SIPHẸ aBaibul phọ yira robạl ghan ni ibadị araraạr dị awe “iduọn ayira” oghaạph dị eḍuạ k’ekpom. (Jems. 5:17) Esi omaạm, ritir ghan ni iyira mem dị yira aạl ikpo onhụ phọ aPọl aḅạ bọ siphẹ Rom 7:21-24 mọ: “Mem lọ mị rawạ oḍighi igey, ikarạph ghụn kụ retu ghan kegbororian. . . . Pọ eeghe aagiạ dị mị aḍigh!” Mem lọ yira robean r’iitughiạn idị yira u”tue uḍighi agey, iphẹn aPọl aghaạph bọ siẹn phọ kingọ ni iyira onhinhọm.

APọl aḅilhẹ kẹn ni akaạph inhọn idị odị aḅilhẹ alhoghoma. Siphẹ Galetia 2:20, odị aḅạ ikpo onhụ dị emạ emiteom iyaạr dị odị akuphom owol, mọ: aZizọs “uphomoghiạn . . . imị kụ ughol bọ imị kụ amugh”! Yira r’ologhoma aani ghan ni iduọn phọ? Eeni k/oomo amem.

Eḍighi maạr dị yira odianhaan ghan r’iitughiạn idị yira u/mạn maạr loor esi igbaany ikarạph ayira, kekpạr ri omheeraam mọ aZihova uphomhoghiạn ni iyira, kụ mọ masạr ri uwilhenhaạn iyira, kụ esugha ghan kẹn okuphom owol mọ aKraist utuạn iyira kụ amhugh. Eḅeraạn ni Zizọs dị yira kosighẹ ekiạ phọ idiphọ inmo dị ungọ iyira ḍughụm? Eḍighi idiphọ, eeghe kụ kelọgh ḍighaạgh? Ooḅeghiọn iyạl phọ asipuru phọ iphẹn.

Okạr agey, eḅeraạn ni Zizọs dị yira kosighẹ ekiạ phọ idiphọ inmo dị ungọ iyira. Yira ulhegheri ika? Gbiom olhoghi ipẹ ogẹ bọ siphẹ Luk 23:39-43. Okạn oye otumeniom Zizọs. Kụ oye phọ m’aghaạph amiteom m’odị aḍighi ni ikarạph. Ikarạph oye phọ ibụgh ni, idị eḍighi bọ oye dị oḅẹm m’aḍighi igbogh ikarạph kụ edị rokạn ghan. R”eḅaạl olhoghi phọ, oye phọ alhọm Zizọs mọ: “Uutughiạn aani ni imị” mem dị nạ asi epẹ Omhạr phọ anạ.

AZizọs aphagharanhaạn ika? R’eephinha phọ, odị amhiigha loor kụ aaghiremhi emhụ odị aphogh ghisigh oye phọ. Ayịgh aphogh oye phọ, kụ aḅenhị mọ: “Mị akạr raḅenị ghan nyinạ mọ rodon nạ r’amị kụ kotọl epẹ ooḅi omạr phọ.” Kparipẹ dị aZizọs kaatughianhạm nyodị, “Moọny phọ Oye . . . aru . . . osighẹ aghuḍum mọ odị otanyanạm aḍita.” (Mat. 20:28) Odị aḅạ ghụn ikpo onhụ dị eḍeenhaan mọ ekiạ ph’odị rapighirọn bọ eḍighi elọ oye phọ r’aloor. Odị aghaạph eten arighirị mem mọ odị aḅẹm bọ mọ “nạ r’amị,” kụ aḅilhẹ kẹn agbonhonhomhi aḅenhị oye phọ mọ oye phọ katọl aani ni siphẹ Omhạr phọ.

Dị iikia i/lo, aZizọs awạ m’oye phọ asighẹ ekiạ ph’odị idiphọ inmo dị ongọ nyodị r’aloor. Eḍighi maạr dị aZizọs azoọm iduọn osereghiom sighiton dị k/omhoọgh ghan eepoogh okumu Enaạn, pọ odị kaloghoma aani ni eniin phọ eten akị esi aKristẹn phọ abuphẹ rokumu bọ Enaạn. Eeghe kụ kilhoghonhaạn iyira ḍighaạgh okuphom owol mọ yira komooghọm aani ni suọ ekiạ phọ etigheri igbaany ikarạph ayira?

Loor eepoogh oghaạph iiḅi inhaghạn phọ aPọl amhoọgh bọ, odị alhoghoma m’onọ kamooghọm ni suọ ekiạ ph’aZizọs. Ika? Odị aḅẹm mọ:  “Mị rasẹph ni [Zizọs] Kraist Omoọgh-we phọ ayira ungọ bọ imị inyaạm oḍighinom ghan iphẹn phọ. Mị rasẹph ni nyodị idiphọ odị u/pogh bọ igbaany ikarạph phọ mị aghoI ghan bọ ḍien phọ odị, r’igbiphoghọm mọ, r’onhụ phọ mị asuọm ghan bọ nyodị, kụ uḍuom bọ ni imị ologhi umạ imị okumu ghan odị.” (1 Tim. 1:12-14) Idiphọ aZizọs asaḅạr bọ Pọl okumu odị, esi ongọ oḍighi otughemhị aani abunhọn, ikpoomhị oḅio aPọl m’aZizọs anmạ ni nyodị ighirigiir, apomhoghiạn aḅilhẹ aḍuom nyodị olhoghi. Rodon, aZizọs m’usaḅạr aani iyira oḍighi aani oniin phọ oḍighi phọ. (Mat. 28:19, 20) Yira kotue ni ologhoma aani idiphọ aPọl?

Oye dị oghol mọ Albert dị ophorogh siẹn ookpomhoghan phọ dị esighẹ ni ephu 34 asiạ, kụ agbi oḅula esi aZihova, aḅẹm mọ: “Ikarạph phọ amhị edi ghan ghisigh amhị. Kuolọ mem dị mị odi epẹ erugh phọ, mị raloghoma ghan idiphọ otelhedom m’aPọl, mọ aZizọs m’ungọ imhị oḍighi oḍighi. Iphẹn phọ rilhọgh ghan ni imhị kephophe, k’eḅilhẹ ingọ imhị iitughiạn mọ mị oye ni, ḅilhẹ mọ ilọ aghisigh ph’amhị kenighẹ ni.”—Ps. 51:3.

Oọny dị oghol mọ Allan, dị aḍighi ghan oye iigamhanhiạn r’osereghiom asighiton, aḅẹm mọ: “Oomo iiḅaghamhị phọ mị akọm bọ angọ we edi ghan ni epul amhị. Eeni amem rekọm ghan ni oḅonyonhu ozuan. Kuolọ mị rasẹph ni aZihova, omheera mọ, oḍighinhom ikarạph iduọn amhị agbeelhom aani iiḅi iinhaghạn phọ aḅenhị bunhọn. Mem dị mị amhiịn dị abunhọn oḅilhẹ osighẹ aani igey phọ, r’iitughianhạm ghan imhị ilọ enhighẹ r’ephomhoghiạn phọ aZihova. Mị aloghoma m’odị usighẹ imhị kụ raloghonhaạn ḍighaạgh we dị orọl aani iduọn amhị.”

Mem lọ yira odi epẹ erugh phọ, yira rogbon ghan igey iitughiạn r’iiḍighi dị enhighẹ. R’ekpoomhị ghan oḅio ayira m’aZizọs apomhoghiạn ni, aḍuom olhoghi aḅilhẹ runmạ ghan iyira ighirigiir.

Iduọn okarạph aḅirinhi phọ aSetạn odi bọ ni, eeni amem ekpom mọ ayira k”epọ ghan mem lọ yira ootughiạn igbaany ikarạph dị yira oḍighi. Eeghe kụ kilhoghonhaạn iyira ḍighaạgh eenhan iitughiạn phọ ipẹ phọ?

Onyanhị dị oghol mọ aJean dị eenhan ghan olhoghi apum loor adọl ughelhe dị arọl mem iḍoọgh, aḅẹm mọ: “Ikpo onhụ phọ iphẹn phọ eḅẹm bọ mọ: ‘Enaạn ebụgh ni epu ilhoghi phọ ayira,’ ekạr kụ iḅeraạn imhị’ ”. (1 Jọn 3:19, 20) Idiphọ aJean, olhegheri mọ aZihova r’aZizọs olegheri ni mọ yira abuḍighinhom ikarạph, kingọ ni iyira eephọ olhoghi. Ka/bulha mọ loor ephomhoghiạn, bidị ughol emhụ abuḍighinhom ikarạph dị rowạ ni okiton kụ omiteom bọ etagharạn phọ, ka/we dị ikarạph ro/ḍighi ghan.—1 Tim. 1:15.

Yira komoọgh ni eephọ olhoghi mem lọ yira ogbiran ipẹ aZizọs azoọm ghan bọ we dị u/munhughan, oḅilhẹ oḍighi k’ikparạ k’ikpuru ayira oḍighi ph’odị ungọ bọ iyira. Yira oḍighi iduọn phọ, bịn yira kotue ni oḅạ aani ikpo onhụ phọ aPọl mọ: aZizọs “uphomoghiạn imị kụ ughol bọ imị amugh.”