1. Eeghe iiḅaghamhị kụ edị awe phọ aZihova kotue ni osoman?

NẠ RAMIINHỌM ni igbagarạ iiḅaghamhị ḍughụm? Eeni oye siphẹ ookpomhoghan phọ maḍighi iyaạr dị repin esi anạ. (Jems. 3:2) Obobọ eeni awe dị r’anạ reḍighi ghan oḍighi obobọ rekị ghan askul rogilaạm ghan nyinhạ loor iduọn nạ rakumu bọ aZihova. (1 Pit. 4:3, 4) Obobọ abuọ eghunotu anyinha eeni rokparaghạ ghan okikima anạ oghị ghan ituughạ obobọ oḅaanhaạn abuphẹ r’anạ oḅọph bọ omheeraam mọ. (Mat. 10:35, 36) Iiḅaghamhị phọ kụ ephughạn, eeni nạ kaloghoma mọ kenighẹ ghụn owilhẹ okumu aZihova. Kuolọ kuphom ni owol mọ etigheri torobọ ipaanhaạn dị nạ asoman, aZihova kangọ ni nyinhạ osụ olhoghi r’inyaạm okparạm.

2. Odaphạn Rom 15:4, aạl ghan Ekpo Onhụ phọ Enhaạn kitir iyira ika?

² AZihova aḅarạm ni reḍeenhaan idị awe dị u/munughan orue okaran ipaanhaạn dị bidị osoman, siphẹ Ekpo Onhụ phọ odị. Eeghe kụ iḍighi? Pidị yira otuughaạny bidị. Ipẹ kụ idị aZihova anyu otelhedom mọ Pọl ogẹ. (Bạl Rom 15:4.) Aạl ghan igẹ areḍeenhaan awe aBaibul phọ ketue ni iidereghị iyira ḅilhẹ ingọ iyira oḍuomolhoghi. Toroboiperolbọ, orue omhooghọm asuọ igẹ aBaibul phọ epelhom ni oḅẹm mọ aạl ghan aBaibul phọ bịn. Ewạ mọ yira omheera Aḍinyạ Iigbia phọ eḅọl iitughiạn ayira ḅilhẹ etir rokpom ayira. Esi iduọn phọ, yira koḍighi ghan ika mem lọ yira robạl Baibul phọ owạ iiḅakiọm dị kilhoghonhaạn iyira ḍighaạgh okaran iiḅaghamhị dị yira osoman? Yira kotue ni osighẹ oḍighinhom inya phọ areten phọ iphẹn: (1) Ḅeeḅereghị, (2) Gbiom olhoghi, (3) Gbirima, ḅilhẹ (4) Sighẹ aḍighinhom. Uguạ ooḅeghiọn idị yira kotue osighẹ oḍighinhom inya areten phọ iphẹn phọ. * Ipẹ reten kụ yira osighẹ inya  phọ areten phọ iphẹn phọ otuughaạm raraạr dị emite siphẹ adọl aghuḍum uw-emhạ phọ Devid ḅilhẹ r’otelhedom mọ Pọl.

3. Kụ nạ agbi aạl aBaibul phọ, ewạ mọ ḍighi eeghe, kụ eeghe kụ iḍighi?

³ (1) Ḅeeḅereghị. Kụ nạ agbi omhiigh aạl aBaibul phọ, ḅeeḅereghị alhọm aZihova mọ odị alhoghonhaạn nyinhạ ḍighaạgh omhooghọm asuọ ipẹ nạ kabạl bọ. Esi omaạm, eḍighi maạr dị nạ rawạ oromha ilọ orue okaran iiḅaghamhị lọ nạ asoman, pọ ḅeeḅereghị alhọm aZihova alhoghonhaạn nyinhạ ḍighaạgh omhiịn asinhị iilhogh aBaibul dị edi siphẹ Ekpo Onhụ phọ odị dị kelhoghonhaạn nyinhạ ḍighaạgh osopha ogey osopha ilọ iiḅaghamhị phọ.—Fil. 4:6, 7; Jems. 1:5.

4. Eeghe kụ ketue elhoghonhaạn nyinhạ ḍighaạgh oḍighi idị ibạl aBaibul anạ ketu eye esi anạ?

⁴ (2) Gbiom olhoghi. AZihova ungọ iyira eekiạ epul iitughiạn. Orue oḍighi idị eḍeenhaan oye phọ nạ rabạl bọ siphẹ aBaibul phọ ketu eye esi anạ, kparaghạ ghan ogbiom olhoghi mọ nạ kụ oye phọ. Kparaghạ ghan omhiịn araraạr eten phọ epẹ oye aBaibul phọ nạ rabạl bọ ilọ odị amhiịn bọ aḅilhẹ alhoghoma.

5. Ogbirima p’eeghe, kụ ika kụ idị nạ katue agbirima?

⁵ (3) Gbirima ghan. Ogbirima remạ ghan omhaạr omhiigha aloor ootughiạn ilọ iyaạr phọ nạ aạl bọ ḅilhẹ r’ipẹ egbolhomaam bọ nyinhạ. Ogbirima ghan kalhoghonhaạn nyinhạ ḍighaạgh ookpomoghi oomo ipẹ nạ aạl bọ kụ omhoọgh ogey onhaghạn aḍughụm. Oye dị aạl Baibul phọ kụ u/gbirima akịgh idiphọ oye dị amhoọgh ni raraạr ogirom amooboph kuolọ uu/kpomoghi raraạr phọ u/lọgh guugh usạ. Mem dị nạ agbirima pọ nạ raakpomoghi ghan oomo araraạr ogirom amooboph phọ kalhoghoḍị siphẹ aguugh phọ. Oru ogbirima, nạ atue ni apuruan aḅilhẹ apanyanhaạn sipuru phọ iphẹn: ‘Oye phọ nạ aạl bọ ilọ odị siphẹ aBaibul phọ aḍighi eeghe orue olhoghonhaạn aḍighaạgh loor odị? Ika kụ idị aZihova alhoghonhaạn nyodị ḍighaạgh? Ika kụ idị araraạr phọ mị atuughạ bọ kilhoghonhaạn imhị ḍighaạgh okparạm iiḅaghamhị?’

6. Eeghe kụ iḍighi kụ emhoghi bọ dị yira kosighẹ ghan oḍighinhom ipẹ yira rotuughạ bọ?

⁶ (4) Sighẹ aḍighinhom. AZizọs aḅẹm mọ, eḍighi maạr dị yira u/sighẹ uḍighinhom ipẹ yira motuughạ bọ, pọ yira okịgh idiphọ oye dị alhọgh otu anyụ iisaạr. Odị rakumuan ni, kuolọ rapiemhi ni inyaạm odị bịn. Eeghe kụ iḍighi? Loor esi dị, mem dị oghim r’amuụm aḍigho aru arọph otu phọ, kameleghu ni. (Mat. 7:24-27) Iniin phọ kẹn ni, eḍighi maạr dị yira ooḅereghị, ogbiom ghan olhoghi, ḅilhẹ ogbirima ghan kuolọ yira u/sighẹ uḍighinhom ipẹ yira otuughạ bọ, pọ yira opiemhi ni inyaạm ayira bịn. Kụ mem dị omheeraam mọ ayira aḍigh esi odẹgh ophogh obobọ yira osoman ikpuuroghọm, yira ko/tue omoọgh inyaạm omheerạ giph. Ḍieriphọ aḍighaạgh phọ, mem lọ yira otuughạ oḅilhẹ osighẹ oḍighinhom ipẹ yira otuughạ bọ, pọ yira kotue ghan ni osopha ogey osopha, omoọgh eephọ, ḅilhẹ omoọgh omheeraam dị akpạr. (Isa. 48:17, 18) Uguạ osighẹ inya areten phọ iphẹn phọ oḍighinhom ibạl aBaibul ilọ Uw-emhạ phọ Devid, kụ omhiịn iyaạr dị yira kotuughạ.

7. Ibạl aBaibul anhiạn kụ edị yira kooḅeghiọn nyiidiphọ?

⁷ Oyaghirị anạ obobọ olọ eghunotu anyinha mabi ghan ni nyinhạ ḍughụm? Eḍighi idiphọ, pọ nạ kakạr kụ akelhọm esi ooḅeghiọn ilọ Absalom, oọny Uw-emhạ phọ Devid, opọ abi bọ odẹ phọ odị kụ akparaghạ bọ aạr itooghị phọ.—2 Sam. 15:5-14, 31; 18:6-14.

8. Nạ kaḍighi eeghe orue omhoọgh olhoghonhaạn aḍighaạgh aZihova?

⁸ (1) Ḅeeḅereghị. Iduọn nạ raakolhobian bọ aạl eḍeenhaan phọ ephẹn phọ, ḅeeḅereghị aḅenhị aZihova ipẹ nạ alhoghoma bọ ilọ eten phọ mozoọm bọ nyinhạ. (Ps. 6:6-9) Kaạph okạr ipẹ nạ alhoghoma bọ. Lọm aZihova alhoghonhaạn nyinhạ ḍighaạgh omhiịn asinhị iilhogh aBaibul dị kelhoghonhaạn nyinhạ ḍighaạgh olhegheri ilọ okaran iiḅaghamhị phọ nạ asoman bọ.

9. Eeghe kụ imite igbo aDevid r’Absalom?

 ⁹ (2) Gbiom olhoghi. Tuutughiạn raraạr phọ ekạr bọ emite siẹn igẹ aBaibul phọ iphẹn phọ, kụ agbiom olhoghi ipẹ iphẹn phọ etir bọ Uw-emhạ phọ Devid. Oọny phọ aDevid Absalom alhọgh ni inyaạm esi ibadị asiạ oḍighi idị awe phọ kopomoghiạn nyodị. (2 Sam. 15:7) Mem mọ Absalom alhoghoma bọ mọ amem mọ meteẹny, odị arom ni we iḅiligha orelheyogh oomo eelhe phọ Izrạl, ilọ ookolhobian arokpom awe phọ dị komeeraam mọ odị kụ uw-emhạ. Odị aḅilhẹ alhereghian Ahithophel ogbogh oyaghirị r’otomoghiom mọ aDevid, oḍighan odị ogbagharạn. Absalom agbeelhom mọ onọ kụ uw-emhạ, kụ akparaghạ ghan oghiigh aDevid. ADevid arọl e/moon mem mọ amuphẹ phọ. (Ps. 41:1-9) ADevid anhaghạn ni ilọ oḅian phọ Absalom, kụ asuma aḍuạ Jeruselem. Eekunha phọ awe eghạm mọ Absalom uzia ni r’abuphẹ oḅạr bọ Devid, kuolọ ukpạr ri opu buọ igbagharạn phọ, oḅilhẹ oghiigh Absalom oọny phọ aDevid.

10. Eeghe kụ edị Uw-emhạ phọ Devid mutue ni aḍighi?

¹⁰ Edị etum siẹn, gbiom olhoghi ipẹ aDevid alhoghoma bọ mem mọ iphẹn phọ remitenhaan bọ nyodị. Odị aphomhoghiạn agey Absalom aḅilhẹ aḍuomolhoghi Ahithophel. Ghalhamọ r’iduọn phọ ni, bidị ubi ni nyodị. Bidị uḍighi idị olhoghi aDevid eeph kụ okparaghạ ghan oghiigh odị. ADevid mutue ni aroph oḍuomolhoghi phọ odị amhoọgh bọ aghị esi abueriphọ arighirị phọ odị, esi ootughiạn mọ eeni bidị moḍighan aani Absalom. Odị mutue ni aatughiạn ilọ ogina odị bịn kụ mukiil aḍuạ siphẹ eelhe phọ. Obobọ aDevid mutue ni bịn aḅonyonhu azuan. Kuolọ aDevid o/ḍighi idiphọ. Kparipẹ ghụn odị akpạr ri apu iiḅaghamhị phọ odị asoman bọ. Eeghe kụ iḍighi kụ odị arue bọ ni akpạr apu?

11. ADevid aḍighi ika siẹn iiḅaghamhị phọ odị asoman bọ?

¹¹ (3) Gbirima. Eeghe asinhị iilhogh kụ edị nạ atuughạ siẹn igẹ aBaibul phọ ephẹn phọ? Pagharanhaạn ḍipuru phọ aḍiẹn, “ADevid aḍighi eeghe olhoghonhaạn aḍighaạgh loor odị?” ADevid oo/kpereghaan ḅilhẹ oo/gboronhom osopha osopha dị u/ḍighi olọ osụ olhoghi. Obobọ odị oo/binya, oḅio odị o/kaph osi esi dị odị u/legheri mun ilọ oḍighi. Kparipẹ ghụn, odị aaḅereghị alhọm aZihova olhoghonhaạn aḍighaạgh. Odị aḅilhẹ kẹn apuru olhoghonhaạn aḍighaạgh righirị phọ odị. Kụ aagboronhom aḍighi torobọ iyaạr dị odị asopha oḍighi. Ii, uḍighi ni nyodị iyaạr dị eeph iboom, kuolọ iphẹn phọ i/kọm idị aDevid awilhẹ oḍuom ghan olhoghi bunhọn. Odị aghiọm ni ghisigh aḍuom ghan olhoghi aZihova r’arighirị phọ odị.

12. AZihova aḍighi eeghe iyaạr olhoghonhaạn aḍighaạgh Devid?

¹² Ika kụ idị aZihova alhoghonhaạn ḍighaạgh Devid? Nạ akiririom aphogh, nạ kamiịn ni mọ aZihova angọ ni Devid inyaạm mọ ewạ bọ okparạm iiḅaghamhị phọ. (Ps. 3:1-8; superscription) AZihova asẹph ni osopha kirokirọ phọ aDevid. Kụ abakị ni buphẹ oḅạr bọ Devid mem mọ bidị rokparaghạ bọ ee oghoph uw-emhạ phọ Devid.

13. Ika kụ idị nạ katue atuughaạny Devid eḍighi maạr dị oye aḍighi iyaạr dị repin esi anạ? (Matiu 18:15-17)

¹³ (4) Sighẹ aḍighinhom. Puruan loor mọ, ‘Ika kụ idị mị katue atuughaạny Devid?’ Ewạ dị nạ kaagboronhom ghan aḍighi iyaạr amiteom orue okpetenhaan iiḅaghamhị. Odaphạn sidọl phọ, nạ atue ni adaphạn oroma phọ aZizọs ogẹ bọ siphẹ Matiu emhụ phọ 18 obobọ aḍighinhom idiphọ aḍinhị olhogh (Bạl Matiu 18:15-17.) Kuolọ kaa/gboronhom asopha osopha mem dị iyaạr repin esi anạ. Ḅeeḅereghị alhọm aZihova aḍighi idị ekpom anạ kepọ ḅilhẹ r’osụ olhoghi osighẹ okaran iiḅaghamhị phọ. Ka/toph oḍuomolhoghi phọ nạ amhoọgh bọ aghị esi arighirị phọ anạ. Kparipẹ ghụn, kookolhobian osighẹ olhoghonhaạn aḍighaạgh dị bidị ongọ nyinhạ. (Prov. 17:17) Edị emhạn maạr, daphạn oroma phọ aZihova angọ bọ nyinhạ siphẹ aBaibul phọ.—Prov. 3:5, 6.

14. Eeghe asidọl kụ edị eeni nạ asoman dị iphẹn ogẹ bọ siẹn 2 Timoti 1:12-16; 4:6-11, 17-22 kekparamhị nyinhạ?

¹⁴ Nạ asoman ni isophoghom ḍighaạgh abuọ eghunotu anyinha ḍughụm? Obobọ nạ odi eelhe dị osophoghom iiḍighi awe phọ aZihova? Eḍighi  idiphọ, pọ nạ katue ni amoọgh okparamhị esi iphẹn ogẹ bọ siẹn 2 Timoti 1:12-16 r’4:6-11, 17-22. * APọl agẹ siikpịgh phọ iphẹn phọ mem dị odi ikoli.

15. Eeghe iyaạr kụ edị nạ kalọm aZihova?

¹⁵ (1) Ḅeeḅereghị. Kụ nạ agbi aạl asiikpịgh phọ ipẹ phọ, ḅeeḅereghị aḅenhị aZihova iiḅaghamhị phọ anạ ḅilhẹ r’ipẹ nạ alhoghoma bọ. Kaạph okạr ipẹ nạ alhoghoma bọ. Lọm aZihova alhoghonhaạn nyinhạ ḍighaạgh omhiịn asinhị iilhogh siẹn oghaạph phọ aPọl, dị ketue elhoghonhaạn nyinhạ ḍighaạgh olhegheri ipẹ nạ katue ghan bọ aḍighi mem lọ nạ asoman iiḅaghamhị.

16. Eeghe r’eeghe kụ imitenhaan Pọl?

¹⁶ (2) Gbiom olhoghi. Gbiom olhoghi mọ nạ kụ usoman bọ dọl phọ aPọl. Okasaghiọm nyodị izime ikoli epẹ Rom. Odị marọl li ikoli mem, kuolọ egi phọ ephẹn phọ, odị alegheri ni mọ kokiigh ni nyinhọ. Ḅilhẹ kẹn abuniin abuphẹ r’odị ooḅughonhaan ghan bọ mowilhẹ nyodị, kụ aloor odị medugh.—2 Tim. 1:15.

17. Eeghe kụ idị Pọl mutue ni aḍighi?

¹⁷ APọl mutue ni aatughiạn mọ mughumọ onọ mu/ḍighi bọ onyọ aKristẹn, obọ oye mu/moọgh iyaạr otuạn osiph odị olhọgh ikoli. Odị mutue ni aghaghạm olhoghi bumor phọ orọl bọ epẹ eghir phọ Asia mowilhẹ bọ nyodị, ḅilhẹ odị mutue ni aroph oḍuomolhoghi phọ odị amhoọgh bọ aghị esi abueriphọ arighirị phọ odị. APọl o/ḍighi r’eniin iphẹn phọ. Eeghe kụ iḍighi kụ aPọl aḍuom bọ olhoghi mọ arighirị phọ odị kokiọm ni ghisigh oḅạr nyodị, ḅilhẹ mọ aZihova kakpẹ ni nyodị iikpiạ?

18. APọl aḍighi eeghe mem mọ odị asoman bọ iiḅaghamhị?

¹⁸ (3) Gbirima. Pagharanhaạn ḍipuru phọ aḍiẹn, “Ika kụ idị aPọl alhoghonhaạn ḍighaạgh loor odị?” Ghalhamọ r’iduọn odị alhegheri bọ ni mọ moọny amem kokiigh nyodị, aPọl o/wulha idị emhạn maạr—osighẹ arughuenhian oruom aZihova. Odị aghiọm ghisigh aatughiạn ghan ipẹ odị katue bọ akparamhị bunhọn. Odị abeḍenhọm aZihova esi ogbor ghan ooḅereghị. (2 Tim. 1:3) Kparipẹ rootughiạn ghan ipẹ abumor phọ abuphẹ owilhẹ bọ nyodị, odị asẹph ghụn righirị phọ abuphẹ oḅạr bọ nyodị kụ rologhonhaạn bọ nyodị ḍighaạgh ibadị areten. Oḅarạm isiẹn, aPọl aghiọm ghisigh atuughạ ghan Ekpo Onhụ phọ Enhaạn. (2 Tim. 3:16, 17; 4:13) Edị emhạn maạr epelheghiom pọ, odị aḍuom olhoghi mọ aZihova r’aZizọs opomoghiạn ni nyodị. Mọ bidị u/ḅitonhaạn nyodị, ḅilhẹ mọ bidị kokpẹ ni nyodị iikpiạ arukumuan phọ odị.

19. Ika kụ idị aZihova alhoghonhaạn ḍighaạgh Pọl?

¹⁹ AZihova aghiọm ni olhoghi Pọl mọ odị kasoman ni igbiphoghọm loor iduọn odị aḍighi bọ onyọ aKristẹn. (Iiḍighi 21:11-13) Ika kụ idị aZihova alhoghonhaạn ḍighaạgh Pọl? Odị aphagharanhaạn iiḅereghị aPọl kụ angọ inyaạm nyodị. (2 Tim. 4:17) AZihova angọ ni okuphom owol Pọl mọ odị kamoọgh ni iikpiạ phọ odị. AZihova aḅilhẹ kẹn aḍighinhom righirị phọ abuphẹ oḅạr bọ Pọl, ongọ odị olhoghonhaạn aḍighaạgh dị akasiạn.

20. Odaphạn Rom 8:38, 39, ika kụ idị yira kotue otuughaạny Pọl?

²⁰ (4) Sighẹ aḍighinhom. Puruan loor mọ, ‘Ika kụ idị mị katue atuughaạny Pọl?’ Idiphọ aPọl, yira olhegheri mọ yira kosoman ni ikpuuroghọm loor omheeraam mọ ayira. (Mạk 10:29, 30) Orue ophamhanhạm aḍimheerạ phọ ayira mem iiḅaghamhị, pọ ewạ dị yira kobeḍenhọm aZihova esi ogbor ghan ooḅereghị r’omhoọgh egey edeọm ituughạ Ekpo Onhụ phọ odị. Oomo amem yira ootughiạn ghan mọ iyaạr dị ekạr emhạn maạr dị yira koḍighi pọ osighẹ arughuenhian oruom aZihova. Yira kotue ni okuphom owol mọ aZihova r’amem r’amem iyira ku/ḅitonhaạn ḅilhẹ iyaạr i/lo dị ketue ekạ ephomhoghiạn phọ edi bọ igbo ayira r’odị.—Bạl Rom 8:38, 39; Hib. 13:5, 6.

21. Eeghe kụ ilhoghonhaạn ḍighaạgh Aya r’aHector orue okpạr opu ipaanhaạn phọ bidị osoman bọ?

²¹ Etigheri dọl phọ nạ asoman bọ, areḍeehaan aBaibul phọ ketue ni engọ nyinhạ inyaạm.  Esi omaạm, oniin okọy oten dị oghol mọ Aya, epẹ Japan, aḅẹm mọ, eḍeenhaan phọ aJonah ilhoghonhaạn nyinọ ḍighaạgh okpạr opu oghiilhaan ongọ ghan ogbaanhaạn esi ogbo. Oniin onyọ iḍoọgh dị oghol mọ Hector, epẹ Indonesia, dị odẹ r’onhiin phọ ro/tu aani ghan ituughạ, aḅẹm mọ, eḍeenhaan phọ aRuth ilhoghonhaạn nyinọ ḍighaạgh otuughạ ilọ aZihova ḅilhẹ r’okumu odị.

22. Ika kụ idị nạ kakạr atue akelhọm regberi aBaibul phọ obobọ mem dị nạ rabạl rumhuoghaạph phọ edi bọ eeḍiạn emhuoghaạph phọ “Imitate Their Faith”?

²² Iḍighen esi kụ edị nạ kamiịn reḍeenhaan aBaibul dị kengọ nyinhạ inyaạm? Asividio phọ ayira, ilọ onhaghanhạm arurụ, aregberi dị eḍighi ilọ onhaghanhạm arurụ, ḅilhẹ r’ipẹ edi bọ siphẹ eeḍiạn emhuoghaạph phọ “Imitate Their Faith” reḍighi ghan idị ibạl aBaibul phọ ketu eye. * Kụ nạ agbi ophogh avidio, m’ilọ onhaghanhạm arurụ, obobọ aạl iphẹn ogoolhạ bọ siẹn phọ, ḅeeḅereghị alhọm aZihova alhoghonhaạn nyinhạ ḍighaạgh omhiịn ikpanhạ araraạr ituughạ dị nạ kasighẹ aḍighinhom. Gbiom olhoghi mọ nạ kụ oye aBaibul phọ nạ rabạl bọ ilọ odị. Gbirima ilọ ipẹ arebenhẹ phọ aZihova abuẹn phọ okpẹ bọ oḍuomolhoghi oḍighi bọ ḅilhẹ r’ipẹ aZihova alhoghonhaạn bọ bidị ḍighaạgh okpạr opu iiḅaghamhị phọ bidị osoman bọ. Kụ asighẹ aḍighinhom aani ipẹ nạ atuughạ bọ esi eḍeenhaan phọ abidị. Sẹph aZihova olhoghonhaạn aḍighaạgh phọ odị rangọ ghan bọ nyinhạ k’aḍio phọ. Kụ aḍeenhaan mọ nạ asereghiạn ni, esi owạ ghan aroopoogh okparamhị r’obakị aani abunhọn.

23. Odaphạn Isaiah 41:10, 13, aZihova aguanhaan oḍighinhaan ayira eeghe?

²³ Aghuḍum siẹn aḅirinhi phọ ophọn aSetan kụ raaḅakị bọ akpạr ri, eeni amem yira ro/legheri ghan ilọ oḍighi. (2 Tim. 3:1) Kuolọ, i/wạ mọ yira omhoọgh oboom ooḅaghamhiạn aloor obobọ oghiilhaan. AZihova alegheri ni ipẹ yira rokaran bọ. Mem lọ yira omheel, odị aguanhaan ni ophạm ayira omheremhị r’aḍighaạgh elhiom mọ odị. (Bạl Isaiah 41:10, 13.) R’oḍuomolhoghi mọ aZihova katue ni ubakị iyira, yira kotue ni omoọgh inyaạm mọ Aḍinyạ iigbia phọ rengọ ghan bọ bịn okpạr opu ipaanhaạn lọ yira osoman.