1. Yira ulhegheri ika mọ aZihova rawạ mọ yira oḍuraan otuman nyodị?

 AZIHOVA rawạ mọ yira oḍuraan otuman nyodị. (Jems. 4:8) Odị rawạ oḍighi Enhaạn ayira, Odẹ ayira, ḅilhẹ r’Oyaghirị ayira. Odị rapagharanhaạn ghan ni iiḅereghị ayira kụ aḅilhẹ ulhoghonhaạn iyira ḍighaạgh mem iiḅaghamhị. Kụ odị rasighẹ ghan kẹn ookpomhoghan phọ odị katughemhiọm aḅilhẹ ughoph iyira. Kuolọ yira koḍighi eeghe orue oḍuraan otuman aZihova?

2. Ika kụ idị yira kotue oḍuraan otuman aZihova?

² Yira kotue ni oḍuraan otuman aZihova esi ooḅereghị ghan, aạl, ḅilhẹ r’ogbirima ghan ipẹ yira m’aạl bọ siphẹ aBaibul phọ. Yira oḍighi iduọn phọ, ephomhoghiạn phọ ḅilhẹ r’osereghiạn phọ yira omhoọgh bọ oghị esi aZihova kepogh ghan bịn obụgh. Iphẹn phọ k’inyu iyira oghị aghisigh onhaghanhạn ghan odị ḅilhẹ rongọ odị iiseeny phọ ekạr bọ esi nyodị. (Ogan. 4:11) Idiphọ yira rolegheri bọ aZihova kobughẹ, idiphọ kụ edị oḍuomolhoghi phọ yira omhoọgh bọ oghị esi aZihova ḅilhẹ r’oḍighom mọ odị kabụgh ghan bịn.

3. Ika kụ idị Eru phọ rakparaghạ ghan ogbariọn ayira r’aZihova, kuolọ eeghe kụ kilhoghonhaạn iyira ḍighaạgh olhom Enhaạn phọ ayira r’oḍighom mọ odị ogheelhom? (Psalm 31:13, 14)

³ Mem dị yira osoman iiḅaghamhị, Eru phọ rakparaghạ ghan osighẹ eepoogh phọ epẹ phọ ogbariọn ayira r’aZihova. Odị raḍighi ghan ika iphẹn phọ? Enụm enụm odị rakparaghạ ghan odughe oḍuomolhoghi phọ ayira esi aZihova r’oḍighom mọ odị. Kuolọ yira kotue ni okpạr opu ikeḍi phọ odị ipẹ phọ. Mem dị omheeraam mọ ayira akpạr, oḍuomolhoghi phọ ayira kamiigh ni, kụ yira ko/bilhẹ Enhaạn phọ ayira ḅilhẹ r’oḍighom mọ odị.—Bạl Psalm 31:13, 14.

4. Yira kooḅeghiọn eeghe siẹn emhuoghaạph phọ ephẹn phọ?

⁴ Siẹn emhuoghaạph phọ ephẹn phọ, yira kooḅeghiọn iraạr iiḅaghamhị dị ketue ni iteẹny iyira dị re/ḍuạ ghan siẹn ookpomhoghan  phọ kụ keru; kụ iraạr phọ araraạr phọ iphẹn phọ ketue ni edughe oḍuom olhoghi phọ ayira esi aZihova ḅilhẹ r’oḍighom mọ odị. Ika kụ idị iiḅaghamhị phọ iphẹn phọ ketue igbariọn iyira r’aZihova? Kụ yira koḍighi eeghe orue okaran oomo phọ ikuph phọ aSetan iphẹn phọ?

5. Ika kụ idị iiḅaghamhị ketue edughe oḍuomolhoghi phọ nạ amhoọgh bọ aghị esi aZihova r’oḍighom mọ odị?

⁵ Eeni amem, yira rosoman ghan ni iiḅaghamhị—idiphọ isophoghom eghunotu obobọ mem dị oye phọ aroph oḍighi oye phọ. Ika kụ idị iiḅaghamhị phọ ipẹ phọ ketue edughe oḍuomolhoghi phọ ayira esi oḍighom mọ aZihova kụ eḅilhẹ igbariọn iyira r’odị? Mem dị yira osoman iiḅaghamhị esi eedoọny amem, yira otue ni ologhoma mọ oḍuomolhoghi o/lho mun ḅilhẹ oḅonyonhu ozuan. ASetan rasighẹ ghan eepoogh phọ epẹ phọ kaḍighinhom idị yira komoọgh iikia mughumọ aZihova uphomhoghiạn ni iyira. Eru phọ rawạ mọ yira ootughiạn mọ aZihova obobọ oḍighom mọ Odị kụ ukọm iiḅaghamhị phọ ayira. Idọ phọ iphẹn phọ imitenhaan ni buniin abuọ Izrạl epẹ Ijipt. Emhiighom mọ bidị umheeraam ni mọ aZihova kụ amạ Mozis r’Eeron otagharạn abidị dọl arebenhẹ phọ. (Ex. 4:29-31) Kuolọ mem mọ aFero aḍighi bọ idị adọl aghuḍum mọ abidị ekpạr, bidị ukpalhạm ni Mozis r’Eeron esi iiḅaghamhị phọ bidị osoman bọ, kụ oḅenhị ghan bidị mọ: “Nyinha meḍighi idị aFero r’arebenhẹ phọ odị mughaghạm iyoor olhoghi, mokophogh rolhool eghạm oziọm ayoor.” (Ex. 5:19-21) Bidị ukpalhạm we phọ aZihova arom bọ otagharạn abidị. P’eeghe idị ipẹ phọ eeph! Esi iduọn phọ, eḍighi maạr dị nạ asoman iiḅaghamhị dị mesighẹ ni mem, ika kụ idị nạ kakparamhị oḍuomolhoghi phọ nạ amhoọgh bọ aghị esi aZihova r’oḍighom mọ odị?

6. Yira otuughạ eeghe esi oyil phọ Habakkuk ilọ okaran ghan iiḅaghamhị ayira? (Habakkuk 3:17-19)

⁶ Zu ekpom mọ anạ angọ aZihova esi iiḅereghị, kụ aḍuom olhoghi dị odị kabakị nyinhạ. Oyil phọ aHabakkuk asoman ni ibadị iiḅaghamhị. Eniin amem, odị awạ ni omhoọgh iikia mughumọ aZihova amoọgh ni ogbolhomaam odị. Esi iduọn phọ, odị azu ni ekpom odị esi iiḅereghị kụ aḅenhị aZihova ipẹ odị alhoghoma bọ. Odị aḅẹm mọ: “Sey Zihova, mị kamoghi k’apur aḍio olhoghonhaạn aḍighaạgh kụ nạ anaghanhạn? . . . Eeghe kụ iḍighi kụ nạ ameera bọ mọ mị umiịn iiḅaghamhị?” (Hab. 1:2, 3) AZihova aphagharanhaạn ni iiḅereghị ebenhẹ phọ odị ophọn phọ akpẹ bọ oḍuomolhoghi phọ. (Hab. 2:2, 3) AHabakkuk aḅilhẹ ni amhoọgh ibo phọ odị, mem dị odị aatughiạn ipẹ aZihova rapẹl ghan bọ we phọ odị. Odị akuphom ni owol mọ aZihova amoọgh ni ogbolhomaam odị ḅilhẹ mọ kaloghonhaạn ni nyodị ḍighaạgh okparạm atorobọ iiḅaghamhị. (Bạl Habakkuk 3:17-19.) Eeghe kụ edị yira otuughạ esi oomo phọ iphẹn phọ? Mem dị yira osoman ḍikparamhinheẹn kirokirọ, ḅeeḅereghị aḅenhị aZihova kụ aḅenhị nyodị ipẹ nạ alhoghoma bọ. Kụ agon omhiịn idị odị kabakị nyinhạ. Mem dị nạ aḍighi iduọn phọ, nạ kamoọgh ni oḍuomolhoghi mọ aZihova kangọ ni nyinhạ inyaạm mọ nạ amhoghi bọ okparạm. Kụ mem dị nạ alhoghoma obakị phọ odị, omheeraam mọ anạ esi odị kapogh ghan bịn okpạr.

7. Onyọ asiya phọ aShirley akparaghạ ghan oḅenhị odị eeghe, kụ eeghe kụ ilhoghonhaạn nyodị ḍighaạgh ophamhanhạm omheeraam mọ odị esi aZihova?

⁷ Kiọm ghisigh aḍighi ghan raraạr dị keḍur nyinhạ etumeri aZihova. Ooḅeghiọn idị iphẹn phọ elhoghonhaạn ḍighaạgh oniin onyọ umaranhi epẹ Papua New Guinea, dị oghol mọ Shirley. b Eghunotu abuọ aShirley u/moọgh ikpoki, kụ eeni amem ikparanhaạn ghan kẹn bidị oteẹny eḍien. Onyọ asiya abidị akparaghạ ghan ni oḍighi idị bidị ko/ḍuom mun olhoghi aZihova. Odị aḅẹm mọ: “Nyinha iḅẹm mọ uwaloor iigbia phọ Enhaạn rilhoghonhaạn ghan inyinha ḍighaạgh, kuolọ odi eghẹn olhoghonhaạn  aḍighaạgh phọ? Eghunotu phọ anyinha ikpoki u/moọgh. Kụ nyinha retoph ghan mem anyinha oghaạph iiḅi iinhaghạn phọ.” AShirley aḅẹm mọ: “Mị upuruan ni loor mọ: ‘Enhaạn akạr ri ruphogh ghan iyoor obobọ ra/pogh?’ Esi iduọn phọ, mị ukem ni aaḅereghị aḅenhị aZihova, kụ mị aḅenhị nyodị oomo araraạr phọ edi bọ olhoghi amhị. Kụ mị aghị ghisigh aạl ghan Baibul phọ r’arinyạ oḍighom mọ. Kụ mị aḅilhẹ aghiọm ghisigh amite ghan epẹ erugh phọ aḅilhẹ ghan aghị ituughạ.” AShirley amhiigh olhọgh elhegh mọ aZihova rapogh ghan ni eghunotu phọ odị. Eghunotu phọ odị u/mugh okoọny, ḅilhẹ bidị omoọgh ni oḅaạl olhoghi. AShirley aḅẹm mọ: “Mị ukạr kụ alhoghoma mọ aZihova rapagharanhaạn ghan ni iiḅereghị amhị.” (1 Tim. 6:6-8) Eḍighi maạr dị nạ aghiọm ghisigh aḍighi ghan raraạr dị kelhoghonhaạn nyinhạ ḍighaạgh oḍuraan otuman aZihova, pọ iiḅaghamhị obobọ iikia ke/tue egbariọn nyinhạ r’aZihova.

8. Eeghe kụ ketue emitenhaan bumor phọ abuẹn roḍiemhiom bọ siẹn oḍighom mọ aZihova?

⁸ Dị eego esi aradio, tv, ḅilhẹ r’intanẹt phọ, amulhọgh ḍien phọ ayira rogbaaghị ghan ni okpẹ koḅilhẹ olheenye ikarạph iinhaghạn ilọ abumor phọ roḍiemhiom bọ siẹn oḍighom mọ aZihova. (Ps. 31:13) Mosiphi ni buniin ikpolhom abumor ayira bịn ogbạ okpẹ oḅạm emhụ abidị. AKristẹn oḅẹl okuron asiạ phọ usoman aani ni iniin phọ asidọl phọ iphẹn phọ mem mọ ogbaanhaạn bọ Pọl okpẹ bịn osiph nyodị olhọgh ikoli. Bidị umhegheron ika?

9. Ika kụ idị abuniin aKristẹn omhegheron oghị esi aPọl mem mọ olhọgh bọ nyodị ikoli phọ?

⁹ Abuniin aKristẹn oḅẹl okuron asiạ phọ uwilhẹ ni obakị aPọl mem mọ olhọgh bọ nyodị ikoli phọ epẹ Rom. (2 Tim. 1:8, 15) Eeghe kụ iḍighi? Umugholoor aPọl kụ asiph ghan bidị ḍughụm loor iduọn awe omhiịn bọ Pọl idiphọ osoroghuom iilhogh ḍughụm? (2 Tim. 2:8, 9) Obobọ bidị utuạn mọ komiinhẹ oḅilhẹ okpuuroghọm aani bidị ḍughụm? Torobọ ipẹ ekọm bọ, eḍighinhom iyaạr phọ abidị dị iikia i/lo ketir ri Pọl. Odị akparạm ni imhinhimhiịn aḅilhẹ alhọgh ghuḍum odị dọl ooto r’osooromineen loor emhụ abidị. (Iiḍighi 20:18-21; 2 Kọr. 1:8) R’amem r’amem yira ku/kịgh aani buphẹ oḅitonhaạn bọ Pọl  mem mọ odị akạr bọ amhoghi olhoghonhaạn aḍighaạgh abidị! Ewạ mọ yira olhọgh elhegh eeghe mem dị romiinhẹ bumor phọ abuphẹ roḍiemhiom bọ siẹn igbo phọ ayira?

10. Eeghe kụ edị yira kolọgh elhegh mem dị rokpuuroghọm ikpolhom abumor phọ ayira, kụ eeghe kụ iḍighi?

¹⁰ Tuutughiạn ephigh phọ otuạn bọ kụ rugbiphoghọm bọ iyira ḅilhẹ r’oye phọ akọm bọ. Omhunhenhiom iyạl aTimoti 3:12 eḅẹm mọ: ‘Kogbiphoghọm ni oomo awe lọ owạ oḅophoghạn r’aZizọs Kraist orọl adọl aruukuan.’ Esi iduọn phọ, ki/ḍighi iikia esi ayira omhiịn mọ aSetan anyạ ni ozuoghom ikpolhom abumor phọ ayira. Odị raatughiạn ghan siphẹ ekpom mọ odị mọ abumor phọ abuẹn phọ kotoph ni ḍimheerạ phọ abidị bịn ipẹ phọ ekọm oghiilhaan ingọ iyira.—1 Pit. 5:8.

11. Eḍeenhaan phọ Onesiforọs itughemhị iyira eeghe? (2 Timoti 1:16-18)

¹¹ Kiọm ghisigh abakị aḅilhẹ aḅạr bumor phọ. (Bạl 2 Timoti 1:16-18.) Siphẹ oḅẹl okuron asiạ phọ, onyọ aKristẹn dị oghol mọ Onesiforọs azọ ni eten dị egbatanhaạn aghị esi aPọl mem mọ olhọgh bọ nyodị ikoli phọ. “Adọl ikoli phọ [aPọl] i/siphe nyodị umugholoor.” Onesiforọs awạ ni Pọl, kụ mem mọ odị amhiịn bọ nyodị, odị aḍighinhaan yogh ni Pọl raraạr olhoghonhaạn odị ḍighaạgh. Onesiforọs alhọgh ghan ghuḍum odị dọl ooto r’osooromineen. Yira otuughạ eeghe esi iphẹn phọ? Yira ku/meera oghiilhaan oye uukperemhi iyira obobọ ukikima iyira obakị abumor phọ abuphẹ rokpuuroghọm bọ. Kparipẹ ghụn ni, oghị ghisigh olhoghonhaạn bidị ḍighaạgh. (Prov. 17:17) Bidị omoghi ephomhoghiạn ḅilhẹ r’obakị phọ ayira.

12. Yira otuughạ eeghe esi abumor r’abumaranhi phọ epẹ Russia?

¹² Tuutughiạn ipẹ abumor r’abumaranhi phọ ayira epẹ Russia robakị ghan bọ bumor r’abumaranhi phọ abuphẹ olhọgh bọ ikoli phọ. Mem dị osighẹ bidị oghimọm otu iiruẹn, abumor r’abumaranhi phọ rokị aani ghan ni epẹ otu iiruẹn phọ obakị abidị. Iphẹn phọ itughemhị iyira eeghe? Mem dị ogbaanhaạn okpẹ, osiph olhọgh ikoli obobọ okpuuroghọm ikpolhom abumor pho siẹn igbo phọ ayira, kuu/kpereghaan. Kol bidị aaḅereghị, alhoghonhaạn ḍighaạgh buọ eghunotu phọ abidị, kụ aḅilhẹ awạ inhọn areten dị nạ katue aloghonhaạn ḍighaạgh aḅilhẹ abakị bidị.—Iiḍighi 12:5; 2 Kọr. 1:10, 11.

13. Ika kụ idị igilaạm ketue edughe oḍuomolhoghi phọ ayira esi aZihova r’ookpomhoghan phọ odị?

¹³ Asiya dị u/lo siẹn igey phọ, buọ otu oḍighi ayira, obobọ abudị r’ayira rokị ghan askul eeni otue ni ugilaạm iyira loor esi oḍighi oghaạph iiḅi iinhaghạn phọ obobọ loor iduọn yira odimom ghan bọ r’asiigbu phọ aZihova. (1 Pit. 4:4) Bidị otue ni uḅenhị iyira mọ: “Nạ uḅeraạn ni imhị o, kuolọ ookpomhoghan phọ anyinha rosiphighaghan kophughạn, ro/meera ghan mọ oye aḍighi torobọ iyaạr dị oye pho rawạ oḍighi ḅilhẹ mọ olọ ogbaany orụgh.” Abuniin otue ni uḍaghạ iyira esi eten phọ epẹ yira rozoọm ghan bọ buphẹ mophorogh bọ siẹn ookpomhoghan phọ, bidị otue ni oḅẹm mọ: “Ika kụ idị nyinha ketue bọ eḅẹm mọ nyinha emoọgh ephomhoghiạn?” Idọ ikpo onhụ phọ iphẹn phọ ketue ni elọgh iikia siẹn ekpom mọ ayira. Yira otue ni omiigh ootughiạn mọ: ‘Araraạr phọ aZihova rawạ bọ mọ mị uḍighi phọ ipel iyira loor, obobọ mọ ookpomhoghan phọ rosiphighaghan kophughạn,’ Eḍighi maạr dị nạ mamhoọgh ghan iitughiạn phọ iphẹn phọ, ika kụ idị nạ katue akiọm ghisigh aḅạr aZihova r’ookpomhoghan phọ odị?

14. Yira komegheron ika eḍighi maạr dị awe otuạn idị yira rodạph siigbu aZihova kụ rugilaạm iyira? (Psalm 119:50-52)

¹⁴ Kiọm ghisigh adạph ghan siigbu phọ aZihova. AJob aḍighi oye dị adạph ghan siigbu phọ aZihova ghalhamọ r’amem dị oghol li ipẹ phọ ogilaạm nyodị. Oniin oye dị apu aḅẹm mọ onọ oyaghirị aJob akparaghạ ghan oḍighi idị aJob kameeraam mọ ikuph phọ odị alhọgh bọ odạph asiigbu  phọ Enhaạn mọ Enhaạn o/lhọgh elhegh. (Job 4:17, 18; 22:3) Kuolọ aJob o/mheeraam okpẹ phọ odị opọ phọ. Odị alhegheri ni mọ asiigbu phọ aZihova ilọ igey r’ikarạph eeleeny ni, kụ odị asopha oghiọm aghisigh ophamhanhạm. Odị o/mheera mọ abunhọn awe oḍighi iyaạr dị odị katoph ḍimheerạ phọ odị. (Job 27:5, 6) Iphẹn phọ itughemhị iyira eeghe? Ku/meera igilaạm awe ekọm idị yira komoọgh iikia esi asiigbu phọ aZihova. Tuutughiạn idị memitenhaan ghan nyinhạ epẹ omhạn. Nạ ko/mhiịn ghan mem dị odạph asiigbu phọ aZihova mekạr engọ nyinhạ suọ ḍughụm? Eḍighi ni osopha anạ oghị aghisigh odạph ookpomhoghan phọ rodạph bọ siigbu phọ aZihova. Bịn i/yaạr i/lo dị oye kakaạph eten igilaạm dị ketue egbariọn nyinhạ r’aZihova.—Bạl Psalm 119:50-52.

15. Eeghe kụ iḍighi kụ ogilaạm ghan bọ Brizit?

¹⁵ Ooḅeghiọn eḍeenhaan onyọ umaranhi epẹ India dị oghol mọ Brizit. Eghunotu olom mọ odị ugilaạm ni nyodị iboom loor iduọn odị raaḅereghị bọ aZihova. Kụ umaranhi phọ roḍiiny muụm lhạ phọ 1997, bịn i/bia bịn olom mọ odị u/lo aani bọ siẹn igey phọ aroph oḍighi odị. Esi iduọn phọ, olom mọ odị asopha mọ, aBrizit, r’anmanyaạn phọ abidị ookoroghian raraạr abidị ogheel k’odẹ r’onhiin odị, enhọn emhạ kụ orọl. Kuolọ iphẹn phọ ibughẹ ghụn iiḅaghamhị phọ aBrizit. Loor esi iduọn olom mọ odị u/moọgh mun bọ oḍighi phọ, iwạ mọ aBrizit akumuan ghan oomo amem pidị odị arue aphogh eghunotu phọ odị. Kụ oḅarạm isiphẹ, ookpomhoghan phọ akelhạn r’esi phọ bidị orugh bọ, aḍikẹl phọ remạn ni 350 akilometers (220 itobi). Kụ inhọn iiḅaghamhị dị odị asoman pọ, eghunotu olom mọ odị ukparaghạ ghan ni okikima odị ooḅereghị aZihova. Kụ isophoghom mọ ikạr kụ ebụgh dị tutụ bidị oḅilhẹ ookoroghian oḍuạ siphẹ phọ. Onyebel roten, bịn iyaạr dị u/seere olhoghi emite, olom mọ odị amhugh. Kụ ipẹ reten, bịn obumoọny abidị dị amhạn 12 asiạ aḅilhẹ amhugh loor ezẹgh aKansạ. Kụ dị eeph elhoghorị, okạr eghunotu phọ aBrizit ukpalhạm ghan nyodị mọ odị kụ akọm bọ iyaạr phọ oomo ikarạph araraạr phọ iphẹn phọ remiteghu bọ. Bidị uḅẹm ghan mọ aloor iduọn odị aḍighi bọ onyọ Ogbaanhaạn aZihova kụ edị iiḅaghamhị phọ iphẹn phọ remitenhaan bọ nyodị. Kuolọ esi oomo phọ iphẹn phọ aBrizit aghị ni ghisigh aḍuomolhoghi aZihova kụ aḅạr ookpomhoghan phọ odị.

16. Eeghe aḍisẹph kụ edị aBrizit amhoọgh esi iduọn odị aḅạr bọ aZihova r’oḍighom mọ odị?

 ¹⁶ Eḍighi bọ edị ookpomhoghan phọ akelhạn bọ epẹ aBrizit arugh bọ, opoghom eghir aromha ni nyodị oghaạph ghan iiḅi iinhaghạn phọ siphẹ ekool phọ odị kụ oḅilhẹ ophạm ghan ituughạ olhoghotu odị. Eḅẹl amem mọ, ikparanhaạn ni nyodị. Kuolọ odị adaphạn ni iiḅakiọm mọ. Odị aghaạph ghan iiḅi iinhaghạn phọ aḅenhị we, kụ aphạm ghan ituughạ siphẹ olhoghotu phọ odị, kụ aḅilhẹ amhoọgh mem dị odị aphạm ghan iiseeny eghunotu r’anmanyaạn phọ odị. Eeghe kụ iḍuạ emite? ABrizit amhoọgh ni ibadị awe dị odị atughemhị ghan Baibul, kụ ibadị abidị oru oḍiiny muụm. Kụ odị amhiigh okọy eten opọ oomo amem mọ lhạ phọ 2005. Kụ aZihova asẹph ni nyodị loor iduọn odị aḍuom bọ nyodị olhoghi kụ aḅilhẹ bọ aḅạr oḍighom mọ odị. Anmanyaạn phọ odị okị ni ghisigh rooḅereghị aZihova agey, kụ nyiidiphọ iyạl arookpomhoghan kụ memite siphẹ ekool phọ abidị! ABrizit ameeraam akuphom owol mọ aZihova kụ angọ bọ nyodị inyaạm orue okaran iiḅaghamhị kirokirọ phọ odị asoman bọ ḅilhẹ rokparạm arigilaạm eghunotu phọ odị.

17. Eeghe kụ edị yira kosopha oḍighi?

¹⁷ ASetan rawạ dị yira komeeraam mọ aZihova kuḅitonhaạn ni iyira mem dị yira osoman iiḅaghamhị ḅilhẹ mọ orọl isiẹn ookpomhoghan phọ aZihova keḍighi idị araraạr kikparanhaạn iyira. ASetan rawạ dị yira komoọgh oghiilhaan mem dị rogbaaghiọm ikarạph asiagbạ, rokpuuroghọm, obobọ olhọgh ikoli ikpolhom abumor phọ ayira. Kụ dị eego esi igilaạm, odị rawạ odughe oḍuomolhoghi phọ yira omhoọgh bọ oghị esi asiigbu phọ aZihova r’oḍighom mọ Odị. Toroboiperolbọ, yira u/ḍighi we dị u/legheri ikeḍi phọ odị. Yira ko/meera mọ odị uukelheghi iyira. (2 Kọr. 2:11) Kụ iḍighi kụ, sopha oghel okpẹ kirokirọ phọ aSetan kụ aḅạr aZihova r’ookpomhoghan phọ Odị. Legheri mọ, aZihova r’amem r’amem nyinhạ ka/ḅitonhaạn. (Ps. 28:7) Esi iduọn phọ, ka/meera iyaạr egbariọn nyinhạ r’aZihova!—Rom. 8:35-39.

18. Yira kooḅeghiọn eeghe emhuoghaạph phọ etum bọ siẹn?

¹⁸ Siẹn emhuoghaạph phọ ephẹn phọ, yira mooḅeghiọn omiịn iiḅaghamhị dị yira kotue ni osoman dị re/ḍuạ ghan siẹn ookpomhoghan phọ kụ keru. Kuolọ araraạr edi ni dị ketue ni emite siẹn ookpomhoghan phọ aZihova dị ketue ni eḍighi odẹgh ophogh ingọ iyira oḍuom olhoghi aZihova r’ookpomhoghan phọ odị. Ika kụ idị yira kotue okaran iiḅaghamhị phọ ipẹ phọ? Yira kooḅeghiọn ilọ ipẹ phọ emhuoghaạph phọ etum bọ siẹn.