1. Eeghe iyaạr kụ edị aZihova maḍighinhaan torobọ onyọ ayira?

AZIHOVA kụ aḍur torobọ onyọ ayira alhoghomạ. (Jọn 6:44) Gbiom olhoghi idị ipẹ phọ remạ ghan. AZihova aaḅeghiọn bọ aphogh riisi eelạ awe phọ odi bọ oomo aḅirinhi phọ, amiịn ni eekiạ iyaạr loor anạ—eeḅi ekpom dị ketue ni epomhoghiạn nyodị. (1 Chron. 28:9) AZihova alegheri ni aḅilhẹ apomhoghiạn nyinhạ. P’eeghe idị iphẹn phọ ikparamhị iyira!

2. Ika kụ idị aZizọs ulhoghonhaạn iyira ḍighaạgh onhaghanhạn aḍiḅeraạn phọ aZihova amhoọgh bọ aru esi atorobọ ebenhẹ ph’Odị?

² AZihova amoọgh ni ogbolhomaam anạ r’abumor r’abumarani phọ. Oḍighi idị yira konaghanhạn iphẹn phọ, aZizọs atomaạm aZihova opoghom iyool. Eḍighi maạr dị 1 esi 100 iyool kụ aphe, opoghom mọ raḍighi ghan ika? Odị ‘kabilẹ esugha-dị r’esugha phọ epẹ aroogbolom mọ, akị awạ nyopọ aphe bọ.’ Mem dị opoghom mọ amhiịn oyool phọ, ra/kaghạm ghan olhoghi, rabo ghan ibo. Ephigh phọ pọ, torobọ oyool amạn ni maạr esi aZihova. AZizọs aḅẹm mọ: “I/ḅeraạn Odẹ phọ anyina odi bọ k’akẹ phọ lọ oniin ephurukpu onyọ abuẹn phọ kaphe.”—Mat. 18:12-14.

3. Yira kooḅeghiọn eeghe siẹn emhuoghaạph phọ ephẹn phọ?

³ Yira ko/wạ oḍighi idị r’oniin onyọ umor obobọ umarani kaḅonyonhu azuan. Ika kụ idị yira kokel oḍighi iyaạr dị kekọm idị abunhọn komeel? Ḅilhẹ yira koḍighi ika mem dị oye aḍighi idị repin esi ayira? Kopanyanhaạn sipuru phọ iphẹn phọ siẹn emhuoghaạph phọ ephẹn. Kuolọ ophụr olhegheri obughẹ ilọ ‘iphurukpu abuẹn’ phọ oghaạph bọ oghol siphẹ Matiu emhụ phọ 18.

4. Abuọ anhiạn kụ ‘iphurukpu abuẹn phọ’?

⁴ ‘Iphurukpu abuẹn phọ’ pọ oomo abutelhedom mọ aZizọs. Etigheri siạ phọ abidị, bidị okịgh idiphọ “ibạm anmụny” loor iduọn bidị omheera bọ mọ aZizọs atughemhị bidị. (Mat. 18:3) Ii, ghalhamọ r’iduọn eeni asidọl r’iḍighinhom araraạr ḅilhẹ r’eten phọ epẹ bidị ropogh ghan bọ raraạr egbaranhaạn bọ ni, oomo abidị omoọgh omheeraam okị esi aKraist. Kụ aKraist phọ kẹn, apomhoghiạn bidị agey.—Mat. 18:6; Jọn 1:12.

5. AZihova raloghoma ghan ika mem dị oye alher obobọ aḍighi idị kepin esi oniin ebenhẹ Odị?

⁵ Oomo ‘iphurukpu abuẹn phọ’ omạn ni maạr esi aZihova. Orue onhaghanhạn ipẹ Odị raloghoma ghan bọ, pọ tuutughiạn ipẹ yira rologhoma ghan bọ ilọ ibạm anmụny. Bidị omạn maạr esi ayira. Kụ yira rowạ ghan oghoph abidị loor esi dị bidị u/moọgh inyaạm, u/legheri iyaạr, ḅilhẹ olhoghi u/sụ idiphọ ikumor awe. Okạr oghaạph, yira ro/wạ ghan dị oye kaḍighi idị kepin olhoghi oye, kụ repin ghan kẹn iboom esi ayira—mem dị oye aḍighi obumoọny idị i/nighẹ. Iniin phọ kẹn ni, aZihova rawạ ghan oghoph ayira. Re/ḅaạl ghan olhoghi Odị mem dị oye alher obobọ aḍighi idị kepin esi oniin ebenhẹ Odị!—Isa. 63:9; Mạk 9:42.

6. Odaphạn 1 Korịnt 1:26-29, ika kụ idị aḅirinhi phọ omhiịn bumatuạn phọ aZizọs?

⁶ Eghẹn kụ enhọn eten dị abutelhedom mọ aZizọs oghịgh ‘iphurukpu’ ibạm anmụny? Ọ, abuọ anhiạn kụ edị aḅirinhi phọ romaghamhị ghan maạr? Araalhạ phọ, abudị oolheghaan, ḅilhẹ r’abudị omhoọgh iikpọ. Ḍieriphọ aḍighaạgh phọ, abutelhedom mọ aZizọs u/mạn maạr esi aḅirinhi phọ, oḍighi ‘iphurukpu’ ibạm anmụny. (Bạl 1 Korịnt 1:26-29.) Kuolọ aZihova o/mhiịn bidị idiphọ.

7. AZihova rawạ mọ yira olhoghoma ghan ika ilọ abumor r’abumarani phọ?

⁷ AZihova apomoghiạn ni oomo arebenhẹ phọ odị, mughumọ abudị mokumu ni nyodị esi ibadị asiạ obobọ budị purukụ oḍigh siẹn igey phọ. Oomo abumor r’abumarani phọ ayira omạn ni maạr esi aZihova, kụ omạn aani kẹn maạr esi ayira. Ewạ mọ ophomhoghiạn oomo ‘abuọ asiya phọ,’ ka/buniin bịn. (1 Pit. 2:17) Oḍighi oomo ilọ yira kotue oghoph r’oḍeenhaan abidị ogbolhomaam. Nạ alhegheri mọ nạ maḍighi idị repin esi oye, ka/ḍighi mudị iyaạr imite, bịn aatughiạn mọ eẹny iyaạr bịn repin esi odị, ḅilhẹ mọ kasạr ri awilhenhaạn nyinhạ. Uḍighi ika kụ abuniin ronuụn ghan bọ kophin olhoghi? Eeni loor emitenhom mọ abidị, abuniin opogh loor abidị bịn osooromhi. Buniin ke/bia oḍigh bọ siẹn igey phọ; kụ iḍighi kụ ko/lhegheri ilọ ophogh ghan e/munughan abunhọn. Toroboiperolbọ, oḍighi oomo ilọ yira kotue oolemhi araraạr. Ḍieriphọ aḍighaạgh phọ, oye dị iyaạr regbor ghan kephin esi odị alhegheri mọ epẹ phọ eḅoriạ eegharạ dị ewạ mọ odị awilhẹ. Bịn odị marue akelhọm eephọ olhoghi, aḅilhẹ amoọgh igey asiya r’abunhọn.

8. Eeghe eegharạ awe amem mọ aZizọs kụ itir aani butelhedom mọ aZizọs?

⁸ Eeghe kụ iḍighi kụ aZizọs aghaạph bọ ilọ ‘iphurukpu phọ abuẹn phọ’? Abutelhedom mọ kụ upuru nyodị mọ: “Anhiạn kụ aḍighi okaraghị ogbogh epẹ Omạr phọ k’Enaạn?” (Mat. 18:1) Ibadị aJu phọ mem mọ amuphẹ phọ, umhaghamhị ghan maạr igbogh asidọl. Oniin oye ituughạ igbogh arinyạ aḅẹm mọ: “Awe uphorogh ghan eghuan, ḍigbogh aḍien, oolheghaan, kuuḅi aghisigh r’eegu bịn tutụ omhugh.”

9. Eeghe kụ idị ewạ mọ abutelhedom aZizọs oḍighi?

⁹ AZizọs alhegheri ni mọ kewạ ni dị abutelhedom mọ kolọgh inyaạm oruphuron osighẹ siphẹ ekpom mọ abidị eegharạ iipikian phọ  olhegheriom bọ we aJu phọ. Odị aḅenhị bidị mọ: “Okaraghị ogbogh phọ siphẹ igbo phọ anyina katọl ghụn ni dọl obumoọny, ḅilẹ kẹn oḍiemiom mọ katọl idiphọ otelhedom.” (Luk 22:26) Yira kotue otọl dọl “obumoọny” mem dị yira osighenọm mọ abunhọn kụ upu iyira. (Fil. 2:3) Yira olhọgh inyaạm omhoọgh eegharạ phọ ephẹn phọ, yira ko/kạr ghan oḍighi idị kepin ilhoghi abunhọn.

10. Oghẹn oroma aPọl kụ idị ewạ mọ oseere olhoghi?

¹⁰ Oomo abumor r’abumarani phọ ayira osighẹ ni eniin iyaạr obobọ enhọn upuom iyira. Yira ogbon ghan imạ araagharạ phọ abidị pọ ke/kpạr olhegheri mọ bidị upu ni iyira. Esi iduọn phọ, ootughiạn ghan oroma phọ otelhedom mọ aPọl aroma bọ buọ aKorịnt mọ: “Anhiạn kụ aphoophe bọ nyoniin onyọ anyina apuemi buerị phọ? Enaạn kụ inyina i/ngọ bọ oomo araraạr phọ nyina emoọgh bọ ḍughụm? Kụ eru ni ruunmo, nyina ighol eeghe kụ rebaga ghan bọ?” (1 Kọr. 4:7) Ogona loor odẹgh ophogh oḍighi ghan idị awe kuuraraghiạn ghan iyira, obobọ ootughiạn ghan mọ yira kupu bunhọn. Eḍighi maạr dị onyọ umor amhaạr agey ongọ oghaạph obobọ umarani amhoọgh buboom awe dị ratughemhị ghan Baibul, pọ kuu/binyemhiom ghan ongọ ghan aZihova ḍisẹph phọ.

11. AZizọs aghaạph ghan eeghe siphẹ aḍidogh uw-emhạ phọ r’ebenhẹ phọ odị?

¹¹ AZizọs rophụr rurụ bumatuạn phọ odị mọ ku/ḍighi idị oye kameel, odị adogh ni ḍidogh uw-emhạ r’ebenhẹ odị. Uw-emhạ phọ awilhenhaạn ogbogh omhụgh dị ebenhẹ phọ u/tue ukpẹ. Onyebel roten, ebenhẹ phọ opọ phọ o/mheera owilhenhaạn aani onhọn ebenhẹ dị alhe aani oọny omhụgh odị. Eekunha phọ, uw-emhạ phọ alhọgh ni ikoli ebenhẹ phọ opọ u/meera bọ unmạ aani onhọn ighirigiir. AZizọs atughemhị ghan eeghe siẹn phọ? Odị aḅẹm mọ: “Idiphọ kẹn kụ edị Odẹ phọ amị odi bọ k’akẹ phọ kiḍighi inyina, eḍighi iyaạr dị nyina i/sạr ghan ikarạph ibilenaạn bunọn siphẹ iloghi phọ anyina.”—Mat. 18:21-35.

12. Ika kụ idị ketue etir bunhọn, eḍighi maạr dị yira u/meera usạr ubilhenhaạn bunhọn?

¹² Ezọ ebenhẹ phọ opọ phọ ingọ ni iiḅaghamhị bunhọn awe. Eḅẹl phọ, odị o/nmạ ighirigiir ophoriphọ ebenhẹ phọ, “asighẹ nyodị alọgh ikoli, mọ tutụ odị akpẹ omụgh phọ amadạn.” Edị etum siphẹ, eḍighinhom iyaạr phọ odị iphin ni ilhoghi abueriphọ arebenhẹ phọ. Mem mọ bidị omhiịn bọ ipẹ phọ, “iiḅaghamị ni bidị iboom.” Iniin phọ kẹn ni, iḍighinhom araraạr ayira retir aani ghan ni bunhọn awe. Ketọl ika, eḍighi maạr dị oye upiomạn iyira kụ yira u/meera usạr ubilhenhaạn? Eḅẹl phọ, kepin ni esi odị iduọn yira u/meera bọ usạr ubilhenhaạn, oḅitonaạn, ḅilhẹ u/ḍeenhaan bọ igbiririph. Edị etum siphẹ, kemoọgh ni idị ketọl esi abuọ ookpomhoghan phọ mem dị omhiịn mọ oye phọ r’anạ i/pomoghiạn.

13. Nạ atuughạ eeghe esi eḍeenhaan okọy eten phọ?

¹³ Yira r’abunhọn komooghọm ni suọ mem dị yira osạr owilhenhaạn bumor r’abumarani phọ ayira. Kụ ipẹ kụ idị emitenhaan oniin okọy eten dị oghol mọ Crystal. Onhọn onyọ umarani kụ aḍighi nyodị idị i/nighẹ siphẹ ookpomhoghan phọ. ACrystal aḅẹm mọ: “Igbagarạ ikpo onhụ phọ odị ighịgh ghan mudị ugim imhị elekẹ. Mị u/wạ ghan orelhean odị epẹ erugh phọ. Bịn oophugh phọ r’ibo phọ amhị epẹ erugh phọ emhiigh oophoọm.” ACrystal alhoghoma mọ enighẹ ni oghaghạm odị olhoghi. Kuolọ odị o/seeghị loor odị bịn orolọm ophin olhoghi phọ. Odị adaphạn ni oroma aBaibul phọ odi bọ siphẹ emhuoghaạph aWatchtower October 15, 1999, aḅẹm bọ mọ “Forgive From Your Heart.” Odị asạr ri awilhenhaạn umarani phọ. ACrystal  aḅilhẹ aḅẹm mọ: “Nyiidiphọ mị mamhiịn mọ oomo ayira rokparaghạ ghan ni okpologhiạn omhoom oye phọ torobọ aḍio, kụ aZihova rasạr ghan ni kuwilhenhaạn iyira. Ekịgh mudị useere imhị dool dị eemọr, ḅilhẹ ibo phọ amhị meḅulha.”

14. Odaphạn Matiu 18:21, 22, eeghe kụ iiḅaghamhị ghan otelhedom mọ aPita, kụ nạ atuughạ eeghe esi ophagharanhaạn phọ aZizọs?

¹⁴ Yira olegheri ni mọ enighẹ ni osạr ghan owilhenhaạn, pọ kụ iyaạr dị ekpẹ oḍighi. Kuolọ rekpạr ghan ni oḍighi iduọn phọ. Eeni otelhedom mọ aPita alhoghoma ghan ni iduọn phọ eeni amem. (Bạl Matiu 18:21, 22.) Eeghe kụ ketue elọgh ḍighaạgh? Eḅẹl phọ, tuutughiạn ghan kipekipẹ aZihova masạr ghan bọ awilhenhaạn nyinhạ. (Mat. 18:32, 33) Yira u/kpeanhạn dị odị kasạr ghan abilhenhaạn, kuolọ odị rasạr ghan kuwilhenhaạn iyira oopho bịn. (Ps. 103:8-10) Esi iduọn phọ, “otuụgh iduọn Enaạn iphomoghiạn bọ iyira kụ oniin aphomoghiạn ghan nyoniin.” Kụ iḍighi kụ osạr ghan owilhenhaạn i/ḍighi iyaạr dị oḅẹm mọ lọ eḅeraạn nyinhạ. Yira ole omhụgh osạr ghan owilhenhaạn abumor r’abumarani phọ ayira. (1 Jọn 4:11) Edị etum siphẹ, tuutughiạn ipẹ retọl ghan bọ mem dị yira osạr owilhenhaạn. Etue ni eloghonhaạn ḍighaạgh opọ upiomạn bọ iyira, eḅophoghị ookpomhoghan phọ, ekoph siya phọ ayira r’aZihova, eḅilhẹ iseere iyira dool ooḅaghamhiạn aloor. (2 Kọr. 2:7; Kọl. 3:14) Edị esughanham omhạn, kaaphạn esi iiḅereghị Opọ uḅenhị bọ iyira mọ osạr ghan owilhenhaạn phọ. Ka/meera aSetan aphuẹ eephọ phọ nạ rakelhọm bọ r’abumor phọ. (Efẹ. 4:26, 27) Yira omoghi ni olhoghonhaạn aḍighaạgh aZihova orue okpetenhaan aḍiphil phọ aSetan.

15. Odaphạn Kolosị 3:13, ewạ mọ oḍighi ika mem dị onyọ umor aḍighi iyaạr dị riiḅaghamhị iyira?

¹⁵ Nạ kaḍighi ika, eḍighi maạr dị onyọ umor aḍighi iyaạr dị reeḅaghamhị nyinhạ? Ḍighi oomo ilọ nạ katue oseere eephọ. Ḅenhị  aZihova okạr ipẹ nạ alhoghoma bọ. Ḅenhị aZihova alhoghonhaạn ḍighaạgh nyophọ apiomạn bọ nyinhạ ḅilhẹ mọ aḍighi idị nạ kamiịn ghan imạ araagharạ oye phọ—raagharạ phọ ipẹ odị aZihova atụ bọ kụ aphomhoghiạn oye phọ. (Luk 6:28) Eḍighi maạr dị nạ u/tue ubulha ipẹ onyọ umor phọ aḍighi bọ, pọ tuutughiạn eten dị nạ kateẹny nyodị akaaphạn. Kenighẹ ni dị nạ kaatughiạn ghan mọ onyọ umor phọ o/lhegheri kụ aḍighi. (Mat. 5:23, 24; 1 Kọr. 13:7) Mem dị nạ rakaaphạn nyodị, ka/ḍighi idị kekịgh mudị odị alhegheri ni kụ aḍighi. Kokaạph ika eḍighi maạr dị odị u/wạ eephọ? Kiọm ghisigh ‘amhinoghọm ghan nyodị.’ Nyinhạ ki/phẹr okparaghạm ghan odị. (Bạl Kolosị 3:13.) Edị ekạr emhạn maạr, ka/kaghạm nyodị olhoghi, obọ kelọgh ghan bọ siya phọ anạ r’aZihova esi iiḅaghamhị. Ka/meera iyaạr elher nyinhạ. Nạ aḍighi iduọn phọ, pọ nạ raḍeenhaan ghan mọ nạ apomhoghiạn aZihova apuemhi torobọ iyaạr.—Ps. 119:165.

16. Oghẹn kụ oḍighi dị torobọ onyọ ayira amhoọgh?

¹⁶ Yira omaghamhị ni maạr eepoogh oḅophoghạn okumuan idiphọ aḍiniin “aḍita” eeḍiạn “oniin opoghom”! (Jọn 10:16) Aḍinyạ phọ Organized to Do Jehovah’s Will, ipoḍi phọ 165, eḅẹm mọ: “Omhooghọm aani asuọ muḅọph phọ amuẹn phọ, pọ nạ amoọgh aani ni oḍighi omhaạr ophạm.” Esi iduọn phọ, ewạ mọ “otuughạ idị yira komiịn ghan bumor r’abumarani phọ ayira idiphọ aZihova amhiịn bọ bidị.” Oomo ayira oḍighi “iphurukpu” ibạm anmụny dị omhạn maạr esi aZihova. Nạ amiịn aani ni idiphọ bumor r’abumarani phọ anạ ḍughụm? AZihova amiịn ni aḅilhẹ amaghamhị maạr torobọ ilọ nạ aḍighi olhoghonhaạn abidị ḍighaạgh r’omhaạr ophogh abidị.—Mat. 10:42.

17. Yira osopha oḍighi eeghe?

¹⁷ Yira opomhoghiạn ni bumor r’abumarani phọ ayira. Esi iduọn phọ, osopha owilẹ oḍighi idị onyọ asiya ayira “kakpeteghaan, ḅilẹ keḍighi dị odị kameel aḍighanaan ikarạph.” (Rom. 14:13) Osighenhọm ghan kepẹ ekpom mọ ayira mọ abumor r’abumarani phọ ayira kụ upu iyira. Ku/meera iyaạr ilher iyira. Kparipẹ ghụn, osaḅạr “oḅạm iloghi ayira esi araraạr phọ resighẹ ghan bọ eephọ kụ keru, eḅilẹ bọ reloghonaạn ghan ḍighaạgh okparamiọm awe.”—Rom. 14:19.