1-2. (a) Uḍighi ika kụ abulọ purukụ aalhạn koḍuom bọ olhoghi aZihova? (Psalm 37:3, 4) (b) Yira kooḅeghiọn eeghe siẹn emhuoghaạph phọ ephẹn phọ?

MEKPỤL dị nạ kaḍigh pinien obobọ purukụ nạ aḍigh pinien ḍughụm? Eḍighi idiphọ pọ nạ akạr ri ragon oghelhọm aghuḍum r’opọ nạ akạr bọ aphomhoghiạn. Apinien amoọgh ni ipaanhaạn, kụ ibadị osopha dị emhạn maạr edi ni. Ipẹ nạ kakaran ghan bọ ipaanhaạn ḅilhẹ asopha ghan ketir ri oḅaạl olhoghi phọ anyinha idiphọ olom r’anhịr esi ibadị asiạ. Eḍighi maạr dị nạ abeḍenhọm aZihova nạ kasopha ghan ni r’osụ-olhoghi, apinien phọ akpạr, ḅilhẹ oḅaạl olhoghi phọ anạ abụgh. Eḍighi maạr dị nạ u/sighẹ uḍighinhom iromoghiom mọ Enhaạn, eeni nạ kasoman ni ḍikparamhinheẹn dị kekọm iiḅaghamhị siphẹ apinien phọ anạ, bịn esighẹ oḅaạl olhoghi phọ anạ.—Bạl Psalm 37:3, 4.

² Ghalhamọ r’iduọn emhuoghaạph phọ ephẹn egbon bọ buphẹ purukụ aalhạn bọ, kekaạph ni ilọ ipaanhaạn dị oomo abuphẹ m’aalhạn bọ kotue ni osoman. Keeḅeghiọn raraạr dị yira kotuughạ esi eḍeenhaan anmariịr r’awe omheeraam mọ ogẹ bọ siphẹ aBaibul phọ. Areḍeenhaan phọ abidị iruom iyira raraạr ituughạ dị yira kotue ni osighẹ oḍighinhom siphẹ aghuḍum mọ r’isiphẹ apinien phọ ayira. Yira koḅilhẹ omiịn idị yira kotuughạ ḍighaạgh abuphẹ m’aalhạn bọ siẹn amem mọ ayira.

3-4. Ighẹn ipaanhaạn kụ idị abulọ purukụ m’aalhạn kotue ni osoman?

³ Abuniin awe kotue ni otoma bulọ purukụ aalhạn m’orọl aani ipẹ ibadị awe odi bọ ḍio arodon. Esi omaạm, aburudẹ r’aburunhiin r’abuniin asiya otue ni okpaariọm olom r’anhịr mọ  onhuụn omhiigh emariạ. Obobọ arighirị r’abuọ eghunotu otue ni otoma bulọ purukụ aalhạn mọ ogho otu oḅilhẹ olhoghoḍị raraạr dị orọl esi phọ kedụgh.

⁴ Dị u/gona loor, olom r’anhịr otue ni osopha oḍighi araraạr dị kelọgh bidị esi olheeghi aruumhụgh. Bịn meḍighi idị olom r’anhịr kolọgh ghan muboom amem epẹ oḍighi phọ abidị pidị okpeeghị ruumhụgh phọ abidị. Kụ eeni okumuan ghan idị ko/moọgh mun mem dị ekasiạn osighẹ ophamhạm ibạl aBaibul ogina abidị, iiseeny eghunotu, ḅilhẹ r’oghị epẹ erugh phọ. Olom r’anhịr phọ otue ni obilhẹ yogh ituughạ, obughẹ amem mọ bidị rolọgh ghan bọ epẹ otu oḍighi phọ, pidị obughẹ ikpoki phọ abidị obobọ ko/porogh bidị oḍighi phọ. Ruukunha phọ, bidị rotoph ghan imạ aroopoogh obughẹ arukumuan phọ bidị rongọ bọ aZihova.

5. Nạ atuughạ eeghe esi eḍeenhaan phọ aKlaus r’aMarisa?

⁵ Ibadị areḍeenhaan emạ emiteom mọ ogbon esi omhoọgh aruphua siphẹ aghuḍum mọ ayira re/ngọ ghan oḅaạl olhoghi. Ooḅeghiọn ilọ iyaạr dị aKlaus r’aMarisa otuughạ ilọ iphẹn phọ. * Mem mọ purukụ bidị aalhạn bọ, bidị ulhọgh ni muboom amem siphẹ iiḍighi phọ abidị okori omhoọgh iboom ikpoki r’aruphua. Kuolọ bidị u/moọgh ogey oḅaạl olhoghi. AKlaus aḅẹm mọ: “Aruphua phọ ayoor ipu ni ipẹ yoor omhoghi bọ omhoọgh phọ, kuolọ yoor u/moọgh siigbu obughẹ arukumuan phọ ayoor esi aZihova. Yoor umhoọgh onyạgh aloor, kụ aghuḍum mọ ayoor o/mheerạ esi.” Eeni nạ mamhiịn aani mọ ogbon omhoọgh aruphua nyinhạ ke/ngọ ogbaanyạn. Eḍighi idiphọ pọ ka/ḅonyonhu azuan. Ooḅeghiọn imạ areḍeenhaan abunhọn kelhoghonhaạn ni nyinhạ ḍighaạgh oḍighi ipẹ ewạ bọ. Eḅẹl phọ, ooḅeghiọn iyaạr dị aburulom kotuughạ esi eḍeenhaan Uw-emhạ phọ Jehoshaphat.

6. Ika kụ idị Uw-emhạ phọ Jehoshaphat asighẹ aḍighinhom Proverbs 3:5, 6, okaran igbagarạ ipaanhaạn?

⁶ Burulom, adool phọ anyinha ridughe ghan ni inyinha eeni amem ḍughụm? Eḍighi idiphọ pọ nyinha kemooghọm ni suọ esi eḍeenhaan Uw-emhạ phọ Jehoshaphat. Idiphọ uw-emhạ, iḍighi dool aJehoshaphat ophogh oomo phọ eelhe phọ! Ika kụ idị odị amhaạr bọ aphạm ḍiboom adool phọ aḍiẹn phọ? AJehoshaphat aḍighi ni ipẹ odị katue bọ oghoph awe phọ odị rapogh bọ. Odị aghoony ramhạ phọ aJudah aḅilhẹ aakpomhoghi ḍita awe eghạm dị ropel li 1,160,000. (2 Chron. 17:12-19) Onyebel roten, aJehoshaphat asoman ni igbogh ipaanhaạn. Aḍita awe eghạm Ammon, Moab, r’awe aroogbolhom mọ aSeir, uru ni opaạr nyodị, eghunotu odị, ḅilhẹ r’awe phọ odị. (2 Chron. 20:1, 2) AJehoshaphat aḍighi ika? Odị alhọm aZihova olhoghonhaạn aḍighaạgh r’inyaạm. Iphẹn phọ imhoọgh muḅọph r’oroma osụ-olhoghi phọ odi bọ siphẹ Proverbs 3:5, 6. (Bạl.) Iiḅereghị osooromhi aloor phọ aJehoshaphat ogẹ bọ siphẹ 2 Chronicles 20:5-12, eḍeenhaan okạr ipẹ odị aḍuom bọ olhoghi Odẹ ephomhoghiạn k’akẹ phọ odị. AZihova amhegheron ika kụ aghị esi iiḅereghị phọ aJehoshaphat?

7. Ika kụ idị aZihova amhegheron aghị esi iiḅereghị phọ aJehoshaphat?

 ⁷ AZihova aḅaanhaạn Jehoshaphat dị eego esi oniin onyọ aLivai dị oghol mọ Jahaziel. AZihova aḅẹm mọ: “Imereghạ riisi anyinha, ekori, kụ emhiịn idị aZihova kiphẹl inyinha.” (2 Chron. 20:13-17) Ogbạ agey, epẹ kụ ke/ten dị robe ghan eghạm! Toroboiperolbọ, oye kụ o/ngọ iiḅakiọm mọ iphẹn phọ; iḅuạ esi aZihova kụ eru. AJehoshaphat akạr kụ aḍuomolhoghi Enhaạn phọ odị, kụ aḍighi ipẹ oḅenhị bọ nyodị. Mem mọ awe phọ odị r’odị rokị bọ omherenyạn e/pomoghiạn phọ, kparipẹ roseere arephelhegbe awe eghạm mọ odị epẹ arisigh phọ, odị aseere rokosuọr dị u/pạm raraạr eghạm. AZihova amhunhenhi ni ipẹ odị aguan bọ Jehoshaphat; Odị akpạr ri apu e/pomoghiạn phọ.—2 Chron. 20:18-23.

8. Eeghe kụ idị aburulom kotue otuughạ esi eḍeenhaan phọ aJehoshaphat?

⁸ Burulom, nyinha ketue ni etuughạ iyaạr esi eḍeenhaan phọ aJehoshaphat. Nyinha emoọgh oḍighi oghoph eghunotu phọ anyinha, kụ iḍighi kụ nyinha rekumuan ghan agey oghoph oḅilhẹ obakị abidị. Mem dị nyinha esoman ipaanhaạn, nyinha etue ni eloghoma mọ ogina anyinha ketue ni ekaran. Toroboiperolbọ, ikel inyuughiom obeḍenhọm aloor anyinha. Kparipẹ ghụn, ḅeeḅereghị alhọm olhoghonhaạn aḍighaạgh aZihova esi dị ogina anạ bịn odi. Oḅarạm isiẹn, iiḅereghị k’ekpom r’anhịr phọ anyinha. Iwạ iiḅakiọm aZihova esi otuughạ ghan aBaibul phọ r’arinyạ phọ oḍighom mọ Enhaạn omiteom bọ, kụ esighẹ ghan eḍighinhom oroma phọ nyinha kemiịn bọ. Eeni abunhọn ko/meeraam osopha anyinha dị akpasị siphẹ aBaibul phọ, kụ otue kẹn iḅenhị inyinha mọ nyinha rezoọm r’elologhi. Bidị otue ni oḅẹm mọ ikpoki r’araraạr dị ikpoki ketue eko, ku ketue engọ eghunotu phọ anyinha oghoph dị anhighẹ apelheghiom. Kuolọ tuutughiạn eḍeenhaan phọ aJehoshaphat. Odị aḍuomolhoghi aZihova kụ aḍeenhaan ghan esi iḍighinhom araraạr phọ odị. AZihova o/ḅitonhaạn oye phọ ophọn phọ aḅạr bọ nyodị idiphọ, kụ nyinhạ kẹn ka/ḅitonhaạn. (Ps. 37:28; Hib. 13:5) Ighẹn inhọn araraạr kụ edị olom r’anhịr koḍighi omhoọgh aghuḍum oḅaạl olhoghi?

9. Eeghe kụ edị yira kotue okaạph ilọ oyil phọ Aizaya r’anhịr phọ odị?

⁹ Oyil phọ Aizaya r’anhịr phọ odị ugbon okumu aZihova. Aizaya aḍighi oyil, kụ eeni anhịr phọ odị aḍighi aani ni oḍighi phọ loor esi dị umhạgh ghan nyodị mọ “oyil anhịr.” (Isa. 8:1-4) Idiphọ olom r’anhịr, Aizaya r’anhịr phọ odị usighẹ okumu aZihova kụ oḍighi eḅẹl iyaạr siphẹ aghuḍum mọ abidị. P’eeghe emạ eḍeenhaan dị bidị ongọ budị m’aalhạn rodon!

10. Otuughạ ghan ilọ imiịn aBaibul phọ keloghonhaạn ika ḍighaạgh we dị m’aalhạn okuamhị oḍighi ipẹ bidị kotue bọ siẹn arukumuan phọ aZihova?

¹⁰ Abudị m’aalhạn rodon kotue ni ogbon okumu aZihova esi oḍighi ghan oomo ipẹ bidị kotue bọ siphẹ arukumuan phọ aZihova. Bidị kotue ni okparamhị oḍuomolhoghi phọ abidị esi aZihova, mem dị bidị oḅophạn ghan otuughạ imiịn aBaibul kụ omhiịn ipẹ retuụgh ghan bọ bịn kemite oomo amem. * (Taitọs 1:2) Bidị otue ni opinhom aani bin omhunhenhi imiịn phọ aZizọs mọ oghaạph iiḅi iinhaghạn phọ kokaạph ni oleenye oomo ade phọ kụ eekunha phọ egbi oru. Bidị oḍighi iduọn phọ pọ meḍeenhaan mọ bidị romunenhi aani ni imiịn aBaibul phọ. (Mat. 24:14) Eḍighi maạr dị olom r’anhịr kụ okạr okuphom owol mọ imiịn aBaibul phọ remunughan ni, pọ kenyaamhị ni bidị oḍighi ipẹ bidị kotue bọ siẹn arukumuan phọ aZihova.

11. Eeghe kụ idị aPrisiIiạ r’Akuilạ orue oḍighi, kụ eeghe kụ iḍighi?

¹¹ Abulọ purukụ aalhạn kotue ni otuughạ iyaạr ḍighaạgh olom r’anhịr dị oghol mọ PrisiIiạ r’Akuilạ. Bidị abuọ aJu dị orọl ghan epẹ egbogh emhạ phọ aRom. Bidị uḍighi Kristẹn mem dị onhaghạn aani iiḅi iinhaghạn phọ ilọ aZizọs. Iikia i/lo, bidị umhoọgh ni ogbaanyạn siphẹ aghuḍum mọ abidị. Kuolọ, araraạr inmia ni egina amem, mem mọ odaạm mọ Claudius aḅẹm bọ mọ oomo abuọ aJu oḅuạ Rom. Tuutughiạn ipẹ iphẹn phọ ketir bọ aPrisiIiạ r’Akuilạ. Iwạ mọ bidị oḅuạ ekpisi phọ bidị olhegheri ghan bọ, owạ omhoom otu, kụ oḅilhẹ omhiigh ḍighi olhoghoḍị arogbogo phọ abidị. Onmia phọ ophọn aḍighi ni idị bidị u/sighẹ mun rukumuan Omhạr phọ u/ḍighi eḅẹl ḍughụm? Eeni nạ kalegheri ni ophagharanhaạn phọ. Epẹ Korịnt emhoom ekpisi phọ bidị orugh bọ, aPrisiIiạ r’Akuilạ umhiigh olhoghonhaạn aḍighaạgh ookpomhoghan phọ epẹ phọ oḅilhẹ okumuan r’otelhedom mọ Pọl okparamhị abumor phọ. Onyebel roten, bidị ughị ni inhọn aramhạ dị ewaạm abukaaphọm ebụgh. (Iiḍighi 18:18-21; Rom. 16:3-5) P’eeghe idị bidị oḅophoghạn oghelhọm dọl aghuḍum arukumuan r’oḅaạl olhoghi!

12. Uḍighi ika kụ abulọ m’aalhạn kokonyị bọ siigbu siẹn arukumuan phọ bidị rongọ bọ aZihova?

¹² Abulọ m’aalhạn rodon kotue ni otuughaạny PrisiIiạ r’Akuilạ esi osighẹ Omhạr phọ oḍighi eḅẹl. Amem dị ekạr ekasiạn dị olom r’anhịr kokạr okaạph ilọ asiigbu phọ abidị pọ amem dị bidị rowạ aalhạn. Mem dị olom r’anhịr oghonyị siigbu ilọ arukumuan phọ abidị esi aZihova, kụ oḅophạn ghan okumuan oteẹny asiigbu phọ, bidị komiịn ni ibadị aroopoogh dị aZihova kaloghonhaạn bidị ḍighaạgh. (Eccl. 4:9, 12) Ooḅeghiọn eḍeenhaan aRussell r’Elizabeth. ARussell aḅẹm mọ, “Mem mọ yoor rokaaphạn bọ ilọ ilhom mọ, yoor ughaạph ni raraạr dị yoor okạr rowạ oḍighinhaan aZihova.” Elizabeth aḅẹm mọ, “Yoor ughaạph iphẹn phọ pidị mem dị yoor osoman osopha epẹ ghisigh, yoor otue osopha idị ke/kikima oteẹny asiigbu phọ ayoor.” Asidọl phọ aRussell r’Elizabeth imheera ni mọ bidị oghị epẹ Micronesia, ekpisi dị ewaạm mọ ebụgh.

13. Odaphạn Psalm 28:7, eeghe kụ remite ghan mem dị yira oḍuomolhoghi aZihova?

¹³ Idiphọ aRussell r’Elizabeth, ibadị aburulom  r’anmariịr mosopha odughe adọl aghuḍum mọ abidị pidị bidị omhoọgh muboom amem oghị oghaạph r’otughemhị iiḅi iinhaghạn phọ. Mem dị olom r’anhịr oghonyị siigbu pidị bidị otue ongọ aZihova ipẹ bidị kotue bọ, kụ oḅophoghạn okumuan oteẹny, imạ araraạr reḅuạ ghan ni kemite. Bidị komiịn ni idị aZihova kapogh bidị, oḍuomolhoghi phọ abidị esi odị akpạr, bidị oḅilhẹ omoọgh ogey oḅaạl olhoghi.—Bạl Psalm 28:7.

14. Ika kụ idị otelhedom mọ aPita r’anhịr phọ odị oḍeenhaan mọ bidị oḍuom ni olhoghi oguan phọ odi bọ siphẹ Matiu 6:25, 31-34?

¹⁴ Aburulom r’anmariịr kotue ni otuughạ iyaạr esi eḍeenhaan phọ aPita r’anhịr phọ odị. Esi odiiny unwanyụ obobọ lhạ egbi k’eḅẹl amem mọ odị azuan bọ Zizọs, otelhedom mọ aPita amhoọgh ni ephigh osopha dị emhoghi osopha. APita akonị ghan akonị kụ aphoghom ghan bọ eghunotu phọ odị. Kụ iḍighi kụ mem mọ aZizọs aḅenhị bọ nyodị mọ awilhẹ oḍighi akonị phọ adạph nyinhọ, iwạ ni mọ aPita aatughiạn ilọ eghunotu phọ odị kụ agbi osopha. (Luk 5:1-11) Epẹ eekunha phọ, aPita asopha ni odạph aZizọs. P’eeghe omạ osopha! Ariphigh edi ni omheeraam mọ anhịr phọ aPita abakị ni nyodị. Loor esi dị aBaibul phọ aḍeenhaan mọ oḅeton bọ Zizọs bịn aPita r’anhịr phọ odị urelhean ni oghiighị rikpisi kirokirọ. (1 Kọr. 9:5) Dị iikia i/lo, egey eḍeenhaan anhịr phọ odị iḍighi ni idị aPita angọ ni oroma dị ogẹ ni olhọgh siphẹ aBaibul phọ dị egbolhomaam burulom r’anmariịr dị oḍighi Kristẹn. (1 Pit. 3:1-7) Ii, aPita r’anhịr phọ odị uḍuomolhoghi oguan phọ aZihova mọ odị kamiteom ni angọ bidị, eḍighi maạr dị bidị osighẹ raraạr ilọ Omhạr phọ kụ oḍighi eḅẹl siphẹ aghuḍum mọ abidị.—Bạl Matiu 6:25, 31-34.

15. Nạ atuughạ eeghe esi iphẹn emitenhaan bọ Tiago r’Esther?

¹⁵ Eḍighi maạr dị apinien phọ anạ masighenhọm ni siạ, ika kụ idị nạ kakiọm ghisigh abughẹ ḍiḅeraạn okumuan ongọ aZihova eten dị ebụgh? Eniin eten pọ olhọgh elhegh raraạr dị memiteghunhaan bunhọn aburulom r’anmariịr. Esi omaạm, nạ atue ni abạl ooḍiạ arumhuoghaạph phọ eḅẹm bọ mọ, “They Offered Themselves Willingly.” Arumhuoghaạph phọ ipẹ phọ ilhoghonhaạn ḍighaạgh Tiago r’Esther, olom r’anhịr abuọ aBrazil, orue obughẹ ephuọm mọ bidị omhoọgh bọ okumuan ekpisi dị ewaạm mọ ebụgh. ATiago aḅẹm mọ: “Iduọn yoor aạl bọ ilọ ipẹ aZihova alhoghonhaạn bọ ḍighaạgh rebenhẹ phọ odị siẹn amem mọ ayira, inyu kẹn ni iyoor odạph oroma phọ aZihova kụ olhoghoma aani olhoghonhaạn aḍighaạgh phọ odị.” Bidị unyeenhe ni oghị epẹ Paraguay, ekool dị roḅạ ghan onhụ aPortugal lhạ phọ 2014. Esther aḅẹm iduọn mọ: “Eniin esi aBaibul dị eḅeraạn iyạl phọ ayoor agey pọ Efesọs 3:20. Ibadị amem yoor momhiịn ni dị ikpo onhụ phọ ipẹ phọ eru inẹ iduọn yoor rokumuan bọ rukumuan phọ ayoor kongọ aZihova.” Siphẹ aḍinyạ phọ aḍiphẹ aPọl agẹ bọ aghiọm we Efesọs, odị aguanhaan mọ aZihova kamiteom ni angọ apeelheom ipẹ yira opuru bọ nyodị. Ipẹ phọ oomo amem retu ghan ni inẹ!

16. Aburulom r’anmariịr dị asiạ ke/ghị anyụ koteẹny oroma ḍighen, mem dị rowạ ooḅeghiọn ophogh asiigbu abidị ilọ okumu aZihova?

¹⁶ Aburulom r’anmariịr dị asiạ ke/ghị anyụ kotue ni omooghọm suọ reḍeenhaan abunhọn dị obeḍenhọm aZihova. Abuniin aburulom r’anmariịr morọl li ibadị asiạ rukumuan oomo amem mọ. Kenighẹ ni dị nạ kalọm oroma abidị eḍighi maạr dị nạ rawạ okạr ooḅeghiọn ophogh asiigbu phọ anạ. Ephẹn phọ enhọn odọ eten oḍeenhaan mọ nạ aḍuomolhoghi aZihova. (Prov. 22:17, 19) Ikumor awe phọ kẹn kotue ni ologhonhaạn ḍighaạgh iḍoọgh dị aalhạn, ophighi  r’oḅilhẹ ophorogh oteẹny asiigbu dị egbolhomaam rukumuan aZihova.

17. Eeghe kụ imitenhaan Klaus r’aMarisa, kụ ipẹ phọ itughemhị iyira eeghe?

¹⁷ Eeni amem osopha obughẹ arukumuan phọ ayira ka/kị ipẹ yira ootughiạn bọ. Nạ aatughiạn ni eḍeenhaan aKlaus r’aMarisa, oghaạph bọ oghol epẹ omhạn? Bidị aalhạn bọ iraạr asiạ kụ iten bịn bidị oḍuạ ekpisi abidị oghị okumuan arukumuan olhoghoḍị aruutu epẹ olạ agadạ phọ aFinland. Toroboiperolbọ, uḅenhị ni bidị mọ bidị ko/tue otọl epẹ dị epel odiiny unwanyụ. Eḅẹl amem mọ, ipẹ phọ iḅonyon ni bidị ezu. Kuolọ esighẹ rekị bịn omhạgh bidị oghị otuughạ onhụ Arab, kụ nyiidiphọ r’oḅaạl olhoghi bidị rokumuan ghan ekool dị roḅạ ghan onhụ Arab enhọn eelhe. Mem dị bidị rootughiạn ipẹ emite bọ, aMarisa aḅẹm mọ: “Re/dugh ghan ogbatạn edạ oḍuạ ekpisi dị nạ odi kụ oḍuomolhoghi aZihova bịn. Kuolọ mị mamhiịn ipẹ aZihova oomo amem rulhoghonhaạn ghan bọ iyoor ḍighaạgh reten dị yoor u/seere olhoghi. Iphẹn imitenhaan bọ iyoor mebughẹ agey oḍuomolhoghi phọ amhị esi aZihova.” Odaphạn reḍeenhaan phọ iphẹn phọ, nạ katue ni akuphom owol mọ aZihova oomo amem kakpẹ ni nyinhạ imạ iikpiạ lọ nạ aḍuom nyodị olhoghi bịn.

18. Eeghe kụ edị olom r’anhịr koḍighi oghiọm aghisigh oḍuomolhoghi aZihova?

¹⁸ Apinien aḍighi inmo dị eḍuạ k’aZihova kụ eru. (Mat. 19:5, 6) Kụ odị rawạ dị abuphẹ m’aalhạn bọ kokelhọm inmo phọ ipẹ phọ. (Prov. 5:18) Nyinha abuphẹ m’aalhạn bọ kụ asiạ phọ ke/ghị bọ, ke/nighẹ ooḅeghiọn ophogh ipẹ nyinha rewạ bọ oghelhọm adọl aghuḍum mọ anyinha ḍughụm? Nyinha reḍighi ni oomo ipẹ nyinha ketue bọ oḍeenhaan osereghiạn inmo phọ aZihova mingọ bọ inyinha ḍughụm? Iḅaanhaạn aZihova esi iiḅereghị. Eghị siphẹ Ekpo Onhụ phọ odị ewạ sinhị iilhogh dị egbolhomaam r’adọl aghuḍum mọ anyinha. Kụ edaphạn oroma phọ aZihova kingọ bọ inyinha. Ikuphom ni owol mọ nyinha kemoọgh ni oḅaạl olhoghi r’akugey adọl aghuḍum, eḍighi maạr dị apinien phọ anyinha kụ agbon esi okumu aZihova!