1. Uḍighi ika kụ aZizọs alhọm bọ mọ aZihova aphogh butelhedom mọ odị?

ḌUGHUL phọ aḍiphẹ aZizọs arọl bọ siẹn ade phọ asughanham omhạn, odị aatughiạn ghan ni ilọ ipaanhaạn phọ abutelhedom mọ odị kosoman bọ. Loor iduọn aZizọs aphomhoghiạn bọ righirị phọ odị, odị aḅenhị ni Odẹ odị mọ, “mị rạIọm ghan ghụn mọ bidị okoronaan Okarạph [oye ] phọ.” (Jọn 17:14, 15) AZizọs alhegheri ni mọ mem dị odị aḅulha epẹ k’akẹ phọ, aSetan Eru phọ kakiọm ni ghisigh atupheom ghan elhephiri bulọ rowạ ooḅereghị aZihova. Esi iduọn phọ, awe phọ aZihova okạr kụ omoghi oghoph.

2. Eeghe kụ ingọ bọ iyira okuphom owol mọ aZihova kapagharanhaạn ni iiḅereghị phọ ayira?

² AZihova aphagharanhaạn ni iiḅereghị phọ aZizọs loor esi dị Odị apomhoghiạn Oọny phọ Odị. Eḍighi maạr dị yira olhọgh inyaạm oḍighi ghan raraạr dị keḅeraạn aZihova, odị kuphomhoghiạn aani ni iyira, aḅilhẹ apagharanhaạn iiḅereghị phọ ayira ilọ olhoghonhaạn aḍighaạgh r’oghoph. Idiphọ Uw-emhụ eghunotu dị amhoọgh ogbolhomaam, aZihova kakiọm ni ghisigh apomhoghiạn aḅilhẹ apogh nmụny phọ odị. Iduọn kụ i/lo, kepuẹ ḍien odị eḅilhẹ eefolhomhi nyodị!

3. Eeghe kụ iḍighi kụ emhoghi bọ dị aZihova kughoph iyira ḍio arodon?

³ Yira omoghi oghoph aZihova nyiidiphọ opuemhi mem dị meten. Mophorogh Setan epẹ k’akẹ phọ, kụ “oghạgh ologhi odị abụgh ni.” (Ogan. 12:12) Odị maḍighi idị abuniin abuphẹ rumhiinhẹ ghan bọ iyira rootughiạn ghan mọ bunọ ‘oḍighi rongọ Enaạn.’ (Jọn 16:2) Abunhọn dị u/meeraam Enhaạn, rumhiinhẹ ghan iyira loor iduọn yira ogbatanhaạn bọ r’awe isiẹn aḅirinhi phọ. Etigheri torobọ ipẹ ekọm bọ kụ awe rugbiphoghọm bọ iyira, yira ro/kiilhaan. Eeghe kụ iḍighi? Loor esi dị Ekpo Onhụ phọ Enhaạn eḅẹm ni mọ: “Omoọgh-we phọ kaḍighi ni iphẹn dị aguanaan bọ. Odị kingọ ni inyina inyaạm, iphẹl inyina asighẹ ḍighaạgh Eru.” (2 Tẹs. 3:3) Ika kụ idị aZihova  rughoph ghan iyira? Uguạ, ooḅeghiọn iyạl areten.

4. Odaphạn Efesọs 6:13-17, aZihova amiteom eeghe oghophom ayira?

⁴ AZihova amiteom iinyạ eghạm dị ketue ighoph iyira esighẹ esi izuoghom mọ aSetan. (Bạl Efesọs 6:13-17.) Iinyạ eghạm mọ Enhaạn emoọgh iikpọ ḅilhẹ emoon agey! Kuolọ amem lọ yira osighẹ oomo iinyạ eghạm mọ Enhaạn onyaaghiạn—oḅilhẹ oghiọm ghisigh oḍighinhom ghan, kụ idị ketue ighoph iyira. Araraạr iinyạ eghạm Enhaạn emerenyạn eeghe? Uguạ, ooḅeghiọn eniin etum nyeniin.

5. Eeghe kụ okuughaam igey phọ, kụ eeghe kụ iḍighi kụ ewạ bọ ni mọ osighẹ oḍighinhom?

⁵ Okuughaam igey phọ ramạ ghan igey phọ edi bọ siphẹ Ekpo Onhụ phọ Enhaạn, Baibul phọ. Eeghe kụ iḍighi kụ ewạ bọ ni mọ osighẹ oḍighinhom okuughaam mọ ophọn phọ? Loor esi dị aSetan “odẹ oomo okpẹ.” (Jọn 8:44) Odị mamhiigh ni ogbạ okpẹ esi asimuonịr asiạ ḅilhẹ maakeleghi “oomo aḅirini phọ”! (Ogan. 12:9) Kuolọ, igey phọ edi bọ siphẹ aBaibul phọ righoph ghan iyira kesighẹ esi iikeleghian phọ aSetan. Ika kụ idị yira kotue osighẹ oḍighinhom okuughaam mọ ophọn phọ oghaạph bọ omaaniọm siẹn phọ? Yira koḍighi iduọn phọ esi otuughạ olhegheri igey phọ ilọ aZihova, r’esi ooseenyom ghan odị “uwaIoor r’igey phọ,” ḅilhẹ r’oḍighi ghan ipẹ eru bọ igey oomo amem.—Jọn 4:24; Efẹ. 4:25; Hib. 13:18.

6. Eeghe kụ amamạ oghophom ekpologhi phọ, kụ eeghe kụ ewạ bọ dị yira kokpologhiạn?

⁶ Amamạ oghophom ekpologhi phọ amerenyạn siigbu elhiom eḍighinhom iyaạr phọ aZihova. Eeghe kụ iḍighi kụ yira kokpologhiạn bọ amamạ oghophom ekpologhi phọ ophọn phọ? Idiphọ amamạ oghophom ekpologhi rakoph ghan bọ ekpom onyọ eghạm dị osọph ka/gim, amamạ oghophom ekpologhi phọ aḍighi bọ elhiom eḍighinhom iyaạr phọ rekoph ghan ekpom mọ ayira, obobọ oye phọ yira oru bọ kesighẹ esi araraạr aḅirinhi phọ dị ke/tue epuẹ ekpọm mọ ayira. (Prov. 4:23) AZihova rawạ dị yira kopomoghiạn oḅilhẹ okumu nyodị r’oomo ekpom. (Mat. 22:36, 37) ASetan rakparaghạ ghan odi ekpom mọ ayira, esi oḍighi idị yira kopomoghiạn raraạr aḅirinhi phọ—raraạr dị aZihova i/ḅeraạn. (Jems. 4:4; 1 Jọn 2:15, 16) Kụ eḍighi maạr dị ekeḍi phọ ephẹn phọ i/moọgh ekol, odị kamiigh ogbiphoghọm ayira, obọ yira oḍighi iyaạr dị aZihova i/ḅeraạn.

7. Ika kụ idị yira rokpologhiạn ghan amamạ oghophom ekpologhi phọ eḍighi bọ siigbu elhiom eḍighinhom iyaạr phọ?

⁷ Yira rokpologhiạn ghan amamạ oghophom ekpologhi phọ esi odaphạn asiigbu phọ aZihova idị egbolhomaam igey r’ikarạph. (Ps. 97:10) Abuniin awe rootughiạn ghan mọ asiigbu phọ aZihova resiphigha ghan bidị. Eḍighi maạr dị yira owilẹ odaphạn asinhị iilhogh aBaibul phọ siphẹ adọl aghuḍum mọ ayira, pọ yira okịgh onyọ eghạm dị akporonhaạn oghophom ekpologhi phọ odị aseere mem dị odi erugh eghạm loor esi dị mọ aamọr. P’eeghe elologhi! Buphẹ ophomhoghiạn bọ aZihova, iilhogh phọ odị “ii/mọr” esi abidị, kuolọ repẹl ghan ghụn sighuḍum.—1 Jọn 5:3.

8. Remạ ghan eeghe olhoghạ okoro ookolhobian ogbeelhom iiḅi iinhaghạn phọ?

⁸ APọl uroma iyira kẹn mọ, olheenye elheeny ooḅi oghaạph eephọ phọ kụ aḍighi rokoro dị yira kologhạ. Iduọn phọ pọ remạ ghan mọ oomo amem yira ookolhobian ghan oghaạph iiḅi iinhaghạn Omhạr phọ. Mem dị yira oḅenhị aani bunhọn dom aBaibul phọ, omheeraam mọ ayira rakpạr ghan ni. Reḍighi ghan ni iyaạr oḅaạl olhoghi omhiịn dị awe phọ aZihova siẹn oomo aḅirinhi phọ rowạ ghan roopoogh ogbeelhom iiḅi iinhaghạn phọ—mem dị odi otu oḍighi, otu askul, rokool dị romuul siḍighi, ḅilhẹ r’amem dị oḍuạ otu r’ogbạ otu, oghị oghooghi araraạr, oghị ophogh asiya abidị, mem dị bidị rokaaphạn r’awe dị bidị olhegheri, ḅilhẹ ghalhamọ r’amem dị asidọl phọ i/meera mọ omite erugh. Eḍighi maạr dị yira omheel oḍighanhaan esi oghiilhaan bịn owilhẹ ogbeelhom iiḅi iinhaghạn phọ, pọ yira okịgh onyọ eghạm dị akporonhaạn rokoro phọ odị mem eghạm; odị atue ni aḍighima iyaạr  siphẹ eḍạ owol phọ odị. Kụ iphẹn phọ kekọm idị odị ka/tue amerenyạn izuoghom mọ, ḅilhẹ odị ka/tue adaphạn itọ oḍiemhiom mọ odị.

9. Eeghe kụ iḍighi kụ emhoghi bọ dị yira kopạm osuarạm mọ ayira?

⁹ Osuarạm Omheeraam mọ ramạ ghan omheeraam mọ yira omhoọgh bọ oghị esi aZihova. Yira omoọgh omheeraam mọ aZihova kamunenhi ni ruguanhaan phọ odị. Omheeraam mọ kulhoghonhaạn iyira ḍighaạgh ‘okoronaan oomo ikpinạ epo phọ Eru ketum bọ niạn etạph ghan etuom.’ Eeghe kụ iḍighi kụ emhoghi bọ dị yira kopạm osuarạm mọ? Loor esi dị righoph ghan iyira kesighẹ esi ikarạph itughemhị abuphẹ momheel bọ oḍuạ siẹn igey phọ obobọ esi oḅonyonhu ozuan loor iḅenị-yogh abuphẹ rogbaaghiọm bọ omheeraam mọ ayira. Omheeraam kụ o/lho loor ayira, yira ko/tue omoọgh inyaạm omherenyạn abuphẹ rukpaariọm ghan bọ iyira ophogh ogunhọm asiigbu phọ aZihova. Ḍieriphọ aḍighaạgh phọ, torobọ amem dị yira ogbạ omheeraam mọ ayira epẹ otu oḍighi phọ ayira obobọ epẹ otu askul phọ, pọ omheeraam mọ ayira mughoph iyira. (1 Pit. 3:15) Torobọ amem dị yira oghel eepoogh oḍighi dị ka/meera ungọ iyira eepoogh okumuan arukumuan phọ aZihova ḅilhẹ r’oghị ituughạ, pọ yira opạm ni osuarạm mọ ayira. (Hib. 13:5, 6) Ḅilhẹ kẹn, torobọ amem dị yira rokumu ni aZihova etigheri isophoghom, pọ osuarạm mọ ayira mughoph iyira.—1 Tẹs. 2:2.

10. Eeghe kụ eghoony apelieẹny phọ, kụ eeghe kụ iḍighi kụ emhoghi bọ dị yira kozua?

 ¹⁰ Eghoony apelieẹny phọ pọ oḍuomolhoghi phọ aZihova ungọ bọ iyira—oḍuomolhoghi phọ yira omhoọgh bọ mọ odị kuphẹl li iyira esi aḍuugh ḅilhẹ akpẹ iikpiạ oomo abuphẹ roḍighi bọ ogbi phọ odị. (1 Tẹs. 5:8; 1 Tim. 4:10; Taitọs 1:1, 2) Idiphọ eghoony amamạ rekoph ghan bọ emhụ onyọ eghạm, eghoony apelieẹny phọ rakoph ghan iitughiạn r’olhegheri iyaạr phọ ayira. Eghẹn eten? Oḍuomolhoghi phọ raḍighi ghan idị yira rogbon ghan ruguanhaan phọ Enhaạn ḅilhẹ r’idị yira koo/ḅaghamhiạn ghan loor iboom ilọ iiḅaghamhị dị yira osoman. Ika kụ idị yira rozua ghan eghoony phọ ephẹn phọ? Yira rozua ghan eghoony apelieẹny phọ esi oḍighi ghan idị iitughiạn phọ ayira keḅọph r’iitughiạn phọ Enhaạn. Esi omaạm, yira okpasaghị oḍuomolhoghi phọ ayira esi Enhaạn, ke/si eelạ.—Ps. 26:2; 104:34; 1 Tim. 6:17.

11. Eeghe kụ elhool eghạm mọ uwaloor iigbia phọ rangọ ghan bọ, kụ uḍighi ika kụ emhoghi bọ dị yira kosighẹ oḍighinhom?

¹¹ Elhool eghạm mọ uwaloor iigbia phọ rangọ ghan bọ pọ Ekpo Onhụ phọ Enhaạn, aBaibul phọ. Elhool eghạm mọ emoọgh iikpọ dị ketue ni esoph etoph oomo okpẹ kirokirọ, ḅilhẹ etagharạn we oḍighi ebenhẹ ongọ itughemhị okpẹ r’ikarạph araagharạ. (2 Kọr. 10:4, 5; 2 Tim. 3:16, 17; Hib. 4:12) Yira rotuughạ ghan ilọ omhaạr oḍighinhom elhool eghạm mọ ephẹn phọ dị eego esi ituughạ aBaibul ogina ayira ḅilhẹ r’esi itughemhị phọ ookpomhoghan phọ Enhaạn rutughemhị ghan bọ iyira. (2 Tim. 2:15) Etigheri iinyạ eghạm mọ, aZihova ungọ ni iyira enhọn iyaạr dị emhoọgh iikpọ agey dị kighoph iyira. Eeghe kụ iyaạr phọ ephẹn phọ?

12. Yira obilhẹ omoghi eeghe, kụ eeghe kụ iḍighi?

¹² Ogey onyọ eghạm dị asilor alegheri ni mọ ogina onọ ka/tue abean ḍita awe eghạm; mọ onọ amoghi ni olhoghonhaạn aḍighaạgh abunhọn. Iniin phọ kẹn ni, yira bịn ko/tue obean Setan r’abudaphạm mọ odị; yira omoghi ni olhoghonhaạn aḍighaạgh abumor r’abumarani phọ. AZihova m’ungọ iyira “buọ asiya” oomo isiẹn aḅirinhi phọ dị ookolhobian ni olhoghonhaạn ayira ḍighaạgh.—1 Pit. 2:17.

13. Odaphạn Hibru 10:24, 25, eeghe asuọ kụ raḍuạ ghan kamite oghị ghan ituughạ?

¹³ Eniin eten dị yira romoọgh ghan obakị pọ oghị ghan ituughạ. (Bạl Hibru 10:24, 25.) Mem dị yira oḅonyonhu ozuan—idiphọ rimitenhaan ghan bọ ni iyira eeni amem—ituughạ phọ yira rokị ghan bọ rilhọgh ghan ni iyira kephophe. Ophanyanhaạn abumor r’abumarani phọ riimhanhamhi ghan iyira. Araghaạph aBaibul phọ rongọ ghan bọ siphẹ otu ituughạ phọ ḅilhẹ r’oḍighi oḍeenhaan phọ rikparamhị ghan iyira oghiọm aghisigh okumu aZihova. Ḅilhẹ kẹn, oghaaphạn abumor r’abumarani phọ, mem dị ituughạ ke/mhiigh ḅilhẹ r’amem dị m’omhạn ituughạ phọ rikparamhị ghan iyira. (1 Tẹs. 5:14) Oḅarạm isiẹn, ituughạ phọ r’ingọ ghan iyira eepoogh oghelhọm aani ibo phọ edi ghan bọ olhoghonhaạn aḍighaạgh bunhọn. (Iiḍighi 20:35; Rom. 1:11, 12) Ituughạ phọ ayira eḅilhẹ ni rilhoghonhaạn ghan iyira ḍighaạgh inhọn areten. Retophomhi ghan sighalhanyạ ayira ilọ oghaạph iiḅi iinhaghạn phọ r’otughemhị aBaibul phọ. Esi omaạm, yira rotuughạ ghan ni ilọ osighẹ oḍighinhom Igbe Araraạr Osighẹ Otughemhiọm Mọ Ayira. Esi iduọn phọ, kookolhobian ghan agey kụ agbi oghị ituughạ. Maạr ghan alher rurụ mem dị ituughạ phọ memhiigh. Mem dị ituughạ emhinheen, sighẹ ni aḍighinhom ipẹ nạ matuughạ bọ. Nạ aḍighi iphẹn phọ, nạ kaḍighi ni “ogey onyọ eghạm k’aJizọs Kraist.”—2 Tim. 2:3.

14. Eeghe onhọn olhoghonhaạn aḍighaạgh kụ edị yira omhoọgh?

¹⁴ Yira oḅilhẹ kẹn omoọgh olhoghonhaạn aḍighaạgh aḍita aruukpaạny dị omhoọgh iikpọ. Gbiom olhoghi idị oniin ookpaạny katue aḍighi! (Isa. 37:36) Kụ agbiom nuụn olhoghi idị aḍita aruukpaạny ketue eḍighi. Oye obobọ okarạph uwaloor o/lho dị katue amerenyạn ḍita awe  eghạm iikpọ phọ aZihova. Okạr oghaạph, oniin onyọ Ogbaanhaạn aZihova dị akpẹ oḍuomolhoghi katue ni amerenyạn ḍiboom aḍita. (Judg. 6:16) P’eeghe idị ipẹ phọ eru ni inẹ! Tuutughiạn ghan ni iphẹn phọ mem dị oye otu oḍighi anyinha, obobọ olọ askul anyinha, onyọ asiya anạ dị ra/tu aani ghan ituughạ aghaạph obobọ aḍighi iyaạr dị ekọm oḅonyonhu ozuan engọ nyinhạ. Legheri mọ ogina anạ bịn o/lho. Nạ odi eeḍiạn iiḅakiọm aZihova, kụ iḍighi kụ odị kabakị ni nyinhạ.

15. Odaphạn Isaiah 54:15, 17, eeghe kụ iḍighi kụ ko/tue bọ okpomori runhụ awe phọ Enhaạn?

¹⁵ Aḅirinhi phọ aSetan omoọgh ni ibadị ariphigh otuạn olhọgh ayira ḍien. Yira ro/pinomaam ghan bin iikonoghiạn odạ ḅilhẹ r’oghị ee araaghạm. Yira rogbeelhom ghan ḍien phọ Enhaạn, koghaạph ilọ Omhạr phọ odị idiphọ ogina itooghị dị kesighẹ eephọ etu, ḅilhẹ yira rodạph ghan siigbu elhiom eḍighinhom iyaạr phọ odị. Yira roḅenhị ghan we mọ otooghiạ aḅirinhi phọ ophọn phọ ogbaạm okpẹ ḅilhẹ r’ookọm-enu. (Jọn 8:44) Ḅilhẹ kẹn yira rogbeelhom ghan ilọ amuphe phọ ratu bọ osoorom aḅirinhi phọ aSetan. Kuolọ, aSetan r’abudaphạm mọ odị ko/tue okpomori runhụ ayira. Kparipẹ ghụn ni, yira kokiọm ni ghisigh ooseeny ghan aZihova, esi osighẹ ghan oḍighinhom atorobọ eten phọ epẹ yira kotue bọ! Ghalhamọ r’iduọn aSetan amhoọgh bọ ni iikpọ, odị o/rue osophoghom dom Omhạr phọ oteẹny awe siẹn oomo aḅirinhi phọ. Oghoph phọ aZihova kụ aḍighi bọ idị iphẹn phọ edugh.—Bạl Isaiah 54:15, 17.

16. Ika kụ idị aZihova kapẹl bọ we phọ odị mem igbogh iiḅaghamhị phọ?

¹⁶ Eeghe kụ kemite ghisigh? Mem igbogh iiḅaghamhị phọ, aZihova kuphẹl li iyira esi iyạl iikiạ areten. Eḅẹl phọ, odị kapẹl rebenhẹ phọ odị oḅạr bọ nyodị mem dị odị kalọgh bọ iitughiạn ilhoghi abudaạm aḅirinhi phọ ophiemhi aBabilọn Ogbogh phọ, aḍighi bọ oomo aruukụ iiḅereghị okpẹ. (Ogan. 17:16-18; 18:2, 4) Ipẹ reten, odị kapẹl li we phọ odị mem mọ odị kapiemhi bọ oomo itooghị phọ aSetan siphẹ Amagedọn.—Ogan. 7:9, 10; 16:14, 16.

17. Ika kụ idị yira komooghọm suọ eḍighi maạr dị yira okuamhị oḅạr aZihova?

¹⁷ Eḍighi maạr dị yira okuamhị oḅạr aZihova, aSetan ka/tue uphiemhi iyira. Okạr oghaạph, odị kụ edị kopiemhi k’agee-pọ. (Rom. 16:20) Kụ iḍighi kụ, nyaaghiạn oomo iinyạ eghạm mọ Enhaạn—ka/kporonhaạn! Kaa/tughiạn mọ ogina anạ bịn katue ni eenan Setan r’aḅirinhi phọ odị. Bakị aani bumor r’abumarani phọ. Kụ adaphạn ghan iiḅakiọm mọ aZihova. Nạ aḍighi iduọn phọ, nạ kakuphom ni owol mọ Odẹ k’akẹ phọ anạ kakparamhị ni aḅilhẹ aghoph nyinhạ.—Isa. 41:10.