1. Eeghe kụ iḍighi kụ ekpẹ bọ ni dị yira kokuọm oomọ aloor ayira aZihova?

AZIHOVA akpẹ dị yira kokuọm oomo aghuḍum mọ ayira, loor esi dị odị kụ ulhẹm iyira aḅilhẹ ungọ iyira ghuḍum. (Ogan. 4:11) Toroboiperolbọ, ipaanhaạn edi ni. Ghalhamọ yira opomoghiạn ni oḅilhẹ rolhọgh ghan eegu aZihova, inhọn araraạr ketue ni eḍighi idị yira kobilhẹ okuọm oomo aloor phọ ayira aZihova eten phọ epẹ ekpẹ bọ. Ewạ ni mọ olhegheri ipẹ iphẹn phọ ketue bọ imitenhaan iyira. Eḅẹl phọ ophụr ooḅeghiọn iyaạr phọ okuọm oomo aloor aZihova remạ ghan bọ.

2. Odaphạn Exodus 34:14, yira koḍighi ika kụ eḍeenhaan mọ yira okuọm ni oomo aloor aZihova?

² Siphẹ aBaibul phọ, okuọm aloor Enhaạn remạ ghan okuamhị ophomhoghiạn odị. Mem dị yira okuọm oomo aloor ayira aZihova, yira kooseeny ghan ogina odị bịn. Yira ko/⁠meera oye obobọ iyaạr eru esighẹ esi phọ aZihova siphẹ ekpom mọ ayira.​—Bạl Exodus 34:14.

3. Eeghe kụ iḍighi kụ okuọm aloor ayira aZihova o/ḍighi bọ eekulha?

³ Okuọm oomo aloor phọ ayira aZihova i/ḍighi eekulha. Eeghe kụ iḍighi? Loor esi dị okuọm aloor phọ ayira akpasị esi ariphigh dị yira molhegheri ni ilọ odị. Imạ araagharạ phọ odị kụ iḅeeraạn iyira. Yira molhegheri raraạr dị eḅeeraạn r’idị nyodị i/ḅeeraạn, kụ iphẹn phọ iḅeeraạn aani iyira. Yira molhegheri igbiom mọ odị ilọ omhạr awe, kụ r’obakị aani ghan. Yira moḍigh eghuan iduọn odị ungọ aani bọ iyira eepoogh oḍighi arighirị odị. (Ps. 25:14) Oomo phọ araraạr phọ yira rotuughạ ghan bọ ilọ Olemiạ phọ, riḍur ghan iyira kegbiemhị nyodị.​—Jems. 4:8.

4. (a) Eeghe kụ edị Eru phọ rasighẹ ghan kaḍighinhom oḍighi idị yira ko/⁠kuọm loor aZihova? (b) Yira kooḅeghiọn eeghe siẹn emhuoghaạph phọ ephẹn?

 ⁴ Eru phọ kụ aḍiemhiom eghimoghọm araraạr aḅirinhi phọ ophọn phọ, kụ odị rasighẹ ghan kaḍighinhom idị araraạr ipẹ ewạ bọ ni siẹn adọl aghuḍum m’ayira kụ kemạn maạr epelhom esi ayira ḅilhẹ r’idị aruuphuạ iphulhupul phọ ayira kekpạr ogbagharạn. (Efẹ. 2:1-3; 1 Jọn 5:19) Odị rawạ ghan dị yira kopomoghiạn aani inhọn araraạr pidị esophoghom okuọm oomo aloor phọ ayira aZihova. Ooḅeghiọn iyạl areten dị odị katue ni asighẹ aḍighinhom bịn amoọgh ekol. Eḅẹl phọ, odị rudẹgh ghan iyira ophorogh eelạ, omhunhenhiom iyạl, odị rakparaghạ ghan oḍighi idị yira kosaḅạr okarạph umoore.

5. Eeghe kụ iḍighi kụ ewạ bọ ni ogona loor esi ephomhoghiạn ikpoki?

⁵ Eḍighi eseeriom ayira owạ ghan iyaạr olhe, omhoọgh imạ iinmenhian, ḅilhẹ r’ekuạ-ekuạ esi orọl. Toroboiperolbọ, yira omoọgh ogona aloor obọ yira komoọgh ghan bọ ephomhoghiạn ikpoki. Ibadị awe siẹn aḅirinhi phọ aSetan “omoọgh ekpooko ikpoki” kụ opomoghiạn raraạr phọ ipẹ ikpoki ketue bọ eko. (2 Tim. 3:2) AZizọs alhegheri ni mọ abutelhedom mọ odị otue ni omeel ḍiphil omhoọgh ephomhoghiạn phọ ephẹn phọ. Kụ aḅẹm mọ “Oye o/⁠Io dị katue adạph iyạI aburudẹ-otu. Odị kạIọgh ni nyoniin ḍien, apomoghiạn nyoọri phọ. Odị kạpamanạm ni nyoniin akeI nyoorị phọ. Nyina ke/⁠tue eḅạr Enaạn r’ikpoki kụ edạph.” (Mat. 6:24) Oye dị raaḅereghị aZihova kụ amhiigh olhọgh amuboom amem r’inyaạm owạ eelạ aḅirinhi phọ, pọ iduọn phọ rakparaghạ ghan okumu iyạl aburudẹ-otu. Bịn eḍighi idị odị ka/⁠kuọm mun oomo aloor odị aZihova.

6. Eeghe kụ edị yira kotue otuughạ esi ipẹ aZizọs aḅenhị bọ ookpomhoghan phọ aLodisia?

⁶ Rekpụl bọ eekunha oḅẹl okuron asiạ phọ, abuniin abuọ ookpomhoghan phọ arọl bọ egbogh emhạ phọ aLodisia ubagaam ghan mọ:  “Mineghenọm iyoor, yoor omoọgh eelạ, iyaạr iyoor i/⁠kuom.” Kuolọ riḍien aZihova r’aZizọs, bidị oḍighi ‘aagiạ r’obịph. Rukulom dị odi edaḅạ, ḅilẹ eten u/⁠miịn.’ AZizọs o/⁠roma bidị, loor esi eelạ dị bidị omhoọgh, kuolọ loor esi dị ephomhoghiạn eelạ phọ abidị repuẹ siya phọ abidị r’aZihova. (Ogan. 3:14-17) Eḍighi maạr dị yira olhoghoma mọ yira momhiigh romoọgh ephomhoghiạn ikpoki siphẹ ekpom mọ ayira, pọ oogboronhom oolemhi iitughiạn phọ ayira. (1 Tim. 6:7, 8) Yira u/ḍighi iduọn phọ, ekpom mọ ayira k’aayạ ni bịn eḍighi idị aZihova ka/⁠sighẹ mun iiseeny phọ ayira. Odị “rawạ ghan mọ okuọm nyodị oomo aloor bịn.” (Deut. 4:24) Ika kụ idị ephoghom m’ayira idị egbolhomaam ikpoki ketue egbọl?

7-9. Nạ atuughạ eeghe esi eḍeenhaan okumor oye ookpomhoghan phọ oghol bọ mọ Devid?

⁷ Ooḅeghiọn eḍeenhaan aDevid, okumor oye ookpomhoghan dị akpạr ḍighaạgh, dị arugh epẹ United States. Odị aghaạph ilọ aloor odị idiphọ oye dị akuọm loor siphẹ arukumuan phọ odị. Uphophe ni nyodị siphẹ akompinị phọ odị aḍighi ghan bọ, ḅilhẹ kẹn oomo eelhe phọ olhegheri nyodị idiphọ oye dị akạr amhaạr oḍighi phọ. ADevid aḅẹm mọ “eeni amem, mị uutughiạn mọ idiphọ oḍighi phọ ruḍume bọ imhị pọ eḍighi ḍisẹph aZihova.” Kuolọ eḍighi ni ḍisẹph aZihova ḍughụm?

⁸ ADevid amhiigh ni omhiịn areḍeenhaan dị remạ ghan mọ oḍighi phọ rangọ iiḅaghamhị siya phọ odị r’aZihova. Odị aḅẹm mọ: “Siphẹ otu ituughạ phọ, ghalhamọ r’epẹ erugh phọ kụ mị raatughiạn ghan iiḅaghamhị kirokirọ dị emite epẹ otu oḍighi phọ. Mị umhoọgh ghan ni iboom ikpoki, kuolọ ooḅaghamhiạn aloor phọ amhị abụgh ghan bịn, ḅilhẹ apinien phọ amhị amhooghọgh ghan iiḅaghamhị.”

⁹ ADevid alhoghoma ni mọ ewạ ni okiririom ophogh iyaạr phọ ekạr bo emhạn maạr  siphẹ aghuḍum mọ odị. Odị aḅẹm mọ: “Mị usopha ni oolemhi adọl phọ amhị.” ADevid awạ ghan onme edeọm oḍighi phọ odị, kụ aghị aḅenhị opọ asighẹ bọ nyodị oḍighi phọ. Epẹ eekunha phọ, uphorogh ni Devid oḍighi phọ! ADevid aḍighi ika? Odị aḅẹm mọ: “Reḅaạl bọ bịn, mị aghị ageạn okọy eten ekulha amem dị kasighẹ ghan bịn akiọm.” Olhoghonhaạn aḍighaạgh loor abidị, anhịr odị r’odị rogbuurogh ghan rutu awe. I/⁠mạn mem bịn odị amhiigh okọy eten oomo amem mọ, onyebeel roten bịn anhịr phọ amhiigh aani okọy eten oomo amem mọ. Olom r’anhịr phọ ophọn usaḅạr oḍighi dị ibadị awe ophogh osooromhi, kuolọ oḍighi phọ ophọn phọ bidị roḍighi bọ kụ o/ḍighi ekpanhạ iyaạr siphẹ adọl aghuḍum mọ abidị. Ghalhamọ r’iduọn ikpoki phọ bidị olhe ghan bọ mesoorom bọ esi aḍioph abin, bidị romoọgh ghan ni ikpoki dị ekasiạn oghoom iyaạr lọ rewạ ilọ unwanyụ phọ. Bidị rowạ osighẹ aZihova kụ oḍighi eḅẹl siphẹ aghuḍum mọ abidị, kụ bidị omhiịn mọ aZihova rapogh ghan ni buphẹ osighẹ bọ Omhạr phọ kụ oḍighi eḅẹl.​—Mat. 6:31-33.

10. Ika kụ idị yira kotue ooḅakị ekpom ayira?

¹⁰ Mughumọ yira omeel eelạ obobọ u/⁠meel, ewạ mọ ooḅakị ekpom mọ ayira. Ika? Ka/⁠moọgh ephomhoghiạn ikpoki. Ka/⁠meera oḍighi phọ anạ kụ amhoọgh maạr oḍighinhom apu rukumuan phọ aZihova. Ika kụ idị nạ katue alegheri mọ nạ mamhiigh ramoọgh ephomhoghiạn ikpoki? Asipuru dị nạ kapuruan loor anạ pọ: ‘Mị ragbor ghan ni kaatughiạn ilọ oḍighi mem lọ mị odi otu ituughạ obobọ epẹ erugh phọ ḍughụm? Mị ragbor ghan ni kaaḅaghamhiạn loor ilọ ipẹ mị kamoọgh bọ igbogh ikpoki epẹ ghisigh ḍughụm? Ikpoki r’araraạr aruphua rekọm ni iiḅaghamhị igbo anhịr phọ amhị r’amhị ḍughụm? Mị kameera ni osighẹ oḍighi dị awe ophogh osooromhi, eḍighi maạr dị kungọ ni imhị eepoogh olhọgh amuboom amem okumu aZihova ḍughụm?’ (1 Tim. 6:9-12) Mem dị yira rooḅeghiọn sipuru phọ iphẹn phọ, ootughiạn ni mọ aZihova uphomhoghiạn ni iyira, kụ aguanhaan buphẹ okuọm bọ nyodị oomo aloor mọ: “Mị inyina ki/⁠wilẹ. Mị inyina ki/⁠ghel.” Pọ kụ iyaạr phọ otelhedom mọ aPọl agẹ bọ mọ: “Ke/⁠sighẹ ghuḍum mọ anyina eḅạm anyụ ikpoki.”​—Hib. 13:5, 6.

11. Eeghe kụ edị umoore katue aḍighi oye?

¹¹ AZihova rawạ mọ yira oghelhọm ghuḍum, kụ umoore rulhoghonhaạn ghan iyira ḍighaạgh oghelhọm aghuḍum. Okạr agey, Ekpo-onhụ phọ Enhaạn eḅẹm mọ “iyaạr i/⁠lo dị enhighẹ  epu dị oye kale aḅilhẹ apughọl kụ amoọgh oghelhọm aloor, loor esi iikparạ iiḍighi phọ odị.” (Eccl. 2:24) Toroboiperolbọ, ibadị umoore aḅirinhi phọ ketue ni itir iyira ekarạph eten. Reḍighi ghan idị awe komiigh ophogh r’aḍiḅeeraạn,​—⁠obobọ ophomhoghiạn​—⁠araraạr phọ ipẹ Enhaạn aghel bọ.

12. Odaphạn 1 Korịnt 10:21, 22, eeghe kụ iḍighi kụ yira komiigha bọ ni loor kụ osaḅạr umoore?

¹² Yira rowạ ooḅereghị ogina aZihova bịn, kụ iḍighi kụ yira ko/ḅạr “male Omoọgh-we phọ r’amale aruru kụ [ole].” (Bạl 1 Korịnt 10:21, 22.) Ogbor olhean eḍien r’onhọn oye remạ ghan siya arighirị r’oye pho. Eḍighi maạr dị yira osaḅạr umoore dị ralọgh ghan kaphophe iigamaniạn, iiḍighi ikarạph aruwaloor, roozọ dị i/ḅaạl, obobọ inhọn aruuphuạ iphulhupul phọ r’araagharạ dị i/⁠kpeanhaạn, pọ iduọn phọ yira role ghan eḍien dị amulhọgh ḍien Enhaạn kụ osạ. Epẹ eekunha phọ, yira ko/ḍighima iyaạr siloor phọ ayira bịn, kepiemhiom kẹn siya phọ ayira r’aZihova.

13-14. Odaphạn Jems 1:14, 15, eeghe kụ iḍighi kụ ewạ bọ dị yira k’ogona loor esi umoore dị u/⁠kpeanhaạn? Gbạ.

¹³ Ooḅeghiọn iniin areten dị umoore aghịgh eḍien phọ ephẹn yira role ghan bọ. Mem dị yira role eḍien, yira kotue ni osaḅạr epẹ yira kolọgh bọ onhụ ayira. Kuolọ mem dị yira momhịn eḍien phọ, bịn eḍien phọ memhiigh oḍighi phọ odị ḅilhẹ engọ loor phọ inyaạm. Egey eḍien ketue ni ingo iyira omhoon aloor, ekarạph eḍien ketue ni ekọm e/⁠moon ingọ iyira. Ke/⁠nuụn eganana eḅẹl amem mọ, kuolọ esighẹ rekị bịn yira komiịn egaan ipẹ kekọm bọ engọ loor phọ ayira.

¹⁴ Iniin phọ kẹn, mem dị yira osaḅạr umoore, yira kotue ni ooselhạ raraạr phọ ipẹ ekpẹ bọ osighẹ olhọgh olhoghi ayira. Kuolọ onyebeel roten, ipẹ yira osaḅạr bọ ketue ni etir olhoghi phọ r’ekpom mọ ayira. Ogey umoore katue ni uumhanhamhi iyira egey eten; okarạph umoore kulhọgh iyira esi iiḅaghamhị. (Bạl Jems 1:14, 15.) Ipẹ umoore phọ kutir bọ iyira, yira ko/⁠nuụn olọgh elhegh kuolọ esighẹ rekị bịn keganana ni. Pọ kụ iyaạr phọ aBaibul phọ uphụr bọ iyira rurụ mọ: “Ke/⁠bia loor. Enaạn ro/⁠nmoghoghoọm ghan. Torobọ ilọ oye phọ aḅeph kụ idị odị katuụgh ni abugha; Oye lọ aḅephenaan iphulupul phọ odị, kabugha ibugha aḍuugh.” (Gal. 6:7, 8) P’eeghe idị ekạr ewạ dị yira kokel oomo odọ umoore dị ralọgh ghan kaphophe raraạr dị aZihova aghel!​—Ps. 97:10.

15. Eeghe inmo kụ edị aZihova ungọ iyira oghelhọm?

¹⁵ Ibadị awe phọ aZihova rokelhọm ghan agey ophogh aJW Broadcasting^®, raḍereghinhaan ghan bọ imạ araraạr. Onyọ umarani dị oghol mọ Marilyn aḅẹm mọ: “aJW Broadcasting mulhoghonhaạn imhị ḍighaạgh omhoọgh oḅaạl olhoghi, ḅilhẹ mọ i/⁠moghi mun dị mị kaaḅaghamhiạn loor ooselhạ araraạr dị mị kapogh ghan. Mem lọ mị alhoghoma dọl igina obobọ aḅonyonhu azuan, mị ramiịn ghan ni siphẹ iiseeny aḍiroọr aJW Broadcasting phọ raghaạph dị rikparamhị ghan imhị. Ipẹ phọ reḍighi idị mị raḍuraan ghan kagbị aZihova r’oḍighom mọ odị. AJW Broadcasting phọ makạr kụ anme ghuḍum mọ amhị.” Nạ rakelhọm ni inmo phọ aZihova iphẹn phọ ḍughụm? AJW Broadcasting phọ ramoọgh ghan emhoom edeọm torobọ unwanyụ, ilọ onhaghanhạm arurụ r’asividio r’asuọr dị kelọgh nyinhạ epophe.

16-17. Eeghe kụ iḍighi kụ emhoghi bọ ni dị yira k’ogona loor esi amem mọ yira kolọgh ghan bọ mem umoore, kụ ika kụ idị yira kotue bọ oḍighi iduọn phọ?

¹⁶ I/⁠wạ mọ yira ogona loor esi odọ umoore phọ yira komoore bọ bịn kuolọ onhụ amem mọ yira rolọgh ghan bọ oghelhọm aloor phọ ayira. Eḍighi maạr dị yira u/⁠pogh ukiririom mem mọ yira rolọgh ghan bọ, ketue eḍighi idị yira kolọgh muboom amem dị epu mem mọ yira olhọgh bọ okumu aZihova. Ekparanhaạn ni ibadị ooḅakị onhụ amem mọ bidị rolọgh ghan bọ esi umoore. Esi omaạm, oniin umarani dị amhạn 18 asiạ dị oghol mọ Abigail aḅẹm mọ: “Ophogh  ghan aTV rulhoghonhaạn ghan imhị ḍighaạgh ophooghian mem lọ mị akumuan iboom obobọ aloor amhị medugh. Kuolọ, eḍighi maạr dị mị u/⁠gona loor, ketue ni isighẹ imhị oomo emhụ aḍio phọ ophogh aTV phọ.” Oniin onyọ iḍoọgh umor dị oghol mọ Samuel aḅẹm mọ: “Eeni amem mị uphogh ghan iikpera asividio siphẹ intanẹt phọ. Iduọn mị kamiighom bọ nyoniin, bịn tutụ mị raloghoma loor amhị iraạr obobọ inya awạ meten.”

¹⁷ Ikạ kụ idị yira kotue opamaghạ mem mọ yira rolọgh ghan bọ umoore? Eḅẹl phọ pọ miigha loor agbiighi alhegheri onhụ amem mọ nạ ralọgh ghan bọ mem umoore. Nạ atue ni agbiighi alegheri ilọ oniin awiki. Gẹ esi onhụ amem mọ nạ ralọgh ghan bọ ophogh afim, ophogh araraạr siphẹ intanẹt phọ, ḅilhẹ r’ophegh agem siphẹ afon phọ anạ. Kụ eḍighi maạr dị nạ agbiighi amhiịn mọ nạ ralọgh ghan muboom amem, pọ kparaghạ omhoọgh edeọm. Moọgh mem dị ekasiạn oḍighi iphigh araraạr, kụ aseere mem dị nạ kamoore ghan. Edị etum siphẹ, lọm aZihova alhoghonhaạn nyinhạ ḍighaạgh odạph edeọm mọ anạ. Nạ aḍighi iduọn phọ, pọ nạ kamoọgh ni mem r’inyaạm osighẹ ghan ophamạm ituughạ ogina anạ, iiseeny eghun otu, oghị ghan ituughạ, ogbạ ikpo onhụ phọ r’otughemhị awe Baibul phọ. Ekpom anạ nyinhạ ke/⁠gurọgh mun esi amem mọ nạ kalọgh bọ esi umoore phọ.

18-19. Ika kụ idị yira kotue oḍeenhaan mọ yira okuọm ni oomo aloor ayira aZihova?

¹⁸ Otelhedom mọ aPita rogẹ bọ ilọ eekunha aḅirinhi phọ aSetan r’ilọ omhoom aḅirinhi phọ, kụ aḅẹm mọ: “liḅi asiya, idiphọ nyina regonom bọ ḍio phọ aḍiphẹ phọ, ikparamị ghan ḍighaạgh eḍighi ilọ nyina ketolạn nyodị r’eephọ, eekuan eseleman ghisigh phọ Enaạn.” (2 Pit. 3:14) Yira odaphạn oromha phọ opọ phọ kụ oḍighi ipẹ yira kotue bọ ophamhanhạm igey aroozọ, pọ yira roḍeenhaan ghan mọ yira okuọm ni oomo aloor nyodị.

¹⁹ ASetan r’eghimoghọm araraạr phọ odị kekị ni ghisigh iideghọgh iyira onme araraạr phọ ipẹ eḍighi bọ iḅẹl esi ayira. (Luk 4:13) Kuolọ etigheri ipaanhaạn lọ yira osoman, ku/⁠meera oye obobọ iyaạr esighẹ esi phọ aZihova siẹn ekpom mọ ayira. Osopha ongọ aZihova ipẹ esi bọ nyodị bịn​—⁠okuọm oomo aloor phọ ayira aZihova!