EMHUOGHAẠPH ITUUGHẠ PHỌ 41
Ḍighi Ni Oye Dị Akpẹ Oḍuomolhoghi Mem ‘Igbogh Iiḅaghamhị Phọ’
“Ipomhoghiạn aZihova, oomo anyinha phọ abuẹn eḅạr bọ nyodị! AZihova rakoph ghan buẹn okpẹ bọ oḍuomolhoghi phọ.”—PS. 31:23.
AḌUỌR PHỌ 129 We Will Keep Enduring
OGHAẠPH OOKARAGH *
1-2. (a) Ighẹn iphelhegbeel kụ edị areelhe phọ kogbeelhom ḍiniin aḍio? (b) Ighẹn asipuru kụ edị ewạ mọ ophanyanhaạn?
GBIOM olhoghi dị areelhe phọ ogbeelhom iphelhegbeel phọ eḅẹm bọ mọ “oomo ariisi mephooghị, ḅilẹ iiḅaghamị i/lo,” iphẹn yira rokori ghan bọ onhaghạn k’aḍio phọ. Kụ bidị omiigh obaga mọ eephọ dị elheeny idiphọ k’ekula k”erọl ghan. Areelhe phọ kowạ ni mọ yira omheeraam mọ bunọ omoọgh ni iikpọ ooḅakiọm asidọl aḅirinhi phọ. Kuolọ bidị u/mạn osophoghom ipẹ kedaphạn bọ! Eeghe kụ iḍighi? Odaphạn imiịn aBaibul phọ, “ekperenom bịn amuphe mateẹny bidi, bidị ko/kpetenaan.”—1 Tẹs. 5:3.
2 Ekạr kụ emạn maạr dị yira kopanynhaạn sipuru phọ edaphạn bọ siẹn: Eeghe kụ kemite mem ‘igbogh iiḅaghamhị’ phọ? AZihova kawạ mọ yira oḍighi eeghe mem mọ amuphẹ phọ? Ḅilhẹ ika kụ idị yira kookolhobian siloor ayira nyiidiphọ orue orọl adọl dị ekpẹ oḍuomolhoghi mem igbogh iiḅaghamhị phọ?—Mat. 24:21.
EEGHE KỤ KEMITE MEM ‘IGBOGH IIḄAGHAMHỊ PHỌ’?
3. Odaphạn Ogananami 17:5, 15-18, ika kụ idị Enhaạn kepiemhi bọ ‘Babilọn Ogbogh phọ’?
3 Bạl Ogananami 17:5, 15-18. Kokạr kụ opiemhi ‘Babilọn Ogbogh phọ!’ Idiphọ oghaạph bọ ni epẹ emhiighom mọ, areelhe phọ u/mạn ooḅakị ipẹ keḅilhẹ bọ emite siẹn amem mọ amuẹn phọ. Eeghe kụ iḍighi? Loor esi dị “[Enhaạn] kelọgh iitughiạn phọ odị ologhi abidị mọ oḍighinom ipẹ onọ rawạ bọ.” Eeghe kụ ipẹ Enhaạn rawạ bọ? Ophiemhi oomo aruukụ iiḅereghị okpẹ phọ, eḅaramaạm ni kẹn Kristẹn uḅeenheẹn. * Enhaạn kelọgh ḍiitughiạn phọ odị rokpom “aḍioph phọ araphaạl” “etotọgh elhom enạm” mọ. Ḍioph phọ araphaạl phọ emeerạ enye oomo abuọ itooghị phọ oḍighan bọ “elhom enạm mọ”—eḍighi bọ United Nations phọ. (Ogan. 17:3, 11-13; 18:8) Amem dị iikpọ itooghị phọ kozuom bọ ruukụ iiḅereghị okpẹ phọ kụ edị keḍeenhaan bọ mọ igbogh iiḅaghamhị phọ memhiigh. Ipẹ kemite bọ kekọm ni ookperemhi engọ torobọ oye siẹn ade phọ.
4. (a) Areelhe phọ koḅẹm mọ bunọ utuạn eeghe kụ ropiemhi bọ ruukụ iiḅereghị okpẹ phọ? (b) Eeghe kụ idị awe phọ abuphẹ oghiighị ghan bọ ruutu iiḅereghị phọ ipẹ phọ koḍighi?
4 Yira u/kạr ulegheri iyaạr phọ keḍighi bọ kụ areelhe phọ kozuoghom bọ Babilọn Ogbogh phọ. Bidị otue ni oḅẹm mọ aruukụ iiḅereghị aḅirinhi phọ rokikima ghan eephọ ḅilhẹ kẹn mọ bidị rokparaghạ ghan onyuughiom abuọ itooghị phọ. Obobọ bidị otue ni oḅẹm mọ ikpoki r’aruphua dị aruukụ iiḅereghị phọ momhoọgh mephughạn. (Ogan. 18:3, 7) Eḍighi ni osụ olhoghi ootughiạn mọ izuoghom mọ iphẹn phọ ke/piemhi oomo abuphẹ odi aani bọ siphẹ aruukụ iiḅereghị okpẹ phọ. Kparipẹ ghụn ni aruukụ iiḅereghị phọ kụ edị kopiemhi bọ. Mem dị ophiemhi ruukụ iiḅereghị phọ, awe phọ oghị ghan bọ kologhoma ni loor mọ abuḍiemhiom aruukụ iiḅereghị phọ mookelheghi bunọ, kụ eeni omiigh oḍuraan oḍuạ esi abidị.
5. AZihova aguanhaan oḍighi eeghe mem igbogh iiḅaghamhị phọ, kụ eeghe kụ iḍighi?
5 ABaibul phọ o/ghol onhụ asiạ phọ kesighẹ bọ ophiemhi aBabilọn Ogbogh phọ, kuolọ yira olegheri ni mọ ke/bia. (Ogan. 18:10, 21) AZihova aguanhaan ni mọ “loor emụ abuphẹ dị masaḅạr bọ odị kasoph ni riiḍio phọ akpere” bịn eḍighi idị egey ekụ iiḅereghị phọ kokpetenhaan igbogh iiḅaghamhị phọ. (Mạk 13:19, 20) Kuolọ eeghe kụ edị aZihova kawạ mọ yira oḍighi, emhiigh mem igbogh iiḅaghamhị phọ kụ eghị eteẹny ḍio eghạm Amagedọn?
KIỌM GHISIGH APHAMHANHẠM IGEY IISEENY PHỌ K’AZIHOVA
6. Eeghe kụ iḍighi kụ i/munheen bọ oruura oḍuạ esi aruukụ iiḅereghị okpẹ bịn?
6 Idiphọ oghaạph bọ siphẹ emhuoghaạph phọ eten bọ, aZihova rawạ mọ arebenhẹ phọ odị oḍuạ esi aBabilọn Ogbogh phọ. Toroboiperolbọ, i/muneen esi oruura oḍuạ esi aruukụ iiḅereghị okpẹ bịn. Ewạ mọ yira osopha oghiọm aghisigh ophamhanhạm igey iiseeny—iserereẹny iiseeny phọ k’aZihova. Uguạ ooḅeghiọn iyạl areten dị yira kotue oḍighi iduọn phọ.
Ku/bulhamaam ghan ookpomoghan ghan, ghalhamọ r’amem dị asidọl phọ ekpạr ri (Miịn ekpịgh phọ 7) *
7. (a) Ika kụ idị yira kotue opạm okparamhị siigbu elhiom eḍighinhom iyaạr phọ aZihova? (b) Ika kụ idị Hibru 10:24, 25 eghaạph elhọgh iiphaghamhiọm ilọ iyaạr phọ eḍighi bọ kụ oghị ghan ituughạ amhạn bọ maạr, ekạr nuụn ekpaariọm nyiidiphọ?
7 Eḅẹl phọ, yira omoọgh ophạm okparamhị asiigbu elhiom eḍighinhom iyaạr phọ aZihova ilọ aroozọ dị eḅaạl. I/wạ r’owạ mọ yira omhoọgh aani roozọ aḅirinhi phọ i/ḅaạl bọ. Esi omaạm, yira ku/pinomaam bin torobọ eten orolhạn esi dị u/ḅaạl, idiphọ orolhạn esi igbo ilhephiri r’alhephiri anhiniạn igbo anmariịr. (Mat. 19:4, 5; Rom. 1:26, 27) Edị etum siẹn, Yira omoọgh oghiọm aghisigh ookpomhoghan ghan r’abuẹn r’ayira oḅọph bọ omheeraam mọ. Yira kookpomoghan ghan torobọ esi lọ yira kotue, mughumọ isiphẹ aKindọm Họl phọ ayira, lọ ewạ ni, m’olhoghi otu onyọ umor obobọ esi dị aaghiạn. Etigheri ipẹ kemite bọ, yira ko/bilhẹ oghị ghan ituughạ oḅophoghạn ooḅereghị. Ogbạ agey, ekạr kụ ewạ dị yira kookpomoghan ghan dị ‘oniin kakuamhị ghan atomoghiom ghan nyoniin siẹn dị yira romiịn bọ ni mọ aḍio omoọgh-we phọ rekpulạn ni’—Bạl Hibru 10:24, 25.
8. Ika kụ idị adom mọ yira rogbeelhom ghan bọ ketue enmia ghisigh?
8 Mem igbogh iiḅaghamhị phọ, eeni adom mọ yira kogbeelhom bọ etue ni enmia. Nyiidiphọ, yira rogbeelhom ghan iiḅi iinhaghạn ilọ Omhạr phọ, ḅilhẹ roḍighi awe bumatuạn. Kuolọ mem mọ amuphẹ phọ, eeni yira kogbeelhom dom dị eghịgh iiḅoghoḍi ibikpo. (Ogan. 16:21) Eeni yira kogbeelhom mọ moọny amem kopiemhi aḅirinhi phọ aSetan. Iduọn amem mọ rekị bọ ni, yira kowạ ni olegheri ipẹ adom mọ ketọl bọ ḅilhẹ r’ipẹ yira kogbeelhom bọ. Yira kosighẹ ni eniin eten phọ ephẹn yira roḍighinhom ghan bọ k’asiạ phọ ogbeelhom iiḅi iinhaghạn phọ kụ oḍighinhom ḍughụm? Obobọ yira kosighẹ inhọn odọ areten kụ oḍighinhom? Yira u/legheri. Etigheri ipẹ ketọl bọ, eeni yira komoọgh aani ni eepoogh ogbeelhom adom ooruẹn phọ aZihova!—Ezek. 2:3-5.
9. Awe areelhe phọ komegheron ika esi adom mọ yira kogbeelhom bọ, kuolọ yira kokuphom owol eeghe?
9 Eeni, adom mọ yira kogbeelhom bọ kepin ni ilhoghi areelhe phọ, bịn eḍighi idị bidị konyạ osophoghom ayira. Iduọn yira obeḍenhọm bọ aZihova nyiidiphọ ilọ oḍighi iphelhegbeel phọ, kụ edị yira kobeḍenhọm nyodị mem mọ amuphẹ phọ. Yira okuphom ni owol mọ aZihova Enhaạn phọ ayira, kungọ ni iyira iikpọ dị emhanhạm omhunhenhi ogbi phọ odị.—Mic. 3:8.
KOOKOLHOBIAN ILỌ IZUOGHOM MỌ RETU BỌ
10. Idiphọ oghaạph bọ siphẹ Luk 21:25-28, ika kụ idị ibadị awe kologhoma loor esi araraạr aḍiigu phọ kemite bọ mem igbogh iiḅaghamhị phọ?
10 Bạl Luk 21:25-28. Mem igbogh iiḅaghamhị phọ, keḍighi ni unmam esi awe omhiịn dị araraạr aḅirinhi phọ bidị ootughiạn bọ mọ ketọl li ebia phọ repeeghu. Bidị kotọl dọl “amukum olhoghi,” r’oghiilhaan ilọ asighuḍum mọ abidị, idiphọ bidị kosoman bọ simem dị ekạr eeph elhoghorị esi iphirigba omhạr awe. (Zeph. 1:14, 15) Mem mọ amuphẹ phọ, asidọl aghuḍum awe phọ kekpạr ri, ghalhamọ r’ilọ awe phọ aZihova kẹn. Loor iduọn yira u/ḍighi bọ pakirị aḅirinhi phọ, eeni yira kosoman ni ḍikparamhinheẹn. Ibadị araraạr dị ekạr ri ewạ omhoọgh kikuom ni iyira.
11. (a) Eeghe kụ iḍighi kụ areelhe phọ kooghiraan bọ osoman Bugbaanhaạn AZihova? (b) Eeghe kụ iḍighi kụ i/wạ bọ dị oḅio ayira k’akaph ilọ igbogh iiḅaghamhị phọ?
11 Kesi ni esi dị kepin ilhoghi abuphẹ mophiemhi bọ ruukụ iiḅereghị phọ abidị, loor iduọn u/piemhi aani bọ ookpomhoghan Abugbaanhaạn AZihova phọ. Gbiom olhoghi odọ igbaragbarạ dị iphẹn phọ kekọm, ghalhamọ r’isiphẹ iisoph intanẹt phọ. Areelhe phọ ḅilhẹ r’otooghiạ phọ abidị, aSetan, kulhọgh ni iyira ḍien loor esi dị u/piemhi aani bọ ookpomhoghan phọ ayira. Bidị ko/moọgh ekol ophiemhi oomo aruukụ iiḅereghị isiẹn ade phọ idiphọ bidị ootughiạn bọ. Loor esi iduọn phọ, yira kụ edị areelhe phọ kokiton osoman. Mem mọ amuphẹ phọ, bịn areelhe phọ moḍighi Gọg opọ aMegọg. * Bidị koḅophoghạn kụ olọgh oomo inyaạm abidị oghị ozuom awe phọ aZihova. (Ezek. 38:2, 14-16) Yira otue ni ooḅaghamhiạn loor ilọ ipẹ kemite bọ mem igbogh iiḅaghamhị phọ, ekạr nuụn ekpaariọm iduọn yira u/kạr bọ u/legheri ipẹ kekạr bọ etọl. Toroboiperolbọ, yira okuphom ni owol eniin iyaạr, mọ: I/wạ dị yira kokiilhaan igbogh iiḅaghamhị phọ. AZihova k’ungọ ni iyira iiḅakiọm dị kiphẹl iyira. (Ps. 34:19) Yira kotue ni “omeerạ opogh okiọm anyụ ḅilhẹ omeremhị rumhụ ayira,” loor esi dị yira kolegheri ni mọ “apelieẹny phọ [ayira] masi siẹn edạ aḍighaạgh. *
12. Ika kụ idị ‘Ebenhẹ phọ asụ bọ olhoghi aḅilhẹ akpẹ oḍuomolhoghi phọ’ ruukolhobian ghan iyira okaran ipẹ kemite bọ ghisigh?
12 ‘Ebenhẹ phọ asụ bọ olhoghi aḅilhẹ akpẹ oḍuomolhoghi phọ’ ruukolhobian ghan ni iyira ilọ yira kotue otọl dọl dị ekpẹ oḍuomolhoghi mem igbogh iiḅaghamhị phọ. (Mat. 24:45) Bidị moḍighi ni iphẹn phọ ibadị areten, kuolọ ooḅeghiọn eniin eten: edeọm arookpomhoghan eephugh phọ ayira ipẹ 2016-2018. Dị eego esi edeọm arookpomhoghan eephugh phọ ipẹ phọ, araghaạph phọ ongooghị bọ mikparamhị iyira omhoọgh araagharạ phọ emhoghi bọ, idiphọ aḍio phọ aZihova metuman bọ siẹn. Uguạ ooḅeghiọn enụm araagharạ phọ ipẹ phọ.
KIỌM GHISIGH AKPARAMHỊ GHAN DỌL OḄẠR PHỌ ANẠ, OKPARẠM MỌ, ḄILHẸ R’AKPỌ OḄIO PHỌ ANẠ
Kookolhobian nyiidiphọ ilọ okpetenhaan ‘igbogh iiḅaghamhị’ phọ (Miịn siikpịgh phọ 13-16) *
13. Ika kụ idị yira kotue okparamhị dọl oḅạr phọ ayira esi aZihova, kụ eeghe kụ iḍighi kụ ekpaariọm bọ ni oḍighi iduọn phọ nyiidiphọ?
13 Adọl oḅạr: Emhuoghaạph ookpomhoghan eephugh phọ 2016 iḅẹm mọ “Tolhonhaạn Esi Oḅạr AJihova!” Edeọm ookpomhoghan eephugh phọ epẹ phọ, itughemhị iyira mọ eḍighi maạr dị yira omhoọgh siya dị ekpạr oghị esi aZihova, pọ yira koḅạr ri nyodị. Ḅilhẹ kẹn mọ yira kotue ni oḍuraan ogbị aZihova dị eego esi iiḅereghị dị eḅuạ k’ekpom ḅilhẹ r’okuamhị otuughạ Ekpo Onhụ phọ odị. Kụ mọ oḍighi iduọn phọ k’ingọ iyira inyaạm r’ibuọm orue okpạr opu ghalhamọ r’iiḅaghamhị dị ebụgh ni iboom. Iduọn aḅirinhi phọ aSetan rasi bọ eekunha, adọl oḅạr phọ ayira esi aZihova ḅilhẹ r’Omhạr phọ odị keḍigh ni esi odẹgh ophogh. Awe kokị ni ghisigh ugilhaạm iyira. (2 Pit. 3:3, 4) Iphẹn phọ kemite loor adọl asạm mọ ayira. Kụ iḍighi kụ ewạ mọ okparamhị dọl oḅạr phọ ayira nyiidiphọ, pidị yira otue otolhonhaạn esi oḅạr aZihova mem igbogh iiḅaghamhị phọ.
14. (a) Eeghe onmia kụ kasighẹ dọl idị egbolhomaam bumor phọ abuphẹ oḍiemhiom bọ siẹn ade phọ? (b) Uḍighi ika kụ kewạ bọ ni mọ oḍeenhaan adọl oḅạr mem mọ amuphẹ phọ?
14 Mem igbogh iiḅaghamhị phọ, onmia katọl li idị egbolhomaam bumor phọ oḍiemhiom bọ siẹn ade phọ. Esighẹ rekị, kookpomoghi ni okeelhom k’akẹ oomo abuphẹ osagharạn bọ uwaloor phọ osugha bọ siẹn ade phọ, ophinhomaam aani abin eghạm mọ Amagedọn. (Mat. 24:31; Ogan. 2:26, 27) Iphẹn phọ remạ ghan mọ Aloor Phọ Repogh bọ ke/tọl mun r’ayira siẹn ade phọ. Toroboiperolbọ, komaạr ri ooḅakị ḍigbogh aḍita phọ. Abumor dị osianhaan igbo aḍigbogh aḍita phọ, kụ kooḅakị iyool phọ. Kewạ ni dị yira koḍeenhaan dọl oḅạr esi obakị aani abumor phọ abuphẹ phọ ḅilhẹ r’odaphạn iiḅakiọm mọ Enhaạn kengọ bọ bidị. Apelieẹny phọ ayira kaḍuạ esi odaphạn iiḅakiọm mọ abidị kụ amite!
15. Ika kụ idị yira kotue okparamhị okparạm mọ ayira, kụ uḍighi ika kụ ewạ bọ ni oḍighi iduọn phọ nyiidiphọ?
15 Okparạm: Emhuoghaạph ookpomhoghan eephugh a2017 iḅẹm mọ “Nyinạ Ki/phẹr!” Edeọm mọ epẹ phọ ilhoghonaạn iyira ḍighaạgh orue okparamhị inyaạm okparạm mọ ayira. Yira utuughạ mọ asidọl dị enhighẹ kụ iyira ri/ngọ ghan bọ okparạm mọ, kuolọ reḍuạ ghan esi obeḍenhọm aZihova. (Rom. 12:12) Yira ku/bulha ipẹ aZizọs aguanhaan bọ mọ: “oye lọ akparạm ateẹny eekuna phọ kamoọgh ni pelieẹny.” (Mat. 24:13) Oguan phọ ophọn phọ ramạ ghan kaḍeenhaan mọ yira ophạm ni omheeraam mọ ayira okparamhị etigheri torobọ ipaanhaạn. Yira okparạm ghan nyiidiphọ, omheeraam mọ ayira kakpạr ri kụ egbi oteẹny amem igbogh iiḅaghamhị phọ.
16. Eeghe kụ reḍeenhaan ghan mọ yira omoọgh ni akpọ oḅio, kụ ika kụ idị yira kotue okparamhị akpọ oḅio phọ ayira nyiidiphọ?
16 Akpọ oḅio: Emhuoghaạph ookpomhoghan eephugh a2018 iḅẹm mọ “Kpọ Oḅio!” Edeọm mọ ighiọm iyira olhoghi mọ kii/kpọ ayira kụ keḍeenhaan mughumọ yira okpọ ni oḅio. Idiphọ ewạ bọ mọ yira obeḍenhọm aZihova orue omhoọgh okparạm, iduọn kẹn kụ edị ewạ orue omhoọgh akpọ oḅio. Ika kụ idị yira kotue bọ okiọm ghisigh obeḍenhọm ghan aZihova? Esi obạl ghan Ekpo Onhụ phọ odị ḍio ḍio ḍio kụ ogbirima ghan ilọ ipẹ odị aphẹl ghan bọ we phọ odị iḍiodi phọ. (Ps. 68:20; 2 Pit. 2:9) Mem igbogh iiḅaghamhị phọ areelhe phọ kuzuom bọ iyira, kemoghi dị yira koḍeenhaan akpọ oḅio r’oḍuomolhoghi dị agbatanhaạn okị esi aZihova. (Ps. 112:7, 8; Hib. 13:6) Yira orue obeḍenhọm aZihova nyiidiphọ, yira komoọgh ni akpọ oḅio phọ kewạ bọ orue omherenyạn izuoghom mọ aGọg. *
GON NI R’IKPUKPỤ OMHIỊN APELIEẸNY PHỌ ANẠ
AZizọs r’aḍita awe eghạm mọ odi bọ k’akẹ phọ oḍiku iphalhaḅaạl arusụ kụ robeom eghạm amagedọn phọ ophiemhi amulhọgh ḍien phọ Enhaạn! (See paragraph 17)
17. Eeghe kụ iḍighi kụ i/wạ bọ mọ yira oghiilhaan Amagedọn? (Miịn afoto oḅẹl opoḍi phọ.)
17 Idiphọ oghaạph bọ ni siphẹ emhuoghaạph phọ epẹ eten bọ mọ, ibadị ayira m’orọl oomo adọl aghuḍum mọ ayira siẹn asiḍio aruukunha phọ. Kuolọ yira oḅilhẹ ni omoọgh oḍuomolhoghi orọl oḅeẹny igbogh iiḅaghamhị phọ. Eghạm mọ Amagedọn kụ keḍighi ekureriom iyaạr dị kemite siẹn eghimoghọm araraạr aḅirinhi phọ ophọn phọ. Toroboiperolbọ, iyaạr otuạn oghiilhaan i/lo. Eeghe kụ iḍighi? Loor esi dị eghạm mọ elọ aZihova. (Prov. 1:33; Ezek. 38:18-20; Zech. 14:3) AZihova rotọ ongọ Zizọs, aZizọs kaḍiemhiom ni we eghạm mọ Enhaạn. Odị kaḍiemhiom ḍita abuẹn moḅerion bọ ogheelhom k’akẹ r’aḍita aruukpaạny phọ. Kụ aḍita phọ abidị okị ozuom Setan, ikarạph aruwaloor phọ odị, ḅilhẹ r’awe eghạm aḅirinhi phọ.—Dan. 12:1; Ogan. 6:2; 17:14.
18. (a) AZihova uguanhaan iyira eeghe? (b) Ika kụ idị Ogananami 7:9, 13-17 engọ nyinhạ oḍuomolhoghi ilọ aghisigh?
18 AZihova maguanhaan mọ: “Eenemạ i/lo dị okpọl ophoghomiom nyinhạ kụ k’emoọgh ekol.” (Isa. 54:17) ‘Aḍigbogh aḍita’ arebenhẹ aZihova dị okpẹ oḍuomolhoghi ‘kokpetenaan ni igbogh iiḅaghamhị phọ’ r’ighuḍum! Kụ bidị okiọm ghisigh oḍighi ghan oḍighi ongọ Enhaạn. (Bạl Ogananami 7:9, 13-17.) P’eeghe idị aBaibul phọ umuzeḍinhaan iyira oḍuomolhoghi ilọ aghisigh phọ! Yira olegheri mọ “AZihova rakoph ghan buẹn okpẹ bọ oḍuomolhoghi phọ.” (Ps. 31:23) Oomo phọ abuẹn ophomhoghiạn bọ ḅilhẹ r’ooseeny ghan bọ aZihova koḅaạl li olhoghi omhiịn dị aZihova kaḅaalhamhị ḍien phọ odị.—Ezek. 38:23.
19. Eeghe imạ aghisigh kụ rukori iyira esi eẹny ekula amem?
19 Tuutughiạn idị 2 Timoti 3:2-5 mukaạph eḍighi maạr dị rakaạph ilọ awe phọ abuẹn kotọl bọ siphẹ omhoom aḅirinhi phọ, mokpetenhaan bọ inyuughiom mọ aSetan. (Miịn igbe phọ “Eten Phọ Epẹ Awe Kotọl Bọ Mem Mọ Amuphẹ Phọ.”) Umor phọ George Gangas, * opọ akumuan aani bọ ni siphẹ Aloor Phọ Repogh Bọ, aḅẹm mọ: “P’eeghe idị aḅirinhi phọ kanighẹ mem dị oomo awe phọ moḍighi bumor r’abumarani! Esi eẹny ekula amem, nạ kamoọgh ni eepoogh orọl aḅirinhi emhoom eghimoghọm araraạr. Asiḍughul otu anạ kedoọny aani idiphọ ipẹ aZihova. Yira kotọl bịn k’agee-pọ.” P’eeghe ookiạ oḍuomolhoghi!
AḌUỌR PHỌ 122 Be Steadfast, Immovable!
^ par. 5 Yira olegheri ni mọ ‘igbogh iiḅaghamhị’ moọny amem kesoorom omhạr awe. Eeghe kụ kemitenhaan rebenhẹ phọ aZihova mem mọ amuphẹ phọ? AZihova kawạ mọ yira oḍighi eeghe mem mọ amuphẹ phọ? Ighẹn araagharạ kụ edị ewạ mọ yira okparamhị nyiidiphọ obọ yira oḍighi we dị okpẹ oḍuomolhoghi? Yira komiịn ophanyanhaạn asipuru phọ ipẹ phọ, siẹn emhuoghaạph phọ ephẹn.
^ par. 3 IKPO ONHỤ DỊ OGBẠ: Akristẹn uḅeenheẹn phọ pọ aruukụ iiḅereghị phọ oghophora bọ mọ bunọ oḍighi Kristẹn, kuolọ ro/tughemhị ghan bọ we idị bidị kooseeny aZihova eten phọ epẹ rewạ bọ.
^ par. 11 IKPO ONHỤ DỊ OGBẠ: Ekpo onhụ phọ Gọg opọ aMegọg (obobọ aGọg) remạ ghan ookpomhoghan areelhe dị k’onyạ ozuom awe phọ aZihova, mem dị igbogh iiḅaghamhị phọ rekị esi eekunha.
^ par. 11 Olhegheri obughẹ ilọ araraạr phọ kemite bọ kụ egbi oteẹny aḍio eghạm mọ Amagedọn, pọ bạl ḍinyạ phọ God’s Kingdom Rules! emhuoghaạph phọ 21. Olhegheri obughẹ kẹn ilọ izuoghom mọ aGọg opọ aMegọg ḅilhẹ r’ipẹ aZihova katagharạn bọ we phọ odị mem Amagedọn, pọ bạl ḍinyạ phọ Pure Worship of Jehovah—Restored At Last! rumhuoghaạph phọ 17 r’18.
^ par. 16 Edeọm ookpomhoghan eephugh 2019 emhuoghaạph phọ eḅẹm bọ mọ “Ephomoghiạn Re/mineen Ghan!” ilhoghonhaạn iyira ḍighaạgh omhiịn mọ yira kotue ni omoọgh oghoph eeḍiạn oghoph ephomhoghiạn phọ aZihova.—1 Kọr. 13:8.
^ par. 19 Miịn Watchtower aDecember 1, 1994 emhuoghaạph phọ “His Deeds Follow Him.”
