EMHUOGHAẠPH ITUUGHẠ PHỌ 21
AZihova Kangọ Ni Nyinhạ Inyaạm
“Mị adugh ghụn, purukụ molome iikpọ phọ amị.”—2 KỌR. 12:10.
AḌUỌR PHỌ 73 Grant Us Boldness
OGHAẠPH OOKARAGH *
1-2. Eeghe ipaanhaạn kụ idị ibadị Abugbaanhaạn osoman?
OTELHEDOM mọ aPọl aroma Timoti ḅilhẹ r’oomo aKristẹn mọ oḍighi k’ikparạ k’ikpuru oḍighi phọ abidị. (2 Tim. 4:5) Oomo phọ ayira omaghamhị ni maạr oroma phọ aPọl. Kuolọ ipaanhaạn edi ni. Rekparanhaạn ghan ni ibadị abumor r’abumarani ayira oghaạph iiḅi iinhaghạn phọ. (2 Tim. 4:2) Esi omaạm, tuutughiạn ilọ abuphẹ odi bọ rikpisi dị osophoghom oḍighi phọ ayira. Bidị rokaạph ghan ni iiḅi iinhaghạn phọ ghalhamọ r’iduọn kotue bọ ni olọgh bidị ikoli!
2 Awe phọ aZihova rosoman ghan ni iiḅaghamhị kirokirọ dị ketue ni eḅonyon bidị. Esi omaạm, ibadị rokumuan ghan iboom orue omhoọgh araraạr phọ ipẹ eghunotu abidị rowạ bọ. Repụ ghan ni bidị obughẹ arukumuan erugh phọ abidị, kuolọ reteẹny eekunha awiki phọ aloor medugh. Abunhọn u/tue mun uḍighi ipẹ bidị oḍighi ghan bọ loor e/moon dị re/soph ghan mem obobọ aḍikpọ; buniin moḍigh otu. Abuniin rologhoma ghan mọ bunọ u/moọgh maạr oḍighinhom. Umarani dị oghol mọ Mary, * aḅẹm mọ: “Mị ralọgh ghan ni ikuph orue eenhan okarạph olhoghoma phọ amhị, riḅonyon ghan imhị bịn kezu. Kụ mị aloghoma apum loor esi dị resighẹ ghan inyaạm r’amem dị mị mukimọm epẹ erugh phọ.”
3. Yira kooḅeghiọn eeghe siẹn emhuoghaạph phọ ephẹn phọ?
3 Etigheri sidọl phọ ayira, aZihova kungọ ni iyira inyaạm okaran ipaanhaạn phọ ayira, ḅilhẹ r’oghiọm aghisigh okumu odị ipẹ adọl phọ ayira emheera bọ. Kụ yira ogbi ooḅeghiọn ipẹ aZihova kulhoghonhaạn bọ iyira ḍighaạgh, ophụr omhiịn ipẹ Odị akparamhị bọ Pọl r’aTimoti omhunhenhi oḍighi phọ abidị etigheri ipaanhaạn phọ.
INYAẠM OGBEELHOM IIḄI IINHAGHẠN PHỌ
4. Eeghe ipaanhaạn kụ edị aPọl asoman?
4 APọl asoman ni ibadị ipaanhaạn. Odị akạr ghan amhoghi inyaạm mem dị okuphogh, oroḅol ikpo, ḅilhẹ olhọgh nyodị ikoli. (2 Kọr. 11:23-25) APọl aghaạph ni amiteom mọ eeni amem odị asoman ghan ni oḅonyonhu ozuan. (Rom. 7:18, 19, 24) Odị aḅilhẹ kẹn akparạm iiḅaghamhị e/moon dị eghịgh “ooburom” dị agim nyodị, dị odị awạ ni mọ obọ Enhaạn esighẹ.—2 Kọr. 12:7, 8.
Eeghe kụ ilhoghonhaạn bọ ḍighaạgh Pọl oghiọm aghisigh rukumuan phọ odị? (Miịn siikpịgh phọ 5-6) *
5. Eeghe kụ idị aPọl arue aḍighi amhunhenhi etigheri ipaanhaạn phọ?
5 AZihova angọ Pọl inyaạm oghiọm aghisigh rukumuan phọ etigheri oomo ipaanhaạn phọ odị asoman bọ. Ooḅeghiọn raraạr dị aPọl aḍighi amhunhenhi. Esi omaạm, mem mọ odị arọl bọ ikoli olhoghotu epẹ Rom—odị aghaạph ni iiḅi iinhaghạn phọ r’oophugh aḅenhị buḍiemhiom abuọ aJu phọ kụ eeni kẹn r’abugbogh abuọ itooghị phọ. (Iiḍighi 28:17; Fil. 4:21, 22) Odị aghaạph ghan kẹn aḅenhị ibadị abuphẹ okori ghan bọ uw-emhạ phọ aRom, aḅilhẹ angọ ogbaanhaạn oomo abuphẹ oru ghan bọ ophogh odị. (Iiḍighi 28:30, 31; Fil. 1:13) Eniin phọ amem mọ amuphẹ phọ, Enhaạn aphum ni Pọl ogẹ arinyạ dị engọ suọ bugey aKristẹn amem mọ amuphẹ r’anyiidiphọ. Kụ eḍeenhaan phọ aPọl ikparamhị ni ookpomhoghan phọ aRom, bịn eḍighi idị “akpọ olhoghi” abumor phọ amhanhạm oghaạph oghaạph Enhaạn “dị okaphian oḅio” u/tọl. (Fil. 1:14) Ii obọ eeni amem aPọl o/rue ghan ni oḍighi ipẹ odị awạ bọ, kuolọ odị aḍighi ni okạr ipẹ odị katue bọ odaphạn sidọl phọ, kụ ikạr ri “eloghonaạn ooḅi oghaạph phọ ḍighaạgh oghị aghisigh.”—Fil. 1:12.
6. Odaphạn 2 Korịnt 12:9, 10, eeghe kụ ilhoghonhaạn ḍighaạgh Pọl omhunhenhi oḍighi phọ odị?
6 APọl amhiịn ni mọ torobọ iyaạr dị odị aḍighi siẹn arukumuan phọ aZihova i/ḍighi ekpạr onọ. Odị aḅẹm mọ iikpọ phọ Enhaạn “relom ghan mem lọ [oye phọ madugh].” (Bạl 2 Korịnt 12:9, 10.) Dị eego esi uwaloor iigbia phọ, aZihova angọ ni Pọl iikpọ oḍighi k’ikparạ k’ikpuru oḍighi phọ odị—etigheri igbiphoghọm, ikoli, r’inhọn ipaanhaạn kirokirọ dị odị asoman.
Eeghe kụ ilhoghonhaạn bọ ḍighaạgh Timoti oghiọm aghisigh rukumuan phọ odị? (Miịn ekpịgh phọ 7) *
7. Eeghe ipaanhaạn kụ idị aTimoti akaran orue omhunhenhi oḍighi phọ odị?
7 ATimoti, oḍoọgh oye phọ akumuan ghan bọ r’aPọl abeḍenhọm aani kẹn iikpọ phọ Enhaạn orue omhunhenhi oḍighi phọ odị. ATimoti adạph ghan ni Pọl aghị erelhe amisonarị rikpisi dị ekelhọgh ni iboom. Idị epelhom siẹn, aPọl aḅilhẹ kẹn arom nyodị aghiọm inhọn arikpisi, oghị oophoghogh oḅilhẹ okparamhị arookpomhoghan phọ. (1 Kọr. 4:17) Eeni aTimoti alhoghoma ni mọ onọ o/sianhaan. Kụ eeni epẹ kụ iyaạr phọ aPọl aroma bọ nyodị mọ: “Ka/meera oye atuạn mọ nạ onyugheeI bịn aphogh nyinạ asooromi.” (1 Tim. 4:12) Ḅilhẹ kẹn, mem mọ amuẹn phọ aTimoti asoman ni “egbạ mem iirurughiạn” dị eeḅaghamhị ghan nyodị. (1 Tim. 5:23) Kuolọ aTimoti alhegheri ni mọ uwaloor iigbia phọ aZihova kanyaamhị ni nyodị oghaạph iiḅi iinhaghạn phọ r’okumu abumor phọ odị.—2 Tim. 1:7.
INYAẠM ORỌL ADỌL ARUUKUAN ETIGHERI IPAANHAẠN
8. Ika kụ idị aZihova ranyaamhị ghan we phọ odị rodon?
8 Rodon, aZihova rungọ ghan iyira ‘iikpọ dị ki/lọ ayira’ pidị yira okiọm ghisigh okumu nyodị eten dị ekpẹ oḍuomolhoghi. (2 Kọr. 4:7) Uguạ ooḅeghiọn inya araraạr dị aZihova amiteom olhoghonhaạn ayira ḍighaạgh orọl adọl aruukuan: iiḅereghị, aBaibul phọ, abumor r’abumarani phọ, ḅilhẹ r’oghaạph iiḅi iinhaghạn phọ.
AZihova runyaamhị ghan iyira dị eego esi iiḅereghị (Miịn ekpịgh phọ 9)
9. Ika kụ idị iiḅereghị ketue ilhoghonhaạn iyira ḍighaạgh?
9 Iiḅereghị kụ ikparamhị. Idiphọ ogẹ bọ siphẹ Efesọs 6:18, aPọl uroma iyira mọ: “Iiḅereghị ghan oomo amem,” bịn Enhaạn kunyaamhị ni iyira. AJonnie, epẹ Bolivia, amhiịn ni olhoghonhaạn aḍighaạgh aZihova mem dị asoman iiḅaghamhị kirokirọ. Anhịr odị r’odẹ r’onhiin odị umheel egbogh e/moon eniin phọ amem mọ. Ikparanhaạn ni Jonnie ophogh oomo phọ abidị. Onhiin phọ amhugh ni, kụ isighẹ ni mem kụ anhịr phọ r’odẹ phọ ogbi omhoon. AJonnie aatughiạn ni aḅulha omhạn kụ aḅẹm mọ, “Mem mọ amuphẹ phọ kụ mị amhoọgh ooḅaghamhiạn aloor iboom, iyaạr dị ilhoghonhaạn ghan imhị ḍighaạgh pọ otuụgh ipẹ mị alhoghoma bọ bịn oghaạph oḅenhị aZihova.” AZihova angọ ni Jonnie inyaạm mọ ewạ bọ orue okparạm. ARonald, okumor oye ookpomhoghan epẹ Bolivia, alhegheri ni mọ onhiin odị amoọgh kansạ. Unwanyụ roten bịn onhiin phọ amhugh. Eeghe kụ ilhoghonhaạn nyodị ḍighaạgh okparạm? Odị aḅẹm mọ: “Mem dị mị raaḅereghị mị uḅenhị ghan aZihova oomo ipẹ mị alhoghoma bọ. Mị alegheri mọ odị unhaghanhạn ni imhị apu imhị phọ r’aloor.” Eeni amem, yira roḅonyonhu ghan ni kozuan dị yira ro/legheri ghan iyaạr oghol kụ ooḅereghị. Kuolọ aZihova aḅẹm mọ ooḅereghị ghan oḅenhị nyinọ ghalhamọ r’amem dị yira u/tue ni u/kaạph ipẹ yira olhoghoma bọ.—Rom. 8:26, 27.
AZihova runyaamhị ghan iyira dị eego esi aBaibul phọ (Miịn ekpịgh phọ 10)
10. Odaphạn Hibru 4:12, uḍighi ika kụ aạl ghan ogbirima aBaibul phọ emhạn bọ maạr?
10 ABaibul phọ kụ akparamhị. Idiphọ aPọl abeḍenhọm bọ Igẹ Iigbia phọ ilọ inyaạm r’iidereghị, yira kẹn kotue ni oḍighi aani iniin phọ. (Rom. 15:4) Mem dị yira aạl Ekpo Onhụ phọ Enhaạn kụ ogbirima, aZihova kaḍighi ni idị yira konaghanhạn ipẹ Igẹ Iigbia phọ kilhoghonhaạn bọ iyira ḍighaạgh. (Bạl Hibru 4:12.) ARonald, oghaạph bọ oghol epẹ omhạn aḅẹm mọ: “Olhoghi amhị aḅaạl li iduọn mị alhẹm bọ amiteom eegharạ aạl ghan aBaibul phọ torobọ aḍughul. Mị ragbirima ghan ni iboom ilọ araagharạ phọ aZihova r’ipẹ odị razoọm ghan bọ rebenhẹ phọ odị. Kụ iphẹn phọ ringọ ghan imhị inyaạm.”
11. Ika kụ idị aBaibul phọ akparamhị anhịr dị purukụ olom amhugh?
11 Ogbirima Ekpo Onhụ phọ Enhaạn kilhoghonhaạn iyira ḍighaạgh ophogh iiḅaghamhị phọ ayira eten dị eeleeny. Omhiịn idị aBaibul phọ alhoghonhaạn ḍighaạgh ekpukele anhịr dị ramoghi. Oniin okumor oye ookpomhoghan aḅenhị mọ odị atue ni atuughạ iphigh araraạr esi aạl aḍinyạ phọ aJob. Odị aạl bọ, odị ghụn kụ akem aḍaghạ mọ iitughiạn phọ aJob i/nighẹ. Kụ siphẹ olhoghi odị kụ aḅaạm nyodị mọ: “Job! Kaa/tughiạn ilọ iiḅaghamhị phọ anạ bịn!” Kụ odị alhoghoma mọ eegharạ phọ odị eḍighi aani iniin r’ephen aJob. Iphẹn phọ ilhoghonhaạn nyodị ḍighaạgh onme ephoghom mọ odị, eḅilhẹ ekparamhị nyodị okparạm eephinha aḍuugh olom mọ odị.
AZihova runyaamhị ghan iyira dị eego esi ooḅughonhaan abumor phọ (Miịn ekpịgh phọ 12)
12. Ika kụ idị aZihova rukparamhị ghan iyira dị eego esi abumor r’abumarani phọ?
12 Ooḅughonhaan aKristẹn phọ kụ akparamhị. Enhọn eten dị aZihova rakparamhiọm ghan Kristẹn pọ abumor r’abumarani phọ. APọl agẹ aghiọm bumor r’abumarani phọ mọ “omeeraam mọ amị r’opọ anyina kaloghonaạn ni ḍighaạgh oomo phọ ayira.” (Rom. 1:11, 12) AMary, oghaạph bọ oghol epẹ omhạn, asereghiạn ni orọl ghan r’abumor r’abumarani phọ. Odị aḅẹm mọ: “AZihova maḍighinhom bumor r’abumarani dị u/legheri kẹn ilọ iiḅaghamhị phọ amhị. Bidị roḅạ ghan ni ekpo onhụ okparamhị, obobọ eeni ugẹ imhị ḍinyạ dị eghaạph iyaạr phọ mị rawạ bọ. Relọgh ghan kẹn ni ḍighaạgh oghaaphạn abumarani dị mosoman aani ghan iniin phọ ipaanhaạn phọ kụ otuughạ aani esi abidị. Ḅilhẹ ikumor awe phọ kẹn roḍighi ghan ni idị mị kaloghoma mọ mị amoọgh ni maạr oḍighinhom siẹn ookpomhoghan phọ.”
13. Ika kụ idị oniin katue akparamhị nyoniin siphẹ otu ituughạ phọ?
13 Esi dị ekạr enhighẹ dị oniin rakparamhị ghạn nyoniin pọ isiphẹ otu ituughạ phọ. Nạ katue ni akparamhị aani bunhọn mem dị nạ aghị ituughạ esi osereghiạn obobọ oseenyạn abidị kepẹ ekpom mọ anạ. Esi omaạm, eniin aḍio mem dị ituughạ phọ ke”mhiigh, oniin okumor oye dị oghol mọ Peter aḅenhị ni onyọ umarani dị olom mọ ra/tu aani ghan ituughạ mọ: “Eḍighi ni iyaạr okparamhị omhiịn ghan anạ otu ituughạ. R’iduọn nạ ramaạr ghan bọ kaanmenemhi odiiny phọ anmụny phọ anạ aḅilhẹ aakolhobian ophinhom aani abin ituughạ phọ.” Kụ izin eekeleghiạn riḍien umarani phọ kụ aphagharanhaạn mọ: “Nạ o/lhegheri idị olhoghi amhị aḅaạl onhaghạn iphẹn phọ rodon.”
AZihova runyaamhị ghan iyira dị eego esi arukumuan epẹ erugh phọ (Miịn ekpịgh phọ 14)
14. Ika kụ idị oghaạph iiḅi iinhaghạn phọ rulhoghonhaạn ghan iyira ḍighaạgh?
14 Arukumuan epẹ erugh phọ kụ ikparamhị. Mem dị yira oghaạph iiḅi iinhaghạn phọ oḅenhị bunhọn, riimhanhamhi ghan ni iyira, mughumọ omegheron agey obobọ u/megheron. (Prov. 11:25) Umarani dị oghol mọ Stacy alhoghoma ni idị arukumuan epẹ erugh phọ rekparamhị ghan oye. Mem dị ophorogh olọ eghunotu abidị siẹn igey phọ, olhoghi odị eeph ni iboom, kụ aatughiạn mọ, ‘Mị mutue ni alhoghonhaạn nyodị ḍighaạgh ḍughụm?’ AStacy arolhonhaạn ghan ootughiạn ipẹ phọ bịn. Eeghe kụ ilhoghonhaạn nyodị ḍighaạgh omhooghạ aloor? Omite epẹ erugh phọ! Odị akuọm loor rukumuan epẹ erugh phọ, kụ agbon we dị omhoghi olhoghonhaạn aḍighaạgh siphẹ ekool oghaạph iiḅi iinhaghạn phọ abidị. Odị aḅẹm mọ: “Mem mọ amuphẹ phọ, aZihova ungọ imhị we otughemhị aBaibul dị onhuụn odaphạn ipẹ bidị rotuughạ bọ. Ipẹ phọ ikparamhị ni imhị agey. Oghaạph iiḅi iinhaghạn phọ kụ akạr bọ ulhoghonhaạn imhị ḍighaạgh.”
15. Nạ atuughạ eeghe esi eḍeenhaan phọ aMary?
15 Asidọl phọ etue ni eḍighi idị ibadị kologhoma mọ bunọ u/tue mun uḍighi ipẹ bidị oḍighi ghan bọ epẹ erugh phọ. Eḍighi maạr dị nạ alhoghoma idiphọ, pọ tuutughiạn mọ aZihova rasereghiạn ghan ni mem dị nạ aḍighi ipẹ nạ katue bọ. Obilhẹ ooḅeghiọn eḍeenhaan phọ aMary, mem dị odị aghị ekpisi dị roḅạ ghan onhọn onhụ, odị alhoghoma mọ onọ o/kạr omhoọgh maạr oḍighinhom. Odị aḅẹm mọ, “Esi ekpo amem, iyaạr dị mị arue ghan aḍighi aani ghan epẹ erugh phọ pọ ongọ ekulha ophagharanhaạn, aạl esi aBaibul obobọ ongọ atrạkt.” Bịn eḍighi idị odị alhoghoma mọ onọ o/sianhaan r’abuphẹ roḅạ bọ onhụ phọ. Toroboiperolbọ, odị anme ni iitughiạn phọ odị. Kụ amhiigh olhoghoma mọ aZihova katue ni aḍighinhom nyodị etigheri e/maạr phọ odị. Odị aḅẹm mọ, “Igey aBaibul phọ eegholhaan ni, kụ igey phọ kụ renme ghan bọ sighuḍum awe, ka/sighalhanyạ.”
16. Eeghe kụ ketue eloghonhaạn ḍighaạgh buphẹ moḍigh bọ otu omhoọgh inyaạm?
16 AZihova ramiịn ni kụ asereghiạn ni ḍiḅeraạn phọ ayira ophinhom aani abin oghaạph iiḅi iinhaghạn phọ, ghalhamọ r’amem dị yira moḍigh otu. Odị katue ni amiteom eepoogh dị yira kongọ ogbaanhaạn buphẹ ruphogh bọ iyira obobọ buọ arookonhom mọ ayira. Yira otomaạm iphẹn yira roḍighi bọ nyiidiphọ r’ipẹ yira oḍighi ghan bọ mem dị eten, etue ni iḅonyon iyira. Kuolọ yira olhọgh ni elhegh ipẹ aZihova rubakị bọ iyira nyiidiphọ, kingọ ni iyira inyaạm mọ ewạ bọ orue okparạm iiḅaghamhị r’ibo.
17. Odaphạn Ecclesiastes 11:6, uḍighi ika kụ yira kokiọm bọ ni ghisigh rukumuan phọ ghalhamọ awe u/megheron ni agey?
17 Yira u/legheri ipẹ keḍum bọ siphẹ oomo iizuphạ igey phọ yira ozụph bọ. (Bạl Ecclesiastes 11:6.) Esi omaạm, aBarbara, umarani dị mapel li 80 asiạ, agbor ghan angọ ogbaanhaạn esi ogẹ arinyạ r’omhạgh afon. Ḍiniin aḍinyạ dị odị agẹ, odị alhoghọm Watchtower aMarch 1, 2014, dị aphạm emhuoghaạph dị eḅẹm mọ “What God Has Done for You.” Odị o/lhegheri mọ aḍinyạ phọ odị ighị eteẹny olom r’anhịr dị mophorogh siẹn igey phọ. Kụ olom r’anhịr phọ aạl oḅilhẹ aạl Watchtower phọ. Kụ olom mọ alhoghoma mudị aZihova kụ raḅaanhaạn nyodị onyen. Kụ bidị oḅilhẹ omhiigh oghị ghan ituughạ—kụ esi 27 asiạ phọ bidị mowilhẹ bọ igey phọ—bịn bidị oḅilhẹ oḍighi Bugbaanhaạn AZihova. Gbiom olhoghi idị ekparamhị Barbara omhiịn imạ phọ aḍinyạ phọ odị ekọm bọ emiteom!
AZihova runyaamhị ghan iyira dị eego esi (1) iiḅereghị, (2) aBaibul phọ, (3) ooḅughonhaan abumor phọ, ḅilhẹ (4) r’arukumuan epẹ erugh phọ (Miịn siikpịgh phọ 9-10, 12, 14)
18. Yira koḍighi ika kụ omooghọm suọ iikpọ phọ Enhaạn?
18 AZihova amiteom ni ibadị araraạr onyaamhiọm ayira, iduọn iiḅereghị, aBaibul phọ, ooḅughonhaan aKristẹn phọ, ḅilhẹ r’arukumuan epẹ erugh phọ—yira osighẹ oḍighinhom roopoogh phọ iphẹn phọ—pọ yira roḍeenhaan ghan mọ yira oḍuom ni olhoghi mọ odị katue ni, ḅilhẹ kẹn mọ rawạ ni olhoghonhaạn ayira ḍighaạgh. Esi iduọn phọ, obeḍenhọm ghan Odẹ k’akẹ phọ ayira, amhoọgh bọ ḍiḅeraạn “ongọ inyaạm buphẹ ilhoghi phọ emheeraam bọ nyodị.”—2 Chron. 16:9.
AḌUỌR PHỌ 61 Forward, You Witnesses!
^ par. 5 Yira odi simem dị ekpạr, kuolọ aZihova rulhoghonhaạn ghan ni iyira ḍighaạgh okparạm. Siẹn emhuoghaạph phọ ephẹn phọ, yira komiịn ipẹ aZihova alhoghonhaạn bọ ḍighaạgh Pọl r’aTimoti oghiọm aghisigh okumu odị etigheri iiḅaghamhị. Yira kooḅeghiọn inya araraạr dị Odị amiteom olhoghonhaạn ayira ḍighaạgh okparạm.
^ par. 2 M’onme ḍien phọ.
