AZizọs agbeelhom ghan dom eephọ. Kuolọ eniin amem odị aḅenhị butelhedom mọ odị mọ: “Ke/gbiom ghan mọ mị uphạm eephọ kụ arumom bọ siẹn abịrini phọ. K/idiphọ. Mị uru ghụn oler eghạm. Mị uru ogbariọn aburudẹ r’anmụny, burunhiin r’anmạnyaạn, ronọ-oyiI r’aburunhiin ilom.” (Mat. 10:34, 35) Eeghe kụ emhụ iphẹn aZizọs aghaạph bọ?

AZizọs o/wạ ghan mọ arughunotu egbaragbarạ dị oniin siphẹ eghunotu phọ kabilhẹ bueriphọ, kuolọ odị alhegheri ni mọ itughemhị phọ odị kekọm ni madia elọgh iniin arughunotu. Esi iduọn phọ, awe lọ rowạ oḍighi aani abutelhedom aKraist kụ oḍiiny muụm kolegheri ni odọ iikpiạ dị osopha phọ abidị ophọn phọ katue akọm. Eru maạr lọ opọ r’abidị aalhạn bọ obobọ asiya abidị dị u/lo aani siẹn igey phọ kụ rosophoghom bidị, pọ keḍighi ni ipaanhaạn orolhọm ritughemhị phọ aKraist.

ABaibul phọ atoma Kristẹn mọ ‘orolọm eephọ r’oomo awe.’ (Rom. 12:18) Kuolọ itughemhị phọ aZizọs ketue ni ekịgh mudị “oler eghạm” iniin arughunotu. Iphẹn phọ ketue emite mem dị oniin siphẹ eghunotu phọ amheera odạph itughemhị phọ aZizọs mem dị abunhọn oghel obobọ r’ogbagharạn. Mem lọ eḍighi iduọn phọ, pọ asiya phọ—buẹn oḍighi bọ buọ eniin phọ eghunotu phọ—‘molọgh ḍien oye phọ’ opọ matuughạ bọ igey phọ—Mat. 10:36.

Abutelhedom aKraist dị odi rughunotu dị aruukụ iiḅereghị phọ egbaranhaạn rosoman ghan ni sidọl dị retir ghan ephomhoghiạn phọ bidị omhoọgh bọ oghị esi aZihova r’aZizọs. Esi omaạm, asiya abidị dị u/lo aani siẹn igey phọ otue ni okpaariọm bidị m’oḍighom aani olhe eyaạl ekụ iiḅereghị abunọ. Bidị koḅaalhamhị olhoghi anhiạn mem dị osoman odẹgh ophogh? AZizọs aḅẹm mọ: “Oye lọ aphomoghiạn odẹ r’onhiin odị upuemiom imị, o/kpeanaạn oḍighi oIọ k’amị.” (Mat. 10:37) Iphẹn phọ re/mạ ghan mọ aZizọs aḅẹm m’abutelhedom onọ ku/pomhoghiạn r’ophomhoghiạn odẹ r’onhiin abidị. Kparipẹ ghụn, odị ratughemhị ghan bidị ilọ osopha ghan mem dị rokaạph ilọ araraạr dị emhạn maạr epu siphẹ aghuḍum mọ abidị. Eru maạr lọ asiya ayira rusophoghom iyira ooḅereghị aZihova, yira ko/lọgh bidị ḍien, kuolọ yira kolegheri ni mọ ephomhoghiạn phọ yira omhoọgh bọ oghị esi Enhaạn kụ eḅẹl.

Ogbạ agey, repin ghan ni mem dị abuọ eghunotu oye phọ kụ rosophoghom oye phọ. Kụ etigheri iduọn phọ, abutelhedom mọ aZizọs oseerian ni olhoghi ikpo-onhụ phọ odị eḅẹm bọ mọ: “Oye Iọ u/tooI osuom arusu phọ odị kụ udaphạm imị, o/kpeanaạn oḍighi oIọ k’amị.” (Mat. 10:38) Iphẹn phọ remạ ghan mọ, aKristẹn kosighẹ isophoghom asiya phọ abidị idiphọ apakirị imhinhimhiịn phọ abutelhedom mọ aKraist komhiinhọm bọ. Kụ eniin phọ amem mọ, bidị oḍuom ni olhoghi mọ imạ aroozọ phọ abidị ketir ri ilhoghi asiya phọ abidị bịn opogh okiririom aani dom aBaibul phọ.—1 Pit. 3:1, 2.