghiigh odị, aDevid akpetenhaan ni. Odị akuphom ni owol mọ aZihova alegheri ni iiḅaghamhị phọ odị asoman bọ r’ipẹ etir bọ nyodị.

9. Eeghe kụ edị aZihova ralọgh ghan elhegh ilọ atorobọ onyọ ayira?

⁹ Mem dị nạ asoman iiḅaghamhị dị engọ nyinhạ oghiilhaan, legheri mọ aZihova alọgh ni elhegh iiḅaghamhị phọ ḅilhẹ r’ipẹ etir bọ nyinhạ. Esi omaạm, aZihova o/mhiịn bịn iiḅaghamhị phọ awe phọ Izrạl osoman bọ epẹ Ijipt kuolọ odị alhegheri ni “imhinimhiịn phọ abidị.” (Ex. 3:7) ADevid amhoọr mọ aZihova amiịn ni “imhinhimiịn” ḅilhẹ “riiḅaghamhị” phọ odị. (Ps. 31:7) Ḅilhẹ mem dị awe phọ Enhaạn omhiinhọm—ghalhamọ r’aloor esi okarạph osopha abidị—“iiḅaghamhị ghan ni [aZihova].” (Isa. 63:9) Mem dị nạ amhoọgh oghiilhaan, aZihova anaghanhạn ni ipẹ nạ alhoghoma bọ kụ akạr rawạ  olhoghonhaạn anạ ḍighaạgh okpạr opu oghiilhaan phọ anạ.

10. Eeghe kụ ingọ bọ nyinhạ okuphom owol mọ aZihova alhọgh ni nyinhạ elhegh ḅilhẹ mọ odị kalhoghonhaạn ni nyinhạ ḍighaạgh okaran iiḅaghamhị phọ anạ?

¹⁰ Eḍighi maạr dị nạ asoman iiḅaghamhị dị rekọm okaphian oomhiigh kengọ nyinhạ, eeni etue ni ekparanhaạn nyinhạ omhiịn olhoghonhaạn aḍighaạgh aZihova. Eḍighi idiphọ, pọ nạ atue ni alọm nyodị oḍighi idị nạ kamiịn olhoghonhaạn aḍighaạgh phọ odị. (2 Ki. 6:​15-17) Kụ agbirima sipuru phọ iphẹn: Mongọ ni oghaạph obobọ ophagharanhaạn otu ituughạ dị akparamhị nyinhạ? Aḍinyạ, avidio, obobọ aḍuọr abrokastịn mekparamhị ni nyinhạ? Oye masighẹ ni esi aBaibul akparamiọm nyinhạ? Yira otue ni obulha idị ephomhoghiạn abumor r’abumaranhi phọ ḅilhẹ r’eḍien aruwaloor phọ rikparamhị ghan iyira. Kuolọ, ipẹ phọ iikiạ inmo k’aZihova. (Isa. 65:13; Mạk 10:​29, 30) Ipẹ phọ reḍeenhaan ghan mọ odị ruphogh ni iyira. (Isa. 49:​14-16) Eḅilhẹ eḍeenhaan mọ yira kotue ni oḍuom nyodị olhoghi.

11. Eeghe kụ ilhoghonhaạn Aida ḍighaạgh okpạr opu oghiilhaan phọ odị?

¹¹ Aida, dị arugh epẹ Senegal, alhọgh ni elhegh idị aZihova abakị nyodị mem dị odị asoman iiḅaghamhị. Loor iduọn odị kụ aḍighi bọ oḅẹl obumoọny, odẹ r’onhiin odị uwạ ghan dị odị kaḍighi oḍighi amoọgh ikpoki ophoghom aloor odị r’oomo eghunotu phọ. Kuolọ araraạr iru ni bịn ekpạr bịn elhoghorị mem mọ Aida adughe bọ dọl aghuḍum mọ odị orue okọy eten. Eghunotu odị ughaghạm ni nyodị olhoghi oḅilhẹ oghaaphọgh ghan ikarạph odị. Odị aḅẹm mọ, “mị ughiilhaan mọ mị ka/tue aloghonhaạn odẹ r’onhiin amhị ḍighaạgh ḅilhẹ mọ oomo abidị kuḅitonhaạn imhị. Mị ukpalhạm kẹn ni aZihova esi omheera mọ araraạr elhoghorị esi siphẹ phọ.” Kụ odị anhaghạn oniin oghaạph otu ituughạ. “Kụ okaaphọm mọ aatughianhạm ḍita phọ mọ aZihova alegheri ni torobọ odọ oghiilhaan dị yira omhoọgh. Kụ enụm enụm, dị eego esi oroma ikumor awe phọ r’abunhọn, mị uru ni akuphom owol mọ aZihova uphomhoghiạn ni imhị. Bịn mị amhiigh omhoọgh akpọ oḅio mem dị mị raaḅereghị mọ aZihova kulhoghonhaạn ni imhị ḍighaạgh. Kụ mị ukạr ghan kụ alhoghoma eephọ mem dị mị amhiịn ophagharanhaạn iiḅereghị phọ amhị.” Esighẹ rekị bịn, Aida amhoọgh oḍighi dị alhoghonhaạn nyodị ḍighaạgh okọy eten ḅilhẹ r’omiteom ongọ eghunotu phọ odị r’abunhọn. Odị akureri mọ, “mị matuughạ okpasị  oomo oḍuom olhoghi phọ amhị esi aZihova, nyiidiphọ, oghiilhaan amhị raḍuạ ghan ni torọ amem dị mị aaḅereghị.”

EEGHE KỤ EDỊ AZIHOVA KAḌIGHI?

12. Odaphạn Psalm 56:​9, eeghe kụ edị aDevid akuphom owol?

¹² Bạl Psalm 56:9. Ekpịgh phọ ephẹn phọ ekaạph enhọn iyaạr dị elhoghonhaạn ḍighaạgh Devid okpạr opu oghiilhaan phọ odị. Ghalhamọ r’iiḅaghamhị phọ odị asoman bọ ni, odị agbirima ni ipẹ aZihova kaḍighinhaan bọ nyodị epẹ ghisigh. ADevid akuphom ni owol mọ mem dị eteẹny aZihova katagharạn ni nyodị. Idị eḍighi bọ, aZihova magbeelhom mọ aDevid kụ kaḍighi odaạm Izrạl. (1 Sam. 16:​1, 13) Esi aDevid, torobọ iyaạr dị aZihova aguanhaan pọ memite.

13. Eeghe oḍuom olhoghi kụ edị yira omhoọgh esi aZihova?

¹³ Eeghe kụ edị aZihova maguanhaan oḍighinhaan anạ? Yira ro/gon ghan dị odị kughoph iyira asighẹ esi oomo iiḅaghamhị dị yira osoman. c Kuolọ, torobọ iiḅaghamhị dị yira osoman siẹn okarạph aḅirinhi phọ ophon, aZihova kasiemhi ni eekunha siphẹ omhoom aḅirinhi phọ ratu bọ. (Isa. 25:​7-9) Olemiạ phọ ayira amoọgh ni iikpọ oḅerion abuphẹ momhuughu bọ, ookonhom ayira, r’osiemhi eekunha oomo abuọ igbiphoghọm mọ.—1 Jọn 4:4.

14. Eeghe kụ edị yira kotue ogbirima ghan?

¹⁴ Mem dị nạ alhoghoma oghiilhaan, gbirima ipẹ aZihova kaḍighi bọ ghisigh. Gbiom olhoghi ipẹ ketọl bọ mem dị aSetan u/lo mun, mem dị mophiemhi ikarạph awe kụ ogina awe elhiom eḍighinhom iyaạr bịn kụ kotọl, kụ enụm enụm e/munughan eḍuạ ni emineen siẹn asiloor phọ ayira. Oḍighi oḍeenhaan dị arọl pakirị edeọm ookpomhoghan eghir 2014 phọ aḍeenhaan ni idị yira kotue ogbirima ghan ilọ oḍuom olhoghi phọ ayira. Odẹ aaḅeghiọn ni idị kobạl ghan 2 Timoti 3:​1-5 eru maạr dị esi phọ rekaạph ghan ipẹ aParadais katọl bọ. Odị aḅẹm mọ: “Siphẹ omhoom aḅirinhi phọ ogey oḅaạl olhoghi bịn kụ katọl. Awe kopomoghiạn bunhọn, opomoghiạn raraạr k’Enhaạn, olegheri okụ, osooromhi loor, ooseeny ghan Enhaạn, onaghanhạn ghan burudẹ r’aburunhiin, olegheri iiḅi, oḅạr Enhaạn, omhoọgh igbiririph okị esi abuọ eghunotu abidị, ro/bi ghan oguan, rokaạph ghan imạ ilọ abunhọn oomo amem, omoọgh ophamhaghạn aloor, oyoghoyoghọ, opomoghiạn igey phọ, oḍighi we dị okpẹ oḍuom olhoghi, romeeraam ghan ilọ abunhọn, roo/baga ghan, opomoghiạn Enhaạn kparipẹ r’eedughạ, kụ okạr r’ooḅereghị ghan Enhaạn k’ekpom; ḍighom ghan odọ awe phọ abuẹn.” Nạ rakaaphạn ghan ni r’eghunotu anạ obobọ bumor r’abumaranhi phọ idị aghuḍum katọl siphẹ omhoom aḅirinhi phọ?

15. Ghalhamọ r’iduọn aTanja amhoọgh bọ ni oghiilhaan, eeghe kụ ilhoghonhaạn bọ nyodị ḍighaạgh ophamhanhạm aḍimheerạ phọ odị?

¹⁵ Umaranhi phọ Tanja epẹ North Macedonia akpạr ri apu oghiilhaan phọ odị esi ogbirima ghan ilọ aḍisẹph kirokirọ phọ retu bọ ghisigh. Odẹ r’onhiin odị usophoghom ghan ni nyodị otuughạ aBaibul phọ. Odị abẹm mọ: “Iniin araraạr phọ mị aghiilhaan bọ mọ kimitenhaan imhị imite ni, onhiin amhị ukuphogh ghan imhị torọ amem dị mị arigheel ituughạ. Odẹ r’onhiin amhị upaarọgh imhị oghiigh amhị eru maạr dị mị aḍighi oniin onyọ Ogbaanhaạn AZihova.” Eekunha phọ, uphorogh ni Tanja siphẹ otu phọ. Odị amhegheron ika? ATanja aḅẹm mọ: “Mị ugbon oḅaạl olhoghi phọ mị kakelhọm bọ k’agee-pọ eru maạr lọ mị aphamhanhạm ḍimheerạ phọ amhị. Mị uḅilhẹ kẹn ni agbirima ghan ipẹ aZihova kusẹph bọ imhị siphẹ omhoom aḅirinhi phọ esi atorobọ iyaạr dị mị aroph siẹn okarạph aḅirinhi phọ ophọn phọ ḅilhẹ r’idị koo/tughiạn ghan mun imhinhimhiịn aḅirinhi phọ ophọn phọ.” ATanja aghị ni ghisigh  aphamhanhạm ḍimheerạ phọ odị. Kụ r’olhoghonhaạn aḍighaạgh aZihova, odị amhoọgh ni esi orọl. Rodon, aTanja odi rukumuan oomo amem mọ r’olom odị.

KPARAMHỊ OḌUOM OLHOGHI PHỌ ANẠ RODON

16. Eeghe kụ kilhoghonhaạn iyira ḍighaạgh okpọ oḅio mem dị yira omhiịn dị imiịn phọ edi bọ Luk 21:​26-28 remunughan?

¹⁶ Mem igbogh iiḅaghamhị phọ, “arimiigh awe kekaphagh ni.” Kuolọ awe phọ Enhaạn komeerạ ni r’akpọ oḅio. (Bạl Luk 21:​26-28.) Uḍighi ika kụ yira ko/moọgh bọ oghiilhaan? Loor esi dị yira motuughạ oḍuom olhoghi aZihova. ATanja, oghaạph bọ oghol epẹ omhạn, aḅẹm mọ ipẹ emitenhaan bọ nyodị ilhoghonhaạn nyodị ḍighaạgh okparạm igbagarạ asidọl dị odị asoman ghan. “Mị utuughạ mọ aZihova katue ni ulhoghonhaạn iyira ḍighaạgh aḅilhẹ usẹph iyira etigheri dọl dị yira osoman,” Kụ odị aḅarạm mọ, “eeni amem kekịgh mudị awe kụ rooḅakị raraạr, kuolọ ogbạ agey, ogina araraạr dị aZihova angọ ogẹl bịn kụ edị awe kotue ooḅakị. Ii adọl phọ ketue ni egbagarạ dị r’ilọ oḍighi u/legheri, kuolọ kesi ni eekunha.”

17. Ika kụ edị emhuoghaạph alhạ phọ 2024 ketue ilhoghonhaạn iyira ḍighaạgh? (Miịn afoto oḅẹl opoḍi phọ.)

¹⁷ Ibadị araraạr edi ni rodon dị ketue ekọm oḅio kakaph. Kuolọ idiphọ aDevid, ku/meera mọ oghiilhaan akpạr upu iyira. Emhuoghaạph alhạ phọ 2024 eḍighi iiḅereghị dị aDevid aaḅereghị aZihova: “Mem lọ mị amhoọgh oghiilhaan, mị rakpasị ghan oḍuom olhoghi amhị esi anạ.” (Ps. 56:3) Aḍinyạ dị regbạ ghan Baibul phọ ighaạph ilọ ekpịgh phọ ephẹn phọ mọ: “ADevid o/gbon raraạr phọ rekọm ghan bọ oghiilhaan phọ odị, kparipẹ ghụn, odị agbon Opeliạ phọ odị.” Tuutughiạn ghan emhuoghaạph alhạ phọ siẹn arunwanyụ phọ retu bo, ekạr ekpaariọm mem dị nạ asoman sidọl dị rekọm okaphian oomhiigh. Lọgh ghan mem aatughiạn ipẹ aZihova maḍighi bọ epẹ omhạn, raḍighi bọ rodon, ḅilhẹ kaḍighi bọ ghisigh. Bịn idiphọ aDevid, nạ katue ni agbeelhom aani mọ: “Mị akpasị emooph amhị esi Enhaạn kụ mị u/moọgh oghiilhaan.”—Ps. 56:4.