1. Mem dị nạ raatughiạn oye dị amhoọgh onmạ ighirigiir eeghe kụ ketu olhoghi anạ?

MEM lọ oghol oye onmạ ighirigiir, eeni nạ kaatughiạn oyoghoyoghọ oye, dị aḍighi oye ezạ, amhoọgh igbiririph, ḅilhẹ amhaạr inmo. Eeni nạ atue kẹn aatughiạn ḍidogh phọ aZizọs ilọ oye olọ aSameria phọ. Oye olọ enhọn eelhe dị aḍeenhaan “onmạ ighirigiir” olọ aJu dị amheel aḍigh ḍighaạgh aruḅạ. “Igbiririph” kụ inyu bọ oye olọ aSameria phọ oḍeenhaan onmạ ighirigiir olọ aJu phọ. Odị aḅọgh alhọgh ḍighaạgh oye dị kamaạr apoghonhaan nyodị. (Luk 10:29-37) Aḍidogh phọ aḍiẹn phọ ekạr eegholhomhi emạ eegharạ Enhaạn phọ ayira—eegharạ onmạ ighirigiir. Eegharạ phọ ephẹn phọ apakirị ephomhoghiạn phọ Enhaạn, kụ odị raḍeenhaan ghan ni torobọ aḍio esi eten phọ epẹ odị ruzoọm ghan bọ iyira.

2. Oghẹn kụ onhọn agạ onmạ ighirigiir?

² Emoọgh ni enhọn agạ onmạ ighirigiir dị eeni nạ kaatughiạn ni. Eḅaramaạm owilhenhaạn ghan oye dị akpẹ ni oliọm. Siẹn phọ eḍeenhaan mọ aZihova akạr kụ runmạ ghan iyira ighirigiir. Okọ suọr phọ aḅẹm mọ,“odị ru/kpiọm ghan iyira ikarạph phọ” ayira. (Ps. 103:10) Ii eeni amem, aZihova rangọ ghan ni ilioghọm dị ekpeanhaạn we dị opiomạn.

3. Eeghe asipuru kụ edị yira kooḅeghiọn?

³ Siẹn emhuoghaạph phọ ephẹn phọ, yira kooḅeghiọn iraạr asipuru: Uḍighi ika kụ aZihova raḍeenhaan ghan bọ onmạ ighirigiir? Amasian odi ni igbo oliọm oye dị ekpeanhaạn r’onmạ ighirigiir ḍughụm? Kụ eeghe kụ kilhoghonhaạn iyira ḍighaạgh oḍeenhaan ghan onmạ ighirigiir? Uguạ omhiịn idị Ekpo Onhụ phọ Enhaạn ephanyanhaạn sipuru phọ iphẹn phọ.

4. Uḍighi ika kụ aZihova ranmạ ghan bọ ighirigiir?

⁴ Eḅeraạn aZihova onmạ ghan ighirigiir. Iphum ni otelhedom mọ aPọl ogẹ mọ, ‘onmạ ighirigiir phọ Enaạn apughạn.’ Siẹn oghaạph  phọ ophọn phọ, aPọl aghaạph ghan ilọ onmạ ighirigiir phọ Enhaạn aḍeenhaan bọ esi ongọ awe dị u/munughan oḍuomolhoghi ogheel k’akẹ. (Efẹ. 2:4-7) Kuolọ onmạ ighirigiir phọ aZihova apelhom ipẹ phọ bịn. Okọ suọr phọ aDevid agẹ mọ: “Enhighẹ aZihova eteẹny ni torobọ oye, kụ odị anmạ ighirigiir oomo olhẹm mọ odị.” (Ps. 145:9) Loor esi iduọn aZihova aphomhoghiạn bọ we, odị raḍeenhaan ghan ni onmạ ighirigiir torobọ amem dị odị amhiịn ephigh oḍighi iduọn phọ.

5. Ika kụ idị aZizọs alhegheri bọ ilọ onmạ ighirigiir phọ aZihova?

⁵ AZizọs alegheri ni apu torobọ oye idị eḅeraạn aZihova oḍeenhaan ghan onmạ ighirigiir. Odẹ phọ r’Oọny phọ ophọn phọ urọl ghan ni epẹ k’akẹ phọ esi asimuonịr asiạ kụ aZizọs agbi bọ oru isiẹn ade phọ. (Prov. 8:30, 31) Ibadị amem aZizọs amhiịn ghan ni ipẹ Odẹ phọ odị aḍeenhaan ghan bọ onmạ ighirigiir we dị oḍighi ikarạph. (Ps. 78:37-42) Siphẹ itughemhị phọ odị, aZizọs agbor ghan ni aghaạph aghol emạ eegharạ Odẹ phọ odị ephẹn phọ.

6. Ika kụ idị aZizọs ulhoghonhaạn iyira ḍighaạgh onhaghanhạn onmạ ighirigiir Odẹ phọ odị?

⁶ Idiphọ oghaạph bọ ni siphẹ emhuoghaạph phọ eten bọ, aZizọs asighẹ ḍidogh oọny uruur phọ, kụ amaạm amiteom odọ idị eḅeraạn aZihova oḍeenhaan ghan onmạ ighirigiir. Siphẹ aḍidogh phọ, oọny phọ aḍuạ olhoghotu “kụ aliom ikpoki phọ odị uruur.” (Luk 15:13) Onyebel roten, odị akiton esi ikarạph araagharạ phọ odị, asooromhi loor, kụ aḅula olhoghotu. Odẹ phọ azọ ika? AZizọs aḅẹm mọ: “Kụ odị [oọny phọ] odi ni k’egher, kụ odẹ phọ odị amiịn nyodị, kụ amoọgh igbiririph esi odị, kụ aghiil aghị aghurughi nyodị, kụ akpụn okpo odị.” Odẹ phọ oo/folhomhi oọny phọ odị. Kparipẹ ghụn, r’onmạ ighirigiir odị asạr ri awilhenhaạn aḅilhẹ asighẹ nyodị alhọgh otu. Oọny uruur phọ apiomạn ni agey, kuolọ odẹ phọ asạr ri awilhenhaạn loor okiton phọ odị. Odẹ onmạ ighirigiir phọ siẹn aḍidogh phọ amerenyạn aZihova. Ephẹn kụ eten dị aZizọs agananami ipẹ Odẹ phọ odị aakolhobian bọ ni osạr owilhenhaạn abukarạph dị okiton k’ekpom.—Luk 15:17-24.

7. Ika kụ idị osụ olhoghi phọ aZihova amhoọgh muḅọph r’onmạ ighirigiir phọ odị?

⁷ AZihova raḍeenhaan ghan onmạ ighirigiir loor osụ olhoghi phọ odị omaạm u/lo bọ. Osụ olhoghi phọ aZihova i/ḍighi idị atuughạ kụ amhaạr. Kparipẹ ghụn, aBaibul phọ aḅẹm mọ “olegheri iyaạr phọ opọ aḍuạ bọ k’akẹ kụ aru . . . ranmạ ghan ghụn ighirigiir . . . kamuum iimuma igey iiḍighi.” (Jems. 3:17) Idiphọ odẹ r’onhiin dị omhoọgh ephomhoghiạn, aZihova alegheri ni mọ onmạ ighirigiir phọ odị rangọ ghan ni suọ nmụny phọ odị. (Ps. 103:13; Isa. 49:15) Onmạ  ighirigiir phọ k’Enhaạn rangọ ghan bidị oḍuomolhoghi etigheri e/munughan phọ abidị. Esi iduọn phọ, osụ olhoghi phọ aZihova eekunha i/lo ghan bọ ranyu ghan nyodị oḍeenhaan onmạ ighirigiir torobọ amem dị odị amhiịn ephigh oḍighi iduọn phọ. Eniin phọ amem mọ, onmạ ighirigiir phọ aZihova aaleeny aḅilhẹ amunughan. R’osụ olhoghi, odị ra/sighẹ ghan onmạ ighirigiir phọ odị bịn k’angoọm we eepoogh oḍighi yogh ilọ eḅeraạn.

8. Eeghe kụ edị rewạ ghan mọ oḍighi eeni amem, kụ eeghe kụ iḍighi?

⁸ Oḅẹm mọ ebenhẹ Enhaạn kụ alegheri bịn asoor dọl aghuḍum oḍighi yogh ghan ikarạph. Yira koḍighi ika? “ke/ḅọph oghuugh” r’odị, ipẹ kụ idị aZihova aphum otelhedom mọ Pọl ogẹ. (1 Kọr. 5:11) Oḍighinhom ikarạph dị u/meera ukiton roporogh ghan ni siẹn ookpomhoghan phọ. Ekạr emạn maạr oḍighi iduọn phọ pidị eghoph bumor r’abumarani phọ okpẹ bọ oḍuomolhoghi phọ, ḅilhẹ r’ooghironhaan eten adọl iigbia phọ aZihova. Rekparanhaạn ghan ni buniin omheeraam mọ ophorogh oye siẹn ookpomhoghan phọ eḍighi eḍeenhaan onmạ ighirigiir phọ Enhaạn. K/iduọn ḍughụm? Uguạ omhiịn.

9-10. Odaphạn Hibru 12:5, 6, uḍighi ika kụ yira koḅẹm bọ mọ ophorogh oye eḍighi eḍeenhaan onmạ ighirigiir? Gbạ.

⁹ Mem dị yira onhaghạn dị ogbeelhom mọ oye ephomhoghiạn ayira “o/ḍighi mun onyọ Ogbanhaạn AZihova,” olhoghi ayira ra/ḅaạl ghan. Yira otue ni ookia mughumọ ekạr ri ekpeanhaạn ophorogh oye phọ. Kuolọ nạ ragbi mọ ophorogh oye siẹn ookpomhoghan phọ ekạr ri eḍighi eḍeenhaan onmạ ighirigiir ḍughụm? Ii, eḍighi ni. Ophạm oḅulhemhi omhạn ilioghọm esi oye dị akpeanhaạn ni olhiọm i/ḍighi osụ olhoghi, onmạ ighirigiir, obobọ ephomhoghiạn. (Prov. 13:24) Ophorogh oye siẹn ookpomhoghan phọ ketue ni eloghonhaạn ḍighaạgh oḍighinhom ikarạph phọ onmia ḍughụm? Ii ketue ni. Ibadị dị oḍighi igbogh ikarạph umhiịn ni mọ osopha ikumor awe phọ aḍighi ni idị bidị olhoghoma loor kụ onme okarạph okol aghuḍum mọ abidị bịn oḅula esi aZihova.—Bạl Hibru 12:5, 6.

¹⁰ Ooḅeghiọn oghaạph omaaniọm. Oḅẹm mọ opoghom iyool igạ amiịn mọ oniin oyool ogạ odị o/mhoon. Kụ odị alegheri mọ orue ookonhom oyool ogạ phọ, pọ kemoghi mogbatạn siphẹ aḍita ipheriphọ iyool phọ. Kuarị bidị eḍighi inhạm dị reeḅughonhaan ghan. Bidị rewạ ghan orọl igbo ipheriphọ. Opọ u/moon bọ ka/kelhọm orọl aḍiọ odị bịn. Iduọn phọ remạ ghan mọ opoghom mọ ophọn phọ aḍighi ogbagarạ oye dị u/moọgh ogbolhomaam oyool phọ ḍughụm? Eeye. Odị alegheri ni mọ eḍighi iyaạr dị odị amheera mọ opọ u/moon bọ aaḍikuan ipheriphọ iyool phọ, ezẹgh phọ keetenheghian ni. Esi ogbatạn oyool phọ opọ u/moon bọ, odị rakoph ghan oomo phọ aḍita phọ.—Poghom Leviticus 13:3, 4.

11. (a) Ighẹn areten kụ edị oye dị ophorogh aghịgh oyool dị u/moon? (b) Ighẹn iikolhobian r’olhoghonhaạn aḍighaạgh kụ edianhaan buphẹ mophorogh bọ?

¹¹ Kotue ni omaaniọm oye dị ophorogh idiphọ oyool dị u/moon. Odị o/mhoon eten aruwaloor. (Jems. 5:14) E/moon aruwaloor eḅilhẹ ekịgh idiphọ iniin areezẹgh dị reetenheghian ghan. Kụ iḍighi kụ ewạ ni dị kogbatạn oye dị u/moon eten aruwaloor osighẹ igbo ookpomhoghan phọ. Ilioghọm mọ iphẹn phọ eḍighi eḍeenhaan ephomhoghiạn phọ aZihova amhoọgh bọ aghị esi iyool phọ Odị abuphẹ okpẹ bọ oḍuomolhoghi phọ, kụ ketue kẹn ni eḅọgh ekpom oḍighinhom ikarạph phọ bịn akiton. Oye dị ophorogh, katue ni akị ituughạ, pidị odị atue aḅilhẹ asighẹ iromhoghiom dị keḅilhẹ ekparamhị nyodị. Odị kẹn ni katue ni asighẹ rinyạ aạl aḅilhẹ apogh JW Broadcasting^®. Mem dị ikumor awe phọ omhiịn oghị aghisigh phọ odị, mem emhạn mem bidị kotue ni ongọ nyodị oromha r’iiḅakiọm olhoghonhaạn odị ḍighaạgh dị odị kaḅilhẹ amoon,  bịn oḅilhẹ omạgh nyodị oḅulhemhi idiphọ oniin onyọ Ogbaanhaạn AZihova. *

12. Eghẹn eten ephomhoghiạn r’onmạ ighirigiir kụ edị ikumor awe kotue oḍeenhaan oḍighinhom ikarạph dị u/meera ukiton?

¹² Emạn maạr agey dị yira kolegheri mọ ogina oḍighinhom ikarạph dị u/meera ukiton kụ edị roporogh ghan bọ. Loor iduọn ophọn phọ aḍighi bọ ephigh oghaạph, ikumor awe phọ olegheri mọ bidị kooḅeghiọn ni raraạr iboom kụ ogbi osopha mughumọ bidị koporogh ni oye phọ. Bidị olegheri mọ aZihova “ratuụgh ghan maliọm” kụ aliọm oye. (Jer. 30:11) Ikumor awe phọ opomhoghiạn bumor r’abumarani phọ, esi iduọn phọ bidị ro/wạ ghan oḍighi iyaạr dị k’engọ iiḅaghamhị siya abumor phọ abidị r’aZihova. Kuolọ eeni amem, bidị roḍeenhaan ghan ephomhoghiạn r’onmạ ighirigiir esi ophorogh oḍighinhom ikarạph phọ esi ekpo amem.

13. Uḍighi ika kụ ewạ bọ mọ ophorogh oniin onyọ aKristẹn epẹ Korịnt?

¹³ Ooḅeghiọn idị otelhedom mọ aPọl azoọm oniin oḍighinhom ikarạph dị u/meera ukiton siphẹ oḅẹl okuron asiạ phọ. Oniin onyọ aKristẹn epẹ Korịnt alhe ghan emhạ r’anhịr odẹ odị. P’eeghe isa! Idị egbolhomaam iphẹn phọ, aZihova aḅenhị we Izrạl iḍiodi phọ mọ: “Oye kụ aliom emhạ anhịr odẹ odị, pọ odị mamhiịn edaḅạ odẹ odị. Pọ iḅạr iyạl phọ abidị eghiigh.” (Lev. 20:11) Ii, aPọl ka/tue asoph erugh aḍuugh apume nyodị oḍighinhom ikarạph phọ. Kuolọ odị atọ aḅenhị buọ aKorịnt phọ mọ ophorogh nyodị. Adọl ipesi oye phọ opọ phọ itir ri bunhọn siphẹ ookpomhoghan phọ, dị tutụ abuniin u/loghoma mun umugholoor ilọ ipẹ phọ!—1 Kọr. 5:1, 2, 13.

14. Ika kụ idị aPọl aḍeenhaan onmạ ighirigiir oye olọ aKorịnt phọ ophorogh bọ, kụ eeghe kụ iḍighi? (2 Korịnt 2:5-8, 11)

¹⁴ Onyebel roten, aPọl amhiịn ni onmia. Oḍighinhom ikarạph phọ makạr akiton! Ii, ghalhamọ r’iduọn odị asiphe bọ ni umugholoor ookpomhoghan phọ, aPọl o/wạ dị ikumor awe phọ koliọm nyodị “opeele.” Odị aḅenhị bidị mọ: “Isạr bịn ewilenaạn ekparamị ghan oIoghi odị.” Miịn ephigh phọ aPọl atụ bọ kụ aḅenhị bidị: “Obọ ologhi phọ odị kagurọgh ghan bọ nyodị akiigh.” APọl aseenyạn ni oḍighinhom ikarạph phọ makiton bọ. Odị o/wạ dị oye phọ kakiriri bịn aḅonyonhu azuan esi ipẹ odị aḍighi bọ, bịn awilhẹ owạ osạr owilhenhaạn.—Bạl 2 Korịnt 2:5-8, 11.

15. Ika kụ idị ikumor awe phọ roliọm ghan koḅilhẹ oḍeenhaan onmạ ighirigiir mem lọ ekpeanhaạn?

¹⁵ Esi otuughaạny aZihova, reḅeraạn ghan ni ikumor awe phọ oḍeenhaan onmạ ighirigiir. Bidị  ro/bilhẹ ghan oliọm mem lọ ekpeanhaạn, kuolọ roḍeenhaan ghan ni onmạ ighirigiir lọ edugh ni mem dị omhiịn ephigh otuạn oḍighi iduọn phọ. Iduọn kụ i/lo, pọ ke/ḍighi onmạ ighirigiir kuolọ keḍeenhaan mọ bidị ongọ ogẹl ekarạph eḍighinhom iyaạr siphẹ ookpomhoghan phọ. Ikumor awe phọ bịn kụ ogina awe dị koḍeenhaan ghan onmạ ighirigiir ḍughụm?

16. Odaphạn Proverbs 21:13, ika kụ idị aZihova ramegheron ghan k’aghị esi abuphẹ ro/ḍeenhaan ghan bọ onmạ ighirigiir?

¹⁶ Oomo aKristẹn rowạ ghan otuughaạny onmạ ighirigiir phọ aZihova. Eeghe kụ iḍighi? Eniin ephigh phọ pọ, aZihova ka/naghạn iiḅereghị awe dị ro/ḍeenhaan ghan bunhọn onmạ ighirigiir. (Bạl Proverbs 21:13.) Onyọ ayira o/lho dị kawạ mọ aZihova ku/naghạn iiḅereghị odị, esi iduọn phọ yira rokel ghan ni omhoọgh egbagarạ ekpom. Kparipẹ roḅitonhaạn onyọ aKristẹn dị odi esi eephinha, yira ookolhobian ni “onhaghạn emoghi” odị. Yira olọgh kẹn ni elhegh ipẹ aḍinyạ iigbia phọ eḅẹm bọ mọ: “Oye lọ ra/nmạ ghan bunọn ighirigiir, mem iiruẹn phọ Enaạn nyodị ighirigiir ke/nmạ.” (Jems. 2:13) Eḍighi maạr dị r’osooromhi aloor kụ yira olhọgh ni elhegh mọ yira omoghi aani ni onmạ ighirigiir, pọ kinyu ni iyira oḍeenhaan onmạ ighirigiir. Ewạ ni oḍighi iduọn phọ ekạr ekpaariọm mem dị oḍighinhom ikarạph kụ akiton aḅilhẹ aḅulha siẹn ookpomhoghan phọ.

17. Ika kụ idị Uw-emhạ phọ Devid aḍeenhaan onmạ ighirigiir k’ekpom?

¹⁷ Areḍeenhaan aBaibul ketue ni ilhoghonhaạn iyira ḍighaạgh oḍeenhaan ghan onmạ ighirigiir r’oghel ozọ ghan egbagarạ eten. Esi omaạm, ooḅeghiọn eḍeenhaan Uw-emhạ phọ Devid. Odị agbor ghan ni aḍeenhaan onmạ ighirigiir k’epẹ ekpom mọ. Ghalhamọ r’iduọn aSọl awạ ghan bọ ni oghiigh odị, aDevid aḍeenhaan ni onmạ ighirigiir aghị esi uw-emhạ phọ aZihova kụ asagharạn bọ. R’amem r’amem odị o/wạ obulhemhian.—1 Sam. 24:9-12, 18, 19.

18-19. Ighẹn iyạl amem kụ edị aDevid u/ḍeenhaan onmạ ighirigiir?

¹⁸ Toroboiperolbọ, k/oomo amem kụ edị aDevid aḍeenhaan ghan onmạ ighirigiir. Esi omaạm, mem mọ aNabal ogbagarạ oye phọ aḅaanhaạn bọ nyodị r’e/lọgh eegu ḅilhẹ u/meera bọ ungọ eḍien we phọ odị, ighạgh ni olhoghi aDevid kụ odị asopha oghị oghiigh aNabal r’ozẹ oomo alhephiri anmụny eghunotu phọ odị. Abigail anhịr phọ aNabal amhoọgh bọ okparạm kụ mu/lo bọ, obọ aDevid mazu iḅaạl.—1 Sam. 25:9-22, 32-35.

¹⁹ Enhọn amem oyil phọ aNathan aḅenhị ni Devid ilọ oolhạ dị aziton aạr oyool ogạ onyọ amatuman odị. R’oghạgh olhoghi, aDevid amhegheron mọ: “Mị akunya r’aZihova opọ odi ghan bọ bịn, oye phọ opọ aḍighi bọ iphẹn phọ akpẹ omhugh!” (2 Sam. 12:1-6) ADevid alhegheri ni Olhogh phọ aMozis. Oye dị amhi oyool ogạ kakpẹ apeele inya amem. (Ex. 22:1) Kuolọ ipẹ phọ erugh aḍuugh ḍughụm? Iphẹn aDevid asophonhaan bọ oolhạ phọ ikạr kụ eḍighi igbagarạ iiruẹn. Iyaạr phọ enhighẹ bọ pọ, iḍighi ḍidogh dị aNathan adogh omạ omiteom ogbogh opiomạn dị eeph ni iboom—dị odị aDevid r’aloor apiomạn! AZihova aḍeenhaan ni onmạ ighirigiir Devid dị epelhom ipẹ odị  muḍeenhaan bọ oye phọ aziton bọ aạr oyool ogạ onyọ amatuman phọ odị!—2 Sam. 12:7-13.

20. Eḍeenhaan phọ aDevid itughemhị iyira eeghe?

²⁰ Lọgh elhegh mọ r’oghạgh olhoghi aDevid asoph mọ aNabal r’oomo alhephiri eghunotu phọ odị okpẹ omhugh. Kụ enhọn pọ, aDevid anyạ ni osoph mọ oye phọ siphẹ aḍidogh phọ aNathan akpẹ omhugh. Siẹn omhunhenhiom iyạl phọ, yira otue ni opuru mọ eeghe kụ iḍighi kụ aDevid phọ amhaạr bọ ni onmạ ighirigiir kasoph bọ ogbagarạ ooruẹn dị arọl iduọn. Ooḅeghiọn sidọl phọ ekitonhom bọ. Mem mọ amuphẹ phọ, aDevid amhoọgh ooruẹn olhoghi dị ragurọgh nyodị. Eegharạ osophonhaan ghan awe ogbagarạ ooruẹn i/ḍighi eḍeenhaan oye dị amhoọgh igey asiya r’aZihova. Okạr oghaạph, dị egbạgh r’iphẹn phọ, aZizọs aphụr rurụ budaphạm mọ odị mọ: “Kee/gboonaan iiruẹn bunọn, obọ Enaạn kiigboonaan aani inyina. Ipẹ nyina keegboonaan bọ bunọn kụ idị Enaạn kiigboonaan aani ni inyina.” (Mat. 7:1, 2) Esi iduọn phọ ogona loor ku/zọ ghan egbagarạ eten, okparaghạ ghan omhoọgh “oboom onmạ ighirigiir,” idiphọ Enhaạn phọ ayira.

21-22. Ighẹn kụ areten oḍighi oḍeenhaan onmạ ighirigiir?

²¹ Onmạ ighirigiir apelhom ni oḅẹm mọ olhoghoma bịn. Okạr oghaạph, ogbạ onmạ ighirigiir idiphọ “oḍighi oḍeenhaan igbiririph.” Esi iduọn phọ, torobọ onyọ ayira katue ni apogh we dị omhoghi olhoghonhaạn aḍighaạgh siphẹ eghunotu phọ, siphẹ ookpomhoghan phọ, ḅilhẹ r’isiphẹ emhạ phọ ayira. Okạr oghaạph ibadị aroopoogh oḍeenhaan onmạ ighirigiir edi ni! Yira otue ni oodereghị oye dị ewạ mọ ongọ iidereghị. Yira otue ni ongọ aani oye eḍien obobọ oḍighinhaan oye iyaạr. Eeni kẹn ni kemoghi ni dị yira koodereghị oye dị purukụ omhạgh oḅulhemhi siẹn ookpomhoghan phọ oḅilhẹ ooḅughonhaan r’odị. Yira otue kẹn ni okaạph dom iidereghị oghaạph iiḅi iinhaghạn phọ oḅenhị bunhọn. Iphẹn phọ eḍighi iniin imạ areten dị yira kotue oḍeenhaan onmạ ighirigiir torobọ oye dị yira oozuanhaan.—Job 29:12, 13; Rom. 10:14, 15; Jems. 1:27.

²² Eḍighi maạr dị yira olhọgh ghan elhegh mọ abuniin awe omoghi ni olhoghonhaạn aḍighaạgh, pọ yira komiịn ghan ni ibadị aroopoogh oḍeenhaan onmạ ighirigiir. Mem dị yira oḍeenhaan bunhọn onmạ ighirigiir, p’eeghe idị yira koḅeraạn Odẹ k’akẹ phọ ayira, Enhaạn “oboom onmạ ighirigiir”!