1. Ḍighẹn aḍipuru kụ idị yira kotue ni opuruan loor?

NẠ RAMOỌGH ghan ni ooḅaghamhiạn aloor eeni amem ilọ araraạr phọ ipẹ kemite bọ ghisigh, idiphọ amuphe ikarạph aruukụ iiḅereghị, izuoghom mọ aGog opọ aMagog, ḅilhẹ r’eghạm mọ Amagedọn ḍughụm? Nạ mapuruan ghan ni loor mọ ‘Mị katue ni apamanhạm ḍimheerạ phọ amhị mem dị araraạr oḍigh aḍiigu phọ iphẹn phọ emhiigh omiteghu ḍughụm?’ Eḍighi maạr dị nạ raatughiạn ghan ni ilọ iphẹn phọ, pọ ikpo onhụ phọ aZizọs ogẹ bọ esi aBaibul phọ osighẹ bọ emhuoghaạph phọ ephẹn yira kooḅeghiọn bọ kelhoghonhaạn ni nyinhạ ḍighaạgh. AZizọs aḅenhị butelhedom mọ odị mọ: “Ke/meera iloghi phọ anyina iiḅaghamị inyina. lmeeraam.” (Jọn 14:1) Omheeraam dị akpạr kulhoghonhaạn iyira ḍighaạgh okparạm r’akpọ oḅio etigheri idị kemite ghisigh.

2. Ika kụ idị yira kotue okparamhị omheeraam mọ ayira, yira kooḅeghiọn eeghe siẹn emhuoghaạph phọ ephẹn phọ?

² Yira kotue ni okparamhị omheeraam mọ ayira ilọ okaran araraạr dị edi ghisigh, esi ooḅeghiọn ipẹ yira rokaran ghan bọ odẹgh ophogh omheeraam mọ ayira nyiidiphọ. Mem dị yira okiririom ophogh ghan nyiidiphọ ipẹ yira rozọ ghan bọ mem dị yira osoman odẹgh ophogh, bịn yira komiịn ni riisi dị ewạ okparamhị omheeraam mọ ayira. Torobọ amem dị yira okparạm odẹgh ophogh, omheeraam mọ ayira kakpạr ri apu ipẹ arọl bọ. Kụ iphẹn phọ kinyaamhị iyira orue okparạm ilọ retu ghisigh. Siẹn emhuoghaạph phọ ephẹn phọ, yira kooḅeghiọn inya asidọl dị abutelhedom mọ aZizọs osoman dị eḍeenhaan idị emhoghi dị bidị kobughẹ omheeraam mọ abidị. Kụ yira oḅilhẹ ooḅeghiọn idị yira kotue ni osoman aani iniin phọ asidọl phọ rodon, r’idị ipẹ phọ kiikolhobian iyira ilọ aghisigh phọ.

3. Odaphạn Matiu 6:30, 33 eeghe iyaạr ilọ omheeraam kụ edị aZizọs aagholhomhi?

³ Eḍighi eseereom mọ olhephiri uwotu aaḅaghamhiạn ghan loor ilọ omiteom eḍien, iinmenian, r’esi orọl ongọ eghunotu phọ odị. Kuolọ iphẹn phọ re/dugh ghan oḍighi siẹn asimem mọ ekpạr bọ iduọn. Abuniin abumor ayira moroph oḍighi abidị, kụ etigheri ikuph phọ bidị olhọgh bọ ko/mhoọgh mun onhọn. Abunhọn moghel osighẹ oḍighi dị u/kpeanhaạn Kristẹn. Mem dị erọl iduọn phọ, rewạ momhoọgh omheeraam dị akpạr mọ aZihova kaḍighi ni idị yira komoọgh ilọ ophoghom eghunotu phọ ayira. AZizọs aḅenhị ni bumatuạn phọ odị iphẹn phọ siphẹ oghaạph phọ odị arọl bọ anyụ eeḅarạph angọ. (Bạl Matiu 6:30, 33.) Amem dị yira okạr okuphom owol mọ aZihova iyira ku/ḅitonhaạn kụ edị yira kotue ogbon okumu aZihova. Kụ mem dị yira omhiịn ipẹ aZihova rulhoghonhaạn bọ iyira ḍighaạgh omiteom araraạr orolhọm odị katu ni eye esi ayira, ḅilhẹ omheeraam mọ ayira akpạr.

4-5. Eeghe kụ ilhoghonhaạn ḍighaạgh eghunotu dị omhoọgh ooḅaghamhiạn aloor mem dị araraạr ekpạr?

⁴ Ooḅeghiọn idị eniin eghunotu epẹ Venezuela olhoghoma olhoghonhaạn aḍighaạgh aZihova mem dị bidị omhoọgh ooḅaghamhiạn aloor ilọ omhoọgh araraạr orolhọm. Epẹ omhạn, eghunotu phọ aCastro umhoọgh ghan ikpoki orolhọm esi oḅephogh ghan iizo. Kuolọ awe dị ophạm silaagbạ oru ophorogh bidị omiteom osighẹ de phọ. AMiguel odẹ phọ, aḅẹm mọ: “Nyiidiphọ yoor olọm oye ḍibạm ade kụ roḅeph aani ghan. Mị ramiighom ghan torobọ aḍio r’iiḅereghị mọ aZihova ungọ ni iyoor ilọ aḍio phọ.” Araraạr ekparanhaạn ni eghunotu phọ ephẹn phọ, kuolọ loor omheeraam mọ abidị mọ Odẹ ephomhoghiạn phọ abidị kangọ ni ipẹ ewạ bọ ilọ aḍio phọ, eghunotu phọ aCastro ro/bilhẹ ghan oghị ituughạ r’omite epẹ erugh phọ. Bidị osighẹ Omhạr phọ kụ oḍighi eḅẹl, kụ aZihova rangọ ghan ni bidị ipẹ ewạ bọ.

⁵ Siẹn aḍikparamhinheẹn phọ aḍiẹn phọ, aMiguel r’anhịr phọ odị Yurai, ugbon ipẹ aZihova rapogh bọ bidị. Eeni amem, aZihova asighẹ ghan bumor r’abumarani phọ kụ aḍighinhom ongọ aMiguel raraạr phọ ipẹ ewạ bọ orolhọm obobọ olhoghonhaạn odị ḍighaạgh omhoọgh oḍighi. Inhọn asimem aZihova asighẹ olạ agadạ phọ kụ angoọm bidị raraạr ipẹ ewạ bọ. AZihova ko/ḅitonhaạn bidị. Loor esi iduọn phọ, bidị momhiịn idị omheeraam eghunotu phọ abidị rakpạr ghan bịn. Oḅẹl onyanhị phọ abidị Yoselin roghaạph ilọ amem dị aZihova alhoghonhaạn bidị ḍighaạgh, kụ aḅarạm mọ: “Itir ri imhị iboom omhiịn olhoghonhaạn aḍighaạgh phọ aZihova. Mị amiịn nyodị idiphọ oyaghirị dị mị katue ni abeḍenhọm oomo adọl aghuḍum mọ amhị.” Odị aḅilhẹ aḅẹm mọ: “Iiḅaghamhị phọ iphẹn phọ eghunotu phọ ayoor osoman bọ mitughemhị iyoor ilọ okaran iiḅaghamhị dị kebụgh epu iphẹn phọ epẹ ghisigh.”

6. Ika kụ idị nạ kakparamhị omheeraam mọ anạ mem dị nạ asoman ekulhom?

⁶ Nạ asoman ni ekulhom ḍughụm? Eḍighi idiphọ, pọ ophọn amem dị ekparạm nyinhạ. Toroboiperolbọ, etigheri ipẹ adọl phọ ekpạr bọ esi, nạ katue ni asighẹ mem mọ amuẹn phọ akparamhiọm omheeraam mọ anạ. R’iiḅereghị,  bạl ikpo onhụ phọ aZizọs edi bọ Matiu 6:25-34 kụ agbirima. Ḅeeḅeghiọn reḍeenhaan awe amem mọ ayira dị egananamhi mọ aZihova ramiteom ghan ni kangọ buphẹ ogbon bọ okumu odị. (1 Kọr. 15:58) Oḍighi ghan iduọn phọ kekparamhị akpọ oḅio phọ anạ mọ Odẹ k’akẹ phọ anạ kaḍighi ni angọ nyinhạ ipẹ odị maḍighi bọ ni angọ bunhọn dị osoman aani iniin phọ asidọl phọ. Odị alegheri ni raraạr phọ ekuom bọ nyinhạ, aḅilhẹ alegheri ilọ omiteom ongọ anạ. Mem dị aZihova alhoghonhaạn nyinhạ ḍighaạgh, omheeraam mọ anạ kakpạr ri apu ipẹ arọl ghan bọ, eḅilhẹ enyaamhị nyinhạ ilọ okparạm ogbogh odẹgh ophogh ghisigh.—Hab. 3:17, 18.

7. Odaphạn Matiu 8:23-26, ika kụ idị “oboom oghim” adẹgh omheeraam abumatuạn phọ aphogh?

⁷ Mem dị aZizọs r’abumatuạn odị ozuan oghim ophiịny, aZizọs asighẹ ipẹ emite bọ kụ alhoghonhaạn bidị ḍighaạgh omhiịn mọ bidị omoghi obughẹ omheeraam mọ abidị. (Bạl Matiu 8:23-26.) Iduọn oghim mọ rabụgh bọ, oolhogh ophiịny phọ aphum ghan muụm bịn alhoghoḍị siphẹ oghuugh phọ, kuolọ aZizọs aphoomhị loor bịn anhaanhị ghan. R’oḅio kakaph abutelhedom mọ odị ughị ni osumeẹny nyodị kụ olhọm mọ aphẹl bunọ, Uw-emhoọgh phọ aphagharanhaạn bidị mọ: “Sey, nyina awe dị omeeraam u/manạm. Eeghe kụ iḍighi kụ nyina reepuph bọ iduọn phọ?” Abutelhedom mọ aZizọs roopuph bọ ukpẹ ni olhọgh elhegh mọ aZihova katue ni apẹl Zizọs r’abidị asighẹ siphẹ iiḅaghamhị phọ ipẹ phọ. Iphẹn phọ itughemhị iyira eeghe? Mọ r’omheeraam dị akpạr yira kotue ni okaran iiḅaghamhị dị eghịgh idiphọ oghim, obobọ iiḅaghamhị dị okạr oghim akọm.

8-9. Ika kụ idị omheeraam mọ Anel aḍigh esi odẹgh ophogh, kụ eeghe kụ ilhoghonhaạn nyodị ḍighaạgh?

⁸ Ooḅeghiọn idị omheeraam oniin onyọ umarani olọ Puerto Rico dị k/aạl ilhom dị oghol mọ Anel akpạr, mem dị akparaghạm odẹgh ophogh. Odẹgh ophogh phọ odị akạr aḍighi “oboom oghim.” Odẹgh ophogh phọ amhiigh 2017 mem dị aHurricane Maria aphueghị otu phọ Anel. Loor esi oghim mọ odị aroph ni oḍighi odị. Anel aḅẹm mọ, “mem mọ asidọl phọ erọl bọ iduọn phọ mị umhoọgh ni ooḅaghamhiạn aloor, kuolọ mị utuughạ ilọ oḍuomolhoghi aZihova dị eego esi iiḅereghị, ḅilhẹ dị mị ka/meera mọ ooḅaghamhiạn aloor phọ amhị uḅonyon imhị azu.”

⁹ Anel aḅilhẹ aḅẹm mọ, onhaghanhạn ghan alhoghonhaạn nyinọ ḍighaạgh okaran odẹgh ophogh phọ opọ phọ. Odị aḅẹm mọ: “Odaphạn ghan iromhoghiom mọ odighom mọ ongọ ghan bọ ilhoghonhaạn imhị ḍighaạgh ophoomhị aloor. AZihova ulhoghonhaạn ni imhị ḍighaạgh dị eego esi abumor r’abumarani phọ. Bidị ukparamhị ni imhị kụ ungọ ghan imhị raraạr phọ ipẹ rewạ bọ orolhọm.” Odị aḅarạm mọ: “AZihova ungọ ni imhị apuemhi ipẹ mị apuru bọ, kụ ikparamhị ni omheeraam amhị iboom.”

10. Eeghe kụ idị nạ katue aḍighi eḍighi maạr dị nạ asoman “oboom oghim” iiḅaghamhị?

¹⁰ Nạ asoman ni “oboom oghim” siphẹ adọl aghuḍum mọ anạ ḍughụm? Eeni nạ ramiinọm loor esi iiḅaghamhị eseereom. Eeni oghim olọ anạ aḍighi e/moon dị meḅonyon nyinhạ ezu, kụ nạ o/lhegheri ilọ oḍighi. Oobaghamhiạn  aloor katu ghan ni eeni amem, kuolọ ka/meera esophoghom nyinhạ oḍuomolhoghi aZihova. Ḍuraan atuman nyodị esi iiḅereghị r’oomo ekpom. Kparamhị omheeraam mọ anạ esi ogbiran ghan ilọ asimem dị aZihova malhoghonhaạn ghan nyinhạ ḍighaạgh. (Ps. 77:11, 12) Nạ katue ni akuphom owol mọ r’amem r’amem odị nyinhạ ka/ḅitonhaạn.

11. Uḍighi ika kụ yira kosopha bọ onhaghanhạn ghan abuphẹ roḍiemhiom bọ?

¹¹ Eeghe kụ keḅilhẹ etue elọgh ḍighaạgh okparạm odẹgh ophogh? Idiphọ Anel aghaạph bọ, onhaghanhạn ghan. Tuughạ oḍuomolhoghi buphẹ aZihova r’aZizọs oḍuom bọ olhoghi phọ. Eeni amem abuphẹ roḍiemhiom bọ otue ni ongọ iiḅakiọm dị emhoọgh idị edi esi ayira. Toroboiperolbọ, aZihova rasẹph ghan ni bulọ onhaghanhạn. Yira olegheri iphẹn phọ loor esi dị Ekpo Onhụ phọ odị r’idị memitenhaan rebenhẹ odị dị okpẹ oḍuomolhoghi eḍeenhaan mọ onhaghanhạn rapẹl ghan sighuḍum. (Ex. 14:1-4; 2 Chron. 20:17) Gbirima ghan ilọ idọ areḍeenhaan phọ iphẹn phọ. Oḍighi ghan iduọn phọ kekparamhị eephuạ phọ nạ amhoọgh bọ odaphạn ghan iikolhobian oḍighom mọ aZihova nyiidiphọ r’epẹ ghisigh. (Hib. 13:17) Kụ epẹ eekunha phọ nạ ka/moọgh iyaạr otuạn oghiilhaan igbogh iiḅaghamhị phọ ketu bọ moọny amem.—Prov. 3:25.

12. ALuk 18:1-8 emiteom eeghe amuḅọph dị odi igbo omhoọgh omheeraam r’okparạm elhiom ooruẹn?

¹² AZizọs alegheri mọ ekeeny ooruẹn kedẹgh ni epogh omheeraam abumatuạn phọ odị. Olhoghonhaạn abidị ḍighaạgh okparaghạm, odị angọ ni oghaạph omaaniọm dị ogẹ siphẹ aḍinyạ phọ aLuk. AZizọs aghaạph ilọ ekpukelhe anhịr dị aaḅereghiạn ghan oogboom iiruẹn dị asiph r’akeel u/legheri. Odị akuphom owol mọ odị kamoọgh ni olhoghonhaạn aḍighaạgh eḍighi maạr dị nyodị i/pẹr olhọm. Ruukunha phọ oogboom iiruẹn phọ anhaghanhạn ni ilọm mọ odị. Yira otuughạ eeghe? AZihova k/oye ekeeny ooruẹn. Kụ iḍighi kụ aZizọs aḅẹm mọ: “Nyina regbi mọ Enaạn ke/soph iiruẹn ekeelemi we phọ odị rolọm bọ nyodị ologhonaạn aḍighaạgh ḍughul r’ootaany phọ ḍughụm?” (Bạl Luk 18:1-8.) Kụ aZizọs aḅilhẹ aḅarạm mọ: “Mem mọ Oọny phọ oye katu bọ, kamiịn nuụn ni buphẹ omeeraam bọ nyodị siẹn aḅirini phọ ḍughụm?” Idiphọ ekpukele anhịr phọ, mem dị yira osoman ekeeny ooruẹn, rewạ mọ oḍeenhaan ghan mọ omheeraam mọ ayira akpạr ri esi omhoọgh eegharạ okparạm kụ okori ghan. R’odọ omheeraam mọ opọ phọ yira kotue ni okuphom owol mọ mem lọ ekasiạn aZihova kulhoghonhaạn ni iyira ḍighaạgh. Ewạ kẹn momheeraam iikpọ phọ iiḅereghị emhoọgh bọ. Eeni amem, kopagharanhaạn iiḅereghị phọ ayira eten dị yira u/seere olhoghi.

13. Ika kụ idị iiḅereghị elhoghonhaạn ḍighaạgh eghunotu dị osoman ekeeny ooruẹn?

¹³ Ooḅeghiọn idị emitenhaan onyọ umarani dị oghol mọ Vero, dị odi ghan Democratic Republic of the Congo. AVero r’olom odị dị ra/kumu aani ghan aZihova ḅilhẹ r’onyanhị odị dị mamhạn 15 asiạ ughiil li roḍuạ emhạ abidị mem dị awe eghạm ozuom emhạ phọ. Epẹ eten phọ, bidị usi ni esi dị awe eghạm mọ osophom eten phọ, kụ omheremhị bidị opaạr mọ kozẹ bidị. Bịn aVero  amhiigh emoghi. Ophoomhị odị, onyanhị phọ odị amhiigh ooḅereghị omiteom kụ aghol ghan ḍien phọ aZihova siphẹ iiḅereghị phọ. Odị rooḅereghị omhạn, kụ oḍiemhiom awe eghạm mọ apuru mọ, “Bạm onyanhị, anhiạn kụ atughemhị nyinhạ ilọ ooḅereghị?” Kụ odị aḅẹm mọ, “Onhiin amhị kụ asighẹ ipẹ edi bọ siphẹ Matiu 6:9-13 utughemhiọm imhị.” Kụ oḍiemhiom abuọ eghạm mọ aḅẹm mọ, “Bạm onyanhị, dạph odẹ r’onhiin anạ aghị r’eephọ, aZihova Enhaạn phọ anyinha ighoph ni inyinha!”

14. Eeghe kụ ketue edẹgh epogh omheeraam mọ ayira, kụ eeghe kụ kilhoghonhaạn iyira ḍighaạgh okparạm?

¹⁴ Idọ phọ areḍeenhaan phọ iphẹn phọ itughemhị iyira mọ ku/bulha ghan mọ iiḅereghị emạn ni maạr. Kuolọ kokaạph ika eḍighi maạr dị aZihova u/pagharanhaạn iiḅereghị phọ anạ mem mem mọ obobọ iyaạr i/nmia? Idiphọ ekpukelhe anhịr phọ aZizọs aghaạph bọ aghol, ka/bilhẹ ooḅereghị r’okuphom owol mọ Enhaạn nyinhạ ka/ḅitonhaạn, ḅilhẹ mọ mem dị eteẹny odị kapagharanhaạn ni iiḅereghị phọ anạ. Kiọm ghisigh alhọm ghan aZihova uwaloor iigbia phọ odị. (Fil. 4:13) Ka/bulha mọ moọny amem aZihova kasẹph ni nyinhạ iboom kụ eḅilhẹ ekịgh mudị nạ o/mhiinhọm ghan. R’olhoghonhaạn aḍighaạgh aZihova kụ nạ arue ni akparạm odẹgh ophogh, omheeraam mọ anạ kakpạr ri eḅilhẹ enyaamhị nyinhạ okparạm odẹgh ophogh ghisigh.—1 Pit. 1:6, 7.

15. Odaphạn Matiu 17:19, 20, eeghe ipaanhaạn kụ edị abutelhedom mọ aZizọs osoman?

¹⁵ AZizọs atughemhị bumatuạn phọ odị mọ omheeraam kaloghonhaạn ni bidị ḍighaạgh okpạr opu iiḅaghamhị. (Bạl Matiu 17:19, 20.) Amem irọl li dị bidị u/tue uporogh okarạph uwaloor ghalhamọ r’iduọn bidị moḍighi ghan bọ ni inhọn asimem. Eeghe kụ isughanham bọ? AZizoṣ aḅenhị ni bidị mọ omheeraam mọ abidị kụ idị u/manạm. Odị aḅenhị bidị mọ eḍighi maạr dị bidị omhoọgh omheeraam dị akpạr, pọ bidị kotue ni oḅenhị iiḅaghamhị dị eghịgh eeḅarạph mọ eruphuronhu eḅuạ! Rodon, yira kẹn kotue ni osoman iiḅaghamhị dị kekịgh mudị elọ ayira memhunheen.

16. Ika kụ idị omheeraam alhoghonhaạn ḍighaạgh Geydi okparạm mem mọ oghiigh bọ olom mọ odị?

¹⁶ Ooḅeghiọn eḍeenhaan umarani phọ Geydi, olọ aGuatemala. Ughiigh olom odị Edi, ḍiniin aḍio dị bidị oḍuạ otu ituughạ rokeel olhoghotu. Ika kụ idị omheeraam mọ aGeydi alhoghonhaạn nyodị ḍighaạgh okaran adọl okururu phọ? Odị aḅẹm mọ: “Iiḅereghị rilhoghonhaạn imhị ḍighaạgh onyaariọm aZihova iiḅaghamhị phọ amhị, kụ ipẹ phọ ringọ ghan imhị eephọ olhoghi. Mị amiịn mọ aZihova ruphogh ni imhị dị eego esi abuọ eghunotu amhị ḅilhẹ r’arighirị amhị siẹn ookpomhoghan phọ. Okuọm aloor siphẹ arukumuan phọ aZihova rilhoghonhaạn ghan imhị ḍighaạgh dị mị ka/moọgh ooḅaghamhiạn aloor ilọ iḍue. Loor iphẹn mimitenhaan bọ imhị, mị maru alegheri mọ etigheri odẹgh ophogh phọ mị kasoman bọ ghisigh, mị katue ni akparạm r’olhoghonhaạn aḍighaạgh aZihova, Zizọs, ḅilhẹ r’oḍighom mọ.”

17. Eeghe kụ idị yira kotue oḍighi mem dị yira osoman iiḅaghamhị dị eghịgh egbogh eeḅarạph?

¹⁷ Nạ ramoghi ni ḍuugh oye ephomhoghiạn  anạ ḍughụm? Pọ bạl ghan riisi aBaibul dị eghaạph ilọ awe dị oḅerion esi aḍuugh, obọ ekparamhị oḍuomolhoghi phọ anạ. Nạ ramoghi ni loor olọ eghunotu anạ dị mophorogh siẹn ookpomhoghan phọ ḍughụm? Pọ waaghị riisi aBaibul dị kengọ nyinhạ okuphom owol mọ eten phọ epẹ Enhaạn raliọm ghan bọ ilọ asuọ ayira ni. Torobọ iiḅaghamhị lọ nạ asoman, sighẹ akparamhiọm omheeraam mọ anạ. Kuukuanhaan aZihova oomo ipẹ edi bọ ekpom mọ anạ. Ka/tọl elọ anạ sạm, kparipẹ ghụn ḍuraan atuman bumor r’abumarani phọ. (Prov. 18:1) Pinhom aani ghan bin raraạr dị kelhoghonhaạn nyinhạ ḍighaạgh okparạm, ghalhamọ r’iduọn nạ raḍighinhom bọ r’izin. (Ps. 126:5, 6) Ka/bilhẹ oghị ghan ituughạ, omite ghan epẹ erugh phọ, ḅilhẹ r’aạl ghan aBaibul. Ḅilhẹ tuutughiạn ghan imạ aḍisẹph phọ aZihova aseenhaan bọ nyinhạ epẹ ghisigh. Mem dị nạ amhiịn ipẹ aZihova alhoghonhaạn bọ nyinhạ ḍighaạgh nyiidiphọ, omheeraam mọ anạ kakpạr ghan bịn.

18. Eḍighi maạr dị nạ awạ amhiịn esi dị omheeraam mọ anạ adugh, nạ kaḍighi eeghe?

¹⁸ Eḍighi maạr dị ipaanhaạn dị nạ asoman nyiidiphọ obobọ epẹ omhạn eḍeenhaan ḍidugh siphẹ omheeraam mọ anạ, pọ ka/ḅonyonhu azuan. Eḍighi ghụn eepoogh okparamhiọm omheeraam mọ anạ. Lọm aani iniin phọ ilọm mọ abutelhedom mọ aZizọs olhọm bọ mọ “bughẹ omeeraam mọ ayoor.” (Luk 17:5) Ḅilhẹ kẹn, tuutughiạn ilọ oomo areḍeenhaan phọ yira mooḅeghiọn bọ siẹn emhuoghaạph phọ ephẹn phọ. Idiphọ aMiguel r’aYurai, tuutughiạn ilọ oomo asimem mọ aZihova malhoghonhaạn bọ nyinhạ ḍighaạgh. Idiphọ onyanhị phọ aVero r’Anel, kuukuanhaan aZihova oomo ipẹ edi bọ ekpom mọ anạ, ekạr nuụn ekpaariọm mem dị nạ odi esi igbogh iiḅaghamhị. Ḅilhẹ kẹn idiphọ aGeydi, lọgh elhegh mọ aZihova katue ni asighẹ siya r’arighirị anạ alhoghonhaạn nyinhạ ḍighaạgh. Mem dị nạ angọ eepoogh mọ aZihova alhoghonhaạn nyinhạ ḍighaạgh okaran iiḅaghamhị nyiidiphọ, nạ kakuphom ni owol mọ odị kalhoghonhaạn ni nyinhạ ḍighaạgh okaran ipaanhaạn dị ketu ghisigh.

19. AZizọs akuphom owol eeghe, kụ eeghe kụ idị nạ kakuphom aani bọ owol?

¹⁹ AZizọs amạ ni riisi dị omheeraam abumatuạn phọ odị adugh, kuolọ odị o/mhoọgh iikia mọ aZihova kaloghonhaạn ni bidị ḍighaạgh okaran odẹgh ophogh epẹ ghisigh. (Jọn 14:1; 16:33) Odị akuphom ni owol mọ omheeraam dị akpạr kaloghonhaạn ni ḍighaạgh ḍigbogh aḍita phọ, okpetenhaan igbogh iiḅaghamhị phọ retu bọ. (Ogan. 7:9, 14) Nạ kaḍighom aani ni buẹn phọ ḍughụm? Dị eego esi onmạ ighirigiir phọ aZihova u/kpeanhaạn bọ nạ kaḍighom ni, eḍighi maạr dị nạ asighẹ ni oomo aroopoogh phọ edi bọ nyiidiphọ aaneghiọm aḅilhẹ akparamhiọm omheeraam mọ anạ!—Hib. 10:39.