Abuọ aLivai dị u/ḍighi aani bupinyọn rikiạ phọ, umhoọgh ni inhọn iiḍighi dị oḍighi ghan, oniin pọ okori ghan otu iiḅereghị phọ mudị abuọ iḍiil. Uw-emhụ abukoriom otu iiḅereghị phọ kụ angọ ghan bidị itọ. Ogeọm arinyạ olọ aZu dị oghol mọ Philo, aghaạph ilọ oḍighi abukoriom mọ, mọ: “Buniin [aLivai] phọ abuẹn phọ umheraghạ ghan siphẹ arunhụ-aḍibuo phọ idiphọ abukoriom ariḍighom mọ, buniin umereghạ ghan [epẹ otu iiḅereghị phọ] epẹ esomanhan phọ, osophoghom atorobọ oye dị apikimạ rawạ oḍigh eten dị i/kpeanhaạn mughumọ alegheri obobọ o/lhegheri. Buniin urọl ghan ḍikoru dulhe, buniin ootaany, orelhe ghan okitonhom otu iiḅereghị phọ, ogon ghan”

Abukoriom mọ abuẹn phọ, ulhoghonhaạn ghan ḍighaạgh ikpolhọm awe aSanhedrin phọ. Abuẹn phọ bịn kụ awe aZu dị itooghị aRom emheera mọ ophạm reenemạ.

Oniin oye dị atuughạ Baibul phọ dị oghol mọ Joachim Jeremias, aḅẹm mọ “eḍighi maạr dị abukoriom Otu iiḅereghị phọ kụ oru osiph aZizọs, pọ mekạr eegholhomhi ikpo onhụ igilaạm mọ odị aḅạ bọ mọ, ḍio etum ḍio, m’onọ arọl ghan ni siphẹ Otu iiḅereghị phọ atughemhị ghan kụ nyinọ u/siph. (Mat. 26.55).” Oye phọ amheeraam kẹn ni mọ abuphẹ orom bọ oghị osiph aZizọs iphodiphọ amem mọ uḍighi kẹn ni bukoriom otu iiḅereghị phọ. (Jọn 7:32, 45, 46) Ḅilhẹ kẹn, ikpolhọm awe aSanhedrin urom ni bukoriom mọ r’uw-emhụ phọ abidị m’oghị osiphi bumatuạn phọ aZizọs orumom siphẹ aSanhedrin phọ, kụ eeni kẹn abukoriom otu iiḅereghị phọ kụ ughoghọgh bọ otelhedom mọ aPọl omiteom siphẹ otu iiḅereghị phọ.—Iiḍighi 4:1-3; 5:17-27; 21:27-30.