Odaphạn 1 Korịnt 15:8, aPọl aḅẹm mọ: “Osughanam omạn phọ, odị umitenaan aani ni imhị, ghalamọ idiphọ mị aghịgh bọ ni moọny dị i/munughan kụ omạr.” Mem dị eten, yira ugbạ ghan siẹn phọ mọ, eeni aPọl aghaạph ilọ amem dị odị amhiịn uḍien eghuan phọ aZizọs epẹ k’akẹ. Kụ ighịgh mudị mongọ nyodị eboom eghuan mudị umhạr ri obobọ uḅeton nyodị esi aḍuugh ongọ dọl aruwaloor kụ egbi oteẹny okạr amem dị koḅerion we eten phọ ephẹn phọ rukuron asiạ ghisigh. Toroboiperolbọ, oḅilhẹ bọ otuughạ ekpịgh phọ ephẹn phọ, omiịn mọ ewạ ni m’ooḅenhion onhaghạn aḍughụm mọ ayira.

Etu ni inẹ mọ aPọl rakaạph ghan ilọ ipẹ emite bọ mem mọ odị akiton bọ aḍighi otelhedom aZizọs. Kuolọ eeghe kụ emhụ iphẹn odị aḅẹm bọ m’onọ akịgh “moọny dị i/munughan kụ omạr”? Ibadị areten ophogh oghaạph phọ ophọn phọ edi ni.

Okiton ph’odị aḍighi ekperenhom ḅilhẹ r’unmam. Eghun dị i/munughan kụ omhạr resighẹ ghan we phọ ekperenhom. Iduọn aSọl (onyebel roten olhegheriom bọ mọ aPọl) rakị bọ Damaskọs ogbiphoghọm aKristẹn phọ odi bọ epẹ phọ, odị o/gbiighiom omhiịn uḍien Zizọs phọ moḅeton bọ. Okiton phọ aPọl aḍighi ni ekperenhom esi odị ḅilhẹ r’aKristẹn phọ abuphẹ odị rakị bọ ogbiphoghọm mọ. Oḅarạm isiẹn, iphẹn phọ iḍighi ni unmam dị ekọm idị odị u/miịn mun eten ekulha amem.—Iiḍighi 9:1-9, 17-19.

Okiton ph’odị amite “mukarạph amem.” Okạr ekpo onhụ aGrik phọ ogbạ bọ mọ “oọny dị i/munughan kụ omạr” kotue kẹn ni oḅilhẹ ogbạ mọ “oọny dị omhạr mukarạph amem.” ABaibul dị oghol mọ The Jerusalem Bible agbạ mọ: “Ighịgh mudị umhạr Imhị mem dị oye u/seere olhoghi.” Moḅeton Zizọs osighẹ okị k’akẹ, kụ aPọl agbi bọ okiton. Mem mọ oḅeton bọ Zizọs, odị amitenhaan ni we phọ aPọl aagholhogh bọ siphẹ asiikpịgh phọ ipẹ eru bọ eteẹny ekpịgh phọ 8, kuolọ aPọl o/sighẹ aani riḍien omhiinhọm Zizọs mem mọ oḅeton bọ aḅilhẹ agheel k’akẹ. (1 Kọr. 15:4-8) Iduọn aZizọs amitenhaan bọ nyodị ekperenhom kụ eepoogh dị odị amhoọgh aani omhiịn aZizọs phọ moḅeton bọ, ghalhamọ r’iduọn eghịgh bọ mudị imite “mukarạph amem.”

Odị aghaaphaạn ni loor odị eten dị eeleeny. Abuniin abuọ igbogh ituughạ uḅẹm mọ ikpo onhụ phọ aPọl aḍighinhom bọ siẹn phọ epạm ḍiitughiạn dị iyaạr i/mạn maạr. Eru maạr dị iphẹn phọ kụ erọl olhoghi aPọl mem mọ raḅạ bọ ikpo-onhụ phọ iphẹn phọ, pọ odị amạ ghan amiteom m’onọ o/kpeanhaạn eepoogh phọ ongọ bọ nyodị. Okạr oghaạph, odị aghị ghisigh kụ aḅẹm mọ: “Mị kụ uḍigh aagiạ aḅarạm oḅịph siphẹ abutelhedom mọ. Mị phọ kẹn bịn u/mạn oghola mọ otelhedom, idị eḍighi bọ mị ugbiphoghọm ni buọ asiosị phọ Enaạn. Kụ esi onmạ ighirigiir phọ Enaạn kụ mị odi bọ dọl phọ aḍiẹn mị odi bọ.”—1 Kọr. 15:9, 10.

Esi iduọn phọ, ekịgh mudị aPọl aghaạph ghan ilọ e/seere olhoghi phọ ḅilhẹ r’eten ekperenhom mọ epẹ aZizọs amitenhaan bọ nyodị, okiton phọ odị amite bọ mem dị olhoghi u/seere, obobọ ilọ ipẹ eten aruwaloor odị u/kpeanhaạn bọ omhiịn uḍien phọ odị amhiịn bọ. Toroboiperolbọ, iigholhaan ni mọ aPọl amhaghamhị ni maạr eepoogh phọ epẹ phọ. Ikạr kụ engọ nyodị riphigh dị ilọ oogbaghanhaạn i/tọl mọ moḅeton Zizọs esi aḍuugh. Bilẹ kẹn, odị o/gbạ ghan mem oghaạph oghol ipẹ emitenhaan bọ nyodị torobọ amem dị odị rakaaphạn we ilọ oḅetenhu esi aḍuugh phọ aZizọs.—Iiḍighi 22:6-11; 26:13-18.