1. Yira komhiịn ika eepoogh oḅaanhaạn ghan aZihova?

 EEPOOGH phọ yira omhoọgh bọ epughan—oḅaanhaạn ghan Olhemhiạ k’akẹ phọ r’ade phọ esi iiḅereghị. P’eeghe eepoogh: Ii, yira kotue ni ozu ekpom ayira oḅenhị aZihova torobọ amem ḅilhẹ r’atorobọ onhụ. Yira kotue ni ooḅereghị ongọ nyodị mem dị yira odi emhinhạ e/moon ḅilhẹ r’otu ikoli, r’akpọ oḅio mọ Odẹ ephomhoghiạn phọ ayira ranaghạn ni. Yira ro/peghom ghan ephegh eepoogh phọ ephẹn phọ.

2. Ika kụ idị Uw-emhạ phọ Devid aḍeenhaan m’onọ asereghiạn ni eepoogh iiḅereghị?

² Uw-emhạ phọ Devid amaghamhị ni maạr eepoogh iiḅereghị phọ. Odị aaseeny aZihova kụ aḅẹm mọ: “Sighẹ ni iiḅereghị phọ amhị idiphọ insẹns eeḅi eḍu.” (Ps. 141:1, 2) Mem mọ aDevid, abupinyọn rikiạ phọ ulhọgh ghan ni iboom ikuph ookolhobian insẹns phọ osighẹ ghan bọ oḍighinhom. (Ex. 30:34, 35) Esi otomaạm iiḅereghị phọ odị insẹns, aDevid amạ ghan amiteom mọ onọ ramaạr ghan ni kaakolhobian ipẹ odị kaḅenhị bọ Odẹ k’akẹ ph’odị. Ipẹ kẹn kụ idị yira rowạ aani. Yira rowạ mọ aZihova asighẹ aani iiḅereghị phọ ayira.

3. Ika kụ idị yira koḅaanhaạn ghan aZihova, kụ uḍighi ika kụ emạn bọ maạr?

³ Oḅaanhaạn ghan aZihova r’eegu. Tuutughiạn ghan ilọ ookiạ uḍien phọ Isaiah, Ezekiel, Daniel, ḅilhẹ r’aJọn omhiịn bọ. Uḍien phọ abidị agbaranhaạn ni, kuolọ emoọgh ni esi dị oomo phọ idị eḅọph. Uḍien phọ aḍeenhaan ghan aZihova idiphọ Uw-emhạ dị apeleghiom. Isaiah “amhiịn aZihova dị arolhọm agadạ odaạm mọ odị” agadạ phọ “apoph kụ r’arughuanhian.” (Isa. 6:1-3) Ezekiel amhiịn dị aZihova arolhọm agadạ odaạm dị odị anyụ oboom oghuugh, kụ “aḍiḅaạl otozị . . . dị amhoọgh oomo inmẹ phọ ipẹ edi ghan bọ olhoghi aghozogh oburukeeny” kụ eeghironhom.  (Ezek. 1:26-28) Daniel amhiịn “Opọ Odi ghan bọ K’agee-pọ phọ” dị iinmenhian phọ eḅaạl fororo, r’anem aniạn dị remite pạ agadạ phọ Odị. (Dan. 7:9, 10) Kụ aJọn amhiịn aZihova dị arolhọm agadạ dị aghozogh oburukeeny dị aghịgh iyaạr dị oghol mọ emerạld akitonom. (Ogan. 4:2-4) Eghuan phọ aZihova yira omhiịn bọ ko/tue otomaạm enhọn iyaạr, kụ iphẹn phọ iḍeenhaan iyira idị eepoogh phọ yira omhoọgh bọ oḅaanhaạn ghan odị emạn maạr, ḅilhẹ mọ ekpẹ kẹn dị yira koḅaanhaạn nyodị reegu. Kuolọ yira kooḅereghị ghan ika?

4. Ighunyonhom ikpo onhụ iiḅereghị Odẹ phọ edi bọ Matiu 6:9, 10 itughemhị iyira eeghe?

⁴ Bạl Matiu 6:9, 10. Siphẹ oghaạph phọ aZizọs angọ bọ pạ anyụ eeḅarạph phọ odị atughemhị bumatuạn phọ odị ilọ ooḅereghị ghan eten dị Enhaạn kasighẹ. Odị r’oḅẹm bọ mọ “iiḅereghị ghan iduọn mọ,” aZizọs aghị ni ghisigh agọ raraạr dị emạn maạr dị egbolhomaam ogbi phọ aZihova: oḅaalhamhị aḍien phọ Odị; eeruanhaan Omhạr phọ kasiemhi bọ eekunha buẹn r’ogbagharạn ghan bọ Enhaạn; ḅilhẹ r’aḍisẹph kirokirọ phọ Odị katuom naan bọ omhạr awe. Mem dị yira oḅarạm iphẹn phọ siphẹ iiḅereghị phọ ayira pọ yira r’oḍeenhaan ghan mọ ogbi phọ aZihova amạn ni maạr esi ayira.

5. Ebeeph ni ooḅereghị ilọ araraạr dị yira rowạ ḍughụm?

⁵ Ḍierị phọ agạ phọ, aZizọs aḍeenhaan mọ emạn ni maạr ooḅereghị ilọ araraạr dị yira omhoghi. Yira kotue ni olhọm aZihova ilọ eḍien olhe aḍio phọ, osạr owilenaạn asipiomạn, oghoph ayira esi odẹgh ophogh, ḅilhẹ r’ophẹl ayira esi okarạph oye phọ. (Mat. 6:11-13) Yira opuru ghan aZihova ilọ araraạr phọ iphẹn phọ pọ reḍeenhaan ghan mọ yira obenenhọn ni nyodị kụ rowạ ghan oḍighi oomọ amem mọ ilọ kebeeraạny nyodị.

6. Araraạr phọ yira kooḅereghị ghan bọ okol keḍighi oginha ipẹ edi bọ siphẹ iiḅereghị Odẹ phọ bịn? Gbạ.

⁶ AZizọs o/ḅẹm mọ abutelhedom mọ odị odạph ghan iiḅereghị phọ iphẹn phọ ekpo etum ekpo. Enhọn amem dị aZizọs aaḅereghị odị aghaạph aghol inhọn araraạr dị odị amoghi mem mọ amuphẹ phọ. (Mat. 26:39, 42; Jọn 17:1-26) Iginha phọ kẹn, yira kotue ni ooḅereghị ilọ atorobọ iyaạr dị r’iiḅaghamhị iyira. Mem dị yira r’owạ osopha osopha, yira kotue ni olhom osu olhoghi r’onhaghanhạn aḍughụm. (Ps. 119: 33, 34) Mem dị yira rowạ omhiigh omhoom oḍighi dị ungọ iyira, yira kotue ni ooḅereghị ilọ orọph omhiịn r’amagheel. (Prov. 2:6) Odẹ r’onhiịn kotue ni ooḅereghinaạn nmụny aḅidị, kụ anmụny phọ kotue ni oḍighi aani iginha phọ, kụ oomo ayira kotue ni ooḅereghinaạn buẹn yira rotughemhị ghan bọ Baibul phọ r’abuẹn yira rokaạph ghan bọ iiḅi iinhaghạn phọ koḅenhị. Kuolọ iiḅereghị phọ ayira ketue ni epel olhọm araraạr bịn.

7. Uḍighi ika kụ yira kooseeny ghan bọ aZihova siphẹ iiḅereghị phọ ayira?

⁷ Ku/bulha ghan oḅarạm iiseeny siphẹ iiḅereghị phọ ayira. Oye o/lho dị akpẹ ooseeny apu Enhaạn phọ ayira. Odị “anighẹ kụ asạr ghan ikarạph rabilenaạn ghan.” Odị aḍighi Enhaạn “onmạ ighirigiir r’aghusạn, oomo amem r’akparạm ghan, oomo amem r’amoọgh ghan igbiririph ḅilhẹ amuza r’ephomhoghiạn oḅạr, o/mhoọgh mabi.” (Ps. 86:5, 15) Yira okạr omoọgh igey ariphigh ooseeny ghan aZihova ilọ oye phọ odị aru bọ ḅilhẹ r’iiḍighi ph’odị.

8. Eeghe kụ iniin araraạr dị yira kotue okol osẹph aZihova? (Psalm 104:12-15, 24)

⁸ Etigheri ooseeny ghan aZihova siphẹ iiḅereghị phọ ayira, r’inyu ghan kẹn ni iyira osẹph odị ilọ imạ araraạr phọ odị ruḍighinhaan ghan bọ iyira. Esi omaạm yira kotue ni osẹph nyodị loor esi imạ agbạ kirokirọ phọ yira romiịn ghan bọ loor asifalawạy phọ, r’ariiḍien kirokirọ phọ yira rokelhọm ghan bọ, ḅilhẹ r’imạ arighirị phọ yira omhoọgh bọ. Odẹ ephomhoghiạn phọ ayira atuẹn dị yira komhoọgh ibo kụ ungọ bọ iyira raraạr phọ iphẹn phọ. (Bạl Psalm 104:12-15, 24.) Kụ idị emhạn maạr epu, yira rosẹph ghan ni aZihova ilọ eḍien aruwaloor phọ odị ramiteom ghan bọ ḅilhẹ r’ookiạ oḍuomolhoghi aghisigh phọ.

9. Eeghe kụ kilhoghonhaạn iyira ḍighaạgh ootughiạn ghan osẹph aZihova? (1 Tesalonikạ 5:17, 18)

⁹ Ketue ni edugh dị yira kobulha osẹph aZihova ilọ oomo araraạr phọ odị muḍighinhaan bọ iyira. Eeghe kụ kilhoghonhaạn iyira ḍighaạgh ootughiạn ghan? Nạ katue ni agẹ raraạr dị nạ alhọm mọ aZihova aḍighinhaạn nyinhạ, kụ amem etum mem nạ apogh ghan omhiịn ipẹ odị rapanyanhaạn bọ. Kụ aaḅereghị asẹph nyodị ipẹ odị r’alhoghonhaạn bọ nyinhạ ḍighaạgh. (Bạl 1 Tesalonikạ 5:17, 18.) Pogh eten phọ ephẹn: Yira rologhoma ghan ni oḅaạl olhoghi  r’ephomhoghiạn mem dị abunhọn awe usẹph iyira. Iginhạ phọ kẹn, mem lọ yira ootughiạn ghan osẹph aZihova ipẹ odị r’apanyanhaạn ghan bọ iiḅereghị phọ ayira, reḅaạl ghan ni olhoghi odị. (Kọl. 3:15) Kuolọ enhọn ephigh dị emạn maạr edi ni otuạn osẹph aZihova?

10. Odaphạn 1 Pita 2:21, eeghe kụ iḍighi kụ yira k’okol bọ ni emhụ osighẹ oọny phọ odị orumhom isiẹn ade phọ osẹph aZihova?

¹⁰ Bạl 1 Pita 2:21. Osẹph ghan aZihova esi orom Oọny phọ odị aphomhoghiạn bọ mọ aru utughemhị iyira. Yira kotue ni olhegheri obughẹ ilọ aZihova ḅilhẹ raraạr phọ ipẹ r’eḅaalhamhị ghan bọ olhoghi odị esi otuughạ ilọ adọl aghuḍum mọ aZizọs. Yira oḍeenhaan omheeraam oghị esi ekiạ phọ aKraist, kilhoghonhaạn iyira ḍighaạgh omhoọgh asiya dị ekpạr r’aZihova Enhaạn phọ ḅilhẹ r’oghelhọm eepho r’Odị.—Rom. 5:1.

11. Eeghe kụ iḍighi kụ yira rooḅereghị ghan bọ aZihova dị eego esi aḍien aZizọs?

¹¹ Yira rosẹph ghan aZihova iduọn yira kotue bọ ni oḅaanhaạn nyodị dị eego esi oọny ph’odị. Amem dị yira ooḅereghị esi aḍien phọ aZizọs bịn kụ edị aZihova katue anaghạn iiḅereghị phọ ayira. AZizọs aghaạph mọ: “Torobọ iyaạr dị nyina eghoI ḍien amị kụ epuru Odẹ phọ, mị kaḍighi ni, pidị awe oghoI Moọny phọ ongọ Odẹ phọ eghuan.”—Jọn 14:13, 14.

12. Eghẹn kụ enhọn ephigh oghol osẹph aZihova loor esi oọny phọ odị?

¹² AZihova r’akol ghan emhụ ekiạ etagharạn phọ aZizọs Kraist kụ asạr uwilhenhaạn iyira ikarạph. Igẹ Iigbia phọ ekaạph mọ aZizọs “uw-emụ opinyọn rikiạ dị marọI ude epẹ k’akẹ ḍighaạgh eIiom agadạ odaạm emạ Egbogh Enaạn phọ.” (Hib. 8:1) AZizọs kụ ‘omeerạ enye’ ayira “ghisigh Odẹ phọ.” (1 Jọn 2:1) Yira rosẹph ni aZihova ongọ ayira Ogbogh Opinyọn Rikiạ dị unhaghanhạn iyira, kụ ragbạ ghan kẹn “ophelọm ayira ghisigh” Enhaạn! (Rom. 8:34; Hib. 4:15) Yira oḍighi we dị u/munughan, kụ ekiạ phọ aZizọs kụ iḍighi idị edugh dị yira rooḅereghị ghan aZihova. Yira ko/tue osẹph aZihova idị kekasiẹn ilọ inmo phọ iphẹn phọ emhạn bọ maạr odị ungọ bọ iyira—inmo oọny phọ odị aphomhoghiạn bọ!

13. Ḍughul phọ aḍiphẹ eḅaạl kokiigh bọ nyodị, aZizọs aḍeenhaan ika ephomhoghiạn bumatuạn ph’odị?

¹³ Ḍughul phọ aḍiphẹ eḅaạl kokiigh bọ nyodị, aZizọs aghol li emhụ abumatuạn phọ odị aaḅereghị eedoọny amem, alhọm ghan Odẹ phọ mọ “opogh bidị loor esi okarạph oye phọ.” (Jọn 17:15 NWT) P’eeghe ephomhoghiạn dị aZizọs aḍeenhaạn bidị! Iduọn phọ rokaạph bọ Odị rawạ osoman imhinhimhiịn dị ephughạn; ghalhamọ r’iduọn phọ ni, odị aḍeenhaạn ni ogbolhomaam ilọ asighuḍum abutelhedom mọ odị.

14. Ika kụ idị yira koḍeenhaan mọ yira opomhoghiạn ni bumor r’abumaranhi phọ ayira?

¹⁴ Mem lọ yira otughaạny Zizọs, yira ko/gbon ghan ipẹ riiḅaghamhị bọ iyira bịn. Kparipẹ ghun, yira kogbor ghan ooḅereghinhaạn bumor r’abumaranhi phọ ayira. Mem dị yira oḍighi iduọn phọ, pọ yira ronaghanhạn ghan itọ phọ aZizọs, ilọ oniin k’apomhoghiạn ghan nyoniin ḅilhẹ kẹn yira roḍeenhaan ghan aZihova odọ idị yira ophomhoghiạn buẹn r’ayira oḅọph bọ omheeraam mọ. (Jọn 13:34) Kụ ooḅereghinhaạn abumor r’abumaranhi phọ ayira i/ḍighi oroph amem. Ekpo-onhụ phọ Enhaạn eḅẹm mọ “oye aruukuan kụ aaḅereghị, iiḅereghị phọ remoọgh ghan ni iikpọ keḍighi ekol.”—Jems. 5:16.

15. Eeghe kụ iḍighi kụ yira kooḅereghinhaạn bọ bumor r’abumaranhi phọ ayira?

¹⁵ Ekpianhaạn ni lọ yira kooḅereghinhaạn ghan bumor r’abumaranhi phọ ayira loọr esi dị  bidị rosoman ghan ni iiḅaghamhị kirokirọ. Yira kotue ni olọm aZihova mọ alhoghonhaạn bidị ḍighaạgh okparạm e/moon, ekperenhom iiḅaghamhị, raaghạm, igbiphoghọm, obobọ inhọn odọ iiḅaghamhị. Yira kotue kẹn ni ooḅereghinhaạn bumor r’abumaranhi phọ ayira abuẹn omiteom bọ loor olhoghonhaạn ghan aḍighaạgh rikpisi dị iiḅaghamhị emite. Iduọn siẹn nạ alhegheri ni buniin abudị osoman ipaanhaạn phọ iphẹn phọ. Eru ni idiphọ pọ kol ghan ni ḍien abidị mem lọ nạ raaḅereghị. Yira roḍeenhaan ghan ephomhoghiạn abumor mem dị yira olhọm aZihova olhoghonhaạn aḅidị ḍighaạgh okparạm.

16. Uḍighi ika kụ yira kooḅereghinhaạn bọ buẹn roḍiemhiom bọ siẹn igbo phọ ayira?

¹⁶ Ilhoghi abuẹn roḍiemhiom bọ ookpomhoghan phọ reḅaạl ghan ni kụ r’omooghọm ghan kẹn ni suọ mem dị abunhọn ooḅereghinhaạn bidị. Onyọ amatuạn phọ Pọl alhọgh ni elhegh iphẹn phọ. Odị agẹ mọ: “Iiḅereghị ghan ni iIoghọm aani imị, mọ Enaạn ingọ ghan imị iIọ ekpeanaạn oghaạph, mem Iọ mị atagharạn onhụ amị, ḅiIẹ kẹn mọ mị ukaaphọm ghan akpọ ologhi ugananami ipẹ aaghị bọ ilọ ooḅi oghaạph phọ.” (Efẹ. 6:19) Rodon yira omhoọgh ni ibadị abumor dị rokumuan ni agey di roḍiemhiom siẹn igbo phọ ayira. Kụ yira roḍeenhaan ghan ephomhoghiạn buẹn phọ mem dị yira olhọm aZihova m’asẹph bidị.

17-18. Apụr amem kụ edi kotue umạgh iyira omherenyạn abunhọn ooḅereghị, kụ eeghe iyaạr kụ edị yira kolhọgh elhegh?

¹⁷ Eeni amem rumạgh ghan ni iyira ooḅereghị esi dị abunhọn awe odi. Esi omaạm, umaranhi dị ratughemhị Baibul oye atuen ni aḅenhị onyọ umaranhi dị adạph nyodị maaḅereghị. Umaranhi phọ omạgh bọ ooḅereghị phọ eeni o/kạr olhegheri opọ rotughemhị bọ, loor iduọn phọ, eeni keḅeeraạny nyodị ongọ iiḅereghi okureriom ituughạ phọ. Opọ kụ amem dị odị katue aaḅereghị alhoghọm raraạr dị opọ rotughemhị bọ amhoghi.

¹⁸ Mem dị ophạm ruupuruan omite epẹ erugh phọ obobọ oghị ituughạ romạgh ghan ni onyọ umor ooḅereghị. Abumor dị omhoọgh eepoogh phọ ephẹn ootughiạn ni iyaạr phọ otuạn bọ kụ ookpomhoghan. Ku/sighẹ ghan iiḅereghị phọ kụ oolhemhiom ookpomhoghan phọ obobọ ongoọm iinhaghạn. Ibadị ituughạ phọ ayira, rongọ ghan oogh ikalhạ bịn omhoorọm aḍuọr  r’ooḅereghị, esi iduọn phọ, onyọ umor phọ k/uuḅereghị “iidoọny” iiḅereghị, ekạr nuun ekpaariọm ilọ oghughuronhom ituughạ phọ.—Mat. 6:7.

19. Eeghe kụ kilhoghonhaạn iyira ḍighaạgh ookolhobian ilọ aḍio iiruẹn phọ aZihova?

¹⁹ Ewạ mọ yira omhaghamhị maạr iiḅereghị siẹn aghuḍum mọ ayira iduọn aḍio iiruẹn phọ aZihova metuman bọ. Idị egbolhomaam iphẹn phọ aZizọs aḅẹm mọ: “Itọl esi ogon eeḅereghị ghan oomo amem, pidị nyina emoọgh inyaạm omerenyạn oomo araraạr phọ iphẹn osi eekuna.” (Luk 21:36) Ii, ogbor ghan ooḅereghị kilhoghonhaạn iyira ḍighaạgh oomanham eten aruwaloor, dị aḍio phọ Enhaạn iyira ki/sighẹ ekperenhom.

20. Ika kụ idị iiḅereghị ayira kekịgh insẹns eeḅi eḍu?

²⁰ Yira mooḅeghiọn eeghe? Yira okạr kụ omaghamhị iboom maạr eepoogh iiḅereghị phọ yira omhoọgh bọ. Ogbon ghan iiḅereghị phọ ayira raraạr dị emhoọgh muuḅọph r’arigbiom mọ aZihova. Yira oḅilhẹ kẹn ni rosereghiạn ghan Oọny phọ Enhaạn r’itooghị Omhạr ph’odị, ḅilhẹ yira r’ooḅereghinhaạn ghan kẹn bumor r’abumaranhi phọ ayira. Kụ yira kooḅereghị ni ken ilọ araraạr dị yira rowạ eten iphulhupul r’eten aruwaloor. Mem dị yira omhiigha loor kụ ootughiạn raraạr phọ ipẹ yira kokaạph bọ iduọn yira rooḅereghị bọ, pọ yira roḍeenhaan ghan mọ yira omhaghamhị ni maạr eepoogh phọ. Ikpo-onhụ phọ ayira kekịgh ni insẹns eeḅi eḍu esi aZihova—“dị redụgh esi Odị onhaghạn.”—Prov. 15:8.