EMHUOGHAẠPH ITUUGHẠ PHỌ 10
Ephomhoghiạn R’osereghiạn AZihova Kụ Renyu Ghan Oye Oḍiiny Amuụm
“Eeghe kụ kemirighan bọ nyinạ [oḍiinye] aani amị?”—IIḌIGHI 8:36.
AḌUỌR PHỌ 37 Serving Jehovah Whole-Souled
OGHAẠPH OOKARAGH *
1-2. Odaphạn Iiḍighi 8:27-31, 35-38, eeghe kụ inyu bọ oye olọ Etiopiạ phọ oḍiiny amuụm?
NẠ RAWẠ ni oḍiiny amuụm oḍighi aani onyọ amatuạn aKraist ḍughụm? Ephomhoghiạn r’osereghiạn menyu ni ibadị oḍiiny amuụm. Ooḅeghiọn eḍeenhaan oye dị akumuan ghan angọ ukueni phọ Etiopiạ.
2 Oye olọ Etiopiạ phọ oo/binyemhiom oḍiiny amuụm loor esi ipẹ odị atuughạ bọ siphẹ aBaibul phọ. (Bạl Iiḍighi 8:27-31, 35-38.) Eeghe kụ inyu bọ nyodị oḍighi iduọn phọ? Eegholhaan ni mọ odị asereghiạn Ekpo onhụ phọ Enhaạn; odị aạl ghan elhegh Isaiah idiphọ odị aḍigh bọ oghuugh eghạm mọ odị aḍuạ Zeruselem raḅula Etiopiạ. Mem mọ aPhilip ateẹny bọ nyodị aghaaphạn, oye phọ asereghiạn ni ipẹ aZizọs maḍighinhaan bọ nyodị. Eeghe kụ iḍighi kụ oye phọ ophọn phọ aghị bọ aZeruselem? Aloor esi ephomhoghiạn phọ odị amhoọgh bọ aghị esi aZihova. Yira ulegheri ika? Odị aghị ghan aZeruselem ooḅereghị aZihova. Oye phọ ophọn phọ mawilhẹ ekụ iiḅereghị phọ dị aghị ghan bọ k’eghoroghọr, akị aḍighan egina eelhe phọ rooḅereghị ghan bọ egey Enhaạn phọ. Eniin phọ ephomhoghiạn phọ odị esi aZihova kụ iḍighi bọ iyaạr phọ dị agbatạn bọ enhọn edạ dị emhạn maạr, esi oḍiiny amuụm oḍighi aani onyọ amatuạn aKraist.—Mat. 28:19.
3. Eeghe kụ ketue esophoghom oye oḍiiny amuụm? (Miịn igbe phọ “ Eeghe Kụ Edi Siphẹ Ekpom Mọ Anạ?”)
3 Ephomhoghiạn aZihova ketue ni enyu nyinhạ oḍiiny amuụm. Kuolọ ephomhoghiạn kẹn ketue ni esophoghom nyinhạ oḍiiny amuụm. Ika? Omhiịn iniin areḍeenhaan. Eeni nạ atue ni apomoghiạn iboom buọ eghunotu anạ r’arighirị anạ, bịn amiigh ooḅaghamhiạn aloor mọ bidị kolhọgh nyinhạ ḍien eḍighi maạr dị nạ aḍiiny muụm. (Mat. 10:37) Obobọ eeni nạ atue ni apomoghiạn iboom roozọ dị Enhaạn elhọgh ḍien, kụ ekparanhaạn nyinhạ iboom owilhẹ yogh. (Ps. 97:10) Obobọ eeni k’eghoroghọr anạ n’ulheeghiyogh ghan rayaạl aḅilhẹ ghan adạph iḍighinhom araraạr ekpisi anyinha dị reeseeny ghan ikarạph aruukụ iiḅereghị. Eeni nạ ughelhọm ghan agey iḍighinhom araraạr phọ ipẹ phọ. Kụ loor esi iduọn phọ, ekparanhaạn nyinhạ owilhẹ yogh iḍighinhom araraạr phọ ipẹ aZihova i/ḅeraạn bọ. (1 Kọr. 10:20, 21) Bịn mewạ mọ puruan loor anạ mọ, “eeghe obobọ anhiạn kụ edị mị aphomhoghiạn apu?”
EPHOMHOGHIẠN DỊ EMHẠN MAẠR EPELHEGHIOM
4. Eeghe kụ ekpanhạ iyaạr dị kenyu nyinhạ oḍiiny amuụm?
4 Emoọgh ni ibadị araraạr dị emhạn maạr agey dị ewạ mọ pomoghiạn aḅilhẹ asereghiạn. Esi omaạm, nạ uphụr ri amhoọgh ḍiḅeraạn aghị esi aBaibul phọ kụ agbi bọ omhiigh otuughạ ghan r’Abugbaanhaạn AZihova. Kụ eeni kẹn nạ uphomhoghiạn ni Zizọs. Nyiidiphọ nạ malhegheri bọ Bugbaanhaạn AZihova, eeni keḅeraạn ni nyinhạ ooḍikuan abidị. Kuolọ nạ ka/tuạn mọ nạ apomoghiạn imạ araraạr phọ iphẹn phọ bịn aḅọgh loor anạ angọ aZihova aḅilhẹ aḍiiny muụm. Ephomhoghiạn phọ nạ amhoọgh bọ aghị esi aZihova Enhaạn phọ kụ ekpanạ iyaạr dị k’enyu nyinhạ oḍiiny amuụm. Mem dị nạ aphomhoghiạn aZihova apuemhi oomo iphedị phọ araraạr phọ, nạ ka/meera iyaạr obobọ oye asophoghom nyinhạ okumu odị. Ephomhoghiạn phọ nạ amhoọgh bọ aghị esi aZihova ketue ni elhoghonhaạn nyinhạ ḍighaạgh oḍiiny amuụm, eḅilhẹ eeḅakị nyinhạ oghiọm aghisigh okumu Enhaạn.
5. Yira kooḅeghiọn ighẹn asipuru?
5 AZizọs aḅẹm mọ yira omoọgh ophomhoghiạn aZihova r’oomo ekpom, r’aghuḍum, r’olhoghi, ḅilhẹ r’inyaạm ayira. (Mạk 12:30) Ika kụ idị nạ katue bọ atuughạ ilọ ophomhoghiạn r’olhọgh eegu aZihova k’ipẹ k’ipẹ? Mem dị yira ootughiạn ilọ eboom ephomhoghiạn phọ aZihova amhoọgh bọ aru esi ayira, rinyu ghan ni iyira ophomhoghiạn aani odị oḅulhemhian. (1 Jọn 4:19) Eeghe olhoghoma kirokirọ r’iiḍighi kụ kedaphạn, mem dị nạ amhoọgh ephomhoghiạn phọ epẹ emhạn bọ maạr epelheghiom? *
6. Odaphạn Rom 1:20, eghẹn kụ eniin eten dị nạ katue atuughạ ilọ aZihova?
6 Tuughạ ilọ aZihova esi olhẹm mọ odị. (Bạl Rom 1:20; Ogan. 4:11) Gbirima ghan osụ olhoghi phọ aganana bọ siphẹ emạ eten phọ olhẹm bọ iizuphạ phọ r’inhạm mọ. Tuughạ kẹn iyaạr esi eekiạ eten phọ epẹ aZihova amakạ bọ loor phọ oye. (Ps. 139:14) Tuutughiạn ni kẹn ilọ iboom iikpọ phọ aZihova alhọgh bọ loor erumuḍio phọ, eḍighi bọ nyeniin esi ariisi eelạ araanaạn phọ edi bọ. * (Isa. 40:26) Nạ aḍighi iduọn phọ, nạ kakuamhị ni alọgh eegu aZihova. Toroboiperolbọ, olhegheri mọ aZihova asụ olhoghi aḅilhẹ amoọgh iikpọ eḍighi pakirị iphighiom asiya phọ anạ r’odị. Orue okparamhị ephomhoghiạn phọ anạ esi aZihova, pọ ewạ mọ kuamhị alhegheri nyodị.
7. Ewạ mọ kuphom owol eeghe, orue okuamhị ophomhoghiạn aZihova?
7 Ewạ mọ legheri akuphom owol mọ aZihova raphogh ghan ni nyinhạ r’aloor. Rekparanhaạn ghan ni nyinhạ omheeraam mọ Olemiạ akẹ phọ r’ade phọ alhegheri ni nyinhạ r’aloor ḍughụm? Eḍighi idiphọ, pọ legheri mọ aZihova “o/kạr okeIạn torobọ onyọ ayira.” (Iiḍighi 17:26-28) Odị “raaḅeghiọn ghan ni kaphogh oomo arokpom,” kụ odị aguanhaan nyinhạ idiphọ aDevid aḅenhị bọ Solomon mọ, “eḍighi maạr dị nạ awạ ni nyodị, p’odị kameera ni mọ miịn nyodị.” (1 Chron. 28:9) Okạr oghaạph, iyaạr phọ eḍighi bọ kụ nạ mamhiigh bọ otuughạ aBaibul phọ pọ aloor esi dị aZihova aḅenhị nyinhạ mọ, “Mị maḍur nyinhạ aloghomạ.” (Jer. 31:3) Mem dị nạ amhaghamhị maạr oomo ipẹ aZihova maḍighinhaan bọ nyinhạ, ephomhoghiạn phọ anạ esi odị keḍiinyan ni.
8. Ika kụ idị nạ kaḍeenhaan mọ nạ asereghiạn ni ephomhoghiạn phọ aZihova?
8 Eniin eten dị yira kotue oḍeenhaan mọ yira osereghiạn ni ephomhoghiạn phọ aZihova pọ oḅaanhaạn ghan odị esi iiḅereghị. Mem dị nạ aḅenhị nyodị raraạr phọ ipẹ reeḅaghamhị bọ nyinhạ aḅilhẹ asẹph ghan nyodị ilọ araraạr phọ ipẹ odị aḍighinhaan bọ nyinhạ, ephomhoghiạn phọ anạ esi odị kepoph ni. Kụ mem dị nạ amhiịn ipẹ odị aphagharanhaạn bọ iiḅereghị phọ anạ, kekuamhị ni ekparamhị siya phọ anạ r’aZihova. (Ps. 116:1) Keḍighi kẹn idị nạ kameeraam akuphom owol mọ odị anaghanhạn ni nyinhạ. Kuolọ okuamhị oḍuraan otuman aZihova, pọ ewạ mọ legheri raraạr phọ ipẹ eḅeraạn bọ nyodị r’ipẹ nyodị i/ḅeraạn bọ. Ḅilhẹ r’ipẹ odị rawạ bọ esi anạ. Ogina eten dị nạ katue amoọgh olhegheri iyaạr phọ ophọn phọ pọ esi otuughạ ghan Ekpo onhụ phọ odị, Baibul phọ.
Eten dị enhighẹ epelheghiom dị yira kotue oḍuraan otuman Enhaạn ḅilhẹ kẹn olegheri ipẹ odị rawạ bọ ḍighaạgh ayira, pọ otuughạ ghan aBaibul phọ (Miịn ekpịgh phọ 9) *
9. Ika kụ idị nạ kaḍeenhaan mọ nạ amaghamhị ni maạr Baibul phọ?
9 Tuughạ idị nạ kamaghamhị ghan maạr Ekpo onhụ phọ Enhaạn, Baibul phọ. ABaibul phọ bịn kụ aḍinyạ dị ephamhanhạm igey phọ ilọ aZihova r’ogbi phọ odị ilọ anạ. Eten dị nạ katue aḍeenhaan mọ nạ asereghiạn ni Baibul phọ pọ aạl ghan atorobọ aḍio, osighẹ ghan oḍighinhom mem dị nạ raakolhobian okoriom opọ ratughemhị ghan bọ nyinhạ, ḅilhẹ r’esi osighẹ ghan ipẹ nạ atuughạ bọ oḍighinhom. (Ps. 119:97, 99; Jọn 17:17) Nạ amoọgh ni edeọm aạl ghan aBaibul phọ elọ anạ ḍughụm? Nạ radaphạn ghan ni edeọm mọ anạ, kamhiịn mọ nạ abạl li Baibul phọ torobọ aḍio ḍughụm?
10. Eeghe kụ eniin iyaạr aḍiḅeraạn dị edi siphẹ aBaibul phọ?
10 Eniin iyaạr aḍiḅeraạn dị edi siphẹ aBaibul phọ pọ, iinhaghạn ilọ awe dị okạr omhiịn aani mem mọ aZizọs arọl bọ siẹn ade phọ. ABaibul phọ bịn kụ aḍinyạ dị ephamhanhạm igey ilọ ipẹ aZizọs maḍighinhaan bọ nyinhạ. Mem dị nạ atuughạ alhegheri ipẹ aZizọs aghaạph bọ aḅilhẹ aḍighi, kenyu ni nyinhạ oḍigh arighirị r’odị.
11. Eeghe kụ kelhoghonhaạn nyinhạ ḍighaạgh ophomhoghiạn aZihova?
11 Tuughạ ilọ ophomhoghiạn aZizọs, bịn ephomhoghiạn phọ anạ esi aZihova kepoph ni. Utụ eeghe kụ oḅẹm bọ iduọn phọ? Loor esi dị aZizọs aaghironhaan raagharạ Odẹ phọ odị bịn ḅeer amadạn. (Jọn 14:9) Esi iduọn phọ, mem dị nạ akuamị atuughạ ilọ aZizọs, kelhoghonhaạn nyinhạ ḍighaạgh onhaghanhạn ḅilhẹ r’osereghiạn aZihova. Tuutughiạn odọ igbiririph dị aZizọs aḍeenhaan buphẹ ophogh bọ osooromi, rukulom mọ, buphẹ u/moonogh bọ, r’abuphẹ odugh bọ. Tuutughiạn kẹn ilọ imạ oroma phọ odị angọ bọ nyinhạ ḅilhẹ r’ipẹ adọl aghuḍum mọ anạ enighẹ bọ mem mọ nạ asighẹ bọ oroma phọ aḍighinhom.—Mat. 5:1-11; 7:24-27.
12. Eeni kenyu nyinhạ oḍighi eeghe, mem dị nạ atuughạ ilọ aZizọs?
12 Ephomhoghiạn phọ nạ amhoọgh bọ aghị esi aZizọs kepoph ni mem dị nạ aghiọm ghisigh aatughiạn ghan ilọ ekiạ phọ aZizọs aphighirọn bọ obọ osạr ikarạph ayira uwilhenhaạn iyira. (Mat. 20:28) Mem dị nạ anhaghanhạn mọ aZizọs amheeraam ni omhughanhaan anạ, etue ni enyu nyinhạ okiton esi ikarạph phọ anạ kụ olhọm aZihova osạr owilhenhaạn. (Iiḍighi 3:19, 20; 1 Jọn 1:9) Iduọn nạ aphomhoghiạn bọ Zizọs r’aZihova, kenyu nyinhạ oḍuraan otuman awe dị ophomhoghiạn aani aZihova r’aZizọs.
13. AZihova mangọ nyinhạ eeghe?
13 Tuughạ ophomhoghiạn aani abuphẹ ophomhoghiạn bọ aZihova. Eeni abuọ eghunotu anạ r’arighirị anạ dị ro/tu aani ghan ituughạ ko/naghanhạn iyaạr phọ eḍighi bọ kụ nạ raḅọgh bọ loor kangọ aZihova. Bidị otue kẹn ni osophoghom nyinhạ. AZihova kangọ ni nyinhạ bumor r’abumarani dị koḍighi eghunotu anạ. Eḍighi maạr dị nạ akpulạn ni adaphạn eghunotu abumor r’abumarani phọ, nạ kamiịn ni ephomhoghiạn r’obakị phọ opọ nạ rawạ bọ. (Mạk 10:29, 30; Hib. 10:24, 25) Bịn idiphọ amem mọ rekị bọ, abuọ eghunotu phọ anạ otue ni omiigh odạph aani anạ oru ituughạ ḅilhẹ r’odaphạn asiigbu phọ aZihova.—1 Pit. 2:12.
14. Idiphọ oghaạph bọ siphẹ 1 Jọn 5:3, eeghe kụ edị nạ maru alhegheri ilọ asiigbu phọ aZihova?
14 Tuughạ ilọ osereghiạn r’osighẹ oḍighinhom asiigbu phọ aZihova. Eeni nạ umhoọgh ghan ni eten dị nạ aḍighi ghan raraạr kụ egbi bọ oteẹny amem mọ nạ alhegheri bọ aZihova, kuolọ nyiidiphọ nạ maru alegheri mọ areten phọ ipẹ k’aZihova kụ inhighẹ epu. (Ps. 1:1-3; bạl 1 Jọn 5:3.) Tuutughiạn ilọ oroma phọ aBaibul phọ angọ bọ burulom, nmariịr, burudẹ r’aburunhiin, ḅilhẹ r’ibạm anmụny. (Efẹ. 5:22–6:4) Mem mọ nạ asighẹ bọ oroma phọ aḍighinhom, adọl eghunotu phọ anạ inighẹ ni ḍughụm? Araagharạ anạ inighẹ ni ḍughụm, loor esi iduọn nạ asighẹ bọ oroma phọ aZihova aḍighinhom, idị egbolhomaam osaḅạr arighirị? Nạ aḍighi ni oye oḅaạl olhoghi nyiidiphọ ḍughụm? (Prov. 13:20; 1 Kọr. 15:33) Olegheri ni mọ nạ apagharanhaạn ii sipuru phọ ipẹ phọ.
15. Ewạ mọ ḍighi eeghe eḍighi maạr dị nạ rawạ olhegheri ilọ osighẹ oḍighinhom asinị iilhogh aBaibul phọ?
15 Eeni amem, etue ni ekparanhaạn nyinhạ olhegheri ipẹ nạ kaḍighinhom bọ sinị iilhogh aBaibul phọ nạ ratuughạ bọ. Pọ kụ iyaạr phọ ookpomhoghan phọ aZihova ramiteom ghan bọ rinyạ dị regbạ ghan Baibul phọ olhoghonhaạn anạ ḍighaạgh olhegheri ilọ eru igey r’ikarạph. (Hib. 5:13, 14) Nạ aạl ghan aḅilhẹ atuughạ rinyạ phọ iphẹn phọ, nạ kamiịn ni ipẹ nạ katue bọ aḍighinhom siphẹ adọl aghuḍum mọ anạ, bịn eḍighi idị nạ kaḍuraan aḍighom aani pakirị ookpomhoghan phọ aZihova.
16. AZihova adẹ ika we phọ odị?
16 Tuughạ ilọ ophomhoghiạn r’obakị aani oḍighom mọ aZihova. AZihova adiighi ni we phọ odị alọgh rookpomhoghan kirokirọ; kụ Oọny phọ odị Zizọs kụ oḍiemhiom oomo abidị. (Efẹ. 1:22; 5:23) AZizọs amạ ni ebạm egu abumor dị osagharạn uwaloor iigbia phọ oḍiemhiom oḍighi phọ odị rawạ bọ moḍighi ḍio arodon. AZizọs akol egu awe phọ abuẹn phọ mọ ‘ebenhẹ phọ asụ bọ olhoghi phọ aḅilhẹ akpẹ oḍuomolhoghi,’ kụ bidị omaghamhị ni maạr iboom oḍighi phọ abidị olhoghonhaạn anạ ḍighaạgh dị nạ kakparamhị siya phọ anạ r’aZihova ḅilhẹ r’oghoph anạ. (Mat. 24:45-47) Eniin eten dị ebenhẹ phọ akpẹ bọ oḍuom olhoghi phọ raloghonhaạn ghan nyinhạ ḍighaạgh pọ omạ awe dị okpẹ oḍuom olhoghi dị koḍighi ikumor awe pidị oghoph nyinhạ. (Isa. 32:1, 2; Hib. 13:17; 1 Pit. 5:2, 3) Ikumor awe phọ ookolhobian ni oḍighi oomo ipẹ bidị kotue bọ, oodereghị anạ ḅilhẹ r’okparamhị asiya phọ anạ r’aZihova. Kuolọ eniin iyaạr dị ekạr emhạn maạr dị bidị koḍighinhaan nyinhạ pọ olhoghonhaạn anạ ḍighaạgh dị nạ kamaạr ilọ otughemhị aani abunhọn ilọ aZihova.—Efẹ. 4:11-13.
17. Odaphạn Rom 10:10, 13, 14, eeghe kụ iḍighi bọ iyaạr phọ yira rokaạph ghan bọ ilọ aZihova koḅenhị aani bunhọn?
17 Loghonhaạn bunhọn ḍighaạgh otuughạ aani ilọ ophomhoghiạn aZihova. AZizọs aḅenhị bumatuạn phọ odị mọ otughemhị aani bunhọn ilọ aZihova. (Mat. 28:19, 20) Eeni nạ atue ni aḍighi ghan iduọn phọ loor esi dị eḍighi itọ dị aZizọs ungọ iyira. Kuolọ mem dị ephomhoghiạn phọ anạ esi aZihova ephoph, nạ kaloghoma aani ni eniin phọ eten phọ otelhedom mọ aPita r’aJọn olhoghoma bọ kụ oḅẹm bọ mọ: “Yoor ko/biIẹ oghaạph araraạr phọ ipẹ yoor momiịn bọ oḅiIẹ onaghạn.” (Iiḍighi 4:20) Yira romoọgh ghan ni oboom oḅaạl olhoghi mem dị yira olhoghonhaạn oye ḍighaạgh ophomhoghiạn aZihova. Gbiom olhoghi ibo phọ aFilip amhoọgh bọ, mem mọ odị alhoghonhaạn bọ oye olọ Etiopiạ phọ ḍighaạgh otuughạ igey phọ kụ oḍiiny amuụm! Mem dị nạ atuughaạny Filip ḅilhẹ adaphạn itọ phọ aZizọs oghị ogbeelhom iiḅi iinhaghạn phọ, pọ iduọn phọ nạ ramạ ghan kaḍeenhaan mọ nạ rawạ ni oḍighi aani oniin onyọ Ogbaanhaạn AZihova. (Bạl Rom 10:10, 13, 14.) Mem dị nạ arue aḍighi oomo iphẹn phọ, eeni nạ kapuru aani ni ḍipuru phọ oye olọ Etiopiạ phọ apuru bọ mọ: “Eeghe kụ kemirighan bọ nyinạ [oḍiinye] aani amị?”—Iiḍighi 8:36.
18. Yira kotuughạ eeghe siphẹ emhuoghaạph phọ etum bọ siẹn?
18 Edạ dị emhạn maạr epelheghiom dị nạ kagbatạn siẹn adọl aghuḍum mọ anạ, pọ oḍiiny amuụm. Ewạ ni mọ lọgh ni mem amhaạr aatughiạn kụ agbi ogbatạn edạ phọ ephẹn phọ, loor esi dị eḍighi edạ dị emhạn maạr iboom. Eeghe kụ iyaạr dị ewạ mọ legheri ilọ oḍiiny amuụm? Eeghe kụ iyaạr dị ewạ mọ ḍighi kụ egbi oteẹny amem dị nạ kaḍiiny muụm ḅilhẹ r’amem dị nạ maḍiiny muụm eten? Kopanyanhaạn sipuru phọ ipẹ phọ siphẹ emhuoghaạph phọ etum bọ siẹn.
AḌUỌR PHỌ 2 Jehovah Is Your Name
^ par. 5 Abuniin abudị ophomhoghiạn ni aZihova u/kạr ulegheri mughumọ mekpeanhaạn ni dị bidị koḍiiny muụm oḍighi aani oniin Ogbaanhaạn AZihova. Eḍighi maạr dị nạ alhoghoma eten phọ epẹ phọ, pọ emhuoghaạph phọ ephẹn phọ kelhoghonhaạn ni nyinhạ ḍighaạgh omhiịn iniin araraạr dị nạ kaḍighi obọ nạ aḍiiny aani muụm.
^ par. 5 Awe ogbaranhaạn ni, esi iduọn phọ abuniin eeni ko/kạr otuụgh ipẹ omaaghị bọ siẹn emhuoghaạph phọ ephẹn phọ kụ oḍighinom, eeni koḍighinom enhọn eten.
^ par. 6 Omhiịn inhọn areḍeenhaan, pọ bạl sibrosọ phọ Was Life Created? r’aḍiphẹ eḅẹm bọ mọ The Origin of Life—Five Questions Worth Asking.
^ par. 61 ILỌ AFOTO: Onyọ umarani angọ trạkt oḍoọgh anhịr esi dị odị aghị ogho iyaạr.
