1. Odaphạn Matiu 24:9, eeghe kụ iḍighi kụ ke/ḍighi bọ iikia esi ayira, eḍighi maạr dị aḅirinhi phọ ulhọgh iyira ḍien?

AZIHOVA ulhẹm iyira eten dị yira kopomhoghiạn ghan we, ḅilhẹ awe kuphomhoghiạn ghan iyira. Esi iduọn phọ, mem dị oye ulhọgh iyira ḍien olhoghi ayira ra/ḅaạl ghan, eeni kẹn yira romoọgh ghan ni oghiilhaan. Esi omaạm, onyọ umarani dị oghol mọ Georgina, dị odi ghan epẹ Europe aḅẹm mọ: “Mem dị mị amhạn 14 asiạ, onhiin amhị ulhọgh imhị ḍien loor okumu aZihova. Mị ulhoghoma igini, kụ mị amhiigh ookia mughumọ mị ogey oye ni.” * Onyọ umor dị oghol mọ Danylo agẹ mọ: “Mem dị abuọ eghạm ukuphogh imhị, uutuuny imhị, oḅilhẹ upaạr imhị loor iduọn mị aḍighi bọ onyọ Ogbaanhaạn AZihova, iikperemhi ni imhị, mị aḅilhẹ alhoghoma roofolha.” Repin ghan ni iboom mem dị awe ulhọgh iyira ḍien, kuolọ i/ḍighi iikia esi ayira. AZizọs aḅẹm ni mọ kulhọgh ni iyira ḍien.—Bạl Matiu 24:9.

2-3. Uḍighi ika kụ olọgh bọ ḍien buẹn rodạph bọ Zizọs?

² Aḅirinhi phọ olọgh ḍien bumatuạn phọ aZizọs. Eeghe kụ iḍighi? Loor esi dị idiphọ aZizọs, yira “k/abuọ aḅirini phọ.” (Jọn 15:17-19) Kụ iḍighi kụ, ghalhamọ r’iduọn yira rolọgh ghan bọ ni eegu itooghị omhạr awe, yira roo/seeny ghan bidị obobọ silagbạ abidị. Yira rooseeny ghan aZihova bịn. Yira robakị ghan elhiom mọ Enhaạn emhoọgh bọ otooghị ongọ omhạr awe—elhiom mọ aSetan r’otul phọ odị mopạ bọ. (Gen. 3:1-5, 15) Yira rogbeelhom ghan mọ Omhạr phọ k’Enhaạn bịn kụ oḍuomolhoghi omhạr awe, ḅilhẹ mọ moọny amem kapiemhi oomo abuphẹ ogbagharạn bọ Itooghị Omhạr phọ. (Dan. 2:44; Ogan. 19:19-21) Adom mọ aḍiphẹ phọ eḍighi ni  iiḅi iinhaghạn esi abuphonheẹn awe phọ, kuolọ eḍighi ikarạph iinhaghạn esi abukarạph phọ.—Ps. 37:10, 11.

³ Oḅilhẹ kẹn otuạn iduọn yira rodạph ghan bọ iilhogh phọ Enhaạn kụ ulhọgh iyira ḍien. Iilhogh phọ Enhaạn egbatanhaạn ni r’iḅoriạ araagharạ aḅirinhi phọ. Esi omaạm, ibadị okạr odimom ghan iḅoriạ iḍighinhom araraạr phọ erọl ghan bọ Sodom r’aGomorrah kụ Enhaạn ephiemhi bọ! (Jud 7) Loor iduọn yira rodạph ghan bọ siigbu aBaibul phọ idị egbolhomaam iḍighinhom araraạr phọ ipẹ phọ, ibadị awe rugilaạm ghan ni iyira, bidị roḅẹm ghan mọ yira igbagarạ awe.—1 Pit. 4:3, 4.

4. Ighẹn araagharạ kụ rikparamhị ghan iyira mem dị awe ulhọgh iyira ḍien?

⁴ Eeghe kụ kilhoghonhaạn iyira ḍighaạgh okparạm mem dị awe ulhọgh iyira ḍien ḅilhẹ ruutuuny iyira? Ewạ mọ okparamhị omheeraam mọ ayira mọ aZihova kulhoghonhaạn ni iyira ḍighaạgh. Idiphọ osuarạm, omheeraam mọ ayira katue ni aḍighi idị yira kokoronaan oomo “ikpinạ epo phọ Eru ketum bọ niạn etạph ghan etuom.” (Efẹ. 6:16) Kuolọ, ewạ kẹn enhọn iyaạr. Ewạ mọ omhoọgh ephomhoghiạn. Eeghe kụ iḍighi? Loor esi dị ephomhoghiạn “re/kpom ghan ekpom.” Okụ o/lhoonhaan ghan omheeraam mọ r’okparạm mọ odị. (1 Kọr. 13:4-7, 13) Uguạ omhiịn idị ophomhoghiạn aZihova, r’abuẹn r’ayira oḅọph bọ omheeraam mọ, ghalhamọ kẹn r’amulhọgh ḍien phọ ayira ketue inyaamhị iyira okparạm amulọgh ḍien.

5. Ika kụ idị ephomhoghiạn phọ aZizọs amhoọgh bọ aghị esi Odẹ phọ odị ekparamhị nyodị?

⁵ Ḍughul phọ aḍiphẹ eḅaạl amulọgh ḍien phọ odị kokiigh bọ nyodị, aZizọs aḅenhị buphẹ obạr bọ nyodị mọ: “Mị apomoghiạn ni Odẹ phọ kụ mị atuụgh ghan bọ oomo iIọ dị atọ raḍighi ghan.” (Jọn 14:31) Ephomhoghiạn phọ aZizọs amhoọgh bọ aghị esi aZihova kụ ikparamhị bọ nyodị osoman odẹgh ophogh phọ akori ghan bọ nyodị. Yira ophomhoghiạn aani aZihova yira kotue ni oḍighi aani iniin phọ.

6. Odaphạn Rom 5:3-5, arebenhẹ phọ aZihova rologhoma ghan ika ilọ amulọgh ḍien aḅirinhi phọ?

⁶ Ophomhoghiạn Enhaạn reloghonhaạn aani ghan kẹn ḍighaạgh rebenhẹ phọ aZihova okparạm igbiphoghọm. Esi omaạm, mem mọ ogbogh otu iiruẹn aJu phọ otọ bọ mọ abutelhedom mọ ku/kaạph mun iiḅi iinhaghạn phọ, ephomhoghiạn Enhaạn iḍighi idị bidị oḅẹm mọ, “yoor konaghanạn Enaạn, ko/naghanạn we.” (Iiḍighi 5:29; 1 Jọn 5:3) Edọ phọ ephomhoghiạn phọ ephẹn phọ rekparamhị aani ni kẹn bumor phọ ayira abuphẹ osoman bọ igbiphoghọm ḍighaạgh abuọ itooghị dị omhoọgh ni iikpọ iboom ḍio arodon. Yira ro/ḅonyonhu ghan kozuan mem dị aḅirinhi phọ ulhọgh iyira ḍien, yira romoọgh ghan ghụn oḅaạl olhoghi.—Iiḍighi 5:41; bạl Rom 5:3-5.

7. Ika kụ idị yira kozọ mem dị abuọ eghunotu ayira usophoghom iyira?

⁷ Eeni iniin igbogh ipaanhaạn ayira reḍuạ ghan esi abuọ eghunotu ayira kụ etu. Mem mọ yira omhiigh bọ omhoọgh aḍiḅeraạn igey phọ, eeni abuniin abuọ eghunotu ayira uutughiạn ghan mọ muukeleghi iyira. Abuniin otue ni ootughiạn mọ emhụ ayira i/bomạ. (Poghom Mạk 3:21.) Bidị otue ni uzuoghom iyira. Isophoghom mọ iphẹn phọ ki/ḍighi iikia esi ayira. AZizọs aḅẹm mọ: “Asiya oye phọ kụ kolọgh oye phọ ḍien.” (Mat. 10:36) Kuolọ etigheri ipẹ asiya phọ ayira uzoọm bọ iyira, yira ro/zoọm ghan bidị idiphọ amulọgh ḍien ayira. Ḍieriphọ aḍighaạgh phọ, ephomhoghiạn phọ yira omhoọgh bọ oghị esi aZihova r’abunhọn rebụgh ghan ghụn. (Mat. 22:37-39) Kuolọ yira ko/tuạn oḍighi idị eḅeraạn we bịn o/bilhẹ odaphạn iilhogh r’asinhị iilhogh aBaibul phọ.

8-9. Eeghe kụ ilhoghonhaạn ḍighaạgh oniin onyọ umarani orue omheerạ giph etigheri igbagarạ isophoghom?

⁸ AGeorgina, oghaạph bọ oghol epẹ omhạn, arue ni amheerạ giph etigheri igbagarạ isophoghom onhiin phọ odị. AGeorgina aḅẹm mọ: “Onhiin amhị r’amhị kụ umhiigh otuughạ aBaibul r’Abugbaanhaạn phọ. Kụ odiiny unwanyụ reten,  mị rawạ omhiigh oghị aani ghan ituughạ bịn onhiin phọ amhị anmia. P’iduọn phọ odị raaḍikuan ghan r’awe dị momheel oḍuạ siẹn igey phọ, kụ odị asighẹ ghan okpẹ phọ abidị kụ aagbaghanhaạn ghan r’amhị mem lọ yoor rokaạph. Odị uutuuny ghan ni imhị, aruphi silaạl amhị, apọgh ekpooko amhị, aḅilhẹ aroḅolhoghi ghan rinyạ phọ amhị. Mị romhạn 15 asiạ bịn mị aḍiiny muụm. Onhiin amhị akparaghạ ni osophoghom amhị dị tutụ usighẹ imhị aghị esi dị rosereghi ghan ibạm anmụny dị u/sereghian. Isophoghom rekpạr ghan ni okaran mem dị eḍuạ esi oye dị akpẹ ghụn ophomhoghiạn ḅilhẹ r’ophogh anạ kụ eru.”

⁹ Eeghe kụ ilhoghonhaạn bọ ḍighaạgh Georgina okparạm? Odị aḅẹm mọ: “Ḍio phọ onhiin phọ amhị amhiigh bọ onyaạm amhị, purukụ mị aạl oomo aBaibul phọ amhadạn. Mị umheeraam ni akuphom owol mọ mị mamhiịn igey phọ, kụ mị aḍuraan atuman aZihova. Mị u/gbạ ghan mem ooḅereghị aZihova, kụ odị unhaghanhạn ghan ni imhị. Mem mọ mị arọl ghan bọ epẹ odị usighẹ bọ imhị aghị, oniin onyọ umarani umhạgh ghan ni imhị omite aani ghan k’odị, kụ iyạl phọ ayoor oḅọph onhụ ooḅeghiọn ghan Baibul phọ. Mem mọ amuphẹ phọ, abumor r’abumarani phọ kụ ukparamhị ghan imhị. Bidị usighẹ imhị idiphọ oniin olọ eghunotu abidị. Iigholhaan ni esi amhị mọ aZihova kụ amhoọgh inyaạm apu buọ isophoghom mọ etigheri budọ awe phọ bidị oru bọ.”

10. Eeghe kụ idị yira kokuphom owol mọ aZihova kaḍighi ni ungọ iyira oomo amem?

¹⁰ Otelhedom mọ aPọl agẹ mọ iyaạr i/lo dị ketue “igbariọn iyira siphẹ ephomoghiạn phọ Enaạn iphomoghiạn bọ iyira phọ moḅophoghạn bọ Jizọs Kraist Omoọgh-we phọ ayira.” (Rom. 8:38, 39) Yira otue ni omiinhọm eeni amem, kuolọ aZihova odi ni agạ ayira oodereghị r’okparamhị ayira oomo amem. Kụ iphẹn emitenhaan bọ Georgina, eḍeenhaan ni mọ aZihova rulhoghonhaạn ghan kẹn iyira ḍighaạgh dị eego esi abuuḅi abumor r’abumarani phọ ayira.

11. Ika kụ idị ephomhoghiạn phọ aZizọs aghaạph bọ siphẹ Jọn 15:12, 13 keloghonhaạn ḍighaạgh butelhedom mọ odị? Ngọ eḍeenhaan.

¹¹ Ḍughul phọ aḍiphẹ eḅaạl odị kamugh bọ, aZizọs aatughianhạm bumatuạn phọ odị mọ oniin aphomhoghiạn nyoniin. (Bạl Jọn 15:12, 13.) Odị alhegheri ni mọ ephomhoghiạn osighẹ aloor ophighironhọm ekiạ kụ ketue eloghonhaạn ḍighaạgh bidị omhoọgh amuḅọph ḅilhẹ r’okparạm amulọgh ḍien aḅirinhi phọ. Ooḅeghiọn eḍeenhaan ookpomhoghan phọ arọl bọ Tesalonikạ. Umhiigh ogbiphoghọm abumor phọ k’amem mọ purukụ ophighi bọ ookpomhoghan phọ. Ghalhamọ r’iduọn phọ ni, abumor r’abumarani phọ uphighi ni emạ eḍeenhaan esi ophạm aḍimheerạ phọ  abidị ḅilhẹ r’oḍeenhaan ephomhoghiạn. (1 Tẹs. 1:3, 6, 7) APọl aroma bidị mọ oghiọm ghisigh oḍeenhaan ghan ephomhoghiạn, kụ aḅẹm mọ “iḍighi ni epuemi siẹn.” (1 Tẹs. 4:9, 10) Ephomhoghiạn kenyu bidị okparamhị abuọ eepuph, ḅilhẹ r’olhoghonhaạn aḍighaạgh bulọ modugh. (1 Tẹs. 5:14) Bidị udaphạn ni oroma phọ aPọl, pọ kụ iyaạr phọ siphẹ omhunhenhiom iyạl aḍinyạ phọ odị agẹ bọ aghiọm bidị, odị aḅẹm mọ: “Omeeraam mọ anyina rapoph ni kaghị ghisigh, ḅilẹ kẹn ephomoghiạn phọ oniin aphomoghiạn bọ nyoniin rebụgh ni.” (2 Tẹs. 1:3-5) Ephomhoghiạn phọ abidị ilhoghonhaạn bidị ḍighaạgh okparạm aḍikparaminheẹn r’igbiphoghọm.

12. Ika kụ idị abumor r’abumarani oḍeenhaan ephomhoghiạn, mem eghạm?

¹² Ooḅeghiọn idị emitenhaan Danylo oghaạph bọ oghol epẹ omhạn, r’anhịr odị. Mem dị eghạm dị erọl eelhe abidị esi aani epẹ emhạ phọ abidị, bidị ughiọm ni ghisigh oghị ghan ituughạ, oghaạph ghan iiḅi iinhaghạn phọ ipẹ bidị kotue bọ, oḅilhẹ ghan odi aani eḍien lọ bidị omhoọgh ongọ aani bumor r’abumarani phọ. Eniin aḍio, abuọ eghạm dị ophạm silaagbạ ughị ni otọ k’aDanylo. ADanylo aḅẹm mọ: “Bidị uḅenhị imhị mọ mị ukunyan mọ mị ko/nyọ Ogbaanhaạn mun. Iduọn mị u/meera bọ, kụ ukuphogh imhị, ugbonomiom imhị laagbạ kụ orạph otenhe ghan anyụ emhụ amhị. Bidị koḍuạ kụ upaạr imhị mọ bunọ koḅilhẹ ni oḅulha obiighi anhịr amhị. Kuolọ abumor phọ ukem ni utuạn iyoor oghị osaạny atren bịn yoor oghị enhọn emhạ. Mị ka/tue ni bịn abulha ephomhoghiạn abuuḅi abumor phọ abuẹn phọ. Yoor oghị bọ osi ephodiphọ emhạ phọ, abumor r’abumarani phọ ungọ ni iyoor eḍien, uwaanhaạn imhị oḍighi r’esi orọl! Bịn eḍighi idị yoor orue olhọgh aani otu bunhọn Abugbaanhaạn dị oghiil aani eghạm mọ.” Iphẹn phọ iḍeenhaan iyira mọ ephomhoghiạn aKristẹn ketue ni ilhoghonhaạn iyira ḍighaạgh okparạm amulọgh ḍien.

13. Ika kụ idị uwaloor iigbia phọ rulhoghonhaạn ghan iyira ḍighaạgh okparạm isiẹn arukumuan phọ aZihova etigheri mulọgh ḍien?

¹³ AZizọs aḅenhị bumatuạn phọ odị mọ ophomhoghiạn ghan ni mulọgh ḍien abidị. (Mat. 5:44, 45) Edugh ni ḍughụm? Eeye! Kuolọ r’olhoghonhaạn aḍighaạgh uwaloor iigbia phọ Enhaạn, edugh ni. Eemuma uwaloor phọ Enhaạn eḅaramaạm; ephomhoghiạn, okparạm, onmạ ighirigiir, osooromi aloor, ḅilhẹ r’ophamhaghạn aloor. (Gal. 5:22, 23) Araagharạ phọ iphẹn phọ kilhoghonhaạn iyira ḍighaạgh okparạm amulọgh ḍien. Ibadị abuọ isophoghom mọ monme olhoghi, eeni loor esi dị olom, anhịr, obumoọny, obobọ amatuman kụ aḍeenhaan raagharạ uwaloor phọ Enhaạn etigheri isophoghom. Ibadị abuọ isophoghom mọ  moḍighi aani kẹn buuḅi abumor r’abumarani ayira. Esi iduọn phọ, eḍighi maạr dị ekparanhaạn nyinhạ oḍeenhaan ephomhoghiạn bulọ olhọgh nyinhạ ḍien loor okumu aZihova phọ, pọ ḅeeḅereghị alhọm uwaloor iigbia phọ aZihova. (Luk 11:13) Kụ akuphom owol mọ iyaạr dị enhighẹ eeleeny orọl ipẹ Enhaạn rewạ bọ i/lo ghan.—Prov. 3:5-7.

14-15. Ika kụ idị aRom 12:17-21 elhoghonhaạn ḍighaạgh Yasmeen oḍeenhaan ephomhoghiạn olom mọ odị, etigheri igbagarạ isophoghom mọ?

¹⁴ Ooḅeghiọn eḍeenhaan aYasmeen. Mem mọ purukụ odị aḍighi bọ onyọ Ogbaanhaạn AZihova, olom mọ agbi mọ mookelheghi nyodị, kụ akparaghạ ghan osophoghom odị esi okumu Enhaạn. Aatuuny ghan nyodị, aḅilhẹ aḅenhị siya abidị r’uw-emhụ asiosị abidị, ḅilhẹ r’oḅaghamạ oyil okpẹ mọ opaạr nyodị, kụ aḅilhẹ aḅenhị mọ rakạ eghunotu phọ abidị. Olom mọ odị aḅilhẹ kẹn aatuuny bumor phọ eniin amem dị odi otu ituughạ! AYasmeen amhoghi ghan ni loor iduọn ozoọm ghan bọ nyodị eten dị i/nighẹ.

¹⁵ Mem lọ osi Kindọm Họl, abumor r’abumarani phọ uudereghị ghan ni oḅilhẹ okparamhị Yasmeen. Kụ ikumor awe phọ oroma nyodị osighẹ oḍighinhom ipẹ ogẹ bọ siphẹ Rom 12:17-21. (Bạl.) AYasmeen aḅẹm mọ: “I/dugh o, kuolọ mị ulhọm ni aZihova olhoghonhaạn aḍighaạgh, kụ mị aḍighi oomo ipẹ mị katue bọ osighẹ oḍighinhom ipẹ aBaibul phọ aghaạph bọ. Esi iduọn phọ, eniin amem dị olom amhị aghạgh olhoghi bịn azuughi eenịr olhoghotu phọ, mị ughị ni agbuurogh. Mem lọ odị ruutuuny imhị, mị uphagharanhaạn ghan ni eyoghoyoghọ eten. Ḅilhẹ mem dị amheel e/moon, mị uphogh ni nyodị.”

16-17. Iphẹn emitenhaan bọ Yasmeen etughemhị nyinhạ eeghe?

¹⁶ AYasmeen amhooghọm ni suọ esi oḍeenhaan ghan ephomhoghiạn olom mọ odị. Odị aḅẹm mọ: “Olom mọ amhị amhiigh ni oḍuom amhị olhoghi, loor esi dị odị alhegheri ni mọ mị ra/gbạ ghan okpẹ. Odị amhiigh olher arurụ ongọ amhị r’olhọgh eegu mem lọ yoor rokaạph ilọ ekụ iiḅereghị, bịn amheeraam oseere eephọ siphẹ olhoghotu phọ. Nyiidiphọ, odị muḅenhị imhị mọ mị ku/moọgh iiḅaghamhị, mọ mị ukị ghan ituughạ. Olom mọ amhị r’amhi rokelhọm ni ḍigey adọl r’eephọ nyiidiphọ. Mị aḍuom ni olhoghi mọ olom mọ amhị kanaghạn aani ni igey phọ, bịn yoor oḅọph onhụ okumu aZihova.”

¹⁷ Iphẹn emitenhaan bọ Yasmeen eḍeenhaan mọ “Ephomoghiạn eḍighi okparạm, . . . okụ o/loonaan ghan omeeraam mọ r’oḍuom ologhi phọ r’okparạm mọ odị.” (1 Kọr. 13:4, 7) Amulọgh ḍien amoọgh ni iikpọ ḅilhẹ rapin ghan ni, kuolọ ephomhoghiạn kụ imhoọgh iikpọ epu. Renme ghan rokpom. Rengọ ghan aZihova oḅaạl olhoghi. Kụ ghalhamọ abuọ isophoghom ughiọm ni ghisigh ulhọgh iyira ḍien, yira kotue ni omoọgh oḅaạl olhoghi. Ika?

18. Eeghe kụ iḍighi kụ yira komoọgh bọ oḅaạl olhoghi mem dị ulhọgh iyira ḍien?

¹⁸ AZizọs aḅẹm mọ: “Ibo k’Enaạn irolonaạn inyina mem dị awe ilọgh inyina ḍien.” (Luk 6:22) Yira roo/ḅereghị ghan mọ awe ulhọgh iyira ḍien. Yira ro/kelhọm ghan mem dị otuạn omheeraam mọ ayira rugilaạm iyira. Kụ eeghe kụ iḍighi kụ yira komoọgh bọ oḅaạl olhoghi mem dị ulhọgh iyira ḍien? Ooḅeghiọn iraạr ariphigh. Eḅẹl phọ, yira roḅeraạn ghan Enhaạn mem lọ yira rokparạm. (1 Pit. 4:13, 14) Edị etum siphẹ, reesạ ghan keḅilhẹ ekparamhị omheeraam mọ ayira. (1 Pit. 1:7) Omhunhenhiom iraạr, yira komoọgh iikpiạ dị ko/tue okoom ikpoki—ghuḍum k’agee-pọ.—Rom. 2:6, 7.

19. Uḍighi ika kụ abutelhedom mọ omhoọgh bọ ibo mem mọ ogurọgh bọ bidị?

¹⁹ Onyebel roten, mem mọ oḅeton bọ aZizọs siphẹ aḍuugh phọ, bịn abutelhedom mọ omhiịn oḅaạl olhoghi phọ odị aghaạph bọ. Mem dị ogurọgh bidị kụ otọ mọ bidị ku/kaạph mun iiḅi iinhaghạn phọ, bidị ubo ni. Eeghe kụ iḍighi? Loor esi dị “Enaạn megbiom aani mọ abunọ omanạm ni otuạn aḍien phọ aJizọs omiinọm.” (Iiḍighi 5:40-42) Bidị uphomhoghiạn Odẹ otu phọ abidị kụ opuemhi rigilaạm amulọgh phọ abidị. Kụ bidị uḍeenhaan ephomhoghiạn phọ abidị esi oghiọm aghisigh ogbeelhom iiḅi iinhaghạn phọ dị “u/soph ghan ḍio.” Ibadị abumor ayira okiọm ni ghisigh rokumu Enhaạn etigheri ḍikparamhinheẹn kirokirọ. Bidị olegheri ni mọ aZihova ka/bulha oḍighi phọ r’ephomhoghiạn phọ bidị omhoọgh bọ oghị esi aḍien phọ odị.—Hib. 6:10.

20. Yira kooḅeghiọn eeghe siphẹ emhuoghaạph phọ etum bọ siẹn?

²⁰ Aḅirinhi phọ kulhọgh ni iyira ḍien siẹn okarạph aḅirinhi phọ ophọn ko/si bọ eekunha. (Jọn 15:19) Kuolọ i/wạ mọ omhoọgh oghiilhaan. Iduọn yira komiịn bọ ni siphẹ emhuoghaạph phọ etum bọ siẹn, aZihova ‘kingọ ni inyina inyaạm aḅilhẹ apẹl’ buphẹ oḅạr bọ nyodị. (2 Tẹs. 3:3) Esi iduọn phọ, oghiọm ghisigh ophomhoghiạn aZihova, bumor r’abumarani phọ ayira, ghalhamọ kẹn r’amulọgh ḍien phọ ayira. Yira odaphạn oroma phọ ophọn phọ, amuḅọph phọ r’omheeraam mọ ayira kakpạr ri, esighẹ eegu etuomaan aZihova, kụ yira oḅilhẹ omạ omiteom mọ ephomhoghiạn emoọgh iikpọ epu mulọgh ḍien.