EMHUOGHAẠPH ITUUGHẠ PHỌ 39
Aḍien Anạ Edi Aani Ni Siphẹ “Aḍinyạ Aghuḍum Mọ”?
Aḍinyạ ootughianhạm irọl li risigh aZihova dị ogẹ ilọ abuphẹ rokiilhaan bọ nyodị.”—MAL. 3:16.
AḌUỌR PHỌ 61 Forward, You Witnesses!
OGHAẠPH OOKARAGH *
Emhiigh k’aḍio phọ, aZihova ragẹ ni siḍien awe kalhọgh siphẹ “aḍinyạ aghuḍum mọ” (Miịn siikpịgh phọ 1-2)
1. Odaphạn Malachi 3:16, eeghe aḍinyạ kụ edị aZihova ragẹ ghan, kụ epamanhạm eeghe?
ESI asimuonịr asiạ, aZihova apạm ni oḍighi ogẹ aḍinyạ dị egbatanhaạn. Aḍinyạ phọ aḍiẹn phọ epamanhạm sikoọl asiḍien, emhiigh ḍien oḅẹl oye phọ akpẹ bọ oḍuomolhoghi phọ, Ebel. * (Luk 11:50, 51) Emhiigh k’amem mọ amuphẹ phọ, aZihova maḅarạm ni inhọn asiḍien siphẹ aḍinyạ phọ, kụ k’arodon odị magẹ ni irubal asiḍien. Siphẹ aBaibul phọ, aḍinyạ phọ aḍiẹn phọ okol mọ, “aḍinyạ ootughianhạm,” “aḍinyạ aghuḍum,” ḅilhẹ ‘r’aḍikpoghinheen aḍinyạ aghuḍum.’ Kuolọ siẹn emhuoghaạph phọ ephẹn phọ, yira kokaạph ghan ilọ aḍinyạ phọ idiphọ “aḍinyạ aghuḍum.”—Bạl Malachi 3:16; Ogan. 3:5; 17:8.
2. Asiḍien abuọ anhiạn kụ edi bọ siphẹ aḍinyạ aghuḍum mọ, kụ yira koḍighi ika kụ ogẹ aani ḍiọ ayira?
2 Aḍinyạ phọ aḍiẹn egbatanhaạn bọ epamanhạm siḍien oomo abuphẹ rooseeny bọ aZihova r’oghiilhaan, obobọ r’olhọgh eegu, kụ oḅilhẹ bọ ophomhoghiạn ḍien phọ odị. Bidị komoọgh eepoogh omhoọgh aghuḍum k’agee-pọ. Rodon yira kotue ni otọl idị kogẹ aani ḍien ayira siphẹ aḍinyạ phọ aḍiẹn phọ, eḍighi maạr dị yira omhoọgh mugey amasian r’aZihova, dị eego esi ekiạ etagharạn Oọny phọ odị, Zizọs Kraist. (Jọn 3:16, 36) Oomo ayira rowạ ni dị aḍien ayira ketọl aani siphẹ aḍinyạ phọ—mughumọ yira omoọgh oḍuomolhoghi ogheel k’akẹ obobọ siẹn ade phọ.
3-4. (a) Yira komoọgh ni eepoogh orọl bịn k’agee-pọ lọ aḍien ayira edi ni siphẹ aḍinyạ aghuḍum mọ nyiidiphọ ḍughụm? Gbạ. (b) Yira kooḅeghiọn eeghe siẹn emhuoghaạph phọ ephẹn phọ r’epẹ otum bọ siẹn?
3 Iphẹn phọ remạ ghan mọ torobọ oye dị ogẹ aani ḍien odị siphẹ aḍinyạ aghuḍum mọ kamoọgh ghuḍum k’agee-pọ ḍughụm? Yira komiịn ophagharanhaạn aḍipuru phọ aḍiphẹ phọ esi ikpo onhụ phọ ipẹ aZihova aḅenhị bọ Mozis, ogẹ bọ siphẹ Exodus 32:33. AZihova aḅẹm mọ: “Torobọ oye dị aḍighi ikarạph aru esi amhị, mị kagbuurogh ni ḍien odị siphẹ aḍinyạ phọ amhị.” Iduọn phọ pọ, asiḍien dị edi siphẹ aḍinyạ aghuḍum mọ nyiidiphọ kotue ni oḅilhẹ ogbuurogh. Enighẹ oḅẹm mọ aZihova apụr ageọm pensụl. (Ogan. 3:5) Ewạ mọ orọl idị kogeọm ḍien ayira iyaạr dị ko/tue mun ogbuurogh, idiphọ iki.
4 Oghaạph phọ ophọn phọ amiteom ni sipuru. Esi omaạm, aBaibul phọ akaạph eeghe ilọ abuphẹ ogẹ bọ siḍien abidị siphẹ aḍinyạ aghuḍum mọ ḅilhẹ kẹn r’ilọ abuphẹ u/gẹ bọ r’ogẹ? Pụr amem kụ edị abuphẹ asiḍien phọ edi bọ siphẹ aḍinyạ aghuḍum mọ komoọgh ghuḍum k’agee-pọ? Kokaạph aani ika ilọ abuphẹ u/moọgh aani bọ eepoogh olhegheri aZihova kụ ogbi bọ omhugh phọ? Ketue ni edugh dị kogẹ aani siḍien abidị siẹn aḍinyạ phọ aḍiẹn phọ ḍughụm? Kopanyanhaạn sipuru phọ iphẹn phọ siẹn emhuoghaạph phọ ephẹn phọ ḅilhẹ r’epẹ etum bọ siẹn.
ASIḌIEN ABUỌ ANHIẠN KỤ EDI BỌ SIPHẸ AḌINYẠ PHỌ?
5-6. (a) Odaphạn Filipai 4:3, asiḍien abuọ anhiạn kụ edi aani siphẹ aḍinyạ aghuḍum mọ? (b) Pụr amem kụ edị kokạr bọ ogẹ siḍien abidị eten dị ko/tue mun ogbuurogh?
5 Asiḍien abuọ anhiạn kụ edị ogẹ bọ siphẹ aḍinyạ phọ oghaạph bọ omaaniọm? Orue ophagharanhaạn aḍipuru phọ aḍiphẹ phọ, yira kooḅeghiọn oogh arugu awe. Igbo abuẹn phọ, asiḍien abuniin edi ni siphẹ aḍinyạ aghuḍum mọ, asiḍien abuniin i/lo.
6 Eḅẹl egu phọ pọ, abuphẹ mosaḅạr bọ oghị otooghị r’aZizọs epẹ k’akẹ. Asiḍien abidị edi ni siphẹ aḍinyạ aghuḍum mọ nyiidiphọ ḍughụm? Ii. Odaphạn ikpo onhụ phọ otelhedom mọ aPọl aḅenhị bọ buphẹ r’odị oḅọph bọ rukumuan phọ, epẹ Filipai, asiḍien abuphẹ mosagharạn bọ uwaloor iigbia phọ, momhạgh bọ oghị otooghị r’aZizọs, edi ni siphẹ aḍinyạ aghuḍum mọ nyiidiphọ. (Bạl Filipai 4:3.) Kuolọ, omhiịn mọ asiḍien abidị etọl li pạ phọ, pọ ewạ mọ bidị ophamhanhạm omheeraam mọ abidị k’epẹ eekunha phọ. Eḍighi maạr dị bidị ophamhanhạm ni omheeraam mọ abidị tutụ k’aḍuugh obobọ tutụ k’amem dị igbogh iiḅaghamhị phọ kemiigh, pọ kogẹ siḍien abidị siphẹ aḍinyạ phọ eten dị ko/tue ogbuurogh.—Ogan. 7:3.
7. Yira onaghanhạn ika Ogananami 7:16, 17 ilọ amem mọ kogẹ bọ siḍien aḍigbogh aḍita phọ eten dị ko/tue mun ogbuurogh siphẹ aḍinyạ aghuḍum mọ?
7 Omhunhenhiom iyạl egu phọ eḅaramaạm ḍigbogh aḍita abueriphọ iyool phọ. Asiḍien abidị edi aani ni siphẹ aḍinyạ aghuḍum mọ nyiidiphọ ḍughụm? Ii. Kụ asiḍien abidị ketọl li siphẹ aḍinyạ aghuḍum mọ mem dị bidị okpetenhaan Amagedọn ḍughụm? Ii. (Ogan. 7:14) AZizọs aḅẹm mọ, buphẹ phọ oghịgh bọ iyool phọ “koḍigh esi aghuḍum dị eekuna i/lo.” (Mat. 25:46) Kuolọ buphẹ kokpetenhaan bọ Amagedọn ko/moọgh ghuḍum k’agee-pọ mem mem mọ. Enighẹ oḅẹm mọ ogeọm siḍien abidị pensụl siphẹ aḍinyạ aghuḍum mọ. Mem Itooghị Oniin Oonịr Asiạ phọ, aZizọs kaḍighi opoghom abidị “kụ atorori bidị ateenyẹ ruunụ adir dị amuụm aghuḍum rakil.” Abuphẹ komegheron bọ egey eten okị esi iiḅakiọm mọ aKraist kụ edị kokạr bọ osophonhaan ooruẹn idiphọ awe dị ophamhanhạm dọl dị ekpẹ oḍuomolhoghi oghị esi aZihova, kụ oḅilhẹ ogẹ siḍien abidị eten dị ko/tue mun ogbuurogh siphẹ aḍinyạ aghuḍum mọ.—Bạl Ogananami 7:16, 17.
8. Asiḍien abuọ anhiạn kụ edị i/lo aani siphẹ aḍinyạ aghuḍum mọ, kụ eeghe kụ kemitenhaan bidị?
8 Omhunhenhiom iraạr egu phọ eḅaramaạm atụ igạ phọ, buphẹ kopiemhi bọ siphẹ Amagedọn. Asiḍien abidị i/lo aani siphẹ aḍinyạ aghuḍum mọ. AZizọs aḅẹm mọ, “buẹn ko/ḍuạ esi iminimiịn dị eekuna i/lo.” (Mat. 25:46) Uwaloor iigbia phọ aphum ni otelhedom mọ aPọl kụ aḅẹm mọ, “bidị komiinọm iminimiịn amuphe dị eekuna i/lo.” (2 Tẹs. 1:9; 2 Pit. 2:9) Iniin phọ kẹn kụ edị edianhaan buphẹ k’aḍio phọ okạr bọ olhegheri kụ roḍighi ghan ikarạph koghị esi uwaloor iigbia phọ. Bidị phọ kẹn kosoman aani ni muphe dị eekunha i/lo, ka/ghuḍum k’agee-pọ. Eegholhaan ni, ko/ḅerion aani bidị. (Mat. 12:32; Mạk 3:28, 29; Hib. 6:4-6) Uguạ, okiririom ophogh iyạl egu awe dị koḅerion siẹn ade phọ.
BUPHẸ KOḄERION BỌ
9. Odaphạn Iiḍighi 24:15, ighẹn iyạl egu awe kụ edị koḅerion siẹn ade phọ, kụ eeghe kụ ogbaranhaạn iyạl egu phọ?
9 ABaibul phọ akaạph ilọ iyạl egu awe dị koḅerion r’oḍuomolhoghi orọl isiẹn ade phọ k’agee-pọ, ‘abuọ elhiom eḍighinhom iyaạr phọ’ ‘r’abuọ ekeeny eḍighinhom iyaạr phọ.’ (Bạl Iiḍighi 24:15.) ‘Abuọ elhiom eḍighinhom iyaạr phọ,’ pọ abuphẹ okumu bọ aZihova eten dị ekpẹ oḍuomolhoghi mem mọ bidị odi bọ r’ighuḍum. Kụ ‘abuọ ekeeny eḍighinhom iyaạr phọ,’ pọ abuphẹ u/kumu bọ aZihova. Okạr oghaạph, ibadị amem aroozọ phọ abidị i/ḍighi ghan elhiom. Koḅerion bọ ni iyạl phọ egu phọ, yira kotue ni oḅẹm mọ ogẹ aani ni asiḍien abidị siphẹ aḍinyạ aghuḍum mọ ḍughụm? Orue ophagharanhaạn aḍipuru phọ aḍiphẹ phọ, pọ ooḅeghiọn ilọ egu etum egu.
10. Uḍighi ika kụ koḅerion bọ ‘buọ elhiom eḍighinhom iyaạr phọ,’ kụ eghẹn eepoogh kụ edị abuniin kokelhọm? (Miịn igbe phọ “Asipuru Dị Abuẹn Robạl Ghan Bọ Rinyạ Phọ Ayira Opuru” idị egbolhomaam oḅerion awe phọ siẹn ade phọ.)
10 ‘Abuọ elhiom eḍighinhom iyaạr phọ’ kụ omhunhenhiom inya egu phọ. Tutụ bidị komugh bọ, ugẹ ni siḍien abidị siphẹ aḍinyạ aghuḍum mọ. Nạ ragbi mọ ugbuurogh ni siḍien abidị mem mọ bidị omhugh bọ ḍughụm? Eeye, loor esi dị, esi aZihova bidị odi ni ropooghu. AZihova “Enaạn abuphẹ odi bọ, k/elọ abuphẹ momuughu bọ.” (Luk 20:38) Iphẹn phọ remạ ghan mọ mem dị oḅerion buọ elhiom eḍighinhom iyaạr phọ oḅulhemhi siẹn ade phọ, komiịn ni siḍien phọ abidị siphẹ aḍinyạ aghuḍum k’agee-pọ phọ, kuolọ enighẹ oḅẹm mọ ogeọm “pensụl.” (Luk 14:14) Iikia i/lo, abuniin abuẹn phọ koḅerion bọ komoọgh ni eepoogh okumuan idiphọ “Anmụny k’araalhạ oomo isiẹn ade phọ.”—Ps. 45:16.
11. Eeghe kụ edị ewạ dị ‘abuọ ekeeny eḍighinhom iyaạr phọ’ kotuughạ pidị asiḍien abidị eḍigh aani siphẹ aḍinyạ aghuḍum mọ?
11 Okureriom, ooḅeghiọn omhunhenhiom oogh egu phọ, ‘abuọ ekeeny eḍighinhom iyaạr phọ.’ Eeni loor iduọn bidị u/legheri bọ iilhogh phọ aZihova, bidị u/tọl dọl elhiom eḍighinhom iyaạr kụ ogbi bọ omhugh phọ. Esi iduọn phọ, asiḍien abidị i/lo aani siphẹ aḍinyạ aghuḍum mọ. Kuolọ esi oḅerion abidị, Enhaạn kangọ bidị eepoogh dị aḍien abidị keḍigh aani siphẹ aḍinyạ aghuḍum mọ. ‘Abuọ ekeeny eḍighinhom iyaạr phọ’ abuẹn phọ komoghi ni oboom olhoghonhaạn aḍighaạgh. Kụ bidị ogbi bọ omhugh phọ, abuniin abidị uḍighi yogh ghan raraạr dị eeph elhoghorị. Esi iduọn phọ, kemoghi ni dị kotughemhị bidị ilọ orọl idị emhoọgh muḅọph r’asiigbu elhiom eḍighinhom iyaạr phọ aZihova. Orue osianhaan, Omhạr phọ Enhaạn kangọ ni itọ dị kopạm ogbogh oḍighi itughemhị dị k”erọl ghan esi iphirigba omhạr awe.
12. (a) Abuọ anhiạn kụ kotughemhị bọ buọ ekeeny eḍighinhom iyaạr phọ? (b) Eeghe kụ kemitenhaan buphẹ u/meera bọ udaphạn itughemhị phọ?
12 Abuọ anhiạn kụ kotughemhị bọ buọ ekeeny eḍighinhom iyaạr phọ? Aḍigbogh aḍita phọ r’abuọ elhiom eḍighinhom iyaạr phọ abuphẹ koḅerion bọ. Omhiịn mọ ogẹ aani ni siḍien abuọ ekeeny eḍighinhom iyaạr phọ, kemoghi ni dị bidị komoọgh siya r’aZihova kụ oḅilhẹ oḅọgh siloor abidị ongọ nyodị. AZizọs Kraist r’abuẹn kotooghị bọ r’odị kotọl epẹ k’akẹ phọ kụ omaạr opogh ipẹ abuọ ekeeny eḍighinhom iyaạr phọ romegheron bọ koghị esi itughemhị phọ. (Ogan. 20:4) Onyọ abidị dị u/megheron agey ukị esi itughemhị phọ kotuphuron ni otoph—ghalhamọ mamhạn ni 100 asiạ. (Isa. 65:20) AZihova r’aZizọs kotue ni obạl rokpom, esi iduọn phọ bidị ko/wạ oye dị katọl siẹn ade phọ aḅilhẹ akomhọgh iiḅaghamhị.—Isa. 11:9; 60:18; 65:25; Jọn 2:25.
OḄERION ONGỌ AGHUḌUM R’OḄERION OSOPHONHAAN IIRUẸN
13-14. (a) Epẹ omhạn yira unhaghanhạn ika ikpo onhụ phọ aZizọs edi bọ siphẹ Jọn 5:29? (b) Ewạ mọ olhọgh elhegh eeghe ilọ ikpo onhụ phọ ipẹ phọ?
13 AZizọs aḅilhẹ ni kẹn aghaạph ilọ abuphẹ koḅerion bọ siẹn ade phọ. Esi omaạm, Odị aḅẹm mọ: “Amem retu ni, dị buphẹ odi bọ pạ iiḍi phọ konaghanạn ni eḍọgh phọ kụ oḍuạ siphẹ iiḍi phọ abidị omiteghu. Buphẹ moḍighi ghan bọ igey phọ koḅerion ni omoọgh ghuḍum, kụ buphẹ moḍighi ghan bọ ikarạph phọ koḅerion ni kụ osoph iiruẹn opume.” (Jọn 5:28, 29) AZizọs rakaạph ghan eeghe siẹn phọ?
14 Epẹ omhạn, yira unhaghanhạn mọ ikpo onhụ phọ aZizọs remạ ghan iiḍighi phọ ipẹ abuphẹ moḅerion bọ koḍighi bọ mem mọ koḅerion bọ bidị; iduọn phọ pọ, mọ abuniin abuphẹ koḅerion bọ koḍighi ghan igey kụ abunhọn dị koḅerion oḍighi ghan ikarạph araraạr. Kuolọ, lọgh elhegh mọ aZizọs o/ḅẹm mọ buphẹ purukụ oḅerion bọ siphe iiḍi phọ abidị koḍighi ghan igey araraạr obobọ koḍighi ghan ikarạph araraạr. Odị aḍighinhom ikpo onhụ dị remạ ghan mọ moḍighi eten. Odị aghaạph ilọ abuphẹ “moḍighi ghan bọ igey” araraạr r’abuphẹ “moḍighi ghan bọ ikarạph” araraạr. Ikpo onhụ phọ iphẹn phọ eḍeenhaan mọ ipẹ aZizọs aghaạph bọ remạ ghan iiḍighi phọ bidị oḍighi bọ kụ ogbi bọ omhugh phọ. Eegholhaan ni, ki/diphọ? Loor esi dị, ko/meera mun mọ oye arọl siphẹ omhoom aḅirinhi phọ aḍighi yogh ikarạph. Abuọ ekeeny eḍighinhom iyaạr phọ uḍighi yogh ghan ikarạph kụ ogbi bọ omhugh. Kụ ikpo onhụ phọ aZizọs ilọ ‘oḅerion omoọgh aghuḍum’ ḅilhẹ ‘r’oḅerion osoph iiruẹn opume’ remạ ghan eeghe?
15. Abuọ anhiạn kụ edị koḅerion bọ ongọ ghuḍum, kụ eeghe kụ iḍighi?
15 Abuọ elhiom eḍighinhom iyaạr phọ abuphẹ oḍighi ghan bọ igey kụ ogbi bọ omhugh phọ “koḅerion ni omoọgh ghuḍum,” loor esi dị asiḍien abidị edi ni siphẹ aḍinyạ aghuḍum mọ. Iphẹn phọ remạ ghan mọ oḅerion abuọ elhiom eḍighinhom iyaạr phọ “moḍighi ghan bọ igey phọ” oghaạph bọ siphẹ Jọn 5:29 eḍighi ni r’iniin phọ r’abuọ elhiom eḍighinhom iyaạr phọ abuphẹ oghaạph bọ oghol siphẹ Iiḍighi 24:15. Onhaghạn aḍughụm mọ ophọn phọ amoọgh muḅọph r’ipẹ edi bọ siphẹ Rom 6:7, eḅẹm bọ mọ: “Oye phọ romugh bịn makpetenaan iikpọ phọ ikarạph emoọgh bọ.” Ikarạph phọ abuọ elhiom eḍighinhom iyaạr phọ oḍighi bọ mem mọ bidị odi bọ ugbuurogh mem mọ bidị omhugh bọ, kuolọ u/gbuurogh aani iiḍighi elhiom eḍighinhom iyaạr phọ abidị. (Hib. 6:10) Toroboiperolbọ, kewạ dị abuọ elhiom eḍighinhom iyaạr phọ koḅerion bọ kopamanhạm dọl dị ekpẹ oḍuomolhoghi pidị asiḍien abidị ekiọm ghisigh etọl siphẹ aḍinyạ aghuḍum mọ.
16. Oḅerion kụ “osoph iiruẹn opume” remạ ghan eeghe?
16 Kokaạph ika ilọ abuphẹ oḍighi yogh ghan bọ ikarạph kụ ogbi bọ omhugh phọ? Ghalhamọ r’iduọn mogbuurogh bọ ni ikarạph phọ abidị mem mọ bidị omhugh bọ, bidị uḍighi yogh ghan ikarạph araraạr mem mọ bidị odi bọ ni. Esi iduọn phọ, siḍien abidị u/gẹ aani siphẹ aḍinyạ aghuḍum mọ. Toroboiperolbọ, oḅerion abuphẹ “moḍighi ghan bọ ikarạph phọ” iniin phọ r’oḅerion ‘abuọ ekeeny eḍighinhom iyaạr phọ’ oghaạph bọ oghol siphẹ Iiḍighi 24:15. Ophọn abidị kụ aḍighi oḅerenhu esi aḍuugh dị aḅarạm “osoph iiruẹn” ongọ. * Osoph iiruẹn ongọ abuọ ekeeny eḍighinhom iyaạr phọ remạ ghan mọ kokiririom ni oḅilhẹ ooḅeghiọn bidị opogh. (Luk 22:30) Kesighẹ ni mem kụ ogbi olhegheri mughumọ ekpeanhaạn ni dị kogẹ aani siḍien abidị siphẹ aḍinyạ aghuḍum mọ. Ogina amem dị abuọ ekeeny eḍighinhom iyaạr phọ oghel ogbaany okol aghuḍum mọ abidị kụ oḅọgh siloor abidị ongọ aZihova bịn kụ edị kotue ogẹ aani siḍien abidị siphẹ aḍinyạ aghuḍum mọ.
17-18. Kewạ mọ oomo abuphẹ koḅerion bọ ongọ ghuḍum siẹn ade phọ koḍighi eeghe, kụ eeghe kụ “iiḍighi” phọ oghaạph bọ oghol siphẹ Ogananami 20:12, 13?
17 Mughumọ yira uḍighi ghan we elhiom eḍighinhom iyaạr obobọ buọ ekeeny eḍighinhom iyaạr, buphẹ koḅerion bọ kewạ dị bidị konaghanhạn ghan iilhogh phọ Enhaạn ketọl bọ siphẹ aḍimhoom aḍikpooghinheen aḍinyạ phọ mem itooghị 1,000 asiạ phọ. Otelhedom mọ aJọn aghaạph ipẹ odị amhiịn bọ siphẹ uḍien phọ mọ: “Kụ mị amiịn buphẹ momuughu bọ, bubạm r’abugbogh, dị omereghạ ghisigh agadạ odaạm emạ phọ. Ukpenyon ni rinyạ kụ oḅilẹ okpegheron ḍinọn aḍinyạ, ḍiphẹ abuphẹ odi bọ. Ugẹ ni iiḍighi abuphẹ momuughu bọ siphẹ arinyạ phọ. Udạph ni iphẹn phọ kụ oogboonaan bọ bidị iiruẹn phọ.”—Ogan. 20:12, 13.
18 Kodaphạn ighẹn “iiḍighi” kụ osoph bọ iiruẹn ongọ buphẹ koḅerion bọ? Keḍighi ipẹ bidị oḍighi bọ kụ ogbi bọ omhugh ḍughụm? Eeye! Tuutughiạn, mogbuurogh ikarạph phọ abidị mem mọ bidị omhugh bọ. Esi iduọn phọ, “iiḍighi” phọ abidị ke/tue eḍighi iiḍighi akugbaany aghuḍum mọ abidị. Kparipẹ ghụn, eḍighi ilọ ipẹ bidị omhegheron bọ oghị esi itughemhị phọ, siphẹ omhoom aḅirinhi phọ. Ghalhamọ r’awe phọ okpẹ bọ oḍuomolhoghi idiphọ aNoa, Samuel, Devid, ḅilhẹ r’aDaniel bịn kotuughạ ni ilọ aZizọs Kraist oḅilhẹ omoọgh omheeraam okị esi ekiạ etagharạn phọ odị. Kụ aghiọm nuụn olhoghi buọ ekeeny eḍighinhom iyaạr phọ!
19. Eeghe kụ kemitenhaan buphẹ oghel bọ eekiạ eepoogh phọ ephẹn phọ?
19 Eeghe kụ kemitenhaan buphẹ kokel bọ eekiạ phọ eepoogh phọ ephẹn phọ? Ogananami 20:15 iḅenhị iyira mọ: “Uroph aani ni torobọ oye lọ ḍien odị u/gẹ aani siphẹ aḍinyạ abuphẹ odi bọ osumeeny oodụ aniạn phọ.” Ii, kokạr bịn kụ opiemhi bidị k’agee-pọ. P’eeghe idị emhạn maạr oḍighi oomo ilọ yira kotue omhiịn mọ ogẹ aani ni ḍien ayira siphẹ aḍinyạ aghuḍum mọ kụ eḅilhẹ otọl siphẹ phọ!
Onyọ umor dị r’apinom aani bin ogbogh oḍighi itughemhị phọ katọl bọ siphẹ Itooghị Oniin Oonịr Asiạ phọ (Miịn ekpịgh phọ 20)
20. Eeghe ookiạ oḍighi kụ edị koḍighi mem Itooghị Oniin Oonịr Asiạ phọ? (Miịn afoto oḅẹl opoḍi phọ.)
20 P’eeghe amuukiạ amem dị Itooghị Oniin Oonịr Asiạ phọ keḍighi! Ogbogh oḍighi itughemhị katọl li mem mọ amuphẹ phọ siẹn ade phọ. Kuolọ, amem mọ amuphẹ phọ keḍighi kẹn mem dị kooḅeghiọn roozọ abuọ elhiom eḍighinhom iyaạr phọ r’abuọ ekeeny eḍighinhom iyaạr phọ. (Isa. 26:9; Iiḍighi 17:31) Kopạm bọ ika oḍighi itughemhị phọ katọl bọ? Emhuoghaạph phọ etum bọ siẹn kilhoghonhaạn ni iyira ḍighaạgh onhaghanhạn kụ oḅilhẹ osereghiạn imạ phọ iphẹn phọ kemite bọ.
AḌUỌR PHỌ 147 Life Everlasting Is Promised
^ Emhuoghaạph phọ ephẹn phọ eeḅenion onhaghạn aḍughụm mọ ayira ilọ ikpo onhụ phọ aZizọs edi bọ Jọn 5:28, 29, eghaạph bọ idị egbolhomaam ‘oḅerion omoọgh aghuḍum’ ḅilhẹ ‘r’oḅerion osoph iiruẹn ophume.’ Yira kolegheri iyaạr phọ iyạl phọ oḅerion aḍuugh phọ ophọn phọ remạ ghan ḅilhẹ r’odọ awe phọ koḅerion bọ.
^ Enhaạn amhiigh ogẹ aḍinyạ phọ aḍiẹn phọ “k’eḅẹl egbiom aḅirini phọ,” iduọn phọ pọ, eḅẹl egbiom aḅirinhi abuphẹ kotagharạn bọ osighẹ esi ikarạph. (Mat. 25:34; Ogan. 17:8) Ekịgh mudị Ebel kụ oḅẹl oye dị ogẹ ḍien phọ siphẹ aḍinyạ aghuḍum mọ.
^ Epẹ omhạn yira uḅẹm ghan mọ ekpo onhụ phọ “iiruẹn” osighẹ bọ oḍighinhom siẹn phọ remạ ghan mọ, iiruẹn aḍuugh obobọ iiruẹn amuphe. Okạr oghaạph, ekpo onhụ phọ “iiruẹn” eeni remạ ghan ni ipẹ phọ. Kuolọ siẹn oghaạph phọ ophọn phọ, ekịgh mudị aZizọs aḍighinhom ekpo onhụ phọ “iiruẹn” enhọn eten. Odị amạ ghan eten phọ epẹ rokiririom ghan bọ kophogh oye obobọ ooḅeghiọn oye ophogh, idiphọ aḍiniin aḍinyạ dị regbạ ghan ikpo onhụ aGrik eḅẹm bọ mọ “ooḅeghiọn ophogh aroozọ.”
