Umhạr imhị epẹ St. Paul, Minnesota, U.S.A., lhạ phọ 1954, otọ k’ayoor utuụgh ni omhoọgh ikpoki, kụ ughị ghan Roman Catholic. Mị kụ omhunhenhiom iyạl oọny siphẹ oogh anmụny phọ bidị omhạr bọ. Mị ughị ghan elimetirị skul aCatholic, kụ mị kụ ulhoghonhaạn ghan ḍighaạgh priest phọ. Ghalhamọ r’iduọn phọ ni mị u/kạr ghan u/legheri Baibul phọ. Ghalhamọ r’iduọn mị amheeraam bọ ni mọ Enhaạn edi ni dị elhẹm torobọ iyaạr, mị u/kạr ghan u/moọgh omheeraam siphẹ asiosị phọ.

Ḍiḅẹl alhạ phọ mị aḍigh bọ askul iilhogh phọ oghol bọ mọ William Mitchell, Abugbaanhaạn AZihova uru ni k’ayoor. Bidị oru bọ mị raatolhogh ghan rusuomạ amhị, kụ bidị oḅẹm mọ bunọ koḅula enhọn amem. Mem mọ bidị oḅula bọ, mị upuru ni bidị iyạl asipuru: “Eeghe kụ iḍighi kụ abugey awe kụ ro/moọgh ghan bọ igbogh asidọl siẹn aḅirinhi phọ?” ḅilhẹ “Eeghe kụ edị oye katue aḍighi kụ amoọgh oḅaạl olhoghi?” Bidị ungọ ni imhị ḍinyạ phọ oghol bọ mọ The Truth That Leads to Eternal Life r’aNew World Translation of the Holy Scriptures, imhoọgh ghan okpogho dị aḍighi green dị raamhaghaghạn. Mị umheera kẹn mọ bidị  oru ghan utughemhị imhị Baibul phọ. Ipẹ phọ ikạr kụ ekpenyon riḍien amhị. Olhoghi amhị aḅaạl li agey olhegheri mọ Omhạr phọ k’Enhaạn aḍighi gomẹt dị katue aalemhi sidọl awe phọ siẹn ade phọ. Mị umhiịn ni mọ itooghị awe ke/rue emhoọgh ekol, kparipẹ ghụn ekọm eephinha, imhinhimhiịn, ekeeny ooruẹn, ḅilhẹ r’iiḅaghamhị kụ emuzeḍi siẹn ade phọ.

Mị uḅọgh loor amhị angọ aZihova emhiighom alhạ phọ 1982, kụ mị aḍiiny muụm ookpomhoghan eephugh phọ ophạm bọ epẹ St. Paul Civic Center, emhuoghaạph phọ eḅẹm bọ mọ “Kingdom Truth.” Mị uḅilhẹ ni aḅula siphẹ civic center phọ wiki phọ opọ atum bọ siphẹ ogẹ ezạm asiloyạ phọ. Emhiighom unwanyụ October, uḅenhị ni imhị mọ mị mapasị ezạm mọ, asi amananaạm oḍighi aani onyọ aLoyạ.

Siphẹ ookpomhoghan eephugh phọ “Kingdom Truth”, mị uuzuanaan ni onyọ umor dị oghol mọ Mike Richardson, odị odi aani ghan Betẹl epẹ Brooklyn. Kụ odị uḅenhị imhị mọ mophighi ofịs iilhogh epẹ emhụ agadạ phọ. Mị uutughiạn ni ikpo onhụ ophoony oye olọ Ethiopia phọ ogẹ bọ siphẹ Iiḍighi 8:36, kụ mị apuruan loor mọ, ‘eeghe kụ risophoghom imhị oghị okumuan aani siphẹ Ofịs Iilhogh phọ?’ Kụ mị agẹ aani ḍien okumuan aani epẹ Ḅetẹl.

Iiḅaghamhị ni iboom olhoghi odẹ r’onhiin amhị iduọn mị maḍighi bọ onyọ Ogbaanhaạn AZihova. Odẹ amhị upuru ni imhị iyaạr dị aWatchtower kukpẹ ghan imhị, eḍighi maạr dị mị akumuan ghan r’abidị. Kụ mị aḅenhị nyodị mọ eḍighi oḍighi dị mị kụ aḅọgh loor amhị angọ. Mị aḅenhị nyodị mọ kungọ ghan imhị iịny ikpoki bịn torobọ unwanyụ, idiphọ ongọ ghan bọ torobọ oye dị odi ghan Betẹl mem mọ amuphẹ phọ.

Mị romadạn iniin iiḍighi dị mị aphamạgh, mị umhiigh ni rukumuan aBetẹl epẹ Brooklyn, New York, lhạ phọ 1984. Usighẹ imhị olhọgh epẹ Ofịs Iilhogh phọ. Mị kaḅẹm mọ ikạr bịn kụ etuụgh mem mọ opọ ekasiạn bọ kụ emite.

Ugho otu areephegh phọ aStanley epẹ Jersey City, New Jersey, lhạ phọ 1983 unwanyụ aNovember. Abumor phọ ughị ni oboọr iikpọ ilọ oḅilhẹ oselhemhi ikpamaghinheẹn alaịt r’ikpamaghineẹn amuụm esi phọ. Mem mọ bidị oghị bọ oteẹny buọ itooghị ekpisi phọ, abumor phọ uḅenhị ni buọ itooghị phọ mọ bidị rowạ osighẹ esi phọ oḍighi esi dị kopạm ghan ookpomhoghan eephugh Abugbaanhaạn AZihova. Iphẹn phọ iḍighi ni iboom iiḅaghamhị, loor esi dị awe phọ romaaghị ghan bọ riisi dị kodoghoḍi ruutu uḅẹm mọ olhoghoḍị ghan ruutu iiḅereghị ekool dị awe orugh bịn. Kuolọ otu areephegh phọ Stanley arọl pakirị epẹ aḍighi phọ, esi iduọn phọ abuọ itooghị phọ u/meera mọ bidị oḍighi oḍighi phọ. Abumor phọ uḅilhẹ ni oteẹny buọ itooghị phọ kuolọ i/ḅọph.

 Siphẹ oḅẹl awiki phọ mị aghị aani bọ Betẹl, oḍighom mọ ugbo ni ogbo buọ itooghị ekool phọ siphẹ otu iiruẹn eelhe phọ, loor iduọn bidị u/meera bọ mọ oselhemhi esi phọ. Eḍighi bọ edị purukụ mị akumuan iyạl asiạ siphẹ otu iiruẹn phọ St. Paul, Minnesota, mị ulhegheri aani ni ilọ aḍighiton phọ. Oniin onyọ iilhogh ayoor aḅetenhu ni kụ aḅẹm mọ rosighẹ ghan ni esi phọ koḍighinhom reephegh kirokirọ idiphọ asifim r’asuọr. Eeghe kụ iḍighi kụ ko/tue bọ osighẹ opamạm ekụ iiḅereghị? Otu iiruẹn phọ uuḅeghiọn ni raghaạph phọ ophogh kụ osoph mọ aJersey City mosophoghom eerẹgh ooseeny Enhaạn phọ ayira. Otu iiruẹn phọ ongọ itọ mọ bidị omheera yoor uḍighi oḍighi phọ, pọ kụ amem dị mị amhiigh omhiịn idị aZihova rasẹph oḍighom mọ odị esi osighẹ eten iilhogh obughiọm oḍighi phọ odị. Olhoghi amhị akạr kụ aḅaạl iduọn mị aphinhomaan aani bọ bin.

Egina amem bịn abumor phọ omhiigh oselhemhi otu phọ, oselhemhi bọ otu phọ omhạn alhạ i/ten bịn ophạm raghaạph askul aGilead phọ amhunhenhiom bọ 79 siphẹ Assembly Hall phọ aJersey City, unwanyụ aSeptember 8, 1985. Mị ulhoghoma ni idiphọ eboom eepoogh ophinomaam aani abin obughẹ iiḍighi Omhạr phọ dị eego esi agạ ephẹn iilhogh phọ. Ogbaanyạn dị mị amhoọgh apelheghiom odị mị mumoọgh siphẹ oḍighi phọ amhị idiphọ onyọ iilhogh kụ egbi bọ oteẹny amem mọ mị aru bọ Betẹl. Iduọn phọ pọ mị u/legheri mọ aZihova umhooghonaạn ni imhị inhọn ibadị aroopoogh.

Siạ phọ ipẹ eḍighi bọ 1980, ariil arookonhom ḅilhẹ r’aruutu arookonhom u/lọgh ghan eegu osopha Abugbaanhaạn phọ mem dị rokaạph ilọ iḅaạl. Ikạr ghan ekparanhaạn bumarani dị odi r’eghun, loor esi dị abuugboom iiruẹn phọ ibadị amem uḅẹm ghan mọ anhịr ephoph phọ o/mhoọgh elhiom oghaạph idị kookonhom nyodị. Abugboom iiruẹn phọ uutughiạn ghan mọ eḍighi maạr dị u/lọgh bidị iḅaạl eeni bidị komugh obilhẹ obumoọny phọ.

Unwanyụ aDecember 29, 1988, iḅaạl umarani phọ Denise Nicoleau imite bịn ewạ omhunheen mem dị odị amhạr oọny odị. Iyaạr phọ retoghomị ghan bọ iḅaạl isoor ri epu 5.0, kụ oyil arookonhom mọ aḅenhị mọ kolọgh nyodị iḅaạl. Kuolọ umarani phọ Nicoleau o/mheera. Ḍierị phọ aḍiroọr phọ, otu arookonom mọ ughị ni oteẹny otu iiruẹn oḅenhị mọ ongọ bunọ iikpọ olhọgh onyọ umarani phọ iḅaạl. Otu iiruẹn phọ u/naghạn aani onhụ umarani phọ, ḅilhẹ kẹn u/ḅenhị r’oḅenhị umarani phọ Nicoleau obobọ olom mọ ilọ oghaạph phọ, ungọ bịn iikpọ otu arookonom mọ, olhọgh onyọ umarani phọ iḅaạl.

Reteẹny, December 30, bịn olhọgh umarani phọ Nicoleau iḅaạl etigheri idị onyọ umarani phọ, olom mọ r’abunhọn abuọ eghunotu abidị dị orọl aani siphẹ phọ okparaghạ osophoghom. Dule phọ aḍiphẹ phọ, usiphi ni ibadị abuọ eghunotu phọ r’abuniin ikumor awe ookpomhoghan phọ oghị okasaghiọm, bịn ogbạ mọ umhereghạ okitonhom emhinạ  Umarani phọ Nicoleau okparaghạ osophoghom oyil phọ olhọgh iḅaạl phọ. Reteẹny ḍiroọr aSaturday, December 31, arinyạ, asi-TV r’asi-redio emhiigh oghaạph ipẹ emite bọ.

Ḍiroọr aMonday, kụ mị aghị ateẹny oogboom iiruẹn dị apel bidị, Milton Mollen aḅaanhaạn. Mị aghaạph oomo ipẹ emite bọ aagholhomhi aḅenhị nyodị, mọ oḅẹl oogboom iiruẹn phọ angọ otu arookonom mọ iikpọ dị u/pụr unaghạn aani onhụ ayoor. Ogbogh oogboom iiruẹn phọ Mollen aḅẹm mọ elọ ootaany kụ mị aḅilhẹ aghị obọ yoor ooḅeghiọn riphigh phọ ḅilhẹ r’ipẹ olhogh phọ aghaạph bọ. Opoghom ekpịgh oḍighi ayoor epẹ Betẹl, Philip Brumley, udạph aani ni imhị aghị ofịs aMollen dulhe phọ aḍiphẹ phọ. Oogboom iiruẹn phọ amhạgh aani ni Loyạ otu arookonhom mọ oru aani isiphẹ yoor odi bọ. Araghaạph phọ ayoor ibụgh ni iboom. Araghaạph phọ ikpọ ni esi esi dị Umor phọ Brumley agẹ iyaạr ḍinyạ odị ungọ imhị mọ mị upụr “udughe eḍọgh amhị.” Opọ phọ aḍighi ni imạ oroma loor esi dị araghaạph phọ mekpọ esi esi dị mị raagbaghanaạn r’aLoyạ otu arookonhom mọ.

Yoor roogbaghanhaạn esi oniin awạ, kụ Oogboom Iiruẹn phọ Mollen aḅẹm mọ opọ kụ oḅẹl oghaạph dị kopạm ḍierị phọ aḍio phọ. Mem mọ yoor orelhe bọ romite ofịs phọ, Oogboom Iiruẹn phọ Mollen aḅẹm ni mọ aLoyạ otu arookonhom mọ amoọgh ni “oboom oḍighi iḍueneen phọ.” Iphẹn phọ remạ ghan mọ kekparanhaạn ni nyodị iboom oogbaghanaạn r’ayoor. Ipẹ phọ iḍighi ni idị mị alhoghoma mudị aZihova ruḅenhị ghan imhị mọ yoor komoọgh ni akeel. Iḍighi ni iboom iikia omhiịn dị aZihova rusighẹ iyoor kamuneniom ogbi phọ odị.

Yoor urọl li k’eminighạn amem ḍughul phọ aḍiphẹ phọ ookolhobian ghan idị yoor kokaạph ḍieriphọ aḍio phọ. Otu iiruẹn phọ o/kelạn Betẹl aBrooklyn, kụ iḍighi kụ ibadị ayoor abuẹn odi bọ Ekpịgh Iilhogh phọ urelhe ghan ni owol ade bịn osi. Mem dị inya abugboom iiruẹn phọ onhaghạn bọ ipẹ yoor oghaạph bọ, bidị usoph ni mọ otu iiruẹn m’u/ngọ otu arookonhom mọ iikpọ olhọgh iḅaạl onyọ umarani phọ. Ogbogh otu iiruẹn phọ usoph ni ogheelhe Umarani phọ Nicoleau kụ olhọgh olhogh mọ i/kpeanhaạn ongọ itọ mọ oghiọm ghisigh ookonom oye dị u/pụr upuru oye phọ, mọ ipẹ phọ i/ḍeenaan mọ olọgh ni eegu elhiom oye phọ.

Otu iiruẹn phọ apelheghiom bọ epẹ New York umheeraam ni mọ Umarani phọ Nicoleau amoọgh ni elhiom oḅẹm mọ ku/lọgh nyinọ iḅaạl. Ophọn kụ oḅẹl esi inya asighiton dị egbolhomaam oghaạph  iḅaạl dị mị aḍighom aani ghan raghaạph phọ, ruutu iiruẹn kirokirọ dị edi United States. (Miịn igbe phọ “ Asighiton Dị Mowinhogh Ghan Siphẹ Otu-iiruẹn phọ Apelheghiom Bọ Epẹ US.”) Mị maḍighan aani ni kẹn bunhọn asiloyạ ephẹn Betẹl apamạgh raghaạph dị egbolhomaam ilọ ookonhom ibạm anmụny, oḅạm ikpoki apinien, aalhaghi aruutu, ḅilhẹ romaaghị arikpisi dị kodoghoḍi ruutu.

Eḅẹl amem mọ mị azuan bọ anhịr phọ amhị, Dawn, odị aḍighi ekpukele anhịr r’iraạr ibạm anmụny. Odị amhoọgh ni iyaạr dị aḍighi ghan ḅilhẹ kẹn akọy ghan eten. Odị masoman ni ḍikparamineẹn, kụ osopha phọ odị oghiọm aghisigh okumu aZihova uḅeraạn imhị iikiạ. Lhạ phọ 1992, yoor ughị ni Ookpomhoghan Eephugh phọ “Light Bearers” epẹ New York City, kụ mị apuru mughumọ odị k’ubạl li imhị. Alhạ reten bịn yoor aalhạn. Omhoọgh anhịr dị amhoọgh igey asiya r’aZihova ḅilhẹ amhoọgh ezạ eḍighi inmo k’aZihova. ADawn akạr ri ukpẹ imhị igey iikpiạ siphẹ oomo adọl aghuḍum mọ ayoor.—Prov. 31:12.

Yoor aalhạn bọ, ibạm anmụny phọ momạn 11, 13, ḅilhẹ r’16 asiạ. Omhiịn mọ mị aḍighi ni ogey odẹ, mị umhiigha ni loor awaaghị raraạr aḅilhẹ asighẹ aḍighinhom oomo araraạr phọ edi bọ siphẹ arinyạ phọ ayira, dị eghaạph idị kotue oḍighi odẹ anmụny dị anhịr oye phọ amharanhaạn onhọn oye. Ipaanhaạn irọl li idiphọ asiạ phọ rekị bọ, kuolọ olhoghi amhị aḅaạl li loor esi dị ibạm anmụny phọ usighẹ ni imhị idiphọ ogey oyaghirị r’odẹ ephomhoghiạn. Yoor umheera ni mọ arighirị ibạm anmụny phọ ayoor oru ghan k’ayoor, kụ yoor ughelhọm ghan agey bidị idiphọ iḍoọgh dị omhoọgh inyaạm.

Lhạ phọ 2013, aDawn r’amhị uḅuạ ni oghị epẹ Wisconsin olhoghonhaạn aḍighaạgh ophogh odẹ amhị ḅilhẹ odẹ r’onhiin odị dị mokpọ. Iḍighi ni iikia omhiịn mọ u/siemhi eekunha eepoogh aBetẹl phọ amhị. Umhạgh ghan ni imhị oghị ghan olhoghonhaạn aḍighaạgh ogbạ omiteom elhiom ookpomhoghan phọ idiphọ oye dị rakumuan ghan Betẹl ekulha amem.

Unwanyụ aSeptember 2018, mị umhiịn ni mọ ooko amhị mamhiigh ramoọgh iiḅaghamhị. Oyil phọ uukonhom ghan bọ imhị uuḅeghiọn ni imhị aphogh kuolọ o/mhiịn iyaạr phọ ekọm bọ. Onyebel roten, onhọn oyil arookonhom aru aḅẹm mọ mị ukị umiịn oyil dị atuughạ ilọ ighiph. Unwanyụ aJanuary 2019, oye phọ akuamhị ni uuḅeghiọn imhị aphogh kụ aḅẹm mọ mị mamhoọgh ezẹgh dị oghol mọ progressive supranuclear palsy (PSP).

Iraạr aḍughul otu r’eten, mem dị mị rapegh ephegh ozaamiạn aloor, mị umheel li bịn awuna ḍighaạgh elhiom amhị. Mị rapegh ghan ephegh phọ ephẹn k’eghoroghọr amhị. Kụ iḍighi kụ mị ulhegheri ni mọ mị u/moọgh mun inyaạm ophegh ephegh phọ epẹ phọ. Eten phọ ezẹgh phọ ephẹn phọ ekem bọ bịn elheeny oomo aloor amhị iḍighi ni iikia esi amhị, ikọm idị oḅạ, orelhe, ḅilhẹ r’omhịn iyaạr ikparanhaạn imhị.

Olhoghi amhị aḅaạl li iduọn mị asighẹ bọ emhaạr phọ amhị idiphọ onyọ aloyạ alhoghonhaạn ḍighaạgh ookpomhoghan phọ aZihova. Olhoghi amhị aḅaạl kẹn loor esi dị mị m’agẹ ni ibadị arumhuoghaạph dị ariil arookonhom, asiloyạ, ḅilhẹ r’abuọ iilhogh robạl ghan. Mị maḅilhẹ kẹn akiighị riisi angooghị raghaạph ilọ ogbạ omheremhị elhiom mọ awe phọ aZihova omhoọgh bọ osaḅạr arookonhom dị ko/loghạ iḅaạl. Ghalhamọ r’iduọn phọ ni, mị akaạph aani iphẹn aLuk 17:10 aḅẹm bọ mọ: ‘Mị ebenẹ dị iyaạr u/mạn. Mị maḍighi ipẹ isi bọ imị bịn.’