AZihova akạr rawạ dị abudị maalhạn komoọgh oḅaạl olhoghi oḅilhẹ okelhọm siya dị ekpạr. (Mat. 19:4-6) Kụ eḍighi maạr dị nạ rawạ ni aạl ilhom obobọ ophin anhịr, ika kụ idị nạ katue amiịn ogey olom obobọ anhịr? Idiphọ Olemhiạ ayira, aZihova alegheri ni idị yira koḍighi kụ yira omoọgh ekol ophin obobọ aạl ilhom. Kụ iḍighi kụ, eḍighi maạr dị nạ asighẹ aḍighinhom sinhị iilhogh phọ odị m’ungọ bọ iyira, nạ kamoọgh ni ekol. Ooḅeghiọn iniin asinhị iilhogh phọ.

Eḅẹl phọ, yira olhegheri mọ: “Iyaạr areekelheghian i/lo dị eeleeny ekpom mọ.” (Jer. 17:9) Mem dị oye rawạ onyanhị ophin obobọ olhephiri oọny aạl, olhoghoma r’aruuphuạ ketue ni eḍighi iyaạr dị kekparanhaạn bidị osopha ogey osopha. Mem dị awe oghol ruuphuạ r’olhoghoma bịn kụ aalhạn, amabi ratọl ghan ni. (Prov. 28:26) Esi iduọn phọ, i/ḍighi osụ olhoghi dị olhephiri oọny r’anhịr ephoph kokem omiighom oghaaphọgh iboom ilọ ipẹ bidị olhoghoma bọ kụ egbi oteẹny okạr amem dị bidị koḍigh raghaạph ilhom.

AProverbs 22:3 ebẹm mọ: “Awe iitughiạn komiịn dị iiḅaghamhị retu kụ ogbọl, kụ opọ u/moọgh bọ igbiighi katelhe akị asuma kụ aḅẹm mọ eeghe kụ isu imhị.” Nạ aatughiạn mọ eeghe kụ ooto r’osooromineen phọ odi bọ oḍighinhom arokool intanẹt dị ophighi owaạm olom obobọ anhịr? Dị eeph ni iboom, ibadị moghị siphẹ osoph intanẹt phọ omiigh oghaạph ilọ apinien kụ ogbi olhegheri mọ oye phọ aakelheghi ni bunọ. Ḅilhẹ kẹn, aruḅạ mophighi yogh rokool intanẹt iikelheghian okori omhiighi ikpoki awe. Eeni amem, abuniin abuẹn phọ rokue ghan bịn koḅẹm mọ abunọ Abugbaanhaạn AZihova.

Ooḅeghiọn onhọn ooto r’osooromineen. Iniin arokool intanẹt phọ iphẹn phọ opighi idị ketue egbiighi elegheri we dị okpẹ oḍighi arighirị. Kuolọ, eḍeenhaan i/lo dị emạ emiteom mọ areten phọ iphẹn phọ ekạr ri remoọgh ghan ekol. Nạ ragbi mọ eḍighi ni osụ olhoghi oḍuom olhoghi idị oye kụ agbiighi orue omhoọgh ekol ilọ iyaạr dị emhạn maạr idiphọ apinien ḍughụm? Kotue ni osighẹ igbiighi intanẹt phọ iphẹn phọ omaaniọm sinhị iilhogh aBaibul phọ ḍughụm?—Prov. 1:7; 3:5-7.

Aḍinhị olhogh dị edi Proverbs 14:15 eḅẹm mọ: “Uwo elologhi kameeraam torobọ iyaạr, awe olhoghi komaạr olegheri igbaranuọm aruwol abidị.” Tutụ nạ kasopha oghaaphạn ilọ ilhom oye, pọ ewạ ni mọ kuamhị alhegheri oye phọ. Kuolọ kekpạr ri oḍighi iduọn phọ eḍighi maạr dị nạ  aghị siphẹ osoph intanẹt phọ kụ rawạ oye ophin obobọ aạl. Nạ kakạr ri atue aḅẹm mọ nạ alegheri ni oye phọ akuamhị eḍighi maạr dị nyinha eghaaphạn ghan eḅilhẹ egẹ ilọ odọ awe phọ nyinha eru bọ siphẹ intanẹt phọ bịn ḍughụm? Abuniin awe dị ootughiạn mọ bidị momhiịn oye dị bidị kopin obobọ obạl, umhoọgh ni mabi mem dị okạr omhiịn oye phọ risigh r’arisigh.

Okọ suọr phọ aḅẹm mọ: “Mị raa/ḍikuan ghan we iikelheghian ḅilhẹ mị rakel ghan ni buphẹ robooghị ghan bọ okạr awe phọ bidị oru bọ.” (Ps. 26:4) Ibadị awe ootughiạn mọ i/beeph olhoghọm idị i/tu inẹ mem dị oye phọ rakaạph ilọ odọ oye phọ oye phọ aru bọ siphẹ arokool intanẹt phọ ophighi bọ owaạm olom obobọ anhịr. Bidị otue ni obooghị ikạr araagharạ obobọ ikarạph araagharạ phọ abidị mem dị bidị rogẹ kolhọgh. Abuniin awe roḅẹm ghan mọ abunọ Abugbaanhaạn AZihova, kuolọ bidị okạr ri oḍighi Kristẹn dị moḍiiny muụm ḍughụm? Bidị oḍighi ni Kristẹn dị osianhaan? Bidị omoọgh ni siya dị ekpạr r’aZihova ḍughụm? Bidị oḍighi ni emạ eḍeenhaan siphẹ ookpomhoghan phọ abidị? Obobọ eeni bidị u/ḍighi egey eḍeenhaan obobọ eeni “ikarạph arighirị.” (1 Kọr. 15:33; 2 Tim. 2:20, 21) Odaphạn Baibul phọ, bidị osianhaan ni aạl obobọ ophin ḍughụm? Ewạ ni dị nạ kalegheri iphẹn phọ, kuolọ kekpạr ri eḍighi maạr dị abunhọn Abugbaanhaạn dị olhegheri nyodị agey u/kaạph uḅenhị nyinhạ. (Prov. 15:22) Kụ kẹn, oye dị aḅạr aZihova kaa/tughiạn “ooḍikuan r’abuphẹ k”omeeraam bọ Enaạn.”—2 Kọr. 6:14; 1 Kọr. 7:39.

Eḍighi bọ edị arokool intanẹt phọ ophighi bọ owaạm olom obobọ anhịr eḅaramaạm bọ ooto r’osooromineen, imạ areten edi ni osighẹ owaạm olom obobọ anhịr dị epẹ eekunha phọ ketorori engọ pinien dị kakuenhi Enhaạn. Ighẹn kụ aroopoogh orue omhiịn oye dị nạ kapin obobọ abạl? Mem mọ ko/sophoghom bọ ookpomhoghan ghan eniin esi, Abugbaanhaạn AZihova uuḍikuan ghan ni mem dị oghị ituughạ, ookpomhoghan eghir, rookpomhoghan eephugh, ḅilhẹ r’inhọn arookpomhoghan.

Mem dị i/dugh ookpomhoghan ghan, idiphọ amem ezẹgh aCOVID-19 phọ, yira osighẹ sifon r’akomputa kụ ropamhạm ghan ituughạ, kụ ephẹn phọ eniin eepoogh osighẹ olhegheriom Abugbaanhaạn dị ko/phin obobọ k/aạl ilhom. Nạ kamiịn ni ipẹ bidị ropinomaam aani bọ bin ituughạ phọ r’ophanyanhaạn asipuru phọ abidị. (1 Tim. 6:11, 12) Eeni nyinha etue kẹn ni esighẹ breakout room mọ ekaaphọm mem dị ituughạ phọ mesi eekunha. Mem dị aḍita Abugbaanhaạn ookpomhoghan idiphọ egu siphẹ intanẹt phọ, nạ katue ni amiịn ipẹ opọ nạ amhoọgh bọ ḍiḅeraạn rakaaphạn ghan bọ r’abunhọn, bịn nạ kalegheri ni okạr odọ oye phọ odị aru bọ. (1 Pit. 3:4) Esighẹ rekị bịn nạ kakuamhị ni alegheri mughumọ asiigbu phọ r’iḍighinhom araraạr phọ odị r’anạ eḅọph ni ḅilhẹ mughumọ nyinha ketue ni ebalhạn.

Mem dị abuphẹ rowạ bọ oye aạl obobọ ophin odaphạn eten dị emhoọgh muḅọph r’asinhị iilhogh aBaibul phọ, aḍidogh aBaibul phọ ephẹn phọ kemunughan ni esi abidị: “Opọ ateẹny bọ ogey anhịr [obobọ olom] mateẹny egey iyaạr, kụ eḍeenhaan mọ odị amoọgh kuuḅi aghisigh aZihova.”—Prov. 18:22.