Ariphigh phọ emạ eḍeenhaan mọ aZizọs aḍighi Uw-emhụ Opinyọn Rikiạ mem mọ odị aḍiiny bọ muụm mọ lhạ phọ 29 C.E. Yira ulhegheri ika? Mem mọ aZizọs aḍiiny bọ muụm mọ, odị asighẹ ni loor odị aphighironhọm ekiạ siphẹ ekpạn phọ emerenyạn bọ ‘itooghị’ phọ Enhaạn. (Gal. 1:4; Hib. 10:5-10) Eḍighi bọ edị ekpạn phọ epẹ phọ emerenyạn bọ iyaạr, merọl bọ ni esighẹ k’amem mọ aZizọs aḍiiny bọ muụm mọ kụ rekị, pọ kotue kẹn ni oḅẹm aani mọ ogbogh otu iiḅereghị aruwaloor phọ—amherenyạn bọ iikolobian iserereẹny iiseeny phọ k’aZihova ekpasị bọ esi ekiạ etagharạn phọ—arọl aani ni k’amem mọ amuphẹ phọ. Ekpạn phọ eḍighi ni ephigh iyaạr siphẹ otu iiḅereghị aruwaloor phọ.—Mat. 3:16, 17; Hib. 5:4-6.

Iwạ ni mọ uw-emhụ opinyọn rikiạ arọl siphẹ ogbogh otu iiḅereghị aruwaloor phọ. Iduọn kụ iḍighi kụ aZihova asighẹ ni “UwaIoor Iigbia phọ r’inyaạm” asagharanhạm Zizọs elo obọ odị aḍighi uw-emhụ opinyọn rikiạ phọ. (Iiḍighi 10:37, 38; Mạk 1:9-11) Ghalhamọ r’iduọn phọ ni, ika kụ idị yira kotue bọ okuphom owol mọ momạ ni Zizọs idiphọ Uw-emhụ Opinyọn Rikia kụ egbi bọ oteẹny amem dị odị amhugh aḅilhẹ aḅetenu esi aḍuugh phọ? Yira omiịn ephigh otuạn omheeraam iphẹn phọ esi ooḅeghiọn eḍeenhaan phọ Eerọn r’abuphẹ osighẹ bọ esi phọ odị, buẹn phọ okumu ghan bọ idiphọ abupinyọn rikiạ eeḍiạn Olhogh phọ aMozis.

Odaphạn Olhogh phọ, uw-emhụ opinyọn rikiạ phọ bịn kụ katue aḍigh Ephạn phọ siphẹ ogbogo iiḅereghị phọ, ipẹ reten kụ agbi oḍigh isiphẹ Ephạn otu iiḅereghị phọ. Ogorogorọ ukpe kụ asoph ghan Ephạn phọ. Aḍio Otuạn Iiḅereghị Orọl Okoọny phọ bịn kụ edị opinyọn rikiạ phọ akpor ghan ogorogorọ ukpe phọ aḍigh. (Hib. 9:1-3, 6, 7) Idiphọ ophụr bọ ni osagharạn elo Eerọn r’abuphẹ osighẹ bọ esi phọ odị kụ ogbi bọ okpor ogorogorọ “ukpe” ogbogo iiḅereghị phọ, kụ edị omạ aani Zizọs idiphọ Uw-emhụ Opinyọn Rikiạ ogbogh otu iiḅereghị aruwaloor phọ kụ odị agbi bọ omhugh otigh aani ‘ukpe phọ, aḍighi bọ ḍizu phọ odị’ oten ogheel k’akẹ. (Hib. 10:20) Esi ephigh phọ ephẹn phọ, otelhedom mọ aPọl aghaạph ilọ aZizọs mọ odị maru “idiphọ uw-emhụ opinyọn rikiạ” atelhe aḅeẹny ogbogo dị “abụgh apu, aḅiIẹ aseIeman apu oḅẹI phọ opọ okpeom bọ rukpe phọ. Awe kụ u/Iọgh,” kụ akị aḍigh epẹ “k’akẹ.”—Hib. 9:11, 24.

Mem mọ aZizọs agheel bọ k’akẹ aḍeenhaan ipẹ odị masighẹ bọ ghuḍum mọ odị amhạn bọ maạr aphighironhọm ekiạ loor ayira, odị agbatạn ni eḅẹl edạ phọ ilọ ophighi imhoom iyọ phọ. Iniin phọ aradạ phọ kụ iphighi bọ iyọ phọ eḅilhẹ eḍighi idị omhiigh osighẹ oḍighinhom. Ugbariọn ighẹn aradạ oḍighi iduọn phọ?

Eḅẹl phọ, aZizọs aghị ni ateẹny aZihova; edị etum siphẹ, aZizọs aḅọgh ni ekiạ phọ odị emhạn bọ maạr angọ aZihova; ekureriom mọ, aZihova asighẹ ni iḅaạl phọ aZizọs ozu bọ emhạn bọ maạr. Uphụr ri ogbariọn radạ phọ iphẹn phọ kụ ogbi bọ omhiigh osighẹ oḍighinhom imhoom iyọ phọ.

ABaibul phọ iyira u/ḅenị okạr amem mọ aZihova asighẹ bọ ekiạ etagharạn phọ aZizọs. Iniin phọ kẹn ni, yira ko/tue omạ okaraghị amem mọ ophighi bọ imhoom iyọ phọ ḅilhẹ r’amem mọ omhiigh bọ osighẹ oḍighinhom. Kuolọ toroboiperolbọ, yira olegheri ni mọ aZizọs agheel k’akẹ ḍioph aḍughul otu kụ egbi oteẹny aPentecost. (Iiḍighi 1:3) Igbo amem mọ amuphẹ phọ kụ edị aZizọs asighẹ bọ ekiạ phọ odị angọ aZihova, kụ aZihova asighẹ ni. (Hib. 9:12) Ariphigh phọ iphẹn phọ ikạr eganana Pentecost. (Iiḍighi 2:1-4, 32, 33) Pọ kụ amem dị imhoom iyọ phọ ekạr emhiigh oḍighi oḍighi.

Esi ookaragh, uphighi imhoom iyọ phọ oḅilhẹ omhiigh osighẹ oḍighinhom mem mọ aZihova asighẹ bọ iḅaạl phọ aZizọs ozu bọ emhạn bọ maạr. Iyọ phọ r’Uw-emhụ Opinyọn Rikiạ phọ umhiigh ni oḍighi oḍighi, idiphọ aZizọs kụ aḍighi bọ Omeerạ Enye.—Hib. 7:25; 8:1-3, 6; 9:13-15.