AJack r’aMarie-Line umhiigh rukumuan oomo amem mọ lhạ phọ 1988. Iduọn bidị oḍighi bọ we dị rodaphạn ghan agey sidọl ekpisi lọ bidị oghị, bidị m’okumuan ni ibadị arikpisi siphẹ Guadeloupe ḅilhẹ r’epẹ French Guiana. Nyiidiphọ Olạ agadạ phọ aFrance kụ rapogh ghan iyạl phọ arikpisi phọ iphẹn phọ. Uguạ opuru aani umor phọ Jack r’umarani phọ Marie-Line iyạl ikpo asipuru.

Eeghe kụ inyu bọ inyinha oḍigh arukumuan oomo amem mọ?

Marie-Line: Idiphọ obumoọny dị ookonhom epẹ Guadeloupe, mị ugbor ghan ni amite epẹ erugh phọ r’onhiin amhị. Odị ko/wilhẹ oophugh phọ odị idiphọ onyọ Ogbaanhaạn. Mị apomhoghiạn we agey, kụ iḍighi kụ mị r’omadạn askul lhạ phọ 1985, bịn mị amhiigh okọy eten.

Jack: Mem dị mị aḍighi onyọ iḍoọgh, abukọy eten oomo amem dị ophomhoghiạn oḍighi iphelhegbel kụ ukitonhom ghan imhị. Mị ugbor ghan akọy eten opọ ekulha amem mọ, mem dị oghughi askul. Eeni eekunha awiki, yoor uḍigh ghan moto oghị aani ekool phọ epẹ abukọy eten phọ roḍighi bọ. Yoor ughaạph ghan iiḅi iinhaghạn phọ oomo emhụ aḍio phọ—kụ yoor okị epẹ esiḍia phọ opooghian. Asiḍio phọ ipẹ phọ idụgh ghan iikiạ!

Mị rophin Marie-Line lhạ phọ 1988, i/bia bịn mị apuruan loor mọ; ‘Yoor u/moọgh bọ ni dool, yoor ko/tue obughẹ rukumuan phọ ayoor ḍughụm?’ Kụ mị adạph aani Marie-Line amhiigh okọy eten oomo amem mọ. Alhạ reten, yoor roghị askul abukọy eten phọ bịn umạ iyoor idiphọ abukọy eten dị ogbatanhaạn. Yoor ughelhọm ni ibadị aroopoogh arukumuan epẹ Guadeloupe kụ ogbi osighẹ ayoor oghị aFrench Guiana.

Monmeeghi ni roopoogh arukumuan phọ anyinha k’asiạ phọ. Eeghe kụ ilhoghonhaạn inyinha ḍighaạgh orue ghan odaphạn imhoom asidọl phọ?

Marie-Line: Abumor phọ odi bọ epẹ Olạ Agadạ aFrench Guiana, ulhegheri ni mọ egbogh esi aBaibul ayoor pọ Isaiah 6:8. Kụ torọ amem dị bidị umhạgh iyoor, bidị usighẹ ghan ilọ ephegh kụ upuruom iyoor mọ; “Nyinha eetughiạn ni egbogh esi aBaibul phọ anyinha?” Bịn yoor molhegheri mọ meteẹny konme oḍighi ph’ayoor. Kụ yoor omegheron mọ; “Poronọ ayoor! Irom iyoor!”

Yoor u/sighẹ ghan omhoom oḍighi phọ ayoor u/tomaạm ogbaany phọ, loor esi dị ipẹ phọ etue ni isophoghom  iyoor osereghiạn eepoogh phọ yoor omhoọgh bọ. Yoor k’uphụr ghan kẹn ogbatạn edạ olhegheri abumor r’abumarani phọ.

Jack: Mem dị eten, abuniin abugey arighirị ayoor ukparaghạ ghan ni odughe ayoor dị yoor ko/ḅuạ ekpisi phọ loor inyaam. Kuolọ mem mọ yoor oḅuạ bọ Guadeloupe, oniin onyọ umor uutughianhạm ni iyoor ikpo onhụ phọ aZizọs edi bọ siphẹ Matiu 13:38: “Ozo phọ, pọ aḅirini pho.” Kụ iḍighi kụ mem lọ onme oḍighi phọ ayoor, yoor uutughianhạm ghan ni siloor ayoor mọ torobọ ekpisi phọ epẹ yoor odi bọ kụ rokumuan, pọ ozo phọ ni. Ekpanạ iyaạr phọ pọ awe phọ odi bọ ekool phọ!

Mem dị yoor osi emhoom ekool arukumuan, yoor umhiịn ghan ni mọ awe odi ni ekpisi phọ r’oḅaạl olhoghi. Kụ yoor okparaghạ orọl aani idiphọ awe ekpisi phọ odi bọ. Ariiḍien phọ igbatanhaạn ghan ni r’ipẹ ayoor, kuolọ yoor ulhe ghan ni oḅilhẹ ophughọl torobọ iyaạr lọ yoor omhiịn, oḅilhẹ ogona ghan kẹn loor ilọ omhoon aloor phọ ayoor. Yoor ulhọgh ghan ni ikuph oghaạph ghan imạ ilọ atorobọ eepoogh arukumuan lọ ungọ iyoor.

Marie-Line: Yoor utuughạ kẹn ni ibadị araraạr ḍighaạgh abumor r’abumarani ekpisi phọ. Mị aatughiạn eḅẹl amem mọ yoor osi bọ French Guiana. Ḍiniin aḍio dị yoor rowạ omite epẹ erugh phọ kụ ogbogh olọph ralọph, yoor ugbi mọ kasorọph kụ yoor ogbi omite epẹ erugh phọ. Kuolọ oniin onyọ umarani uḅenhị imị mọ, “Nạ manyạ pọ uḍuạ!” Iḍighi ni ḍiigu esi amhị kụ mị apuru mọ, “Ika?” Kụ odị mọ, “Yira kopạm roghophaam bịn oḍigh righilhighom ayira oḍuạ.” Pọ kụ esi dị mị atuughạ ilọ ophạm oghophaam ḍiniin aḍighaạgh oḍighom oghiilhom. Mọ mị u/tuughạ bọ, obọ mikparanhaạn imị oghaạph iiḅi iinhaghạn phọ mem olophiạ!

Siẹn 15 arikpisi nyinha meghiighị bọ. Eeghe iyaạr kụ edị nyinha etuughạ dị keloghonhaạn aani ḍighaạgh bunhọn?

Marie-Line: Ipaanhaạn edi ghan ni oḍuạ oghị enhọn ekpisi. Ghalhamọ r’iduọn phọ ni, emạn ni maạr owạ esi dị kephonhaạn ghan nyinhạ orọl mem dị nạ aghị epẹ erugh phọ arigheel.

Jack: Iḅeraạn ghan imhị ogbul agbạ torobọ omhoom otu dị mị aḍigh. Kụ eeni amem abumor phọ odi bọ epẹ olạ agadạ phọ kụ olhegheri mọ yoor ko/tọl ekpisi phọ obia, kụ uḅenhị imhị mọ, “Jack, kaa/ḅaghamhiạn loor ogbul agbạ otu phọ nạ katọl bọ!”

AMarie-Line ophelhegbe ookoroghi araraạr! Odị alhoghoḍị ghan raraạr phọ ilọ esi r’esi ilhoghi igbe kụ ageeghị siḍien phọ araraạr phọ adapharị, esi omaạm; “ilọ osoph,” “ilọ oghoony,” “ilọ otu iisạ,” ḅilhẹ r’inhọn. Bịn mem lọ yoor osi emhoom ekpisi phọ, midughanhaan iyoor onhuụn osereghi araraạr ilọ esi r’esi. Odị  ageeghị ghan kẹn siḍien araraạr phọ edi bọ torobọ igbe phọ, bịn idughanhaan ghan iyoor onhuụn omhiịn atorobọ iyaạr lọ yoor rowạ.

Marie-Line: Loor esi iduọn yoor oḅoonomhị ghan bọ raraạr phọ ilọ esi r’esi, yoor unhuụn ghan ni omhiigh rukumuan phọ ayoor mem lọ yoor osi.

Ika kụ idị nyinha edẹ ghan bọ mem mọ anyinha orue oḍighi “k’ikparạ k’ikpuru oḍighi phọ [anyinha]”?—2 Tim. 4:5.

Marie-Line: Yoor uphooghian ghan torobọ aMondị, ookolhobian ituughạ. Reḅaạl Tuusdee bịn yoor momhiigh rukumuan phọ ayoor.

Jack: Yoor ro/gbon ghan onhụ awạ phọ ewạ bọ mọ yoor ungọ unwanyụ phọ bịn. Kuolọ oghaạph iiḅi iinhaghạn phọ kụ iḍighi ekpanhạ iyaạr siẹn adọl aghuḍum mọ ayoor. Kụ iḍighi kụ, emhiigh oogho phọ yoor koḍuạ bọ olhoghotu kụ eteẹny mem dị yoor kotigheel yoor ukparaghạ ghan ni oghaạph iiḅi iinhaghạn phọ oḅenhị atorobọ oye lọ yoor ozuan.

Marie-Line: Mem dị yoor romite aani oghelhọm aloor, oomo amem mị uphạm ghan ni sitrạkt. Abuniin awe uru ghan ni upuru imhị rinyạ, ghalhamọ r’amem dị yoor ko/ḅenhị ni bidị mọ yoor Abugbaanhaạn AZihova. Pọ kụ iyaạr phọ yoor uu/nmenhan ghan bọ teteẹny iinmenian ḅilhẹ u/zọ ghan bọ ilọ iḅeraạn iyoor. Loor esi dị awe ronuụn ghan omhiịn araraạr phọ ipẹ phọ.

Jack: Olhoghonhaạn aḍighaạgh phọ yoor ongọ ghan bọ matuman phọ ayoor ingọ ghan bidị ogbaanhaạn. Esi omaạm, mị usọn ghan ni rinyạ dị egbusemhi esi phọ, azuughinhaan ghan bidị iiyạ, ḅilhẹ aḅeerenaan ghan roghoony iizuphạ dị ikitonom iyoor. Amatuman phọ ayoor umhiịn ghan ni iphẹn phọ mị aḍighi ghan bọ, kụ oru ghan eeni amem upuru ghan imhị mọ, “Nạ kamoọgh ni Baibul ongọ aani ayoor ḍughụm?”

Nyinha i/gbạ ghan mem oghaạph iiḅi iinhaghạn phọ rikpisi dị ekelhọgh. Eghẹn kụ iḍighan elhegh siẹn erelhe phọ anyinha?

Jack: Oḍuạ oghị osi iniin arokool epẹ Guiana isighẹ ghan iyoor 370 itobi, kụ areten phọ epụ ephuọm dị. Yoor ko/tue ni bịn obula mem mọ yoor oghị bọ epẹ St. Élie, eekpuạ phọ Amazon. Isighẹ ghan ni iyoor ibadị awạ oḍuạ oghị osi epẹ phọ, yoor uḍigh ghan moto dị rokiilhom ghan rikpisi dị egey eten i/lo. Ogbogh opol awe dị odi ghan epẹ phọ oḍighi we dị roguphogh ghan de owạ asigol. Esi osereghiạn arinyạ phọ yoor ongọ bọ bidị, abuniin abuẹn phọ ungọ ghan iyoor ipherepẹ asigol idiphọ iisogh! Kụ ogbạl adulhe kụ Ibadị abuọ emhạ phọ ookpomhoghan esi, kụ yoor oḍeenhaan sividio ookpomhoghan phọ.

Marie-Line: Uḅenhị ni Jack oghị ongọ oghaạph aMemorial emhạ dị oghol mọ Camopi. Oghị osi epẹ phọ, isighẹ iyoor inya awạ oḍigh abot oḅeẹny ophiịny Oyapock phọ. Ephẹn phọ iyaạr dị mị ka/tue aḅula.

Jack: Esi dị amuụm mọ asoorom, ekilhom mọ regbagarạ ghan ni. Ogbạ agey, ekilhom amuụm mọ iḍigh ghan ni ḍiigu omhiịn. Oye lọ u/maạr ka/tue akiilhom bot phọ. Kuolọ idụgh ghan ni iikiạ. 6 Abugbaanhaạn kụ urọl ekpisi phọ, kuolọ 50 awe k’uru aMemorial phọ, awe Amerindians uru aani ni!

Marie-Line: Iphẹn phọ araraạr dị rekori ni iḍoọgh dị rowạ obughẹ arukumuan phọ abidị. Nạ kaḍuom olhoghi aZihova sidọl phọ iphẹn phọ, bịn omheeraam mọ anạ kakpạr ri. Yoor ugbor ghan ni omhiịn olhoghonhaạn aḍighaạgh phọ aZihova.

Nyinha metuughạ ni ibadị arunhụ aḍiaḅạ. Nyinha emoọgh ni inmo onhaghạn inhọn arunhụ aḍiaḅạ ḍughụm?

Jack: Eeye. Mị utuughạ runhụ phọ iphẹn phọ loor esi dị ikạr kụ ewạ dị mị katuughạ. Mị utughemhị Otu Okoriom mọ onhụ Sranantongo * mem dị mị k”aạl ghan ibạl aBaibul phọ! Mị upuru ni oniin onyọ umor ipẹ itughemhị phọ amhị erọl bọ. Kụ odị mọ, “Eeni amem yoor u/kạr ghan unaghanhạn ikpo onhụ phọ anạ, kuolọ ituughạ phọ idụgh ni.” Ibạm anmụny phọ ulhoghonhaạn imhị ḍighaạgh agey. Mem dị mị u/ḅạ agey, bidị k’uulemhi ghan imhị, i/kumor awe phọ iyaạr u/kaạph ghan. Mị utuughạ ni ibadị araraạr ḍighaạgh ibạm anmụny phọ.

Marie-Line: Eniin ekool, mị umhoọgh ni we dị mị atughemhị ghan Baibul phọ onhụ aFrench, Portugal, ḅilhẹ r’aSranantongo. Onyọ umarani uḅenhị imhị mọ mị upụr umiighom ghan otughemhị abuẹn roḅạ bọ onhụ dị ukparanhaạn imhị, kụ mị akureriom buẹn roḅạ bọ onhụ dị adugh. Mị umhiịn ni osụ olhoghi oroma phọ opọ phọ.

Eniin aḍio, mị utughemhị ghan oye Baibul phọ onhụ  Sranantongo, onhọn onhụ Portugal. Mị ramiigh bọ otughemhị omhunhenhiom iyạl oye phọ, onyọ umarani phọ r’amhị rotelhean bọ, uḅenhị imhị mọ, “Marie-Line, reḍighi ghan ika?” Kụ mị agbi olhegheri mọ mị asighẹ onhụ Sranantongo kụ ratughemhiọm ghan anhịr olọ Brazil phọ raḅạ ghan bọ onhụ aPortugal!

Awe arikpisi phọ nyinha ekumuan ghan bọ iphomhoghiạn inyinha iikiạ. Ika kụ idị nyinha erue bọ eḍighi righirị abidị?

Jack: AProverbs 11:25 eḅẹm mọ: “Oye inmo kameel li eelạ.” Yoor u/bilhẹ ghan omiteom aloor phọ ayoor olhoghonhaạn aḍighaạgh bunhọn. Mem dị roḍighi oḍighi aKindọm Họl, abuniin abumor uḅenhị ghan imhị mọ: “bilhenhaạn oḍighi phọ buọ ookpomhoghan phọ.” Kụ mị aphagharanhaạn mọ: “Ọ mị oniin olọ ookpomhoghan phọ ni. Kụ iḍighi kụ eḍighi maạr dị oḍighi odi, pọ mị kaḍighi aani ni.” Ghalhamọ r’iduọn ewạ bọ ni dị yoor komoọgh ghan mem muọ ayoor, bịn yoor u/meera mọ ipẹ phọ ikikima iyoor olhoghonhaạn aḍighaạgh obobọ oḍighi iiḅi bunhọn.

Marie-Line: Yoor ulhọgh ghan ni ikuph dị emhanhạm oḍeenhaan ogbolhomaam bumor r’abumarani phọ. Bịn erue idughanhaan iyoor olhegheri amem dị bidị rowạ dị oye kapoghonhaan bidị ibạm anmụny abidị obobọ akị asighenhaạn ibạm anmụny abidị otu askul. Kụ yoor ooḅenhion edeọm mọ ayoor omiteom eepoogh dị yoor kotue ologhonhaạn aani ḍighaạgh. Omiteom ghan aloor olhoghonhaạn aḍighaạgh mem lọ ewạ, ikparamhị ni siya phọ ayoor r’abunhọn.

Eeghe aḍisẹph kirokirọ kụ edị nyinha m’emhoọgh esi okumuan ekpisi dị ewaạm mọ ebụgh?

Jack: Arukumuan oomo amem mọ m’ingọ iyoor oḅaạl olhoghi siẹn adọl aghuḍum mọ ayoor. M’ingọ iyoor eepoogh oghelhọm odọ kirokirọ olhẹm mọ aZihova. Ghalhamọ r’iduọn yoor osoman ghan bọ ni ipaanhaạn, yoor omoọgh ni eephọ olhoghi loor esi dị yoor olegheri mọ yoor komoọgh ni olhoghonhaạn aḍighaạgh awe phọ Enhaạn torobọ ekpisi lọ yoor oghị.

Mem dị mị aḍighi onyọ ugheel, ulhọgh ni imhị ikoli epẹ French Guiana loor adọl asạm mọ amhị idiphọ onyọ aKristẹn. Mị uu/tughiạn mọ mị kaḅilhẹ ni aḅula epẹ idiphọ onyọ amisonarị, dị kaḅilhẹ amoọgh eepoogh oghị ghan ophogh abuọ ikoli phọ idiphọ oye k’Enhaạn. Okạr agey, aZihova makạr kụ usẹph iyoor. Odị Enhaạn inmo!

Marie-Line: Mị ramoọgh ghan iboom ibo mem dị mị amiteom loor angọ bunhọn. Olhoghi ayoor aḅaạl agey ophinhom aani abin siẹn arukumuan phọ aZihova. Mekparamhị pinien phọ ayoor. Eeni amem, aJack upuru ghan imhị mọ yira otue ni omạgh aani eghunotu dị moḅonyonhu ozuan oru olhe aani eḍien k’ayira ḍughụm? Mị uphagharanhaạn mọ, “Mị phọ kẹn raatughiạn aani iniin phọ!” Idiphọ kụ idị yoor oḍighi ghan.

Jack: Eniin amem, mị umhoọgh ezẹgh akansạ. Ghalhamọ r’iduọn ke/ḅaạl bọ olhoghi aMarie-Line o/nhaghạn, mị umhạgh ni nyodị aḅenhị mọ: “Ooḅi amhị, mị alegheri ni mọ mị ko/kpọ dị koḅẹm mọ ikị kụ emhiịn, kuolọ ghalhamọ mị umhugh ni moọny amem, mị alegheri ni mọ mị masighẹ ni ghuḍum mọ amhị aḍighinhom raraạr dị emhạn maạr, okumu aZihova, kụ ipẹ phọ ringọ ghan imhị oḅaạl olhoghi.’—Gen. 25:8.

Marie-Line: AZihova m’ungọ iyoor iiḍighi dị olhoghi yoor u/seere, omheera dị yoor kokumuan eten dị yoor u/gbiom olhoghi. Imạ araraạr mekạr ekpolhom ghuḍum mọ ayoor. R’oḍuomolhoghi esi Enhaạn, torobọ ekpisi dị oḍighom mọ Enhaạn uḅenhị iyoor oghị, yoor kokị ni!