Uḍighi ika kụ oye phọ omhạgh bọ mọ “Opeẹr” aḅẹm bọ mọ “kepuenhaạn” erua onọ eḍighi maạr dị onọ aphin Ruth? (Ruth 4:1, 6)

Simem aBaibul phọ kụ oye amhugh dị moọny u/mạr, ibadị asipuru imite ghan ni dị ewạ ophanyanhaạn: Eeghe kụ kemitenhaan de lọ odị amhoọgh? Aḍien eghunotu phọ odị kepe bịn k’agee-pọ ḍughụm? Olhogh phọ aMozis aphanyanhaạn ni sipuru phọ ipẹ phọ.

Eeghe kụ kemitenhaan de oye lọ amhugh obobọ de lọ aal loor ekulhom? Umor obobọ onyọ asiya lọ akpulạn kụ katạ de phọ. Iphẹn phọ keḍighi idị ade phọ ke/ḍuạ siphẹ eghunotu phọ.—Lev. 25:23-28; Num. 27:8-11.

Ika kụ idị iphẹn phọ keḍighi idị aḍien opọ mamhugh bọ ke/pe? Dị eego esi apinien erua, idiphọ eḍighi bọ mem mọ aRuth. Oye katue ni apin anhịr umor odị dị mamhugh bịn amaranhaạn nyodị moọny lọ kameera ḍien phọ aḅilhẹ ale erua opọ mamhugh bọ. Imạ phọ iikolhobian phọ iphẹn phọ iḅilhẹ ghan kẹn elhoghonhaạn ḍighaạgh ekpukele anhịr phọ.—Deut. 25:5-7; Mat. 22:23-28.

Ooḅeghiọn eḍeenhaan phọ aNaomi. Odị aạl oye dị oghol mọ Elimelech. Mem dị olom mọ r’iyạl phọ anmụny phọ odị omhuughu, odị asoor dọl dị r’oye ophogh odị u/tọl mun. (Ruth 1:1-5) Odị roḅulha Judah, kụ aNaomi aḅenhị anọ-oyil phọ odị Ruth mọ aḅenhị aBoaz alhe erua ade phọ. Odị aḍighi onyọ asiya dị akpulhạn Elimelech. (Ruth 2:1, 19, 20; 3:1-4) Kuolọ aBoaz aatughiạn ni mọ onhọn onyọ asiya dị aBaibul phọ aghol mọ “Opeẹr,” kụ akpulhạn apu nyinhọ. Opọ phọ kụ amhoọgh elhiom olhe erua phọ apu nyodị.—Ruth 3:9, 12, 13.

Eḅẹl amem mọ, “Opeẹr” phọ awạ ni olhe erua phọ. (Ruth 4:1-4) Ghalhamọ r’iduọn keḅarạm bọ ni muboom amaliom, odị alhegheri ni mọ aNaomi ka/tue mun amạr moọny dị kale erua ade phọ Elimelech. Iphẹn phọ remạ ghan mọ Opeẹr phọ kasighẹ de phọ Elimelech aḅarạm side phọ ipẹ odị, bịn odị amoọgh iboom aside oḅephogh iizo.

Kuolọ Opeẹr phọ anme ni olhoghi mem dị odị amhiịn bọ mọ odị kaḅilhẹ apinhom Ruth. Kụ aḅẹm mọ: “Mị ka/le erua phọ, loor esi dị kepuenhaạn erua elọ amhị.” (Ruth 4:5, 6) Eeghe kụ iḍighi kụ odị anme bọ olhoghi?

Eḍighi maạr dị Opeẹr obobọ onhọn oye aphin Ruth kụ amhạr moọny, pọ oọny phọ kụ kale erua ade phọ Elimelech. Kụ ika kụ idị iphẹn phọ “kepuenhaạn” Opeẹr “erua” phọ odị? ABaibul phọ o/ghaạph, kuolọ etue ni eḍighi reten phọ iphẹn yira kooḅeghiọn bọ siẹn.

• Eḅẹl phọ, kekịgh mudị amaliom mọ odị maphe, idị eḍighi bọ ade phọ Elimelech ke/tue ni bịn eḍighi ḍiọ odị. Keḍighi ghụn ḍiọ oọny phọ aRuth.

• Omhunhenhiom iyạl, odị kụ katool dool ongọ eḍien r’omhaạr ophogh aNaomi r’aRuth.

• Omhunhenhiom iraạr, eḍighi maạr dị aRuth amharanhaạn Opeẹr bunhọn anmụny pọ bidị koḅophạn nmụny phọ Opeẹr ole erua odị.

• Omhunhenhiom inya, eḍighi maạr dị Opeẹr u/mạr mun bunhọn anmụny pọ oọny phọ aRuth kaḅạr erua ade phọ Elimelech r’ipẹ Opeẹr kụ ale. Bịn ade phọ odị megboton eḍighi ḍiọ oọny dị rameera ḍien Elimelech, ka/ḍien odị. Opeẹr o/mheera r’omheera oroph erua odị loor olhoghonhaạn aḍighaạgh aNaomi. Kparipẹ ghụn odị awạ mọ onyọ asiya phọ atum bọ nyodị, aBoaz, kụ arool dool phọ aḍiphẹ phọ. ABoaz amheera ni oḍighi iduọn phọ “obọ aḍien opọ mamhugh bọ kepe ghan bọ siphẹ abumor phọ odị r’aḍibuo otu phọ odị.”—Ruth 4:10.

Opeẹr phọ akạr amhoọgh ogbolhomaam ilọ omheremhị aḍien r’araraạr ilọ odị. Owạ ilọ aloor kụ iponomaam iitughiạn phọ odị. Kparipẹ ghụn lọ aḍien phọ Opeẹr kemeerạ, eḅilhẹ ghụn bịn epe. Odị aḅilhẹ kẹn ni aroph imạ eepoogh phọ aBoaz amhoọgh bọ ogholhom aani aḍien phọ odị ḍikoọl eemharạ eemharạ phọ omiteom bọ aMesaya phọ, Zizọs Kraist. P’eeghe idị eephnaan Opeẹr phọ atuạn bọ owạ ilọ aloor kụ aghel eepoogh olhoghonhaạn aḍighaạgh oye dị ekuom!—Mat. 1:5; Luk 3:23, 32.