1. Eeghe kụ edị yira kogon omhiịn, kụ eeghe kụ edị yira kokuphom owol?

 IDUỌN yira roḍighi bọ oḍighi iphelhegbeel phọ yira kosoman ni isophoghom. Kụ isophoghom mọ iphẹn phọ etue ni ebụgh epẹ ghisigh. (Dan. 11:44; 2 Tim. 3:12; Ogan. 16:21) Kuolọ ghalhamọ r’iduọn phọ ni, yira kotue ni okuphom owol mọ aZihova kungọ ni iyira raraạr phọ ipẹ yira omhoghi bọ. Eeghe kụ iḍighi? Oomo amem aZihova raloghonhaạn ghan ni ḍighaạgh rebenhẹ phọ odị oḍighi omhunhenhi oḍighi phọ odị angọ bọ bidị—etigheri ipẹ oḍighi phọ agbagarạ bọ. Esi omaạm, ooḅeghiọn iniin araraạr dị emite siphẹ adọl aghuḍum oyil phọ Ezekiel, opọ agbeelhom bọ dom mọ aZihova aḅenhị buọ aJu phọ origheel bọ dọl arebenhẹ epẹ Babilọn.

2. AZihova aghaạph eeghe ilọ awe phọ orọl bọ ekool phọ Ezekiel agbeelhom bọ dom mọ odị, kụ yira kooḅeghiọn eeghe siẹn emhuoghaạph phọ ephẹn phọ? (Ezekiel 2:3-6)

² Eeghe odọ awe kụ urọl bọ ekool phọ Ezekiel agbeelhom ghan bọ dom mọ Enhaạn? AZihova aghaạph ilọ abidị mọ bidị oḍighi we “igbagarạ arokpom,” r’awe “iḅạph.” Ḅilhẹ kẹn mọ bidị okịgh iitoor ḅilhẹ oḍighi ooto r’osooromineen idiphọ asikororoph anyụ ade. Pọ kụ iyaạr phọ aZihova u/gbạ ghan bọ mem oḅenhị Ezekiel mọ: “Ka/moọgh oghiilhaan”! (Bạl Ezekiel 2:3-6.) Ezekiel arue ni amhunhenhi oḍighi iphelhegbeel phọ odị loor esi dị (1) aZihova kụ arom nyodị, (2) odị amhoọgh iikpọ dị eego esi uwaloor iigbia phọ, ḅilhẹ (3) ikpo onhụ phọ Enhaạn kụ ikparamhị nyodị. Ika kụ idị iraạr phọ araraạr phọ iphẹn phọ elhoghonhaạn ḍighaạgh Ezekiel? Kụ ika kụ idị iphẹn phọ r’ilhoghonhaạn iyira ḍighaạgh rodon?

3. Eeghe ikpo onhụ kụ edị eeni ekparamhị ni Ezekiel, kụ ika kụ idị aZihova angọ nyodị okuphom owol mọ odị kabakị ni nyodị?

³ AZihova aḅenhị Ezekiel mọ: “Mị rarom nyinhạ.” (Ezek. 2:3, 4)  Dị iikia i/lo, ikpo onhụ phọ ipẹ phọ ikparamhị ni Ezekiel. Eeghe kụ iḍighi? Eeni odị aatughiạn ghan ni ipẹ aZihova aḍighinhom bọ ikpo onhụ phọ iphẹn phọ mem mọ odị amạ bọ riil phọ odị Mozis r’Isaiah. (Ex. 3:10; Isa. 6:8) Eeni Ezekiel alhegheri ni ipẹ aZihova asighẹ bọ ikpo onhụ phọ iphẹn phọ alhoghonhaạn ḍighaạgh iyạl phọ ariyil phọ abuẹn phọ okpạr opu ipaanhaạn. Esi iduọn phọ, mem mọ aZihova aḅenhị bọ Ezekiel iyạl amem mọ: “Mị rarom nyinhạ,” odị amhoọgh ni igey ariphigh otuạn oḍuom olhoghi mọ aZihova kabakị ni nyodị. Oḅarạm isiphẹ, siphẹ aḍinyạ phọ Ezekiel, ikpo onhụ phọ eḅẹm bọ mọ: “Ikpo onhụ phọ aZihova iru iteẹny imhị,” emite ni ibadị amem. (Ezek. 3:16) Kụ opumom isiphẹ, ikpo onhụ phọ eḅẹm bọ mọ: “Ikpo onhụ phọ aZihova eḅilhẹ eru iteẹny imhị” emite kẹn ni ibadị amem siphẹ aḍinyạ phọ Ezekiel. (Ezek. 6:1) Agey ni, Ezekiel akuphom ni owol mọ aZihova kụ arom ni nyodị. Kụ oḅarạm isiphẹ, idiphọ oọny opinyọn rikiạ, eeni odẹ phọ odị atughemhị ni nyodị mọ aZihova ra/bilhẹ ghan oguan ariil phọ odị obakị abidị. AZihova aḅenhị ni Aizịk, Jekọb, ḅilhẹ r’aJeremiah mọ: “Mị odi ni r’anạ.”—Gen. 26:24; 28:15; Jer. 1:8.

4. Eeghe ikpo onhụ kụ edị eeni ekparamhị ni Ezekiel?

⁴ Awe phọ Izrạl komegheron ika kụ okị esi adom mọ Ezekiel? AZihova aḅenhị Ezekiel mọ: “Awe phọ Izrạl ko/meera onaghanhạn nyinhạ, loor esi dị bidị ro/wạ onhaghanhạn amhị.” (Ezek. 3:7) Esi oghel Ezekiel, awe phọ Izrạl ughel ghan aZihova. Ikpo onhụ phọ aZihova ipẹ phọ iḍighi ni idị Ezekiel alhọgh elhegh mọ idiphọ awe phọ u/naghạn bọ dom mọ pọ re/mạ ghan mọ odị kụ edị u/ḍighi agey idiphọ oyil. AZihova aḅilhẹ kẹn akparamhị Ezekiel mọ mem dị adom iiruẹn phọ emhunhughan, awe phọ “kolegheri ni mọ oyil arọl ghan ni igbo abidị.” (Ezek. 2:5; 33:33) Okạr agey, ikpo onhụ okparamhị phọ ipẹ phọ ingọ ni Ezekiel inyaạm mọ odị amhoghi bọ orue oḍighi oḍighi phọ odị idiphọ oyil.

5. Odaphạn Isaiah 44:8, eeghe kụ ringọ ghan iyira inyaạm?

⁵ Olhegheri mọ aZihova kụ urom iyira ringọ ghan ni iyira inyaạm. Odị ughuenhi iyira esi omhạgh ayira mọ “abugbaanhaạn” onọ. (Isa. 43:10) P’eeghe emạ eepoogh dị enhighẹ epelheghiom dị yira omhoọgh! Idiphọ aZihova aḅenhị bọ Ezekiel mọ: “Ka/moọgh oghiilhaan,” aZihova ruḅenhị aani kẹn iyira mọ: “Ku/moọgh oghiilhaan.” Eeghe kụ iḍighi kụ i/wạ bọ dị yira kokiilhaan mulhọgh ḍien phọ ayira? Idiphọ Ezekiel, aZihova kụ urom iyira kụ odị kụ rubakị iyira.—Bạl Isaiah 44:8.

6. (a) Ika kụ idị aZihova ungọ iyira okuphom owol mọ odị kubakị ni iyira? (b) Esi eeghe iyaạr kụ edị yira romoọgh ghan inyaạm?

⁶ AZihova aguanhaan ni obakị ayira. Esi omaạm, tutụ odị kaḅạ bọ ikpo onhụ phọ iphẹn phọ mọ: “Nyinha kụ abugbaanhaạn amhị,” odị aḅẹm ni mọ: “Mem dị nyinha regụph muụm mọ keḅeẹny, mị kirolhonhaạn ni inyinha, ḅilhẹ mem dị nyinha reḅeẹny siphẹ ariphiịny phọ, amuụm mọ ki/kilhom inyinha. Mem dị nyinha reḅeẹny esi aniạn, egholhoghọl aniạn phọ ki/gụr inyinha, kụ anem aniạn phọ ki/lhe inyinha.” (Isa. 43:2) Iduọn yira roḍighi bọ oḍighi iphelhegbeel phọ, eeni amem yira rosoman ghan ni ipaanhaạn dị eḍighi idipho amuụm aḍigho obobọ odẹgh ophogh dị osighẹ otomaạm niạn. Ghalhamọ r’iduọn phọ ni, r’olhoghonhaạn aḍighaạgh aZihova yira kotue ni okiọm ghisigh oḍighi igbeelhom phọ. (Isa. 41:13) Idiphọ erọl bọ siḍio phọ Ezekiel, ibadị awe okel li dom mọ ayira. Kuolọ ipẹ phọ i/mạ imiteom mọ yira ro/ḍighi agey idiphọ Abugbaanhaạn. Rikparamhị ghan ni iyira olhegheri mọ aZihova asereghiạn ni ikuph phọ yira rolọgh bọ orọl adọl dị ekpẹ oḍuomolhoghi kụ oḅilhẹ oghị ghisigh oḍighi igbeelhom mọ. Otelhedom mọ aPọl aḅẹm mọ: “Torobọ oye kamoọgh ni iikpiạ phọ ipẹ odị odaphạn oḍighi phọ odị.” (1 Kọr. 3:8; 4:1, 2) Oniin onyọ umaranhi dị makọy eten esi ibadị asiạ aḅẹm mọ: “Ringọ ghan ni imhị ibo olhegheri mọ aZihova rakpẹ ghan ni iikpiạ esi ikuph phọ ayira.”

7. Ezekiel alhoghoma ghan ika torobọ amem dị odị agbirima ilọ uḍien phọ odị amhiịn bọ? (Miịn afoto oḅẹl opoḍi phọ.)

⁷ Ezekiel amhiịn ni odọ iikpọ dị uwaloor iigbia phọ Enhaạn amhoọgh. Esi uḍien, odị amhiịn ni idị uwaloor iigbia phọ angọ inyaạm ruukpaạny phọ ḅilhẹ rogbogh oghuugh k’akẹ phọ Enhaạn. (Ezek. 1:20, 21) Ezekiel amhegheron ika? Odị agẹ mọ: “Mem mọ mị amhiịn bọ, mị umheel li abolholho.” Loor aḍiigu phọ, Ezekiel amheel li ude abolholho. (Ezek. 1:28) Torobọ amem dị Ezekiel agbirima ilọ ookiạ uḍien phọ opọ phọ, iikia i/lo ingọ ghan ni nyodị okuphom owol mọ uwaloor iigbia phọ Enhaạn kaloghonhaạn ni nyodị ḍighaạgh, ḅilhẹ mọ odị kaḍighi ni amunenhi oḍighi iphelhegbeel phọ odị.

8-9. (a) Eeghe kụ imitenhaan Ezekiel mem mọ aZihova aḅenhị bọ nyodị mọ ḅetenhu amheerạ? (b) Ika kụ idị aZihova aḅilhẹ akparamhị Ezekiel ilọ egbagarạ ekool phọ odị?

⁸ AZihova atọ aḅenhị Ezekiel mọ: “Oye dị kamugh ni, ḅetenhu amheerạ. Mị rawạ oḅaanhaạn anạ.” Itọ phọ iphẹn phọ r’uwaloor phọ Enhaạn ingọ ni Ezekiel inyaạm mọ odị amhoghi bọ oḅetenhu isiphẹ ude phọ. Ezekiel agẹ mọ: “Uwaloor phọ Enhaạn uḍigh ni imhị kụ uḅeton imhị amheremhị.” (Ezek. 2:1, 2) Siphẹ oomo arukumuan phọ odị, Enhaạn aaḅakị ghan Ezekiel ‘r’aḍighaạgh’ phọ odị—eḍighi bọ uwaloor iigbia phọ odị. (Ezek. 3:22; 8:1; 33:22; 37:1; 40:1) Uwaloor iigbia phọ angọ ni Ezekiel inyaạm oḍighinhom oḍighi phọ ongọ bọ nyodị—oḍighi ogbeel adom oḅenhị awe “igbagarạ arokpom mọ r’oḅaạr emhụ” epẹ ekool phọ odị. (Ezek. 3:7) AZihova aḅenhị Ezekiel mọ: “Nyiidiphọ mị kaḍighi nyinhạ oye oḅaạr emhụ dị akpạr idiphọ abidị. Mị kamhiighemhi nyinhạ idiphọ aḍighiigh,  akparamhị idiphọ adayamọn, ka/kiilhaan buḅaạr arumhụ phọ abuphẹ phọ.” (Ezek. 3:8, 9) R’ikpo onhụ phọ iphẹn phọ, aZihova aḅenhị ghan Ezekiel mọ: ‘Ka/meera mọ oḅaạr emhụ awe phọ adughe nyinhạ. Mị kakparamhị ni nyinhạ.’

⁹ Onyebẹl roten, uwaloor iigbia phọ Enhaạn aphạm ni Ezekiel aghimọm epẹ ekool phọ odị kagbeelhom bọ dom mọ, Ezekiel agẹ mọ: “Aḍighaạgh phọ aZihova irọl li r’amhị.” Isighẹ Ezekiel oniin awiki otuughạ oḅilhẹ onhaghanhạn adom mọ aZihova arom bọ nyodị ogbeelhom mọ. (Ezek. 3:14, 15) Kụ ipẹ reten, kụ aZihova aaḅakị nyodị aghimọm epẹ eḍiiny phọ “uwaloor iigbia phọ aḍigh bọ loor [odị].” (Ezek. 3:23, 24) Ezekiel manyạ nyiidiphọ omhiigh arukumuan phọ odị.

10. Eeghe olhoghonhaạn aḍighaạgh kụ edị yira omhoghi orue oḍighi oḍighi iphelhegbeel phọ, kụ eeghe kụ iḍighi?

¹⁰ Eeghe olhoghonhaạn aḍighaạgh kụ edị yira omhoghi siẹn oḍighi iphelhegbeel phọ? Orue ophagharanhaạn aḍipuru phọ aḍiphẹ phọ, pọ tuutughiạn ipẹ emitenhaan bọ Ezekiel. Kụ odị agbi bọ okạr omhiigh ogbeelhom adom mọ Enhaạn arom bọ nyodị, uwaloor iigbia phọ Enhaạn angọ ni nyodị inyaạm mọ odị amhoghi bọ. Rodon, idiphọ emitenhaan bọ Ezekiel, iyaạr dị ketue ingọ iyira inyaạm orue oḍighi oḍighi iphelhegbeel phọ pọ uwaloor iigbia phọ Enhaạn. Eeghe kụ iḍighi? Loor esi dị aSetan anyạ ni osophoghom oḍighi iphelhegbeel phọ ayira. (Ogan. 12:17) Odaphạn ephoghom awe, yira ko/tue omerenyạn Setan. Kuolọ dị eego esi oḍighi iphelhegbeel phọ yira okpạr ri ropu nyodị! (Ogan. 12:9-11) Eghẹn eten? Mem dị yira ophinhom aani bin oḍighi iphelhegbeel phọ, yira roḍeenhaan ghan mọ yira u/kiilhaan izuoghom mọ aSetan. Yira rokpạr ghan kopu Setan torobọ amem dị yira ophinhom aani bin oḍighi iphelhegbeel phọ. Esi iduọn phọ, yira kokureri mọ eeghe kụ iḍighi kụ yira otue bọ ni rokiọm ghisigh oḍighi phọ ophọn phọ etigheri isophoghom mọ aSetan? Yira kotue ni oḅẹm mọ aZihova kụ ubakị iyira dị eego esi uwaloor iigbia phọ odị.—Mat. 5:10-12; 1 Pit. 4:14.

11. Eeghe kụ edị uwaloor iigbia phọ kuḍighinhaan iyira, kụ ika kụ idị yira kokiọm ghisigh omoọgh ghan?

 ¹¹ Eeghe iyaạr kụ edị yira oḅilhẹ otuughạ mem dị yira ootughiạn ipẹ aZihova angọ bọ inyaạm Ezekiel orue ogbeelhom adom mọ odị? Uwaloor iigbia phọ Enhaạn katue ni ungo iyira inyaạm orue okaran atorobọ ipaanhaạn dị yira osoman siẹn oḍighi iphelhegbeel phọ. (2 Kọr. 4:7-9) Esi iduọn phọ, eeghe kụ edị yira kotue oḍighi omhiịn mọ yira okiọm ni ghisigh omhoọgh uwaloor iigbia phọ Enhaạn? Ewạ mọ yira oghiọm ghisigh ooḅereghị ghan, kụ oḍuomolhoghi mọ aZihova kanaghạn ni iiḅereghị phọ ayira. AZizọs aḅenhị bumatuạn phọ odị mọ: “Ilọm ghan, . . . iwạ ghan, . . . ikar ghan.” Kụ aZihova kamegheron ni esi “ongọ abuphẹ olọm bọ nyodị uwaloor iigbia phọ.”—Luk 11:9, 13; Iiḍighi 1:14; 2:4.

12. Odaphạn Ezekiel 2:9–3:3, aḍikpooghinheen aḍinyạ phọ iḍuạ eghẹn kụ eru, kụ iphamhanhạm eeghe?

¹² Uwaloor iigbia phọ bịn kụ o/ngọ bọ inyaạm Ezekiel, ikpo onhụ phọ Enhaạn iḅilhẹ kẹn ni ekparamhị nyodị. Ezekiel amhiịn ni esi uḍien, ḍighaạgh dị ephạm ḍikpooghinheen aḍinyạ. (Bạl Ezekiel 2:9–3:3.) Aḍinyạ phọ aḍiẹn phọ iḍuạ eghẹn kụ eru? Iphamhanhạm eeghe? Kụ iimhanhamhi ika Ezekiel? Uguạ ooḅeghiọn omhiịn. Aḍikpooghinheen aḍinyạ phọ adiẹn phọ iḍuạ epẹ agadạ itooghị phọ Enhaạn kụ eru. Eeni, aZihova arom oniin siphẹ inya aruukpaạny phọ Ezekiel amhiịn bọ siphẹ uḍien phọ oru oḅọgh aḍikpooghinheen aḍinyạ phọ ongọ odị. (Ezek. 1:8; 10:7, 20) Aḍikpooghinheen aḍinyạ phọ iphamhanhạm ikpo onhụ phọ Enhaạn—dom ooruẹn phọ Ezekiel kagbeelhom bọ aḅenhị we iḅạph aḅuọ aJu phọ orọl bọ dọl arebenhẹ phọ epẹ Babilọn. (Ezek. 2:7) Dom mọ aḍiẹn phọ ugẹ omhạn r’aghisigh aḍikpooghinheen aḍinyạ pho.

13. AZihova aḅenhị Ezekiel osighẹ aḍinyạ phọ oḍighinhom eeghe, kụ uḍighi ika kụ emịn bọ?

¹³ AZihova aḅenhị oyil phọ mọ araạl ḍikpooghinheen aḍinyạ phọ kụ “amuzeḍiom okuruḅakạ [odị].” Ezekiel adaphạn ni itọ phọ, kụ aghị ghisigh araạl amhạn ḍinyạ phọ. Apakirị imiịn phọ iphẹn phọ remạ ghan eeghe? Remạ ghan mọ ewạ dị Ezekiel kanaghanhạn aḅilhẹ ameeraam dom mọ odị kagbeelhom bọ. Ewạ mọ eḍigh iḅaạl odị, pidị enyu nyodị ogbeelhom oḅenhị awe phọ. Iyaạr dị olhoghi u/seere iḅilhẹ ni emite. Ezekiel amhiịn mọ aḍinyạ phọ okpooghi bọ kụ odị araạl bọ “remịn idiphọ enhuụm aḍiowo.” (Ezek. 3:3) Eeghe kụ iḍighi? Esi Ezekiel, ikạr kụ edụgh eḅilhẹ eḍighi iyaạr eghuan oḍighi omeerạ enye aZihova. (Ps. 19:8-11) Olhoghi odị akạr kụ aḅaạl iduọn aZihova amheera bọ mọ odị akumu nyodị idiphọ oyil.

14. Eeghe kụ ilhoghonhaạn bọ ḍighaạgh Ezekiel orue orelhe adom mọ orom bọ nyodị?

¹⁴ Ipẹ reten, kụ aZihova aḅenhị Ezekiel mọ: “Maạr amhiigha loor kụ aatughiạn torobọ ilọ mị aḅenhị nyinhạ.” (Ezek. 3:10) R’itọ phọ ipẹ phọ, aZihova aḅenhị ghan Ezekiel mọ odị alhọgh siphẹ iitughiạn phọ odị ikpo onhụ phọ edi bọ siphẹ aḍinyạ phọ okpooghi bọ kụ aḅilhẹ agbirima ghan. Mem mọ Ezekiel atuụgh bọ iduọn phọ aḍighi ikparamhị ni omheeraam mọ odị. Iḅilhẹ kẹn eḍeenhaan nyodị dom mọ odị kagbeelhom bọ. (Ezek. 3:11) Mem mọ Ezekiel anhaghanhạn bọ aḅilhẹ amheeraam dom aḍikpooghinheen aḍinyạ phọ, Ezekiel anyạ ni oghị ogbeelhom adom mọ orom bọ nyodị.—Poghom Psalm 19:14.

15. Orue okparạm, eeghe kụ edị ewạ mọ osighẹ olhọgh siphẹ “ekpom” mọ ayira?

¹⁵ Orue okparạm siẹn oḍighi iphelhegbeel phọ, pọ ewạ dị yira kokiọm aani ghisigh omeera mọ ikpo onhụ phọ Enhaạn ingọ iyira inyaạm. Ewạ dị yira kosighẹ olọgh siphẹ “ekpom” mọ ayira oomo ipẹ aZihova ruḅenhị bọ iyira. Rodon aZihova ruḅaanhaạn ghan iyira dị eego esi Ekpo Onhụ phọ odị, Baibul phọ. Eeghe kụ edị yira koḍighi  omhiịn mọ Ekpo Onhụ phọ Enhaạn ekị ni ghisigh retir olhoghoma phọ, iitughiạn phọ, ḅilhẹ r’inyuughiom mọ ayira?

16. Yira koḍighinhom eeghe Ekpo Onhụ phọ Enhaạn, kụ ika kụ idị yira kotue olọgh siphẹ ekpom mọ ayira?

¹⁶ Idiphọ yira romoọgh ghan bọ inyaạm mem dị yira olhe eḍien, kụ edị yira romoọgh ghan kẹn inyaạm mem dị yira otuughạ oḅilhẹ ogbirima Ekpo Onhụ phọ Enhaạn. Epẹ kụ iyaạr ituughạ dị aZihova rawạ mọ yira otuughạ idị egbolhomaam ḍikpooghineen aḍinyạ phọ. AZihova rawạ mọ yira “omuzeḍi okuruḅakạ ayira,” obobọ onhaghanhạn ikpo onhụ phọ odị. Yira kotue ni oḍighi iduọn phọ esi iiḅereghị, aạl ghan, ḅilhẹ r’ogbirima ghan ipẹ yira aạl bọ. Eḅẹl iyaạr dị yira koḍighi pọ ooḅereghị ookolhobian ekpom mọ ayira ilọ otuughạ ikpo onhụ phọ Enhaạn. Ipẹ reten kụ yira obạl ekpịgh aBaibul phọ. Kụ idị etum pạ, yira oḅoorian pidị yira orue ogbirima ipẹ yira aạl bọ. Eeghe kụ keḍuạ emite mem dị yira oḍighi iduọn phọ? Idiphọ yira rogbirima bọ, idiphọ kụ edị yira kokuamhị onaghanhạn Ekpo Onhụ phọ Enhaạn.

17. Eeghe kụ iḍighi kụ emhạn bọ maạr ogbirima ghan ipẹ yira aạl bọ siphẹ aBaibul phọ?

¹⁷ Eeghe kụ iḍighi kụ emhạn bọ maạr dị yira kobạl ghan Baibul phọ oḅilhẹ ogbirima? Loor esi dị kingọ iyira inyaạm mọ yira omhoghi bọ orue ogbeelhom adom Omhạr phọ nyiidiphọ ḅilhẹ r’ogbeelhom aḍigbagarạ adom ooruẹn phọ epẹ ghisigh. Ḅilhẹ kẹn, mem dị yira ogbirima ilọ imạ araagharạ phọ aZihova, asiya phọ ayira r’odị kepogh ghan bịn okpạr. Kụ eekunha phọ, yira kokạr omoọgh eephọ olhoghi r’ogbaanyạn.—Ps. 119:103.

18. Eeghe iyaạr kụ edị awe phọ yira oghaạph ghan bọ dom mọ Enhaạn oḅenhị epẹ arokool phọ ayira kolọgh elhegh, kụ eeghe kụ iḍighi?

¹⁸ Ezekiel aḍighi oyil, kuolọ ko/tue okaạph aani idiphọ ilọ ayira. Kuolọ yira kotue ni okiọm ghisigh ogbeelhom ghan dom mọ aZihova, odị agẹ bọ siphẹ aBaibul phọ tutụ odị aḅẹm mọ oḍighi iphelhegbeel phọ makasiạn. Amem iiruẹn phọ eteẹny, awe phọ yira oghaạph ghan bọ dom mọ Enhaạn oḅenhị epẹ ekool phọ ayira ko/moọgh egbaạm oḅẹm mọ u/pụr bunọ rurụ obobọ mọ Enhaạn oo/tughiạn bidị. (Ezek. 3:19; 18:23) Kparipẹ ghụn, bidị kolọgh ni elhegh mọ adom mọ yira ogbeelhom ghan bọ iḍuạ ni ḍighaạgh Enhaạn kụ eru.

19. Eeghe kụ kingọ iyira inyaạm orue oḍighi omhunhenhi oḍighi iphelhegbeel phọ?

¹⁹ Eeghe kụ ringọ ghan iyira inyaạm oḍighi omhunhenhi oḍighi iphelhegbeel phọ? Iniin phọ iraạr phọ araraạr phọ elhoghonhaạn bọ ḍighaạgh Ezekiel orue omhoọgh ekol. Yira rokiọm ni ghisigh ogbeelhom adom mọ loor esi dị yira olegheri mọ aZihova kụ urom iyira, uwaloor iigbia phọ, ḅilhẹ r’Ekpo Onhụ phọ Enhaạn kụ ringọ ghan iyira inyaạm. R’olhoghonhaạn aḍighaạgh aZihova, yira kotue ni okparạm oḍighi omunenhi oḍighi iphelhegbeel phọ kụ “eekuna phọ” egbi oteẹny—Mat. 24:13.