EMHUOGHAẠPH ITUUGHẠ PHỌ 40
“Osighẹ Ibadị Olhọgh Esi Elhiom Eḍighinhom Iyaạr”
“Abuphẹ osighẹ bọ ibadị rolọgh esi elhiom eḍighinhom iyaạr [komụ] ldiphọ araanhaạn phọ, k’agee-pọ k’agee-pọ.”—DAN. 12:3.
AḌUỌR PHỌ 151 He Will Call
OGHAẠPH OOKARAGH *
1. Eeghe amuukiạ amem kụ rikori iyira mem Itooghị Oniin Oonịr Asiạ phọ?
P’EEGHE idị aḍio phọ komiigh bọ oḅerion awe phọ kedụgh siẹn ade phọ mem Itooghị Oniin Oonịr Asiạ phọ aKraist! Oomo abuphẹ abuọ ephomhoghiạn abidị omhuughu bọ r’ikpukpụ onyạ ni omhiịn abidị. Kụ ipẹ kụ idị aZihova alhoghoma aani kẹn. (Job 14:15) Gbiom olhoghi ibo phọ ketọl bọ oḅilhẹ ooḍikuan r’abuọ ephomhoghiạn phọ abidị siẹn ade phọ. Idiphọ yira omhiịn bọ siphẹ emhuoghaạph phọ eten bọ, ‘abuọ elhiom eḍighinhom iyaạr phọ’ abuphẹ ogẹ bọ siḍien abidị siphẹ aḍinyạ aghuḍum mọ, “koḅerion ni omoọgh ghuḍum.” (Iiḍighi 24:15; Jọn 5:29) Eeni ibadị abuọ ephomhoghiạn phọ ayira omhuughu bọ koḍighom aani ni buḅẹl abuphẹ koḅerion bọ ongọ ghuḍum siẹn ade phọ. * Opumom isiẹn, ‘abuọ ekeeny eḍighinhom iyaạr phọ’ idiphọ abuphẹ u/moọgh aani bọ eepoogh dị ekasiạn olhegheri aZihova obobọ okumu odị eten dị ekpẹ oḍuomolhoghi kụ ogbi bọ omhugh phọ, koḅerion ni kụ osophonhaan iiruẹn.
2-3. (a) Odaphạn Isaiah 11:9, 10, eeghe kụ ogbogh oḍighi itughemhị dị katọl esi iphirigba oomo omhạr awe? (b) Yira kooḅeghiọn eeghe siẹn emhuoghaạph phọ ephẹn?
2 Kemoghi ni dị kotughemhị oomo abuphẹ koḅerion bọ. (Isa. 26:9; 61:11) Esi iduọn phọ, ogbogh oḍighi itughemhị dị ko/rọl ghan esi iphirigba oomo omhạr awe katọl li. (Bạl Isaiah 11:9, 10.) Eeghe kụ iḍighi? Eniin ephigh pọ, abuọ ekeeny eḍighinhom iyaạr phọ koḅerion bọ komoghi ni dị kotuughạ ilọ aZizọs Kraist, iikolhobian Omhạr phọ, ekiạ etagharạn phọ, ḅilhẹ r’oghaạph phọ agbolhomaam bọ ḍien phọ aZihova r’elhiom itooghị phọ odị. Ghalhamọ r’abuọ elhiom eḍighinhom iyaạr phọ bịn kemoghi ni dị koḅilhẹ otughemhị aani ipẹ aZihova maḍighi bọ okuamhị ogananamhi igbiom mọ odị ilọ ade phọ. Abuniin abuẹn phọ okpẹ bọ ni oḍuomolhoghi umhugh ni k’epẹ omhạn, k’amem dị aBaibul phọ k”omhunhughan. Abuọ ekeeny eḍighinhom iyaạr phọ r’abuọ elhiom eḍighinhom iyaạr phọ komoghi ni otuughạ ibadị araraạr.
3 Siẹn emhuoghaạph phọ ephẹn phọ, yira kooḅeghiọn sipuru phọ edaphạn bọ siẹn: Kopạm bọ ika ogbogh oḍighi itughemhị phọ? Eeghe etirom kụ edị kemoọgh ekị esi abuphẹ u/gẹ bọ r’ogẹ ḍien phọ obobọ buphẹ mogeọm bọ ḍien phọ iki siphẹ aḍinyạ aghuḍum mọ? Ophanyanhaạn asipuru phọ iphẹn phọ amạn ni maạr esi ayira rodon. Iduọn yira momhiịn bọ ni, iniin iikiạ imiịn dị ogẹ siphẹ aḍinyạ phọ aDaniel r’ogananami phọ kilhoghonhaạn iyira ḍighaạgh oogholhomhi onhaghạn aḍughụm mọ ayira ilọ ipẹ kemite bọ mem dị oḅerion buphẹ omhuughu bọ. Eḅẹl phọ, uguạ ooḅeghiọn iikiạ imiịn dị oghaạph siphẹ Daniel 12:1, 2.
“BUPHẸ RONAANỊ BỌ SIPHẸ ISAẠR ADE PHỌ . . . KOḄETENHU NI”
4-5. Daniel 12:1 egananami eeghe ilọ amem eekunha phọ?
4 Bạl Daniel 12:1. Aḍinyạ phọ aDaniel egananami ni esi etum esi idị iikiạ araraạr phọ iphẹn phọ kemite bọ mem eekunha phọ. Esi omaạm, Daniel 12:1 egananami mọ AMaikẹl, opọ phọ pọ aZizọs Kraist, ‘ameeranhaạn enye we phọ [Enhaạn].’ Apakirị imiịn phọ ipẹ phọ imhiigh omhunhughan lhạ phọ 1914, mem mọ omạ bọ Zizọs idiphọ Uw-emhạ Omhạr k’akẹ phọ.
5 Toroboiperolbọ, uḅilhẹ ni oḅenhị Daniel mọ aZizọs “kameerạ ni” mem “iiḅaghamhị dị ke/rọl ghan emhiigh k’amem mọ ophighi bọ eelhe phọ kụ eru eteẹny mem mọ amuphẹ phọ.” Amem “iiḅaghamhị” phọ iphẹn phọ pọ ‘igbogh iiḅaghamhị’ phọ oghaạph bọ oghol siphẹ Matiu 24:21. AZizọs amheerạ obobọ aḍighi iyaạr amiteom oghoph awe phọ Enhaạn epẹ eekunha amem iiḅaghamhị phọ amuphẹ phọ, iduọn phọ pọ siphẹ Amagedọn. Aḍinyạ Ogananami phọ ekaạph ilọ eniin phọ egu awe phọ abuẹn phọ idiphọ aḍigbogh aḍita phọ “mokpetenaan bọ iboom iminimiịn phọ.”—Ogan. 7:9, 14.
6. Eeghe kụ kemite mem dị aḍigbogh aḍita phọ mokpetenhaan igbogh iiḅaghamhị phọ? Gbạ. (Miịn siẹn emhuoghaạph phọ ephẹn phọ “Asipuru Dị Abuẹn Robạl Ghan Bọ Rinyạ Phọ Ayira Opuru” idị egbolhomaam oḅerion awe esi aḍuugh siẹn ade phọ.)
6 Bạl Daniel 12:2. Eeghe kụ kemite mem dị aḍigbogh aḍita phọ mokpetenhaan mem iiḅaghamhị phọ? Imiịn phọ iphẹn phọ i/ḍighi oghaạph omaạm oḅerenhu esi aḍuugh aruwaloor, dị arebenhẹ phọ Enhaạn oḅilhẹ oḅetenhu roḍighi oḍighi dị abụgh iboom siẹn asiḍio eekunha phọ iduọn yira omheeraam ghan bọ mem dị eten. * Kparipẹ ghụn, ikpo onhụ phọ iphẹn phọ remạ ghan oḅerenhu esi aḍuugh dị kamite siphẹ omhoom aḅirinhi phọ. Uḍighi ika kụ yira okureri bọ iduọn phọ? Ekpo onhụ phọ “iisaạr” oḅilhẹ ni oḍighinhom siphẹ Job 17:16, idiphọ enhọn ekpo onhụ dị remạ ghan mọ “oḍi.” Ephigh phọ ephẹn phọ eḍeenhaan mọ aDaniel 12:2 rekaạph ghan ilọ oḅetenhu esi aḍuugh dị kakarị amite mem dị asiḍio eekunha phọ esi eekunha ḅilhẹ m’ee eghạm mọ Amagedọn eten.
7. (a) Eghẹn eten kụ edị koḅerion bọ buniin ongọ “ghuḍum k’agee-pọ”? (b) Ika kụ idị ophọn phọ “anighẹ apu oḅẹl phọ”?
7 Kụ aDaniel 12:2 remạ ghan eeghe, iduọn eḅẹm bọ mọ koḅerion buniin ongọ ghuḍum k’agee-pọ? Remạ ghan mọ buphẹ koḅerion bọ kụ olegheri aZihova, obobọ kokiọm bọ ghisigh, olegheri aZihova, oḅilhẹ onaghanhạn aZihova r’aZizọs mem 1,000 asiạ phọ kokạr kụ omoọgh ghuḍum k’agee-pọ. (Jọn 17:3) Ophọn phọ okạr ogey oḅetenhu esi aḍuugh “dị anighẹ apu” nyophọ iḍiodi phọ oḅerion ghan bọ buniin awe oḅilhẹ ongọ ghuḍum. (Hib. 11:35) Eeghe kụ iḍighi? Loor esi dị abuphẹ phọ oḅerion bọ iḍiodi phọ uḅilhẹ ni omhuughu.
8. Ika kụ idị koḅerion bọ buniin “otonyon oḅilhẹ okel k’agee-pọ”?
8 Kuolọ k/oomo abuphẹ koḅerion bọ kụ kosighẹ itughemhị phọ aZihova. Imiịn phọ aDaniel iḅẹm mọ buniin koḅerion kụ “otoyon oḅilhẹ okel k’agee-pọ.” Loor esi dị bidị koḍeenhaan eegharạ iḅạph. Siḍien abidị ko/gẹ aani siphẹ aḍinyạ aghuḍum mọ, ḅilhẹ bidị ko/moọgh ghuḍum k’agee-pọ. Kparipẹ ghụn, “kotonyon bidị k’agee-pọ,” obobọ opiemhi. Esi iduọn phọ aDaniel 12:2 rekaạph ghan ilọ ipẹ kemitenhaan bọ oomo abuphẹ koḅerion bọ odaphạn ipẹ bidị oḍighi bọ mem mọ opọ moḅerion bọ bidị. * (Ogan. 20:12) Abuniin awe komoọgh ghuḍum k’agee-pọ, kụ abunhọn ko/moọgh.
“OSIGHẸ IBADỊ OLHỌGH ESI ELHIOM EḌIGHINHOM IYAẠR”
9-10. Eeghe kụ keḅilhẹ emite mem dị igbogh iiḅaghamhị phọ meten, kụ abuọ anhiạn kụ “komụ bọ idiphọ okuaḍio phọ”?
9 Bạl Daniel 12:3. Eeghe kụ keḅilhẹ emite mem dị amem “iiḅaghamhị” phọ meten? Oḅarạm ipẹ aDaniel 12:2 eghaạph bọ, ekpịgh phọ 3 eḅilhẹ kẹn ekaạph ilọ iyaạr dị kemite mem dị igbogh iiḅaghamhị phọ meten.
10 Abuọ anhiạn kụ “komụ bọ idiphọ okuaḍio phọ”? Orue ophagharanhaạn aḍipuru phọ aḍiphẹ phọ, yira komiịn olhoghonhaạn aḍighaạgh siphẹ ikpo onhụ phọ aZizọs ogẹ bọ siphẹ Matiu 13:43 eḅẹm bọ mọ: “Pọ kụ amem dị abugey awe phọ komụ idiphọ erumuḍio, pạ Omạr Odẹ phọ abidị.” Siẹn ikpo onhụ phọ iphẹn phọ, aZizọs aghaạph ghan ilọ “awe phọ oru bọ buphẹ k’Omạr phọ,” bumor phọ odị abuphẹ osagharạn bọ uwaloor iigbia phọ, kokumuan bọ r’odị epẹ Omhạr k’akẹ phọ. (Mat. 13:38) Esi iduọn phọ, aDaniel 12:3 rekaạph ghan ilọ abuphẹ osagharạn bọ uwaloor iigbia phọ ḅilhẹ r’oḍighi phọ bidị koḍighi bọ mem Itooghị Oniin Oonịr Asiạ phọ.
Abuphẹ osagharạn bọ uwaloor iigbia phọ koḅophoghạn r’aZizọs Kraist kụ ooḅakị oḍighi itughemhị phọ katọl bọ siẹn ade phọ mem 1,000 asiạ phọ (Miịn ekpịgh phọ 11)
11-12. Eeghe oḍighi kụ edị 144,000 phọ koḍighi mem 1,000 asiạ phọ?
11 Ika kụ idị abuphẹ osagharạn bọ uwaloor iigbia phọ kosighẹ “ibadị olọgh esi elhiom eḍighinhom iyaạr”? Abuphẹ osagharạn bọ uwaloor iigbia phọ koḅophoghạn r’aZizọs Kraist kụ ooḅakị oḍighi itughemhị phọ katọl bọ siẹn ade phọ mem 1,000 asiạ phọ. 144,000 kokumuan idiphọ araalhạ ḅilhẹ r’abupinyọn rikiạ. (Ogan. 1:6; 5:10; 20:6) Iduọn phọ pọ, bidị kologhonhaạn ḍighaạgh ‘ookonom ghan areelhe phọ”—enụm enụm kụ osighẹ omhạr awe oḅulhemhi dọl dị emhunhughan. (Ogan. 22:1, 2; Ezek. 47:12) P’eeghe ibo dị abuẹn osagharạn bọ komoọgh!
12 Anhiạn kụ kaḍighom aani igbo “ibadị phọ” kosighẹ bọ olọgh esi elhiom eḍighinhom iyaạr phọ? Abuniin abuẹn phọ eḅaramaạm oomo abuphẹ koḅerion bọ ḅilhẹ kẹn r’abuphẹ kokpetenhaan bọ Amagedọn, ghalhamọ kẹn r’ibạm anmụny dị eeni komạr siphẹ omhoom aḅirinhi phọ. Epẹ eekunha 1,000 asiạ phọ, oomo awe phọ abuphẹ odi bọ siẹn ade phọ moḍighi we dị momhunhughan. Kụ iḍighi kụ, apụr amem kụ edị kogeọm bọ siḍien abidị iki siphẹ aḍinyạ aghuḍum mọ, dị i/ḍighi mun pensụl?
OWAAGHỊ OPHOGH DỊ ASUGHANHAM OMHẠN
13-14. Kewạ dị oomo awe dị momhunhughan koḍighi eeghe iyaạr kụ ogbi omhoọgh aghuḍum k’agee-pọ?
13 Ewạ mọ olhegheri mọ oḍighi oye dị mamhunhughan pọ re/mạ ghan mọ oye phọ mamhoọgh ghuḍum k’agee-pọ. Tuutughiạn Adam r’Iv. Bidị uḍighi ni we dị omhunhughan, kuolọ iwạ dị bidị koḍeenhaan mọ bidị osooromhi ni loor ronaghanhạn aZihova Enhaạn phọ kụ bidị ogbi nuụn omhoọgh aghuḍum k’agee-pọ. Dị eeph ni, bidị ughel li onhaghanhạn Enhaạn.—Rom. 5:12.
14 Eeghe kụ keḍighi dọl abuphẹ kotọl bọ siẹn ade phọ siphẹ eekunha 1,000 asiạ phọ? Oomo phọ abidị koḍighi we dị momhunhughan. Oomo abuphẹ momhunhughan bọ kobakị ni itooghị phọ aZihova k’agee-pọ ḍughụm? Obobọ buniin abidị kotọl aani idiphọ Adam r’Iv—omhunhughan bọ ni kụ u/tọl bọ dọl dị ekpẹ oḍuomolhoghi? Kewạ ni mọ ophagharanhaạn sipuru phọ iphẹn phọ, kuolọ ika?
15-16. (a) Apụr amem kụ edị oomo omhạr awe komoọgh bọ eepoogh oḍeenhaan mọ bidị oḅạr ri aZihova? (b) Owaaghị ophogh phọ asughanham bọ omhạn kakọm eeghe kụ amiteom?
15 Kokasaghiọm Setan ikoli esi 1,000 asiạ. Mem mọ amuphẹ phọ, odị ka/tue mun aakelheghi oye. Toroboiperolbọ, mem dị 1,000 asiạ phọ esi eekunha, kotagharạn ni Setan siphẹ okasaghiọm bọ. Kụ odị aḅilhẹ akparaghạ ookelheghi omhạr awe phọ momhunhughan bọ. Mem owaaghị ophogh phọ opọ phọ, oomo omhạr awe phọ momhunhughan bọ siẹn ade phọ komoọgh eepoogh oḍeenhaan mughumọ bidị odi ni agạ aḍien phọ Enhaạn ḅilhẹ r’elhiom itooghị phọ odị. (Ogan. 20:7-10) Ipẹ torobọ onyọ abidị kamegheron bọ akị esi ipẹ aSetan kaḍighi bọ kụ kemạ emiteom mughumọ kogeọm ni siḍien abidị iki siphẹ aḍinyạ aghuḍum mọ.
16 Onhụ abạl awe dị u/kol, kotọl aani ni idiphọ Adam r’Iv esi oghel itooghị phọ aZihova. Eeghe kụ kemitenhaan bidị? Ogananami 20:15 iḅenhị iyira mọ: “Uroph aani ni torobọ oye lọ ḍien odị u/gẹ aani siphẹ aḍinyạ abuphẹ odi bọ osumeeny oodụ aniạn phọ.” Ii, abuọ iḅạph phọ abuẹn phọ kokạr bịn kụ opiemhi k’agee-pọ k’agee-pọ. Kuolọ ogbogh opol omhạr awe phọ momhunhughan bọ kokpetenhaan ni owaaghị ophogh phọ asughanham bọ omhạn. Kụ ogeọm siḍien abidị iki siphẹ aḍinyạ aghuḍum mọ.
“MEM EEKUNHA PHỌ”
17. Uḅenhị Daniel m’eeghe kụ kemite mem mọ ayira? (Daniel 12:4, 8-10)
17 Eḍighi ni emạ iyaạr ootughiạn ghan ilọ araraạr phọ kemite bọ ghisigh! Toroboiperolbọ, ookpaạny angọ ni Daniel iphigh iinhaghạn idị egbolhomaam mem mọ ayira, “mem eekunha phọ.” (Bạl Daniel 12:4, 8-10; 2 Tim. 3:1-5) Ookpaạny phọ aḅenhị Daniel mọ: “Ogey olhegheri iyaạr kaapaany ni.” Ii, awe phọ Enhaạn bịn kụ kotue okạr onaghanhạn ikpo onhụ imiịn phọ edi bọ siphẹ aḍinyạ phọ aDaniel. Ookpaạny phọ apumom mọ, mem mọ amuphẹ phọ “abukarạph phọ [kozọ] ghan ni ekarạph eten, kụ r’oniin okarạph oye ka/naghanhạn.”
18. Eeghe kụ kemitenhaan buḍighinhom ikarạph phọ moọny amem?
18 Rodon ekịgh mudị ro/liọm ghan buḍighinhom ikarạph. (Mal. 3:14, 15) Kuolọ moọny amem aZizọs kasoph ni iiruẹn angọ buphẹ oghịgh bọ atụ igạ phọ kụ agbariọn bidị asighẹ esi abuphẹ oghịgh bọ iyool phọ. (Mat. 25:31-33) Abuḍighinhom ikarạph phọ abuẹn phọ ko/kpetenhaan igbogh iiḅaghamhị phọ, ko/ḅeton kẹn bidị ongọ ghuḍum siphẹ omhoom aḅirinhi phọ. Ko/gẹ siḍien abidị siphẹ “aḍinyạ ootughianhạm mọ” oghaạph bọ oghol siphẹ Malachi 3:16.
19. Eeghe kụ edị ewạ moḍighi nyiidiphọ, kụ eeghe kụ iḍighi? (Malachi 3:16-18)
19 Ophọn kụ amem omạ omiteom mọ yira u/loom aani ekụ abuḍighinhom ikarạph phọ. (Bạl Malachi 3:16-18.) AZihova raakpomhoghi ni buphẹ odị amhiịn bọ idiphọ “emhoọgh dị egbatanhaạn,” obobọ idiphọ ephua. Yira okạr kụ rowạ oḍighom aani igbo abuẹn phọ.
P’eeghe ibo omhiịn aDaniel, r’abuọ ephomhoghiạn phọ ayira, ḅilhẹ r’ibadị abunhọn dị “koḅerenhu” osighẹ bin aruunmo phọ abidị siphẹ omhoom aḅirinhi phọ! (Miịn ekpịgh phọ 20)
20. Eeghe oguan dị asughanham omhạn kụ edị oguanhaan Daniel, kụ uḍighi ika kụ nạ ragon bọ omhiịn dị imiịn phọ ipẹ phọ kemunughan?
20 Okạr agey, yira odi muukiạ amem. Kuolọ, araraạr dị eḍigh ḍiigu epelhom iphẹn phọ kemiigh ni omite oọny amem. Moọny amem yira komiịn ni muphe oomo abukarạph phọ. Ipẹ reten, yira komiịn omhunhughan imiịn phọ aZihova aguanhaan bọ Daniel mọ: “Nạ kaḅetenhu ni asighẹ bin aruunmo phọ anạ mem asiḍio eekunha phọ.” (Dan. 12:13) Nạ apogh ni rakiọm ghisigh ḍio phọ aDaniel r’abuọ ephomhoghiạn phọ anạ koḅilhẹ bọ ‘oḅerenhu’ ḍughụm? Eḍighi idiphọ, pọ ḍighi oomo ilọ nạ katue orọl adọl dị ekpẹ oḍuomolhoghi, kụ akuphom owol mọ aḍien anạ ketọl aani siphẹ aḍinyạ aghuḍum mọ aZihova.
AḌUỌR PHỌ 80 “Taste and See That Jehovah Is Good”
^ Emhuoghaạph phọ ephẹn phọ eeḅenhion onhaghạn aḍughụm mọ ayira idị egbolhomaam ogbogh oḍighi itughemhị phọ oghaạph bọ oghol siphẹ Daniel 12:2, 3. Yira kooḅeghiọn mem dị iphẹn phọ kemite bọ r’abuphẹ egbolhomaam bọ. Yira oḅilhẹ ooḅeghiọn ipẹ oḍighi itughemhị phọ kaakolhobian bọ we phọ abuphẹ kotọl bọ siẹn ade phọ ilọ owaaghị ophogh phọ kasughanham bọ omhạn siphẹ Itooghị Oniin Oonịr Asiạ phọ aKraist.
^ Eeni oḅerenhu esi aḍuugh phọ kamiighom buphẹ omhugh bọ siẹn asiḍio eekunha phọ kụ akị epẹ omhạn oghiil atum oghiil. Eḍighi maạr dị eru ni idiphọ, pọ torobọ oghiil komoọgh ni eepoogh oḅenhị abuphẹ bidị okạr bọ olhegheri mọ nyinha mesi. Torobọ ipẹ kekị bọ, Igẹ Iigbia phọ ekaạph mọ “amem muọ oye r’oye” idị egbolhomaam oḅetenhu esi aḍuugh phọ opọ k’akẹ phọ, kụ yira osighẹ aani kẹn mọ oḅerenhu esi aḍuugh ophọn isiẹn ade phọ kedaphạn aani eniin phọ eten phọ.—1 Kọr. 14:33; 15:23.
^ Egbaạm mọ ephẹn phọ eeḅenhion onhaghạn aḍughụm mọ ayira ogẹ bọ siphẹ aḍinyạ phọ Pay Attention to Daniel’s Prophecy! emhuoghaạph phọ 17, ḅilhẹ r’aWatchtower aJuly 1, 1987, ipoḍi phọ 21-25.
^ Ḍieriphọ aḍighaạgh phọ, ikpo onhụ phọ ‘abuọ elhiom eḍighinhom iyaạr phọ’ ḅilhẹ ‘r’abuọ ekeeny eḍighinhom iyaạr phọ’ edi bọ siphẹ Iiḍighi 24:15 ḅilhẹ r’ikpo onhụ phọ “buphẹ moḍighi ghan bọ igey phọ,” ḅilhẹ “r’abuphẹ moḍighi ghan bọ ikarạph phọ” edi bọ Jọn 5:29 rekaạph ghan ilọ iiḍighi phọ buphẹ koḅerion bọ oḍighi ghan bọ kụ ogbi bọ omhugh phọ.
