1. Eeghe iyaạr kụ edị aZihova angọ torobọ ebenhẹ odị dị akpẹ oḍuomolhoghi?

R’ETEN ephomhoghiạn, aZihova angọ ni torobọ ebenhẹ phọ odị akpẹ bọ oḍuomolhoghi esi siẹn ookpomhoghan phọ. Ghalhamọ r’iduọn iiḍighi phọ ayira egbaranhaạn bọ ni, oomo phọ ayira omạn ni maạr ḅilhẹ kẹn oniin awạ ni olhoghonhaạn aḍighaạgh ophoriphọ. Otelhedom mọ aPọl ulhoghonhaạn iyira ḍighaạgh omhiịn ephigh iyaạr ituughạ phọ ephẹn phọ. Ika?

2. Odaphạn Efesọs 4:16, eeghe kụ iḍighi kụ ewạ bọ ni mọ oniin amhaghamhị ghan maạr nyoorị phọ kụ oḅophoghạn ghan okumuan?

² Odaphạn esi aBaibul phọ osighẹ bọ emhuoghaạph phọ ephẹn phọ, aPọl aghaạph ni akparamhị mọ onyọ ayira o/lho dị kamiịn onhọn ebenhẹ aZihova kụ aḅẹm mọ “Mị u/moọgh iyaạr oḍighinom ana.” (1 Kọr. 12:21) Eḍighi maạr dị yira rowạ mọ eephọ erọl siẹn ookpomhoghan phọ, pọ oomo ayira omoọgh omhaghamhị amaạr ophoriphọ oye phọ kụ oḅophoghạn okumuan. (Bạl Efesọs 4:16.) Mem dị yira okumuan ghan r’amuḅọph, ookpomhoghan phọ kapoph ni, ḅilhẹ kẹn ephomhoghiạn etọl.

3. Yira kooḅeghiọn eeghe siẹn emhuoghaạph phọ ephẹn phọ?

³ Ighẹn kụ iniin areten dị yira kotue oḍeenhaan olhọgh eegu bueriphọ aKristẹn phọ siẹn ookpomhoghan phọ? Siẹn emhuoghaạph phọ ephẹn phọ, yira kooḅeghiọn idị ikumor awe ookpomhoghan phọ koḍeenhaan ghan olhọgh eegu siphẹ igbo phọ abidị. Ipẹ reten, kụ yira ooḅeghiọn idị oomo phọ ayira kotue oḍeenhaan mọ yira omaghamhị ni maạr bumor phọ ayira abuẹn ko/phin bọ nmariịr ḅilhẹ r’abumarani phọ abuẹn k/aạl bọ ilhom mọ. Kụ ekureriom mọ, yira kotuughạ olegheri idị yira kotue osereghiạn buphẹ u/kạr bọ umaạr aani ilọ oḅạ onhụ phọ ayira.

4. Eeghe oroma aPọl dị ogẹ siphẹ Rom 12:10, kụ edị ewạ mọ ikumor awe ookpomhoghan phọ odạph?

⁴ Uwaloor iigbia phọ aZihova kụ amạ oomo phọ abuphẹ oḍighi bọ ikumor awe siẹn ookpomhoghan phọ. Ghalhamọ r’iduọn phọ ni, torobọ onyọ abidị amoọgh ni inmo ḅilhẹ r’asighalhanyạ dị egbatanhaạn. (1 Kọr. 12:17, 18) Buniin eeni purukụ omạ aani idiphọ okumor oye, kụ esi iduọn phọ ko/karaghị omhiịn raraạr. Buniin ikumor awe phọ eeni ro/tue ghan kokumuan iboom loor esi aḍikpọ obobọ e/moon. Ghalhamọ r’iduọn phọ ni, okumor oye ookpomhoghan ku/kiton upogh nyoniin kụ aḅẹm mọ “Mị u/moọgh iyaạr oḍighinom ana.” Kparipẹ ghụn, torobọ okumor oye adaphạn ghan oroma phọ aPọl odi bọ siphẹ Rom 12:10.—Bạl.

5. Ika kụ idị ikumor awe phọ roḍeenhaan ghan olhọgh eegu siphẹ igbo phọ abidị, kụ eeghe kụ iḍighi kụ emhạn bọ ni maạr oḍighi iduọn phọ?

⁵ Ikumor awe phọ roḍeenhaan ghan mọ bunọ olọgh eegu bueriphọ ikumor awe phọ esi omhaạr ghan olher arurụ ongọ abidị. Iphẹn phọ emạn maạr ekạr ekpaariọm mem dị ikumor awe phọ ookpomhoghan ophạm iphigh araghaạph. Eeghe kụ iḍighi? Lọgh elhegh idị aWatchtower October 1, 1988, eghaạph: “Ikumor awe phọ rolọgh ghan elhegh mọ aKraist dị eego esi uwaloor iigbia phọ katue ni aaḅakị ḍiitughiạn oniin okumor oye omiteom aḍinị olhogh aBaibul dị kotue osighẹ oḍighinhom odaphạn dọl phọ obobọ siphẹ ephigh osopha phọ bidị rowạ bọ osopha phọ. (Iiḍighi 15:6-15) Uwaloor iigbia phọ ra/soorom ghan oniin okumor oye bịn kuolọ oomo aḍita phọ.”

6. Ika kụ idị ikumor awe kotue oḅophoghạn okumuan, kụ ika kụ idị ookpomhoghan phọ komooghọm suọ?

⁶ Okumor oye dị alhọgh eegu bueriphọ ikumor awe phọ kụ ra/ḍighi ghan oḅẹl oye oghaạph iyaạr torobọ amem dị bidị ophạm ruupuruan. Odị ra/ponomaam ghan raghaạph phọ, ḅilhẹ odị ra/sighẹ ghan mọ ipẹ odị aghaạph bọ bịn kụ inẹ. Kparipẹ ghụn, odị rakaạph ghan eten phọ epẹ odị amhiịn aani bọ r’osooromhi aloor kaḅilhẹ alhọgh elhegh mọ odị o/lhegheri omhadạn. Odị ramaạr ghan ni kalher rurụ angọ mem dị abunhọn rokaạph aani. Dị emhạn maạr epelheghiom, r’ikpukpụ odị raḍighinhom ghan ni sinị iilhogh aBaibul phọ odị awaaghị bọ amhiịn r’abueriphọ, ḅilhẹ r’iiḅakiọm “ebenhẹ phọ asụ bọ olhoghi phọ aḅilhẹ akpẹ  oḍuomolhoghi.” (Mat. 24:45-47) Mem dị ikumor awe phọ kụ ophạm raghaạph eten ephomhoghiạn r’olhọgh eegu, uwaloor phọ Enhaạn katolạn ni r’abidị kụ aaḅakị torobọ onyọ abidị osopha osopha dị kakparamhị ookpomhoghan phọ.—Jems. 3:17, 18.

7. AZizọs aphogh ika dọl egelenyạ?

⁷ Siẹn ookpomhoghan phọ ḍio arodon, arughunotu dị ophạm ibạm anmụny ḅilhẹ r’abudị ko/mhạr kụ odi. Ghalhamọ r’iduọn phọ ni, ibadị abumor r’abumarani dị ko/phin obobọ k/aạl ilhom odi aani ni. Ika kụ idị yira kopogh ghan buẹn ko/phin bọ obobọ k/aạl bọ ilhom? Ooḅeghiọn eten phọ epẹ aZizọs aphogh bọ dọl egelenyạ. Mem mọ odị arọl bọ siẹn ade phọ akumuan, odị o/phin anhịr. Odị arọl dọl egelenyạ kụ agbon mem mọ odị r’arukumuan phọ odị. AZizọs o/tughemhị mọ iten dị oye phọ aphin anhịr obobọ arọl dọl egelenyạ. Odị aḅẹm mọ toroboiperolbọ abuniin aKristẹn kotọl li dị kosopha mọ bunọ ko/pin anhịr obobọ ilhom ko/bạl. (Mat. 19:11, 12; miịn iyaạr ituughạ dị edi Matiu 19:12.) AZizọs alhọgh ni eegu buphẹ nmariịr u/pin bọ obobọ ilhom u/bạl bọ. Odị o/mhiịn buphẹ orọl bọ dọl egelenyạ idiphọ awe dị osoorom, obobọ we dị rotoph iyaạr siphẹ adọl aghuḍum mọ abidị.

8. Odaphạn 1 Korịnt 7:7-9, aPọl aroma Kristẹn oḍighi eeghe?

⁸ Idiphọ aZizọs, otelhedom mọ aPọl aphamhanhạm ni rukumuan phọ odị idiphọ egelenyạ. Amem i/tọl dị aPọl atughemhị mọ ebeeph ni dị onyọ aKristẹn kabạl ilhom obobọ apin anhịr. Odị alhegheri ni mọ torobọ oye kụ kasopha. Ghalhamọ r’iduọn phọ ni, aPọl aroma Kristẹn mọ bidị ooḅeghiọn mughumọ bidị kokumu aZihova idiphọ egelenyạ. (Bạl 1 Korịnt 7:7-9.) Okạr oghaạph, aPọl o/phogh osooromhi Kristẹn dị odi dọl egelenyạ. Esi omaạm, odị asaḅạr ri Timoti oḍoọgh oye dị arọl dọl egelenyạ, ophạm iphigh iiḍighi. * (Fil. 2:19-22) Eegholhaan ni mọ keḍighi ni opiomạn ootughiạn mọ onyọ umor o/si omhanhanhaạm ophạm iniin aroopoogh arukumuan, emuton dị aphin anhịr obobọ u/pin.—1 Kọr. 7:32-35, 38.

9. Eeghe iyaạr kụ edị yira kotue okaạph ilọ apinien ḅilhẹ r’adọl egelenyạ?

⁹ AZizọs obobọ aPọl u/tughemhị mọ aKristẹn omoọgh aạl ilhom obobọ ophin anhịr, obobọ omoọgh orọl adọl egelenyạ. Esi iduọn phọ, yira kokạr okaạph ika ilọ apinien obobọ egelenyạ? AWatchtower October 1, 2012, akạr akaạph aageliọn mọ: “Okạr oghaạph, kotue ni oḅẹm mọ, [apinien obobọ egelenyạ] eḍighi inmo k’Enhaạn. . . . AZihova ra/pogh ghan [egelenyạ] idiphọ iyaạr dị kekọm roofola obobọ okururu.” Odaphạn iphẹn phọ, ewạ mọ  yira olhọgh ghan eegu bumor r’abumarani dị odi dọl egelenyạ siẹn ookpomhoghan phọ.

10. Ika kụ idị yira kotue oḍeenhaan olhọgh eegu bumor r’abumarani phọ ayira abuẹn odi bọ dọl egelenyạ phọ?

¹⁰ Ika kụ idị yira kotue oḍeenhaan olhọgh eegu sidọl r’olhoghoma abumor r’abumarani phọ abuphẹ anhịr ko/phin bọ obobọ ilhom k/aạl bọ? Ewạ mọ yira olhegheri mọ buniin aKristẹn phọ abuphẹ odi bọ dọl egelenyạ phọ kụ usopha mọ bunọ kotọl dọl egelenyạ. Abunhọn aKristẹn dị odi dọl egelenyạ phọ, eeni keḅeraạn ni ophin anhịr obobọ aạl ilhom, kuolọ ko/mhiịn oye dị akasiạn. Kuolọ buniin eeni olom obobọ anhịr abidị kụ mamhugh. Etigheri iyaạr phọ eḍighi bọ, ekpẹ ni dị buọ ookpomhoghan phọ komiigh oopuru yogh abidị iyaạr phọ eḍighi bọ kụ bidị ilhom k/aạl bọ obobọ anhịr k/ophin bọ, ḅilhẹ kẹn oḅẹm mọ bunọ kologhonhaạn bidị ḍighaạgh owaanhaạn olom obobọ anhịr ḍughụm? Ọ, olhegheri mọ buniin abuphẹ odi bọ dọl egelenyạ phọ kowạ ni mọ olhoghonhaạn bunọ ḍighaạgh owạ anhịr obobọ olom. Kuolọ eḍighi maạr dị bidị kụ nyinhạ u/ḅenhị, pọ nạ ragbi mọ abumor r’abumarani phọ abuẹn phọ kologhoma ika eḍighi maạr dị nạ aḅẹm mọ nạ rawạ owaanhaạn abidị anhịr obobọ olom? (1 Tẹs. 4:11; 1 Tim. 5:13) Ooḅeghiọn omhiịn iniin araraạr dị buniin abumor r’abumarani dị odi dọl egelenyạ dị okpẹ ni oḍuomolhoghi oghaạph.

11-12. Ika kụ idị yira kotue okọm oḅonyonhu ozuan ongọ buẹn odi bọ dọl egelenyạ phọ?

¹¹ Oniin opoghom eghir dị anhịr u/pin, dị rakumuan ni agey siphẹ arukumaun phọ odị, aloghoma mọ ibadị asuọ edi ni orọl adọl egelenyạ. Ghalhamọ r’iduọn phọ ni, odị aḅẹm mọ, reḍighi ghan ni iyaạr oḅonyonhu ozuan iboom mem dị ikpolhọm abumor r’abumarani opuru nyodị mọ: “Eeghe kụ iḍighi kụ nạ o/phin bọ anhịr?” Onyọ umor dị odi dọl egelenyạ, dị rakumuan ghan olạ agadạ aḅẹm mọ: “Eeni amem abumor r’abumarani phọ roḍighi ghan idị mị raloghoma ghan mọ ighirigiir kụ edianhaan buphẹ odi bọ dọl egelenyạ phọ. Iphẹn phọ ketue ni eḍighi iyaạr dị kekịgh mudị adọl egelenyạ phọ eḍighi ghụn dool, kparipẹ r’inmo.”

¹² Oniin onyọ umarani dị odi dọl egelenyạ dị rakumuan ghan Betẹl, aḅẹm mọ: “Abuniin abumor rootughiạn ghan mọ torobọ oye dị odi dọl egelenyạ pọ rawạ ghan ilhom aạl obobọ anhịr ophin, obobọ mọ oomo abuẹn odi bọ dọl egelenyạ phọ romiịn ghan riisi ooḅughonhaan idiphọ esi dị bidị komiịn oye aạl obobọ anhịr ophin. Eniin amem dị mị aghị enhọn apakirị eelhe phọ oḍighi, mị usi dulhe dị bidị kokị ituughạ, onyọ umarani phọ ulhọgh bọ imhị otu phọ uḅenhị imhị mọ iyạl abumor odi ni siphẹ ookpomhoghan phọ dị oḍighi oki amhị. Odị uḅenhị imhị mọ u/ḅẹm mọ odị rakparaghạ ghan owaanhaạn amhị oye aạl, kuolọ iduọn yoor orelhe bọ oḍigh Kindọm Họl phọ, odị uphạm imhị bịn anyeenheom epẹ iyạl phọ abumor phọ odi bọ. Okạr oghaạph, ipẹ phọ iḍighi ni iyaạr aroofola kụ ingọ imhị r’iyạl phọ abumor phọ.”

13. Ighẹn areḍeenhaan kụ ikparamhị oniin onyọ umarani dị odi dọl egelenyạ?

¹³ Onhọn onyọ umarani dị rakumuan ghan epẹ Betẹl dị odi dọl egelenyạ aḅẹm mọ: “Mị alegheri ni bunhọn abukọy eten dị odi dọl egelenyạ, dị omhiigh, ogbon, dị osighẹ ni loor ropighironhọm ekiạ kụ omhoọgh ni ogbaanyạn siphẹ arukumuan phọ abidị, ḅilhẹ molhoghonhaạn ni ḍighaạgh ookpomhoghan phọ. Bidị omoọgh ephoghom dị eeleeny ilọ adọl egelenyạ phọ abidị, ro/loghoma ghan mọ bunọ k’upu bunhọn loor iduọn bidị odi bọ dọl egelenyạ phọ, ḅilhẹ ro/loghoma ghan mọ roogbegheḍiom bunọ esi iduọn bidị u/moọgh bọ eghunotu, olom, obobọ anhịr.” Pọ kụ iyaạr phọ renighẹ ghan bọ dị ookpomhoghan phọ komaghamhị maạr oḅilhẹ olọgh eegu torobọ oye siphẹ ookpomhoghan phọ. Nạ ka/loghoma ighirigiir, obobọ mọ omooghọm nyinhạ eḍịm, ḅilhẹ mọ oḅitonhaạn ni nyinhạ, obobọ roophughemhi ni nyinhạ. Nạ alegheri bịn mọ ophomhoghiạn ni nyinhạ.

14. Ika kụ idị yira kotue oḍeenhaan mọ yira olọgh ni eegu buẹn odi bọ dọl egelenyạ phọ?

¹⁴ Keḅeraạn ni bumor r’abumarani phọ ayira abuẹn odi bọ dọl egelenyạ phọ eḍighi maạr dị yira omhaghamhị bidị maạr loor esi imạ araagharạ phọ abidị, k/ilọ idị bidị m’aạl ilhom obobọ u/bạl.  Kparipẹ r’oseenyạn ghan abidị, enighẹ dị yira kosereghiạn ghan dọl phọ abidị ekpẹ bọ oḍuomolhoghi phọ. Yira oḍighi iduọn phọ, abumor r’abumarani phọ ayira odi bọ dọl egelenyạ phọ ko/loghoma mudị yira roḅenhị ghan bidị mọ: “Mị u/moọgh iyaạr oḍighinom anyina.” (1 Kọr. 12:21) Kparipẹ ghụn bidị komiịn mọ yira olọgh ni bidị eegu oḅilhẹ omaghamhị maạr esi phọ bidị ophạm bọ siẹn ookpomhoghan phọ.

15. Ika kụ idị abuniin awe mooḅenhion raraạr omhiịn mọ bidị obughẹ rukumuan phọ abidị epẹ erugh phọ?

¹⁵ Iduọn asiạ phọ rekị bọ, ibadị abukaaphọm m’oghonyị siigbu otuughạ onhọn onhụ, pidị bidị otue obughẹ rukumuan phọ abidị epẹ erugh phọ. Oḍighi iduọn phọ rewạ ni mọ bidị ooḅenhion raraạr. Abumor r’abumarani phọ abuẹn phọ mowilhẹ rookpomhoghan phọ abidị, roḅạ ghan bọ runhụ emhạ phọ abidị okị rokumuan rookpomhoghan dị roḅạ ghan inhọn arunhụ, dị emhoghi ibadị abukaaphọm ilọ Omhạr phọ. (Iiḍighi 16:9) Ophọn phọ aḍighi osopha dị aKristẹn phọ abuẹn phọ kụ osopha, omhiịn mọ bidị obughẹ iiḍighi Omhạr phọ. Ii olegheri mọ resighẹ ghan ni ibadị asiạ kụ bidị ogbi okạr omhaạr oḅạ onhụ phọ, ghalhamọ r’iduọn phọ ni bidị rologhonhaạn ghan ni ḍighaạgh ookpomhoghan phọ ibadị areten. Imạ areḍeenhaan phọ r’olhegheri iyaạr phọ abidị rekparamhị ghan ni keḅilhẹ emhiighemhi ookpomhoghan phọ. Yira omaghamhị ni maạr bumor r’abumarani phọ abuẹn osighẹ bọ siloor ropinyonhọm rikiạ!

16. Eeghe iyaạr kụ edị ikumor awe phọ kopogh mem dị bidị rowạ omạ onyọ umor idiphọ okumor oye, obobọ odị raloghonhaạn ghan ḍighaạgh ikumor awe?

¹⁶ Aḍita ikumor awe ku/tuạn mọ onyọ umor o/kạr omhaạr o/ḅạ onhụ ekpisi phọ bịn owilhẹ omạ odị idiphọ okumor oye obobọ idiphọ odị raloghonhaạn ghan ḍighaạgh ikumor awe. Ewạ dị ikumor awe phọ kosighẹ ipẹ aBaibul phọ aghaạph bọ kụ opoghom mughumọ onyọ umor asianhaan ni oḍighi okumor oye obobọ odị raloghonhaạn ghan ḍighaạgh ikumor awe kparipẹ r’onhụ phọ ookpomhoghan phọ roḅạ ghan bọ.—1 Tim. 3:1-10, 12, 13; Taitọs 1:5-9.

17. Eeghe osopha kụ edị abuniin arughunotu kosopha mem dị bidị oghị enhọn eelhe?

¹⁷ Abuniin arughunotu aKristẹn phọ moḍuạ okị enhọn eelhe owạ oghoph obobọ oḍighi. Mem dị eḍighi iduọn phọ, eeni ibạm anmụny phọ kokị ghan askul dị kotughemhiọm ghan onhụ emhoom ekpisi phọ. Eeni kewạ ni kẹn mọ aburudẹ r’aburunhiin otuughạ aani onhụ emhoom ekpisi phọ obọ bidị omhiịn oḍighi. Kokaạph ika eḍighi maạr dị ookpomhoghan obobọ egu dị roḅạ ghan onhụ emhạ abidị odi? Oghẹn ookpomhoghan kụ edị eghunotu phọ kokị? Bidị kokị ookpomhoghan dị roḅạ ghan onhụ ekpisi phọ obobọ kokị opọ roḅạ ghan bọ onhụ emhạ phọ abidị ḍughụm?

18. Odaphạn Galetia 6:5, ika kụ idị yira kotue oḍeenhaan mọ yira olọgh ni eegu osopha uw-emhụ eghunotu?

¹⁸ Uw-emhụ eghunotu phọ kụ kasopha ookpomhoghan phọ opọ eghunotu phọ odị kokị bọ, loor esi iduọn ophọn phọ aḍighi bọ osopha odị, ewạ mọ odị aphụr aaḅeghiọn aphogh ipẹ kengọ bọ suọ eghunotu phọ odị. (Bạl Galetia 6:5.) Ewạ mọ yira olhọgh eegu osopha uw-emhụ eghunotu phọ. Ewạ mọ yira osighẹ aani torobọ ipẹ odị asopha bọ  kụ oghuraam eghunotu phọ siphẹ ookpomhoghan phọ ayira.—Rom. 15:7.

19. Eeghe iyaạr kụ edị aruw-emhụ eghunotu kooḅeghiọn opogh r’iiḅereghị?

¹⁹ Eeni amem etue ni eḍighi idị eghunotu phọ odi ookpomhoghan dị roḅạ ghan onhụ emhạ odẹ phọ r’onhiin phọ, kuolọ eeni ibạm anmụny phọ u/karaghị u/naghạn onhụ phọ. Eḍighi maạr dị ookpomhoghan phọ odi ekpisi dị roḅạ ghan onhụ eelhe phọ, pọ ketue ni eḍighi ipaanhaạn esi ibạm anmụny phọ onhaghanhạn ipẹ rotuughạ ghan bọ epẹ otu ituughạ phọ, ḅilhẹ r’ophoph oghị aghisigh siẹn igey phọ. Eeghe ku iḍighi? Loor esi dị eeni ibạm anmụny phọ rokị ghan askul dị rotughemhiọm ghan onhụ eelhe phọ, k/onhụ odẹ phọ r’onhiin phọ. Mem dị eḍighi iduọn phọ, abuḍiemhiom eghunotu phọ ooḅeghiọn ni ophogh ipẹ bidị kotue bọ ologhonhaạn ḍighaạgh ibạm anmụny phọ abidị oḍuraan otuman aZihova r’awe phọ odị. Eeni kewạ dị bidị kologhonhaạn ḍighaạgh ibạm anmụny phọ abidị okuamhị onhaghạn onhụ emhạ phọ abidị, obobọ eeni kewạ dị bidị koḍuạ okị ookpomhoghan dị roḍighinhom ghan onhụ phọ opọ ibạm anmụny phọ abidị onhaghạn bọ. Torobọ ipẹ uw-emhụ eghunotu phọ asopha bọ, ewạ dị ookpomhoghan phọ odị odi bọ, kolọgh eegu ḅilhẹ omaghamhị maạr nyodị r’eghunotu phọ odị.

20. Ika kụ idị yira kotue oḍeenhaan mọ yira olọgh ni eegu bumor r’abumarani phọ ayira abuẹn rotuughạ bọ omhoom onhụ phọ?

²⁰ Odaphạn oomo ariphigh phọ iphẹn yira mooḅeghiọn bọ, abumor r’abumarani odi ni ibadị arookpomhoghan dị rokparaghạ otuughạ omhoom onhụ, eeni etue ni ekparanhaạn bidị oghaạph idị bidị ootughiạn. Ghalhamọ r’iduọn phọ ni, eḍighi maạr dị yira u/pogh ghan esi dị bidị osughanham siphẹ onhụ phọ, yira komiịn ephomhoghiạn phọ bidị omhoọgh bọ oghị esi aZihova r’aḍiḅeraạn phọ abidị okumu odị. Mem dị yira omhiịn imạ araagharạ phọ abidị, yira komaghamhị ni maạr oḅilhẹ olọgh eegu bumor r’abumarani phọ abuẹn phọ, bịn yira ko/ḅẹm mọ: “Mị u/moọgh iyaạr oḍighinom anạ” loor esi dị u/kạr unaghạn onhụ phọ ayira.

21-22. Eeghe eekiạ eepoogh kụ edị yira omhoọgh?

²¹ AZihova mungọ iyira eekiạ eepoogh ophạm aani esi siẹn ookpomhoghan phọ odị. Mughumọ yira alhephiri obobọ anmariịr, odi dọl egelenyạ obobọ m’aalạn, iḍoọgh obobọ ikumor awe, mọ yira otue ni roḅạ onhụ ekpisi phọ yira odi bọ obobọ ikparanhaạn ni iyira, oomo phọ ayira omạn ni maạr esi aZihova ḅilhẹ r’esi oniin atum nyoniin.—Rom. 12:4, 5; Kọl. 3:10, 11.

²² Eḍighi idị yira kokiọm ghisigh osighẹ oḍighinhom iikiạ araraạr ituughạ phọ yira otuughạ bọ esi oghaạph omaaniọm mọ aPọl idị egbolhomaam loor phọ oye. Yira oḍighi iduọn phọ, pọ yira kopogh ghan ilọ oghiọm aghisigh, omaghamhị ghan maạr esi phọ yira ophạm bọ, ḅilhẹ r’ariisi phọ abunhọn ophamạgh aani bọ siẹn ookpomhoghan phọ aZihova.