1. Eeghe emạ eepoogh kụ edị yira rokelhọm?

P’EEGHE emạ eepoogh dị yira omhoọgh oḍighom aani ookpomhoghan phọ aZihova! Yira okạr kụ rokelhọm eephọ r’oḅaạl olhoghi iduọn yira rooḅereghị bọ aZihova siẹn igbo abumor r’abumarani phọ ayira? Nạ apạm ḍighen esi siẹn ookpomhoghan phọ aZihova?

2. Eeghe oghaạph omaaniọm kụ edị otelhedom mọ aPọl aḍighinhom siphẹ iniin arinyạ phọ ophum bọ nyodị ogẹ?

² Yira kotuughạ ni ibadị araraạr siẹn emhuoghaạph phọ ephẹn phọ esi oghaạph omaaniọm mọ otelhedom mọ aPọl aḍighinhom bọ siphẹ iniin arinyạ phọ ophum bọ nyodị ogẹ. Siphẹ arinyạ phọ aPọl agẹ bọ, odị atomaạm ookpomhoghan phọ loor oye. Odị aḅilhẹ kẹn atomaạm torobọ oye siẹn ookpomhoghan phọ riisi aloor phọ.—Rom. 12:4-8; 1 Kọr. 12:12-27; Efẹ. 4:16.

3. Eeghe iraạr araraạr ituughạ kụ edị yira kooḅeghiọn siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kooḅeghiọn iraạr ikpanhạ araraạr dị yira kotue otuughạ esi oghaạph omaaniọm mọ aPọl. Eḅẹl phọ, yira kotuughạ olegheri mọ torobọ onyọ ayira apạm ni esi * dị emhạn maạr siẹn ookpomhoghan phọ aZihova. Edị etum siẹn, yira kooḅeghiọn idị yira kotue oḍighi, eḍighi maạr dị ikparanhaạn iyira olhegheri esi phọ yira ophạm bọ siẹn ookpomhoghan phọ. Omhunhenhiom iraạr, yira kooḅeghiọn iyaạr phọ eḍighi bọ kụ emhạn bọ maạr dị yira kokumuan ghan torobọ amem orue omhunhenhi oḍighi phọ yira ophạm bọ siẹn ookpomhoghan phọ Enhaạn.

4. Aḍinyạ aRom 12:4, 5 itughemhị iyira eeghe?

⁴ Eḅẹl iyaạr dị yira kotue otuughạ siẹn oghaạph omaaniọm mọ aPọl pọ, torobọ onyọ ayira apạm ni esi siẹn eghunotu phọ aZihova. APọl amhiighom oghaạph omaaniọm mọ odị esi oḅẹm mọ: “Esi kirokirọ kụ itulughan bọ eḍighi ḍiniin phọ aloor phọ, kụ oḍighi oIọ esi r’esi. Igina phọ kẹn ni, ghalamọ idiphọ aḍita phọ ayira ebụgh bọ ni, yira moḅophoghạn Kraist oḍighi ḍiniin aIoor, kụ oniin atulan nyoniin idiphọ ariisi aIoor phọ.” (Rom. 12:4, 5) APọl rakaạph ghan eeghe siẹn phọ? Mọ ghalhamọ r’iduọn torobọ onyọ ayira amhoọgh bọ ni oḍighi olọ odị siẹn ookpomhoghan phọ, oomo ayira omạn ni maạr.

5. Eeghe “inmo” kụ edị aZihova m’angọ ookpomhoghan phọ?

⁵ Mem dị nạ raatughiạn ilọ awe dị ophạm riisi siẹn ookpomhoghan phọ, olhoghi anạ kakiil akị buẹn oḍiemhiom bọ. (1 Tẹs. 5:12; Hib. 13:17) Etu ni inẹ mọ dị eego esi aKraist, aZihova m’angọ “inmo” we siẹn ookpomhoghan phọ Odị. (Efẹ. 4:8) Awe phọ Enhaạn angọ bọ “inmo” phọ eḅaramaạm Loor phọ Repogh bọ, bulọgh ḍighaạgh aLoor phọ Repogh bọ, Ruukụ phọ Repogh bọ Ilạ Agadạ phọ, bupoghom eghir, buphẹ rotughemhị ghan bọ ruskul aBaibul phọ, ikumor awe ookpomhoghan phọ, ḅilhẹ r’abuphẹ rologhonhaạn ghan bọ ḍighaạgh ikumor awe phọ. Uwaloor iigbia phọ aZihova kụ amạ oomo abumor phọ abuẹn phọ ophogh oḅilhẹ okparamhị iyool phọ aZihova omhạn bọ maạr siẹn ookpomhoghan phọ.—1 Pit. 5:2, 3.

6. Odaphạn 1 Tesalonikạ 2:6-8, eeghe kụ edị abumor dị uwaloor iigbia phọ m’amạ rokparaghạ ghan oḍighi?

⁶ Uwaloor iigbia phọ ramạ ghan bumor ophạm iiḍighi kirokirọ siẹn ookpomhoghan phọ. Idiphọ akirokirọ ariisi aloor phọ, idiphọ araghaạgh r’aruwol rekumuan ghan bọ ongoọm asuọ oomo aloor phọ, kụ idị abumor phọ abuphẹ phọ uwaloor iigbia phọ m’amạ bọ, rokumuan ghan ongoọm asuọ oomo ookpomhoghan phọ. Bidị ro/ḍighi ghan iduọn phọ pidị awe osẹph bidị. Kparipẹ ghụn, bidị rokparaghạ ghan olhọgh ophophe ḅilhẹ r’okparamhị abumor r’abumarani phọ. (Bạl 1 Tesalonikạ 2:6-8.) Yira rosẹph ni aZihova ongọ ayira bumor dị osianhaan, kụ osighẹ ḍiḅeraạn abunhọn kụ oḍighi eḅẹl!

7. Ighẹn aḍisẹph kirokirọ kụ edị ibadị abuphẹ odi bọ rukumuan oomo amem mọ rokelhọm ghan?

⁷ Otue ni omạ buniin siẹn ookpomhoghan phọ okumu idiphọ amisonarị, okọy eten dị agbatanhaạn, obobọ okọy eten oomo amem. Okạr oghaạph, abumor r’abumarani oomo isiẹn aḅirinhi phọ mosighẹ oomo amem mọ abidị olọgh ogbạ ikpo onhụ phọ ḅilhẹ r’oḍighi awe bumatuạn. Arukumuan phọ abidị melhoghonhaạn ḍighaạgh ibadị oḍighi aani abumatuạn aZizọs Kraist. Ghalhamọ r’iduọn abukaaphọm mọ abuphẹ phọ u/moọgh bọ ni ruphua, aZihova m’asephọm ni bidị ibadị igey araraạr. (Mạk 10:29, 30) Yira opomhoghiạn iikiạ bumor r’abumarani phọ abuẹn phọ, kụ olhoghi ayira aḅaạl li agey iduọn bidị oḍighi aani bọ pakirị ookpomhoghan phọ!

8. Eeghe kụ iḍighi kụ torobọ okaaphọm iiḅi iinhaghạn phọ amhạn bọ ni maạr esi aZihova?

⁸ Ogina abumor phọ abuphẹ phọ omaaghị bọ ḅilhẹ r’abuphẹ odi bọ rukumuan oomo amem mọ bịn kụ uphạm riisi siẹn ookpomhoghan phọ ḍughụm? Eeye! Torobọ okaaphọm iiḅi iinhaghạn phọ, amoọgh ni maạr oḍighinhom esi Enhaạn r’ookpomhoghan phọ. (Rom. 10:15; 1 Kọr. 3:6-9) Okạr oghaạph, aḍinhiin aḍikpanhạ aḍiigbu ookpomhoghan phọ pọ oḍighi awe bumatuạn Uw-emhoọgh phọ ayira, Zizọs Kraist. (Mat. 28:19, 20; 1 Tim. 2:4) Oomo abukaaphọm iiḅi iinhaghạn phọ, bulọ moḍiiny muụm r’abulọ ko/ḍiiny, rokparaghạ ghan ni osighẹ oḍighi phọ ophọn oḍighi eḅẹl siphẹ adọl aghuḍum mọ abidị.—Mat. 24:14.

9. Eeghe kụ iḍighi kụ yira opomhoghiạn bọ iikiạ bumarani phọ odi bọ siẹn ookpomhoghan phọ?

⁹ AZihova akuenhi ni bumarani phọ esi ongọ abidị oḍighi dị amhạn maạr siẹn ookpomhoghan phọ. Odị amaghamhị ni maạr nmariịr ilhom,  burunhiin, ikpukelhe anmariịr, ḅilhẹ r’abumarani dị k’/aạl ilhom dị oḅạr kụ rokumu nyodị. Aḍinyạ iigbia phọ egoolhạ ni nmariịr dị ogbatanhaạn dị oḍighi ghan ipẹ eḅeraạn bọ Enhaạn. Ekaạph ilọ abidị idiphọ anmariịr osụ-olhoghi, omheeraam, oophugh, akpọ oḅio, onmo ghan inmo oḅilhẹ oḍighi ghan igey iiḍighi. (Luk 8:2, 3; Iiḍighi 16:14, 15; Rom. 16:3, 6; Fil. 4:3; Hib. 11:11, 31, 35) P’eeghe idị yira rosẹph aZihova, omhoọgh anmariịr dị omhoọgh aani imạ araagharạ phọ iphẹn siẹn ookpomhoghan phọ!

10. Eeghe kụ iḍighi kụ yira omhaghamhị bọ maạr buphẹ asiạ phọ m’eghị bọ anyụ?

¹⁰ Yira oḅilhẹ kẹn omoọgh ikumor awe dị asiạ phọ m’eghị anyụ iboom siẹn ookpomhoghan phọ. Iniin arookpomhoghan omoọgh ikumor awe r’ikumor anmariịr dị asiạ phọ m’eghị ni anyụ iboom, dị oḅạr kụ osighẹ oomo adọl aghuḍum mọ abidị rokumuom aZihova. Abuniin abudị asiạ phọ m’eghị ni anyụ iboom ke/bia onhaghạn bọ igey phọ. Toroboiperolbọ, abuphẹ phọ m’okpọ bọ rosoman ghan ni iiḅaghamhị e/moon loor aḍikpọ phọ abidị. Iiḅaghamhị phọ iphẹn phọ ketue ni ekikima ipẹ bidị kotue bọ oḍighi siẹn ookpomhoghan phọ r’ogbạ ikpo onhụ phọ. Ghalhamọ r’iduọn phọ ni, abuphẹ mokpọ bọ roḍighi ghan ni ipẹ bidị kotue bọ epẹ erugh phọ, kụ rosighẹ ghan oomo inyaạm mọ bidị omhoọgh bọ koḍighinhom okparamhị r’otughemhị abunhọn! Kụ yira rokelhọm ghan ni raraạr phọ ipẹ bidị motuughạ bọ. Okạr agey, bidị onighẹ ni esi aZihova ḅilhẹ r’ayira.—Prov. 16:31.

11-12. Ika kụ idị eḍeenhaan iḍoọgh phọ mekparamhị nyinhạ siẹn ookpomhoghan phọ?

¹¹ Kokaạph aani ika ilọ iḍoọgh phọ. Bidị rosoman ghan ni ibadị ipaanhaạn, iduọn bidị ropoph bọ komhanhạm siẹn aḅirinhi phọ aSetan Eru phọ kụ raaḅakị bọ, ḅilhẹ ikarạph itughemhị phọ odị emuza bọ. (1 Jọn 5:19) Ghalhamọ r’iduọn phọ ni, rilhọgh ghan ni iyira kephophe mem dị yira omhiịn iḍoọgh phọ abuẹn phọ dị ropanyanhaạn sipuru epẹ otu ituughạ phọ, romite epẹ erugh phọ, kụ rogbạ ilọ omheeraam mọ abidị r’akpọ oḅio. Ii, nyinha iḍoọgh, nyinha epạm ni esi dị emhạn maạr iboom siẹn ookpomhoghan phọ aZihova!—Ps. 8:2.

¹² Toroboiperolbọ, ekparanhaạn ni buniin abumor r’abumarani omheeraam mọ bidị opạm aani ni esi dị emhạn maạr siẹn ookpomhoghan phọ. Eeghe kụ ketue eloghonhaạn ḍighaạgh torobọ  onyọ ayira olhoghoma mọ onọ apạm ni esi siẹn ookpomhoghan phọ? Uguạ ooḅeghiọn ophogh.

13-14. Uḍighi ika kụ abuniin kotue bọ ni ootughiạn mọ bunọ u/pạm esi siẹn ookpomhoghan phọ?

¹³ Omhunhenhiom iyạl iyaạr ituughạ siẹn oghaạph omaaniọm mọ aPọl, iitughianhạm iyira iiḅaghamhị dị ibadị osoman ḍio arodon, rekparanhaạn ghan bidị omheeraam mọ bidị opạm ni esi siẹn ookpomhoghan phọ. APọl agẹ mọ: “Eḍighi iyaạr dị edạ owol phọ eḅẹm mọ, ‘Mị u/tu bọ ḍighaạgh, pọ mị u/lo aani siphẹ aloor phọ,’ iduọn phọ bịn i/mirighan nyodị orọl aani isiphẹ aloor phọ. Ḅilẹ kẹn aḅeri phọ kụ aḅẹm mọ, ‘Mị u/tu bọ ekpeḍien, pọ mị u/lo aani siphẹ aloor phọ,’ iduọn phọ bịn i/mirighan nyodị orọl aani isiphẹ aloor phọ.” (1 Kọr. 12:15, 16) APọl rakaạph ghan eeghe siẹn phọ?

¹⁴ Eḍighi maạr dị nạ asighẹ loor anạ atomaạm ghan bunhọn, eeni nạ ka/miịn mọ nạ raḍighi aani ghan ni iyaạr siẹn ookpomhoghan phọ. Abuniin siẹn ookpomhoghan phọ omaạr itughemhị, omaạr oḅoonomhị araraạr, obobọ omaạr olhọgh abunhọn ophophe r’okparamhị. Eeni nạ atue ni aatughiạn mọ nạ o/rue oḍighi aani ipẹ bidị roḍighi bọ. I/beeph, reḍeenhaan ghan osooromhi aloor ḅilhẹ r’olhegheri okụ. (Fil. 2:3) Kuolọ ewạ ni mọ gona loor. Oomo amem kụ nạ asighẹ ghan loor anạ atomaạm bunhọn, nạ katue ni aḅonyonhu azuan. Idiphọ aPọl aghaạph bọ, nạ atue ni aatughiạn mọ nạ o/phạm aani esi siẹn ookpomhoghan phọ. Eeghe kụ ketue elhoghonhaạn nyinhạ ḍighaạgh okpạr opu odọ iitughiạn phọ ipẹ phọ?

15. Odaphạn 1 Korịnt 12:4-11, ewạ mọ torobọ onyọ ayira alhọgh elhegh eeghe idị egbolhomaam ruunmo dị eeni yira omhoọgh?

¹⁵ Ḅeeḅeghiọn aphogh ephigh phọ ephẹn phọ: AZihova angọ Kristẹn oḅẹl okuron asiạ phọ ruunmo oḍighinhom iiḍaạny kirokirọ dị eego esi uwaloor iigbia phọ, kuolọ k/oomo aKristẹn kụ umhoọgh ghan iniin phọ inmo phọ. (Bạl 1 Korịnt 12:4-11.) AZihova angọ bidị ruunmo r’araraạr oḍighi kirokirọ, kuolọ torobọ onyọ aKristẹn aphạm ni oḍighi. Rodon, yira u/moọgh aani ruunmo oḍighinhom iiḍaạny dị eego esi uwaloor iigbia phọ. Kuolọ idiphọ erọl bọ mem mọ opọ phọ,  kụ idị edi aani ni ḍio arodon. Eeni oomo ayira ko/moọgh iniin phọ asighalhanyạ phọ, kuolọ oomo ayira omoọgh ni maạr oḍighinhom esi aZihova.

16. Oghẹn oroma otelhedom mọ Pọl kụ edị ewạ mọ yira osighẹ oḍighinhom?

¹⁶ Kparipẹ rosighẹ aloor ayira otomaạm abunhọn aKristẹn, ewạ mọ osighẹ oḍighinhom oroma phọ ophum bọ otelhedom mọ Pọl ogẹ, eḅẹm bọ mọ: “Torobọ oye amaạr aaḅeghiọn ezọ phọ odị aphogh! Kụ kparipẹ r’osighẹ aIoor phọ odị omaaniọm onọn oye, odị asighẹ ghan ghụn oIoghi odị kụ amitenom ezue!”—Gal. 6:4.

17. Eeghe asuọ kụ edị yira komoọgh eḍighi maạr dị yira odaphạn oroma phọ aPọl?

¹⁷ Eḍighi maạr dị yira odạph oroma phọ ophum bọ Pọl ogẹ, kụ ooḅeghiọn roozọ phọ ayira ophogh, eeni yira komiigh ni omhiịn aruunmo r’asighalhanyạ dị egbatanhaạn dị yira omhoọgh dị abunhọn u/moọgh aani. Esi omaạm, eeni etue ni eḍighi idị okumor oye phọ o/kạr omhaạr ongọ oghaạph, kuolọ amaạr agey oḍighi awe bumatuạn. Obobọ o/kạr omhaạr oḅoonhomhị araraạr idiphọ abueriphọ ikumor awe phọ siphẹ ookpomhoghan phọ, kuolọ aḍighi okumor oye dị amhoọgh igbiririph r’ephomhoghiạn dị abumor r’abumarani phọ ro/kiilhaan ghan oghị oteẹny opuru oroma aBaibul. Obobọ olegheriom nyodị idiphọ oye dị ralọgh ghan ruuruen otu. (Hib. 13:2, 16) Mem dị yira okạr olhọgh elhegh sighalhanyạ r’aruunmo phọ ayira, yira komoọgh ni iyaạr otuạn olhoghoma imạ ilọ ipẹ yira rotue bọ koḍighi siẹn ookpomhoghan phọ. Bịn yira ko/kạr ghan mun omoọgh eḍịm okị esi abumor dị omhoọgh ruunmo dị yira u/moọgh aani.

18. Ika kụ idị yira kotue onighemhị sighalhanyạ phọ ayira?

¹⁸ Etigheri esi phọ torobọ onyọ ayira aphạm bọ siẹn ookpomhoghan phọ, oomo phọ ayira omhoọgh eephuạ obughẹ iiḍighi phọ ayira oḅilhẹ onhighemhị asighalhanyạ phọ ayira. Olhoghonhaạn ayira ḍighaạgh onhighemhị iiḍighi phọ ayira, aZihova m’ungọ iyira itughemhị dị eego esi oḍighom mọ odị. Esi omaạm, siphẹ ituughạ ogboku awiki phọ, rutughemhị ghan iyira ilọ oḍighi agey epẹ erugh phọ. Nạ akuamhị ni rasighẹ kaḍighinhom itughemhị phọ ipẹ phọ ḍughụm?

19. Ika kụ idị nạ kateẹny ḍiigbu oghị aani School for Kingdom Evangelizers phọ?

¹⁹ Enhọn esi itughemhị pọ aSchool for Kingdom Evangelizers phọ. Askul phọ ophọn phọ olọ abumor r’abumarani dị odi rukumuan oomo amem, dị odi igbo 23 kụ eghị esi 65 asiạ. Etue ni ekịgh esi anạ mudị nạ ka/tue ateẹny ḍiigbu phọ aḍiẹn phọ. Kuolọ, kparipẹ rogoolhạ araraạr phọ ipẹ eḍighi bọ kụ nạ ka/tue bọ akị aani, goolhạ ghụn riphigh phọ eḍighi bọ kụ nạ rawạ bọ ni oghị aani askul phọ opọ phọ. Kụ agbiighi raraạr dị kelhoghonhaạn nyinhạ ḍighaạgh osianhaan. R’olhoghonhaạn aḍighaạgh aZihova ḅilhẹ r’ikuph phọ ipẹ nạ kalọgh bọ, nạ katue ni aḍighi iyaạr phọ epẹ eghịgh bọ mudị nạ ka/tue aḍighi phọ.

20. Eeghe iyaạr kụ edị yira kotue otuughạ siphẹ Rom 12:6-8?

²⁰ Iyaạr ituughạ dị emhunhenhiom iraạr siphẹ oghaạph omaaniọm mọ aPọl, omiịn siẹn Rom 12:6-8. (Bạl.) Siẹn phọ aPọl aḅilhẹ amạ aḍeenhaan mọ torobọ onyọ ayira siẹn ookpomhoghan phọ amoọgh ni ruunmo kirokirọ. Kuolọ nyiidiphọ odị akạr aghaạph alhọgh iiphaghamhiọm mọ yira osighẹ oḍighinhom torobọ inmo phọ yira omhoọgh bọ olhọgh ophophe oḅilhẹ okparamhiọm ookpomhoghan phọ.

21-22. Eeghe iyaạr kụ edị yira otuughạ esi aRobert r’aFelice?

²¹ Ooḅeghiọn eḍeenhaan onyọ umor dị oghol mọ Robert. Mem dị odị akumuan ḍiiruen ade amhạn, usighẹ ni nyodị oghị Betẹl epẹ eelhe phọ odị. Ghalhamọ r’iduọn abumor phọ oḅenhị bọ ni nyodị mọ i/ḍighi idị oḅẹm mọ odị o/rue oḍighi oḍighi phọ, odị aḅẹm mọ: “Ekarạph eten phọ epẹ mị aphogh ghan bọ loor phọ amhị—mọ mị u/moọgh maạr oḍighinhom—iḍighi ni idị esi ibadị asiạ mị aatughiạn ghan mọ mị u/ḍighi agey oḍighi phọ  amhị. Imhoọgh ni mem dị mị awạ ghan owilhẹ arukumuan aBetẹl phọ amhị.” Ika kụ idị onyọ umor phọ ophọn phọ aḅilhẹ amhoọgh ibo phọ odị? Oniin okumor oye aatughianhạm nyodị mọ aZihova rasighẹ ghan egbaany eepoogh arukumuan phọ ayira kụ utughemhiọm iyira, pidị yira okạr omoọgh maạr oḍighinhom siẹn eepoogh arukumuan phọ yira omhoọgh bọ nyiidiphọ. ARobert alhọgh ni elhegh mọ ewạ dị odị kabilhẹ ophogh ghan ipẹ m’eten bọ, kụ amiigh ophogh ghan ipẹ odị katue bọ aḍighi ghan nyiidiphọ.

²² Umor phọ Felice Episcopo asoman aani ni iniin phọ ipaanhaạn phọ. Odị r’anhịr odị umhạn askul aGilead lhạ phọ 1956 kụ okumuan ghan idiphọ abupoghom eghir epẹ Bolivia. Kụ lhạ phọ eḍighi bọ 1964 bidị oru omhoọgh oọny. AFelice aḅẹm mọ: “Iḍighi ni ipaanhaạn owilhẹ oḍighi phọ ophọn akạr bọ amhạn maạr esi ayoor. Okạr oghaạph, esi aḍiniin alhạ mị ulhoghoma ghan mabi esi iphẹn mị aḍighi bọ. Kuolọ r’olhoghonhaạn aḍighaạgh aZihova, mị unme ni iitughiạn phọ ipẹ phọ bịn mị aghiọm ghisigh omhoom oḍighi phọ amhị, idiphọ odẹ.” Nạ raloghoma aani ghan ni iphẹn aRobert obobọ aFelice olhoghoma bọ ḍughụm? Nạ raḅonyonhu ghan ni kazuan loor esi dị nạ o/phạm mun roopoogh phọ ipẹ nạ aphạm ghan bọ mem dị eten ḍughụm? Eḍighi idiphọ, nạ kamoọgh ni oḅaạl olhoghi eḍighi maạr dị nạ agbon ghụn ipẹ nạ katue bọ aḍighi nyiidiphọ okumu aZihova ḅilhẹ r’abumor phọ. Moọgh ghan iyaạr dị nạ kaḍighi torobọ amem, sighẹ ruunmo r’asighalhanyạ phọ nạ amhoọgh bọ aḍighinhom olhoghonhaạn aḍighaạgh bunhọn, bịn nạ kamoọgh ni ibo idiphọ nạ ralọgh bọ ookpomhoghan phọ kaphophe.

23. Eeghe iyaạr kụ edị ewạ mọ yira olhọgh mem oḍighi, kụ yira kooḅeghiọn eeghe siphẹ emhuoghaạph phọ etum bọ siẹn?

²³ Torobọ onyọ ayira amạn ni maạr esi aZihova. Odị rawạ ni mọ yira oḍighom aani pakirị eghunotu phọ odị. Eḍighi maạr dị yira olhọgh mem ogbirima ghan ilọ ipẹ yira kotue bọ olọgh opophe bumor r’abumarani phọ ayira, kụ olọgh inyaạm oḍighi ipẹ phọ omiteom, kekpạr ri kụ yira ologhoma mọ yira u/moọgh maạr oḍighinhom! Kuolọ kokaạph aani ika ilọ eten phọ epẹ yira ophogh bọ bunhọn siẹn ookpomhoghan phọ? Ika kụ idị yira kotue oḍeenhaan mọ yira osereghiạn ni bidị? Siphẹ emhuoghaạph phọ etum bọ siẹn, yira kooḅeghiọn ni oghaạph phọ opọ phọ.