IBADỊ olegheri ni iphirigba phọ eghaạph bọ mọ ukạn Zizọs anyụ oreeny igbo iyạl abusoroghuom iilhogh. (Mat. 27:35-38) Kuolọ ibadị rogbakiạn ni ipẹ aBaibul phọ aghaạph bọ mọ uukolhobian ni loor phọ aZizọs oghị oḍi olhoghi oḍi.—Mạk 15:42-46.

Abuniin awe dị ootughiạn mọ oghaạph aGospel phọ o/ru inẹ, rogbakiạn ghan mọ oye dị osophonhaan erugh aḍuugh kụ okạn anyụ oreeny u/ḍi ghan mugey amaḍi, olhoghi oḍi. Mọ kparipẹ ghụn uzoọm ghan kirọ odọ eten. Aḍinyạ iinhaghạn Smithsonia dị oye dị ragẹ ghan iinhaghạn dị oghol mọ Ariel Sabar agẹ, ekaạph ni ipẹ eḍighi bọ kụ bidị omheeraam bọ iduọn phọ, odị aḅẹm mọ: “Okạn oye loor oreeny iḍighi ghan ilioghọm dị olhiọm ghan we dị osoor ogbogh olhogh siphẹ eelhe phọ. Abuniin awe dị olhegheri iyaạr oḅẹm mọ eḍighi rigilaạm omheeraam mọ awe aRom komeera ni mọ oḍi odọ oye dị arọl idiphọ mugey amaḍi.” Abuọ aRom ugilaạm ghan iḍim awe dị osophonhaan erugh aḍuugh, esi iduọn phọ, iḍim mọ ipẹ phọ uwilhẹ ghan siphẹ oreeny phọ dị inhụn kebạ. Kụ eeni onyebel roten kụ osighẹ okị otebeeny ekarạph eḍum.

Toroboiperolbọ, idị oguphogh ude owaaghị omhiịn eḍeenhaan ni idị egbatanhaạn ilọ abuniin aJu dị osophonhaan erugh aḍuugh. Lhạ phọ 1968, uguph ni oḍighiron oye dị oghiigh oḅẹl okuron asiạ phọ. Uḍighiron oḍi okạr eghunotu abuọ aJu dị atuman Jeruselem. Iḅararạ phọ irọl esi obobọ olhoghi igbe dị rosereghi ghan iḅararạ awe dị momhuughu. Oḅararạ eeghim mọ arọl aani ni siphẹ phọ. Ukanhạm oḍugh dị ramạn ni ḅarazụ oḅaraghiọm opoḍi oreeny. ASabar aḅẹm mọ, “eeghim mọ iḍighi eeghim oye dị oghol mọ Yehochanan. Kụ iphẹn phọ melhoghonhaạn ḍighaạgh oolemhi ipẹ oogbaghanhaạn ghan bọ mọ igẹ aGospel phọ ilọ amaḍi phọ aZizọs i/tu inẹ.” Eḍighan ni elhegh mọ, “eeghim mọ aYehochanan eḍighi eḍeenhaan oye dị okạn aani loor oreeny oghiigh mem mọ aZizọs dị abuọ aRom mọ omheera mọ oḍi ni maḍi abuọ aJu phọ.”

Awe omoọgh ni iitughiạn kirokirọ ilọ eten phọ okạn bọ Zizọs siphẹ oreeny phọ, loor oḅararạ eeghim mọ aYehochanan. Kuolọ iyaạr dị eegholhaan siẹn phọ pọ, uḍi ghan ni buniin awe dị osophonhaan erugh aḍuugh, u/sighẹ ghan bịn ukị u/tebeeny ekarạph eḍum. Eegholhaan ni mọ ipẹ aBaibul phọ aghaạph bọ ilọ ipẹ oḍi bọ Zizọs mugey amaḍi siphẹ oḍi phọ etu ni inẹ. Eḍeenhaan phọ ephẹn phọ bidị owaaghị bọ omhiịn ebakị ni ipẹ aBaibul phọ aghaạph bọ.

Edị emhạn maạr epelhom, aZihova aghaạph ni mọ koḍi Zizọs oḍi oolhạ, kụ oye ka/tue asophoghom ekpo onhụ phọ Enhaạn omhunhughan.—Isa. 53:9; 55:11.