1. Eeghe iyaạr kụ edị aZihova maḍighinhaan nyinhạ?

IKA kụ idị nạ aḍighi bọ onyọ Ogbaanhaạn AZihova? Eḅẹl phọ, nạ unhaghạn “ooḅi oghaạph” phọ—eeni ḍighaạgh odẹ r’onhiin anạ, oye dị r’anạ reḍighi ghan oḍighi obobọ onyọ askul anạ, obobọ Abugbaanhaạn AZihova kụ uru k’anạ. (Mạk 13:10) Kụ oye alhọgh mem r’inyaạm amhiigh otughemhị anạ Baibul phọ. Idiphọ ituughạ phọ rekị bọ bịn nạ aru aphomhoghiạn aZihova aḅilhẹ atuughạ alhegheri mọ odị aphomhoghiạn ni nyinhạ. AZihova aḍur nyinhạ alhọgh siẹn igey phọ, kụ nyiidiphọ nạ maḍighi onyọ amatuạn aZizọs Kraist, dị mamhoọgh aani oḍuomolhoghi orọl k’agee-pọ. (Jọn 6:44) Iikia i/lo, nạ rasẹph ghan ni aZihova iduọn Odị arom bọ oye otughemhị anạ igey phọ, aḅilhẹ asighẹ aani nyinhạ idiphọ oniin ebenhẹ Odị.

2. Yira kooḅeghiọn eeghe siẹn emhuoghaạph phọ ephẹn phọ?

² Nyiidiphọ yira molhegheri bọ igey phọ, yira omoọgh eepoogh olhoghonhaạn abunhọn ḍighaạgh orelhe aani eten aghuḍum mọ. Eḍighi maạr dị edughanhaan nyinhạ oḍuạ otu ogbạ otu, kuolọ ekparanhaạn nyinhạ omhoọgh oye otughemhị ghan aBaibul phọ, pọ iphẹn komaaghị bọ siẹn emhuoghaạph phọ ephẹn phọ ketue ni elọgh ḍighaạgh. Yira kooḅeghiọn iyaạr phọ rinyu ghan bọ iyira oḍighi awe bumatuạn. Kụ yira oḅilhẹ ooḅeghiọn ipẹ yira kotue bọ okpạr opu ipaanhaạn dị risophoghom ghan iyira omhoọgh aani awe dị yira kotughemhị Baibul. Uguạ, ophụr ooḅeghiọn iyaạr phọ emhoghi bọ dị yira kogbạ oḅilhẹ otughemhị bunhọn ikpo onhụ phọ Enhaạn.

3. Eeghe kụ iḍighi kụ yira kogbạ ghan bọ ikpo onhụ phọ?

³ Mem mọ aZizọs arọl bọ siẹn ade phọ, odị angọ ni budaphạm mọ odị oḍighi dị aḍighi iyạl agạ. Eḅẹl phọ, odị aḅenhị bidị  ogbeelhom ooḅi oghaạph Omhạr phọ, ḅilhẹ r’ipẹ bidị koḍighi bọ. (Mat. 10:7; Luk 8:1) AZizọs atughemhiọm kẹn bumatuạn phọ odị ilọ oḍighi mem dị awe onhaghạn obobọ u/naghạn dom Omhạr phọ. (Luk 9:2-5) Odị aḅilhẹ kẹn aghaạph ipẹ oḍighi phọ kaleeny bọ. Odị aḅenhị bumatuạn phọ odị mọ bidị kogbạ ni “oIeenyemi oomo aramạ.” (Mat. 24:14; Iiḍighi 1:8) Etigheri ipẹ awe omhegheron bọ oghị esi ooḅi oghaạph phọ, abumatuạn phọ omoọgh oḍighi oḅenhị awe ilọ Omhạr phọ Enhaạn ḅilhẹ r’ipẹ Omhạr phọ Enhaạn kaḍighi bọ.

4. Odaphạn Matiu 28:18-20, yira omoọgh oḍighi eeghe etigheri ogbeelhom ilọ Omhạr phọ?

⁴ Eeghe kụ omhunhenhiom iyạl agạ oḍighi phọ aZizọs angọ bọ? Odị aḅenhị budaphạm mọ odị mọ otughemhị we dị kotue ni oḍighi aani bumatuạn odị ilọ ooko oomo itọ phọ odị. Kuolọ ungọ oḍighi phọ ophọn phọ Kristẹn oḅẹl okuron asiạ phọ bịn ḍughụm, idiphọ ibadị awe oḅẹm bọ? Eeye, aZizọs amạ ni amiteom mọ oḍighi phọ ophọn phọ amhạn bọ maạr kakiọm ni ghisigh, “tutụ eteẹny eekuna aḅirini phọ.” (Bạl Matiu 28:18-20.) Eeni aZizọs angọ itọ phọ iphẹn phọ mem dị odị amitenhaan bumatuạn odị dị ropel li 500. (1 Kọr. 15:6) Siphẹ uḍien phọ aZizọs agananami bọ aḍeenhaan Jọn, odị amạ ni amiteom mọ odị rawạ dị oomo abumatuạn phọ odị kologhonhaạn ḍighaạgh bunhọn olhegheri aZihova.—Ogan. 22:17.

5. Odaphạn 1 Korịnt 3:6-9, ika kụ idị aPọl aghaạph amaaniọm muḅọph phọ odi bọ igbo ogbạ ikpo onhụ phọ r’otughemhị awe Baibul?

⁵ Otelhedom mọ aPọl atomaạm rukumuan oḍighi awe bumatuạn idiphọ ozụph iizuphạ, omạ omiteom mọ epelhom ni ozụph ghan bịn. Odị aghiọm olhoghi buọ aKorịnt mọ: “Mị kụ uzụph bọ iizuphạ phọ, ApoIọs aaḍuom ghan muụm . . . Nyina kụ iizuphạ ozo phọ Enaạn.” (Bạl 1 Korịnt 3:6-9.) Idiphọ awe arukumuan “ozo phọ Enaạn,” yira ro/zụph ghan iizuphạ phọ bịn kuolọ rooḍuom ghan kẹn muụm komhaạr ophogh eḍumom iizuphạ phọ. (Jọn 4:35) Eniin phọ amem mọ, yira olọgh elhegh mọ Enhaạn kụ raḍighi ghan idị iizuphạ phọ keḍum.

6. Oḍighi otughemhị ghan awe Baibul phọ eḅaramaạm eeghe?

⁶ Yira rowạ ghan we phọ abuphẹ “[okpẹ] bọ omoọgh aghuḍum k’agee-pọ.” (Iiḍighi 13:48) Kụ orue oḍighi idị abudọ awe phọ abuẹn phọ koḍighi bumatuạn, yira omoọgh olhoghonhaạn abidị ḍighaạgh dị bidị (1) konaghanhạn, (2) omeeraam, ḅilhẹ (3) osighẹ oḍighinhom raraạr phọ ipẹ bidị otuughạ bọ siphẹ aBaibul phọ. (Jọn 17:3; Kọl. 2:6, 7; 1 Tẹs. 2:13) Oomo ookpomhoghan phọ kotue ni ologhonhaạn ḍighaạgh bidị esi oḍeenhaan ghan ephomhoghiạn ḅilhẹ r’oghuraam ghan abidị mem lọ oru ituughạ. (Jọn 13:35) Opọ ratughemhị bọ bidị Baibul phọ katue kẹn ni alọgh muboom amem r’inyaạm olhoghonhaạn abidị ḍighaạgh okpạr opu “iikparạ” aremheeraam r’iḍighinhom araraạr. (2 Kọr. 10:4, 5) Etue ni esighẹ runwanyụ orue olhoghonhaạn aḍighaạgh oye ogbariọn aradạ oteẹny aḍiigbu oḍiiny amuụm. Kuolọ eḍighi iyaạr dị emhạn maạr dị odị kaḍighi.

7. Eeghe kụ inyu bọ nyinhạ ophinhomaam aani abin rukumuan ogbạ ikpo onhụ phọ r’oḍighi awe bumatuạn?

⁷ Uḍighi ika kụ yira ropinomaam aani ghan bọ bin rukumuan oḍighi awe bumatuạn phọ? Eḅẹl phọ, loor esi dị yira opomhoghiạn aZihova. Mem dị nạ aḍighi oomo ipẹ nạ katue bọ oḍighi awe bumatuạn, pọ nạ raḍeenhaan ghan ephomhoghiạn phọ nạ amhoọgh bọ aghị esi Enhaạn. (1 Jọn 5:3) Tuutughiạn ilọ iphẹn phọ: Ephomhoghiạn phọ anạ esi aZihova menyu nyinhạ omhiigh ogbạ ikpo onhụ phọ. Idugh ni odạph itọ phọ iphẹn phọ ḍughụm? Eeni i/dugh. Eḅẹl amem mọ nạ akar bọ eghuugh oye ogbạ ikpo onhụ phọ, oḅio anạ akaph ni? Iikia i/lo, oḅio anạ akaph ni! Kuolọ nạ ulhegheri ni  mọ ophọn phọ kụ oḍighi phọ aZizọs atọ bọ mọ ḍighi, kụ nạ radạph bọ itọ phọ. Eeni kẹn omite epẹ erugh phọ i/kpạr mun esi anạ. Nyiidiphọ kokaạph aani ika ilọ otughemhị oye Baibul? Oḅio anạ rakaph ghan ni ilọ iphẹn phọ? Eeni rakaph ghan ni. Toroboiperolbọ, mem dị nạ alhọm aZihova olhoghonhaạn aḍighaạgh okpạr opu oghiilhaan, r’omhoọgh oḅio otughemhị aani oye Baibul, aZihova kalọgh ni ḍighaạgh okparamhị eephuạ phọ nạ amhoọgh bọ oḍighi awe bumatuạn.

8. Odaphạn Mạk 6:34, eeghe kụ enhọn iyaạr dị ketue inyu iyira otughemhị abunhọn?

⁸ Omhunhenhiom iyạl, ephomhoghiạn amatuman phọ ayira rinyu ghan iyira otughemhị abidị igey phọ. Esi omaạm, eniin amem aloor aZizọs r’abumatuạn phọ odị idugh ni mem dị bidị motughemhị we phọ, kụ bidị oghị esi orọl ophooghian, kuolọ aḍita awe uru ni oteẹny bidị siphẹ phọ. R’igbiririph, aZizọs amhiigh ni otughemhị abidị “iminighạn araraạr.” (Bạl Mạk 6:34.) Ghalhamọ r’iduọn aloor phọ odị medugh bọ ni, odị alhọgh ni inyaạm. Eeghe kụ iḍighi? AZizọs aseenyạn we phọ. Odị amhiịn imhinhimhiịn phọ abidị—kụ awạ olhoghonhaạn abidị ḍighaạgh ongọ abidị oḍuomolhoghi. Awe ḍio arodon osoman aani ni iniin phọ asidọl phọ. Asighisigh phọ abidị nyinhạ kii/kelheghi. Bidị okịgh idiphọ iyool igạ dị reyeelha ḅilhẹ opoghom u/lo. Otelhedom aPọl aghaạph ilọ awe phọ abuẹn phọ idiphọ awe dị oḍuomolhoghi u/moọgh ḅilhẹ u/legheri Enhaạn. (Efẹ. 2:12) Bidị rodạph eten phọ erẹgh bọ kụ “eekuna phọ amuphe”! (Mat. 7:13) Mem dị yira ootughiạn ipẹ bidị odi bọ okoọny olhegheri Enhaạn, ephomhoghiạn r’igbiririph phọ yira omhoọgh bọ rinyu ghan ni iyira olhoghonhaạn abidị ḍighaạgh. Kụ emạ eten olhoghonhaạn abidị ḍighaạgh pọ otughemhị abidị Baibul phọ.

9. Odaphạn Filipai 2:13, ika kụ idị aZihova katue ulhoghonhaạn iyira ḍighaạgh?

⁹ Eeni nạ ughiilhaan ni omhoọgh oye otughemhị ghan aBaibul loor amem r’inyaạm mọ rolọgh ghan bọ otughemhị oye Baibul. Eḍighi idiphọ, pọ kaạph ipẹ nạ alhoghoma bọ aḅenhị aZihova. Lọm odị alhoghonhaạn nyinhạ ḍighaạgh omhoọgh eephuạ owạ awe dị nạ katughemhị ghan Baibul. (Bạl Filipai 2:13.) Otelhedom mọ aJọn ungọ iyira okuphom owol mọ Enhaạn kapagharanhaạn ni iiḅereghị ayira dị emhoọgh muḅọph r’ogbi phọ Odị. (1 Jọn 5:14, 15) Kụ iḍighi kụ, nạ katue ni akuphom owol mọ aZihova kalhoghonhaạn ni nyinhạ ḍighaạgh omhoọgh eephuạ ophinhomaam aani abin oḍighi oḍighi awe bumatuạn phọ.

10-11. Eeghe kụ ketue ikikima iyira otughemhị awe Baibul phọ?

¹⁰ Yira ro/peghom ghan ephegh rukumuan oḍighi awe bumatuạn phọ etigheri ipaanhaạn dị ketue ni isophoghom iyira oḍighi oomo ipẹ yira kotue bọ. Uguạ, ooḅeghiọn iniin ipaanhaạn phọ ipẹ phọ ḅilhẹ r’ipẹ yira kotue bọ okpạr opu.

¹¹ Eeni asidọl phọ ayira ke/meera dị yira koḍighi osiemhi ipẹ yira rowạ bọ. Esi omaạm, abuniin abukaaphọm mokpọ obobọ u/moon. Nạ asoman aani ni sidọl phọ iphẹn phọ ḍughụm? Eḍighi idiphọ, pọ ooḅeghiọn iniin araraạr dị yira motuughạ esi ezẹgh aCOVID-19 phọ. Yira momhiịn mọ yira kotue ni osighẹ fon obobọ akomputa oḍighinhom otughemhị oye Baibul phọ! Esi iduọn phọ, nyiidiphọ meḍighi edị yira kotue ni otọl ilhoghi aruutu ayira bịn otughemhị oye Baibul. Onhọn asuọ dị odi pọ, abuniin rowạ ghan ni otuughạ aBaibul phọ kuolọ ro/tọl ghan otu mem dị abumor phọ omite ogbạ ikpo onhụ phọ. Eeni bidị rotọl ghan eḅon aḍiroọr obobọ ḍughul. Nạ katue ni amiteom loor otughemhị abidị mem mọ amuphẹ phọ ḍughụm? AZizọs atughemhị aNikodimos  ḍughul, loor esi dị opọ kụ amem dị aNikodimos amhoọgh eepoogh.—Jọn 3:1, 2.

12. Eeghe ariphigh kụ ingọ iyira akpọ oḅio mọ yira kotue ni oḍighi butughemhiạ dị osilor?

¹² Yira otue ni ootughiạn mọ yira ko/tue otughemhị oye Baibul phọ. Eeni yira otue ni ologhoma mọ yira u/moọgh olhegheri iyaạr ḅilhẹ r’adighalhanyạ orue otughemhị oye Baibul. Eḍighi idiphọ, pọ ooḅeghiọn iraạr araraạr dị ketue ebughẹ akpọ oḅio phọ anạ. Eḅẹl phọ, aZihova amiịn mọ nạ asianhaan ni oḍighi otughemhiạ. (2 Kọr. 3:5) Omhuneniom iyạl, aZizọs phọ mọ ḅọgh bọ ongọ ‘oomo phọ iikpọ phọ epẹ k’akẹ r’isiẹn ade phọ,’ kụ arom nyinhạ oḍighi otughemhiạ. (Mat. 28:18) Omhunhenhiom iraạr, abunhọn kotue ni olhoghonhaạn nyinhạ ḍighaạgh. AZizọs abeḍenhọm Odẹ phọ odị orue olhegheri ilọ oghaạph r’otughemhị, nạ katue kẹn ni. (Jọn 8:28; 12:49) Opumom isiphẹ, nạ katue ni alọm opoghom ekol arukumuan phọ anyinha, okọy eten dị asianhaan, obobọ okaaphọm dị asilor olhoghonhaạn anạ ḍighaạgh orue otughemhị aani oye Baibul phọ. Eniin eten dị nạ katue amoọgh akpọ oḅio pọ odạph aani ghan abunhọn abukaaphọm oghị otughemhị oye Baibul.

13. Uḍighi ika kụ ewạ bọ dị yira kodaphạn ghan imhoom areten itughemhị?

¹³ Etue ni ikparanhaạn iyira osighẹ imhoom areten r’imhoom araraạr oḍighinhom epẹ erugh phọ. Eten phọ yira rotughemhị ghan bọ Baibul phọ m’enmia. Aḍinyạ phọ Kelhọm Ghuḍum K’agee-pọ! yira rosighẹ bọ kotughemhiọm we, ewạ mọ ookolhobian ghan agey kụ otughemhị eten dị egbatanhaạn r’ipẹ yira oḍighi ghan bọ igbaany. Yira robạl ghan iịny asiikpịgh bịn komhoọgh iboom araghaạph r’opọ yira rotughemhị bọ. Mem dị yira rotughemhị yira rosighẹ ghan koḍighinhom ibadị asividio r’inhọn araraạr dị edi siphẹ osoph intanẹt phọ ayira, ḅilhẹ r’aJW Library^® phọ. Eḍighi maạr dị nạ ko/lhegheri ilọ oḍighinhom araraạr phọ iphẹn phọ, pọ teẹny oye dị katue alhoghonhaạn nyinhạ ḍighaạgh. Re/dughanhaan ghan we onhuụn onme egbaany eḍighinhom iyaạr. Ghalhamọ r’iduọn phọ ni, r’olhoghonhaạn aḍighaạgh aZihova r’abunhọn yira kotue ni okelhọm otughemhị awe Baibul phọ. Oniin okọy eten aḅẹm mọ, emhoom eten itughemhị phọ iphẹn phọ “otughemhiạ phọ r’opọ rotughemhị bọ kụ rokelhọm ghan.”

14. Eeghe kụ edị ewạ mọ yira ootughiạn ghan mem dị yira rokumuan ekool dị ro/naghạn ghan, kụ ika kụ idị 1 Korịnt 3:6, 7 ikparamhị iyira?

¹⁴ Eeni yira odi ghan ekool dị ekpạr omhiigh itughemhị aBaibul. Abuniin awe u/moọgh ḍiḅeraạn adom mọ ayira, kụ kẹn rosophoghom ghan. Eeghe kụ kilhoghonhaạn iyira ḍighaạgh omhoọgh egey ephoghom ekool phọ ayira? Legheri mọ esi onyam oḅatạn asidọl awe ketue ni enmia siẹn okarạph aḅirinhi phọ ophọn phọ, awe dị u/moọgh ghan ḍiḅeraạn kotue ni onmia bịn eeni omoọgh eephuạ otuughạ aBaibul phọ. (Mat. 5:3) Abuniin dị igbaany u/wạ ghan osighẹ arinyạ phọ ayira, momheera mọ oye amhiigh otughemhị abidị Baibul phọ. Yira olegheri ni mọ aZihova kụ amhoọgh ibugha phọ. (Mat. 9:38) Odị rawạ mọ yira oghiọm ghisigh ozụph ghan oḅilhẹ ooḍuom muụm iizuphạ phọ, kuolọ m’Onọ kụ kaḍighi idị kepoph. (1 Kọr. 3:6, 7) P’eeghe idị eḍighi iyaạr okparamhị olhegheri mọ aZihova kusẹph ni iyira loor esi inyaạm mọ yira olhọgh bọ otughemhị awe Baibul phọ, k/onhụ awe phọ yira otughemhị bọ! *

15. AZihova raloghoma ghan ika mem dị oye asighẹ raḍighinhom ipẹ odị atuughạ bọ?

¹⁵ Olhoghi aZihova raḅaạl ghan ni mem dị oye alhegheri igey aBaibul phọ kụ aḅilhẹ asighẹ  atughemhị aani bunhọn. (Prov. 23:15, 16) P’eeghe idị ibo phọ aZihova rebụgh ghan mem dị odị amhiịn dị arebenhẹ phọ odị roḍighi oḍighi phọ ophọn phọ rodon! Esi omaạm, etigheri ezẹgh phọ emite bọ lhạ arukumuan a2020, utughemhị ni Baibul we dị omhạn 7,705,765, kụ awe dị oḅọgh loor ongọ aZihova kụ oḍiiny muụm umhạn 241,994. Abumhoom abumatuạn phọ abuẹn phọ, kotughemhị aani kẹn bunhọn dị koḍighi bumatuạn. (Luk 6:40) Iikia i/lo, yira roḅaalhamhị ghan olhoghi aZihova mem dị yira ophinom aani bin rukumuan oḍighi awe bumatuạn phọ.

16. Eeghe aḍimạ aḍiigbu kụ edị ewạ mọ yira oteẹny?

¹⁶ Oḍighi awe bumatuạn k/oọny oḍighi, kuolọ r’olhoghonhaạn aḍighaạgh aZihova yira kotue ni oḍighi aani ipẹ yira kotue bọ, otughemhị aani abumhoom ophomhoghiạn Odẹ k’akẹ phọ ayira. Nạ ragbi mọ ke”nighẹ oghoọr aḍiigbu oteẹny aani ghalhamọ oniin oye dị yira kotughemhị Baibul phọ ḍughụm? Imạ keḍuạ ni emite mem dị yira oḍighinhom torobọ eepoogh dị emite oḅenhị ghan abuphẹ yira oozuanhaan bọ motuughạ Baibul phọ r’ayira. Yira okuphom ni owol mọ aZihova kasẹph ni ikuph phọ ayira.

17. Yira kologhoma ika eḍighi maạr dị yira omhoọgh ni oye dị yira rotughemhị ghan Baibul?

¹⁷ Eḍighi ni iyaạr eghuan ophinhom aani abin oḍighi ogbạ ikpo onhụ phọ r’otughemhị igey phọ bunhọn! Oḍighi phọ ophọn phọ rungọ ghan iyira ogey oḅaạl olhoghi. Otelhedom mọ aPọl alhoghonhaạn bọ ḍighaạgh ibadị oḍighi abumatuạn epẹ Tesalonikạ aḅẹm mọ: “Nyina kụ emụ oḍuom ologhi r’oḅaạl ologhi r’eghoony iphelegbe phọ yoor kozua bọ oboom ḍio phọ aJizọs Omoọgh-we phọ ayira katu bọ. Okạr igey ni, nyina ilọgh ni iyoor omạn ingoọm iyoor oḅaạl ologhi.” (1 Tẹs. 2:19, 20; Iiḍighi 17:1-4) Ibadị ḍio arodon ologhoma aani kẹn iniin phọ. Umarani dị oghol mọ Stéphanie dị akumuan r’olom odị olhoghonhaạn aḍighaạgh ibadị awe oḍiiny amuụm aḅẹm mọ , “Ibo i/lo dị eeleeny olhoghonhaạn aḍighaạgh we oḅọgh aloor ongọ aZihova.”