“Eniin amem dị oọny umor onhiin amhị r’amhị omhoọgh iigbaghanhaạn, mị unọ ooko phọ, bịn awạ oghiigh.”—Paul.

“Olhoghotu ayoor, eẹny iyaạr bịn mị maruphe, kụ mị apueghị yogh sigadạ, raraạr ephegh ibạm anmụny, r’atorobọ iyaạr lọ mị ateẹny.”—Marco.

Eeni yira ko/zọ kipekipẹ, kuolọ eeni amem rikparanhaạn ghan ni iyira ophamaghạn aloor. Idị eḍighi bọ yira ole erua ikarạph ḍighaạgh oḅẹl oye phọ, Adạm. (Rom. 5:12) Idiphọ aPaul r’aMarco, rekparanhaạn aani ghan ni buniin ophamaghạn ighạgh ilhoghi abidị. Elọ abunhọn rekparanhaạn ghan ophamaghạn iitughiạn abidị. Bidị rotolhonaạn ghan iitughiạn araraạr dị rekọm ghan oghiilhaan obobọ oḅonyonhu ozuan. Bunhọn rekparanhaạn ghan okpạr opu inyuughiom orolạn esi dị u/ḅaạl, ophughọl amiim otenhom okụ, obobọ oḍighinhom igbagarạ asirooghọ.

Buphẹ ro/ḅologha ghan bọ iitughiạn abidị, ruuphuạ abidị, ḅilhẹ r’iḍighinhom araraạr abidị, rolọgh ghan ghuḍum abidị esi ootor’osooromineen. Yira kotue ni okpetenhaan ipẹ phọ. Ika? Esi omhoọgh eegharạ ophamaghạn-aloor. Orue oḍighi iduọn phọ, pọ ooḅeghiọn iraạr asipuru phọ iphẹn: (1) Ophamaghạn-aloor p’eeghe? (2) Eeghe kụ iḍighi kụ emhạn bọ ni maạr? (3) Ika kụ idị yira kotue bọ omoọgh eegharạ phọ ephẹn phọ, eḍighi aani bọ pakirị ‘eemuma uwaloor phọ’? (Gal. 5:22, 23) Ipẹ reten kụ yira ooḅeghiọn iyaạr dị ewạ mọ oye phọ r’aloor aḍighi omhoọgh ophamaghạn-aloor.

Oye dị amoọgh ophamaghạn-aloor ra/daphạn ghan torobọ inyuughiom bịn k’azọ. Ḅilhẹ kẹn, ra/kaaphọgh ghan ḅilhẹ ra/ḍighi yogh ghan raraạr dị Enhaạn i/ḅeraạn.

AZizọs uḍeenhaan iyira iyaạr dị ophamaghạn-aloor ramạ ghan. ABaibul phọ aḅẹm mọ: “Oronyon bọ nyodị, odị o/ronyon aani oḅulemian. Omiinẹ bọ nyodị, odị o/paaghiạn ipạ. Odị asighẹ ghụn oḍuom ologhi phọ odị akpasị esi opọ raagbo ghan bọ eelenyan iiruẹn phọ.” (1 Pit. 2:23) AZizọs aḍeenhaan ophamaghạn-aloor phọ opọ phọ mem mọ amulọgh ḍien phọ ogilaạm bọ nyodị siphẹ anyụ oreeny imhinhimhiịn phọ. (Mat. 27:39-44) Epẹ omhạn, odị aḍeenhaan ni ophamaghạn aloor dị aḍighan elhegh mem dị abuḍiemhiom aruukụ iiḅereghị phọ okparaghạ oḍighi idị odị kapiomạn esi ikpo onhụ. (Mat. 22:15-22) Ḅilhẹ kẹn odị aḍighi ni aḍeenhaan ophamaghạn-aloor mem dị awe aJu dị omoọgh ighạgh ilhoghi owạ oroḅol odị ikpo! Kparipẹ r’eenan abidị, “[aZizọs] aaghiạn amite pạ otu iiḅereghị phọ aḍuạ.”—Jọn 8:57-59.

Yira kotue ni otuughaạny aani eḍeenhaan phọ aZizọs ḍughụm? Ii, yira kotue ni. Otelhedom mọ aPita agẹ mọ: “aKraist aghol emụ anyina kụ amiinọm bọ mọ isighẹ nyinọ emaạm ghan, pidị nyina edạph ghan igbaranuọm aruwol phọ odị.” (1 Pit. 2:21) Ghalhamọ r’iduọn yira u/munughan bọ ni, yira kotue ni odaphạn eḍeenhaan phọ aZizọs, oḍeenhaan  aani ghan ophamaghạn-aloor. Eeghe kụ iḍighi kụ emhạn bọ ni maạr oḍighi iduọn phọ?

Ewạ dị yira komoọgh ophamaghạn-aloor, orue oḅaalhamhị olhoghi aZihova. Etigheri onhụ asiạ phọ yira mokumu bọ aZihova, yira kotue ni okạ siya phọ ayira r’odị eḍighi maạr dị yira ro/pamaghạn ghan ipẹ yira rozọ ghan bọ, ḅilhẹ r’ikpo onhụ phọ ayira.

Ooḅeghiọn eḍeenhaan aMozis, opọ aḍighi bọ “oye dị asooromi loor apu esi oomo awe phọ orọl bọ siẹn ade phọ” mem mọ amuphẹ phọ. (Num. 12:3) Ghalhamọ r’iduọn aMozis makparaghạm bọ ni igum awe Izrạl phọ esi ibadị asiạ, aḍio irọl li dị odị u/tue mun upamaghạn loor. Odị aghaghạm ni bidị olhoghi mem dị bidị oḅilhẹ omhiigh ogum ilọ amuụm ophughọl. Odị aḅaanhaạn we phọ r’ighạgh ilhoghi, kụ aḅẹm mọ: “Inaghạn, nyinha awe iḅạph! Yoor ingọ inyinha muụm siẹn aḍighiigh phọ aḍiẹn phọ?”—Num. 20:2-11.

AMozis apiọm ni ophamaghạn aloor odị. Odị o/ngọ aZihova eghuan phọ epẹ esi bọ nyodị idiphọ opọ amiteom bọ muụm mọ eten iiḍaạny. (Ps. 106:32, 33) Ipẹ phọ iḍighi idị aZihova u/meera mọ odị aḍigh aani De phọ Oguanhaan bọ. (Num. 20:12) Eeni aMozis alhoghoma ni saị esi ighạgh ilhoghi phọ odị tutụ amhugh.—Deut. 3:23-27.

Iphẹn phọ itughemhị iyira eeghe? Etigheri onhụ asiạ dị yira morọl siẹn igey phọ, yira ku/kaạph eten aroofola ukị esi awe dị oḍighi iyaạr dị repin esi ayira obobọ esi awe dị ekpẹ oolemhi. (Efẹ. 4:32; Kọl. 3:12) Rikparanhaạn ghan ni iyira omhoọgh okparạm idiphọ asiạ phọ ayira rekị bọ. Kuolọ tuutughiạn eḍeenhaan phọ aMozis. R’amem r’amem, yira ku/kạ siya arighirị phọ ayira r’aZihova loor esi e”ḍeenhaan ophamaghạn-aloor. Yira koḍighi ika kụ omoọgh eegharạ phọ ephẹn emhạn bọ idiphọ maạr?

Ḅeeḅereghị Enhaạn Engọ Nyinhạ Uwaloor Iigbia phọ. Eeghe kụ iḍighi? Loor esi dị ophamaghạn-aloor aḍighi aani pakirị eemuma uwaloor iigbia phọ k’Enhaạn, kụ aZihova rangọ ghan ni buphẹ rolọm bọ. (Luk 11:13) AZihova katue ni ungọ iyira iikpọ phọ rewạ bọ dị eego esi uwaloor iigbia phọ odị. (Fil. 4:13) Odị katue kẹn ni ulhoghonhaạn iyira ḍighaạgh omhoọgh iphediphọ agạ eemuma uwaloor iigbia phọ, idiphọ ephomhoghiạn, ephẹn kilhoghonhaạn bọ iyira ḍighaạgh okuamhị omhoọgh ophamaghạn-aloor.—1 Kọr. 13:5.

Kel torobọ iyaạr dị keḍighi idị kekparanhaạn nyinhạ omhoọgh ophamaghạn-aloor. Esi omaạm, Ḍuạ esi iisoph intanẹt r’ozaamiạn aloor dị aḅaramaạm roozọ dị i/ḅaạl. (Efẹ. 5:3, 4) Okạr oghaạph, yira omoọgh oghel atorobọ iyaạr dị kinyu iyira oḍighi ikarạph. (Prov. 22:3; 1 Kọr. 6:12) Esi omaạm,  ewạ mọ oye dị rawạ oḍuạ esi orolạn esi dị u/ḅaạl kakel rinyạ r’asifim dị eghaạph ilọ iḍoonaạn.

Eeni etue ni ikparanhaạn iyira osighẹ oroma phọ ophọn phọ oḍighinhom. Toroboiperolbọ, eḍighi maạr dị yira olhọgh ni inyaạm, aZihova kungọ ni iyira iikpọ phọ ipẹ ewạ bọ orue ophamaghạn aloor. (2 Pit. 1:5-8) Odị kulhoghonhaạn ni iyira ḍighaạgh ophamaghạn iitughiạn, ikpo onhụ, ḅilhẹ r’eten phọ epẹ yira rozọ ghan bọ. Idị eḍeenhaan iphẹn phọ pọ, aPaul r’aMarco, oghaạph bọ oghol epẹ omhạn utuughạ ni ilọ ophamaghạn aloor abidị. Ooḅeghiọn kẹn eḍeenhaan onyọ umor dị anhuụn ghan aghạgh olhoghi mem dị rakiilhom moto, amhooghọgh ghan kẹn iiḅaghamhị r’awe. Odị aḍighi ika oolemhi ipẹ phọ? Odị aḅẹm mọ, “Mị uuḅereghị ghan agey torobọ aḍio. Mị aạl ghan rumhuoghaạph dị eghaạph ilọ ophamaghạn-aloor, aḅilhẹ akpạph aphạm riisi aBaibul dị kilhoghonhaạn imhị ḍighaạgh. Ghalhamọ r’iduọn mesighẹ bọ ni ibadị asiạ mị amhiigh bọ oḍighi iduọn phọ, eḅilhẹ ni ewạ dị mị kamiighom ghan torobọ aḍio r’aḍiitughiạn ophamaghạn aloor amhị. Ḅilhẹ kẹn nyiidiphọ mị raḅon ghan kụ k’aghị esi obọ mị kaḍighinhom ghan bọ ephirighan.”

Eeni amem yira ropiọm ghan ni ophamaghạn aloor ayira. Mem dị eḍighi iduọn phọ, reḍighi ghan ni umugholoor esi ayira oghaaphạn aZihova esi iiḅereghị. Kuolọ opọ ghụn kụ amem dị ekạr ekpẹ ooḅereghị. Esi iduọn phọ kpuḍian aaḅereghị aZihova mem mem mọ. Lọm nyodị osạr owilhenhaạn r’olhoghonhaạn aḍighaạgh, kụ akparaghạ oḍighi idị nạ ka/ḅulha mun aḍighi ipẹ phọ. (Ps. 51:9-11) AZihova ka/ḅitonhaạn ilọm mọ anạ ilọ osạr owilhenhaạn. (Ps. 102:17) Otelhedom mọ aJọn ughiọm ni iyira olhoghi mọ “iḅaạl phọ aJizọs Oọny phọ Enaạn kụ regbuurogh ghan ikarạph . . . phọ ayira keḅaalamị.” (1 Jọn 1:7; 2:1; Ps. 86:5) Eḍighi bọ edị aZihova aḅenhị rebenhẹ phọ odị mọ ku/gbạ ghan mem osạr ghan owilhenhaạn, pọ yira oḍuom ni olhoghi mọ odị ka/gbạ ghan mem osạr owilhenhaạn ayira.—Mat. 18:21, 22; Kọl. 3:13.

I/ḅeraạn aZihova mem mọ aMozis aroph bọ ophamaghạn aloor esi eẹny ekulha amem epẹ edalạ phọ. Ghalhamọ r’iduọn phọ ni aZihova asạr ri awilenaạn nyodị. Kụ Ekpo onhụ phọ Enhaạn ekaạph ilọ aMozis idiphọ oye omheeraam dị aḍighan elhegh. (Deut. 34:10; Hib. 11:24-28) AZihova o/mheera aMozis aḍigh aani De phọ Oguanhaan bọ, kuolọ odị kameera ni mọ aMozis aḍigh aani siphẹ ade phọ keḍighi bọ Paradais phọ, kụ angọ ghuḍum k’agee-pọ. Odọ aghisigh phọ opọ kụ rukori aani ni iyira, eḍighi maạr dị yira oghị ghisigh okparaghạ omhoọgh ophamaghạn-aloor.—1 Kọr. 9:25.