EKPO onhụ phọ ephẹn phọ ogbạ bọ mọ “oghuugh” siphẹ aBaibul phọ re/mạ ghan oniin odọ oghuugh bịn kuolọ ibadị. (Iiḍ. 8:​28, 29, 38) Toroboiperolbọ, ekịgh mudị opọ oye olọ Etiopiạ phọ aghiilhom ghan bọ abụgh ni apu oghuugh eghạm obobọ nyopọ rokiilhom ghan bọ eghiil iipikian phọ. Ooḅeghiọn iniin ariphigh phọ yira otụ bọ omheeraam ipẹ phọ.

Ophọn phọ ogbogh oye olọ Etiopiạ dị aḍuạ eekelhạ ekpisi kụ aru. Odị “okpolom oye ni, dị apaghaghaạm eelạ aKandasi, ukuenhi phọ adạ bọ Etiopiạ.” (Iiḍ. 8:27) Etiopiạ igeedị phọ aḅarạm ni rikpisi phọ yira olhegheri bọ rodon mọ aSudan r’apakirị epẹ Ijipt phọ erumuḍio phọ remeel ghan bọ. Kụ ghalhamọ r’iduọn oye phọ eeni u/ḍigh bọ ni oniin oghuugh oomo erelhe phọ odị, odị aphạm ni ibadị asidool kụ aghimọm bọ erelhe phọ ephẹn phọ. Iniin arughuugh phọ osighẹ ghan bọ osaanyọm we siphẹ oḅẹl okuron asiạ phọ imhoọgh ghan ni inya iidighilha r’iyaạr dị eghoph ghan anyụ phọ. “Odọ phọ oghuugh phọ ophọn phọ arue ghan ni asaạny ḍibogorọ adool, kụ eḍighi ghan idị oye phọ aghelhọm ghan erelhe phọ, ḅilhẹ edugh ghan kẹn oghị arikpisi dị ekẹl,” ipẹ kụ idị aḍinyạ phọ Acts—An Exegetical Commentary eḅẹm.

Oye olọ Etiopiạ phọ aạl ghan ḍinyạ mem mọ aFilip aghị bọ ateẹny nyodị. Esi aBaibul phọ eḅẹm mọ “aFiIip aghiiI aghị ateẹny, kụ anaghạn dị oye phọ rabạl ghan ḍinyạ oyiI phọ Aizaya.” (Iiḍ. 8:30) U/lẹm oghuugh phọ oghiil ghan iboom. Pọ kụ iyaạr phọ oye phọ arue bọ aạl ghan ḍinyạ siphẹ oghuugh phọ eḅilhẹ edughanhaan Filip orue oghị oteẹny odị.

Oye olọ Etiopiạ phọ “amạgh FiIip mọ aru asiịny arolạn nyinọ.” (Iiḍ. 8:31) Oghuugh phọ opọ rokiilhom ghan bọ eghiil phọ, opọ rakiilhọm bọ rameerạ ghan. Kuolọ oghuugh phọ opọ oye olọ Etiopiạ phọ aghiilhom bọ, amhoọgh ni esi dị odị r’aFilip orọl.

Dị edaphạn ipẹ edi bọ Iiḍighi emhụ phọ 8 ḅilhẹ r’idị iphirigba eghaạph, arinyạ phọ ayira reḍeenhaan ghan oye olọ Etiopiạ phọ dị rakiilhom oghuugh dị abụgh apu oghuugh eghạm r’ipẹ rokiilhom ghan bọ eghiil iipikian phọ.