1. AZihova aḍighi eeghe mem mọ Adạm r’Iv opiomạn bọ? (Genesis 3:15)

 IDUỌN Adạm r’Iv ropiomạn bọ bịn, aZihova angọ eemarạ eemarạ phọ abidị oḍuomolhoghi dị eego esi imiịn dị emạn maạr. Ogẹ ipẹ odị aghaạph bọ siẹn Genesis 3:15.—Bạl.

2. Eeghe kụ iḍighi kụ imiịn phọ iphẹn phọ emạn bọ maạr?

² Imiịn phọ iphẹn phọ edi ḍiḅẹl aḍinyạ aBaibul phọ. Kuolọ eniin eten obobọ ephoriphọ, oomo inhọn phọ arinyạ aBaibul phọ ekpulhoghiọm ni siẹn phọ. Imiịn phọ edi bọ Genesis 3:15 kụ ikpogh oomo asidom inhọn phọ arinyạ aBaibul phọ, mudị iyaạr phọ rokpoghom ghan bọ ipoḍi arinyạ, oḍighom oghaạph mọ, Enhaạn katom opelhiạ dị kapiemhi Eru phọ ḅilhẹ r’oomo abukarạph phọ r’odạph bọ nyodị. * P’eeghe aḍisẹph dị ipẹ phọ kengọ buẹn ophomhoghiạn bọ aZihova!

3. Yira kooḅeghiọn eeghe siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kopanyanhaạn sipuru phọ iphẹn ilọ imiịn phọ edi bọ Genesis 3:15: Abuọ anhiạn kụ awe phọ oghaạph bọ oghol siẹn phọ? Ika kụ idị romunhenhi imiịn phọ? Ḅilhẹ ika kụ idị yira r’omooghọm suọ?

4. Anhiạn kụ “ekarạph iyaạr phọ,” kụ yira ulhegheri ika?

⁴ Imiịn phọ edi bọ siẹn Genesis 3:14, 15 ekaạph ekol  “ekarạph iyaạr,” “ranmụny” ekarạph iyaạr phọ, “anhịr,” ḅilhẹ “r’oọny” anhịr phọ. ABaibul phọ ulhoghonhaạn ni iyira ḍighaạgh olhegheri atorobọ onyọ abidị. * Omhiighom “ekarạph iyaạr phọ.” Oopho ekarạph iyaạr ke/tue enaghanhạn ipẹ aZihova aghaạph bọ pạ oghoony phọ Eden. Esi iduọn phọ olhẹm dị asụ ni olhoghi kụ edị aZihova aghaạph bọ aghol siẹn phọ. Ophọn phọ anhiạn? Ogananami 12:9 akị ni onyen akol oye phọ ekarạph iyaạr phọ eru bọ. Siphẹ phọ “egbaany ekarạph iyaạr” okol mọ Eru ḅilhẹ r’aSetan. Kuolọ abuọ anhiạn kụ anmụny ekarạph iyaạr phọ?

5. Abuo anhiạn kụ anmụny ekarạph iyaạr phọ?

⁵ ABaibul phọ ratomaạm ghan ibạm anmụny egu awe dị rootughiạn ghan k’oḅilhẹ oḅo mudi omhoọgh oniin odẹ. Esi iduọn phọ anmụny ekarạph iyaạr phọ pọ olhẹm aruwaloor ḅilhẹ r’omhạr awe dị r’ogbagharạn ghạn aZihova Enhaạn phọ koḅilhẹ ozuoghom we phọ Odị idiphọ aSetan. Abuẹn phọ oḅarạm ni ruukpaạny phọ abuphẹ owilhẹ bọ sidọl phọ abidị epẹ k’akẹ phọ siḍio phọ aNoa, ḅilhẹ r’oomo awe dị roḅọ ghan idiphọ odẹ phọ abidị Eru phọ.—Gen. 6:1, 2; Jọn 8:44; 1 Jọn 5:19; Jud 6.

6. Uḍighi ika kụ koḅẹm bọ mọ Iv kụ ka/nhịr phọ?

⁶ Nyiidiphọ olhegheri nuụn anhịr phọ. Ophọn phọ k/Iv. Yira ulhegheri ika? Ooḅeghiọn eniin ephigh. Imiịn phọ eḅẹm m’oọny anhịr phọ “kaagbị” emhụ ekarạph iyaạr phọ. Iduọn purukụ yira omhiịn bọ, ekarạph iyaạr phọ emeerạ esi okarạph ookpaạny phọ Setan, kụ oye dị u/munhughan, oọny dị Iv amhạr ka/tue aagbị Setan. Esi iduọn phọ anhiạn kụ kapiemhi bọ Setan?

7. Odaphạn Ogananami 12:1, 2, 5, 10, anhiạn kụ anhịr phọ oghaạph bọ oghol siẹn Genesis 3:15?

 ⁷ Ogananami ni anhịr phọ oghaạph bọ oghol siẹn Genesis 3:15 siphẹ aḍinyạ aBaibul phọ esughanham bọ omhạn. (Bạl Ogananami 12:1, 2, 5, 10.) Ophọn phọ k/oopho anhịr bịn! Unwanyụ phọ odi eeḍiạn aruwol odị, kụ ozu nyodị eghoony 12 araanhaạn. Odị amạr moọny dị u/tu okạr oọny: Omhạr phọ k’Enhaạn. Omhạr phọ odi k’akẹ, esi iduọn phọ anhịr phọ kaḍighi aani olọ k’akẹ. Anhịr phọ amerenyạn esi apakirị ookpomhoghan phọ aZihova opọ k’akẹ phọ aḍighi bọ olhẹm aruwaloor phọ oḅạr bọ nyodị.—Gạl. 4:26.

8. Anhiạn kụ okpanhạ oọny anhịr phọ, kụ apụr amem kụ edị odị aḍighi bọ odọ oọny phọ ophọn phọ? (Genesis 22:15-18)

⁸ Ikpo-onhụ phọ Enhaạn ilhoghonhaạn iyira ḍighaạgh olhọgh elhegh okpanhạ oọny anhịr phọ. Odị kaḍighi olọ eemarạ Ebraham. (Bạl Genesis 22:15-18.) Kụ odaphạn ipẹ imiịn phọ eghaạph bọ, aZizọs phọ akạr kụ aḍighi olọ emhariạ oye aḍimeeraam mọ Ebraham. (Luk 3:23, 34) Kuolọ ewạ m’oọny anhịr phọ amhoọgh inyaạm dị epu ilọ oye loor esi dị odị kaagbị Setan Eru phọ apiemhi. Dị edaphạn iphẹn phọ, mem mọ aZizọs amhạn bọ 30 asiạ usagharạn ni nyodị uwaloor iigbia phọ idiphọ oginha oọny Enhaạn dị aḍighi uwaloor. Rosagharạn bọ nyodị uwaloor iigbia phọ bịn aZizọs aḍighi okpanhạ oọny anhịr phọ. (Gal. 3:16) AZizọs amhugh bọ aḅilhẹ aḅetenhu, Enhaạn azu “nyodị eghoony eghuan r’igbogh” aḅilhẹ angọ nyodị “oomo phọ iikpọ phọ epẹ k’akẹ r’isiẹn ade phọ,” aḅarạm kẹn ni iikpọ “Ophiemi iiḍighi phọ Eru.”—Hib. 2:7; Mat. 28:18; 1 Jọn 3:8.

9-10. (a) Abuọ anhiạn kụ eemarạ anhịr phọ, bidị uḍighi pụr amem? (b) Eeghe kụ edị yira kooḅeghiọn?

⁹ Kuolọ emuton Zizọs, abunhọn koḍighi ni omunhenhiom iyạl apakirị anmụny anhịr phọ. Otelhedom mọ Pọl aghaạph ni ilọ apakirị anmụny anhịr abuẹn phọ abuẹn phọ mem mọ odị aḅenhị bọ Kristẹn abuọ aJu r’aruuruen phọ osagharạn bọ uwaloor iigbia phọ mọ: “Kụ nyina eru ni buọ aKraist, pọ nyina kụ abuọ eemarạ phọ Ebraham kemoọgh bọ ḍisẹph phọ Enaạn eguanaan bọ.” (Gal. 3:28, 29) Torobọ onyọ aKristẹn dị aZihova asagharạn aani uwaloor iigba phọ pọ maḍighom aani eemarạ anhịr phọ. Esi iduọn phọ anmụny anhịr phọ pọ aZizọs Kraist ḅilhẹ 144,000 phọ koḍighian bọ nyodị otooghị. (Ogan. 14:1) Oomo abuẹn phọ roḍighi ghan idị eḅọph r’Odẹ phọ, Zihova Enhaạn phọ.

¹⁰ Siẹn yira molhegheri bọ ilọ abuẹn oghaạph bọ oghol siẹn Genesis 3:15, ooḅeghiọn nuụn ipẹ aZihova ramunhenhi bọ imiịn phọ ephẹn phọ r’asụ dị yira komoọgh.

11. Eghẹn eten kụ edị oḍighi bọ iyaạr eeghim oọny anhịr phọ?

¹¹ Odaphạn imiịn phọ Genesis 3:15, ekarạph iyaạr phọ kelom ni “eeghim” oọny anhịr phọ. Kụ ipẹ phọ imunhughan mem mọ aSetan anyuughiom bọ Ju phọ ḅilhẹ r’abuọ aRom mọ oghiigh Oọny phọ Enhaạn. (Luk 23:13, 20-24) Iduọn oye aḍighima iyaạr eeghim ka/tue bọ atelhe tutụ esi phọ egheel, ipẹ kụ idị aḍuugh phọ aZizọs ekọm idị odị u/ḍighi mụn iyaạr ḅilhẹ aminhạ bịn dị ghuḍum u/moọgh siphẹ oḍi phọ esi iraạr aḍughul otu.—Mat. 16:21.

12. Ika, kụ apụr amem kụ edị koogbị bọ emhụ ekarạph iyaạr phọ?

¹² Imiịn phọ Genesis 3:15 mi/munhughan mughumọ mu/ḅeton bọ Zizọs siphẹ aḍuugh phọ. Eeghe kụ iḍighi? Odaphạn imiịn phọ, oọny anhịr phọ kụ kaagbị emhụ ekarạph iyaạr phọ. Iphẹn phọ remạ ghan mọ eeghim  mọ aZizọs k’ekeel lị. Kụ igheel lị! Omunhenhiom iraạr aḍughul otu phọ uḅeton ni nyodị esi aḍuugh idiphọ olhem aruwaloor dị ka/tue amhugh. Mem dị Enhaạn aḅẹm mọ mekasiạn, aZizọs kapiemhi ni Setan. (Hib. 2:14) Abuẹn kotooghị bọ r’aKraist koḍighan ni opiemhi oomo amulhọgh ḍien phọ Enhaạn siẹn ade phọ—nmụny ekarạph iyaạr phọ.—Ogan. 17:14; 20:4, 10. *

13. Ika kụ idị yira romooghọm suọ omhunhughan imiịn phọ iphẹn phọ?

¹³ Eḍighi Iyaạr dị nạ aḍighi ebenhẹ Enhaạn dị maḅọgh loor angọ nyodị pọ nạ ramooghọm ni suọ omunhughan imiịn phọ. AZizọs aru siẹn ade phọ idiphọ oye. Odị akạr kụ aaghironhaan raagharạ Odẹ phọ odị. (Jọn 14:9) Kụ dị eego esi odị yira moru olhegheri oḅilhẹ opomhoghiạn aZihova Enhaạn phọ. Itughemhị phọ r’iiḅakiọm mọ aZizọs rangọ ghan bọ ookpomhoghan aKristẹn phọ rodon eḍighi kẹn suọ dị yira omhoọgh. Odị mutughemhị iyira ilọ orọl idị k’eḅeeraạn aZihova. Ḅilhẹ oomo ayira kotue ni omooghọm suọ ḍuugh phọ aZizọs—esi eeghim mọ odi. Ika? Mem mọ aZizọs aḅetenhu bọ, odị asighẹ iḅaạl ph’odị aphighironhọm ekiạ dị emhunhughan, ipẹ ‘regbuurogh ghan bọ ikarạph phọ ayira keḅaalamị.’—1 Jọn 1:7.

14. Eḍighi ni idị imiịn phọ Eden kemunhughan eginhamem ḍughụm? Gbạ.

¹⁴ Ikpo-onhụ phọ aZihova agbeelhom bọ siphẹ Eden iḍeenhaan mọ kesighẹ ni mem kụ imiịn phọ iphẹn phọ egbi omunhughan omhạn. Kesighẹ ni mem kụ anhịr phọ amiteghom nmụny phọ odị, kụ ḅilhẹ Eru phọ eekpomhoghi buẹn kodạph bọ nyodị, tutụ ekị esi esi dị amulhọgh ḍien katọl igbo iyạl phọ arugu phọ. Olhegheri imiịn phọ aḍighi kẹn ni suọ ungọ iyira loor esi dị uphụr iyira rurụ mọ aḅirinhị phọ aSetan kụ raaḅakị bọ kalhọgh ni ḍien buẹn rooseeny bọ aZihova. AZizọs aḅilhẹ ni angọ odọ phọ ophụr arurụ phọ ophọn butelhebom mọ odị. (Mạk 13:13; Jọn 17:14) Siẹn 100 asiạ phọ atẹn bọ yira mokạr omhiịn dị apakirị imiịn phọ iphẹn phọ remunughan. Ika?

15. Eeghe kụ iḍighi kụ ighạgh ilhoghi aḅirinhi phọ repogh ghan bọ bịn olhoghorị, kụ uḍighi ika kụ yira ko/kiilhaany bọ Setan?

¹⁵ Rodaamị bọ Zizọs idiphọ Uw-emhạ itooghị aMesayạ phọ 1914, bịn odị aphorogh Setan epẹ k’akẹ. Nyiidiphọ aSetan odi oginha isiẹn ade phọ bịn rakoriom ghan muphe odị. (Ogan. 12:9, 12) Kuolọ odị o/ḅoorian bịn kụ rakori. ASetan raḍighi ghan ilọ ateẹny r’ighurughuụr, asomhoriom ighạgh ilhoghi phọ odị we phọ Enhaạn. (Ogan. 12:13, 17) Pọ kụ iyaạr phọ eten phọ aḅirinhi phọ olhọgh bọ ḍien we phọ Enhaạn r’epọgh ghan bọ bịn olhoghorị. Kuolọ torobọiperolbọ i/wạ mọ yira oghiilhaany Setan r’abuphẹ rodạph bọ nyodị. Kparipẹ ghụn, yira komoọgh aani oniin phọ okuphom owol phọ aPol amhoọgh bọ kụ agẹ bọ mọ: “Idiphọ Enaạn idianaan bọ ni iyira, anhiạn kụ kumerenyạn bọ iyira?” (Rom. 8:31) Yira kotue ni oḍuom olhoghi aZihova, loor esi dị yira momhiịn ni idị oboom apakirị imiịn phọ edi bọ Genesis 3:15 memhunhughan.

16-18. Ika kụ idị aCurtis, Ursula, ḅilhẹ r’aJessica momhooghọm suọ esi onhaghanhạn aḍughụm mọ bidị omhoọgh bọ ilọ aGenesis 3:15?

¹⁶ Oguan phọ aZihova odi bọ Genesis 3:15 katue ni ulhoghonhaạn iyira ḍighaạgh okaran atorobọ ipaanhaạn lọ yira osoman. ACurtis, onyọ umor dị aḍighi misonari epẹ Guam, aḅẹm mọ: “Eeni amem mị rasoman ghan ni  raraạr dị r’elhọgh ghan siya phọ amhị r’aZihova esi odẹgh ophogh. Kuolọ ogbiran ghan ilọ imiịn phọ edi bọ Genesis 3:15 milhoghonhaạn imhị ḍighaạgh oghiọm aghisigh oḍuom ghan olhoghi Odẹ k’akẹ phọ amhị.” ACurtis rakori ghan ḍio phọ aZihova kasiemhi bọ eekunha oomo ipẹ odị asoman bọ.

¹⁷ Onyọ umaranhi epẹ Bavaria dị oghol mọ Ursula aḅẹm mọ onhaghanhạn Genesis 3:15 ilhoghonhaạn nyinọ ḍighaạgh okuphom owol mọ aBaibul phọ aḍinyạ Enhaạn. Odị amhiịn ipẹ oomo inhọn imiịn rekọm ghan bọ nyeẹ phọ, kụ ipẹ phọ ikạr kụ etir nyodị. Odị aḅilhẹ kẹn ni aḅẹm mọ: “Ipẹ aZihova aagborionhom bọ oḍighi iyaạr amiteom pidị omhạr awe omhoọgh oḍuom olhoghi ikạr kụ etir ekpom amhị.”

¹⁸ AJessica, olọ aMicronesia, aḅẹm mọ: “Mị u/bulha ipẹ mị alhoghoma bọ eḅẹl amem mọ mị amhiịn bọ mọ iphẹn kụ igey phọ! Imiịn phọ edi bọ Genesis 3:15 remunhughan. Ipẹ phọ m’ilhoghonhaạn imhị ḍighaạgh omhiịn m’oomo iphẹn remite bọ aḅirinhi phọ rodon i/ḍighi ogbi aZihova. Imiịn phọ iphẹn phọ mekparamhị omheeraam mọ amhị mọ okumu aZihova kụ kangọ suọ nyiidiphọ ḅilhẹ r’aḍimạ aghuḍum epẹ ghisigh.”

19. Oghẹn okuphom owol kụ edị yira omhoọgh, mọ agạ imiịn phọ esugha bọ kemunhughan ni?

¹⁹ Iduọn yira momhiịn bọ, imiịn aGenesis 3:15 remunhughan. Moganhamhi nmụny anhịr phọ ḅilhẹ r’abuọ ekarạph iyaạr phọ. AZizọs phọ aḍighi bọ okpanhạ apakirị siphẹ anmụny anhịr phọ, mamhoon esi iyaạr phọ oḍighi bọ eeghim mọ odị aḍighi nyiidiphọ Uw-emhạ dị moghuenhi, dị ka/tue mun amugh. Kụ onhụ abạl abuẹn koḍighi bọ omunhenhiom iyạl apakirị anmụny anhịr phọ rakpụl omhunhughan. Loor esi iduọn oḅẹl apakirị imiịn phọ memunhughan bọ, yira omhoọgh ni r’iphigh okuphom owol mọ epẹ esugha bọ, oogbị emhụ phọ ekarạph iyaạr phọ, ke/bilhẹ dị kemunhughan. P’eeghe idị abuẹn omhoọgh bọ omheeraam koseere ekpom mem dị aSetan kasi bọ eekunha! Kụ egbi oteẹny amem mọ amuphẹ phọ, nyinhạ ki/phẹr. Enhaạn phọ ayira olọ oḍuom olhoghi ni. Dị eego esi anmụny anhịr phọ, odị katuom ni ḍisẹph kirokirọ “oomo areelhe isiẹn ade phọ.”—Gen. 22:18.