Umhạr imhị May 19, 1940, egbogh emhạ dị oghol mo Amioûn, epẹ Lebanon. Iyạl ikpo asiạ reten, bịn eghunotu ayoor oḍuạ oghel epẹ Tripoli. Epẹ kụ idị uukonhom imhị r’ephomhoghiạn, r’oḅaạl olhoghi eghunotu dị olhegheri oḅilhẹ ophomhoghiạn aZihova Enhaạn phọ. Yoor oḍighi oogh, iyạl alhephiri r’iraạr anmanyaạn kụ mị kụ obạm. Odẹ r’onhiin ayoor u/sighẹ owạ ikpoki kụ oḍighi eḅẹl, kuolọ ituughạ aBaibul, oghị ghan ituughạ, ḅilhẹ r’olhoghonhaạn awe ḍighaạgh olhegheri Enhaạn kụ iḍighi eḅẹl.

Ibadị abumor dị omhoọgh oḍuomolhoghi ogheel k’akẹ urọl li ookpomhoghan phọ ayoor. Oniin pọ aMichel Aboud, opọ aphạm ghan bọ ituughạ aBaibul ookpomhoghan phọ oghol ghan bọ mọ book study. Odị asighẹ igey phọ asiemhi Lebanon iḅẹl asiạ phọ edaphạn bọ 1920, odị alhegheri igey phọ epẹ New York. Mị raatughiạn ghan ni eten olhọgh eegu r’olhoghonhaạn aḍighaạgh phọ odị angọ ghan bọ iyạl iḍoọgh abumarani dị oghị askul aGilead—Anne r’aGwen Beavor. Bidị uḍighi igbogh arighirị ayoor. Ibadị asiạ reten, olhoghi amhị aḅaạl li agey omhiịn Anne epẹ United States. Onyebel roten, mị aḅilhẹ aazuanhaan Gwen, kụ odị m’aạl onyọ umor dị oghol mọ Wilfred Gooch kụ bidị rokumuan ghan epẹ olạ agadạ phọ aLondon, England.

Mem mọ mị aḍighi bọ onyọ iḍoọgh, iphurukpu Abugbaanhaạn bịn kụ urọl ghan Lebanon. Kuolọ r’oophugh, yoor ughaạph ghan ni ilọ aBaibul phọ oḅenhị we. Yoor ughiọm ni ghisigh etigheri isophoghom abuḍiemhiom aruukụ iiḅereghị phọ. Araraạr edi ni dị emite dị mị u/bula.

Ḍiniin aḍio, umarani amhị Sana r’amhị odi rokaạph dom aBaibul phọ oniin otu anyụ, bịn oniin oḍiemhiom ekụ iiḅereghị aḍuạ aru siphẹ eedaneẹn phọ yoor odi bọ. Eeni oye kụ amhạgh nyodị. Bịn amhiigh ootuuny umarani phọ amhị, anyạ ilọ elhebiri bịn anyu Sana bịn aSana amheel aḍighima iyaạr. Oniin oye amhạgh ni buọ iḍiil, omhiịn mọ ologhonhaạn Sana ḍighaạgh. Abuọ iḍiil phọ usighẹ ni oḍiemhiom ekụ iiḅereghị phọ oghimọm epẹ otu oḍighi phọ abidị, eekunha phọ bidị umhiịn kẹn mọ oye phọ ophọn phọ apạm laagbạ. Ogbogh onyọ abuḍiil phọ apuru nyodị mọ: “Nạ eeghe oye? Nạ oḍiemhiom ekụ iiḅereghị obobọ nạ oḍiemhiom ikarạph anmụny ḍughụm?”

Enhọn iyaạr dị eḅilhẹ emite dị mị ka/tue abula pọ amem dị ookpomhoghan ayoor oḍigh moto oghị ekpisi dị edi sạm oghaạph iiḅi iinhaghạn phọ. Obọ oḍighi phọ ayọ ni imạ rakị, bịn oniin oḍiemhiom ekụ iiḅereghị ekpisi phọ aakpomhoghi we bịn omhiigh ooḅaghamhị ayoor, uroḅol iyoor ikpo, dị tutụ oḍighi odẹ amhị iyaạr. Mị ka/bula iḅaạl phọ emite bọ ghisigh odị. Odị aḅulha ni epẹ amoto phọ r’onhiin ayoor. Loor iduọn oḅio ayoor u/pọ bọ, oomo phọ ayoor udạph aani ni bidị. Toroboiperolbọ, mị ka/tue abula ikpo onhụ dị onhiin ayoor aḅạ, odị aḅẹm mọ: “Seseeny Zihova, sạr ikarạph abidị awilhenhaạn. Bidị u/legheri iphẹn bidị roḍighi bọ.”

Ḍinhiin aḍio kẹn dị yoor oghị emhạ ayoor ophogh asiya ayoor. Oniin oḍiemhiom ekụ iiḅereghị dị aalheghaan, abishop, aru ni ophogh ogbogh odẹ ayoor. Abishop phọ alegheri mọ odẹ r’onhiin amhị Abugbaanhaạn AZihova. Odị umhạgh ni imhị amiteom, mem mọ opọ phọ mị mamhạn odiiny asiạ. Kụ odị upuru imhị mọ “eeghe kụ iḍighi kụ nạ ko/ḍiiny bọ muụm?” Mị aphagharanhaạn nyodị mọ mị oḅumoọny ni bịn ḅilhẹ mọ orue oḍiiny amuụm pọ mị kapụr amoọgh olhegheri iyaạr aBaibul phọ r’omheeraam dị akpạr. Iduọn ophagharanhaạn phọ amhị u/ḅeraạn bọ nyodị bịn aḅenhị ogbogh odẹ phọ amhị mọ mị u/lọgh nyodị eegu.

Iphẹn phọ iniin ikarạph araraạr dị imitenhaan imhị. Toroboiperolbọ, awe aLebanon omaạr osighẹ awe righirị r’oghuraam awe. Esi iduọn phọ, yoor ughelhọm ni ooḅeghiọn ghan aBaibul phọ r’awe, oḅilhẹ omhoọgh ibadị awe otughemhị aBaibul.

Mem dị mị odi ni otu askul, oniin oḍoọgh onyọ umor dị aḍuạ Venezuela aru Lebanon, amhiigh ni oru ookpomhoghan ayoor. Bịn aru alhegheri umarani amhị Wafa. Idiphọ esighẹ bọ rekị bịn bidị aalhạn, kụ bidị ogheel Venezuela. Umarani phọ amhị Wafa agẹ ni ḍinyạ aruom odẹ amhị mọ odị rawạ mọ oomo eghunotu phọ ogheel Venezuela. Odị aḍighi iduọn phọ loor iduọn inyaam ayoor resiph bọ nyodị. Eekunha phọ, yoor usopha ni oḍighi ipẹ odị rawạ bọ!

 Yoor usi Venezuela lhạ phọ 1953, yoor urugh epẹ Caracas, esi phọ etuman marugh odaạm eelhe phọ. Idiphọ oḍoọgh, olhoghi amhị aḅaạl ghan ni omhiịn mem dị odaạm eelhe phọ raten r’imạ asimoto phọ odị. Kuolọ, ikparanhaạn ni odẹ r’onhiin amhị oluạn emhoom eelhe phọ, onhụ phọ, eḍighinhom iyaạr, eḍien phọ, ḅilhẹ r’okuaḍio phọ. Okạr oghaạph, amem mọ bidị omhiigh bọ oluạn ekpisi phọ kụ edị iyaạr dị yoor u/seere olhoghi emite.

Odẹ amhị amhiigh oorurughiạn. Iphẹn phọ iḍighi ni iikia esi ayoor loor esi dị odị oo/rurughiạn ghan, odị amhoon loor agey. Okạr oghaạph yoor uu/tughiạn ḍio dị odị amheel e/moon. Kụ owaaghị omhiịn mọ odị amoọgh kansạ, bịn aạny nyodị. Dị eeph ni iboom, awiki roten bịn odị amhugh.

Anem ke/tue ekaạph ipẹ yoor olhoghoma bọ. Mem mọ opọ phọ mị amạn 13 asiạ bịn. Yoor uu/tughiạn mọ odẹ ayoor kamugh, kụ ighịgh mudị aḅirinhi ayoor masi eekunha. Eḅẹl amem mọ, ikparanhaạn ni onhiin ayoor omheeraam mọ olom mọ odị mamhugh. Toroboiperolbọ, yoor uru ni omhiịn mọ ewạ ni dị yoor kopogh okiọm ghisigh, kụ r’olhoghonhaạn aḍighaạgh aZihova yoor urue ni okparạm. Mị r’omhạn 16 asiạ, bịn mị amhạn sekondrị skul epẹ Caracas. Mị ukạr amhoọgh eephuạ obakị aani eghunotu phọ ayoor.

Idiphọ amem mọ rekị bọ, umarani phọ amhị Sana aạl li onyọ umor dị oghol mọ Rubén Araujo, dị maghị ni Gilead School aḅula Venezuela. Bidị usopha ni oḅula epẹ New York. Mem mọ eghunotu phọ ayoor osopha bọ mọ mị kakị aani ogbogh askul, bidị usopha ni mọ mị katọl r’abidị epẹ New York kụ akị askul phọ. Umarani phọ amhị r’olom mọ odị ukạr kụ ulhoghonhaạn imhị ḍighaạgh oḍuraan otuman aZihova, mem mọ mị arọl bọ r’abidị. Oḅarạm isiẹn, ibadị abumor dị osi omhanhanhaạm urọl li siphẹ ookpomhoghan phọ ayoor Brooklyn Spanish. Iyạl abudị mị alhegheri aḅilhẹ asereghiạn pọ Milton Henschel r’aFrederick Franz; Iyạl phọ abidị ukumuan ghan epẹ Betẹl aBrooklyn.

Reteẹny bọ mem mọ mị kamạn bọ ḍiḅẹl alhạ ogbogh askul phọ mị rakị bọ, mị umhiigh ni ootughiạn ipẹ mị raḍighinhom bọ ghuḍum mọ amhị. Mị m’aạl li aḅilhẹ amiigha loor agbirima ilọ arumhuoghaạph dị eghaạph ilọ aKristẹn dị ophorogh imạ asiigbu siẹn arukumuan phọ aZihova, siphẹ aWatchtower phọ. Mị umhiịn ni odọ oḅaạl olhoghi dị abukọy eten r’abudị rokumuan betẹl omhoọgh siphẹ ookpomhoghan phọ ayoor, kụ mị ukạr kụ awạ orọl aani idiphọ abidị. Kuolọ, mị muụm ko/ḍiiny. Mị ulhegheri ni mọ ekạr emạn maạr dị mị kaḅọgh ghuḍum amhị angọ aZihova. Kụ mị uḍighi ni iduọn phọ aḅilhẹ aḍiiny muụm March 30, 1957.

Mị mogbatạn ephigh edạ phọ epẹ phọ, bịn mị aḅilhẹ amhiigh ootughiạn ilọ ogbatạn enhọn emạ edạ—oḍigh arukumuan oomo amem mọ. Mị ukạr kụ awạ oḍighi onyọ okọy eten, kuolọ mị umhiịn mọ ipaanhaạn ketọl li. Mị kapamanhạm bọ ika rukumuan askul phọ r’arukumuan epẹ erugh phọ? Mị ugẹ ni ibadị arinyạ aghiọm onhiin amhị r’abumor amhị ilọ ipẹ mị masopha bọ owilhẹ ogbogh askul phọ oḅula epẹ Venezuela okọy eten.

Mị uḅula Caracas June 1957. Kuolọ mị umhiịn mọ eghunotu phọ ayoor u/lo ḍigey adọl. Bidị omoghi  olhoghonhaạn aḍighaạgh oye dị kamiteom ghan ikpoki siphẹ otu phọ. Ika kụ idị mị katue alọgh ḍighaạgh? Ungọ ni imhị oḍighi abạnk, kuolọ mị ukạr kụ awạ okọy eten. Loor esi dị, pọ kụ iyaạr phọ mị atụ bọ aḅula. Mị ulhọgh ni inyaạm omhiịn mọ mị aḅạr iyạl phọ idị aḍighi. Esi ibadị asiạ, mị uḍighi ghan oḍighi abạnk phọ aḅilhẹ akọy ghan eten. K’ekulha mị ko/kumuan ghan rukumuan obobọ omhoọgh odọ oḅaạl olhoghi dị alheeny iduọn!

Ibo phọ amhị ibụgh ni mem mọ mị aphin bọ Sylvia, omạ onyọ umarani olọ aGermany dị aphomhoghiạn agey aZihova. Odẹ r’onhiin odị kụ uphạm nyodị orighelhom Venezuela. Eekunha phọ, yoor umhoọgh ni iyạl ibạm anmụny Michel (Mike), r’onyanhị phọ ayoor, Samira. Onhiin ayoor aḅilhẹ arigheel k’amhị. Ghalhamọ r’iduọn mị awilhẹ bọ oḍighi okọy eten phọ amhị orue ophogh eghunotu phọ, mị ughị ni ghisigh aphamhanhạm oḍighi iphelhegbeel phọ. ASylvia r’amhị usighẹ ghan ni okọy eten ekulha amem mọ torobọ amem dị ungọ iyoor ophooghian.

Ibạm anmụny amhị ko”righeel askul mem mọ mị aghaạph bọ ipẹ mị aghaạph bọ emhiighom mọ. Okạr oghaạph adọl amhị iitọl li, awe ulhọgh ni imhị eegu siphẹ oḍighi abạnk phọ ayoor. Kuolọ, mị uwạ ghan ghụn dị bidị kumhiịn imhị idiphọ ebenhẹ aZihova. Iitughiạn phọ mị amhoọgh bọ ḍio phọ aḍiphẹ phọ i/ḍuạ olhoghi amhị. Esi iduọn phọ, anhịr amhị r’amhị urọl li ude oopuruan ilọ ikpoki phọ ayoor. Eḍighi maạr dị mị awilhẹ oḍighi abạnk phọ amhị, kụ ukpẹ ni imhị iboom ikpoki ogheelhom. Kụ loor iduọn yoor u/le bọ omhụgh, yoor uru ni omhiịn mọ eḍighi maạr dị yoor odughe dọl aghuḍum mọ ayoor pọ ikpoki phọ yoor momhoọgh bọ ketue ni ilhoghonhaạn iyoor ḍighaạgh.

Osopha phọ ophọn phọ iyoor u/dughanhaan, kuolọ ooḅi anhịr phọ amhị ḅilhẹ r’onhiin phọ amhị ubakị ni imhị. Esi iduọn phọ, mị uḅilhẹ ni amhiigh rukumuan oomo amem mọ. Olhoghi amhị akạr kụ aḅaạl! Obọ arukumuan phọ rekị ni imạ. Kuolọ i/bia bịn yoor onhaghạn iinhaghạn dị yoor u/seere olhoghi.

Ḍiniin aḍio oyil arookonhom ayoor uḅenhị ni iyoor mọ aSylvia masoph eghun. Okạr agey yoor u/seere olhoghi! P’eeghe ibo; kuolọ, mị uutughiạn ni edạ phọ mị rawạ bọ ogbatạn phọ—oḍighi okọy eten. Ika kụ idị iphẹn phọ ketir osopha phọ ophọn phọ? Yoor u/toph mem bịn yoor ooḅenhion iitughiạn phọ ayoor ḅilhẹ r’eten phọ epẹ yoor olhoghoma bọ, kụ yoor omhiigh ophogh oghiọm aghisigh omhoọgh oḅumoọny phọ. Kuolọ kokaạph aani ika ilọ ipẹ mị magbiighi bọ oḍighi?

 Yoor rooḅeghiọn siigbu phọ ayoor, yoor usopha ni ophamhanhạm ipẹ yoor mosopha bọ. Umhạr oọny phọ ayoor Gabriel unwanyụ April 1985. Toroboiperolbọ, mị uwilhẹ ni oḍighi abạnk phọ aḅilhẹ amhiigh okọy eten opọ oomo amem mọ June 1985. Esighẹ rekị bịn, mị aḍighi aani oniin olọ ekụ phọ ropogh bọ Olạ Agadạ phọ. Kuolọ olạ agadạ phọ o/lho ghan epẹ Caracas, esi iduọn phọ iwạ mọ mị uḍuạ ghan olhoghotu ukị, ḍikẹl dị remạn ni 50 itobi (80 km) iyạl obobọ iraạr aḍio wiki phọ

Olạ agadạ phọ arọl epẹ La Victoria. Esi iduọn phọ, idiphọ eghunotu yoor usopha ni ogheel epẹ La Victoria, etuman bọ olạ agadạ phọ. Ophọn phọ k/oọny osopha. Mị akạr kụ rasereghiạn eghunotu phọ amhị esi olhoghonhaạn aḍighaạgh phọ bidị ungọ bọ imhị. Ezọ phọ abidị ikạr kụ ingọ imhị ogbogh olhoghonhaạn aḍighaạgh. Umarani phọ amhị Baha amheeraam ni omhiigh ophogh onhiin phọ amhị. AMike maphin anhịr, kuolọ aSamira r’aGabriel urọl li r’ayoor mem mọ amuphẹ phọ. Esi iduọn phọ, ogheel aLa Victoria imạ mọ yoor kobilhẹ ni righirị phọ ayoor epẹ Caracas. Ḅilhẹ kẹn, iwạ mọ ooḅi anhịr phọ amhị Sylvia aphironhom orọl ebạm emhạ kparipẹ r’egbogh emhạ phọ odị arọl ghan bọ. Kụ oomo phọ ayoor utuughạ ilọ orọl obạm otu. Ii, oomo phọ iphẹn phọ kụ aradạ dị yoor ogbariọn orue oḍuạ aCaracas ogheel La Victoria.

Toroboiperolbọ, onhọn onmia aḅilhẹ ni amite. AGabriel aphin anhịr, kụ aSamira arugh ḍiodị. Umhạgh ni Sylvia r’amhị oghị okumuan epẹ Betẹl lhạ phọ 2007, emạ eepoogh dị yoor rokelhọm ni k’arodon. AMike, oḅẹl oọny phọ ayoor, maḍighi okumor oye ookpomhoghan, kụ odị r’anhịr odị Monica rokọy kẹn eten. AGabriel kẹn ni maḍighi okumor oye ookpomhoghan, kụ odị rakumuan ghan epẹ Italy r’anhịr odị Ambra. ASamira, rakọy ghan eten kaḅilhẹ alhoghonhaạn ḍighaạgh rukumuan aBetẹl.

Ii, mị masopha ni ibadị osopha kirokirọ dị emhạn maạr siẹn aghuḍum mọ amhị. Mị u/loghoma saị. Kụ eḍighi maạr dị mị amhoọgh eniin phọ eepoogh phọ, mị kabilhẹ ni asopha iniin phọ osopha phọ. Mị asereghiạn ni agey rukumuan phọ mị makumuan bọ r’aroopoogh phọ mị mamhoọgh bọ siẹn arukumuan phọ aZihova. Esi ibadị asiạ, Mị mamhiịn idị emhạn maạr ophamhanhạm asiya dị ekpạr r’aZihova. Mughumọ osopha kirokirọ phọ ayira aḍighi obạm obobọ ogbogh, aZihova katue ni ungọ iyira eephọ phọ “epel bọ dị oye katue alegheri.” (Fil. 4:6, 7) ASylvia r’amhị rokelhọm ni rukumuan phọ ayoor siẹn Betẹl, kụ yoor ologhoma ni mọ aZihova asẹph ni osopha kirokirọ phọ yoor osopha bọ, loor esi dị torobọ osopha dị yoor osopha yoor uutughiạn ghan ni aZihova.